- Detalles
O director xeral de Función Pública convocounos a unha xuntanza da Comisión de Persoal que será o martes 16 de maio, para aprobar a modificación da relación de postos de traballo (RPT) referente ao proceso de funcionarización de postos de persoal laboral da Xunta e a súa clasificación en diferentes escalas/especialidades (bombeiro/a forestal xefe/a de brigada, bombeiro/a forestal-condutor/a motobomba, emisorista-vixilante fixo/a, bombeiro/a forestal, e corpo auxiliar de administración xeral).
Se é do teu interese, podes descargala nesta ligazón. Para achegarnos o que consideres, podes contactar coa CIG.
- Detalles
Despois de semanas dando largas co anuncio das datas de realización do primeiro exercicio para determinados procesos selectivos, por fin a Dirección Xeral de Función Pública tivo a ben anunciar a súa previsión, xa con días concretos. Descargar
Por fin algunhas persoas van ter un horizonte máis ou menos despexado ao ter a data de exame (dous anos despois da publicación da convocatoria).
E mentres, en promoción interna seguimos a agardar (non temos nin o primeiro borrador da convocatoria para negociar).
- Detalles
Reclaman condicións laborais dignas e a recuperación dos dereitos perdidos
Representantes do comité intercentros e dos 4 comités provincias de Política Social compareceron o día 9 de maio en rolda de prensa para denunciar o internamento de doentes con patoloxías psiquiátricas de entre, nalgúns casos, 45 e 50 anos, en residencias de maiores. Advirten de que os centros non están adaptados para esta nova tipoloxía de residentes e que o persoal “nin está formado, nin é suficiente”.
Así o denunciou o comité intercentros que anunciou que ten unha xuntanza convocada coa Consellaría de Política Social o vindeiro día 15 de maio na que agardan que se negocien cuestións que consideran fundamentais. “Esperamos que se chegue a un acordo sobre rateos de persoal nos centros de atención directa ou sobre listas de contratación do persoal substituto, porque teñen chegado a anular vacacións porque non son capaces de cubrir postos como auxiliar de enfermería ou de enfermería” Segundo o comité intercentros o problema é a idade e todo o que iso implica de convivencia entre unha persoa de 80-90 anos e unha de 50. Xunto a isto apuntan as dificultades para enfrontar os problemas que poidan xurdir sen contar coa formación axeitada.
Esta situación agrávase ao non contar con persoal suficiente para facer fronte a carga de traballo que teñen. E é que estes traballadores e traballadoras, ademais de ter que enfrontar unha situación laboral complicada por mor da nova tipoloxía de usuarias e usuarios dos centros, que até o de agora eran só de maiores, teñen que facelo nunhas condicións laborais deterioradas desde hai anos.
Política Social esquece o seu persoal
Para o comité intercentros e os comités provinciais a Consellaría de Política Social “esquécese das súas traballadoras e traballadores”. Neste sentido lembran que no ano 2012 a Xunta de Galiza suspendeu, de facto, o convenio colectivo do persoal laboral da Xunta de Galiza e que, desde esa data, os comités veñen intentando negociar a recuperación de dereitos laborais.
Por fin, despois de que o 18 de abril pediran unha nova xuntanza coa consellaría e tras celebrar o pasado día 3 de maio unha asemblea dos 4 comités provinciais, recibiron a convocatoria para unha xuntanza coa administración. “Alegrámonos, pero isto non evita que deamos a coñecer o que está a acontecer co persoal de atención directa”, que é case todo, persoal funcionario da Xunta de Galiza.
Demandas a Política Social
Por iso o que lle demandan á consellaría é que senten a negociar as rateos de persoal e as compensacións por traballar domingos e festivos. Lembran que o SERGAS acaba de asinar un acordo de compensacións cando “na Consellaría de Política Social traballamos gratis os domingos, festivos, 24 de decembro ou 31 de decembro, entre outros. Denuncia que até lles negan a compensación dos días 24 e 31 de decembro, que este ano caía en sábado, cando a todo o persoal da Xunta de Galiza lle dan 2 días de asuntos persoais”.
Ademais, demandan a adaptación dos centros e do persoal ás novas persoas usuarias dos mesmos e a adaptación, tamén, das listas de contratación ás características dos centros de Política Social.
- Detalles
Persoal do servizo de gardacostas de Galiza continuou o mércores 10 de maio coas mobilizacións para reclamar a súa inclusión no réxime especial do mar e que se lle recoñezan coeficientes redutores da idade de xubilación, ao igual que xa ten recoñecido o persoal que realiza tarefas de salvamento e vixilancia a través das empresas privadas. Desta volta, realizáronse dúas concentracións: a primeira na Delegación do Goberno na Coruña e a segunda en Vigo diante da Consellaría do Mar, como administracións responsábeis desta situación.
Dende a CIG salientamos que a exclusión deste colectivo do réxime especial do mar constitúe unha clara discriminación que o Goberno e o Instituto Social da Mariña exerce contra este persoal unicamente por ser funcionarias e funcionarios públicos. Denunciamos que o ISM fai unha lectura interesada da Lei de Seguridade Social para excluílo, xa que polas súas funcións, este persoal tiña que ser protexido dentro deste réxime.
Denunciamos tamén que nin o Goberno español nin a Xunta achegan unha solución para este persoal que traballa na vixilancia e salvamento nas costas galegas, a quen se lle esixen os mesmos requisitos para o embarque que ao resto do persoal da empresa privada ou o persoal laboral da Xunta pero son excluídos pola súa condición de persoal funcionario.
O ISM esíxelle iguais requisitos para embarcar (como o recoñecemento médico específico ou os requisitos formativos) pero ao mesmo tempo denégallos. Cumpren coas esixencias do réxime especial do mar pero o ISM exclúeos dos beneficios dese mesmo réxime.
Dende a CIG levamos xa un ano loitando para a inclusión no REMAR dos funcionarios/as do servizo de gardacostas de Galiza, e a aplicación de coeficientes redutores para a xubilación. Non se entende que con 64 anos se estea traballando cos mesmos riscos laborais que o persoal da empresa privada coa que se comparte traballo, medios e embarcacións e que se xubila case dez anos antes.
Nin o Goberno español nin a Xunta dan solución
Criticamos que nin a conselleira do Mar nin o Goberno español dan unha saída a este persoal que xa leva moitos meses mobilizándose sen pausa. Hai xa máis de catro meses que a CIG solicitou unha reunión co delegado do Goberno que aínda non foi atendida. Xa basta de escusas, queremos unha solución xa!
Por parte da Consellaría do Mar, mais do mesmo. Mestura o seu persoal con outros conflitos e non aclara nada, non queremos que nos use como baza de enfrontamento político, queremos que inste unha solución xa para a protección do seu persoal.
- Detalles
A Consellería de Medio Rural traslada a sua Oficina Rural (antes oficina agraria comarcal-OAC) do centro de Verín para o Polígono de Pazos afastando o servizo publico da cidadanía, que tampouco ten transporte público
Apenas faltan uns días para o traslado ás novas instalacións dos servizos agrarios comarcais no polígono de Pazos. Esta nova localización da oficina rural non contenta nin a persoal nin a usuarios, que se teñen que trasladar perdendo a proximidade e empeorando o servizo publico esencial que hoxe a vila Verín.
A falta de transporte público cara este polígono complica as tramitacións sinxelas que hoxe se fan directamente, sen cita previa e apenas nunha hora. Como pode ser que as persoas teñan que desprazarse en taxi para solicitar un carné de aplicación de fitosanitarios, volver a Verín para pagar as taxas e logo ir por segunda vez a oficina rural do polígono? Outras tramitacións como dar de alta un galiñeiro, solicitar un permiso de corta ou queima, calquera trámite relacionado co viñedo, etc, vaise complicar de xeito insostible para a cidadanía.
O portelo da Xunta en Verían, a oficina agraria comarcal da Alameda funciona na práctica de rexistro xeral da Xunta, e as persoas que necesitan facer calquera trámite coa Xunta de Galiza acoden a estas oficinas, polo que non só se trasladan os servizos agrarios senón que Verín queda sen a súa oficina pública de rexistro.
Perde o servizo público e gañan as xestorías privadas co custe engadido para o/a administrado/a. Esa é a realidade dun futuro próximo. E non valen as campañas de propaganda do conselleiro de Medio Rural que mentres vende oficinas móbiles traslada as oficinas tradicionais ben situadas e con implantación social a un polígono industrial sen accesos e sen servizos públicos.
Asi se a todo isto sumámoslle a obriga acelerada de administración dixital que implanta esta consellería nos trámites do rural, as oficinas agrarias teñen os días contados, e este traslado é o primeiro paso para o seu desmantelamento.
Na CIG opoñémonos ao traslado desta oficina e solicitamos unha volta ao sentidiño da Consellería do Medio Rural, deixando a oficina onde está, na Alameda de Verín (Praza de García Barbón), e que ademais se promova a atención directa ás persoas usuarias, que son na maior parte das veces persoas de idade avanzada con menor acceso as tecnoloxías e a mobilidade.
- Detalles
O director xeral de Función Pública convocounos a unha xuntanza da Mesa Xeral de Empregados Públicos que será o xoves 11 de maio, para tratar a modificación da relación de postos de traballo (RPT) referente ao proceso de funcionarización de postos de persoal laboral da Xunta e a súa clasificación en diferentes escalas/especialidades (bombeiro/a forestal xefe/a de brigada, bombeiro/a forestal-condutor/a motobomba, emisorista-vixilante fixo/a, bombeiro/a forestal, e corpo auxiliar de administración xeral).
Se é do teu interese, podes descargala nesta ligazón. Para achegarnos o que consideres, podes contactar coa CIG.
- Detalles
O martes 9 de maio tivo lugar unha xuntanza da Comisión de Persoal na que se trataron os seguintes asuntos: 1) Lei de Igualdade; 2) RPT de Infraestruturas e Mobilidade; 3) RPT de Amtega. Dentro do punto de Rogos e preguntas, o director xeral de Función Pública deu información de: procesos selectivos, Acordo FISP, seguintes RPTs, negociacións de xornadas “especiais”.
LEI PARA A IGUALDADE EFECTIVA DE MULLERES E HOMES DE GALIZA
O director xeral da Función Pública (DXFP) informa de que non hai cambios respecto da Mesa Xeral, agás algunha corrección técnica por proposta da Asesoría Xurídica: menciona que algún artigo que afecta ao persoal pasará a formar parte dunha disposición adicional que modificará a Lei do emprego público de Galiza (LEPG).
Para a CIG esta Lei non achega novos dereitos respecto da lexislación xa existente, non innova nin afonda no camiño da igualdade, co que se queda nunha mera declaración de intencións. Debería recollerse nunha única Lei de igualdade todos os dereitos da diversidade sexual e de xénero que existen hoxe na nosa sociedade. Tampouco vai acorde co Plan de igualdade e co Protocolo de acoso que se está a negociar.
A proposta queda aprobada co voto en contra de CIG, e co voto a favor de CCOO e UGT. Pola súa parte, o CSIF non o ten claro e comunicará o voto posteriormente.
RELACIÓN DE POSTOS DE TRABALLO (RPT) DA CONSELLERÍA DE INFRAESTRUTURAS E MOBILIDADE
A pesares de que recibimos o informe de orzamentos tan só 5 minutos antes de comezar a sesión da Comisión de Persoal, a CIG vota a favor da proposta. O mesmo votan CCOO, CSIF e UGT.
RELACIÓN DE POSTOS DE TRABALLO DE AMTEGA
Igual que coa anterior, recibimos o informe de orzamentos tan só 5 minutos antes de comezar a CP, o que é unha falta de respecto. A maiores, nesta proposta amortizan prazas que din necesitar (a propia Amtega fai constar na memoria da proposta, que necesitan os postos). E seguen coa apertura a docentes do posto de xerente de proxectos a docentes, e destrúen postos de traballo para financiar a súa creación.
A proposta queda aprobada co voto en contra de CIG, CCOO, CSIF e UGT.
ROGOS E PREGUNTAS
Previsión de seguintes RPTs: Esta semana remitirán convocatoria para Mesa coa RPT de funcionarización de MR, e para o Comité Intercentros pola RPT de Augas e posteriormente para Mesa. Prevé xuntanzas este venres, luns e martes.
Acordo Farmacéuticos/as Inspectores/as de Saúde Pública (FISP): os sindicatos xa enviamos alegacións, pero non hai movementos, e o persoal está intranquilo, disposto a ir á folga. Queremos saber cales son as previsións. > DXFP: esta semana tentarán estudar as alegacións e enviarán un novo texto. Tentarán facer a remisión esta semana. Darán un novo prazo de alegacións.
Proceso selectivo A2, escala técnica de seguridade e saúde no traballo, especialidades de seguridade no traballo e de hixiene industrial convocado no 2019. Os exames foron en xuño e xullo de 2022. A presentación de méritos fase de concurso foi en xaneiro de 2023. Agora mesmo está pendente de publicación da baremación provisional da fase de concurso. Cando teñen pensado resolver este proceso selectivo? > DXFP: avanzando. Farán apertura de prazo de documentación.
Procesos selectivos coa relación de aspirantes que superaron o proceso xa publicada (marzo/abril) e están pendentes de elixir destino:
- I-5.Veterinarios e A1.Veterinarios > DXFP: mañá remata o prazo para presentar documentación
- A2.Educadores e A2.Traballo social > DXFP: nun dos dous procesos (non lembra cal) están pendentes de admitir ou non o recurso dunha persoa, co que cambiaría o resultado.
- C2.Auxiliares clínica > DXFP: entraron 4 novas persoas por falta de titulación de 4 aprobados e remata o prazo a finais de mes
Negociacións de xornadas especiais e outras cuestións: nos vindeiros días (esta semana ou seguinte) convocarán aos sindicatos para negociar unha proposta de acordo por diversos asuntos (xornadas penosas e nocturnas, xornadas de domingos e festivos, etc.)
- Detalles
No DOG do 08/05/2023 publican a Orde do 26 de abril de 2023 pola que se regula o procedemento de integración como persoal laboral da Xunta de Galiza do persoal laboral fixo procedente do Consorcio Galego de Servizos de Igualdade e Benestar (código de procedemento AP100A).
Poderá exercer a opción para se integrar como persoal laboral da Xunta de Galiza o persoal laboral do CGSIB, sempre que reúna os seguintes requisitos:
a) Ter formalizado un contrato laboral fixo coa entidade de procedencia, celebrado despois de ter pasado un proceso de selección realizado baixo os principios constitucionais de publicidade, mérito e capacidade.
b) Ter a titulación establecida no anexo II e cumprir os demais requisitos exixidos para o acceso ao grupo e a categoría de homologación do Convenio colectivo único para o persoal laboral da Xunta de Galiza.
c) Estar en situación de servizo activo ou en situación que orixine dereito á reserva de praza ou posto.
A solicitude de integración dirixirase á Secretaría Xeral Técnica da Consellería de Política Social e Xuventude e realizarase no prazo de 15 días hábiles contados a partir do seguinte ao da publicación da presente orde no DOG, segundo o modelo de solicitude que se xunta no anexo I.
O posto de traballo ao que se adscriba o persoal interesado será o mesmo que viña desempeñando no momento da solicitude de integración ao abeiro do correspondente contrato de traballo como persoal laboral fixo da entidade de procedencia.
As notificacións electrónicas recibiranse pola sede electrónica da Xunta de Galiza e a través do Sistema de notificacións electrónicas de Galicia-Notifica.gal, con avisos da posta á disposición das notificacións á conta de correo electrónico e/ou teléfono móbil que consten na solicitude.
O persoal laboral fixo do CGSIB que non solicite a súa integración ou, unha vez solicitada, renuncie voluntariamente a ela, así como as persoas solicitantes que non cumpran os requisitos para que aquela se produza, manterá o réxime xurídico do persoal ao servizo do Consorcio establecido nos seus estatutos adicional terceira e no ordenamento laboral.
- Detalles
Na Mesa Xeral de Empregados Públicos do 05/05/23 obtivemos a seguinte información.
Calendario dos exames: nos vindeiros días publicarán na web de FP o calendario dos 92 procesos selectivos que están convocados e que foron ao Consello da Xunta de onte. As datas son orientativas, os exames nunca van ser antes desa data.
Tribunais procesos selectivos: nos vindeiros dous meses publicarán os tribunais que están pendentes.
Listaxes definitivas de admitidos/as dalgúns dos procesos selectivos cuios exames van ser en xuño-xullo: Sairán tamén nos vindeiros días.
Procesos de estabilización de concurso-oposición e de concurso de méritos:
- Na semana que vén ou na seguinte informarán de cando van saír as listaxes de admitidos/as.
- A idea de FP é rematar os procesos de libre o antes posible, logo o concurso de méritos e finalmente o concurso-oposición da lei 20-21.
- Di Función Pública que teñen que comezar a facer os exames da estabilización da lei 20-21 coa maior prontitude porque son moitos procesos e en decembro de 2024 ten que estar todo rematado.
Concurso de traslados dalgunhas escalas: iranse tramitando paralelamente aos procesos selectivos. FP non se atreve a dicir cales.
PI horizontal (funcionarización) do persoal laboral que obtivo praza nos últimos procesos selectivos: intentarán ter negociadas as bases antes das vacacións de verán, falan de xuño.
PI das últimas OEPs: negociación das convocatorias en setembro.
Previsión do remate dos proceso de auxiliares de enfermería: houbo catro renuncias, polo que o tribunal ten que tirar da lista de aprobados e abrir un novo prazo para presentar a documentación. Agardan que non haxa máis incidencias
Proceso selectivo de gardacostas: pendente da baremación da fase de concurso.
Proceso selectivo de bombeiros forestais: di FP que houbo sobre 400 reclamacións, polo que non pode dar polo de agora un prazo aproximado.
Prazo extraordinario da carreira profesional: valorarán abrir un novo prazo para aquelas persoas que por diferentes motivos non poideron solicitala no período anterior.
- Detalles
A enquisa que di que é “non vinculante” marca salarios e funcións individualizando as condicións de traballo e condicionando unha posterior negociación colectiva na que se garantan os dereitos laborais.
A Consellería do Medio Rural pretende a división do persoal funcionario, axentes e técnicos, en dúas direccións xerais mudando o sistema e carga de traballo e a estrutura territorial e funcional, rebaixando salarios e empeorando as condicións de traballo.
A nova estratexia da Consellería do Medio Rural: enviar unha enquisa ao persoal para saltarse a negociación colectiva
Xa avanzamos o rexeitamento da enquisa por parte da CIG, que sinala condicións laborais e funcións sen terse aberto sequera un proceso de negociación onde se traten as bases da reestruturación: a carga de traballo, a distribución territorial e os dereitos laborais. Coa enquisa, Medio Rural individualiza as condicións laborais dos postos, con rebaixas salariais para que nos pelexemos entre compañeiros: e así somos máis febles.
Persoal a dispor a cambio de migallas
Xa nos consta que Medio Rural ten a persoal seducido coa promesa dunha nova especialización no servizo de incendios. O fin xustifica os medios, e todo lles vale para crear unha nova elite ao servizo directo e permanente das direccións xerais.
Abandonados dende hai anos e agora veñen cunha reestruturación dos distritos
Sen concursos, sen regulamento, sen convocar oposicións, sen avances no grupo B e pretenden impoñer unha división cargándose os Acordos de condicións de traballo vixentes.
POR QUE A CIG REXEITA A ENQUISA E AS RAZÓNS POLAS QUE NON DEBES FACELA
1. Queren confundirnos para que pensemos que as condicións que poñen na enquisa son definitivas e que foron negociadas.
2. Pretenden individualizar as relacións laborais. Se respostas a estas validando. Esta actuación da consellería é unha práctica antisindical que pretende cargarse a negociación colectiva vulnerando este dereito fundamental previsto nas leis e regresando o século XIX.
3. Non aportan as organizacións sindicais unha proposta de reestruturación coa información básica necesaria: datos de carga de traballo, distribución territorial e funcional, mobilidade, centro de referencia, un plan de emprego que garanta a viabilidade dos postos e do persoal que os ocupa así como o dereito ao salario íntegro e a localidade de adscrición dos postos.
4. A enquisa marca unhas condicións laborais que van en contra do disposto nos Acordos de condicións de traballo do persoal técnico e axentes ambientais que conseguimos tras a folga e loita en unidade.