A política de auteridade do Goberno de Feijóo, e máis en concreto na Sanidade, contrasta cos diversos trapicheos que brotan da negociación colectiva da modificación na Relación de Postos de Traballo da consellaría de Sanidade e Sergas.
Detrás dunha política de auteridade co persoal da administración agóchanse diversas trampas de trato de favor para as amizades, chegando nalgúns casos á vulneración da propia normativa. A CIG-Autonómica, con motivo da negociación que se está a levar das RPTs desta consellaría e do Sergas, fai a seguinte denuncia pública de diversas irregularidades que se dan nestes organismos en materia de persoal:
Existen indicios de que tanto a vicexerente do Sergas, María Eugenia Lado Lema, coma a subdirectora de Desenvolvemento e Seguridade Asistencial, Mercedes Carreras Viñas, non cumpren cos requisitos necesarios para ocupar estes postos. Da primeira delas non consta que sexa empregada pública e que accedera á praza na forma legalmente establecida e da segunda cónstanos que é enfermeira (equivalente a un subgrupo A2; subgrupo que non pode ocupar postos de subdirección) no sistema estatal de Saúde. Levan ocupando estes postos dende a entrada do goberno Feijóo
Pode ocupar un posto de secretaria (neste caso no gabinete) persoal subalterno? Aínda que se teña un carné do PP cada quen ten que traballar no que lle corresponde.
Hai persoal interino perpetuo. Non é xusto que nesta época de caza ao empregado público haxa xente “privilexiada” á que se lle faga calquera chanchullo para que se manteña no seu posto. Hai algunha persoa que leva “tendo sorte” dende fai anos e anos. Moitas e moitos das persoas que aprobaron o A1 nalgún momento botaron en falta algunha praza desta consellería, nomeadamente na Secretaría Xeral Técnica.
Hai persoal ocupando postos a dedo (Libre Designación) que levan anos cubertos de xeito temporal. Esta xogada permítelle ao titular (coa conivencia do seu superior) blindar o seu posto de orixe, que pode igualmente cubrirse a dedo de xeito temporal, creando cadeas de favores e postos apalancados. Tristes exemplos son tres das catro xefaturas territoriais desta consellería, ocupadas en comisión de servizo, ou sexa que a Conselleira de Sanidade non ten persoal axeitado para prover os postos dos seus máximos responsábeis nas provincias da Coruña, Lugo e Ourense, ou non hai persoal funcionario disposto a asumir estes postos de xeito permanente.
Existen ducias e ducias de persoal estatutario ocupando postos de traballo nos Servizos Centrais desta consellería e do Sergas. Este persoal vén trasladado coa figura dunha orde de servizo, ou sexa, que vén a dedo procedente dos hospitais e seguen cobrando polo hospital ou pola xerencia de primaria e non ocupan ningún posto da RPT. Adoitan, ademais, a ser o persoal que ocupa despois a maioría dos postos de xefatura, nun abuso constante das LDs.
A CIG-Autonómica solicitoulle á consellería:
Unha relación do persoal estatutario que traballa en Sanidade e no Sergas sen ocupar unha praza de RPT mediante unha Orde de Servizo; estas prazas deberían de crearse xa que se entende que son necesarias.
A situación administrativa de todo o persoal do que temos indicios de que ocupan prazas de maneira irregular, incluídas tamén a vicexerente do Sergas e a subdirectora antes mencionada.
Por último, instamos á Consellería de Sanidade a cumprir a normativa vixente en materia de provisión de postos de traballo, de acordo coas RPT´s, e que toda a información que se solicita sexa remitida o máis axiña posible, en aras da transparencia que predica o goberno da Xunta.