O Edificio Administrativo da Xunta de Galicia en Ourense ten unha saída posterior na entreplanta, correspondente á zona do salón de actos e á sala de prensa, que consta dunha dobre porta e no exterior, unha reixa pechada.

Na avaliación de riscos e plan de acción (31/01/2013) do edificio establécese que:

“segundo se indica no Art. 8 Características das portas e dos corredores, da CPI-96, ou no Art. 6 da Sección SI 3 Evacuación dos Ocupantes do Código Técnico da Edificación CTE se debe de adecuar á saída posterior do edificio, na entreplanta, como saída de emerxencia.”

O prazo indicado no plan de acción para aplicar esta medida é de 3 meses.

Ademais na avaliación de riscos resaltábase que “en xeral, os produtos de limpeza gárdanse no vestíbulo previo a un arquivo, ao cal se accede desde o corredor de acceso aos aseos, en cada planta. Neste vestíbulo está o cadro eléctrico xeral de cada planta.”

Neste caso como medidas correctoras o plan de acción obrigaba a:

“Dotación de local ou armario para os produtos de limpeza, en cada planta. Dotación de vestiario ou armario individual para o persoal de limpeza, en cada planta ou suficiente no edificio.”

Seis anos despois, estas medidas están sen aplicar poñéndose en grave perigo a vida dos traballadores e usuarios do edificio.

Tamén hai un mes, tras unha denuncia de persoal do edificio, comprobamos que nas caixas de urxencia faltaba material e o que había estaba caducado, algún desde o ano 2015. O Real Decreto 486/1997, de 14 de abril, polo que se establecen as disposicións mínimas de seguridade e saúde nos lugares de traballo obriga a revisión periódica e reposición do material de primeiros auxilios tan pronto como caduque ou sexa empregado.

Os delegados de prevención de riscos da CIG no Comité de seguridade e saúde laboral do Edificio Administrativo temos solicitado aos responsables da administración en numerosas ocasións o arranxo doutros problemas que tamén continúan sen solucionar:

• As malas condicións do persoal do terceiro andar (Cultura).
• Problemas de seguridade no sistema de peche dos ascensores.
• Medicións de gas radon.
• Adaptacións necesarias para facer efectiva a accesibilidade universal no edificio administrativo.
• As malas condicións do Rexistro e Información.
• A revisión da avaliación de riscos, que estaba prevista para o ano 2018, e continúa sen facerse.

No resto de provincias a Xunta conta cun centro administrativo único. En Ourense existen máis de 20 centros administrativos espallados pola cidade. Todos con moitas deficiencias e carencias: locais sen luz natural, problemas de climatización, falta de espazo, humidades, vertidos, síndrome de edificio enfermo, sen medidas de emerxencia, con problemas de radon... Edificios que ademais incumpren a lei de accesibilidade universal.

Cómpre un centro de atención aos cidadáns no que poidan presentar solicitudes, escritos e comunicacións, informarse acerca dos servizos ofertados ou recibir asistencia no uso de medios electrónicos os interesados que así o soliciten (tal como obriga a Lei 39/2015).

Os delegados da CIG en Ourense continuamos na loita para defender os dereitos dos traballadores e protexer a súa saúde.