Novas por contido

A CIG Autonómica denuncia o establecemento unilateral de quendas continuadas que van dende xornadas de 24 horas e 15 días ininterrompidos no persoal de servizos sociais do Consorcio Galego de Igualdade e Benestar dependente da Consellería de Política Social.

Ao longo da maña do mércores 25, e por medio de avisos por WhatsApp e ameazas da directora de area en chamada telefónica, as direccións modificaron as condicións de traballo ao persoal do Consorcio. Entre as modificacións está o aumento de quendas de ata 24 ou 38 horas de xornada e ata 15 días continuados, e cambio de centro de traballo públicos ou integrados dun día para outro. Entendemos que a función destas traballadoras e traballadores é vital e importantísima dado a crise sanitaria polo COVID 19 e o caos nas residencias de maiores de Política Social e nas privadas, pero ser servizo esencial non pode conducir ao abuso.

A improvisación é de tal magnitude que ante a negativa dalgunha compañeira de presentarse esta mesma tarde a traballar noutro centro de traballo dúas horas antes sen coñecer as condicións laborais, a Xerencia do Consorcio resposta cunha instrución por escrito coa ameaza que de non facelo pode ter consecuencias penais. Ameaza con responsabilidade penal pero non proporciona un horario, un Plan de Prevención, indicación de garantías sanitarias ou con que EPI van traballar: quen é o criminal aquí?

Unha modificación substancial das condicións laborais escura e abusiva

Nin a CIG, como representación sindical da maioría do persoal, nin os comités de empresa nin o comité intercentros, teñen constancia "oficial" desta situación esperpéntica. O estado de Alarma non é escusa para pasarse toda a lexislación laboral e de prevención de riscos laborais polo forro e ESIXIMOS a negociación urxente das condicións que vai ter o persoal, e que mentres isto non se negocie, que non se modifiquen de xeito unilateral e sexan concorde o V convenio.

Non se teñen en conta ás persoas traballadoras sensibles ou con fillas/os menores

O consorcio manifesta que o estar excluídos os servizos sociais da resolución do 15 de marzo de 2020 da Secretaría Xeral Técnica da Consellería de Presidencia, Administracións Públicas e Xustiza (DOG nº 51 do 15 de marzo)… que non hai dereito nin a xustificación de ausencia por desamparo do menor, abandono de maiores ao cargo nin a non facer estas funcións por ser persoal especialmente sensible (enfermidades crónicas ou patoloxías previas, embazadas…). Unha verdadeira vergoña. Se ti estás nesta situación, ponte en contacto coa CIG. Non permitamos o abuso.

Queremos coidar ás nosas persoas maiores con seguridade, sen arriscar a súa saúde, a nosa ou a das nosas familias

Por iso volvemos a solicitar e recordar que se traballe coas garantías de seguridade e saúde laboral necesarias, os equipos de protección adecuados perante o risco de contaxio e con quendas racionais establecidas con criterio sanitario tanto para o persoal usuario e para o persoal empregado publico e as súas familias. E avisamos: o persoal poderá suspender a actividade se observa un perigo grave e inminente para a súa saúde como deixa claro o artigo 21 da Lei de prevención de riscos laborais. Que costa facer as cousas ben?

Outras novas recentes

Domingo, 23 Marzo 2025

A «lotería» dos cursos de linguaxe administrativa da EGAP

Anos, e mesmo décadas, para conseguir completar os dous niveis (medio e superior) de linguaxe administrativa galega: este é o panorama ao que nos enfrontamos o persoal da Administración xeral da Xunta e entes instrumentais, dada a reducidísima oferta de prazas ano tras ano. A EGAP ten por lei entre os seus fins a difusión e a normalización do idioma galego na...
Mércores, 26 Marzo 2025

Boletín CIG-Saúde Laboral nº 59 - marzo 2025

Boletín do Gabinete Técnico Confederal de Saúde Laboral da CIG. Neste número: Riscos psicosociais e saúde mental no traballo: Que son os riscos psicosociais? Que importancia ten o problema? Que se pode facer para previr e xestionar os riscos psicosociais? Prevención e xestión dos riscos psicosociais relacionados co traballo Apoio ao persoal que se enfronta a retos...
Xoves, 27 Marzo 2025

Estase a restrinxir o teletraballo ás bravas?

A prestación de servizos na modalidade de teletraballo na Administración da Comunidade Autónoma de Galiza funcionaba ata o de agora con relativa normalidade agás a xa endémica opacidade da Xunta e a reiteración do incumprimento da convocatoria das Comisións de Seguimento para que as organizacións sindicais poidamos exercer un control.   Mais nos últimos días están a chegar...