O pasado venres 10 de outubro a CIG Autonómica mantivo unha reunión coa consellería de Educación pola situación do persoal non docente dos centros de ensino e as escalas de cociña. Esto foi despois de moitas solicitudes, e de ser necesario chegar á mobilización e o conflito, cunha manifestación en Compostela a finais do curso pasado e as concentracións en todos os departamentos territoriais dependentes da Consellería neste comezo de curso.
Nesta xuntanza puxemos enriba da mesa toda a problemática que existe nos centros de ensino e que o persoal nos vén transmitindo dende hai anos. Toda unha batería de medidas que atinxen aos diferentes colectivos que forman o persoal non docente, e que dende a CIG levamos recompilando dende fai tempo de cara a abordar un acordo marco que non pode agardar máis.
Indicámoslle que non estamos conformes con que cada centro funcione segundo as directrices do equipo directivo do momento e que non podemos consentirse que cando haxa cambios nese equipo tamén cambien as condicións do persoal arbitrariamente. Por iso é imprescindible negociar un acordo de condicións de traballo e funcións que sexan de aplicación a todos o centros similares por igual, e non que cada centro queira establecer as súas propias funcións e criterios, que converten a esta consellería nunha especie de tómbola para o persoal non docente, que dependerá da sorte en función do centro ou do equipo directivo que respecte os seus dereitos. E para isto solicitámoslle que convocaran a todas as organizacións sindicais a unha mesa de negociación.
A CIG toma novamente a iniciativa ante unha situación de abuso que está a padecer o persoal de administración e servizos dos centros de ensino, e por iso forzamos esta xuntanza, para comezar o camiño do diálogo. Entendemos, e así llo transmitimos, que é necesario abordar unha revisión de toda a normativa que actualmente se aplica (acordo persoal subalterno, ratios, comensais, itinerancias...) xa que algunhas teñen máis de 30 anos e as máis recentes máis de 12 anos, e tamén é preciso definir as competencias, funcións e condicións de traballo do persoal dos centros de ensino.
Outro punto clave para nós é a necesidade urxente de poñerlle solución á situación que padece o persoal responsable das cociñas, que tras a recente funcionarización sufriu unha rebaixa profesional sen precedentes e a día de hoxe está a facer funcións de xefatura de cociña encadrado na de auxiliar de cociña, requiríndoselles de forma fraudulento a titulación de técnico/a de cociña. Admitiron o erro e deixámoslle claro que a única solución é encadrar as escalas segundo a titulación requirida para o acceso como laborais e de acordo coa LEPG e o EBEP entendendo que é necesario facelo na Lei de medidas que está a piques de abordarse, polo que lle solicitamos que a consellería de Educación faga as xestións necesarias coa de Facenda.
A CIG quere unha administración moderna e profesionalizada, polo que avogamos pola desaparición da Agrupación Profesional e unha revisión dos encadres das escalas.
A consellería solicitounos tempo para estudar as nosas propostas e convocar unha mesa de negociación. Darémoslle un tempo prudente para que convoquen a negociar a todos os sindicatos, pero temos claro que se non actúan, seguimos.
