- Detalles
No DOG do 23/01/2023 publican:
- RESOLUCIÓN do 20 de xaneiro de 2023 pola que se fai pública a modificación dos temarios que rexerán nos procesos selectivos para o ingreso no corpo de xestión da Administración xeral da Comunidade Autónoma de Galiza e para o ingreso no corpo facultativo de grao medio de Administración especial da Administración xeral, subgrupo A2, correspondentes aos procesos de estabilización derivados da Lei 20/2021, do 28 de decembro, de medidas urxentes para a redución na temporalidade no emprego público.
- RESOLUCIÓN de 20 de xaneiro de 2023 pola que se fai pública a modificación dos temarios que rexerán nos procesos selectivos para o ingreso no corpo administrativo da Administración xeral da Comunidade Autónoma de Galiza, subgrupo C1, para o ingreso no corpo de axudantes de carácter facultativo de Administración especial da Administración xeral, subgrupo C1, ou para o ingreso no corpo de técnicos de carácter facultativo, grupo B, e para o ingreso nas categorías do grupo III de persoal laboral fixo do V Convenio colectivo da Xunta de Galiza, correspondentes aos procesos de estabilización derivados da Lei 20/2021, do 28 de decembro, de medidas urxentes para a redución na temporalidade no emprego público.
- Detalles
No DOG do 23/01/2023 publican:
- RESOLUCIÓN do 20 de xaneiro de 2023 pola que se modifican as resolucións de 22 de decembro de 2022 polas que se convocan os procesos selectivos extraordinarios de estabilización derivados da Lei 20/2021, do 28 de decembro, pola quenda de acceso libre e mediante o sistema de concurso, para o ingreso nos distintos corpos, escalas e categorías da Administración xeral e da Administración especial da Administración xeral da Comunidade Autónoma de Galiza.
- RESOLUCIÓN do 20 de xaneiro de 2023 pola que se modifican as resolucións de 22 de decembro de 2022, polas que se convocan os procesos selectivos extraordinarios de estabilización derivados da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso nos distintos corpos, escalas e categorías da administración xeral e da administración especial da administración xeral da Comunidade Autónoma de Galiza.
Ante as dúbidas xurdidas na interpretación das bases das convocatorias dos procesos selectivos extraordinarios de estabilización derivados da Lei 20/2021, do 28 de decembro, convocados mediante o sistema de concurso e concurso-oposición, procédese a modificar as bases publicadas e a corrixir os erros detectados.
Para garantir a prestación dos servizos en condicións de seguridade e protexer a saúde do empregado publico, para as escalas/especialidades e categorías vinculadas ao servizo de prevención e defensa contra incendios forestais e ao servizo de gardacostas de Galiza, engadese unha/s proba/s física/s.
Dado que o prazo de presentación de solicitudes de participación nos procesos selectivos extraordinarios de estabilización iniciouse o 16 de xaneiro e que as modificacións que se engaden ás bases son de carácter esencial, en aras de garantir a igualdade no acceso e para evitar situacións de indefensión, considérase necesario ampliar o prazo de presentación de instancias ata o día 17 de febreiro (incluído), ao abeiro do disposto no artigo 32 da Lei 39/2015 de 1 de outubro, do procedemento administrativo común das administracións públicas.
- Detalles
O 19 de xaneiro de 2023 Función Pública colga a resolución para o acto de elección de destino do corpo auxiliar. Estamos a falar de procesos convocados no 2019 e principios do 2020. Algo máis de 3 anos para resolver un proceso e aínda non rematou!
No caso da promoción interna, levan esperando dende xuño do 2022 no que saíu o listado de persoas aprobadas. E a maiores da dilación inxustificable do proceso os postos para ofrecerlles en destino provisional son 339 para 332 aspirantes (13 de promoción interna e 319 de acceso libre). Así que isto vai ir moi xusto para todo o mundo.
O día 20 deste mes tamén se publicou no DOG o acto de elección de destino dos titulados de grao medio, categoría 007 do grupo II.
Pero... e o resto de corpos, escalas e categorías?
Pois hai que lembrar que seguen estancados pola ineptitude de Función Pública moitos outros procesos, algún deles cun número de aspirantes considerable, como por exemplo os 205 aspirantes que superaron o proceso de subalternos.
O 28 de novembro de 2022 publicouse no DOG a relación daqueles que superaron o proceso selectivo que se convocou en marzo de 2019. Hai case 4 anos!! e seguen á espera de que o director xeral reaccione a estímulos. Moitas destas persoas están no paro esperando a traballar despois de superar unha dura oposición.
O mesmo sucede co proceso de ordenanzas do grupo V, con varias especialidades de incendios forestais, Bioloxía,etc.
E tamén se falamos das escalas da OEP Social temos o caso de Enfermería, Auxiliar de enfermería, Educadores, Traballo Social e Psicoloxía onde aínda están na fase de baremación provisional da fase de concurso; e Medicina, Fisioterapia e Terapia Ocupacional, onde xa saíu o listado de aprobados e seguen á espera de destino. E todos son procesos convocados no 2019.
É un escándalo maiúsculo que segan mantendo despois de 13 anos un director xeral que demostra unha xestión MOI ineficaz.
Dende a CIG esiximos QUE SE RESOLVAN XA OS PROCESOS SELECTIVOS PENDENTES!!
- Detalles
A Xunta aprobou na Comisión de Persoal do martes 17/01/23 uns criterios que modifican as bases das convocatorias dos procesos de estabilización derivados da Lei 20/21. O director xeral da Función Pública (DXFP) pretendeu que os sindicatos votáramos a favor dunha proposta de “Acordo” que non tiñamos polo que non puidemos analizala minimamente. A CIG (e a CSIF) negámonos a votar a cegas. CCOO e UGT si o fixeron: a favor.
Nesta última semana a CIG traballou arreo e seguiu a aportar máis de trinta cuestións que necesitaban arranxo ou aclaración para o correcto desenvolvemento dos procesos selectivos de estabilización. Algunhas melloras que propuxemos foron adiante, outras non, pero finalmente a Xunta decidiu argallalas con formato de “Acordo” coa minoría sindical (CCOO e UGT) deixando á marxe a maioría da representación do persoal empregado público.
Con ese formato o que se pretenden e inventar unha comisión de seguimento na que amañarán as “cousas que vaian xurdindo sobre a marcha”. Esta comisión será, segundo palabras do propio director xeral, a encargada de resolver cuestións como os “criterios de valoración nas titulacións no momento en que poidan xurdir dúbidas”. Moi mal se están a facer as cousas para ter que prever unha comisión de seguimento para poñer parches nunhas convocatorias de procesos selectivos.
A convocatoria dun proceso selectivo debe ser tan sumamente clara que as persoas candidatas non teñan ningún tipo de dúbida e ter claro dende o minuto cero con que cartas xogamos. Como poden deixar a titulación que se necesita para presentarse a un proceso selectivo ao que interprete unha comisión de seguimento? Aumenta así a inseguridade xurídica ao persoal afectado por esta estabilización trapalleira que vai traer imprevisibles consecuencias.
Chegados a este punto, imos tratar de dar resposta as cuestións que nos foron chegando e que levamos, de novo, ás mesas (16 e 17 de xaneiro):
O que “aclaran”
Non aceptan que o tempo de servizos prestados do persoal transferido puntúe da mesma forma que na Xunta, polo que para este persoal ao que se lle forzou a un cambio de administración, os servizos prestados mentres estivo na administración de orixe vai puntuar como noutra administración.
Non aceptan a retirada das prazas das brigadas de 6 meses do SPIF. Neste caso non é subrogación (as prazas foron creadas polo remate das encomendas anuais no ano 2019) e pode que en moitos casos provoquen o despedimento das persoas que, segundo FP, precisamente xeran as prazas. Polo tanto, as prazas das brigadas de 6 meses do SPIF non se retiran (mesmo poderán engadir algunha máis). Ademais, o tempo de traballo en SEAGA vai puntuar coma noutra administración. En conclusión, consideran que o tempo de traballo de SEAGA vale para incluír a praza coma se fora na Xunta pero para valorar o o tempo de traballo non.
Para as categorías e escalas vinculadas ao SPIF inclúen unha cláusula pola que van valorar o tempo en entes con 0,125 ptos./mes, dando entrada tamén a entes públicos doutras administracións.
Modifican o apartado de formación e puntuarán os cursos dos ministerios da Administración Xeral do Estado (din que van igualar coa formación requirida para a carreira).
Os servizos prestados durante o período no que se goce dunha redución de xornada por conciliación serán valorados como servizos prestados en réxime de xornada completa.
Nas prazas de persoal laboral propio de Amtega (que proveñen do CIXTEC) que se ofertan, entenderase por administración convocante, exclusivamente a Axencia para a modernización tecnolóxica de Galiza. O mesmo para as prazas de IET, e AXEGA.
Corrixen a titulación de xerocultoras, oficiais de recursos naturais e outras.
| Proceso selectivo | Titulación |
| Escala técnica de cocina | – Técnico na rama de hostaleira, restauración ou equivalente |
| Escala técnica de análises de laboratorio | – Técnico na rama de sanidade, de bioloxía, de química ou marítimo pesqueira |
| Escala de xerocultor | – Titulación que habilite para realización das funcións inherentes a esta escala. |
| Escala técnica de condución | – Bacharel ou técnico e carné de conducir tipo C + tipo E |
| Escala de auxiliar de condución | – Graduado en ESO e carné de conducir tipo C1 |
| Escala auxiliar de recursos naturais e forestais. Especialidade oficial | Titulación que habilite para a realización das funcións inherentes a esta escala e carné, autorización ou licenza que sexan necesarios para o manexo dos vehículos e da maquinaria. |
| Mestre de taller | – Bacharel técnico superior o equivalente |
| Escala de profesores numerarios dos institutos maritimos- pesqueiros | Licenciado ou graduado nunha titulación de calquera ramo e master que habilite para o exercicio da profesión de profesor, ou certificado de aptitude pedagóxica ou equivalente |
| Escala auxiliar de recursos naturais e forestais. Especialidade oficial | Titulación que habilite para a realización das funcións inherentes a esta escala e carné, autorización ou licenza que sexan necesarios para o manexo dos vehículos e da maquinaria. |
Seguindo un suposto informe de idoneidade emitido por Educación, parece que van admitir titulacións superiores para postos que requiren outra titulación. Por exemplo, o caso da escala de educadores/as de educación infantil, onde van aceptar as titulacións de mestra/e. Facer isto en base a un informe de Educación é asegurar a lea xudicial, pois o EBEP di algo diferente. A solución é que faciliten as prazas abondas para que puideran titular na quenda de libre este ano na vez de seguir dando falsas expectativas.
Persoas en incapacidade permanente con reserva de posto: nada lles impide presentarse pero teñen que estar aptas no momento de tomar posesión.
Mudan a convocatoria logo da queixa pola actual redacción que valora o tempo traballado como persoal estatutario coa mesma puntuación que na Xunta.
O que deixan para despois.. (si é que non pasan de todo)
O evidente caos das titulacións requiridas para o acceso que ou segue sen axustarse a lei ou evolucionou a outra dentro da mesma categoría/escala (linguaxe de signos, capataz de recursos, lingüistas, etc.). Presentamos alegacións onde propuxemos solucións, pero ignoráronas.
Ante a pregunta de si os procesos por concurso-oposición derivados da Lei 20/2021 teranse en contan para as listas de contratación, por agora tamén queda sen definir. Propuxemos que de valorarse este proceso, non se perda a nota anterior, xa que hai moi poucas prazas nesta estabilización e obrigaría a todo o mundo a presentarse sen expectativas de sacar praza. Como non fixeron nada agora habería que modificar o decreto de listas.
O que seguen sen aclarar
Requirimos o listado anunciado coas persoas que non terían que presentarse ao proceso de estabilización extraordinaria porque xa van para persoal laboral fixo: seguimos sen resposta.
O persoal descontinuo e a media xornada, que xera praza, en moitos casos non vai acadar a puntuación mínima para poder presentarse, e por tanto tampouco recibiría a compensación prevista na Lei 20/21. Non concretaron ningunha solución a pesar de que dixeran que o estudarían.
Di o DXFP que hai 119 prazas na convocatoria de persoal funcionario con xornada parcial pero non identifican cales son. E a maiores, néganse a compensar o tempo traballado ás persoas de xornada parcial que en moitos casos van perder opción a praza. O director xeral de Función Pública di, textualmente, que valorar o 100% non ten “apollatura legal”.
Ante a denuncia polo baile de prazas e porque incluso retiran máis que as da estabilización das convocatorias de decembro de 2021, o DXFP di que non inclúen as prazas que xa provocaron estabilización ou procesos de consolidación, e as prazas anteriores de procesos en marcha (pendentes de rematar) compútanas de forma provisional. E que van publicar no web o listado de postos que xa están convocados en procesos anteriores.
Como é posíbel que modifiquen o listado de postos da Lei 20/21, temos que asegurarnos ben da escala/categoría/grupo no que inscribirnos antes de presentar a instancia (descarga e faille un pantallazo por se tiveras que reclamar).
Tampouco aclaran se van engadir os postos das escalas a extinguir de gardacostas ás prazas das convocatorias do C1. Isto é de sentido común xa que as convocatorias din que os servizos prestados nestas escalas se valorarán nas que se integraron.
Para o persoal reclasificado por sentenza xudicial a puntuación do tempo traballado farase a partir dos efectos da sentenza de reclasificación e a praza computarase tamén na escala reclasificada (aínda que a RPT non estea actualizada). Como o traballo en diferente categoría non o quixeron valorar aconsellámoste que vaias polas dúas opcións porque terás a experiencia partida. O castigo para o persoal que loitou pola sua reclasificación é triplo xa que no caso de non ter a titulación necesaria para a escala, agora quedan colgados/as.
Outras cuestións tratadas sobre os procesos de estabilización
Disparidade na valoración do tempo traballado e falta de reciprocidade nas convocatorias dos entes: dixeron que ían revisar o valor dos servizos prestados, pero non sabemos como queda a cousa.
Veterinarios/as: admiten un erro nas prazas, incluíron as da 2ª parte da transitoria 10ª do convenio colectivo, en troques das da 1ª parte; quedarán 12+34 prazas.
Técnicas/os de Inclusión Social que non teñen especialidade: van ao corpo superior e ao corpo de xestión. As que teñen especialidade van pola titulación que teñen no listado do web.
Servizos prestados que non van no modelo que elaborara FP: os certificados que está a facer agora o Consorcio non valen, porque non seguen o modelo de Función Pública. Vaia caos. Dende a CIG aconsellámoste que te apoies coa vida laboral para facer o cálculo na autobaremación,.
Como computan as vacacións retribuídas non desfrutadas? Pois ainda estamos agardando pola anunciada aclaración.
Título de galego (CELGA) asinado dixitalmente: o FIDES pide que o arquivo que contén o CELGA, estea asinado dixitalmente pola entidade certificadora. Din que é un erro que van corrixir, que se pode presentar copia simple (o documento escaneado).
Pagar as taxas se non chegas ao mínimo de 30 puntos para o concurso: queixámonos de que o FIDES non permite coñecer a puntuación total ata pagar as taxas, polo que non podes valorar se chegas ao mínimo de 30 puntos para poder participar. Esto pasa por chapuzas.
Escalas que comparten varias categorías e unha delas non tivo procesos selectivos: non trasladan a puntuación á formación.
Inclúen as categorías 9 e 52 na escala auxiliar de recursos naturais.
Persoal interino e laboral con estabilidade de seu (anteriores ao 92): quedan como persoal laboral fixo a extinguir.
Néganse a recuperar as prazas do C2 que retiraron por estar a extinguir (axentes forestais e vixilante pesqueiro/a). Porén, manteñen as de axentes ambientais no C1 aínda que é unha escala a extinguir.
O FIDES pide estar en posesión da titulación a data da convocatoria: di que é un erro e que van corrixir a esixencia do compromiso de ter a titulación neste momento; quedará como na convocatoria.
O director xeral de Función Pública anunciou unha inmediata publicación en DOG das modificacións das bases das convocatorias, o que implicará a ampliación do prazo de inscrición nos procesos (volverá a ser de 20 días hábiles). A nosa recomendación: agarda á publicación das bases para inscribirte.
(Documento que nos enviaron unha vez rematada a Comisión de Persoal do 17/01/23 e que sen coñecelo quixeron que o votásemos: descargar)
- Detalles
Na Mesa Xeral do 10/01/2023 tratouse a modificación das RPT co fin de posibilitar tomas de posesión de procesos en curso e a inclusión dunhas cláusulas para adicionar ás convocatorias de estabilización da Lei 20/2021. Ademais aportamos cuestións para buscar dar solución ás eivas destes procesos.
1. Modificación de 7 postos nas RPT Emprego e Igualdade, Medio Rural, Política Social, Cultura e Educación para dar destino as persoas que superaron un proceso selectivo. Ante o noso cuestionamento pola laboralización de postos Función Pública aclara que están previstos para a funcionarización polo que van poder ser ofertados en concurso de traslados ao persoal funcionario de carreira.
2. Cláusulas para incluír nas convocatorias de estabilización (que intentan resolver o que non deixaron ben na Lei de medidas urxentes e nos criterios xerais).
1) Valoración da experiencia ao persoal transferido (INEM e Illas Atlánticas) como en distinta administración (0,125). Ante a demanda de valorar igual o tempo traballado na Xunta que noutras administracións ao persoal que transferiron de xeito obrigatorio din que o van repensar.
2) Persoal das 3 convocatorias da Lei 4/1988 de Función Pública: consideran que son laborais fixos polo que non computan as súas prazas e as retiran da oferta. Que revisen ben e que o fagan xa. Lembramos que hai persoal interino das tres oportunidades que non pasaron aínda a laboral fixo.
3) Prazas das brigadas de 6 meses do SPIF: consideran o tempo prestado en extinción de incendios en SEAGA como tempo traballado noutras administracións (0,125) así que non retiran as prazas como pedíamos.
Medio Rural deixou de facer unha encomenda anual de xestión en incendios forestais con SEAGA e polo tanto non hai subrogación do servizo, non son nin da DA 6ª nin da 8ª . De seguir as prazas produciríase unha competencia inxusta sen apenas oportunidade para que poidan optar a ela os compañeiros e compañeiras que xeraron a praza.
Na CIG sempre fomos cautelosas coa inclusión destas prazas na OEP e para emendalo agora non queda outra que a retirada das prazas.
3. Rogos
Cuestións sobre as convocatorias de estabilización
Dende a CIG remitimos este 9 de xaneiro un novo documento de alegacións pola falla de prazas publicadas no web de Función Pública e fixemos propostas de mellora das convocatorias.
Ademais:
- Rexeitamos o potencial desconto de prazas durante o proceso sobre as xa publicadas na convocatoria do DOG, que xustifican en base aos procesos selectivos pendentes de rematar.
- Esiximos algún mecanismo de compensación da puntuación do tempo traballado nas prazas con xornada inferior á completa ou fixas-descontinuas.
- Na quenda de prazas de diversidade funcional non se tiveron en conta os datos de discapacidade do persoal que as ocupa. Ademais solicitamos que nesta estabilización extraordinaria se acumulen á quenda xeral as prazas que non se cubran.
- Defendemos baremar unicamente os cursos das universidades públicas (estase a promover un negocio e prexudicando o principio de igualdade).
- Temos unha serie interminable de dúbidas sobre como vai ser a autobaremación: solicitamos unha guía de consulta e instrucións e rexeitamos as sancións a quen erre no procedemento.
- Aclaramos que podes presentarte a todas as convocatorias, concurso e concurso-oposición, categorías e escalas equivalentes, etc. O que non sabemos é como vai valorar a puntuación da proba superada e tampouco o tempo traballado (outra cousa que queda pendente para a vindeira reunión).
- Tamén queda sen resolver o que vai pasar coas persoas que están en situación de incapacidade permanente con reserva de posto no caso de que lle revisen a incapacidade e volvan ao posto.
- Sobre as prazas en escalas/categorías a extinguir que foron retiradas e non saen convocadas, defendemos que non se perdan e que se convoquen nas categorías/escalas sucesivas. Función Pública di agora que hai problemas de titulación das persoas que xeran as prazas pero antes dixo que tiñan estabilidade: que aclaren.
- Teñen que deixar clara a repercusión legal da listaxe publicada no web de Función Pública e se vai valer como comunicación ao interesado/a, xa que sufriu cambios e non esta validada. E tamén corrixir no listado de prazas as localidades ou centros que veñen mal.
Sobre titulacións, persiste o caos
- Segue existindo un enorme caos nas titulacións requiridas. Van corrixir a titulación específica de xerocultor/a mais non di nada na de oficial de cociña (2ª) que sigue coa ESO.
- Para os/as profesores/as numerarios/as de institutos politécnicos marítimo-pesqueiros requirimos que validen a docencia como mestrado de formación do profesorado nos mesmos termos que fai a Consellería de Educación nos seus procesos selectivos.
- Escala de técnicos/as en educación infantil. Na normativa é requisito o título técnico/a superior en educación infantil ou equivalente. Si Función Publica mantén que vai aceptar diplomaturas de mestras debe achegar a equivalencia ao grao superior do EBEP. Na CIG cuestionamos a validez da habilitación académica ou profesional. Denunciamos que se están a dar falsas expectativas ao persoal que ocupa as prazas e que ao final vai quedar fóra. O máis lóxico é darlle ás persoas que carezan del a oportunidade de sacar o título antes do prazo de presentación deste requisito. Ao final Función Pública dixo que valoraría a proposta do prazo e que revisaría a cuestión da equivalencia.
Sobre as prazas, segue o xogo das cadeiras
Seguen a faltar por incluír unha morea de prazas (e a vista queda despois da enorme cantidade de alegacións que recibimos estes días).
Debido a desastrosa xestión do persoal temos, por poñer un exemplo, prazas de oficial 2ª cociña no C1 e o resto no C2 facendo as mesmas funcións. Ante esta incoherencia solicitabamos que se valorara igual en escalas alternantes coas mesmas funcións pero non se atendeu a nosa proposta. Hoxe teñen o problema das persoas con postos reclasificados, así que finalmente… como van puntuar o tempo traballado?
Para a vindeira semana teremos unha nova reunión coa DXFP polo que se queres facernos chegar algunha consideración sobre as prazas podes facelo aquí (antes do venres). E esperemos que atendan a algo porque xa levamos milleiros de alegacións feitas con este asunto das prazas dende o mes de maio e seguimos no xogo das cadeiras: faltan centos de prazas.
- Detalles
A Administración di que van ingresar os importes devindicados correspondentes ao ano 2022 entre esta semana do 9 de xaneiro e a seguinte do 16 (o 60% do grao, nun pago único e mediante unha nómina complementaria).
Nalgúns centros directivos comunicaron que o ingresarían xa nun ou dous días, como é o caso do Consorcio. Se non a cobras pode ser que non lles dera tempo a tramitala polo que é posible que se prolongue algún tempo máis. No caso de que haxa algún erro enviaranche un requirimento e en 3 semanas se espera que teñan enviados todos os requirimentos así como preparado a orde de pago para as restantes persoas que faltan.
Se tes dúbida ponte en contacto coa CIG trataremos de axudarche.
- Detalles
Ante o rumor de que persoas interinas que aprobaron procesos selectivos deben comunicar por escrito a súa praza a Función Publica para que lles sexa ofertada, o director xeral de Función Pública desmínteo e aclara:
1. As prazas vanse a ofertar en destino provisional.
2. Dada a excepcionalidade ofertaranse preferiblemente as que ocupan as persoas aspirantes que aprobaron para evitar que salte o mínimo de persoas temporais e interinas.
3. A relación de prazas vaise publicar no DOG nestes días, e escolleranse por orde, coma sempre.
4. Ademais lembra que se ofertarán no seguinte concurso de traslados e as que queden serán as que se ofertarán por orde de prelación das persoas aspirantes como destino definitivo, tal e como se ven facendo habitualmente.
- Detalles
A Dirección Xeral de Función Pública enviou aos sindicatos unha folla de cálculo que pretende resumir a Oferta de Emprego Pública extraordinaria do ano 2022. As convocatorias relacionadas xa foron convocadas (tes as ligazóns de seguido, no apartado de "Novas relacionadas").
- Detalles
Aplicou descontos ás traballadoras e traballadores que estaban de servizos mínimos
O Xulgado nº1 do Contencioso Administrativo de Santiago de Compostela vén de estimar o recurso contencioso administrativo contra a resolución da Secretaría Xeral Técnica da consellería de Medio Rural, de 27 de agosto de 2020, na que inventa uns criterios de descontos salariais que aplicou nas nóminas de agosto e setembro de 2020 ao persoal técnico de incendios (enxeñeiros/as de montes e técnicos/as forestais). Especificamente declara a “NON conformidade a dereito” da resolución e o dereito das persoas afectadas a percibir o 100% das súas retribucións mensuais no tempo que prestaron servizos mínimos. A maiores, a sentenza imponlle costas á Xunta de Galicia.
Esta folga na loita polas melloras laborais do persoal técnico de incendios forestais desenvolveuse entre agosto e setembro de 2020. A consellería de Medio Rural tentou por varios medios reprimir a folga atentando contra este dereito fundamental: contratou a persoal de empresas externas (SEAGA) para a realización de tarefas habituais non decretadas nos servizos mínimos, presionou individualmente ao persoal facendo que declarara se apoiaba a folga convocada e finalmente exerceu descontos salariais sobre o persoal que estaba a cumprir os servizos mínimos. Ademais que o procedemento de desconto tivo unha “celeridade inaudita” para executar a represión da folga tocando o salario ao persoal antes de rematar o mes de agosto de 2020 (coa folga indefinida aínda en marcha).
Salario en función de incendios
Temos vivido múltiples represións patronais máis é a primeira vez que aplican descontos salariais ao persoal que traballou en servizos mínimos, e para xustificar tal barbaridade, vincularon a rebaixa salarial ao número de incendios que tiveron en cada centro de coordinación (a menor número de lumes, maior desconto) aínda que o 100% deles foron atendidos con normalidade.
A xustiza nin entra a valorar a xustificación da Xunta e deixa claro que con independencia de que non se desempeñaran todas as funcións que lle corresponde ao persoal técnico, esa dispoñibilidade outórgalles o dereito a percibir o salario sen dedución proporcional ás funcións desenvolvidas ou á taxa de incendios.
Queda tamén claro que na aplicación dos descontos salariais vulnerouse o establecido nos artigos 30.2 e 14d) do EBEP, sendo non conforme a dereito e tendo por único obxectivo real a desmobilización do seguimento da folga legalmente convocada nese momento.
A CIG-Autonómica manifesta, por iso, a súa satisfacción con esta sentenza xa que pecha a posibilidade de que a Xunta de Galiza volva a reprimir ao seu persoal coa aplicación de descontos salariais cando se esta a traballar en servizos mínimos garantindo o dereito de folga como medida de loita para a mellora das condicións laborais.
Con todo, a CIG urxe á consellaría de Medio Rural a que proceda, de inmediato, á devolución do salario roubado. Xunto a isto, entende que deberían ser cesadas ou dimitir as persoas responsábeis da consellaría que aplicaron os descontos ou as que unha vez aplicados non quixeron rectificar a situación, nomeadamente María Jesús Lorenzana, secretaria xeral técnica nese momento da consellería de Medio Rural e, que pouco despois do conflito, foi ascendida a conselleira de Emprego e Igualdade, e ao actual secretario xeral técnico de Medio Rural, Nicolás Vazquez, ademais da dimisión do conselleiro de Medio Rural: Jose González Vázquez.
- Detalles
No DOG do 30/12/2022 publican o DECRETO 220/2022, do 29 de decembro, polo que se aproba a oferta de emprego público para o ano 2022 do persoal sanitario funcionario ao servizo da comunidade autónoma incluído no ámbito de aplicación da Lei 17/1989, do 23 de outubro, de Creación de Escalas do Persoal Sanitario ao servizo da Comunidade Autónoma.
