Onte no Senado, o ministro de Facenda e Administracións Públicas, facía propaganda de que os salarios públicos brutos que non acaden o 1,5 do Slarario Mínimo Interprofesional (SMI) estarán exentos da supresión da paga extra de Nadal do 2012. Esta medida xa aparecía recollida nos artigos 2.6 e 3.6 do Real decreto-lei 20/2012 publicado este sábado no BOE.
Hai que ter en conta que o SMI quedou conxelado no 2012 en 641,40€, polo que esta medida só afectaría ao persoal que teña uns ingresos brutos por xornada completa de menos de 962,10 €/mes. Xa que logo, non se excetpúa o persoal fixo discontinuo ou contratado a tempo parcial; o director xeral de Función Pública xa confirmou que non hai ningún traballador público da Xunta de Galiza que se poda acoller a esta excepción. Por outra banda, cómpre destacar a pouca vergoña ao sinalar que nos poñemos ao nivel de europa en tipos impositivos (subida do IVE) cando o noso SMI é a metade dos estados europeos cos que se nos compara.
O ministro Montoro asegura que comunicou agora este dato porque se esqueceu de facelo na rolda de prensa do venres. Entendemos que tiña moitos recortes que anunciar pero este tipo de detalles absurdos sobran, non sendo que o que pretenda sexa emular a súa compañeira de partido Andrea Fabra e lanzarnos outro "que se jodan" ás traballadoras e traballadores públicos.
Negro ou branco
Segundo o BOE, non hai tramos, nin escalas, nin unha aplicación proporcional da medida: é negro ou branco. Se ganas menos de 962 euros de soldo base, cobras; se ganas máis, non cobras.
Imaxinemos o caso dun traballador público que gañe 970€/mes. En comparación co seu compañeiro que cobra 962€, o seu soldo é 112 €ao ano superior (8 €* 14 pagas =112 €). Se agora a este o pagan en decembro 962 € e a aquel non lle pagan nada, o que máis gaña sairá perdendo. De feito, podería serlle rendible pedir que lle baixen o soldo no que queda de ano.
Outra cuestión a destacar é que esta medida se aplica sobre o soldo base bruto, sen contar complementos por incentivos ao rendemento. Deste xeito, podería darse o caso de que alguén que gañe 750 de soldo basee e 750 de incentivos (1.500 en total) non perda a paga extra; mentres que outro compañeiro que só cobre 1.000 euros de soldo base, quede sen ela.