A CIG esíxelle á Xunta que respecte tanto o Acordo asinado o 5 de decembro de 2023 como a propia Lei de emprego público e a Resolución de permisos e licenzas

O Acordo sobre as condicións de traballo do persoal dos centros de xestión propia da Consellería de Política Social e Xuventude, asinado o 5 de decembro de 2023, élle de aplicación tanto á Consellaría de Política Social como ao Consorcio Galego de Servizos de Igualdade e Benestar. Este acordo concrétase, entre outras cuestións, na xornada de 35 horas semanais.

Por outra banda, as traballadoras e traballadores teñen dereito a un permiso de lactación que, no caso de ser acumulado en xornadas completas, supón 150 horas de tempo de traballo.

Despois da sinatura do devandito acordo, o resultado de acumular este permiso en xornadas é de 21,429 días, o que se traduce en 21 xornadas completas e 3 horas. Porén, a Administración está a negar o dereito a gozar desas 3 horas co argumento de que o desfrute acumulado ten que facerse en xeiras completas, ignorando completamente a normativa vixente que establece a acumulación parcial.

A Lei 2/2015, de Emprego público de Galiza determina o seguinte: «No caso de acumulación parcial do tempo correspondente a este permiso, gozarase combinando a concesión de xornadas completas coa ausencia dunha hora diaria, a cal se pode dividir en dúas fraccións de media hora, ata acadar o total do tempo concedido.»; polo tanto, as traballadoras e traballadores teñen dereito ao desfrute desas 3 horas que completan as 150.

Non pode ser que, coa escusa da mellora das condicións de traballo do Acordo, se perdan dereitos consolidados e recollidos na normativa.

Reclama os teus dereitos! Non renuncies ao teu permiso de lactación completo!