- Detalles
Despois da parálise dos prazos que houbo pola declaración do primeiro estado de alarma no ano 2020 e rematado o prazo que se abreu por un período similar ao paralizado desde o 1 de xuño ao 18 de xullo rematouse o exame das solicitudes presentadas e por fin no DOG do 3 de decembro de 2020 publícanse as listaxes provisionais de prazas reservadas a persoal funcionario e a contratación temporal de persoal laboral da Xunta de Galiza.
As listas poden consultarse no portal web corporativo da Xunta de Galiza, http://funcionpublica.xunta.gal, epígrafe de <Listas de contratación>; no Servizo de Atención e Información á Cidadanía a través do teléfono 012, e nas oficinas de rexistro e atención á cidadanía da Xunta de Galiza (oficinas dos edificios administrativos da Vicepresidencia Primeira e Consellaría de Presidencia, Xustiza e Turismo).
RECLAMACIÓNS: Hai un prazo de dez (10) días hábiles, contados a partir do día seguinte ao da publicación no DOG, para presentar reclamacións perante a Comisión Permanente (Dirección Xeral da Función Pública, Consellería de Facenda e Administración Pública, Edificio Administrativo San Caetano, s/n, Santiago de Compostela).
Dende a publicación desta resolución todas as persoas solicitantes, tanto as provisionalmente admitidas como as provisionalmente excluídas poderán presentar solicitude de suspensión de chamamentos. Un modelo de solicitude pódese atopar no portal web corporativo da Xunta de Galiza.
- Detalles
Pese ao retraso acumulado, semella que Función Pública bota a andar o proceso de integración do CIXTEC na AMTEGA. O primeiro paso que deu foi meter no anexo V (funcionarización) da OEP 2020 aprobada hoxe, 2 de decembro, as prazas de persoal laboral do CIXTEC.
Son 78 prazas de persoal laboral, máis outras 5 de persoal funcionario que no seu día pediu excedencia e que non terían que funcionarizar. Pero para estes últimos non respostan á cuestión que puxo a CIG enriba da mesa: ese persoal funcionario non eran da escala de informática, e agora, que van facer con eles? O director de Función Pública non resposta.
Ao tempo, achegounos o borrador do "Proxecto do decreto polo que se suprime o Centro Informático para a Xestión Tributaria, Económico-Financeira e Contable (CIXTEC) e se modifican os estatutos da Axencia para a Modernización Tecnolóxica de Galicia (AMTEGA)".
Dispoñemos dun prazo de alegacións ata o día 9 ás 14.00 h. Teñen a intención de aprobalo en Comisión de Persoal neste mes de decembro.
- Detalles
Despois de terllo solicitado hai máis de 15 días, tal e como vos contamos nesta nova, Función Pública dá resposta á CIG en relación ao asunto de ampliación do goce de vacacións e asuntos persoais. En breve publicarán unha resolución na que resolven que:
- Poderá autorizarse o goce das vacacións do ano 2020, ata o 31 de marzo de 2021 naqueles casos específicos de peticións de goce durante 2020 que foron denegadas expresamente cando o motivo da denegación estivera fundamentado nas necesidades da correcta prestación do servizo.
- Poderá autorizarse o goce dos días por asuntos particulares ata o 31 de marzo de 2021, cando por razóns de necesidades do servizo non sexa posible gozar destes días antes de finalizar o mes de xaneiro de 2021.
Aviso a navegantes: ollo coa información facilitada onte por algún sindicato pois é incorrecta ao non contemplar as limitacións que establece Función Pública.
- Detalles
Función Pública ven de enviarnos as prazas propostas para a elección de destino do proceso selectivo de auxiliares de enfermería:
- Orde do 18 de setembro de 2017 pola que se convoca o proceso selectivo para o ingreso, pola quenda de promoción interna e cambio de categoría, na categoría 003 (auxiliar de enfermaría) do grupo IV de persoal laboral fixo da Xunta de Galicia. (DOG 25.9.2017).
Tamén nos envían as prazas para a elección de destino dos seguintes procesos selectivos de Camareiro limpiador PI e Libre - OEP 2016 - G. V Catg. 001.
- Orde do 18 de setembro de 2017 pola que se convoca o proceso selectivo para o ingreso, pola quenda de promoción interna e cambio de categoría, na categoría 001 (camareiro/a-limpador/a // axudante/a cociña) do grupo V de persoal laboral fixo da Xunta de Galicia. (DOG 25.9.2017)
- Orde do 1 de marzo de 2018 pola que se convoca o proceso selectivo para o ingreso pola quenda de acceso libre na categoría 001 (camareiro/a-limpador/a//axudante/a cociña) do grupo V de persoal laboral fixo da Xunta d e Galicia. (DOG 7.3.2018)
PRAZO ALEGACIÓNS: 10 días
- Detalles
No DOG do 1 de decembro publícase o Decreto que regula a estrutura orgánica da Consellería de Cultura, Educación e Universidade e pode comprobarse que o Servizo de Prevención de Riscos Laborais desaparece da estructura da Consellería de Cultura, Educación e Universidade, que ata a data dependendía da Subdirección Xeral de Recursos Educativos Complementarios, que tamén desaparece.
Con esta modificación a prevención dos riscos do persoal desta Consellería pasa a ser unha simple función da Dirección Xeral de Centros e Recursos Humanos, quedando novamente claro que á Consellería de Educación non lle preocupa a saúde nin a protección do seu persoal.
Sorprende tamén que se tome esta decisión xusto cando A Inspección de Traballo confirma irregularidades na protección da saúde fronte ao Covid-19 nos centros educativos a raíz da denuncia presentada por parte da CIG.
Os Servizos de Prevención de Riscos na Administración da Xunta réxense polo estipulado no Decreto 204/1997 que na súa disposición adicional 1º indica expresamente que a Consellería de Educación, ten que crear e regular o seu propio servizo de riscos laborais. Ata o de agora este Servizo, que fan desaparecer, non funcionaba correctamente xa que non ó noso entender non estaba dotado de persoal suficiente.
A CIG solicita que se rectifique esta decisión e que, cumprindo co establecido no Decreto polo que se crea o Servizo de Prevención de Riscos Laborais para o persoal ó servizo da Administración da Xunta de Galicia, se recupere o da Consellería de Educación e se dote dos medios humanos e materiais necesarios para realiza-las actividades preventivas e garantir a protección da seguridade e a saúde do seu persoal.
- Detalles
1. Proposta de modificación estatutos do Consorcio Galego de Servizos da Igualdade e Benestar, para a continuidade de actuacións do acordo entre a Xunta de Galiza e as organizacións sindicais para a integración do persoal do Consorcio Galego no convenio colectivo único do persoal laboral da Xunta de Galiza.
A CIG vota a favor desta modificación estatutaria que obrigará a que os procesos selectivos e as listas de agarda sexan convocados e xestionados pola Dirección Xeral da Función Pública da Xunta de Galiza.
2. Proposta de acordo polo que se aproba un plan de carácter temporal en materia de persoal para aplicar as actuacións para evitar a propagación dun abrocho de covid-19 previstas no protocolo conxunto da Consellaría de Sanidade e da Consellaría de Política Social para facer fronte á crise sanitaria provocada polo virus sars cov-2 nos centros residenciais de persoas maiores e noutros centros sociosanitarios da comunidade autónoma de Galiza.
A CIG recoñece que tanto a Consellaría de Política Social como Facenda aceptaron importantes alegacións que achegamos tanto na mesa previa como na mesa xeral e que se substancia no seu carácter voluntario e no incremento de ata case 300€ mensuais do complemento de singularidade por responsabilidade.
Aínda así, a CIG votou en contra xa que non podemos facilitar que se detraian efectivos das residencias públicas para superar as deficiencias das privadas que só buscan a maximización dos seus beneficios en detrimento dos coidados aos nosos maiores.
3. Solicitude adhesión do sindicato SEPGA ao Acordo para a ordenación e mellora da prestación de Servizos Veterinarios no ámbito da Xunta de Galiza.
A CIG vota en contra xa que esta organización sindical non está lexitimada ao ter unha representación insuficiente que lle impide formar parte da Mesa Xeral da cal se deriva o Acordo dos Servizos Veterinarios. Ademais, salientamos aquí a teima da Administración de querer colar a este sindicato amarelo nos foros de negociación sen estar lexitimado.
O director xeral de Función Pública non posibilitou os rogos e preguntas que quedarán para a vindeira mesa xeral convocada para o 01/12/20, e concretou as seguintes cuestións:
a) Vacacións e asuntos persoais: están a estudar a solicitude da CIG de poder desfrutar das vacacións e AP´s do 2020 máis aló do 31 de xaneiro.
b) Decreto de Oferta de Emprego Público 2020, irá para a mesa xeral deste martes, 1 de decembro.
c) Oferta de Emprego Público 2021, se negociará ao longo do 1º trimestre do vindeiro ano.
d) No foro da Comisión de Coordinación de Emprego Público, a Xunta propón a modificación do EBEP para que nas vindeiras OEP´s se poidan incluír tódalas vacantes, incluídas as xubilacións, sen que computen na taxa de reposición. E adicionalmente que se poida incluír ata o 80% das prazas das que se teña previsión de quedar vacantes por xubilación no seguinte ano, co fin de que cos aprobados dos procesos selectivos se poidan cubrir ditas prazas. O que non pediron mentres gobernaba o PP o piden agora.
e) En breve se publicará a nova regulación sobre o teletraballo.
f) Procesos selectivos: os xa iniciados se retomarán pasado o mes de febreiro. Na proposta de modificación da Lei de emprego público se contempla a posibilidade de realizar exames en varias sedes e varias quendas ou días.
- Detalles
Á Comisión de Persoal do venres se nos trouxo un punto sobre a posibilidade de adhesión ao acordo de veterinarios do sindicato SEPGA.
Dende a Administración levan querendo introducir a este sindicato amarelo nos foros e mesas de negociación dende hai un tempo, a pesar de non ter representación suficiente para poder facelo.
No caso do acordo de veterinarios, este é un acordo derivado dunha negociación na Mesa Xeral de Empregados Públicos que afecta a persoal funcionario e laboral, onde o SEPGA non obtivo representación. Para o director xeral de Función Pública iso da igual e no canto de inadmitir a petición do SEPGA a trae a esta Comisión de Persoal.
Unha semana antes, tamén a instancias de Función Pública, o AGADIC nos convoca para negociar unhas modificacións na RPT que afectan a persoal funcionario e laboral (unha creación de posto de funcionario financiada coa amortización dun posto de laboral). E convocan a SEPGA, dicíndonos por escrito o director do AGADIC que “...é obvia a concorrencia de intereses definidos no ámbito dos estatutos desa organización sindical que son públicos e que foron consultados.”
O que obvia o director do AGADIC é que non se trata do que digan os estatutos do SEPGA, senón do que dixo o persoal empregado público a través dos procesos electorais de eleccións sindicais, onde dos 15 membros da Mesa Xeral de negociación o SEPGA ten CERO representantes.
Pretenden perverter o principio democrático e darlle a un sindicato afín unha representación que as urnas lle negaron.
A posteriori o director xeral de Función Pública emitiu un informe que, sen rubor e indo en dirección contraria á xurisprudencia, xustifica que SEPGA sen votos suficientes pode negociar as condicións de traballo do persoal empregado público.
O Tribunal Supremo na STS 111/2018 deixa claro que para poder negociar cuestións relativas a persoal funcionario e laboral hai que ter representación suficiente nos dous ámbitos, cousa que SEPGA non ten, é que o ter unha representatividade superior ao 10% no ámbito de funcionarios non o lexitima a estar presente en todos os foros onde se traten cuestións relativas a funcionarios.
Pero a empresa segue empeñada en meter ao seu sindicato amarelo con calzador nas negociacións para que apoie á patronal. Nos reservamos as accións a emprender para frear algo que ten todos os indicios de constituír prevaricación.
- Detalles
De conformidade co artigo 6.2 do Decreto 37/2006, do 2 de marzo, polo que se regula o nomeamento de persoal interino para o desempeño con carácter transitorio de prazas reservadas a persoal funcionario e a contratación temporal de persoal laboral da Xunta de Galiza, no DOG do 25/11/2020 publícanse as listas provisiionais das seguintes categorías:
- GRUPO I, CATEGORÍA 2 (Titulado superior médico e outras)
- GRUPO II, CATEGORÍA 2 (ATS e outras)
- GRUPO IV, CATEGORÍA 3 (Auxiliar de Clínica e outras)
As listas poderán consultarse no portal web corporativo da Xunta de Galiza, no teléfono de atención á cidadanía 012, e nas oficinas de rexistro e atención á cidadanía da Xunta de Galiza.
As persoas interesadas teñen un prazo de 10 dias hábiles a partir da publicación no DOG para RECLAMAR. As reclamacións acompañaranse da documentación precisa para enmendar a causa de exclusión, de ser o caso.
A partir da publicación desta resolución no DOG, tanto as persoas solicitantes admitidas como as excluídas, poderán presentar SOLICITUDE DE SUSPENSIÓN DE CHAMAMENTOS, de conformidade co establecido no artigo 15.2 do Decreto 37/2006.
- Detalles
A autoridade laboral achega unha proposta de requerimento a raíz da denuncia que a CIG-Autonómica fixo en setembro pola ausencia de medidas preventivas nos centros educativos
Logo de varias citacións a Consellería de Educación foi incapaz de demostrar ante a Inspección de traballo e Seguridade Social que cumpriu os mínimos que marca a Lei de Prevencion de Riscos Laborais para a protección da saúde do persoal traballador fronte á Covid-19.
Da análise do informe da Inspección de Traballo demóstrase que:
1. A imposibilidade da nosa Consellería mediante o seu servizo de prevención propio de facer as avaliacións específicas para cada centro, polo que contrata a CUALTIS constatándose que tampouco se fai o traballo xa que son prácticamente idénticas en todos os centros e ademais non reflicten as medidas de prevención.
A Consellería indica que soamente son modelos e que cada centro adaptaraos, pero revisando modelos concretos a Inspección detecta as seguintes cuestións:
a) están obsoletos xa que non están adaptados á última versión do protocolo xeral polo que precisan revisión.
b) hai contradiccións, xa que non queda claro por exemplo que tipo de protección hai que levar cando se acompaña a un posible caso á aula COVID nin como se protexerá ó persoal limpador que terá que desinfectar posteriormente esa aula. A Inspección deixa claro neste punto que é necesario un equipo de protección frente oa risco biolóxico e que deben estar especificadas as súas características técnicas así coma o marcado (UNE) segundo a normativa correspondente.
2. O servizo de prevención é quen ten que determinar os escenarios de exposición ó risco do persoal e revisado pola Inspección tamén fai constar que se dan dúas circunstancias curiosas xa que estima:
a) que todo o persoal ten baixa probabilidade de exposición se se cumpren unha serie de condicións (distancia, uso de máscara, ventilación…) cousa que non se pode garantir en tódolos casos.
b) que o persoal docente e o de limpeza (descoñecemos por que o resto non) son de baixo risco pero non se contempla nin en que condicións se da ese risco e tampouco determina que EPIs deberían levar neses casos.
3. Respecto da valoración do persoal vulnerable fronte a COVID tamén queda claro o que a CIG ven dicindo dende o minuto cero. Ten que ser o servizo de prevención quen debe valorar cada posto determinando se o traballador ou traballadora é vulnerable e de ser así debe adaptar o posto.
4. Tamén queda suficientemente claro que todo o persoal da Consellería de Educación non foi formado nin informado adecuadamente frente ao risco da COVID.
Puntualmente tamén se fai referencia neste requirimento a persoal concreto:
- Respecto do persoal coidador a Inspección especifica que este persoal ten a obriga de vixiar o cumprimento de determinadas medidas de protección pero non se especifica nada sobre a súa protección polo que insiste na necesidade da valoración sobre o nivel de exposición deste persoal e a necesidade de dotalos dos EPIs pertinentes (alomenos máscaras FPP2 para as tarefas de maior risco).
Fai isto extensivo ás clases de audición e linguaxe, polo que entendemos que inclúe tamén o persoal intérprete de linguaxe de signos. - Respecto do persoal de limpeza, ainda que a consellería considera que o reforzo das tarefas de limpeza non tería que conlevar obrigatoriamente o incremento do persoal, aínda así ese reforzo fíxose con 77 acumulos de tarefas en todo o país. Para a CIG segue a ser insuficiente e esiximos que se fago extensivo a todos os centros.
- Respecto do persoal de cociña a consellería tamén entende que o incremento de quendas non ten que conlevar incremento de persoal, xustificando que soamente se tiveron 7 peticións de axudantes de cociña e dicindo que as persoas usuarias dos comedores de xestión directa diminuiron respecto do ano pasado. A CIG entende que isto é inaceptable porque non pode depender de se hai solicitudes de persoal por parte das direccións dos centros e poñemos en dúbida o dato da baixada de comensais xa que non se nos facilitou esa información.
Queda claro, polo tanto, que a Consellería de Educación despreza ó seu persoal xa que vai poñendo parches constantes fronte os requerimentos que lle vai facendo a Inspección despois da nosa denuncia, de non ser así:
- nin avaliación de riscos
- nin protección do seu persoal
- nin incremento de persoal para asumir a carga de traballo
- nin valoración do persoal vulnerable
A Inspección dálle de prazo á Administración até o 16 de decembro para achegar toda a documentación que xustifique a corrección das deficiencias contrastadas tras as denuncias da CIG.
- Detalles
Mentres o curso escolar avanza, os dereitos do persoal laboral non docente dos centros de ensino retroceden. Pese á mensaxe oficial de que todo funciona razonablemente ben, a realidade é que o impacto da crise sanitaria da COVID-19 estase a sentir con crudeza nos centros de ensino.
Dende a CIG continuamos a esixir o establecemento de medidas que garantan a seguridade e a saúde laboral do persoal laboral non docente, co establecemento de medidas de prevención, avaliacións de riscos por posto de traballo, resolución ás solicitudes para a determinación de persoal sensibe por vulnerabilidade fronte á COVID-19 , reforzo do persoal de cociña e de limpeza e formación en prevención de riscos no ámbito laboral fronte ao virus.
