- Detalles
A Consellería do Medio Rural terá que adaptar o horario e indemnizar ao traballador logo de negarse sequera a negociar tal e como recolle a lei.
O Tribunal Superior de Xustiza de Galiza ratificou a sentenza que gañara a CIG no xulgado do social de Ourense en marzo do 2020. Esta sentenza recoñece o dereito do traballador a adaptar a quenda de traballo por conciliación familiar sen ter que reducir a xornada nin o salario.
O pasado 5 de decembro 2019, o traballador do SPIF fixera a solicitude de adaptación horaria para poder conciliar a vida familiar e laboral diante da Consellería do Medio Rural. Esa solicitude fíxoa en base ao recollido no Real decreto-lei 6/2019 de 1 de marzo de medidas urxentes para a garantía de igualdade de trato e oportunidades entre homes e mulleres no emprego e na ocupación.
O traballador solicitaba unha adaptación da quenda de traballo que lle permitira poder cumprir o horario laboral á vez que axeitar o horario ás responsabilidades familiares, tal e como recolle o decreto.
O 14 de xaneiro de 2020, a Secretaría Xeral Técnica da Consellería do Medio Rural, dera resposta negativa á petición, motivo polo que acudiu ao xulgado para defender un dereito fundamental acollido pola norma.
No articulado dese decreto recolle o dereito do traballador a solicitar a adaptación da duración e distribución da quenda, na ordenación do traballo e na forma de prestación, cando as/os traballadoras/es teñan fillos/as menores de 12 anos.
Tamén recolle o decreto que diante dunha petición, a empresa abrirá un proceso de negociación co traballador no prazo de trinta días. A Consellería do Medio Rural, nin sequera iniciou tal negociación e cinguiuse a desestimar a petición.
Non é de estrañar este comportamento a medias entre a soberbia e a necidade nestas cuestións, tendo en conta que o propio decreto de medidas para a conciliación establecía o prazo dun ano para acadar o plan de conciliación na empresa, e na Consellería do Medio Rural, a día de hoxe, xa pasado o ano, seguen sen plan e a velas vir.
A sentenza brinda unha primeira vitoria neste campo no que os servizos de emerxencias (e máis en concreto no SPIF), estaban apartados automaticamente polo mero feito de traballar neste sector.
A día de hoxe o traballador, que desfrutaba da execución provisional, foi apartado das súas funcións pola xefatura de distrito, baixo a escusa da provisionalidade da sentenza e da dificultade de adaptación, incorrendo, ao noso entender, noutro posible delito contra este por parte da Consellería. Esta parte está neste momento en fase de asesoramento xurídico e tamén á espera de si a ratificación da sentenza devolve a normalidade ás partes.
Dende a CIG consideramos esta sentenza un paso importante no camiño cara unha conciliación real e efectiva, e convidamos á Xunta a retomar o camiño da negociación para así cumprir a norma, evitar un ronsel de denuncias, e cumprir coas obrigas legais máxima cando estamos a falar da Administración pública e incumprimentos de dereitos fundamentais.
- Detalles
A Dirección Xeral de Defensa do Monte activa e desactiva o “periodo extraordinario”
O venres 26 de marzo de 2021 a Dirección Xeral de Defensa do Monte activaba o período “extraordinario” de prestación de servizos para o persoal do SPIF. Neste comunicado xa se establecía algún concepto que xeraba confusión, posto que o V Convenio Colectivo do persoal laboral establece o período de alto risco, non o extraordinario (denominación que si se emprega no caso de axentes e técnicos). Catro días despois, desactivábao.
Non entendemos esa falta de previsión e improvisación por parte da Dirección Xeral, así como tampouco entendemos outras cuestións que están de plena actualidade estes días.
Por un lado, dende a CIG consideramos que a actividade do persoal fixo descontinuo de 6 meses non se debe vincular exclusivamente aos períodos de alto risco de incendios, senón que o incremento do tempo de traballo deste persoal é imprescindible para realizar tarefas preventivas en sentido amplo (tal e como predica o conselleiro) e apoio a traballos de emerxencia no medio natural e rural, ao igual que o resto do persoal. Por este motivo, dende a CIG non solicitamos a incorporación deste persoal a raíz do anuncio da activación do periodo de alto risco inicial. Isto dende a nosa opinión, soamente contribúe a perpetuar aínda máis a teima da Consellería de deixar este persoal coma de apoio ao alto risco (tal e coma figura na RPT).
Neste senso, seguimos a defender a nosa proposta de reordenación do servizo de incendios, que suporía unha ampliación do tempo de traballo de todo o persoal fixo descontinuo do SPIF. Non nos vale a escusa de que non hai máis cartos, tan so hai que empregar os mesmos pero doutro xeito.
A realización das queimas prescritas ten que ser tarefa propia do persoal do SPIF. Esa foi sempre a postura que defendeu a CIG, e levamos tempo reclamando a implantación dun plan estruturado e ordenado destas (xa no ano 2019, por exemplo, levamos esta proposta diante do grupo de expertos nos incendios forestais do Parlamento de Galiza). Un plan para o que non fai falla que veña a UME nen persoal doutros organismos ou ministerios, posto que o persoal do SPIF está plenamente capacitado para a súa realización, e estas forman parte das tarefas preventivas.
Con respecto ás medidas anti-COVID, calquera cambio nestas debería ser obxecto de comunicación e debate nos respectivos Comités de Seguridade e Saúde. Por iso seguiremos solicitando as xuntanzas destes comités.
- Detalles
Tanto a OEP-2021 de Función Pública como a de persoal funcionario de escalas sanitarias foron aprobadas na Comisión de Persoal do venres 26 de marzo, co voto en contra da CIG, e CSIF, e o voto a favor de CCOO e UGT.
O proceso de negociación foi todo un exemplo de transparencia e da vontade dos responsábeis políticos da Administración por querer chegar a entendemento: os criterios da OEP entregados sen tempo para difundilo e estudalo, ocultando ata última hora os números de prazas por escalas. Vamos, outro ano de "paripé" de negociación.
Acceso libre
Van a ser 635 postos que saen, eso din, indo ao máximo da taxa de reposición de efectivos (100% para postos non prioritarios, e 110% para prioritarios). Con estes números seguimos moi por debaixo do emprego público destruído nos anos anteriores e por tanto, continuaremos cunha alta temporalidade.
É curioso o dato das xubilacións do 2020: 543 postos. Esto é arredor dun 3% do total de persoal, e con previsión de ir a máis en anos sucesivos, o que indica claramente que estamos nunha Administración moi avellentada que require un plan de resposta ante o que ven nun futuro inmediato.
Un dato que non facilitan é se o número de prazas ofertadas se corresponde co de vacantes en cada escala. Os datos que temos é que fan cambios, polo que están a xerar un problema.
Promoción interna
Haberá promoción interna separada do acceso libre, inicialmente só para corpos xerais, pero a última hora engadiron algo para escalas. O resto, será conxunta co acceso libre, o que dificulta a promoción interna do actual persoal. Desta promoción conxunta coa libre non dan números (falan do mínimo legal, 25%), pero afirman que a suma da conxunta e da separada suporá un 75%.
Néganse a aceptar que o persoal que cumpra os requisitos de titulación, poida cambiar de escala mediante promoción horizontal ou vertical:
- O persoal de escalas/especial non vai poder cambiar, agás as escalas de inspección de consumo e turismo (A2) que si poderán ir ao corpo superior.
- Nada din de se o persoal de corpos xerais vai poder ir a escalas, polo que vai quedar ao que decidan en cada convocatoria. Porén, a experiencia de anos anteriores é que tan só van permitir promocións entre escalas similares (como de escala técnica a superior de finanzas).
Defendemos que mentres as persoas aspirantes cumpran cos requisitos esixidos, se permita a promoción horizontal (entre os mesmos ou equivalentes grupos de clasificación), vertical e cruzada (combinando as dúas anteriores), en todos os casos reciprocamente entre corpos xerais-escalas-especial. Rexeitamos, xa que logo, a restrición que aplican.
A distribución xeográfica dos postos de traballo, nomeadamente a concentración en servizos centrais, é tal que en certas localidades existen poucas posibilidades de obter destino. E un ano máis non prevén ningún mecanismo para facilitar a permanencia no posto (reclasificación) ou na localidade, o que incide no pouco interese que poida ter en promocionar quen traballe nunha desas localidades con poucos postos vacantes. En senso contrario, quen ocupe un posto aberto ao grupo superior, estará obrigado a permanecer nel, sen opción de escoller destino voluntariamente.
Estabilización e consolidación
Tantos anos de restricións causaron unhas porcentaxes inaceptables de temporalidade na Administración. Como solucionalo?
- Rexeitamos que a oferta dependa da taxa de reposición, como causa principal da destrución de emprego e do incremento da temporalidade. Para a CIG, a oferta debería ter como único límite, as necesidades reais de persoal.
- Apoiamos a inclusión na OEP da previsión de vacantes por xubilación, como maneira de anticiparnos ao incremento da temporalidade.
E para quen leva xa anos e anos en postos interinos/temporais/indefinidos, fai falla que os responsábeis políticos se aveñan a sentarse a fixar criterios comúns, que non é aceptable que unha convocatoria negociada un día sexa moi diferente da negociada quinte días despois, sen bandazos, sendo fundamental que se fixen os criterios de corrección.
Funcionarización
Un ano máis, comezan polo tellado: o cambio de laboral fixo a funcionario vai ser antes de que haxa un concurso de traslados e unha oferta de emprego previos como persoal laboral.
A Xunta, apoiada en CCOO e UGT, así o decidiron, e pactaron chantaxear a quen non acepte o cambio con non cobrar a carreira profesional, xunto con quedar atado/a ao posto (non convocar nunca máis concursos de traslados como persoal laboral, nin promoción interna ..).
A postura de CCOO e UGT de antepoñer a funcionarización ao concurso de traslados, obrigounos a que a CIG, conxuntamente con CSIF (o que suma maioría no Comité Intercentros do persoal laboral) interpuxeramos unha demanda xudicial contra a Xunta de Galiza polo reiterado incumprimento do disposto no artigo 7.2.a) do V Convenio Colectivo sobre os concursos de traslados. Ligazón
Discapacidade intelectual
Somos conscientes das limitacións destas persoas para desenvolver determinados tipos de traballos. Pero non nos parece correcto concentralas en dúas únicas especialidades: persoal subalterno e especialidade de limpeza e cociña. Seguro que poderiamos atopar algunha especialidade máis.
Pero é que os datos teñen outra lectura: TODA, absolutamente TODA a oferta de persoal subalterno e especialidade de limpeza e cociña está TODA reservada para persoas con discapacidade intelectual, sen opción laboral para quen non teña a discapacidade.
Propuxemos, e non aceptaron, distribuír as prazas de discapacidade intelectual entre máis escalas/especialidades evitando concentrar desta maneira toda a oferta en poucas escalas, e ao tempo incluíndo oferta para persoas sen discapacidade.
OEP-2021 das escalas sanitarias
Nos anos 2018, 2019 e 2020 tamén houbo oferta de emprego para estas escalas de persoal funcionario. Pero, está TODA sen executar, ata o punto de que se non convocan antes de decembro deste ano as prazas da OEP do 2018, caduca e desaparecen as prazas.
Nesta OEP-2021 tamén hai prazas destas escalas, algunhas delas coincidentes con anos anteriores. O lóxico, neste caso, é autorizar a acumulación das prazas, e así, coa suma, podería haber números suficientes para aplicar promoción interna. Reclamamos ás persoas responsábeis políticas que na OEP constase expresamente que teñen que acumular coas ofertas anteriores. Nin caso.
Anexo de prazas da oferta de escalas sanitarias
Estes son os números de prazas por escalas que se ofertarían:
Anexo de prazas da oferta da Dirección Xeral de Función Pública
Os anexos que van de seguido non recollen os cambios anunciados polo director xeral de Función Pública na propia Comisión de Persoal, e que consistirían en pasar unha serie de prazas de promoción interna do anexo I (que irían en convocatoria conxunta co acceso libre), pasa ser convocadas no anexo IV (promoción interna separada). Estes números non son firmes, pois o propio director anuncia unha xuntanza o día 6 de abril, para pechar os números definitivamente. Estes cambios serían: enxeñería agronómica (10), enxeñería superior de montes (10), enxeñería industrial (2), enxeñería de minas (2), inspección de consumo (2), enxeñería técnica de obras públicas (3). Podería incluír algunha de medio rural (incendios) e bibliotecas.
Para rematar, advertimos que a propia convocatoria de OEP autoriza cambios de números entre escalas/especialidades de prazas do Consorcio debido a que os traballos de revisión da RPT non están finalizados (isto pasa como consecuencia de que van adianto as cousas).
Grupos de traballo a dedo e sen luz, para xestionar os fondos europeos de recuperación e resiliencia
- Detalles
Os grupos estarán formados a dedo, sen transparencia na súa composición e nos pagamentos. Así van funcionar os grupos de traballo para a xestión dos fondos de recuperación e resiliencia (FRR), aprobado pola Xunta co apoio de CCOO e UGT, e a oposición de CIG e CSIF, resultado da votación na Comisión de Persoal do 26/03/2021.
O goberno galego vai poñer en marcha uns “grupos de traballo” para a xestión dos FRR e outros fondos europeos. Isto ven derivado da nova Lei de simplificación e reactivación administrativa do PP que pasou polo Parlamento sen negociar, modificando varios artigos da Lei de emprego público ao que nos opuxemos frontalmente, pola mobilidade obrigatoria e pola discrecionalidade, entre outras razóns. Con esta proposta recúan un pouco xa que os grupos estarán formados por persoas voluntarias.
Discrecionalidade e falta de transparencia
A dirección deses grupos vai estar encomendada a quen libremente decida o Goberno galego (en principio, serán subdirectores/as xerais, pero tamén podería ser persoal directivo non empregado público).
Os grupos estarán formados por quen decida a persoa que dirixa cada grupo (tan só ten que motivar a súa decisión). Non van a rendir contas.
Haberá diñeiro de por medio. Nuns casos será mediante produtividade. Noutros serán gratificacións extraordinarias. Non facilitarán información.
Algo que non quedou claro, nin do texto do documento nin da breve explicación que nos deron, foi se formar parte dun grupo de traballo vai implicar un incremento da xornada de traballo. Se non hai incremento, quen forme parte dun grupo vai a deixar de realizar o seu traballo habitual sobrecargando aos demáis?
En resumo:
- Grupos de traballo conformados con total arbitrariedade.
- Non contemplan informar a representación do persoal de quen forma parte de cada grupo.
- Non van dar conta do diñeiro adxudicado en concepto de produtividade ou de gratificación extraordinaria.
- Quedan cousas sen clarificar, e non dan resposta.
Comisión de seguimento
Unha das preocupacións de CCOO e UGT foi reclamar que se constitua unha “comisión de seguimento”, que non constaba nos borradores iniciais. Como non, conseguírono: haberá unha comisión de seguimento formada polos sindicatos asinantes.
Que gañan? Recibirán información sobre os “perfís” dos participantes e dos "criterios" de elección e incentivos económicos, puidendo “emitir” recomendacións.
O que conseguiron é, simplemente, que van a poder opinar sobre como deberían ser os grupos e os pagos. Pero nin van a decidir nin van a ter a información con nome e apelidos de quen forma os grupos, e moito menos dos pagos individualizados.
CCOO e UGT entran así no xogo do goberno: chantaxear aos sindicatos mediante a exclusión da información a quen non trague. Premio á transparencia!
Os pagos polo traballo
Os pagos poden ser en concepto de produtividade ou como gratificación extraordinaria, sendo os importes en función do grupo. Das gratificacións extraordinarias nen sequera contan co persoal subalterno. Pero seguro que van ter que asumir algún traballo.
Lembras o que pasou cando o Prestige: os compañeiros e compañeiras que se metéronse no medio do chapapote, foron gratificados/as. Pero o gran pedazo da pasta levouna a xente que non pisou as praias. Quen vai facer aquí o traballo? E quen vai levar o gordo?
Todo será escuro, non haberá datos de quen traballa e canto pagan polo traballo. Tan só comunicarán (aos sindicatos amigos), os criterios dos incentivos económicos.
A última hora, máis discreción e ocultamento
A negociación foi breve, sen tempo a discutilo, nin a distribuilo e recibir achegas do persoal. Inicialmente non moveron unha soa letra, sen opcións reais de tempo para falar e alegar. Finalmente, o día antes da votación en Comisión de Persoal (venres 26), enviaron un novo borrador que ainda empeoraba o anterior:
- O tempo máximo das comisións de servizo pasa de un a dous anos (entendemos que en contra do disposto no artigo 100 da LEPG).
- Foi nese último borrador onde crean a comisión de seguimento formada polos asinantes.
- Posibilidade de que os grupos de traballo estean dirixidos por persoal directivo non empregado público.
- Da última redacción de quen pode formar parte dos grupos, dubidamos se pode entrar ou non o persoal eventual (persoal dos gabinetes de prensa e asesores de conselleiros/as e delegados/as territoriais). Non dan resposta ás dúbidas da CIG. Tampouco o negan.
Compredemos a necesidade de axilizar e preparar eses grupos de traballo para xestionar os fondos que supostamente van chegar. Pero cando o diñeiro europeo nin sequera entrou no Estado e por tanto ainda menos nas comunidades autónomas, unha semana máis de discusión ben puideron agardar, e chegarmos a algo máis discutido e consensuado.
Hai unha clara decisión política, e teñen capacidade para facelo, de que este diñeiro europeo vaia ser xestionado polas persoas que decidan, dirixidos por quen lles conveña e pagando sen dar contas. E CCOO e UGT votan a favor porque van coñecer os “criterios”.
- Detalles
No DOG do venres 26 de marzo de 2021, saen publicados os acordos dos tribunais coas resolucións das relacións de persoas aspirantes que superaron os procesos de funcionarización de distintas categorías de persoal laboral fixo onde se propón o seu nomeamento como persoal funcionario de carreira.
Estamos na recta final dun proceso iniciado con escurantismo e feito á inversa: comezamos polo nomeamento do persoal e a posteriori dirannos cales van ser as súas condicións laborais.
Dende a CIG esiximos dende un primeiro momento negociar as condicións laborais e salariais como paso previo á funcionarización.
A día de hoxe aínda son moitas as incógnitas que ten o persoal que vai ser nomeado funcionario de carreira. Seguimos sin un concurso de traslados previo como persoal laboral, sin saber a equivalencia entre os pluses do persoal laboral e os complementos salariais do persoal funcionario, cal vai ser o nivel en que encadrarán a cada categoría…
Demasiadas incógnitas e cunha inminente toma de posesión como persoal funcionario, un salto o vacío que da máis que vertixe.
Dende a CIG seguimos esixindo a Administración unha negociación real que lle dea seguridade ós compañeiros e compañeiras de que van ser nomeados persoal funcionario cunhas mínimas garantías de dereitos que son básicos e lexítimos.
Categorías 001, 004, 023, 027, 029, 030 e 031. Director/a de residencia (...), titulado/a superior, documentalista, coordinador/a de actividades externas, xefe/a de departamento de persoal… IGAEM, relacións públicas do IGAEM e titulado/a superior en formación ocupacional.
Categoría 002. Titulado/a superior médico/a. Médico/a xeriatra (...).
Categoría 011. Titulado/a superior pedagogo/a.
Categoría 006. Titulado/a superior psicólogo/a.
Categorías 007 e 037. Titulados/as de grao medio, titulado/a medio/a formación ocupacional.
Categoría 027. Técnico/a superior diplomado/a informática (...).
Categoría 002. ATS. Enfermeiro/a. Practicante. DUE.
Categoría 006. Educador/a. Profesor/a especial.
Categoría 011. Fisioterapeuta.
Categoría 017. Asistente social.
Categoría 020.Terapeuta ocupacional.
Categorías 002, 040, 048, 062. Encargado/a administrativo/a, xefe/a de negociado (...), axudante/a de produción, axente auxiliar de inspeción tributaria, oficial/a administrativo/a, oficial/a 1ª administrativo/a.
Categorías 030, 091. Programador/a, técnico/a especialista en informática.
Categoría 050. Técnico/a especialista en xardín de infancia.
Categorías 001, 028, 030. Auxiliar de gravación. Oficial/a 2ª linotipista (...), auxiliar de produción-dirección e auxiliar de formación ocupacional.
Categoría 003. Auxiliar sanitario. Auxiliar de clínica. Auxiliar psiquiátrico (...).
Categoría 003. Ordenanza, celador/a, vixilante de oficinas (...).
- Detalles
O mércores 24/03/2021 foi aprobada na Comisión de Persoal unha modificacion da RPT de Amtega co voto en contra dos catro sindicatos máis representantivos (CIG, CCOO, CSIF e UGT).
A modificación é froito da adaptación da RPT á integración do persoal do antigo CIXTEC. Nesta proposta veñen os postos de estrutura. Afirman que a modificación polo resto do persoal virá a finais de marzo ou primeiros de abril.
A primeira xuntanza fora o día 24 de febreiro co xerente de Amtega. Déronos prazo para presentar alegacións, que entregamos o 1 de marzo. Tivemos unha xuntanza co director de Función Pública o día 17 de marzo, pasou pola Mesa Sectorial de Negociación ao día seguinte, 18 de marzo, e finalmente Comisión de Persoal o 24.
En total, foron catro xuntanzas, tres borradores e un escrito de alegacións que non serviron para nada. Unha total perda de tempo, pois dende o primeiro ao último día, non moveron unha letra.
A grandes liñas: adaptan os postos de estrutura do CIXTEC a AMTEGA, crean/modifican postos de nivel 28 e superiores, todos libre designación ou persoal directivo, a inmensa maioría abertos a outras administracións.
Rexeitamos a figura do persoal directivo, rexeitamos a cobertura sistemática dos niveis 28 mediante libre designación, rexeitamos á apertura a outras administracións de todos os postos altos. Lembramos que as anteriores xefaturas de departamento do CIXTEC eran de concurso específico, e nesta modificación pasan a ser de libre designación.
Defendemos unha administración profesional, con menos libre designación, con apertura a outras administracións cando haxa reciprocidade e repartidos entre niveis altos e baixos, a cubrir mediante concurso (que non faga falla ter amigos ou ser do partido para vir doutra administración).
- Detalles
O Goberno de Feijoo decidiu incrementar o nivel retributivo das seis xefaturas de Unidade de inspección de Atriga, que pasan do nivel 26 ao 27, e das 12 subxefaturas de Unidade de inspección, que incrementan do nivel 24 ao 25.
A proposta de modificación da RPT de Atriga foi aprobada na Comisión de Persoal do mércores 24 de marzo, co voto en contra de CIG e CSIF, abstención de CCOO e voto favorable de UGT.
A proposta votada inclúe a apertura a A2 (escala técnica de finanzas) dos cinco postos de delegado/a de Coruña, Lugo, Ourense, Pontevedra e Vigo, que só podían ser cubertos por A1. Tamén supón a retirada do mérito por “experiencia en materia tributaria” en 22 postos (todos de A1 e A2).
A CIG non se opón ao incremento retributivo destas 18 xefaturas e subxefaturas de unidade de inspección. Apoiamos tamén as aperturas decididas (A1/A) e a retirada das experiencias na RPT.
Porén, .. non hai máis traballadores e traballadoras que tamén se merecen ver melloradas as súas retribucións? Non sería procedente unha negociación máis global dos niveis retributivos de todos os postos?
Satisfácenos a mellora destes compañeiros e compañeiras. Pero os responsábeis políticos de Atriga e Función Pública néganse a falar sobre as retribucións do conxunto do persoal, de Atriga, e da totalidade da Administración galega.
- Detalles
O Tribunal Superior de Xustiza de Galiza obriga a incluír ao persoal funcionario interino e laboral temporal da Xunta de Galiza no ámbito do sistema extraordinario da carreira profesional.
O Acordo de concertación asinado entre a Xunta CCOO e UGT e o seu desenvolvemento co Acordo entre a Xunta de Galiza e as organizacións sindicais CC.OO. e UGT para a implantación do réxime extraordinario de acceso ao grao I do sistema de carreira profesional, excluía ao persoal funcionario interino e laboral temporal do dereito a solicitar e integrarse no sistema de carreira profesional, e por tanto de cobrar a mesma. O determinante para acceder, segundo a sentenza, non é si o posto se desempeña con carácter fixo ou temporal, senón as competencias e o desempeño do persoal.
Esta foi unha das razóns polas que a CIG non asinamos este acordo, ademais de condicionar ao persoal laboral fixo coa obriga da funcionarización para acceder ao sistema extraordinario, chantaxe pola que tamén interpuxemos outra demanda ante o TSXG, e da que estamos pendentes do xuízo.
O Tribunal Superior de Xustiza de Galiza estimou a nosa demanda nunha sentenza demoledora. Con este novo golpe xudicial á Xunta, demostramos que non valen as chantaxes e que non se poden excluír ao persoal laboral temporal e funcionario interino o dereito a carreira.
Tamén no caso do Consorcio temos xa a primeira sentenza gañada recoñecendo o dereito ao persoal fixo a acceder ao sistema extraordinario de carreira profesional, algo que con esta nova sentenza do TSXG cobra máis forza.
Dos fundamentos de dereito se desprende que a aplicación do sistema extraordinario ten que abranguer con carácter universal a todo o persoal, independentemente do seu vínculo xurídico, sempre que cumpra os requisitos de ter cinco anos de antigüidade e os fixados no artigo 2 do acordo, sen que caiba discriminar por razón da existencia dun vínculo temporal ou permanente coa administración.
A sentenza non declara a nulidade da Orde, polo que todo o persoal que xa accedeu ao sistema extraordinario conserva os seus dereitos e seguirá cobrando a carreira profesional, pero si anula “... por contraria ao ordenamento xurídico, a mencionada Orde, na medida en que se exclúe ao persoal laboral temporal e aos funcionarios interinos…”, e por tanto obriga a incluír a este persoal no seu ámbito subxectivo.
Parece inconcibible que CCOO e UGT sacrificaran a este persoal nun acordo discriminatorio.
Dende a CIG esiximos á Xunta de Galiza que se sente a negociar a inclusión de todo o persoal no ámbito subxectivo do sistema extraordinario e que se recoñeza o dereito deste persoal con carácter retroactivo dende o 1 de xaneiro de 2019.
De paso que isto serva de acicate para sacar a CCOO, UGT e á Xunta do limbo da inacción e se poña en marcha xa o sistema anticipado para o acceso ao grao II para todo o persoal, incluíndo as persoas dos subgrupos A1 e A2.
E tamén lle esiximos que non recorra a sentenza no Tribunal Supremo, tendo en conta xa a clara xurisprudencia ao respecto, exposta nos propios fundamentos da sentenza, e que non trate de prolongar a denegación dun dereito ao persoal que eles, CCOO e UGT excluíron.
Os nosos servizos xurídicos están a estudar as posibilidades para que se faga efectiva esta sentenza, xa sexa mediante negociación ou mediante accións individuais. Nos vindeiros días seguiremos informando.
- Detalles
A CIG e o CSIF acordamos presentar unha demanda xudicial contra a Xunta de Galiza polo reiterado incumprimento do disposto no artigo 7.2.a) do V Convenio Colectivo sobre os concursos de traslados.
A Xunta leva dez anos sen convocar o concurso de traslados do persoal laboral provocando gravísimos prexuízos aos traballadores e traballadoras, como a adxudicación en destino provisional ás persoas aspirantes que superaron procesos de acceso libre ou promoción interna, cando o Convenio Colectivo establece taxativamente que ten que ser destino definitivo. Alén diso o persoal vese na obriga de solicitar, unha e outra vez, as adscricións temporais como medida paliativa á falta dun concurso de traslados.
O persoal laboral do grupo V leva sen convocatoria do concurso de traslados desde o ano 2011 e, no caso dos grupos I ao IV, desde o ano 2012.
O acordo da CIG e a CSIF para a denuncia xudicial vén precedido por reiteradas solicitudes feitas nos últimos anos para que a Dirección Xeral da Función Pública dera cumprimento á normativa vixente que establece o concurso de traslados como o “sistema normal de provisión de postos de traballo”.
É incomprensible que a Xunta de Galiza, co beneplácito de CCOO e UGT, pretendan convocar e resolver procesos de funcionarización ou procesos selectivos de acceso libre, estabilización ou de promoción interna sen ter convocado previamente un concurso de traslados que garanta os dereitos do persoal a mobilidade e ao cambio de categoría para todos os grupos, conforme o disposto no artigo 7.2.a) do V Convenio Colectivo.
Enviamos un comunicado conxunto a medios co anuncio da demanda. Esperemos que a Xunta recúe, e que CCOO e UGT se dean conta dunha vez do dano que coa súa participación están a facer ao persoal da Xunta de Galiza.
- Detalles
É a sétima encomenda de xestión a TRAGSATEC, neste eido, desde 2018
A CIG Autonómica presentou un recurso -que foi admitido a trámite- perante a sala do Contencioso do Tribunal Superior de Xustiza de Galiza, contra a consellaría de Cultura, por realizar reiteradas encomendas de xestión a TRAGSATEC para realizar traballos que son propios de persoal funcionario da consellaría.-
Lembramos que na Dirección Xeral de Patrimonio cultural existe un órgano denominado Comisión do Patrimonio Histórico e dos Camiños de Santiago, que é o encargado entre outras competencias de elaborar os expedientes de autorización de obras que se acometan no ámbito de influencia dos camiños.
Normalmente estes expedientes levan un informe arquitectónico dos elementos construtivos que se acometen e se a obra afecta a un elemento patrimonial (castro, petróglifos, mámoas, etc) tamén é preceptivo un informe arqueolóxico feito polo persoal técnico da consellería.
Persoal insuficiente
Porén, o número de arqueólogas e arqueólogos (arredor de 15 entre servizos centrais e xefaturas territoriais) é manifestamente insuficiente para cubrir todas as necesidades de inspección e elaboración de informes. Unha situación agravada polo aumento enorme de expedientes de obra co recoñecemento e delimitación de máis camiños que o francés e co aumento da distancia de influencia.
A Administración foi incapaz de aumentar o número de efectivos nas reformas de RPT acontecidas desde 2012, por mor do mantemento da taxa de reposición. O único que se puido conseguir, no 2019, foi que se crearan dúas novas prazas de arqueoloxía na RPT que non chegan para cubrir a demanda e atraso na elaboración de informes.
Así a Dirección Xeral no ano 2018 comezou a recorrer á perversa figura da encomenda de xestión a Tragsatec, que foi renovando até o día de hoxe con 6 encomendas que pasan do millón de euros.
Nova encomenda en decembro
De feito, o pasado 31 de decembro o DOG daba publicidade a unha nova encomenda á empresa TRAGSATEC para, segundo o DOG, “a execución do servizo técnico cualificado para a análise e informe das intervencións que se pretendan realizar en bens de interese cultural ou catalogados, así como, de ser o caso, no seu contorno de protección ou na súa zona de amortecemento.”
Un traballo que tería que ser realizado por arquitectas/os e arqueólogas/os funcionarias/os, pero que se externaliza a empresa que non ten entre os seus fins realizar traballos deste tipo.
Tragsatec é unha filial da empresa pública Tragsa; que nos seus estatutos non contempla expresamente o fin de actuacións técnicas en arqueoloxía, senón un fin xenérico de Patrimonio Histórico no medio rural; sendo os informes a elaborar tanto no medio rural como no urbano.
O escandaloso desta nova encomenda de xestión é que é a sétima desde xullo de 2018, e está en vigor de xeito ininterrompido desde o 1 de marzo de 2019, ao terse renovado de continuo por períodos de tres, catro ou seis meses. Deste xeito, converteuse no funcionamento normal da administración, e ao remate desta encomenda cumprirá xa máis de tres anos en vigor.
Con isto, destináronse xa máis dun millón e medio de euros das galegas e galegos para esta contratación dunha administración paralela. Estas son as cifras que recollen o DOG e mais o portal de transparencia:
O peor destas encomendas é a arbitrariedade que parecen reflectir as cifras que custan estes contratos xa que unha encomenda de seis meses que en 2018 custou 261.000 €, en 2019 fíxose por 159.000, en 2020 custou no primeiro primeiro 395.000, e no segundo 308.000 e en 2021 valerá 409.000 €, cunha opacidade total no numero de persoal ou datos da encomenda.
Entre mentres, tanto a Dirección Xeral de Patrimonio Cultural como os respectivos servizos de Patrimonio Cultural das xefaturas territoriais son unidades infradotadas de persoal nas que, aínda por riba, a Xunta de Galiza se permite o luxo de crear novas prazas pero non dotalas de persoal.
Unha praza de arqueóloga/o creada na modificación da relación de postos de traballo de setembro de 2017 estivo sen cubrir ata finais do ano 2020 e outras dúas de arqueóloga/o e tres de arquitecta/o, creadas na modificación relación de postos de traballo de decembro de 2019, estiveron vacantes e sen cubrir en todo o ano 2020 e aínda a día de hoxe non parece haber previsión para cubrir as de arquitecta/o. Por outra banda, tampouco se cubriron baixas de longa duración deste persoal, algunhas das cales aínda seguen activas a día de hoxe.
Funcións propias de persoal funcionario
A CIG-Autonómica denunciamos ademais que o persoal arqueólogo de TRAGSATEC está emitindo informes técnicos sobre as obras e actuacións que afectan a bens integrantes do patrimonio cultural de Galiza. Informes que no caso do patrimonio arqueolóxico refírense a bens que teñen a consideración de dominio público, aos que a Dirección Xeral está dando a mesma validez que aos elaborados polo persoal de arqueoloxía da Xunta e sobre os que se basea a directora xeral para resolver solicitudes.
Xunto a isto denuncia tamén que persoas de TRAGSATEC están mesmo a participar presencialmente como relatoras de asuntos que se levan ao Consello Asesor dos Camiños de Santiago.
Para a Xefatura Territorial de Pontevedra tamén están a autorizar as actividades arqueolóxicas, cando o Decreto 199/1997 que regula a materia indica expresamente (artigo 8) que a DXPC, "á vista do informe previo do Servizo de Arqueoloxía, resolverá as solicitudes para efectuar as actuacións arqueolóxicas".
Contratación a través de portais web
Cómpre lembrar que Tragsatec non tiña persoal propio para executar esta encomenda e tivo que realizar a contratación a través dun famoso portal web (infojobs) e mediante un sistema de selección máis que cuestionable (entrevistas persoais).
Anuncios como os publicados o 01.06.2018; o 27.09.2018; o 01.05.2019; ou o 11.07.2019 demostran que Tragsatec non conta con persoal especializado en arqueoloxía e que se nutre de efectivos nas páxinas de contratación temporal como Infojobs e outras.
