- Detalles
A directora xeral de Emprego Público e Administración de Persoal convocounos a unha xuntanza da Mesa Sectorial de Persoal Funcionario que será o venres 06/06/25, coa seguinte Orde do día:
1. Proposta de Acordo para o persoal adscrito ao Parque Nacional Marítimo Terrestre das Illas Atlánticas de Galiza. Descargar
2. Proposta de Acordo polo que se aproba a modificación da Relación de Postos de Traballo da Consellería de Medio Ambiente e Cambio Climático. Descargar
3. Proposta de Resolución pola que se convoca concurso ordinario para a provisión de postos vacantes das escalas/especialidades (escalas sociais) de medicina, psicoloxía, pedagoxía, enfermaría, fisioterapia, traballo social, educador/a social, educador/a infantil, terapia ocupacional, educación infantil, gabernante/a, auxiliares de clínica. Descargar (inclúe bases e postos)
Se é do teu interese, contacta coa CIG.
- Detalles
A CIG acode á Valedora do Pobo ante a negativa da Administración de rectificar sobre a contratación de persoal sen titulación nas cociñas escolares.
Coa presentación dunha queixa ante a Valedora do Pobo pedimos que interveña para que as persoas responsables da Consellería de Educación, Ciencia, Universidade e Formación Profesional se senten a negociar unha saída xusta á chapuza da funcionarización que artellaron e que rebaixou profesionalmente as escalas de cociña. Con esta decisión deixaron ás cociñeiras e cociñeiros na escala do subgrupo C2, polo que agora ás novas contratacións so lle piden ESO (Ensinanza Secundaria Obrigatoria).
Consecuencia do anterior, neste curso levamos xa varias ofertas de emprego para a escala funcionarizada no C2 ( Escala Auxiliar de cociña ) sen ningún requisito de titulación académica en cociña. Polo que as dietas especiais, intolerancias, control de alérxenos, seguridade e hixiene alimentaria non están garantidas nos comedores escolares públicos da Xunta de Galiza, por colocar aos C2 como responsables das cociñas dos centros de ensino. E amais esta medida provoca a rebaixa profesional nas cociñas dependentes da Xunta de Galiza debilitando a calidade dun servizo público fundamental para familias e crianzas e pondo en risco a súa saúde e nutrición .
A análise da CIG é que o problema ven derivado da incorrecta clasificación do persoal no grupo que lle correspondería por titulación e segundo recolle o EBEP (o Ciclo superior de cociña no grupo B e o Ciclo medio de cociña no C1) Así como que a creación de prazas e a asignación de escalas nos centros foron feitas sen criterios obxectivos e sen ter en conta a carga de traballo.
Requirimos da valedora que esixa buscar unha solución urxente xa que, ademais do anterior, as cociñas e comedores públicos, teñen a obriga de implantar un sistema APPCC (Análise de Puntos de Control Críticos) e un Programa de Seguridade Alimentaria que inclúe a rastrexabilidade dos alimentos, e boas prácticas na manipulación de alimentos.
O Goberno galego e a propia consellería proclaman que a Formación Profesional na Galiza é unha prioridade estratéxica da política educativa e de formación pero, polo que se ve, non para o seu propio persoal xa que prefire contratar persoas sen titulación técnica nas súas cociñas.
- Detalles
No DOG do 02/06/2025 publican a RESOLUCIÓN do 26 de maio de 2025, da Dirección Xeral de Emprego Público e Administración de Persoal, pola que se convoca o concurso ordinario para a provisión de postos de traballo vacantes de corpos e escalas de Administración especial da Administración xeral da Comunidade Autónoma de Galiza: escalas de arqueólogos, técnica de restauración, técnica de delineantes, de facultativos de arquivos, bibliotecas e museos; de axudantes de arquivos, bibliotecas e museos; técnica de arquivos, bibliotecas e museos, e de auxiliar de arquivos, bibliotecas e museos.
Os postos vacantes ofertados neste concurso publícanse no anexo I desta resolución.
As persoas interesadas poderán solicitar por orde de preferencia os postos ofertados no anexo I desta convocatoria aos que se engadirán as potenciais resultas consecuencia das solicitudes de participación presentadas. Considéranse postos de resultas os postos de traballo cuxo sistema de provisión sexa o concurso ordinario e que estivesen ocupados con carácter definitivo por aquelas persoas participantes que obteñan un posto de traballo como consecuencia da adxudicación do concurso.
Incluiranse tamén como potenciais resultas os postos de traballo que teñan adscrito persoal funcionario por motivos de saúde ou rehabilitación, e estará condicionada a súa adxudicación a que a persoa funcionaria adscrita obteña un posto na resolución do concurso.
A relación de postos ofertados en resultas publicarase na web corporativa da Dirección Xeral de Emprego Público e Administración de Persoal, no enderezo https://www.xunta.gal/ funcion-publica/concurso-de-traslados/
A solicitude, e de ser o caso a documentación adicional, deberá presentarse electronicamente a partir do día seguinte ao da publicación da convocatoria no Diario Oficial de Galiza e ata o día 16 de xuño de 2025 incluído, e dirixirse á Dirección Xeral de Emprego Público e Administración de Persoal da Consellería de Facenda e Administración Pública.
- Detalles
No DOG do 02/06/2025 a EGAP publica a RESOLUCIÓN do 30 de maio de 2025 pola que se convoca o programa de autoformación para o persoal ao servizo da Administración pública da Comunidade Autónoma, das entidades públicas instrumentais, da Administración institucional de Galiza, da Administración de xustiza, das entidades locais e o persoal técnico, de xestión e de administración e servizos (PTXAS) das universidades do Sistema universitario de Galiza (SUG).
A inscrición para o acceso aos contidos poderá facerse en calquera momento a partir do día 13 de xuño de 2025, día seguinte ao da finalización do prazo de matrícula da proba de avaliación das actividades do programa de autoformación.
Cada persoa determinará libremente o número de actividades en que se queira inscribir e o período durante o cal vai traballar na actividade ou actividades do programa de autoformación elixidas.
Pode participar nas probas de avaliación das actividades do programa de autoformación o persoal ao servizo da Administración pública da Comunidade Autónoma, das entidades públicas instrumentais, da Administración institucional de Galiza, da Administración de xustiza, das entidades locais e o persoal técnico, de xestión e de administración e servizos (PTXAS) das universidades do Sistema universitario de Galiza (SUG), que se encontre en situación de servizo activo (incluído o persoal que teña concedido un permiso por motivos de conciliación da vida persoal, familiar e laboral) e reúna os requisitos establecidos nesta convocatoria. Está exceptuado o persoal docente da Consellaría de Educación, Ciencia, Universidades e Formación Profesional, o persoal das escalas dos corpos da policía de Galiza e o persoal do Servizo Galego de Saúde, non entendendo por tal o persoal empregado público da escala de saúde pública e administración sanitaria, creada pola Lei 17/1989, do 23 de outubro, de creación de escalas de persoal sanitario ao servizo da Comunidade Autónoma de Galiza.
O prazo de presentación de solicitudes de participación nas probas de avaliación será desde o día seguinte ao da publicación desta resolución no Diario Oficial de Galiza e ata o 12 de xuño de 2025.
- Detalles
Dende a convocatoria do anterior concurso de traslados en decembro do ano 2012, e posterior resolución en febreiro de 2014, non houbo máis concursos de traslados ordinario das escalas de axentes facultativos ambientais e axentes forestais, ata o actual, convocado o 05/12/2023. Toda unha década que forza a buscar comisións de servizos como a única maneira de solucionar os problemas de mobilidade.
Coa convocatoria do actual concurso, en decembro do 2023, o persoal funcionario tivo a expectativa de poder optar a mellores postos, solucionar situacións familiares, ou simplemente planificar a súa vida.
Pasou xa ano e medio dende a convocatoria dun concurso que non chega a 600 efectivos. O número de vacantes ofertadas é de 123, e o de participantes (segundo o número de prazas ofertadas en resultas), é de 230. E con eses números, para sacar o listado definitivo de persoas admitidas e excluídas, vai xa un ano e case dous meses dende que o día 5 de abril de 2024 publicaran o listado provisional de persoas admitidas e excluídas.
A maiores do exposto hai 96 persoas da oposición convocada e case rematada que non poden coller praza mentres non se resolva este concurso.
Entendemos que a paralización total dun concurso dende fai máis dun ano, no que participan 230 persoas é algo inaceptable.
A CIG esixe á Dirección Xeral de Emprego Público e Administración de Persoal que se poña as pilas, tanto para resolver este concurso (non moi grande), como todos os demais que están en execución, e a convocatoria inmediata dos que están pendentes de convocar.
- Detalles
Na Comisión do pasado mércores 28 de maio informaron que neste mes vanse publicar as listas provisionais de funcionarización (das que hubo que presentar solicitudes). Non informan da data só que será antes da próxima reunión da Comisión, que será o 2 de xullo.
Tamén se van a modificar varios acordos para adecualos á lexislación vixente e por causa de sentenzas xudiciais firmes. Non dan máis información de como van quedar os textos pero a intención é aprobalos na comisión de xullo.
Por último, a subdirectora comentou que teñen intención de negociar un novo decreto, máis tampouco informou de como nin cando sería.
- Detalles
Publicado o Real Decreto 402/2025 que regula o procedemento previo para determinar os supostos para xubilación anticipada mediante coeficientes redutores.
Confírmase o recorte nas pensións ao non recoñecerse a xubilación anticipada nin garantirse os coeficientes nos traballos máis penosos. O novo Real Decreto recolle os criterios para que os traballadores de actividades penosas, perigosas ou insalubres teñan a posibilidade de acceder á xubilación anticipada, determina se ese colectivo ou actividade poderá ter dereito aos coeficientes redutores, pero non contempla un procedemento para a súa aplicación directa.
Na perigosidade da actividade terase en conta a incidencia de baixas no colectivo tanto por continxencias comúns como por profesionais e sucesos graves con resultado de morte ou incapacidade permanente.
Un procedemento previo e complexo
O procedemento resulta extremadamente longo e difícil, consta de tres partes que son o inicio da solicitude, emisión de informes da Seguridade Social, do Instituto Nacional de Seguridade e Saúde no Traballo e para persoal da Administración requírese tamén do Ministerio de Traballo e Administración Pública. Despois dun trámite de audiencia e alegacións remitirase a unha Comisión de avaliación que emitirá unha resolución do procedemento que permitirá iniciar o trámite de rebaixa da idade de xubilación. Sinala como mínimo seis meses unha vez iniciado e que de non conseguilo non se poderá iniciar outro en 4 anos.
Estará disposta a nosa Administración a cotizar máis?
Esixe cotizacións adicionais polo que o financiamento das xubilacións anticipadas recaerán no persoal e na Administración, aumentando a cantidade a aportar polos/as traballadores/as e pola Administración.
Como no noso caso, as que están lexitimadas para iniciar o procedemento son conxuntamente as organizacións sindicais máis representativas e a Administración da Xunta…a pregunta é inevitable: estarán dispostas as consellerías a pagar máis e a solicitalo?
A Comisión de avaliación sen representación da Galiza
Dende a CIG-Autonómica levamos anos loitando pola xubilación anticipada naqueles colectivos que, polas características do seu traballo, son susceptibles da aplicación de coeficientes redutores. Promovimos facelo mediante leis con accións no Congreso para que os aplicaran de forma directa como foi o caso do persoal gardacostas ou o do sector sociosanitario. Ambos foron bloqueados politicamente á espera desta regulación que agora vemos que ademais de ser complexa, deixa fóra da comisión de avaliación ás organizacións sindicais que temos un ámbito autonómico polo que o persoal da Galiza vai quedar desamparado, outra vez, fronte intereses estatais.
Unha reforma das pensións - outra vez - con trampa
Lembramos que a xubilación anticipada para traballadores/as de determinadas profesións penosas foi a compensación prometida polo Goberno e o axentes do Pacto Social no seu Acordo de pensións. Era a compensación para os/as traballadores/as de profesións máis duras despois de alongar até os 67 e endurecer a xubilación ordinaria ao necesitar máis tempo de cotización para cobrar o 100% e reducir a contía das nosas pensións, xa que aumenta o tempo para o seu cálculo a 29 anos. Resulta lamentábel que UGT e CCOO teñan avalado este acordo e ao tempo, de xeito cínico e hipócrita, chamen á mobilización en sectores como a construción ou o transporte para que se recoñezan coeficientes redutores da idade de xubilación, cando estes sindicatos son colaboradores da normas que restrinxen este dereito.
|
A inxustiza do noso persoal do mar. Un exemplo de loita contra a discriminación é a do persoal gardacostas que por ser funcionarios públicos están excluídos do réxime especial do mar. A esta inxustiza súmase agora a do persoal patrón e mecánico funcionarizado da Consellaría de Medio Ambiente e Cambio Climático, ademais de mergulladores e outros empregados públicos que traballan no mar e que nos seus postos laborais si tiñan acceso ao Réxime Especial do Mar coa súa xubilación anticipada. Seguimos na loita e xa estamos a preparar accións polo Real Decreto 402/2025 recentemente aprobado... Non hai dereito que o noso persoal do mar se xubile aos 67 anos simplemente polo seu réxime xurídico! |
- Detalles
O martes 3 de xuño quedará aprobado, previsiblemente, o modelo de bases dos concursos específicos (CE), un documento que permitirá ás consellerías convocar cada un dos 800 postos de CE cando queiran (se é que queren), e con criterios tan flexibles que poderán “personificalos” posto a posto
A proposta xa pasou en xaneiro pola Mesa Sectorial de Negociación, con apenas un día para o seu estudo polos sindicatos. Tras as alegacións que presentamos e outro borrador, agora ven á Comisión de Persoal para a súa aprobación.
A CIG asinou no ano 2008 coa Xunta do bipartito, un acordo polo que os postos de nivel 28 (xefaturas de servizo) e inferiores, pasaban a ser de concurso ordinario. En canto Alberto Núñez Feijoo foi nomeado Presidente da Xunta no ano 2009, unha das primeiras decisións en materia de persoal que tomou foi restaurar a libre designación como a forma de provisión das xefaturas de servizo.
Coa aprobación da Lei do emprego público de Galiza no 2015, creouse o concurso específico como a forma de provisión pensada principalmente para a cobertura de postos de xefatura de servizo (hai tamén seccións e direccións de centros) que non se cubriran polo procedemento de libre designación. Esta nova forma de provisión requería un desenvolvemento posterior que non foi impulsado ata que a Dirección Xeral de Función Pública presentou ás organizacións sindicais no ano 2019 unha proposta e, sen existir negociación real, foi aprobado e publicado en setembro de 2022 o Decreto 151/2022, coñecido como Regulamento de mobilidade.
Chegados ao momento actual, temos máis de 800 postos con concurso específico como a súa forma de provisión cubertos por comisións de servizos. Esa foi a causa da pouca présa que tiveron en regular e convocar os concursos específicos: poder manter ocupados un montón de postos en comisión de servizos, e non só os de concurso específico, senón os de concurso ordinario que están bloqueados ao estar as persoas titulares ocupando os postos anteriores.
Como resumo dos parágrafos anteriores, a CIG mantén a súa idea do ano 2008, de que agás excepcións motivadas, o concurso ordinario sexa a forma de provisión das xefaturas de servizo. Rexeitamos, xa que logo, o concurso específico como forma de provisión, por considerar que en realidade é unha libre designación cunha estabilidade mínima de cinco anos. E rexeitamos que a Xunta se negue a poñer un prazo de tempo para que as consellerías estean obrigadas a convocar os postos permitindo así a liberación de moitos outros retidos polas comisións de servizos.
Recapitulando moito, e se as cousas quedan como a Xunta propón, as características deste modelo son as seguintes:
- Os postos poderán seguir ocupados, como ata agora, en comisión de servizos, pois nada obriga ás consellerías a convocar os postos nun prazo determinado
- Limítase a indicar cales son os méritos a valorar, pero non a súa ponderación, polo que cada consellería poderá adaptar a puntuación personificándoa para cada posto a cubrir (un "dime como te chamas que eu che busco o posto")
- Cada consellería decide como quere valorar os méritos para cada posto. Vai poder adaptalos ao seu gusto, posto a posto. Ten suficiente capacidade para seleccionar a quen queiran. Será unha libre designación, con estabilidade no posto por 5 anos
Indo un pouco máis polo miúdo, esta é a visión da CIG que orientou o proceso de negociación:
Prazo para a cobertura dos postos
A Xunta négase a establecer un marco temporal de aplicación, de xeito que todas as prazas de concurso específico teñan que ser convocadas e provistas nun período de tempo que, a criterio da CIG, non debera exceder dun ano. Con esta decisión, as prazas poden seguir indefinidamente ocupadas en comisión de servizos.
Comisión de valoración
Para a selección das persoas constitúese unha comisión de valoración formada por cinco persoas, das que catro son propostas pola consellería convocante do posto, e unha pola Dirección Xeral de Emprego Público e Administración de Persoal (DXEP). Isto, sumado á elevada capacidade das consellerías á hora de definir a puntuación de cada epígrafe, eleva enormemente as posibilidades de endogamia e amiguismo ("fan a festa e botan os foguetes").
Na negociación defendimos que: o proceso estivese tutelado e con máis participación da DXEP, non pola consellería convocante; que participase unha persoa proposta polos sindicatos; e en todo caso, rexeitamos que as persoas superiores directas dos postos a cubrir poidan participar na comisión de valoración no caso de que se presenten persoas que estiveron baixo a súa xerarquía.
Fases do concurso
O proceso consta de dúas fases. A primeira consiste na valoración dunha serie de méritos obxectivables. A segunda é de valoración claramente subxectiva. A consellería convocante decide a puntuación máxima de cada fase (e a puntuación individual de cada ítem).
A CIG reivindica que a primeira fase, por ser a obxectiva, sexa valorada ao máximo posible respecto da segunda fase. É máis, por nós, a segunda fase non existiría. En todo caso, defendemos que a porcentaxe de cada fase e de cada ítem individual veña fixada no modelo, de xeito que non quede a criterio de cada consellería segundo lle interese na convocatoria de cada posto.
Valoración de cada mérito
O conxunto do documento está cheo de falta de concreción na valoración de cada un dos méritos a valorar. Así, a consellería decidirá para cada praza como queren valorar a antigüidade, a formación, a titulación, as medidas de conciliación, os idiomas, etc.
A CIG rexeita que as consellerías poidan facer o que lles veña en gana; rexeitamos que as consellerías poidan “axustar” a valoración personificando cada mérito para a provisión de cada posto.
Comisión de servizos
Solicitamos que tras a obtención dun posto por concurso específico se impida durante un tempo por determinar a obtención dun novo posto mediante comisión de servizos.
Na CIG rexeitamos radicalmente a consideración como mérito do tempo traballado en comisión de servizos, pois esta figura de cobertura temporal de postos está sometida a unha absoluta discreción. Negámonos a que dea lugar a un recoñecemento de méritos mentres non academos un pacto que regule a concesión obxectiva das comisións de servizo.
Segunda fase (memorias e currículos)
Para a segunda fase, de valoración subxectiva, apostamos pola súa eliminación. E mentres non poida ser, optamos por adxudicarlle o mínimo de puntuación posible.
Defendimos que as memorias e os currículos que deben presentar as persoas candidatas, poidan ser accesibles (sen os datos máis persoais), con indicación da puntuación asignada a cada unha delas, co obxectivo de poder vixiar minimamente a puntuación adxudicada.
Non concordamos con que o procedemento para a presentación da documentación sexa fixado por cada consellería segundo considere na convocatoria para cada posto. Polo menos, as partes máis básicas do procedemento deben estar reguladas pola DXEP neste modelo de convocatoria.
Cos mesmos argumentos que para a primeira fase, demandamos que os baremos do total e de cada parte desta segunda fase estean tamén definidos pola DXEP, e non a decisión personalizada da consellería para a cobertura de cada posto.
En definitiva, como grandes ideas para a CIG, este modelo de concursos específicos require:
- Establecer un marco temporal de aplicación
- Fixar a puntuación de cada mérito, de xeito que as consellerías non poidan adaptalo segundo gustos
- Que a DXEP teña maior capacidade, e menos cada consellería
- Potenciar a primeira fase. Minorar ao máximo (se non pode desaparecer), a segunda fase
- Rexeitar todo mérito obtido en comisión de servizos
Se é do teu interese, aquí podes descargar o modelo de bases de concursos específicos que vai á Comisión de Persoal do 03/06/25: descargar.
- Detalles
Cando o que importa non é o servizo, senón trincar pasta!
Recentemente, veñen de publicarse dúas novas no DOG (Resolución do 12 de maio de 2025 e a Resolución do 23 de abril de 2025) que fan referencia a que os concursos polos que dous centros de menores, o de Casa da Quintán en Ponte Caldelas (oito prazas) dirixido a menores con medidas de protección e problemas de saúde mental e o de Concepción Areal de A Coruña, centro de reeducación para menores que teñan que cumprir medidas privativas de liberdade (trinta e cinco prazas) quedan desertas.
Ante esta aposta decidida pola Xunta de Galiza de optar pola privatización destes centros, agora faise evidente que a vía de dar entrada ás corporacións privadas para o concerto de servizos públicos presenta serías eivas. Estas empresas respostan ao sentido primeiro e inherente á súa condición de máquinas de facer cartos procedendo, ante a grande oferta que a Xunta lles fai coas múltiples privatizacóns de servizos do eido social, a elixir concursar naqueles concertos que son máis rendibles en termos económicos ou menos problemáticos no seu desenvolvemento.
Fronte este estado de cousas, a Xunta ten dúas posibilidades: entrar no regateo con estas empresas, ben rebaixando as condicións nas que se deben prestar os servizos ou ben incrementando as contías dos concertos, que será o máis probable dada a deriva privatizadora desta Xunta.
Á única vía que pode garantir plenamenmte os dereitos das persoas usuarias e uns servizos públicos eficientes e de calidade é a xestión pública deste servizo.
O principal obxectivo que se debe acadar é a protección integral das e dos menores, das que a Xunta ten a tutela e a "subroga" a empresas que se fan coas licitacións.
Como podemos deixar a menores vulnerables e tutelados pola administración en mans privadas como se fose un contrato de limpeza de instalacións?
- Detalles
Dende a Dirección Xeral de Emprego e Administración de Persoal comunícannos que, o vindeiro venres, día 2 de xuño publicaranse no Diario Oficial de Galicia as seguintes resolucións:
- Resolución do 26 de maio de 2025 para a presentación de solicitudes de elección de postos e xustificación da posesión de méritos do concurso F0125, escalas de profesores numerarios e mestres de taller de institutos politécnicos marítimo-pesqueiros e de axentes de extensión pesqueira.
- Resolución do 26 de maio de 2025 pola que se convoca o concurso F0225 para a provisión de postos vacantes das escalas de arqueólogos; técnica de restauración; técnica de delineantes; de facultativos de arquivos, bibliotecas e museos; de axudantes de arquivos, bibliotecas e museos; técnica de arquivos, bibliotecas e museos; auxiliar de arquivos, bibliotecas e museos.
