As tres federacións que compoñen a área pública da CIG (ensino, administración e saúde) fixemos público hoxe, día 14 de maio, os seguintes actos en contra das medidas anunciadas polo goberno central de redución de salarios ás empregadas e empregados públicos e a favor do emprego e dos servizos públicos.
Así mesmo convocamos a todas as organizacións sindicais con representación nos distintos sectores (ensino, administración e saúde) da administración pública galega a unha reunión a celebrar o próximo martes para poñer en común e acordar medidas conxuntas en resposta a agresión que supoñen as medidas tomadas polo goberno Zapatero.
A intención da CIG nesta reunión é propor medidas que vaian máis alá das anuciadas, facendo unha proposta máis ampla de mobilizacións, tanto na propia administración pública como no resto do mundo laboral, desembocando nunha folga xeral.
A CIG fai un chamamento á unidade sindical de cara a unha convocatoria de folga xeral contra as medidas adoptadas polo goberno
A Confederación Intersindical Galega ten convocado para o vindeiro martes día 18 de maio, ás 11:00 horas a todas as centrais sindicais, para abordar unha resposta conxunta e contundente ás medidas que vén de facer públicas o goberno.
A CIG entende que é necesaria a mobilización e a unidade sindical para frear a imposición destas medidas e que se debe camiñar cara unha folga xeral que ten que facerse extensiva a todos os sectores, dado o seu carácter regresivo e antisocial, e non limitarse ao Sector Público.
Alén da xuntanza prevista para o vindeiro martes, a CIG anuncia a convocatoria de concentracións nas sete cidades para o vindeiro día 20 de maio, coincidindo co debate, no Congreso dos deputados, das medidas presentadas polo presidente do goberno español, José Luís Rodríguez Zapatero.
Xunto a iso, anunciamos a convocatoria de folga para o día 8 de xuño, no Sector Público e unha manifestación nacional, ese mesmo día, en Compostela. Queremos salientar a gravidade da situación e lembrar que a CIG xa manifestara as súas críticas por considerar que desde o goberno non se estaban a adoptar medidas dirixidas a frear a crise económica e que esta se saldara de forma positiva para a clase traballadora.
A CIG, central maioritaria no Sector Público, quere salientar a necesidade de que se dea a máis contundente contestación” a estas medidas e fai un chamamento á unidade sindical para que isto sexa posíbel. Queremos unidade sindical para que desde Galiza se dea unha resposta conxunta a estas políticas e facemos chamamento á reflexión a CCOO e UGT para a resposta non se cinxa ás Administracións Públicas porque tamén supón unha redución nas prestacións sociais, nomeadamente nas pensións.
A estas medidas vaise sumar a reforma laboral anunciada que terá características similares no ámbito privado xa que se vai tomar a redución salarial no sector público como referente, ademais de incluír medidas como o abaratamento do despedimento ou unha maior flexibilidade do mercado laboral, entre outras.
Queremos denunciar tamén que, en troques de aplicar políticas encamiñadas a incrementar o investimento público de carácter produtivo e o gasto social para contribuír a reactivar a economía; a controlar a economía especulativa e o capital financeiro; encetar unha reforma fiscal incrementando os impostos directos sobre as rendas máis altas e sobre o capital; recuperar o imposto de patrimonio; eliminar os paraísos fiscais ou combater a fraude fiscal, o goberno apostou por medidas antisociais facendo recaer o custo da crise sobre a clase traballadora.
En contraste con isto, hai que salientar os elevados beneficios da banca europea durante o ano 2009, que ascenderon a 50.000 millóns de euros e as grandes empresas españolas que en plena crise chegaron a repartir 32.000 millóns de euros de dividendos, grazas aos beneficios acumulados durante ese mesmo período.
Quen está a dirixir a política económica nos Estados é o capital especulativo e por iso denunciamos a covardía dos Estados, incapaces de abordar políticas que camiñen cara a mudar de modelo.
