Fora Carlos Pellegrini, noutrora presidente da República Arxentina, quen en 1904, referíndose á mesma, sentenzara que "en este país no se gobierna, se manda" -unha frase aplicable a moitos outros lugares e épocas, como esta que estamos a vivir.
O Consello da Xunta aprobou o venres, 20 de xullo, o proxecto de lei de modificación orzamentaria para a eliminación da paga extra de decembro, para a que non se estabelece un mecanismo de recuperación determinado. Este consello non foi máis que un acto de liturxia para lexitimar, con completa ausencia da negociación colectiva, parte da expropiación de dereitos perpetrada polo RDL 20/2012.
Mándase aos servos e aos súbditos, gobérnase aos cidadáns libres. Non se pode tolerar un Goberno que en seis meses destrúe as bases do contrato social e conculca a Constitución, arrasando con dereitos que levou máis de século e medio conquistar, eliminando o dereito á negociación colectiva e a forza vinculante dos convenios por decreto-lei, un Goberno cuxa única política consiste en precarizar aos desempregados, ás persoas dependentes, aos empregados públicos, hipotecando o Estado á banca alemá e trasladándolle á maioría da poboación as consecuencias dunha xestión desastrosa.
