A CIG solicitou a constitución da comisión de seguimento fixada pola disposición adicional 2ª da orde de flexibilidade e teletraballo, pois xa aos poucos días da posta en marcha da nova regulación, existen numerosos incidentes.

- A posta en marcha da nova regulación da flexibilidade familiar podería entrar en colisión co artigo 44 da Lei 7/2004 para a igualdade de mulleres e homes, en canto que esta última di que se establecerá “o máis amplo horario de referencia posible”, mentres que a nova orde é restritiva ao non permitir máis aló das 20 h e nada dos venres pola tarde. Inclusive nalgunha unidade pretenden que o horario de referencia produza rixidez para cada día da semana unha vez aprobado.

- Temos advertencias dalgunha unidade que afirma que non van poder autorizar a flexibilidade a todo o mundo. Que criterios van establecer os/as responsábeis da Administración para decidir?

- A orde recoñece o dereito das centrais sindicais a recibir unha serie de información, pero non existe procedemento de comunicación establecido.

- Está a haber problemas en diversas unidades en que os/as responsábeis pretenden esgotar os prazos para comunicar o novo horario flexibel.

- Observamos que a Orde publicada no DOG non coincide que aprobado na Comisión de Persoal. A diferenza está no prazo de tramitación da flexibilidade familiar que no documento aprobado establecía que sería de 15 días, igual que para a automática, mentres que no documento do DOG non establece prazo e por tanto pasa a ser a que establece a Lei de procedemento administrativo, é dicir, tres meses. A CIG non acepta este cambio e exixe a corrección do publicado para que sexa consonte co aprobado na Comisión de Persoal.

Para rematar, rexeitamos o uso político da orde. “La Voz de galicia” publicou "datos oficiais” (segundo eles) de números de solicitudes (3704 en sete días, 778 o 1º día, 501 o 2º día, ..), porcentaxes de solicitudes por servizos periféricos, centrais, chiringuitos, .. Os representantes dos traballadores e integrantes da comisión de seguimento, non temos coñecemento dos datos. Exiximos ter, como mínimo, a mesma información que a prensa.

Na Comisión de Persoal do 20 de xaneiro, o Director Xeral de Función Pública comprometeuse a que a Comisión de Seguimento xuntaríase a primeira semana de febreiro.