Nos últimos meses chegaron informacións á CIG, por diferentes condutos e con publicacións nos medios de comunicación (véxase https://i.gal/falsosautonomosegap), da existencia de sentenzas xudiciais contra a Escola Galega de Administración Pública (EGAP) polas contratacións de falsas/os autónomas/os ou cesión ilegal.

Por este motivo, o pasado 26 de decembro de 2024, durante a xuntanza do Consello Reitor da EGAP, a CIG tratou precisamente esta cuestión da precariedade laboral e contratacións irregulares no pequeno relatorio no que recapitulou parte das denuncias, queixas e solicitudes de información sobre a xestión da EGAP que veu presentando ao longo do tempo e das que non tivo ningunha resposta até a data.

A postura invariábel adoptada pola dirección da EGAP é a de ignorar todos os escritos remitidos pola representación legal maioritaria do persoal, e a de non facilitar ningunha información, continuando así na senda marcada dende hai máis dunha década; senda de total opacidade que veu contando co beneplácito ou silencio, cando non aplausos, do resto de entidades integrantes do Consello Reitor (entre os que se atopan representantes do Consello Consultivo de Galiza, Universidade de Santiago de Compostela, Universidade da Coruña, Universidade de Vigo, Deputación Provincial de Ourense ou Fegamp, entre outros).

Despois de que a CIG puxera enriba da mesa as principais cuestións pendentes de resposta, xunto coa precariedade laboral na EGAP e as supostas denuncias existentes en relación á contratación de falsas/os autónomos/as, a directora da EGAP non respondeu a nada, limitándose a negar verbalmente a existencia destas sentenzas condenatorias. 

Porén, debido ás informacións contraditorias das que ten constancia esta central sindical, instamos a que a directora da EGAP e o conselleiro de Facenda e Administración Pública dean unha resposta por escrito que confirme a inexistencia destas sentenzas xudiciais.

 Se queres facernos chegar algunha información, consulta ou observación, contacta coa CIG-Autonómica.