O venres 31 de xaneiro asistimos a dúas mesas de negociación nas que se trataron os seguintes asuntos: o modelo de concurso específico, a RPT de Educación e a RPT por sentenza xudicial. 

Na rolda aberta de intervencións fixemos moitas preguntas sobre concursos de traslados, procesos selectivos, carreira profesional, e moito máis. Porén, a directora xeral de Emprego Público, para variar, responde co que xa sabemos: se preguntamos cando van rematar un proceso, di que agora está en baremo provisional e despois virá o definitivo... Vaia novidade! Para iso non fai falla que diga nada!!! E así con todo…, non se sae de que están «analizando» e «valorando», e a previsión para todo é «proximamente».

• Concurso específico

Vai ser unha tomadura de pelo, no sentido de que non queren regular a puntuación de cada mérito, e quedará ao que decidan as consellerías en cada convocatoria. Así van poder adaptar as bases das convocatorias segundo conveña en cada caso, para axustalas o máximo posible a unhas persoas funcionarias determinadas que queiran colocar nas prazas. Dende a CIG non podemos consentir que cada consellaría faga o seu “cortijo”, cremos que tampouco responde a unha administración seria e rigorosa.

Ademais, néganse a poñer un calendario para que as consellarías convoquen a cobertura dos máis de 800 postos de concurso específico, polo que veremos como seguen as comisións de servizos en fraude de lei, moitas delas con máis de 10 anos. 

Chama a atención que o borrador das bases que nos entregou a Dirección Xeral de Emprego Público inclúe que o tempo en comisións de servizos sexa puntuable, cando todas as persoas que se atopan ocupando prazas de concurso específico foron escollidas totalmente de xeito discrecional, sen atender a ningún tipo de criterio ou transparencia. Estas convocatorias deben ser o máis transparentes posibles e que garantan o dereito de tódalas persoas funcionarias a poderen acceder a este tipo de prazas en igualdade de condicións; máxime cando estas prazas son revisables ao cabo de 5 anos, polo que condiciona en gran medida a política en materia de persoal aos gobernos seguintes.

• RPT de Educación

É unha modificación da RPT que foi discutida en xullo do ano pasado. Daquelas amortizaban 21 postos para crear 12. Agora deciden amortizar máis postos: son en total 28 os postos os que queren eliminar, a maioría de atención directa en centros, para crear 12, principalmente en servizos centrais. Insistimos en que hai que revisar as ratios, non danar a atención directa a menores, e engadir na RPT os postos creados. Con esta modificación de RPT queda patente a destrución de emprego público nun dos piares fundamentais de calquera sociedade de benestar como é a Educación.

• RPT de sentenzas

Modifican 4 postos por sentenza xudicial. Lembramos que hai máis sentenzas, e teñen que cumprilas todas.

• Rolda aberta de intervencións 

Solicitámoslle as seguintes informacións á directora xeral de Emprego Público, e velaquí tes o que respondeu:

• Concursos de traslados: preguntamos pola previsión de tomas de posesión dos que están convocados, e a previsión de convocatoria e finalización dos pendentes de convocar.
  Resposta: di que publicaron a acreditación de méritos e a elección de postos para arquitectura e enxeñarías; que este venres 31 de xaneiro publicaron o de incendios; que están priorizando a resolución do concurso de traslados; e que están pendentes de convocar veterinaria e escalas socias. Unha vez publicada no DOG a RPT de Política Social «analizarán» os postos que se ofertarán no concurso de escalas sociais. Conclusión: seguimos igual que estabamos.
• Estabilización: preguntamos 1) a previsión para publicar as baremacións definitivas e a listaxe de persoas aprobadas dos procesos pendentes; 2) datas de toma de posesión; 3) o tipo de postos que van ofertar (criterios).
  Resposta: a resposta para todo é «proximamente». Non dá ningunha data nin ningunha aproximación a cando sairán as listaxes definitivas ou as listaxes de aprobados/a, e limítase a dicir que están a tramitar os recursos ou alegacións e, no caso dos SPIF, as validacións do persoal inscrito. Están analizando como van proceder no caso das tomas de posesión e da oferta de postos.
• Carreira profesional: estaba prevista a negociación e convocatoria a finais do 2024, a cal incumpriron. Preguntamos cando pensan finalizar a negociación e convocar.
  Resposta: están «analizando» as alegacións recibidas.
• Problemas coa Chave365: recibimos moitas queixas de persoas que queren facer cambios nos ámbitos das listas, e tamén de persoas que están a presentar as instancias de incendios, e que se atoparon con que non funciona ben a sinatura coa Chave365 debido a un problema informático. O xoves 30 de xaneiro o problema seguía sen estar resolto, cando o cambio de ámbitos tiña como remate o 31.01.25. 
  Resposta: din que «analizarán» o problema.
• Sentenzas de complementos en Agacal: hai 3 prazas (persoa encargada agraria-C1, capataz agrario/a-C1, peón/peoa agrícola-C1) con sentenzas (2022-2023) de complementos antes da funcionarización que non se recolleron na RPT, a pesar de que o reclamamos. Os complementos van perderse proximamente pola xubilación de dúas persoas e a estabilización doutra. A consecuencia dos problemas cos complementos as prazas non son atractivas e non se cobren, polo que Agacal acabou contratando unha persoa autónoma para os días nos que non hai ninguén e garantir a supervivencia dos animais. Vai haber unha fuga de persoal nos concursos de traslados. Pedimos que cumpran as sentenzas.
  Resposta: non teñen coñecemento desta cuestión, teñen que «revisalo» e falarán con Agacal.
• Modificación RPT Medio Ambiente: no referido ao persoal do Parque Nacional das Illas Atlánticas, creáronse postos con discriminación económica respecto do resto, e sen ter en conta o que levamos pactado das condicións de traballo do persoal do Parque Nacional das Illas Atlánticas. Preguntamos cando teñen previsto negociar a modificación da RPT que nos prometeran durante as negociacións anteriores; e para cando se rematará a negociación para un acordo de condicións de traballo do persoal do Parque.
  Resposta: queda pendente unha «revisión» de modificación desa RPT cando se negocie o acordo para o persoal de Illas Atlánticas. O acordo presentouse ás organizacións sindicais, pero non se negociou nin se levou á Mesa Xeral nin se aprobou na Comisión de Persoal.
• Persoal enxeñeiro agrícola: solicitamos información sobre as tomas de posesión.
  Resposta: no momento que informen sobre os procesos de estabilización dirán cal irá antes ou despois nas eleccións de destino (concurso e concurso-oposición).
• Datas de exames
  Resposta: están «analizando» cales son os procesos que van convocar e as prazas, de acordo coas OEPs 22-23-24. Cando teñan a previsión facilitarana.
• Datas de promoción específica
  Resposta: están «pendentes» das publicacións do DOG e da RPT do Consorcio.
• Comisión de seguimento do acordo de Política Social 
  Resposta: convocarán «proximamente» unha reunión.

Interésanos coñecer a túa opinión, polo que se tes algunha observación, pregunta ou dúbida, contacta coa CIG-Autonómica.