- Detalles
A CIG denuncia na Inspección de Traballo e Seguridade Social de Ourense a imposición de vacacións nos distritos forestais por parte da Xunta en pleno estado de alarma.
As xefaturas de distrito da provincia de Ourense chamaron ao persoal de incendios forestais para poñerlles as vacacións durante estes días de estado de alarma. Non se informou das razóns deste proceder nin ao persoal traballador afectado nin aos seus representantes. Na práctica, a Xunta impón vacacións ao persoal deste servizo esencial para que se “confine” nas súas casas, todo un despropósito polo que acordamos presentar denuncia ante a inspección de traballo e seguridade social.
A denuncia da CIG inclúe entre outras as seguintes cuestións:
- O SPIF é un servizo de atención á emerxencia provocada polo coronavirus e están a realizar funcións importantes de desinfección en residencias de maiores, centros de saúde etc...
- Só unha parte do persoal está para atender aos incendios forestais aos que se lle suman o persoal que esta de vacacións ordinarias polo que a efectos prácticos o cadro para atender a lumes está minguado.
- En base ao anterior, non se motivan as “necesidades do servizo” para establecer períodos de vacacións durante o estado de alarma.
- Implantouse este período de vacacións “obrigatorio” sen que existira negociación previa coa representación do persoal.
NON É ADMISIBLE que se establezan VACACIÓNS OBRIGATORIAS ao persoal durante o período do estado de alarma. Na CIG rexeitamos este proceder opaco e autoritario por parte da Consellería do Medio Rural.
- Detalles
A Consellería de Presidencia, Administracions Públicas e Xustiza, elaborou unha guía, para todo o persoal da Xunta, que complica extraordinariamente o procedemento de protección do persoal especialmente sensible á exposición ao coronavirus.
Así cambia a túa situación: que presentes algunha das patoloxías indicadas ou teñas máis de 60 anos NON determina directamente o recoñecemento de “especialmente sensible”. Terás que ir a traballar estando exposto ao risco ata que se resolva a túa solicitude.
- Detalles
A CIG-Autonómica denuncia que non se lles deu formación
A CIG vén de presentar denuncia perante a Inspección de Traballo e da Seguridade Social de Ourense, logo de Política Social chamar para traballar na residencia de maiores “Nuestra Señora de Fátima”, do Barco de Valdeorras, a 6 auxiliares coidadoras de centros educativos, sen ningunha experiencia nin formación previa en atención a maiores, ás que non proporcionou formación en prevención de riscos laborais, para traballar en plantas de residentes infectados/as por coronavirus.
A residencia de maiores “Nuestra Señora de Fátima” está xestionada pola Xunta de Galiza tras a súa intervención, logo de que apareceran un centenar de positivos en residentes e en máis de 20 en persoas traballadoras desta entidade privada.
- Detalles
No DOG do luns 13 de abril de 2020 sae publicada a RESOLUCIÓN do 31 de marzo de 2020, conxunta da Dirección Xeral da Función Pública da Consellería de Facenda e da Axencia para a Modernización Tecnolóxica de Galicia, pola que se declaran actuacións administrativas automatizadas.
Diante das dúbidas xeradas con esta Resolución, dende a CIG puxémonos en contacto con Función Pública. Unha vez feita a consulta, transmitimos as seguintes aclaracións:
- O novo sistema de chamamentos electrónicos implementarase de xeito progresivo comenzando por categorías nas que hai poucas persoas inscritas e, deste xeito, ir comprobando o correcto funcionamento do programa
- Despois do verán e unha vez comprobado que o programa funciona correctamente, aplicarase de xeito xeneralizado para os chamamentos de listas.
COMO FUNCIONA?
Para poder ser chamado electronicamente hai que darse de alta no sistema notifica.gal. Para isto é preciso dispor do sistema de identificación Chave 365 ou dun certificado dixital. Unha vez dado de alta o procedemento será o seguinte:
- A persoa integrante nunha lista recibirá un SMS no seu teléfono móbil cunha ligazón a través da cal entrará directamente na aplicación informática sen necesidade de identificarse en cada chamamento coa Chave 365 ou cun certificado dixital.
- Dende esta aplicación, a persoa integrante da lista poderá efectuar tódolos trámites precisos en relación co chamamento sen ter que presentarse fisicamente nunha oficina da Administración.
- Detalles
A Xunta escúdase no panorama desolador das residencias privadas para non dar datos sobre o que acontece na pública. Onte por primeira vez deron datos dos falecementos desagregados por residencias e se ben todos sabemos que o COVID-19 estase a cebar en residencias privadas, non se pode ocultar o que está a acontecer nas públicas, onde a falta de datos é notoria.
Pero o que máis nos preocupa neste momento non é xa a falla de datos, senón que dende o inicio desta crise levamos pedindo que se adopten medidas de protección dos nosos maiores e se dote de EPIs ao persoal e se realicen test, para así alonxar o COVID-19 das residencias, e a pesares diso, e de que a Inspección de Traballo a instancias da CIG, obriga a realizar os test ao persoal para que non contaxien aos residentes, isto non se fai.
Por exemplo na Residencia de tempo libre de Panxón, Nigrán (residencia de negativos onde xa hai positivos) o cronograma deste desastre é o seguinte:
• Día 1 de abril: incorpóranse os/as traballadoras ao centro sen ter pasado ningunha proba do COVID-19 (e tendo traballado xa nalgunha residencia con posibles positivos).
• Día 2 de abril: os primeiros catro residentes/as entran no centro recibidos por Corina Porro, Delegada da Xunta en Vigo.
• Día 5 de abril: incorpóranse o resto de residentes.
• Día 8 de abril: fan as probas ao persoal.
• Día 14 de abril: os resultados comunícanselle ao persoal.
A neglixencia da Xunta, o incumprimento das obrigas provoca infectados. Temos que comezar a pensar que ademais de enfrontarnos a unha pandemia, aquí existe, como mínimo, unha mala xestión da crise.
- Detalles
Segue o descontrol de Politica Social nas súas residencias de maiores: a consellería non aprende e repite o caos da xestión do resto das residencias.
A Xunta xestiona a residencia de “Nuestra señora de Fátima”, ante a centena de persoas infectadas confirmadas, enviando ao persoal sen formacion preventiva, sen EPIS adecuados e un plan de prevención de riscos laborais que os protexa fronte o COVID 19.
A CIG tivo coñecemento polos medios de comunicación e as traballadoras as que están requirindo para traballar nesta residencia privada de O Barco de Valdeorras. En ningún momento se informou por parte da Consellería de Politica Social e a situación é insostible polo que vimos de solicitar con urxencia:
- Plan de acción preventivo de COVID 19 para esta residencia coa distribución de espazos e protocolo preventivo por tarefas, formacion e EPIS axeitados.
- Negociacion das condicións laborais do persoal, con especificación de horarios, xornada, quendas e descanso semanal. No caso de facer quendas intensivas tempo de descanso por xornada, confinamento e descanso compensatorio ao remate alarma sanitaria.
- Informacion do persoal chamado con especificacion de tarefas e categorías e titulación. Propoñemos as persoas que non teñan titulación se deriven cara a outros centros para tarefas asistenciais sen caracter clínico.
- Solicitamos o criterio de proximidade xeográfica.
- Que se oferte un aloxamento apropiado para o persoal con garantía de seguridade.
Por outra banda tamén presentamos queixa pola xestión doutras residencias integradas na dos Milagres en Baños de Molgas e Porta do Camiño en Compostela.
- Detalles
Coa publicación o día 13 de abril dun anuncio no DOG onde se empraza ás persoas interesadas a que poidan comparecer como parte nun procedemento contencioso-administrativo relacionado coas listas de substitucións, a Dirección Xeral de Función Pública xera confusión sobre a vixencia da suspensión dos prazos administrativos e xudiciais.
O estado de alarma que foi decretado polo Goberno español no RD 463/2020, establece a suspensións dos prazos tamén no caso da xurisdición contencioso-administrativa polo que entendemos que a Xunta publicou o anuncio como se nada pasase, sen facer constar de que o prazo comezará a contar a partir do remate do estado de alarma.
Dende a CIG queremos pensar que se trata dun erro polo que pedimos a Xunta que o corrixa e que nos seus anuncios aclare os prazos ou espere ao remate do estado de alarma para facer este tipo de comunicacións “non esenciais”.
- Detalles
A Escola Galega da Administración Pública (EGAP) vén de poñer en marcha recentemente os cursos de preparación da promoción interna dos corpos xerais da Administración xeral a través de medios propios. Esta é unha demanda histórica da CIG que por fin ve a luz.
Pero non estamos totalmente satisfeitos/as porque somos coñecedores/as de que os temarios e material non van ser integramente publicados en galego; pois sabemos que a lexislación estatal cuxa versión consolidada estea en castelán así vai ser impartida e subministrada polas persoas que actúan de titoras e docentes.
Temos que dicir antes de nada que a EGAP, como organismo autónomo da Xunta de Galiza, está afectada polo Estatuto de Autonomía que obriga a todas as AAPP a promocionar especialmente a lingua propia de Galiza; pero amáis disto é que a propia EGAP ten un mandato específico para iso. Así tanto na propia Lei 4/1987, do 27 de maio, de creación da EGAP (art 3.5, DOG núm. 103, do 2 de xuño de 1987), como no seu Regulamento de organizacióne funcionamento (art. 2.1., Decreto 306/1990, do 24 de maio, DOG de 12 de xuño de 1990) establecen como fins da EGAP:
2.1 l) A difusión e normalización do idioma galego na Administración Pública, a capacitación lingüística do persoal e a participación na fixación de linguaxe técnica, administrativa e xurídica galega.
É por iso que vimos de enviar un escrito solicitando que se aplique a normativa de funcionamento da Escola no tocante ao fornecemento e tradución de toda a lexislación dos cursos de preparación de promoción interna no idioma galego.
Para iso poderían subscribirse acordos ou convenios con outros órganos da Administración que teñen competencia na lingua como son a Secretaría Xeral de Política Lingüística ou o servizo de Tradución da Consellería de Presidencia.
- Detalles
Dende a CIG-Autonómica presentamos denuncia perante esta inspección o día 18 de marzo porque a Xunta de Galiza estaba omitindo o seu deber de protección cara ao seu persoal e as persoas usuarias dos centros sociais residenciais de xestión pública.
Pois ben, xa hai por parte da Inspección de Traballo unha proposta de requirimento onde a nivel xeral valoramos positivamente as medidas requiridas no documento da Inspección malia que chegan tarde. Por mor da falta de medidas preventivas implementadas con celeridade pola Xunta na actualidade existen casos de persoas contaxiadas polo COVID-19 en case todo os centros. A día de hoxe a Xunta segue sen informar do numero real de persoas infectadas (traballadoras e usuarias) a pesares de que a Inspección no mesmo requirimento establece que o debe facer.
A Inspección de Traballo tomou nota de parte das nosas demandas é obriga á Xunta á:
- Modificar as avaliacións de riscos laborais dos centros co obxecto de introducir os derivados da infección polo COVID 19. Incluír as medidas de protección a adoptar por cada departamento (non valen xerais) en función da exposición na que se atopen e tarefas que realicen.
- Xustificar ante esa autoridade laboral que implantou as medidas inmediatamente para garantir a protección de todo o persoal (informar sobre os protocolos de seguridade, EPIS coas súas fichas técnicas, a formación impartida e elaborar un listado de traballadores/as expostos de xeito individualizado por centro).
- Se existe sospeita (corentena) ou contaxio confirmado dalgunha persoa residente a Inspección obriga á Xunta a protección máxima dos traballadores (criterio SERGAS), con protocolo, EPIS axeitados e formación para este escenario. Dende a CIG entendemos que se debe seguir o protocolo do SERGAS.
- Hai que salientar que a Inspección require a realización de TEST a todas as persoas do centro cando exista sospeita de infección así como a toma de medidas máximas. No caso de traslado ao centro sanitario indicarase previamente o protocolo a seguir polo persoal (incluída coordinación coa ambulancia…).
- A Xunta debe xustificar a información que proporcionou ao persoal sobre a obriga de comunicar estados biolóxicos que os converten en persoas especialmente vulnerables e, polo tanto en traballadores sensibles para a súa protección. É dicir tiña que informar ao persoal de quen é persoal sensible, a súa obriga de comunicalo e protexelos do risco.
Este requirimento ven a mostrar a ineptitude e inacción da Xunta de Galiza na xestión dos centros sociais residenciais, mais cando estamos a ver o que sucedeu nas residencias de maiores de Madrid ou Cataluña.
O goberno da Xunta segue a mirar para outro lado cando lle corresponde por as medidas preventivas tendo tamén competencia para ditar as resolucións, disposicións e instrucións necesarias.
Non entendemos como un mes despois de que comezaramos a demandar medidas sigan sen actuar obrigando ao persoal a traballar sen EPIs nin protocolos preventivos e teña a pouca vergonza de xogar coa saúde do seu persoal e dos nosos maiores para facer campaña política.
- Detalles
Na CIG levamos varios días solicitando que a Consellería do Medio Rural, facilite unha solución ao persoal do SPIF especialmente sensíbel á exposición ao SARS-CoV-2 debido a patoloxías crónicas específicas
Este persoal recibiu un aviso por parte das xefaturas de distrito de que debía incorporarse ao servizo. O xeito de proceder descrito supón un cambio con respecto á anterior actuación para a protección do persoal especialmente sensíbel, polo que na CIG, solicitamos unha aclaración de cal era o motivo deste cambio de criterio e que este persoal permanacerá nos seus domicilios namentres (tal e como se viña facendo).A única alternativa que se lles facilitou aos traballadores e traballadoras afectados foi solicitar unha baixa médica.