- Detalles
Tivo que pasar case un ano para que a Consellería de Economía, Emprego e Industria reabrira a rolda de negociación cos sindicatos para tratar os temas dos pluses nos dous organismos apegados a consellería: o LOMG e GAIN.
Nesta segunda exposición corrixen algúns erros como os de poñerlle nomes aos postos como o de “responsable en...”, pero nunha sorte de café para todos (ou case todos) lle poñen pluses ata un auxiliar administrativo e un administrativo; ata aí poderíamos dicir que non é raro, pero o raro e que se lle poña o “complemento de perigrosidade”. Coñecemos moitos traballadores que para que se lle recoñecesen ese complemento tiveron que preitear contra a Xunta durante anos. Pero é mais, o posto de administrativo esta cualificado na RPT como grupo III Categoría 2 “xefe/de negociado” “encargado/a Adminstrativo/a” polo que o seu salario xa conleva unha diferencia salarial (de case 1.000 euros) do “Administrativo” grupo III categoria 62.
O peor de todo é que seguen coa teima de querer incrementarlle aos 2 “amigos” (do conselleiro ou do secretario xeral, quen sabe) o seu soldo en 6.721,82 € alegando responsabilidade no traballo que desempeñan, responsabilidade que non mostran en ningún documento ás organizacións sindicais.
- Detalles
Os lumes de primavera destes últimos días na Galiza non fan mais que constatar a tendencia das últimas décadas que nos demostran que se intensifican os lumes cando as circunstancias climatolóxicas o permiten. Non estamos diante dun asunto novo, xa que os datos estatísticos dos que dispoñemos - de consulta pública-, permiten entender que o problema dos lumes se desestacionalizou xa fai ben anos.
Un factor determinante a ter en conta é que os bosques galegos dende o 2002 sofren un estrés de humidade moi elevado, case semellante aos do bosque Mediterráneo.
Se lle engadimos outro factor determinante como a elevada intencionalidade dos lumes forestais en Galiza – ronda o 70% e triplica a media de intencionalidade no resto do estado- podemos atoparnos escenarios recorrentes como o que está a acontecer no día de hoxe.
- Detalles
A consellería de Cultura non está a dar ultimamente boas novas, a maiores de levar varios anos coa RPT a voltas, crear unha estrutura orgánica penosa, ven agora con unha externalización escandalosa.
O caso é que a Comisión de Patrimonio histórico é o organismo encargado, entre outras, de elaborar os expedientes arqueolóxicos referidos a todas as obras que se fan nos Camiños de Santiago. Sempre houbo escaseza de persoal arqueólogo, e agora co incremento exponencial dos informes, a cousa está “que bota por fora”.
E que fai a Administración con esta carga de traballo? Contrata persoal? non ; crea prazas? tampouco. Sácase da manga en xullo do ano pasado unha encomenda de xestión coa empresa Tragsatec que volta a renovar este luns (DOG do 25 de marzo), e damos carta de natureza a unha externalización de traballo técnico cos seguintes problemas:
- Detalles
Unha vez que dende a CIG comezamos a debullar todos os fallos que atopabamos na documentación facilitada, dende a consellería recoñecen moitos erros nos códigos de titulacións e equivalencias xa que nos enviaron unha versión anterior; tamén recoñecen erros na memoria xustificativa na que faltan prazas, outras aparecen mal redactadas, etc. Presentamos as seguintes achegas xerais, pendentes dun novo documento:
- É necesaria a identificación das prazas vacantes e a xustificación real na memoria funcional do cambio e as amortizacións do laboratorio de medio ambiente e do resto das prazas.
- No parque das Illas Atlánticas créanse prazas de axentes polo requirimento de traballar ao menos en parellas para minimizar riscos, deben revisar a RPT e ampliar as prazas para que o persoal de campo de conservación non este nesta situación de illamento e se cubran as quendas en todo o territorio.
- Solicitamos que as xefaturas de sección se oferten por concurso ordinario.
- A Xefatura de Area de Parques Naturais tamén por concurso e so aberta a c.especial polas específicas funcións.
- Regular de oficio os pluses e complementos xa que hai enormes diferenzas entre os que reclaman e os que non, débense xeralizalos para todo o persoal sen ter que acudir ao xulgado. Como exemplo os titulados superiores ambientais que non teñen ou persoal do laboratorio de medio ambiente nos que aparecen caóticos.
- Incluír a suba correspondente a 2019, no CE axentes ademais débese barrar as prazas ao B e indicar a extinguir unicamente o C2 e C1.
- Denunciamos tamén de novo amortizacións escandalosas como a de axente de Valdeorras deixando sen persoal ao parque natural da Enciña da Lastra ou outras que se propoñen logo de aumentar a súa carga de traballo.
En canto teñamos o documento da RPT corrixido presentaremos achegas específicas. Se queres facer as túas achegas, contacta coa CIG.
- Detalles
Parece que o despacho do director xeral de Función Pública non é seguro. Ollo! Calquera pode entrar!!
Resulta que CCOO e UGT andan repartindo “confidencialmente” un papeliño cos asuntos que cociñan na comisión de seguimento do acordo de concertación. E como outras veces, resulta tamén que ese papeliño chegou á CIG. Que mala pata!
Volve a resultar, ademais, que nese libelo aparecían as cousas que o director xeral de Función Pública ía traer o día 25 de marzo á Mesa Xeral, que curiosamente ía expoñer como unha cesión e o resultado dunha dura negociación con CCOO e UGT que así “conseguen arrancarlle á Administración” unhas condicións máis benignas para a funcionarización.
Tamén resulta, que xa sabiamos máis cousas desas que o director anuncia na Mesa Xeral, como cando se vai publicar a orde de carreira profesional, cantos funcionarios cumpren cos requisitos (8.000) e cantos laborais (3.000), etc.
Vamos, que tiñan todo cociñado previamente e viñeron a montar un espectáculo valleinclanesco dun duro tira e afrouxa onde o resultado, Oh! por Don Manoel!!, xa o tiña a CIG enriba da mesa dende facía 3 días.
Como é natural, o noso compañeiro na Mesa pedíu explicacións desta ópera bufa (case podemos dicir que pediu tamén que lle devolveran o importe das entradas da Mesa Xeral). A resposta do director xeral a por que nos chegou un documento co guión desta película esperpéntica onde se proba que todo o que traen á Mesa está negociado previamente vai en consonancia coa función teatral: “Mi despacho suele quedar abierto y es posible que alguien entrara y se hiciera con el documento”.
Pois nada, terá que dar sete voltas axeonllado e cun capirote a San Caetano, por neglixente, e terá que tomar medidas drásticas, non vaia ser que a próxima vez lle saian do seu despacho os papeis desfilando.
- Detalles
O 11 de abril son as eleccións aos representantes na Xunta de Persoal Funcionario de Ourense. A CIG presenta unha candidatura forte e equilibrada, composta por persoas con ganas de loitar polos servizos públicos da nosa provincia e a mellora dos dereitos laborais do persoal funcionario en Ourense.
O que votes vai marcar a liña de actuación sindical que imos ter na Administración Autonómica nos vindeiros catro anos.
- Detalles
A semana do 25 ao 29 de marzo vai estar ben completa de asuntos a discutir cos responsábeis políticos da Administración. Vamos tratar a convocatoria das oposicións das escalas de letrado e técnica de estatística, a orde de convocatoria do sistema extraordinario de carreira profesional, os criterios xerais de funcionarización do persoal laboral fixo, e unha xuntanza co conselleiro do Medio Rural para discutir asuntos referentes ao persoal axente medioambiental e forestal. De entrada.
Para todos estes asuntos, podes contactar connosco e achegarnos o que consideres: contacta coa CIG.
Acceso ao sistema extraordinario do grao I da carreira profesional. Vai á Comisión de persoal do luns 25. Contén cambios respecto da versión que foi á Mesa Xeral. Entre outros cambios, modifican os prazos, e crean unha nova "comisión de seguimento" para excluir aos sindicatos non asinantes. Podería publicarse o xoves 28. Descargar borrador da CP.
Criterios xerais dos procesos de funcionarización do persoal laboral fixo. Vai á Comisión de Persoal do luns 25. Sen cambios respecto do documento que pasou pola Mesa Xeral tras ser negociado ás agachadas entre CCOO, UGT e Función Pública. Descargar borrador da CP.
- Detalles
Tras a polémica xurdida polos procesos selectivos para a funcionarización do persoal laboral da Xunta de Galiza, para a CIG-Autonómica compre aclarar a posición fronte deste proceso así como as consecuencias que para os servizos públicos ten dividir e confrontar ao persoal empregado público e fomentar o seu desprestixio perante a sociedade.
Os procesos selectivos da funcionarización son procesos de promoción interna, voluntarios, de categorías laborais que pasarían escalas funcionariais, limitadas exclusivamente para o persoal fixo que xa superou un proceso selectivo para o acceso á función pública.
- Detalles
A Mesa Xeral convocada para o mércores 13/03/2019 finalmente foi aprazada para o venres 15/03/2019. Tratáronse os seguintes asuntos:
- Acceso ao réxime extraordinario do grao I do sistema de carreira profesional
- Criterios xerais dos procesos de funcionarización
- Convocatoria do proceso selectivo da escala superior de estatística.
- Convocatoria do proceso selectivo da escala técnica de estatística.
- Convocatoria do proceso selectivo da escala de letrados.
PROCEDEMENTO PARA O ACCESO AO RÉXIME EXTRAORDINARIO DO GRAO I DA CARREIRA PROFESIONAL
Traen a xuntanza un novo documento modificado, sen tempo para o seu estudo. Supomo que xa esta negociado no despacho do director de Función Pública con CCOO e UGT. Aquí establecen o complemento de carreira en relación ao complemento de destino, amplían prazos de presentación de solicitude e se afinan os subterfuxios e condicionados de acceso do persoal laboral fixo á carreira profesional.
A CIG reitera as alegacións presentadas na procura dunha carreira profesional mais xusta, para todo o persoal, e solicitamos a súa negociación. O director xeral de Función Pública respostou só as seguintes alegacións da CIG:
- O prazo de 6 meses faiselles moi longo.
- O persoal laboral non integrado no V Convenio non cobrará a carreira profesional e o persoal do Consorcio tamén queda fóra.
- As sentenzas do Tribunal Supremo non teñen incidencia no Acordo galego. (ver primeira e segunda labazada xudicial á carreira profesional)
- Non quixeron entrar nas particularidades e diferentes casuísticas da aplicación da orde ao persoal laboral.
- Detalles
Fai uns dias que algunhas persoas están a chamar aos locais da CIG preguntando por unha folga convocada para o xoves día 21 de marzo. A única información que tiñamos era algún papeliño que apareceu nalgún centro, ata que fai dous ou tres días comezaron a notificar servizos mínimos a algunhas persoas.
Non era moita a información que circulaba, pouco máis que unhas pistas que falaban dunha folga convocada en todas as administración públicas do estado.
Como ven sendo habitual para non dar tempo a recursos xudiciais, a Xunta ditou os servizos mínimos a véspera da folga (curioso, que xa fai días houbo quen recibiu notificación de servizos mínimos cando ainda non existía Orde).
Para completar o alucine, o mesmo día que publican os servizos mínimos, tamén na véspera, aparece unha información do suposto sindicato convocante desmentindo que eles convocaran folga algunha.
Pois a ver como acaba isto. Se non hai folga legal convocada, quen decidiu publicar unha Orde de servizos mínimos? E se efectivamente foi convocada, e posto que a negociación deses servizos é obrigatoria, con quen se sentaron a discutilo?
Haberá algún iluminado ou iluminada que dea explicacións? E se alguén meteu a pata, aparecerá a súa cabeza nunha bandexa?