- Detalles
Publicado no DOG Núm. 179 Venres, 20 de setembro de 2019, ORDE do 16 de setembro de 2019 pola que se amplía o prazo de realización do segundo exercicio do proceso selectivo para o ingreso no corpo superior da Administración xeral da Comunidade Autónoma de Galicia, subgrupo A1, escala superior de finanzas.
A ampliación do prazo de realización do segundo exercicio do proceso selectivo no corpo superior da Administración xeral da Comunidade Autónoma de Galicia, subgrupo A1, escala superior de finanzas, en vinte días hábiles.
- Detalles
Publicada no DOG Núm. 179 Venres, 20 de setembro de 2019, RESOLUCIÓN do 9 de setembro de 2019 pola que se convoca un curso sobre a intervención do Consello Consultivo de Galicia na nova Lei de contratos do sector público.
Poderán participar nas accións formativas convocadas nesta resolución os/as empregados/as públicos/as do sector público autonómico de Galicia con responsabilidades en materia de contratación pública da Xunta de Galicia, entidades locais, universidades e Administración institucional dependente das anteriores que se encontren en situación de servizo activo, permiso por maternidade ou paternidade, adopción ou acollemento ou excedencia polo coidado dun/dunha fillo/a ou familiar e que reúnan os requisitos establecidos nesta convocatoria e para cada un dos casos no anexo II.
O prazo de presentación de solicitudes será de dez días contados a partir do seguinte ao da publicación desta resolución no Diario Oficial de Galicia. As solicitudes de participación nas actividades formativas só poderán realizarse mediante o formulario de matrícula telemática dispoñible no enderezo https://egap.xunta.gal/matricula desde as 8.00 horas da data de inicio do prazo de presentación de solicitudes e ata as 23.55 horas da data de finalización. As solicitudes entenderanse presentadas unha vez que se complete correctamente o proceso de matriculación.
- Detalles
No DOG Núm. 179 Venres, 20 de setembro de 2019 publícase RESOLUCIÓN do 16 de setembro de 2019 pola que se convoca, no marco da iniciativa Universo EGAP Innova, a I Xornada de formación práctica dixital (E-martes).
O Universo EGAP Innova é un proxecto multidisciplinar e transversal da Escola Galega de Administración Pública que se desenvolve co obxectivo principal de contribuír, a través de novas prácticas formativas que implican a participación do alumnado, a autoxestión da aprendizaxe e a identificación de novas oportunidades, á innovación e ao cambio nas administracións públicas.
Ao abeiro desta iniciativa, os E-martes, que terán lugar os primeiros martes de cada mes, teñen como finalidade proporcionar formación práctica presencial ao persoal empregado público da Administración autonómica galega e á cidadanía nas transformacións tecnolóxicas, organizativas e lexislativas derivadas da Administración electrónica.
Os E-martes do vindeiro trimestre de 2019 versarán sobre as seguintes materias:
– 1 de outubro: «O Rexistro Electrónico da Xunta de Galicia».
– 5 de novembro: «Certificados electrónicos da Xunta de Galicia».
– 3 de decembro: «Sistemas para a contratación pública».
A actividade está dirixida ao persoal empregado público, en situación de servizo activo ou asimilada, da Administración autonómica galega e dos seus entes instrumentais, así como a profesionais e persoas interesadas en xeral. No caso das empregadas e empregados públicos priorizarase a inscrición daquelas persoas solicitantes que poidan xustificar debidamente que as súas funcións están directamente relacionadas coa materia impartida.
A inscrición nesta actividade formativa só poderá realizarse vía telemática accedendo ao enderezo https://egap.xunta.gal/matricula. As solicitudes entenderanse presentadas unha vez se complete correctamente o proceso de matriculación. O prazo para a inscrición nesta actividade abrirase desde as 8.00 horas do día seguinte ao da publicación desta resolución no Diario Oficial de Galicia e estará aberto ata as 23.55 horas do día 25 de setembro de 2019.
Lugar: Escola Galega de Administración Pública (EGAP). Rúa Madrid, 2-4. Santiago de Compostela.
Datas: 1 de outubro.
Horario: mañá e tarde.
Duración: 6 horas lectivas.
Número de prazas: 50.
- Detalles
No DOG Núm. 179 Venres, 20 de setembro de 2019, publícase RESOLUCIÓN do 13 de setembro de 2019 pola que se convocan cursos na área de incendios forestais da Comunidade Autónoma de Galicia.
Poderán participar nas accións formativas convocadas nesta resolución os/as empregados/as públicos/as da Administración pública da Comunidade Autónoma, das entidades públicas instrumentais, das entidades locais así como profesionais interesados na área de incendios forestais da Comunidade Autónoma de Galicia que se encontren en situación de servizo activo, permiso por maternidade ou paternidade, adopción ou acollemento ou excedencia polo coidado dun/dunha fillo/a ou familiar e que reúnan os requisitos establecidos nesta convocatoria e para cada un dos casos no anexo II.
O prazo de presentación de solicitudes será de vinte días contados a partir do seguinte ao da publicación desta resolución no Diario Oficial de Galicia.
- Detalles
Publicada no DOG Núm. 178 Xoves, 19 de setembro de 2019, RESOLUCIÓN do 10 de setembro de 2019 pola que se convoca o curso Formación sobre o Plan de xestión de emerxencias para persoal de parques naturais.
Poderá participar nas accións formativas convocadas mediante esta resolución o persoal do Parque Natural do Invernadeiro, Parque Natural de Enciña de Lastra e o Parque Natural do Monte Aloia da Consellería de Medio Ambiente, Territorio e Vivenda.
Así mesmo poderá participar persoal dos servizos de Patrimonio Natural das xefaturas territoriais de Ourense e Pontevedra así como do Servizo de Parques Naturais da Consellería de Medio Ambiente, Territorio e Vivenda que desenvolva funcións relacionadas cos devanditos parques naturais que se atopen en situación de servizo activo, permiso por maternidade/paternidade, adopción ou excedencia polo coidado dun/dunha fillo/a ou dun familiar e que reúnan os requisitos establecidos nesta convocatoria.
O prazo de presentación de solicitudes será de dez días a partir do día seguinte ao da publicación desta resolución no Diario Oficial de Galicia. As solicitudes de participación nas actividades formativas só poderán realizarse mediante o formulario de matrícula telemática dispoñible no enderezo https://egap.xunta.gal/matricula.
