Na Mesa Sectorial de persoal funcionario celebrada o día 14/03/2025 a Dirección Xeral de Emprego Público trae como asunto a “modificación de postos ofertados no concurso de Administración Xeral”.

Anúncianos que retiran 212 postos do listado de postos do concurso de Administración xeral, dos que 168 postos son dunha única consellería: a Consellería de Emprego, Comercio e Emigración. Deses 212 postos, cerca de 30 os retiran para as eleccións de destino de persoas con discapacidade intelectual da Agrupación profesional de persoal subalterno e do corpo auxiliar. Comentan tamén que os postos retirados non se van utilizar para dar destinos nos procesos de estabilización.

Baixo a escusa de modificar os postos das oficinas de emprego, retiran case a metade dos postos vacantes da Consellería de Emprego. E certo que o 80% son postos base, pero iso non é desculpa para retiralos.

Estamos de acordo en que polas condicións específicas dos postos das oficinas de emprego, se estude actualizar os niveis (xa veremos cal é a proposta) para facelos atractivos para as persoas que concursen a eles. Pero precisamente, si o problema é que os postos das oficinas de emprego non se cobren con persoas funcionarias de carreira, estamos no momento xusto para facer o contrario ao que pretende a consellería: eses postos están no listado do concurso de traslados de administración xeral, e polo tanto, para a CIG deben permanecer nese listado.

Iso si sería facelos atractivos garantindo ademais os principios de igualdade, mérito, capacidade e publicidade que segundo o artigo 88 da LEPG rexen os procedementos de provisión, porque todas as persoas funcionarias de carreira que poidan concursar van poder acceder a eles.

E si se prevén modificacións neses postos, bastaría con facer constar nas observacións de cada posto, que está sometido a unha posible modificación e unha vez publicado o novo listado facendo constar esa circunstancia, permitir a presentación de solicitudes a persoas que no momento da convocatoria reunisen os requisitos por si entenden que agora se modificaron as circunstancias.

A maiores disto, esta decisión pode ter consecuencias bastante funestas. Hai que lembrar que sobre todos os postos vacantes pende a posibilidade de amortización se non se cobren por funcionario/a de carreira despois de levar tres anos cubertos por persoal interino (excepto a posibilidade de prórroga). Se a Administración permitise a prórroga como lle solicitamos hai un ano, entón, non habería problema, pero retiralos sin permitilo pode dar lugar a retirar eses postos do concurso a perpetuidade. De aí que consideremos que no caso de retirar os postos do concurso se deba establecer a prórroga do persoal interino que os ocupa aínda que se exceda dos tres anos.