- Detalles
Logo da xuntanza do venres 26, onde a Administración non trouxo a proposta comprometida, as organizacións convocantes acordamos manter calendario de mobilizacións.
Nesa xuntanza das organizacions sindicais coa Secrataría Xeral Técnica da consellería de medio rural e os dous directores xerais, os representantes da consellería escudáronse sen ningun pudor na Pandemia ao non seren quen de presentar ningunha proposta. Xa que para tratar as condicions laborais argumentaban necesario unha reordenacion previa do servizo (esta era a escusa anterior), reordenación da que nada sabemos e que tampouco foron quen de facer desde a chegada deste novo conselleiro. Así pasaron xa 25 meses dende a petición da negociación dun novo acordo sen sequera un texto sobre a mesa.
As organizacións sindicais CIG, CCOO, CSIF e UGT, ante o nulo avance das negociacións dun novo acordo que regule as condicións de traballo do persoal técnico de incendios da consellería do Medio Rural e tendo en conta que o período de alto risco de incendios forestais comeza este 1 de xullo convocamos as seguintes accións:
- Luns 29 ás 11h, 2ª concentración diante da consellería do Medio Rural en San Caetano (Santiago de Compostela).
- Luns 29 ás 11:30 h, convocatoria de rolda de prensa diante da Consellería de Medio Rural.
- Asamblea de persoas traballadoras ao remate da concentración (na mesma esplanada).
Nesa asamblea acordaranse novas medidas de presión e denuncia da ausencia de estratexias de funcionamento do servizo de incendios da Consellería de Medio Rural co persoal que coordina e xestiona a defensa contra os incendios forestais da Galiza.
Cun acordo de condicións de traballo do ano 2008 desfasado polos cambios na consellería, distribución de persoal e condicións de xestión do monte e bioclimáticas actuais non temos asegurada a capacidade de resposta do sistema e do cadro de persoal ante unha situacion tan difícil como son os incendios forestais o que deixa desprotexido o servizo publico.
- Detalles
Na súa liña habitual de facer todo sen ningún tipo de planificación ou previsión, a última hora e sempre pensando en todo menos nas necesidades do persoal, o venres 26, nin máis nin menos que ás 15 h da tarde, recibimos na CIG o correo electrónico de Función Pública coa prórroga durante un mes do teletraballo COVID, aplicábel a partir do luns 28 de xuño.
Non é de estrañar que nin os propios servizos de persoal da Xunta, nin o Portax, dispoñan da máis mínima información nin da opción de solicitude dos permisos que o señor Barreiro, director xeral de Función Pública, vai concedendo a golpe de improvisación unilateral, como quen bota caramelos ao aire, e logo que cadaquén se apañe..
O director de Función Pública non quixo atender a razóns para unha maior duración do teletraballo COVID cando llo propuxemos, nin de conciliación, nin da primeira xuntanza da comisión para a mellora do teletraballo ordinario, algo ao que se resiste o director e que leva preto de 2 meses demorando (o protocolo de reincorporación que recolle a constitución da comisión da mesa de teletraballo foi publicado o 9 de maio de 2020).
Dende a CIG insistimos até a saciedade en que o teletraballo COVID é unha solución e un medio prioritario para garantir a seguridade e saúde de todo o persoal: de quen teletraballa e tamén de quen ten que traballar presencialmente pola menor afluencia de persoal. O teletraballo o que non é é un agasallo por entregas.
Este é o texto recibido:
"Por parte da Secretaría Xeral Técnica de Vicepresidencia e da Consellería de Presidencia, Administracións Públicas e Xustiza e da Dirección Xeral da Función Pública e acórdase:
Único.: Prorrogar durante un mes os permisos concedidos ao abeiro do Acordo do Consello da Xunta de Galicia, do 12 de xuño de 2020, polo que se aproban medidas adicionais de aplicación á reincorporación dos empregados públicos ao traballo presencial derivado do estado de alarma que remataban o día 28 de xuño."
E este é o texto que está no web de Función Pública: ligazón.
- Detalles
O traballo desenvolvido en comisión de servizo puntuará como tempo traballado no posto de orixe.
A Dirección Xeral de Función Pública publicou no DOG do venres 26 de xuño (o mesmo día que comeza a campaña electoral), a Resolución pola que se abre o prazo para a presentación de solicitudes de elección de postos de traballo e de xustificación dos méritos e requisitos, para a provisión de postos de traballo vacantes no concurso de traslados de corpos xerais. Ese listado debe conter as prazas vacantes e as posíbeis vacantes de resultas (as das persoas que solicitaron participar no concurso).
A solicitude de postos realizarase electrónicamente dende o Portax. Os prazos son os seguintes:
- Presentación das solicitudes de elección de postos: 15 días hábiles, desde o 29.6.2020 ata o 17.7.2020.
- Xustificación de méritos (conformidade cos datos ou xerar impreso de emenda): 15 días hábiles, desde o 29.6.2020 ata o 17.7.2020.
- Xustificación de méritos (desconformidade cos datos. Expedición do certificado): 45 días hábiles, desde o 29.6.2020 ata o 28.8.2020.
- Xustificación de méritos (desconformidade cos datos. Presentación do certificado): 50 días hábiles, desde o 29.6.2020 ata o 4.9.2020.
Ese trámite estaba previsto que fora por xaneiro do 2020, segundo manifestara o propio director xeral de Función Pública nas últimas xuntanzas e mesas de negociación do ano 2019. Se cadra o COVID19 chegou antes do previsto a Función Pública.
No mesmo DOG do 26 de xuño, a DXFP publica unha segunda Resolución que modifica a convocatoria do concurso (DOG do 27/11/2019):
- Especifican que caso de pertencer a máis dun corpo ou escala só poderá presentarse unha única solicitude.
- O traballo desenvolvido na situación de comisión de servizos puntuarase como realizado no posto de orixe. Con esto péchase a principal discrepancia que sindicatos e Administración tivemos durante a negociación das bases e que finalmente prometeran corrixir. A este respecto, a CIG ten claro que as comisións de servizo son adxudicadas discrecionalmente, polo que non podemos aceptar a súa valoración mentres non se apliquen criterios obxectivos.
Estará resolto durante o 2021?
(Non nos esquecemos do concurso de escalas e de administración especial, así como do de persoal laboral que se negan a convocar)
- Detalles
A reunión "de consultas" foi convocada a última hora do martes para o xoves ás 10 da mañá, sen tempo, e co único obxectivo de desmobilizar as concentracións diante dos centros de traballo convocadas para as 11h dese mesmo día.
Asistimos co obxectivo de presionar para habilitar as mesas de negociacion: Mesa para a recuperacion dereitos V Convenio Colectivo Unico, Comites de empresa e Comités de Seguridade e Saúde Laboral (CSSL). Ao final a reunión valeu para pouco máis que un vago compromiso a convocar o CSSL e respostar a preguntas das organizacións sindicais.
- Esiximos data urxente para unha mesa de negociacion na que falar da recuperación das condicións laborais do V Convenio, a reducción da carga de traballo e mais medios materiais e humanos. A Xunta segue a negarse a negociar a pesar de que, recordamos, o conflito segue activo nas rúas.
- Pídese unha xuntanza do CSSL de Política Social anterior ao 29 de xuño, data en que se prevé a reincorporación ao traballo presencial da maior parte do persoal e denúnciase o incumprimento do Protocolo xeral nesta materia. Tamén hai que tratar os protocolos específicos de apertura dos centros de día e escolas infantís e as Avaliacións de Riscos Laborais e estado das medidas preventivas. Finalmente a Xunta di que “van procurar convocar canto antes”.
- Recordamos a necesidade de realizar unha revisión urxente das Avalicións de Riscos Laborais dos centros pola: 1) Nova categorización do virus COVID 19 como de categoría 3 (nas anteriores o catalogaban como de categoría 2) o que pode obrigar a reforzar as medidas de seguridade. 2) Porque non estaban avaliadas as visitas ou a posibilidade da entrada de xente externa, e debe terse en conta este factor de risco.
- Revisión do cobro dos chamados “complementos COVID” para garantir a sua percepción adecuada; especificamente ao persoal que está ou estivo de baixa por terse contaxiado ou en corentena.
- Solicitamos a volta do persoal que continúa desprazado de Educación, do Consorcio ou de centros da propia consellaría (escolas infantis e centros de día, centros sociocomunitarios, centros ocupacionais...) ou chamado de listas (neste caso, para centros privados ou integrados), tanto en residencias privadas como propias. Esiximos que se traten nos comités de empresa as súas condicións laborais, a maiores de denunciar a dificultade que está a ter o persoal desprazado para solicitar as vacacions. En definitiva na CIG entendemos que a cesións de persoal (a empresas privadas ou a centros propios), debería ter rematado co levantamento do estado de Alarma. Engadimos que cuestionamos a legalidade da cesión aos centros privados. A Xunta resposta que eses desprazamentos e cesións baséanse no estado de emerxencia sanitaria e que poden continuar coa excepcionalidade en horarios e funcións.
- Denunciamos as novas modificacions nas carteleiras de Consorcio con cambio de horarios e funcións: con moita cara o xerente do Consorcio di que se trata da volta á normalidade anterior (carteleras antes COVID) en moitos dos centros e por eso non o trataron cos comites de empresa.
- Formacion e informacion: só van dar formacion nos centros de dia e escolas infantís xa que a secretaria xeral técnica non ve necesario a formación nos demáis centros, porque "xa estaban traballando".
- Sanidade segue tendo a tutela de todos os centro, e non descartan reabrir os integrados para derivar positivos se hai brotes nas residencias.
- Stock EPIS: di que os centros deben ter material suficiente e entenden que non hai apuro.
- Detalles
O Presidente da Xunta anunciou en roda de prensa a entrega dunha tarxeta de 250 euros ao persoal sanitario e sociosanitario para gastar en establecementos hosteleiros.
Os traballadores e traballadoras de política social que loitamos na primeira liña contra esta pandemia non queremos aguinaldos e rexeitamos por uso partidista e electoral este cheque-bar. O único recoñecemento posible é a eliminación dos recortes de dereitos laborais perpetuados dende 2012 e o fortalecemento do sector público, para o que é necesario:
- Material de protección abondo e de calidade para afrontar un novo rebrote ou realizar o traballo diario con seguridade.
- A devolución dos descansos recortados do V Convenio Colectivo da Xunta e a racionalización das carteleras de traballo.
- Máis medios materiais e persoais que baixen a excesiva carga e que permita un servizo público de calidade.
- Rematar xa coa cesión escandalosa de persoal empregado público ás residencias privadas.
Dende a CIG denunciamos esta falta de respecto intolerable e o insulto cara o esforzo do persoal. Rexeitamos a inutilidade do emprego de cartos públicos nunha tarxeta monedero de Abanca, para colmo condicionada ao seu uso en determinados establecementos hosteleiros.
É evidente o tufo electoral e de negocio de amigos aproveitándose do esforzo do seu persoal. O PP non ten escrúpulos máis cando ten un conflito laboral co persoal das súas residencias.
Señor presidente: non nos compras cun cheque-bar, e nas mobilizacións previstas para este xoves 25 de xuño, berraremos mais forte:
NON, NON e NON, A ESMOLAS PARTIDISTAS!
POLA DEVOLUCIÓN DOS DEREITOS LABORAIS ROUBADOS!
MAIS MEDIOS, MÁIS PERSOAL E MENOS PRECARIEDADE!
FEIJOO ESCOITA, ESTAMOS EN LOITA!!!
- Detalles
As organizacións sindicais CIG, CCOO, CSIF e UGT temos convocada para o xoves 25 de xuño a quinta xornada de mobilizacións nos centros sociais residenciais da Consellería de Política Social.
Destacamos o inmobilismo da consellería que logo dun mes de mobilizacións segue sen convocarnos a unha mesa de negoción para tratar a mellora das condicións laborais (recuperacion artigos que se manteñen recortados no convenio colectivo dende o ano 2012) e da urxencia do fortalecemento das residencias para prepararnos ante novas situacións de emerxencia sanitaria.
Denunciamos a falla de vontade da consellería e recordamos a necesidade dunha rede pública de atención as persoas forte e equipada co material e persoal abondo.
Para reclamalo, o persoal das residencias de maiores, centros de menores e centros de atención a persoas con discapacidade sairán en concentracion diante dos seus centros de traballo na quenda de maña entre as 11 e as 11:30h nunha nova xornada de loita este xoves 25 de xuño.
- Detalles
O persoal técnico do Servizo de Prevención de Incendios Forestais da Xunta de Galiza concentrouse o luns 22 de xuño fronte á sede da Consellería do Medio Rural para denunciar a falta de interese da Xunta a negociar as condicións de traballo do colectivo.
As organizacións sindicais CIG, CCOO, CSIF e UGT levamos á mesa de negociación aberta o pasado 9 de agosto de 2019 as demandas dos enxeñeiros técnicos forestais e enxeñeiros de montes, que traballan en tarefas esenciais da coordinación e xestión das emerxencias por incendios forestais, ademais da xestión forestal do monte galego, sen que ata hoxe a Administración fose quen de presentar ningunha proposta de reorganización do servizo público por escrito.
Este persoal conta cun acordo de condicións de traballo do ano 2008 que se demostra desfasado polos cambios na consellería, distribución de persoal e condicións de xestión do monte e bioclimáticas actuais; e que foi denunciado polas catro organizacións sindicais o 30 de agosto de 2019. Así, o acordo de 2008 contradí varios preceptos da normativa laboral, polo que reclamamos un NOVO ACORDO que dea como mínimo solución aos seguintes conflitos:
- Aumentar o cadro persoal para garantir os descansos legais establecidos sen afectar negativamente aos servizos públicos de prevención e extinción de incendios forestais e de planificación e ordenación forestal.
- Redución do horario anual que supera as 2000 horas (bastantes máis do debido).
- Regulación do traballo en fins de semana, festivos, gardas e descansos compensatorios e garantir 15 días de vacacións no verán.
- Distribución da carga de traballo e maior organización entre a xestión de montes, a prevención e loita contra incendios forestais e a xestión do persoal adscrito aos distritos forestais.
- Eliminar a dispoñibilidade absoluta dos xefes de distrito e establecer un/ha segundo/a xefe/a de garda por distrito forestal.
- Diminuír a interinidade, que é do 50%, engadindo todas as vacantes na seguinte oferta de emprego público.
- Segunda actividade e coeficiente redutor para os maiores de 60 anos.
Ante a situación de paralización da negociación dun novo acordo de condicións de traballo por falta dunha proposta da administración sobre a que debater, o colectivo decidiu concentrarse fronte a Consellería do Medio Rural e presentar un pedimento aos principais partidos políticos galegos para que estuden a súa incorporación aos seus respectivos programas electorais.
Porque estamos hoxe aquí e nesta situación
O cadro deste persoal, que na actualidade conta con 123 postos de traballo (segundo RPT da consellería do Medio Rural aprobada en xuño de 2019), data do ano 1999 coa creación dos distritos forestais, cando non existía a Lei de incendios de Galicia, a Lei de montes de Galicia, a certificación forestal dos montes de xestión pública, etc.
Nos últimos anos, o desenvolvemento da normativa sectorial de montes e de prevención de incendios obriga a este persoal técnico a fiscalizar cada vez máis a xestión do territorio. A diversidade das súas funcións, agravada no caso dos técnicos e xefes de distrito, e a carga de cada unha delas son obxectivas e cuantificables en obras proxectadas, en direccións de obra e en aproveitamentos forestais executados en montes de xestión pública, en expedientes de axudas públicas contratadas, en convenios con concellos controlados, en investigacións de causas dos incendios forestais, no número de solicitudes de aproveitamentos privados fiscalizados, na xestión de medios nos centros de coordinación, na dirección de extinción de incendios forestais (especialmente en situacións 1 e 2, con risco para persoas e bens materiais), na divulgación forestal para diferentes colectivos mediante charlas e actividades, nas tarefas de extensión forestal ao informar aos cidadáns e, en definitiva, na sistematización e rigor no control do cumprimento da normativa sectorial de montes e incendios forestais. Todas estas novas tarefas e competencias que asumimos, convértenos en persoal esencial tanto na xestión de emerxencias como na xestión pública dos montes galegos.
O acordo polo que se rexe o colectivo para a realización do traballo na época de máximo risco de incendios entrou en vigor en 2008 e non se actualizou desde a súa sinatura, o que provoca un desfase considerable entre as condicións de traballo e as circunstancias legais e económicas do momento actual, levando ao persoal a un sobreeesforzo considerable, pois o cadro de postos de traballo non foi modificado para adaptarse ás novas circunstancias descritas.
Esiximos que se consideren como horas de traballo efectivo as máis de 500 horas anuais sen compensación que fai o persoal técnico en exceso, como marca o dereito comunitario, así como o cumprimento da normativa laboral en relación a horas traballadas e descansos semanais dos xefes dos distritos.
Demándase unha reorganización das condicións de traballo do persoal técnico vinculado ao SPIF cun aumento substancial do persoal técnico funcionario que permita atender as múltiples tarefas que esixe a normativa sectorial forestal, cun número de días de descanso e de vacacións adecuado e cunha mellora das retribucións. Demándase tamén unha oferta de emprego público que cubra todas as vacantes existentes, así como a segunda actividade e coeficientes redutores de xubilación.
A falta de vontade da Administración provocou unha dilación da apertura oficial da mesa de negociación de quince meses desde a súa solicitude, o que amosa unha absoluta falta de respecto ao servizo público que exerce o persoal técnico vinculado ao SPIF. Ademais, unha vez aberta a mesa de negociación o pasado agosto e tras outros dez meses, a Administración non ten sido capaz de pór riba da mesa unha proposta de funcionamento do servizo público para dotar de contido a mesa de negociación e podermos avanzar cara un novo acordo de condicións laborais que sexa digno e garanta o servizo público que prestamos.
Esenciais ¡¡¡¡ Si ¡¡¡¡ Novo Acordo ¡¡¡¡ Tamén ¡¡¡¡
- Detalles
Unha campaña electoral para tapar as vergoñas
O de que Galiza fora a primeira comunidade en acadar a Nova Normalidade, non é máis que outra pamplina de propaganda electoral. Mentres Feijoo anima aos galegos e galegas a desprazarse entre provincias e a vivir con sentidiño unha vida normal coa vista posta nas eleccions do vindeiro 12 de xullo, ao persoal empregado público continúan a requirilos para traballar en centros lonxe das súas casas, e moitas veces en postos e categorías moi diferentes aos seus, ou seguen mantendo traballadores/as públicos doutras consellarías prestando servizos para Política Social (aforrando cartos e deixando sen traballo ao persoal das listas) por mor do estado de alarma.
A CIG denuncia que se están a vulnerar os dereitos deste persoal que levan dando todo de si dende o inicio da pandemia, lonxe dos seus fogares e das súas familias en moitos casos.
No caso do persoal trasladado a política social dende educación, a casuística parécenos ainda máis grave, pois no seu posto de traballo empezarían xa agora as súas vacacións (polo que a xente que de forma voluntaria aceptou reforzar en Política Social vai estar discriminida sobre o resto de persoal que non aceptou).
Se Galiza está xa nunha situación de normalidade:
- Por que continúan este persoal na mesma situación que durante o pico da epidemia?
- Porque seguen a manter empregados públicos prestando servizos en categorías que non son as súas?
- Porque seguen a manter persoal das listas da Xunta prestando servicios para empresas privadas e fondos buitre, pagando a Xunta os seus salarios?
- Por que non se negocia a permanencia ou non neses postos?
Pois, porque ou nos están mentindo e as cousas non van tan ben como nos queren facer ver de cara ás eleccións ou porque, coma sempre, o goberno de Feijoo está a facer o que tan ben se lle dá ao PP: impoñer sen negociar. Ou ambas.
Exiximos que se deixe de tratar aos empregados públicos como se de corpos militares se tratase e se respecten os seus dereitos.
- Detalles
O Consorcio, por libre, como sempre. Dálle igual pasar por riba da Constitución e da Lei e Emprego Público
A Comisión de listas do Consorcio Galego de Servizos de Igualdade e Benestar (CGSIB), adoptou a decisión unilateral de modificar as bases das listas de contratación en canto á notificación dos chamamentos, que pasa a ser exclusivamente a través do sistema notifica.gal. Esta decisión non foi nin negociada nin comunicada á representación sindical.
A CIG enviou escrito ao director xeral de Función Pública esixindo a revogación da referida decisión da Comisión de listas, e reiteramos unha vez máis que:
- As listas de contratación do CGSIB non cumpren cos preceptos constitucionais de publicidade e transparencia.
- Os ámbitos de chamamentos son provinciais, polo que o persoal chamado ten que aceptar contratos cunhas distancias do seu domicilio que non lles permiten conciliar a súa vida persoal e laboral e, a maior parte deles, no ámbito rural e sen transporte público. Por outro lado os contratos precarios que se lles ofertan non lles permiten, en moitos casos, cubrir os desprazamentos e/ou aloxamento.
- A Comisión de Seguimento de listas do Consorcio non ten presenza nin control sindical.
- Adóptanse acordos unilaterais claramente lesivos para o persoal substituto.
Dende a CIG esiximos a revogación deste Acordo e a transparencia e publicidade nas listas de contratación do Consorcio, mentras non estean integradas nas da Xunta, segundo o Decreto 37/2006, do 2 de marzo.
TRANSPARENCIA NAS LISTAS DE CONTRATACIÓN XA!!
- Detalles
Na CIG entendemos que o teletraballo é unha modalidade na prestación do servizo que veu para quedarse. Quedou máis que demostrada a súa eficacia tanto na prestación do servizo como, sobre todo, na conciliación da vida laboral e familiar do persoal.
Durante a vixencia do estado de alarma detectamos no persoal que estivo e está a teletraballar, grandes carencias de formación en temas de: administración electrónica, protección de datos, seguridade, teletraballo, etc. Se a iso lle engadimos que as persoas expertas falan de posibles rebrotes da pandemia no mes de outubro (ou mesmo antes), urxe dar unha solución a estas carencias formativas.
A modo de exemplo, na oferta formativa da EGAP hai cursos que cubrirían perfectamente as necesidades formativas do citado persoal:
CV19046 - Implantación da administración electrónica na Xunta de Galicia: REXEL, sede electrónica e NOTIFICA
CV20017 - Certificados electrónicos e sinatura electrónica. Uso de certificados electrónicos no contexto da Xunta de Galicia.
CV20015 - Tramitación electrónica integral na Xunta de Galicia no marco da Lei 39/2015
FC20012 - O teletraballo no sector público de Galicia.
AF20045 - Iniciación á Administración electrónica. Seguranza da información e protección de datos
CV20012 - Seguridade da información na Xunta de Galicia
A maiores, necesítase formación específica sobre a prevención de riscos laborais no teletraballo.
A oferta formativa debe ser o suficientemente ampla para chegar a todo o persoal así como facilitar esa formación tamén na modalidade de autoformación.
Desde a CIG enviamos escrito á EGAP e á Xunta de Galiza solicitando unha oferta axeitada que cubra as necesidades formativas do persoal que está a teletraballar.
