- Detalles
O persoal técnico de incendios continúa despois dun mes coa folga, a persares das represalias e vulneracións da consellería do Medio Rural ao dereito fundamental de folga, e inicia o 2 de setembro "Os mércores verdes"; concentracións ao longo das catro provincias galegas que pretenden trasladar á sociedade a importancia do traballo realizado desde o servizo público para manter "verde" a nosa paisaxe e que se resume en: "Fronte ao lume, silvicultura".
O calendario previsto é o seguinte:
- Concentración en Ourense o día 2 de setembro, ás 11 horas.
- Concentración en Santiago de Compostela o día 9 de setembro, ás 11 horas.
- Concentración en Pontevedra o día 16 de setembro, ás 11 horas.
- Concentración na Coruña o día 23 de setembro, ás 11 horas.
- Concentración en Lugo o día 30 de setembro, ás 11 horas.
Na primeira concentración que se celebrará en Ourense diante do centro de coordinación provincial de incendios forestais (Rúa Villamil e Castro, s/n -Prado Lonia-), pedirase ao mesmo tempo algo tan básico como "Diálogo, Diálogo, Diálogo" para iniciar o camiño dun "NovoAcordoXA!!!".
- Detalles
COMUNICADO CONXUNTO
A Consellería do Medio Rural está a vulnerar os dereitos fundamentais do persoal técnico do servizo de prevención de incendios forestais en represalia pola folga indefinida que mantén o colectivo dende o 1 de agosto.
A Consellería do Medio Rural ven de aplicar descontos ilegais nas nóminas do persoal técnico do SPIF, coa finalidade de “amedrentar e desmobilizar” a quen está a secundar a folga indefinida.
En represalia polo éxito da folga convocada e secundada de forma maioritaria polo persoal técnico do SPIF dende o 1 de agosto, Medio Rural ven de aplicar descontos salariais ilegais nos días en que os traballadores prestan servizos en cumprimento dos servizos mínimos.
CIG, CCOO, CSIF e UGT denuncian que, a pesares do estrito cumprimento dos servizos mínimos estipulados pola Administración, que dan fe da máxima responsabilidade e compromiso do colectivo có servizo público de prevención e extinción de incendios, a Consellería decidiu, en un claro acto de mala fe, coaccionar aos traballadores aplicando descontos ilegais nos días de traballo por servizos mínimos, incumprindo a normativa vixente e tentando de forma ilegal impedir o exercicio do dereito a folga.
Dende a CIG, CCOO, CSIF e UGT cualificamos esta actuación de antidemocrática, antisindical e contraria aos dereitos fundamentais e ás liberdades públicas.
CIG, CCOO, CSIF e UGT denunciamos que a Consellería segue a desoír os permanentes chamamentos ao diálogo feitos dende as organizacións sindicais e non fai máis que aumentar a crispación dun colectivo, que xa leva máis de 27 meses reclamando á Administración que se sente a negociar.
Por todo elo, dende as organizacións sindicais CIG, CCOO, CSIF e UGT, e o comité de folga do persoal técnico forestal, comunicamos aos traballadores afectados o noso acordo para formular a correspondente demanda xudicial por vulneración grave de dereitos fundamentais, reclamando na mesma o cese inmediato desta actuación e a reposición integra das cantidades retidas de xeito ilegal.
- Detalles
CIG-Autonómica denuncia niveis de hixiene mesmo inferiores aos do curso pasado.
A CIG-Autonómica denuncia que a consellería de Educación non prevé o aumento do persoal de limpeza nos seus centros educativos e alerta de que as escolas de Infantil, Primaria, institutos de ESO, Bacharelato, educación especial, escolas oficiais de idiomas, conservatorios e Formación Profesional da Xunta de Galiza van abrir as portas sen a seguridade suficiente fronte ao COVID-19 ao non poder garantirse a hixiene, desinfección e limpeza axeitada das súas instalacións.
Para a CIG é inasumible o “Protocolo” que pretende impor a Xunta porque aumenta as tarefas de limpeza sen aumentar o cadro de persoal. A este respecto denunciamos que Educación pretende, segundo se desprende do protocolo, que haxa persoal nos centros polas mañas, durante aproximadamente 3 horas cada día, e que se limpen determinadas zonas varias veces no día. Entón, quen vai facer a limpeza de tarde se se traslada unha persoa para a mañá, se antes este persoal xa tiña unha elevadísima carga de traballo e non lle sobraba tempo de xornada para facer máis?”
Co traslado dunha persoa de tarde para tarefas COVID para a mañá provócase que, na práctica, non se dea feito unha limpeza ordinaria pola tarde e moito menos unha limpeza COVID.
Limpeza covid
Na limpeza COVID hai que facer un varrido e fregado de todas as superficies, como se se tratara dunha limpeza xeral, pero nun só día. Como exemplo poñamos nun instituto medio de 700 alumnos/as, con tres limpadoras/es para duas entradas, tres laboratorios, unha biblioteca, seis zonas de baños cos seus servizos e duchas, pavillón e ximnasio, salón de actos, secretaría, conserxería, sala de atención ás familias, zona de despachos de dirección e despachos de departamentos, sala de profesorado, patio cuberto e beirarrúas de acceso.
Ante este listado abrumador de labores, é imposíbel que dúas persoas limpen todas as superficies de contacto cada día e, algunhas delas, varias veces ao día.
O ratio actual de persoal de limpeza nos centros educativos é de 1800m2 por cada limpador/a e en base a isto deséñase o cadro de persoal. Nel están incluídos servizos cos wc, alicatados, mesas, cadeiras, ventas, portas, manillas, mamparas e cristaleiras de conserxería, laboratorios con cada fregadeiro e banqueta, estanterías, mesas da sala de profesorado, taquillas, entradas, sala de comedor ou cafetería, patios... Un traballo xa de por si duro e mal valorado, para o que, desde a CIG, levamos anos pedindo a súa revisión e que agora co COVID non só non se revisa e aumenta o persoal senón que se incrementa a carga de traballo, por parte da consellería de Educación con autoritarismo e sen ter en conta ao persoal afectado, nin á súa representación legal e mesmo obviando aos Comités de Seguridade e Saúde laboral.
A maiores, este persoal non recibiu formación algunha en materia de prevención fronte ao COVID, nin se sabe de que EPIs van dispor, sobre todo para limpar zonas de alta concentración de virus, como poden ser os WC e lavabos ou se disporán de servizo de lavandaría para desinfectar a súa roupa de traballo.
Diante desta situación, a CIG-Autonómica conclúe que estamos diante dunha desfeita que deixa en grave risco ao colectivo de traballadoras e traballadores máis vulnerable fronte ao COVID.
- Detalles
- As organizacións sindicais CIG, CCOO, CSIF e UGT denunciamos publicamente que a Consellería de Medio Rural está vulnerando o dereito fundamental na Folga indefinida do persoal técnico do servizo de prevención de incendios forestais da Xunta de Galiza.
- A Consellería de Medio Rural ven de practicar o "esquirolismo patronal", ao entregarlle a dirección de obras a persoal alleo á Administración, entre outras prácticas que vulneran o dereito á liberdade sindical.
O persoal técnico forestal do SPIF, denuncia que a Consellería de Medio Rural carece de estratexia e de plan de traballo para as persoas encargadas de coordinar a loita contra os incendios forestais no noso País. O colectivo está en folga indefinida desde o 1 de agosto e denuncia irregularidades por parte da Consellería do Medio Rural na aplicación dos servizos mínimos legalmente establecidos.
O vixente acordo que regula as súas condicións de traballo, que data do ano 2008, está desfasado, entre outras razóns, polos cambios na Consellería, pola distribución de persoal e polas condicións de xestión do monte e bioclimáticas actuais e porque o número de técnicos actualmente é insuficiente para afrontar todos os retos que require o coidado e aproveitamento dos nosos montes. Por este motivo non está asegurada a capacidade de resposta do sistema e do cadro de persoal ante unha situación tan difícil como son os incendios forestais, o que deixa desprotexido o servizo publico. Este acordo foi denunciado polas catro organizacións sindicais o 30 de agosto de 2019, despois de tentar a súa modificación desde maio de 2018, xa que require actualizar diversos preceptos da normativa laboral, polo que é necesario acadar un NOVO ACORDO que dea como mínimo solución aos seguintes conflitos:
- Aumento do cadro persoal que garanta un mellor servizo público de prevención e extinción de incendios forestais e de planificación e ordenación forestal.
- Transformación do exceso de xornada anual (500 horas de dispoñibilidade), na contratación de mais técnicos por distrito.
- Regulación do traballo en fins de semana, festivos, e período estival, mediante gardas e descansos compensatorios.
- Distribución da carga de traballo e maior organización entre a xestión de montes, a prevención e loita contra incendios forestais.
- Eliminación da dispoñibilidade absoluta dos xefes de distrito, establecendo un/ha segundo xefe/a de garda por distrito forestal.
- Regulación da segunda actividade.
As organizacións sindicais CIG, CCOO, CSIF e UGT, ante o nulo avance das negociacións dun novo acordo que recollese estas reivindicacións do persoal técnico de incendios forestais da Consellería do Medio Rural, acordamos convocar unha folga indefinida desde o día 1 de agosto de 2020.
No desenvolvemento da folga e na aplicación da Orde de servizos mínimos, que inicialmente foron pactados, estanse a producir determinados incumprimentos e comportamentos ilícitos que resumimos nos seguintes puntos:
- Externalización da dirección dos contratos de obra, substituíndo ao persoal técnico que está en folga por persoal alleo, practicando o que se denomina “ESQUIROLISMO PATRONAL”.
- Imposición de cambio de cuadrantes e calendarios de traballo, o que supuxo que en determinados días e distritos se pasase, dos servizos mínimos pactados do 66%, a uns servizos mínimos do 100%. Ademais, a modificación dos cuadrantes e calendarios de traballo dos xefes de distrito, provocou que se incumpra, durante dous días cada semana e nos 19 distritos, a presenza en servizo mínimo dun xefe de garda nos centros de coordinación de distrito.
- Modificación a través dunha instrución da Dirección Xeral de Planificación e Ordenación Forestal do procedemento de entrega, recepción e seguimento dos lotes de madeira en xestión pública; encomendando determinados traballos que lle corresponde realizar ao persoal técnico dos distritos forestais que secunda a folga a outros colectivos, coa única finalidade de “rebentar ou minimizar os efectos da folga”, nun claro acto de vulneración da liberdade sindical.
- Presións, coaccións e pseudo ameazas, para que se realicen os informes e executar distintas tramitacións non recollidas dentro da orde de servizos mínimos, que establece claramente que o traballo a realizar en período extraordinario serán só "para as tarefas de coordinación e de dirección de medios de extinción de incendios".
- Envío de correos selectivos, o pasado venres 21 de agosto, e non a todo o persoal afectado pola folga, correos, baixo o pretexto de facer o seguimento da mesma, onde se daban instrucións de notificar no caso de deixar de secundar a folga (unha clara intromisión no libre exercicio do dereito de folga).
Pois así as cousas, as organizacións sindicais CIG, CCOO, CSIF e UGT e o Comité de Folga do persoal técnico forestal acordou formular a correspondente demanda xudicial, por vulneración grave do dereito fundamental do exercicio de folga, así como a posible prevaricación do Sr. Conselleiro e da Secretaria Xeral Técnica de Medio Rural, por externalizar a dirección de obras “a propósito” de que estaban facendo algo que a xurisprudencia recolle como “ESQUIROLISMO PATRONAL”.
- Detalles
A falta de diálogo e negociación da consellería do Medio Rural empurrou ao persoal técnico de incendios forestais a iniciar o 1 de agosto unha folga indefinida; sen resposta algunha por parte da Administración no que vai de mes. Na actualidade o seguimento da folga é masivo (por riba do 80%, exceptuando o persoal de libre designación) e continuado na totalidade dos distritos forestais e nos catro centros de coordinación provinciais.
Ante esta situación as organizacións sindicais CIG, CCOO, CSIF e UGT, convocan concentracións de apoio á folga nas catro provincias, con carácter rotativo cada dous días. Na provincia de Lugo celebrouse o luns 17 de agosto a oitava mobilización no décimo sétimo día de folga indefinida co lema “Se somos esenciais, Novo Acordo Xa!!!!”, no que se pretende resaltar a situación duns profesionais considerados “esenciais” na súa labor de traballo de emerxencias e que pola contra a Administración fixo deixadez de funcións ao non negociar un novo acordo de condicións de traballo. O actual acordo (do ano 2008) foi denunciado fai un ano e está desfasado polos cambios na consellería, distribución de persoal e condicións de xestión do monte e bioclimáticas actuais. Co acordo vixente, non temos asegurada a capacidade de resposta do sistema e do cadro de persoal ante unha situación tan difícil como son os incendios forestais o que deixa desprotexido o servizo publico.
As vindeiras mobilizacións celebraranse nas seguintes datas e lugares:
- Ourense: 19 de agosto - Rúa Villamil e Castro, s/n (Prado Lonia) 32004
- Pontevedra: 21 de agosto - Rúa María Victoria Moreno nº 43, 36003.
- A Coruña: 23 de agosto - Rúa Vicente Ferrer 2, Monelos, 15008.
- Detalles
O DOG do 17 de agosto vén de recoller a resolución da Consellería de Política Social para a apertura das escolas infantís o 1 de setembro baixo a sombra da Covid-19, sen a existencia dun protocolo preventivo válido e consensuado.
A Xunta acorda abrir os servizos e centros de atención á infancia como son as escolas infantís 0-3 anos, os puntos a atención á infancia, casas niño, espazos infantís e ludotecas, sen un protocolo válido de actuación preventivo consensuado nin tratado no respectivo Comité de Seguridade e Saúde Laboral. O texto de protocolo que teñen pendurado na web de Politica Social é de imposible cumplimento se non se amplían os medios humanos e materiais. En conclusión: a Xunta quere unha incorporación a custe cero.
Destacamos que non se fixeron as preceptivas Avaliacións de riscos laborais dos centros ao risco biolóxico do COVID19 e que tampouco se adaptou o seu “Plan de reactivación no ámbito infantoxuvenil en relación ca infección polo virus SARS-COV2.
Demandas da CIG:
- Asegurar a protección das traballadoras, especialmente sensibles e embarazadas.
- Negociación do Protocolo de incorporación cos cativos/as.
- Avaliación de Riscos Laborais e adaptación do protocolo a cada centro de traballo por persoal especializado xa que cada centro é diferente.
- Establecer unha persoa directora e coordinadora para COVID-19 formada e liberada da actividade docente nas aulas.
- Negociación de carteleiras de traballo e revisión das solicitudes de conciliación e flexibilización do persoal.
- Axustar o horario dos centros á matricula actual ó establecemento de burbullas ou illas de convivencia que dificulten o espallamento o contaxio negociada co persoal.
Dende a CIG-Autonómica entendemos que ás escolas infantís igual que outros servizos públicos deben funcionar coa máxima normalidade posible pero parecenos unha irresponsabilidade social intolerable da Xunta de Galiza que se faga sen seguridade.
- Detalles
As traballadora embarazadas das Escolas Infantís do Consorcio, teñen recoñecido o risco biolóxico para o embarazo e a lactancia natural dende o momento que o comunican á empresa (se ben é certo que a pesares de denunciar en repetidas ocasións, a Mutua demora a suspensión do contrato até as tres semanas que lle permite a Lei).
Pois ben, neste momento, a Mutua está dando as suspensións de contrato a partir da semana 20 de embarazo, polo que non se contempla o risco biolóxico recoñecido até o de agora (anterior ao risco por COVID).
Non se teñen en conta nin a sentenza do TSXG, que recoñece o risco biolóxico, nin o que recolle a avaliación de riscos de Qualtis e mais o documento de postos exentos de risco para o embarazo e a lactancia natual, que establecen que hai que apartar do servizo a estas traballadoras.
Ademais dalgunha certificación que xa lle chegou a algunha traballadora, están dicíndolle de palabra, cando van facer a xestión, que o risco vai considerarse dende a semana 20.
Dende non hai moito tempo a Mutua manda facer probas serolóxicas para ver a inmunidade, pero obvia que os citomegalovirus e parvorirus (frecuentes en crianzas de cero a tres anos) non producen inmunidade aínda que se teñan pasado, e xeran malformacións e abortos.
É importante que as traballadoras embarazadas se manifesten por escrito en desacordo coa Mutua, coa certificación a partir da semana 20 porque, se non rectifican, haberá que adoptar, en cada caso, as medidas que se estimen oportunas.
- Detalles
No DOG do 04/08/2020 publican a Resolución pola que se amplía o prazo para expedir e presentar a certificación dos méritos emendados para o concurso de traslados de corpos xerais.
- Expedición dos certificados de xustificación dos méritos por parte das unidades de persoal: ampliado ata o 29 de setembro de 2020.
- Presentación, por parte dos/das concursantes, dos certificados realizados polas unidades de persoal: ampliado ata o 9 de outubro de 2020.
- Detalles
En primeiro lugar queremos agradecer ás máis de 6.000 persoas que están a loitar arestora contra o lume en Galiza, especialmente aos compañeiros e compañeiras que hoxe están no lume de Cualedro. Dese equipo de profesionais, pouco máis de 100 persoas temos o cometido de coordinar e xestionar todos os medios na extinción de incendios. Somos o Persoal Técnico de Incendios Forestais (enxeñeiros/as técnicos/as forestais e enxeñeiros/as de montes). Os que hoxe concentrámonos esixindo un novo acordo para as nosas condicións de traballo e tamén para lograr unha resposta máis eficaz do servizo público que representamos (tanto na extinción e prevención dos incendios forestais como na xestión forestal dos nosos montes).
De seguro que ata o de agora non escoitaras falar de nós, mais vémonos na obriga de alzar a nosa voz e reclamar unha mellor organización do noso traballo ante unha nova realidade que cambiou substancialmente na última década. Tes que preguntarche quen xestiona os nosos montes (que na nosa terra representa as ¾ partes do territorio) e obteras a resposta nos profesionais que estamos aquí. Recordar que coordinamos máis do 40% dos incendios do Estado (un 10% dos de toda Europa), xestionamos de forma directa o 15% do territorio galego que se atopa en contratos de xesión pública (con 60.000 ha en certificación), revisamos a metade das cortas de madeira do Estado e canalizamos a corta de preto de medio millón de toneladas ao ano de madeira en montes de xestión pública (que xeran uns ingresos de preto de 15 millóns de metros cúbicos, unha gran parte dos cales revirte nas comunidades de montes).
Non pedimos aumento de soldo senón unha mellor organización do traballo, melloras na seguridade e aumentar o cadro de persoal nos lugares cunha alta carga de traballo. Loitamos contra os abusos horarios que nos impón a Xunta ao facer gardas de 24 horas cunha media de 500 horas ao ano por riba do calendario medio dos empregados públicos, e no caso dos xefes de distritro ter unha disponibilidade de 24 horas, sete días á semana.
Levamos máis de 25 meses esixindo un novo acordo, e ante o silencio, a falta de diálogo e negociación da consellería do Medio Rural, a Xunta de Galiza empúxanos a iniciar unha folga indefinida a partir do 1 de agosto de 2020. Proba dilo é que aínda non nos xuntamos para negociar os servizos mínimos (farémolo a mesma tarde do xoves 30, en tempo de desconto para publicar ao día seguinte no DOG esa regulación). Somos profesionais responsables e seguiremos atendendo ás necesidades de extinción de incendios que nos espera nesta dura campaña.
Finalmente se Feijoo aposta por Galiza, Galiza, Galiza, non se esqueza da importancia de facer un desenvolvemento rural integral, non se acorde de nós tan só cando hai vaga de lumes e recordámoslle que atallar os lumes parte de ter un traballo de xestión previo. Por todo iso, retrucamos decindo:
MONTE, MONTE, MONTE
FRONTE AO LUME, SILVICULTURA
POR UN NOVO ACORDO XA!!!!!!
- Detalles
Na Mesa Xeral de Negociación de Empregados Públicos (MX) e na Comisión de Persoal do xoves 29 de xullo tratáronse os seguintes asuntos:
PROCESOS SELECTIVOS E OEP-2020
As probas dos procesos que xa tiveron algún exame, serán en outubro.
As probas do proceso selectivo de funcionarización do persoal laboral fixo serán na primeira semana de outubro.
En setembro/outubro comezarán as negociacións das convocatorias pendentes, incluídos legoeiros/estradas.
Os primeiros exames da oferta social e corpos xerais (libre, estabilización, consolidación e promoción interna) comezarán a partires da segunda quincena de outubro ou primeira de novembro.
Oferta de Emprego Público-2020: Di o DXFP que está practicamente pechada, e que despois de varán será a negociación cos sindicatos. Irán prazas de funcionarización.
ELECCIÓNS DE DESTINO
A elección de destino de arqueólogos, finanzas A1 (P.I.), veterinarios e C1-xeral (P.I.) será na segunda quincena de setembro (veremos).
A este efecto, enviáronos un borrador de protocolo de elección de destino telemático (se queres dicir algo, contacta coa CIG)
A CIG insiste en propoñer que o destino para promoción interna, cando sexa provisional, sexa voluntario. O DXFP comprometeuse nos días pasados en dar resposta nesta MX a esta petición da CIG. Pero volve adiar a resposta: di que están a estudar a proposta que lle facemos, pero que non terán resposta ata a primeira quincena de setembro, cando teñamos unha xuntanza para falar dos destinos, que serán na segunda quincena. Deixa para esa xuntanza tamén a solución do conflito de dereitos de quen teña que escoller destino e ao tempo participase no concurso de traslados.
En canto ao número de persoas que están obrigadas a escoller destino en C1 (P.I.), di que serán 50 ou 52 (ofrecéndolles tan só 62 postos).
TELETRABALLO
O DXFP volve co que xa dixo o luns: na primeira quincena de setembro teremos negociación da modificación normativa do teletraballo, para o que están a preparar as modificacións que consideran. O luns comprometérase a enviar “pronto” un borrador.
MÁSCARAS
Insistimos en que as faciliten ao persoal, pois ainda que sexan obrigatorias para todas as persoas, nas zonas comúns (corredores, ..) é imposíbel manter a distancia de 1,5 m, e neses casos é o empresario quen está obrigado a tomas as medidas de protección.
Se as máscaras son obrigatorias para todo o mundo, e por esa razón néganse a facilitarllas a todo o seu persoal, preguntamos polas razóns de que en certos ámbitos estean a facilitar máscaras ao público. Non temos resposta.
RPT DE ATRIGA
A Administración non modifica a proposta, que queda aprobada co voto en contra de CCOO e UGT, e abstención de CIG e CSIF.
RPT DE FACENDA
Non remitiron a documentación que demandamos. Na organización dos postos un parte deles dependen directamente das subdireccións, e non dos servizos. Non cambian nada nas áreas funcionais. Das 12 creacións de postos, 8 son de postos de estrutura, e só 4 son de postos de fora da estrutura (de “curritos”); e para crear eses 4 postos, amortizan 6. Quedou aprobada co voto en contra dos catro sindicatos.
RPT DE MEDIO RURAL
A proposta consiste en que amortizan os 21 postos de persoal laboral veterinario ocupado por persoal indefinido que aprobaron a oposición de veterinario/a funcionario/a, e crean eses mesmos postos como persoal veterinario funcionario para ofertar na elección de destino da escala. A CIG está conforme coa proposta, pero non nos gusta que para financiar eses 21 postos, amorticen outros 5 (ainda que vacantes e sen ocupación).
CIG e CCOO abstémonos. UGT e CSIF votan en contra (porque queren que os 21 postos queden reservados para o proceso de consolidación do persoal laboral indefinido).
O DXFP explica a UGT e CSIF que en canto un posto afectado polo proceso de consolidación/estabilización queda libre porque deixa de estar ocupado pola persoa que estaba nel, a praza desaparece da consolidación/estabilización e hai que amortizala. Por tanto, a proposta que defenden implicaría a amortización dos postos en canto os/as 21 veterinarios laborais indefinidos tomen posesión do seu novo posto de funcionario/a.
CONSORCIO
Segundo o DXFP, a integración do persoal do consorcio está avanzada. Retomarana en setembro. Vai vinculado á RPT (que estaría practicamente avanzada) e á oferta de emprego da totalidade das prazas do consorcio.
ACORDOS ASINADOS NO ÁMBITO DA AXI
Asegura a consellería que xa tiveron conversas con Educación sobre a formación pactada. Enviáronlles unha relación das funcións, e Educación respostou que coas titulacións que existen non hai módulos que se axusten específicamente ás funcións dos vixiantes de estradas, polo que habería que deseñar uns modulos específicos con esas funcións. Volverán a retomar as xuntanzas con Educación.
Á volta das vacacións traballarán nun borrador paraa incorporar na OEP as prazas do acordo de legoeiros e gardería fluvial.
POSTOS DE ARQUIVEIROS/AS
O DXFP di que a dotación destes postos ten que ser mediante unha solución global. O problema é que a solución leva adiada dende o ano 2014.
PROTOCOLO COVID EN CENTROS DE ENSINO
Insistimos en que o protocolo COVID para o curso 2020/2021 en centros de ensino, altera as condicións de traballo de parte do persoal non docente (limpadores/as, coidadores/as, cociña), sen negociación nin información á lexítima representación do persoal afectado, pois o que fixo Educación foi levalo a unha Mesa Sectorial de Docentes (onde están os profes, que non son representantes sindicais do persoal afectado), e tamén levalo ao Comité Intercentros de Seguridade e Saúde Laboral de centros de ensino, comité que non ten capacidade para alterar as condicións de traballo.
Educación quere confundir ao DXFP coa xustificación de que con levalo á Mesa Sectorial Docente e ao CSSL de centros de ensino, xa está ben feito. Pois non. Ou se sentan con nós, ou na seguinte Mesa Sectorial Docente teremos que presentarnos nosoutros, e que nos levanten.