- Detalles
A Xunta anuncia en prensa un novo decreto de dependencia e o aumento dos equipos de valoración
Na ultima semana de outubro tivemos coñecemento de que se ían contratar uns equipos de reforzo para a valoración de dependencia, sen ningún tipo de negociación nin información á representación do persoal. Pedímoslle explicacións a Politica Social e o único que confirman é a contratación dun equipo por provincia, sen aclarar especificamente que tipo de persoal van a contratar nin a duración real dos contratos (parece que queren contratar e prorrogar ano a ano)
Esta información choca coa que hoxe, 2 de novembro, sae nos medios de comunicación, onde anuncian que van pasar de 44 a 66 equipas. Supoñemos que non falan de equipas senón de persoas, pero como sempre pasa coa Xunta, o primeiro é venderse mediaticamente.
Quen, como, onde, cando e en que condicións e para que. Iso é o mínimo que se debe tratar coa representación do persoal. Porén nin o Comité Intercentros nin os comités provinciais da Consellería de Política Social teñen coñecemento algún de tal contratación.
Para a CIG por suposto que é necesaria a contratación de máis persoal para a valoración de dependencia, pero esta contratación debe ser en postos estructurais, con prazas creadas na RPT, e non a través de subvencións de fondos europeos e por tempo limitado o que é sinónimo de emprego e servizos precarios.
Lembramos que o PP e a Xunta de Galiza son os únicos culpables do colapso que existe neste momento na valoración da dependencia. Son os responsábeis de atopar solucións a través da creación das suficientes prazas de persoal especializado coas que ofrecer un servizo axeitado como a cidadanía se merece.
Dende a CIG esiximos a Consellería de Política Social e a Dirección Xeral de Función Pública que non se salte a representación lexítima do persoal. En referencia ao decreto e ás novas equipas estamos abertas a traballar nunha mesa de negociación para a análise das necesidades de recursos humáns e a planificación e creación de todos os postos de traballo necesarios para dar un servizo público e de calidade.
- Detalles
A Xunta convoca a reunión da Comisión Negociadora do I Plan de igualdade para o vindeiro xoves 17 de novembro
Non era sen tempo que a Xunta retomase a negociación do seu I Plan de igualdade para o persoal da Administración Xeral. Tras case un ano de parálise absoluta por parte da Administración que nin convocou nin fixo propostas.
A intensa e incansable presión exercida pola CIG tras tantos escritos, solicitudes de reunión, de vincular o compromiso da súa elaboración á sinatura do Acordo de teletraballo, de tantas denuncias públicas nos medios de comunicación e no noso web, provocaron que a Xunta veña de convocar hoxe 2 de novembro de 2021 a segunda reunión da Comisión Negociadora do I Plan de Igualdade para o vindeiro 17 de novembro, xusto dous días despois de comezarmos a difusión polos centros de traballo do noso boletín especial, onde explicamos a necesidade do Plan de igualdade para todo o persoal e denunciamos as enormes eivas da Xunta de Galiza na conciliación, nas ferramentas de protección fronte ó acoso ou na falla de mulleres nos órganos de dirección.
Na CIG seguimos alerta para que esta sexa a definitiva, e non un mero requisito legal, porque queda pouco para rematar o prazo dun ano para ter listo o Plan de igualdade.
As compañeiras delegadas traballamos coa máxima implicación para que esta ferramenta de vital importancia aumente as garantías de dereitos de todo o persoal empregado, con independencia do seu sexo, tipo de traballo, xornada ou lugar onde preste o seu servizo. E instamos á Xunta a que manifeste agora, oficial e publicamente o seu compromiso en levar adiante este plan.
- Detalles
Como xa aventuramos tras a celebración do segundo exame deste proceso selectivo, os temores das 33 persoas aspirantes cumpríronse. É a primeira vez na historia das oposicións da Xunta de Galiza que ningunha das persoas aspirantes supera o exame dun proceso selectivo.
Se o feito xa é gravísimo en si mesmo, a situación agrávase porque estamos a falar dun proceso selectivo que se supón que é de consolidación de emprego, polo que o escándalo é apoteósico. Os responsables de Función Pública poden sentirse fachendosos por situar á Galiza como a primeira comunidade autónoma na que un proceso de consolidación de emprego non cumpre a súa finalidade.
A mensaxe que se transmite con esta situación resulta inquietante para o resto do persoal pendente doutros procesos de consolidación de emprego. Este escándalo deixa en evidencia a máis que urxente necesidade de fixar uns criterios homoxéneos e comúns nos procesos selectivos en xeral, e nos de estabilización e consolidación de emprego en particular, que eviten situacións bochornosas como esta e que deixan en moi mal lugar á Función Pública galega.
Consumada a desfeita, a pregunta que se fai o persoal afectado é que vai acontecer agora cos 22 postos de consolidación. Agardan unha resposta.
- Detalles
I Plan de igualdade para o persoal da Xunta de Galiza, XA!
O plan de igualdade é un conxunto de medidas destinadas a acadar a igualdade de oportunidades entre homes e mulleres e a eliminar toda discriminación por razón de xénero dentro da empresa. A través das súas distintas fases de elaboración e implantación, busca garantir a igualdade efectiva de mulleres e homes no traballo, nos salarios, na conciliación familiar-laboral, na promoción laboral, no acceso ao traballo, na formación, na carreira profesional ou no teletraballo, eliminando as desvantaxes, dificultades e atrancos que poidan existir para as mulleres no seu día a día laboral.
O plan de igualdade é un instrumento obrigatorio para as empresas de máis de 50 persoas traballadoras e para todas as administracións públicas.
A Xunta non cumpre coa lei e segue sen dotarnos do I Plan de igualdade de oportunidades, que é obrigatorio dende o ano 2007. Despois de distintas tentativas de inicio dos trámites e tamén denuncias na Inspección de traballo, o 6 de marzo de 2009, a CIG tomou a iniciativa solicitando que se iniciaran os trámites; no ano 2017 houbo algún intento máis. No 2019 as persoas responsables da Xunta de Galiza presentaron publicamente unha diagnose non negociada. A diagnose foi amplamente rexeitada, por estar elaborada á marxe da devandita Comisión Negociadora, por estar incompleta, por conter erros e referencias normativas obsoletas, por non abranguer a todo o persoal e por non ofrecer os mínimos datos requiridos pola lexislación vixente.
- Detalles
A interinización forzosa non é novidade: vén do 2017
Aínda que algún sindicato se sorprenda agora e descubra o que a Xunta pretende facer co persoal laboral temporal, a interinización forzosa vén dunha modificación da Lei de Emprego Público introducida hai 4 anos pola Lei 2/2017, de medidas fiscais e administrativas.
A CIG xa denunciou daquela os plans da administración
Chamamos á atención sobre este asunto e posicionámonos en contra desta chantaxe xa en xaneiro do 2017, Lei de medidas fiscais e administrativas 2017
“...o persoal laboral temporal vai ter que optar entre aceptar o cambio a persoal funcionario interino ou o despedimento, sen opción a continuar como persoal laboral temporal. “
Lembrámolo de novo en xaneiro de 2019 no Boletín sobre o Acordo de Concertación Social.
“...rescisión de contrato para quen non acepte pasar a persoal funcionario interino.”
As restricións de permanencia do Icetazo pactadas por CCOO, UGT e CSIF
O que vai facer saltar polos aires todo isto é o RD-l 14/2021, o “Icetazo”, que vén derivado dun acordo do Ministerio con CCOO, UGT e CSIF onde se establece que os contratos ou nomeamentos por interinidade non poden exceder dos tres anos.
Consecuencias de conxugar a funcionarización co Icetazo
Ao mudar o vínculo xurídico e funcionarizarse (pasar de ser persoal temporal a persoal interino), aplican de cheo a limitación aos nomeamentos dos antigos temporais, agora funcionarios interinos, polo que ninguén poderá estar máis de 3 anos na praza.
E se non me quero funcionarizar?
Coa normativa na man, “...nos casos en que o persoal interesado non acepte o nomeamento interino..., a Administración procederá a efectuar os trámites legais tendentes á extinción da relación laboral”
Cobraría indemnización?
Sabemos que aínda que estea recollido na LEPG, a Xunta non vai pagar de oficio, o que implicará ter que acudir ao xulgado para que indemnicen.
Que pasará con persoal indefinido?
Pois que evidentemente se se lles propón a novación do vínculo xurídico perderían a indefinición e pasarían a ser funcionarios interinos en praza vacante por un período non superior a 3 anos (salvo as excepcións que recolle a lei).
Agora ben, isto implicaría que a Xunta se metería nun grave problema se o persoal indefinido non acepta interinizarse e eles extinguen o contrato, polo que en principio non sabemos como queren abordar este asunto pero xa anunciamos a nosa oposición.
Cando se vai aplicar a interinización forzosa?
Parece que a intención da Xunta é iniciala despois da funcionarización do persoal laboral fixo.
A única solución que garante dereitos sería a voluntariedade
Dende a CIG cremos que a única solución a esta perda de dereitos é que a voluntariedade sexa real e que a Xunta admita que quen non queira pasar a ser persoal interino poida permanecer como persoal laboral temporal ou indefinido, e así non ter que novar a relación xurídica co límite dos tres anos.
Mantemos que a normativa actual deixa marxe para que, previa á funcionarización se saiba que persoas non queren facelo e por tanto non se inicie un proceso, que de rexeitarse implicaría a extinción do contrato. A voluntariedade sería a mesma solución que se lle aplicou ao persoal laboral fixo coa funcionarización.
- Detalles
Función Pública vén de informarnos que nos vindeiros días sairán publicadas as datas previstas para a realización dos primeiros exercicios correspondentes ao proceso selectivo para o ingreso na escala de auxiliar do Servizo de Prevención e Defensa contra Incendios Forestais, subgrupo C2, nas especialidades de Emisorista/Vixilante Fixo/a, Bombeiro Forestal - Condutor Motobomba e Bombeiro Forestal, do corpo de auxiliares de carácter técnico de Administración especial da Administración Xeral da Comunidade Autónoma de Galicia.
| Proceso selectivo | DOG convocatoria proceso selectivo | Data 1º exercicio | Prazas | Aspirantes | Hora de chamamento | Lugar |
| C2 – Bombeiro Forestal – Condutor Motobomba | 04.03.2019 | 27.11.2021 | 80 | 2004 | 9:30 h. | Silleda |
| C2 – Emisorista / Vixilante fixo/a | 04.03.2019 | 27.11.2021 | 75 | 2782 | 16:30 h. | Silleda |
| C2 – Bombeiro Forestal | 04.03.2019 | 28.11.2021 | 114 | 3807 | 9:30 h. | Silleda |
- Detalles
- REQUISITOS:
• Ter 16 anos e non exceder a idade máxima de xubilación (65 anos no caso do persoal funcionario)
• Figurar admitido/a nalgunha lista das categorías de persoal laboral equivalentes ao corpo no que solicita a inclusión (non poden anotarse os/as que se atopen penalizados a día 15 de xullo de 2014 ou antes)
• Ter nacionalidade española ou dalgún país membro da UE; ou ser cónxuxe , ascendente ou descendente de español ou dun membro doutro pais da UE sempre que non está separado de dereito
• Posuír as capacidades funcionais para o desempeño das funcións propias do corpo no que se anota.
• Non ter sido separado/a ou despedido/a por expediente disciplinario de ningunha administración pública.
- As solicitudes faranse preferentemente por vía electrónica (código de procedemento AP522U)
- As instancias dirixiranse á Dirección Xeral da Función Pública da Consellería de Facenda e Administración Pública.
- Non é preciso presentar ningunha documentación coa excepción das persoas que non teñan nacionalidade española
- Prazo de presentación de solicitudes: do 19 de outubro ao 18 de novembro (ambos inclusive)
- Detalles
A Xunta impón a modificación da lei de emprego público e os orzamentos en materia de persoal para 2022
O acontecido na Mesa Xeral de Empregados Públicos do 15 de outubro non foi pasar o rodete, foi unha falta de respecto a todos os traballadores e traballadoras da Xunta de Galiza. Non teñen escrúpulos e desta vez foi o recente falecemento do conselleiro de Facenda a escusa para non informar debidamente e modificar a lei de emprego público as présas e sen negociar.
Así, Función Pública solucionou en menos de 24 horas o amargo trago de cumprir coa lei e sentarse coas organizacións sindicais previa aprobación no Parlamento destas leis que afectan ao persoal empregado público.
Os Orzamentos para 2022
Non nos deron documentación ningunha. Soltaron uns poucos datos xerais (sen diferenciar nin sectores, nin consellerías, nin moito menos partidas orzamentarias). De seguro que serán máis completos no telexornal da RTVG. Preguntamos e... Isto é o que hai:
- Suba salarial que marca o goberno do Estado: 2%
- Recuperación do poder adquisitivo perdido na Galiza: CERO
- Recuperación do complemento específico nas pagas extras: CERO
- Recuperación do Fondo de Acción Social: CERO
- Recuperación das compensacións e dereitos do V Convenio: CERO
- Recuperación de emprego público: CERO
- Graos extraordinarios 1 e 2 da carreira profesional: parece que si, pero non se sabe canto, nin onde, nin para cantos.
- Orzamento para pasar o persoal de incendios de 9 a 12 meses: na “bolsa” (debe ser un caixón de xastre dos orzamentos)
- Orzamento para as “primas” do persoal escollido para os Fondos de Recuperación e Resiliencia (FRR): unha incógnita
O que nos venderon:
- O orzamento en materia de persoal aumenta en un 4,25 % a pesares de que xa non teñen os fondos extraordinarios da Covid. Pasa de 4.123 a 4.327 millóns de euros (pola suba do 2% do goberno do estado español)
- Queren que se derrogue a taxa de reposición (esquecen que foron eles os que a impuxeron e defenderon sempre) pero que o “goberno non llo aceptou”. Ironicamente véndense como os defensores do público, pero o que fan é agochar a súa incompetencia acusando de todos os males ao goberno do estado mentras non asumen a súa propia responsabilidade no cumprimento das OEP que eles mesmos aproban.
- Din que van cumprir o Acordo do Consorcio e que van pagar o último tramo salarial da equiparación co V Convenio.
As modificacións da Lei de Emprego Público
A Xunta acostuma a empregar a lei de medidas tanto para recortar dereitos (como no 2012), como para impoñer modificacións á Lei de emprego público de Galiza. Estas son as máis significativas, pero podes consultar o documento completo aquí:
- Modifican a definición do persoal funcionario interino para adaptarse ao RDL 14/2021, cunha redacción ambigua que cuestionamos. Queremos que se inclúa e aclare o dereito á carreira profesional para todo o persoal.
- Eliminan a porcentaxe reservada para a promoción interna nos procesos de consolidación e estabilización. Opoñémonos, e esiximos que se aplique para todos os procesos o 50% xa que non computa na taxa de reposición. Queremos que as prazas que queden desertas se acumulen para a seguinte convocatoria de PI.
- Amplían o tempo de comisión de servizo do artigo 100 (traslado voluntario en sectores prioritarios), de 6 meses a 1 ano con outro de prórroga. Unha barbaridade que pretenden xustificar coa xestión dos fondos de recuperación e resiliencia. Sabemos que na práctica son comisións opacas e que coa funcionarización poden xeralizarse ao ter máis persoal nestes sectores. Que modifiquen ás RPT, convoquen concursos de traslados e se deixen de chanchullos.
- Sancionan a fraude no procesos selectivos (para persoas empregadas e aspirantes): o copiar de toda a vida sanciónano con 2 anos e se é por medios dixitais con 5 anos sen poder presentarse a un proceso selectivo. Un manto co que Función Pública pretende tapar o escándalo do segundo exame do subgrupo C2 e da consolidación da categoría IV-1.
- Crean as escalas de enxeñería química e aeronáutica, e na escala de ciencias as especialidades de matemáticas e física. As primeiras para atender o polígono de Rozas e as segundas só indican que é por petición da Consellería de Medio Ambiente, Territorio e Vivenda.
- Engaden unha nova tarefa ao persoal da escala de gardas de recursos naturais sen tela negociado previamente. Claro, agora non podemos ir a denunciar por incumprir o Convenio porque o fan na escala coa funcionarización avanzada: Con cantos cambios de funcións máis nos imos atopar nesta funcionarización chapuza?
- Entran nunha serie de cambios para permitir a funcionarización deseñada no Acordo de Concertación cos que nin os asinantes están de acordo: a novacion do contrato do persoal laboral temporal e indefinido non fixo en persoal funcionario interino. Era visto e xa o avisamos. O que trae agora a novación ademais da perda de dereitos indemnizatorios por despedimento é a permanencia máxima de tres anos como persoal funcionario interino, segundo recolle o RDL 14/2021. Precarizan ainda máis as 5000 compañeiras e compañeiros laborais temporais da Xunta.
- Manteñen para o 2022 as medidas especiais da Covid para garantir a contratación do persoal sanitario das residencias. Por exemplo, poderán tirar do Servizo Publico de Emprego antes que despenalizar as listas, exclúen a esixencia do coñecemento do galego ou incluso poden tirar de persoal para a categoria de auxiliar de clínica que cursou estudos pero que aínda non ten a titulación. Manter esta excepcionalidade porque non hai xente nas listas denota que non se están a facer as cousas ben na xestión do persoal: sobrecarga de traballo, poucos descansos e inseguridade xurídica por falta de persoal e instrucións temerarias das direccións dos centros, na maior parte residencias de Política Social.
- E hai máis, derrogación das medidas que modificaban a lei de igualdade, eliminacion do período da toma de posesión do persoal eventual ou o traslado das mulleres vítimas da violencia machista e medidas para as vítimas do terrorismo, unicamente para adaptarse a lei básica, claro.
Permítennos facer achegas para presentar no trámite de emendas. Así están as cousas, a Xunta do PP coma sempre, tarde, mal e arrastro e vacilando con chulería ao seu persoal.
Rogos e preguntas:
O director xeral de Función Pública contesta o que quere e cando quere, hoxe tocou:
- Concurso de traslados: bastante avanzado
- Plan de igualdade: a ver se neste mes
- Procesos selectivos: bombeiros e funcionarización bombeiros na segunda quincena de novembro
- RPT do Consorcio: nuns días
- Non hai paralización dos procesos selectivos
- Detalles
A Xunta quere financiar as escolas infantís privadas de 0 a 3 anos en vez de crear novas escolas públicas
A CIG esixe a consolidación e fortalecemento dunha rede pública 100% para a educación infantil.
Feijoo, no canto de potenciar a rede pública de escolas infantís, tanto as dependentes directamente da Consellería de Política Social (Axencia) como as do Consorcio Galego de Servizos de Igualdade e Benestar, anuncia que van conseguir a gratuidade da educación infantil a golpe de talonario, pagándolle ás escolas infantís privadas e desfornecendo os servizos públicos.
Para acceder ao Bono Concilia (axuda, segundo renda, para as escolas infantís privadas) era requisito que solicitases e non obtiveses praza nunha da rede pública. Nos últimos tempos, os segundos fillos non pagan a escola infantil tanto pública como privada, sen requisito previo de ter que solicitar primeiro a praza no sistema público.
Agora estamos ante a aposta da Xunta de Galiza polo ensino concertado xa dende a raíz: dende os 0 a 3 anos. A fórmula dun neoliberal é desprenderse da xestión pública das escolas e apostar por financiar á privada, ben con bonos escolares ben con subvencións, ben concertando servizos.
A necesidade de crear novas escolas infantís e novas unidades en moitas das existentes é algo que levamos anos pedindo dende hai moito tempo. A rede pública necesita incrementar o seu número de centros ata cubrir o 100% da poboación e do territorio, xa que é a única que garante un servizo de calidade e que chega a todo o territorio e non só ás grandes vilas e cidades.
Tal como se presenta este asunto para a empresa privada, vai DOMUSVI adicarse tamén ao sector da infancia?
- Detalles
Función Pùblica vén de convocar ás organizacións sindicais a unha Mesa Xeral de Empregados Públicos que terá lugar o venres 15 para "negociar" o anteproxecto de lei de orzamentos do 2022 e o anteproxecto de lei de medidas naqueles aspectos que afectan ao persoal empregado público.
Afondando no costume instaurado polo director xeral de Función Pública, fomos convocados tamén a unha xuntanza previa no mesmo venres e para falar dos mesmos temas. Un dous por un dos de toda a vida.
É de agradecer o esforzo en materia de conciliación da vida laboral e familiar de Función Pública ao enviarnos a documentación hoxe xoves a última hora da mañá, con menos de vintecatro horas para as xuntanzas. Deste xeito poderemos adicar a tarde ou a noite á lectura da mesma.
A falta dunha análise polo miúdo do texto, un ano máis o director xeral de Función Pública pretende modificar a Lei de emprego público de Galiza, coma quen di, dun día para outro, sen negociación real e pasando o rodete.
Con este precedente xa nos facemos unha idea do que van ser as xuntanzas de mañá.