- Detalles
Orde do 20 de xullo de 2021 (DOG 30/07/2021), pola que se desenvolve a disposición transitoria segunda do Decreto 37/2006 do 2 de marzo, polo que se regula o nomeamento de persoal interino para o desempeño con caracter transitorio de prazas reservadas a persoal funcionario e a contratación de persoal laboral da Xunta de Galicia, e se aproba o modelo normalizado de solicitude (código de procedemento AP522U)
Esta orde será de aplicación ás listas únicas que se elaboren, ao abeiro da disposición transitoria segunda do Decreto 37/2006, do 2 de marzo, para a cobertura transitoria de postos reservados a persoal funcionario da Administración xeral da Comunidade Autónoma de Galicia e de entidades públicas instrumentais do sector público autonómico incluídas no artigo 45.a) da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
As persoas admitidas nas listas das categorías profesionais de persoal laboral funcionarizadas incluiranse nas listas únicas para a cobertura transitoria de postos de persoal funcionario nos corpos, escalas ou especialidades declaradas equivalentes no anexo do Decreto 165/2019, do 26 de decembro, nas condicións establecidas nesta orde. As persoas penalizadas con posterioridade ao 15 de xullo de 2014, que non resultasen excluídas posteriormente por calquera outra causa, incluiranse nas listas nas condicións establecidas nesta orde e no artigo 18.2 do Decreto 37/2006, do 2 de marzo.
Exceptúanse desta regulación as listas para a cobertura temporal de postos dos servizos de prevención e defensa contra incendios forestais que serán obxecto de ordenación específica.
As persoas incluídas no ámbito de aplicación desta orde, integrantes das listas para a cobertura temporal de prazas de persoal laboral, serán admitidas nas listas únicas, sempre que cumpran os requisitos legais exixidos para o acceso ao correspondente corpo, escala ou especialidade de persoal funcionario en que se clasifica a categoría profesional laboral que se funcionariza, nos termos establecidos no artigo 8 do Decreto 37/2006, en concordancia coa súa disposición transitoria segunda.
Listas de vinculación temporal de nova creación (art. 4 da Orde do 20 de xullo de 2021)
Cando fose necesario crear novas listas de natureza funcionarial para cuxa inclusión se requira a mesma titulación xenérica ou específica que a exixida para o acceso ás listas da categoría profesional laboral funcionarizada declarada equivalente, a Administración poderá transformar de oficio as listas da categoría laboral correspondente en listas de persoal funcionario do corpo, escala ou especialidade declarada equivalente.
As persoas integrantes das listas transformadas manterán as mesmas condicións que tiñan nas listas de persoal laboral das categorías profesionais equivalentes o día da entrada en vigor da resolución pola que se publiquen as listas definitivas A Administración comprobará que nas persoas integrantes das novas listas concorren os requisitos legais exixidos para ser admitidas nelas.
Listas de vinculación temporal en xestión (art. 5 da Orde do 20 de xullo de 2021)
Non será necesaria a creación de novas listas de vinculación temporal, no caso de que existan, en xestión, listas de natureza funcionarial equivalentes ás listas das categorías profesionais laborais funcionarizadas ao abeiro do Decreto 165/2019, do 26 de decembro.
As persoas integrantes das listas de contratación temporal de persoal laboral de categorías profesionais funcionarizadas interesadas en incluírse en listas en xestión de persoal funcionario dun corpo, escala ou especialidade declarados equivalentes, deberán presen tar solicitude para a súa inclusión nelas, resultando admitidos sempre que cumpran os requisitos legais para o acceso ao corpo, escala ou especialidade correspondente.
Nestas solicitudes de inclusión unicamente poderán modificarse os ámbitos territoriais e os datos persoais e, se é o caso, incluiranse as titulacións para determinadas categorías profesionais laborais cando así se estableza expresamente nas resolucións de convocatoria.
Méritos
O baremo aplicable nas listas de vinculación temporal elaboradas en desenvolvemento da disposición transitoria segunda do Decreto 37/2006, para a cobertura transitoria de postos reservados a persoal funcionario, é o establecido no artigo 9 do Decreto 37/2006.
Valoraranse os méritos por servizos prestados como persoal laboral en categorías profesionais declaradas equivalentes no anexo do Decreto 165/2019 das cales non existan listas de contratación así como os méritos que tiveran as persoas interesadas como integrantes das listas da categoría profesional laboral equivalente nas alíneas b) e c) do artigo 9, e nos termos establecidos nos artigos 9 e 12 do Decreto 37/2006.
FORMA E PRAZO DE SOLICITUDES
No suposto recolllido no art. 4 desta Orde, as solicitudes presentaranse preferentemente por vía electrónica a través do formulario normalizado, código de procedemento AP522T, contido na Orde do 22 de febreiro de 2021 (DOG do 26 de febreiro), accesible na sede electrónica da Xunta de Galicia, https://sede.xunta.gal.
Para a inclusión nas listas de vinculación temporal en xestión recollidas no art. 5 desta Orde deberá utilizarse o formulario AP522U.
O prazo de presentación de solicitudes será o establecido nas resolucións de apertura da dirección xeral competente en materia de función pública.
- Detalles
Como en anos anteriores, en vésperas do mes de agosto Función Pública apreta o acelerador con varias mesas de negociación concentradas en tres días (23, 26 e 27 de xullo) con varias RPTs, dúas mesas sectoriais de funcionarios/as, dúas mesas xerais de negociación e unha Comisión de Persoal. En rogos e preguntas tocáronse múltiples asuntos que poden ser do teu interese.
Na Comisión de Persoal (martes 27 de xullo) aprobáronse os asuntos que se discutiron nas xuntanzas previas do venres 23 e luns 26, nunha Orde do día sobrecargada: aprobáronse seis RPTs (Vicepresidencia 1ª, Cultura e Educación, Política Social, Agacal, Emprego e Igualdade e Sanidade), xunto ao Acordo de condicións de traballo do persoal técnico de incendios, e retiráronse da orde do día tres puntos: unha corrección de erros da RPT de funcionarización e dúas convocatorias de funcionarización do persoal laboral de incendios (quedaron adiados para unha vindeira Comisión de Persoal na próxima semana).
RPT da Vicepresidencia 1ª
Actualmente está tramitandose unha modificación máis amplia desta RPT (comprométense a retomala en setembro), pero traen esta nova modificación urxente por unha xubilación inmediata e na que amortizan dúas prazas de aux. admvo. para crear unha praza de tradutor/a. Non xustifican a urxencia desta modificación que despachan en dous días e sen xuntanza previa. Voto na Comisión de Persoal: CIG en contra, CSIF a favor e CCOO e UGT abstención.
RPT de Cultura e Educación
A finalidade desta RPT é a adaptación á nova estrutura orgánica da consellería e a modificación consonte ás varias escalas creadas. Modifican tamén outra serie de postos. Excesivas coberturas por LDs e CE e de postos abertos a outras administracións, sempre en LD. Amortizan 40 postos, a maioría postos baixos (30 de 40 son inferiores a C1/III, e 26 de 40 en centros de atención ás persoas), e crean 27, ningún inferior a C1. Incumpren a palabra (setembro/2019) de meter en RPT os máis de 100 postos de persoal laboral creado e non metido en RPT dende o 2015. Voto en contra da CIG, CCOO, CSIF e UGT. Máis información.
RPT de Política Social
Adaptación da RPT á estrutura orgánica, apertura de postos a outras admóns, modificación de postos e centros de destino. Na Mesa Xeral previa a esta CP, por falta de negociación real e por non dispor da documentación necesaria, a CIG solicitou, sen éxito, a retirada da orde do día. Voto en contra da CIG, CCOO, CSIF e UGT.
RPT Agacal
Amortizan de 47 postos (algunhas ocupadas, e de grupos baixos, incluíndo persoal de campo), para crear 25, modificación de varios postos, excesivas prazas de LDs e CE así como de prazas abertas a outras admóns, inclusión de pluses derivados de sentenzas e adaptación das escalas á LEPG. Voto da CIG e CSIF en contra, CCOO abstención e UGT a favor.
Acordo de condicións de traballo do persoal técnico de incendios
O texto foi negociado e consensuado en xuntanzas previas. Voto a favor de CIG, CCOO, CSIF e UGT.
RPT Emprego e Igualdade
Adaptación ao decreto de estrutura, con amortizacións, creacións e modificacións. Non se xustifica a urxencia desta modificación cuns tempos tan reducidos. Non houbo unha verdadeira negociación por parte da consellería. Voto en contra da CIG, CCOO, CSIF e UGT.
RPT de Sanidade
Non existiu negociación, tan só apariencia. Cambios nos corpos/escalas arbitrarias, con xustificacións xenéricas e globais (prometeron facilitar información da cobertura das prazas para ver as necesidades, pero non cumpriron a promesa). Apertura a outras administración sen reciprocidade. Voto en contra de CIG, CCOO, CSIF e UGT.
Rogos e preguntas
Concorrencia entre concurso de traslados e promoción interna: informa o DXFP que remitiron texto informativo dos criterios para os supostos de concurrencia entre concurso e promoción interna. Criterio xeral: respetarán a praza obtida por concurso se é a de maior grupo e poderán tomar posesión con caracter definitivo.
Persoal laboral de educación fora de RPT (prazas creadas pola consellería dende o 2015 e que non foron incluidas na RPT): Calculamos que son 100 prazas. Queremos saber a cifra e cando van tramitar a RPT, algo que prometeron en setembro/2019. O representante da consellería afirma que setembro comezaremos a negociación. Andaremos algo por riba de 100 prazas.
Concurso xeral: tes información específica deste asunto na seguinte ligazón.
Condicións traballo parque Illas Atlánticas: o DXFP asegura que negociaremos a comezos de setembro.
Promoción interna AXI e Augas: outra promesa de comezar a negociar en setembro.
Plan de igualdade: din que están a traballar na diagnose, que é un tema que esixe moitos datos desagregados por sexo. Contan poder presentar o resultado en setembro, e a partir de aí traballar no plan.
Calendario de exames:
- Ata o 20 de setembro non haberá exames. Os primeiros serán de estatística (2º exame polo 20). Inmediatamente C1, C2, e funcionarización. Anunciarán cando teñan as datas e autorizacións de saude pública. Polo 23/24 serán os exames.
- Para promoción interna A1 e A2, o DXFP di que estirarán os prazos ao máximo cumprindo os prazos (40 días + agosto inactivo + 20 de ampliación). Calcula outubro.
RPT Consorcio: amplían o prazo para presentar alegacións ata o luns 6 de setembro.
Teletraballo: Hai problemas en varias consellerías e no Consrocio. O DXFP di que se poden neste mes darán información das concesións, denegacións, etc, e se non para o seguinte (a 30 de xullo, ningún movemento).
Carreira profesional: informa o DXFP que antes de irnos de vacacións (mediados de agosto) teremos unha reunión e explicarán postura. Asegura que quen xa estea a cobrar pode estar tranquilo/a, que seguirá cobrando (o que leva días dicindo a CIG). Estudaremos posibilidades nesa reunión. Máis info sobre a sentenza.
- Detalles
Facemos un repaso á situación e espectativas dos concursos de traslados. Contámosche a información que temos de cada un deles.
a) CONCURSO DE VETERINARIOS/AS
Recibíramos o primeiro e único borrador en xaneiro do 2020, alegamos, e non houbo máis movementos. En múltiples reunións preguntamos e esiximos retomalo, e como quen escoita asubiar.
O director xeral de Función Pública (DXFP) ten mencionado que o concurso estaba bloqueado por unha consellería que quería modificar a súa RPT (isto non lle resta responsabilidade, pois puideron sacalo coa RPT vixente e punto, que espabilasen). A consellería aludida (Sanidade), dixo recentemente que eles xa cumpriron, que Función Pública xa tiña unha proposta da súa RPT.
A última RPT de Sanidade retira a cobertura por parte de persoal veterinario de 18 xefaturas de sección (a proposta de CCOO, co apoio de SEPGA). Pero parece ser que esa non era a RPT que bloqueaba o concurso: segundo o DXFP ao longo de setembro teremos negociación da RPT completa de persoal veterinario de Sanidade.
Así que poñéndonos no mellor dos casos, un par de meses para a RPT, e outro par máis para a publicación do concurso. Veremos se con moita sorte témolo convocado para comezos de 2022.
b) CONCURSO DE FINANZAS
Este é un dos poucos concursos que se move con certa periodicidade (máis ou menos cada catro anos, que comparado cos demais, é maravilloso). Nesta ocasión foi publicado no DOG do 23/07/2021, un mes e pico despois de ser aprobado en Comisión de Persoal.
Subliñamos que neste concurso xa non é preciso confirmar os méritos se hai conformidade, o que vén a solucionar o problema que tivemos noutros concursos e que motivou a exclusión dunha boa parte do persoal (pasou en corpos xerais e en gardacostas).
c) RESTO DE CONCURSOS DE ESPECIAL, ESCALAS E PERSOAL LABORAL
Non enviaron nin o primeiro borrador do resto de concursos de administración especial nin de escalas de administración xeral. Non teñen a máis mínima intención de mover o asunto por agora (e tal e como van as cousas en Función Pública, poden pasar algúns anos máis).
De persoal laboral a vontade dos dirixentes políticos da Administración (co apoio de CCOO e UGT) é que nunca máis haberá concurso, en contra do esixido pola CIG.
d) CONCURSO DE CORPOS XERAIS
Para cando?
Ainda que xa publicaron o baremo provisional o 16 de xullo (dous anos e medio despois de que nos enviaran o primeiro borrador do concurso), non contes que en setembro estará todo resolto. Tomao con calma, que o ritmo que levan quenes dirixen o cotarro é outro.
Estaba previsto que cando publicasen ese baremo provisional (que ia ser fai meses, dicían!), darían conta de se retiraban ou non do concurso as prazas ofertadas que están ocupadas por persoal laboral indefinido non fixo (unhas 80-90), tal e como lle propoñíamos dende a CIG, porque ante o retraso dos procesos selectivos aos que tiñan dereito as persoas que os ocupaban, resolver o concurso antes da oposición podía dar lugar a sentenzas de readmisión. Retirar eses postos era a única maneira de rematar co enorme tempo de bloqueo do concurso (na parte de responsabilidade que vai ligada ao retrado dos procesos selectivos) sen caer en inseguridade xurídica.
Pero publicaron o baremo, e deses postos nin pío. Así que preguntamos pola retirada ou non, e a resposta foi que de momento non, que o verían máis adiante segundo fose a evolución dos procesos selectivos, mantendo a previsión de resolver simultaneamente o concurso e os procesos selectivos.
Conclusión:
- A toma de posesión do concurso vai ser inmediatamente anterior, ou con pouca diferenza temporal, á elección de destino das persoas que superasen os procesos selectivos de acceso libre de corpos xerais.
- Estes procesos selectivos rematarían, segundo palabras do DXFP, “dentro deste ano”.
- No mellor dos casos podemos falar de decembro. Pero ollo, que os retrasos e os incumprimentos dos “cronogramas” son algo habitual en Función Pública.
Concorrencia de promoción interna e concurso de traslados
O director xeral de Función Pública xa publicou a súa solución ao conflito no que están as persoas que superaron a promoción interna pero que ao tempo teñen espectativa de obter no concurso de traslados un posto aberto ao grupo superior. A solución é que van poder quedar na praza do concurso pero xa no novo grupo ao que promocionaron. Este problema é causa, como non, do retraso do concurso.
Renunciar a participar no concurso e reclamación ao baremo provisional
Lembra que as bases da convocatoria do concurso (DOG 27/11/2019) indican (base III.6) que as solicitudes de participación vinculan ás persoas solicitantes, pero permite renunciar ata os dez días seguintes ao da publicación das puntuacións provisionais no DOG. Por tanto, se polas razóns que sexa, estás interesado/a a renunciar a participar no concurso, estás en prazo ata o venres 30.
Ese é o mesmo prazo que tes para reclamar ao baremo provisional.
Admitido/a con cero puntos de méritos
O director xeral lembrou que o concurso é un procedemento de concorrencia competitiva. Aínda así, comprometeuse a estudar o caso, pero advertindo que non abriría a porta a que se producise inseguridade xurídica (porta que podería abrir calquera das persoas que si cumpriron co procedemento).
Nós xa o consultamos coa nosa asesoría xurídica, e tamén o falamos con persoas responsábeis de Función Pública, e concluímos que dende unha óptica xurídica, o tema está complicado, xa que non se trata dun erro emendable, senón do incumprimento dunha base.
Obviamente, a vía xudicial sempre está aberta para calquera e de feito recibimos moitas chamadas insistindo na subsanación de defectos, mais é unha decisión persoal que deben valorar as persoas afectadas pola exclusión.
Sabemos dalgún sindicato que está a prometer seguir esa vía, mais agardemos que non estean a vender fume para gañar afinidades sen opción de chegar a bo porto.
- Detalles
As oficinas agrarias de Castro Caldelas e da Pobra de Trives non poden ofrecer o seu servizo por carencias moi graves de persoal
Foron e son numerosas as campañas publicitarias da Consellería de Medio Rural e da Xunta de Galiza a respecto da importancia do rural e a loita contra o despoboamento. O propio presidente da Xunta , cualificou esta lexislatura como a “lexislatura do rural” pero estas palabras quédanse baleiras ante a realidade das oficinas agrarias comarcais que son un servizo esencial para o apoio e o fomento da actividade agraria e gandeira na Galiza.
Oficinas agrarias comarcais sen rexistro nin atención ao público
Como exemplo neste momento a Oficina Agraria de Castro Caldelas non dispón de ningún tipo de persoal administrativo xa que a única persoa que desenvolve ese traballo está de permiso de paternidade e a consellaría debe querer facer caixa a costa de non dar un servizo público. Esta carencia provoca que non se poda atender ao rexistro e que a oficina teña que pechar cando o persoal técnico ten que facer inspeccións obrigando as persoas usuarias a desprazarse más de 50 km ou a acudir a un xestor/a privado.
Non se cobren as prazas de persoal veterinario
Ademais diso o único persoal veterinario da oficina atópase de vacacións e a xefatura territorial tampouco cubriu a falta. Indicar que nesa oficina debera contar con dous veterinarios segundo establece a relación de postos de traballo de Medio Rural.
A Oficina Agraria da Pobra de Trives letra máis de tres meses sen ningún posto veterinario dos dous que forman a súa estrutura. Estase a funcionar, tanto a oficina de Trives como a de Castro Caldelas, coa única veterinaria de apoio da área o que produce que soamente poida estar media mañá en cada unha das comarcas co prexuízo para o servizo público que isto supón. Non se entende porque a Xunta non procede a sua cobertura mediante a chamada de persoal polas a unhas listas de contratación que conta con máis de medio cento de profesionais agardando soamente na provincia de Ourense.
Sen servizos públicos de atención e apoio non hai desenvolvemento no rural
Dende a CIG entendemos que esta é unha situación insostíbel para dar capacidade de resposta a dúas comarcas con gran actividade gandeira e agraria ademais de mermar considerabelmente os servizos públicos en zoas rurais, baleiradas e de montaña que adoecen significamente deles. Esto é unha tónica continuada na xestión das OACs da provincia, exemplos como a de Viana ou a Rua que costou anos de demandas sindical e dos traballadores e protestas cidadáns para conseguir a cobertura dunha administrativo/a, unha situación de vergonzosa miseria.
Como se pode potenciar este sector primario fundamental para o desenvolvemento económico das comarcas se o que facemos e desmantelar as oficinas agrarias comarcais?
Dende a CIG pedimos que Función Pública se deixe de hipocresías e esiximos a inmediata cobertura dos postos de traballo vacantes nas oficina agrarias para dar un servizo de calidade no rural.
- Detalles
O mércores 21 de xullo tivo lugar o CSSL de Incendios onde dimos conta das grandes eivas de riscos laborais no SPIF.
|
ASUNTO |
CIG |
CONSELLERÍA MEDIO RURAL |
|
Dotación de emisoras TETRA para o persoal vixilante fixo e arranxo das pistas de acceso ás casetas |
Solicitamos que se cumpra o plan de acción onde se contempla que se deberá realizar un mantemento periódico e arranxo das pistas de acceso as casetas Se a administración non arranxa as pistas ou proporciona un vehículo todoterreo verémonos na obriga de denuncialo |
Van adquirir 44 emisoras tetra para entregar aos vixilantes, en base o acordo marco Realizarán unha revisión das pistas e aumentarán a disposición orzamentaria para o arranxo dos accesos |
|
Simulacros de nivel 1 e prácticas de manexo de emisoras. |
Solicitamos que a Subdirección de Incendios elabore un plan axeitado e se estandarice a realización de este tipo de simulacros. |
Os datos aportados pola Administración en canto o números de simulacros solicitados dende a CIG son dispares en cada provincia |
|
Vacinación do persoal de incendios, e recordatorio da necesidade de cumplir o protocolo Covid. |
Reiteramos o abandono do SPIF en canto o protocolo de vacinación coma servizo de emerxencias e servizo esencial. Solicitamos o mantemento dos protocolos antiCovid, que se dote ao persoal de máscaras FFP2 e fomentar o traballo binomio brigada-motobomba a quendas de 10 horas |
|
|
Ficha de características físicas das garrafas de espumóxeno |
Apostamos pola necesidade de establecer plans de formación para o manexo con seguridade deste tipo de sustancias. Solicitamos a entrega ao persoal de fichas de seguridade destes retardantes así como as recomendacións do seu uso e procedementos de almacenaxe Que se leve un rexistro das persoas que os empregan e formación axeitada |
Entregáronnos a ficha de seguridade do producto e o Servizo de Prevención fixo un balance sobor o emprego destes , indicando que están compostos de tensoactivos aniónicos, de composición moi similar de productos coma os lavalouzas. O producto concentrado sen diluír provoca irritación ocular grave,polo que é necesario o emprego das gafas que se empregan no servizo |
|
Designación dos membros do subcomité de Epis. |
Solicitamos que se constitúa este Comité |
Pola Administración os seus integrantes serán o subdirector de incendios ou o xefe de servizo de Programación. |
|
Situación dos medios en alto risco (O persoal en determinadas provincias se está a poñer un puntos altos no monte) |
Manifestamos que non ten sentido situar os bombeiros forestais neste tipo de lugares É preciso dunha vez por todas algo de empatía e respeto hacia o persoal do SPIF |
|
|
Emprego dos bombeiros forestais nas emerxencias de medio rural |
Dende a CIG levamos anos e anos loitando polo emprego cando sexa necesario do emprego do SPIF no Apoio en Continxencias no Medio Rural,primeiro polo establecído no RD 1031 /2011,pola consideración do SPIF como Servizo de Emerxencias,no Convenio actual e no propio CNAE Solicitamos que se incluían aos/as bombeiros/as forestais e demáis categorías para que poidan actuar en Apoio en Contixencias no Medio Rural e Natural |
|
|
Rotativos V1 vehículos de extinción. |
Reseñamos a pouca calidade destes equipos |
Entregáronse sinais luminosos a todas as brigadas, e vanse realizar cursos de manexo destes |
ROGOS E PREGUNTAS
Sopladoras Still.
Utilizadas para a desinfección. Teñen un fallo de fabricación, a empresa púxose en contacto ca Administración para que se leven os sopladores para reparar.
Autorescatadores de osíxeno químico.
Posibilidade de que o contrato quede deserto, xa que é máis que posibél que as empresas non cumpran o prego de garantir 10 minutos de osíxeno químico. Son productos moi específicos e case que non hai moitos modelos no mercado. O presidente do Comité propón baixar nos pregos técnicos o tempo de duracion de 10 a 7 minutos. E unha decisión moi importante para tratar en rogos e preguntas, polo que se solicita que se leve o Subcomité de EPIS
Solicítase o número de prendas que se lle entregaron os axentes ambientais
De non obter está información terremos que denuncialo en vía xudicial.
Deficiencias nos vehículos todoterreo do persoal fixo discontinuo de 6 meses.
Dende a CIG solicitase que se solucionen inmediatamente as deficiencias destes vehículos, rodas inaxeitadas, baca sen topes dianteiros e traseiros, mal selado de caixas traseiras...
Roupa de inverno do SPIF.
Dende a CIG solicitamos información de como está o procedemento da roupa de inverno,e as datas de entrega deste equipamento ao persoal.Dende a Administración indicasenos que sera entregada antes de rematar o ano 2021.
Intercomunicadores para os/as bombeiros/as forestais.
A consecuencia das demandas na Inspección de traballo pola CIG , vanse a entregar intercomunicadores ao persoal bombeiro forestal. Coma non se poden adxudicar a través de un contrato menor e teñen que seguir o procedemento reglamentario.A Administración indícanos que vai axilizar o procedemento.
- Detalles
A Comisión de Persoal do 28 de xullo de 2021 aproba a adenda que mellora o Acordo das condicións de traballo do persoal técnico de incendios dos subgrupos A1 e A2, co voto favorable de todas as organizacións sindicais.
Fixeron falta dous anos de loita e a unha dura folga do persoal técnico do Servizo de Prevención de Incendios Forestais para conseguir a mellora das súas condicións laborais. O acordo foi difícil pois a consellería do Medio Rural se amparaba en que estaba pendente dunha forte reestructuración do servizo que afectaría a estructura e funcións, razón pola que preferían esperar alongando meses incluso anos unha situación insostible e de alta conflitividade co persoal.
Finalmente na mesa de negociación fomos capaces de chegar a unha adenda de mellora do Acordo actual que recolle as demandas máis urxentes, proposta que foi ratificada en asamblea de traballadores cunha alta participación e que pecha o conflito laboral.
Na CIG somos conscientes de que é un avance significativo pero tamén de que a prioridade é fortalecer os cadros de persoal para baixar a carga de traballo. E desconfiamos dunha reestructuración onde non se contemple o reforzo deste servizo esencial para Galiza máis, pola contra, que artellen unha centralización que afonde no illamento do rural co desmantelamento dos 19 distritos forestais.
Olla aquí o comunicado conxunto das organizacións que convocamos a folga do persoal técnico do SPIF.
- Detalles
Despois de moitos meses dando a paliza a Función Pública para que desen unha solución á situación das compañeiras e compañeiros que superaron a promoción interna de corpos xerais e que ao tempo participaron no concurso de traslados, e que por mor do enorme retraso deste último proceso se encontran nunha situación de incertidume, por fin tiveron a ben enviarnos a súa postura.
En xeral, o que propoñen é:
- O concurso será resolto con anterioridade ao acto de elección de destino definitivo.
- Quen no concurso obteña un posto aberto ao grupo superior, poderá tomas posesión dese posto, xa no novo grupo, quedando excluido/a da elección de destino definitivo.
- Quen xa tomou posesión na promoción interna do posto que viña ocupando por estar aberto ao grupo seperior, xa está en destino definitivo, por imperativo das bases da convocatoria, polo que non participará na elección de destino.
Temos que dar resposta inmediata a Función Pública co noso parecer ao texto que enviaron, para unha urxente publicación no web de Funcion Pública, tendo en conta que o venres 30 remata o prazo para renunciar ao concurso de traslados. Así que se tes algo que dicirnos, contacta coa CIG xa.
Este é o texto íntegro do que nos enviou Función Pública:
NOTA ACLARATORIA SOBRE A CONCORRENCIA DOS PROCEDEMENTOS DE CONCURSO DE TRASLADOS E PROMOCION INTERNA
En relación coa concorrencia dos procedementos de concurso de traslados e a promoción interna, INFORMASE:
As persoas que se atopen afectados, ao mesmo tempo, polo procedemento de concurso de traslados F0219 e polos procesos selectivos de promoción interna pendentes do acto de elección de destino definitivo, seranlles de aplicación o seguinte:
1. O concurso ordinario para a provisión de postos de traballo vacantes da Administración Xeral da Comunidade Autónoma de Galicia resolverase con anterioridade as eleccións definitivas derivadas dos procesos selectivos de promoción interna, as cales, faranse inmediatamente despois da resolución do concurso.
2. As persoas que dende a convocatoria do concurso de traslados da administración xeral teñan promocionado a un grupo superior mediante a promoción interna e obtiveran en dito concurso un posto de traballo aberto ao posto ao que teñan promocionado, poderán tomar posesión do mesmo como funcionario dese novo grupo.
Neste caso, non participaran na elección de destino definitiva do proceso selectivo de promoción interna.
3. As persoas participantes no concurso de traslados que non obteñan unha praza aberta ao subgrupo ao que promocionaron, e se atoparan en destino provisional ou excedencia por prestación de servizos no sector público froito do proceso selectivo de promoción interna, deberan participar no acto de elección de destino definitivo.
- Detalles
Valoración das repercusións xurídicas e sindicais da sentenza do Tribunal Superior de Xustiza de Galiza (TSXG) que declara ilegal a sección segunda do Acordo de Concertación relativo á carreira profesional do persoal da Xunta de Galiza
Na CIG asistimos con abraio a unha campaña dos sindicatos amarelos culpándonos de tumbar a carreira profesional e, case que, das dez pragas de Exipto.
Dende o minuto 1 no que foi negociado o Acordo de Concertación, todo o mundo sabía que artellar un sistema de carreira profesional que non fora universal, ademais de ser ética e sindicalmente reprobable, era contrario ao principio de igualdade e vulneraba o ordenamento xurídico do Estado español e o dereito europeo.
Non foi porque non o advertiramos, ata dimos a coñecer sentenzas de diversas administracións ratificadas polo Tribunal Supremo que obrigaban a que carreira profesional tivera carácter universal.
A CIG gañou a sentenza contra a Orde do sistema extraordinario de carreira, conseguindo que o persoal interino e temporal acadaran o mesmo dereito que o persoal fixo e funcionario de carreira. Mais, a Xunta aguillada por CCOO e UGT, no canto de estender o dereito a todo o persoal, recorreu en casación a sentenza.
Agora vimos de gañar a demanda contra a sección 2ª do Acordo de concertación que excluía a este persoal; resultando, da sentenza do TSXG, uns fundamentos de dereito ben clariños nos que fica patente a ilegalidade manifesta deste acordo discriminatorio entre a Xunta, CCOO e UGT.
E, como non podía ser doutro xeito, as comparsas da Xunta, CCOO e UGT, acúsannos de anular o sistema de carreira e que o persoal funcionario de carreira imos deixar de cobrala. Pois ben, a realidade é outra:
- A anulación da sección 2ª do Acordo de Concertación non aparella a anulación do grao I e II do sistema extraordinario de carreira. As razóns son sinxelas: a sentenza anula un “acordo sindical” non anula a “Orde pola que foi convocado o grao extraordinario”.
Como exemplo, as Ofertas de Emprego Público (OEP) dos anos 2017 e 2019: foron declaradas nulas polo TSXG a instancia da CIG, e isto non obrigou á Administración a suspender as OEP, senón a incrementar e convocar postos que non ofertara. - Que pasaría si, como di CCOO e UGT, a Xunta de Galiza decidira extinguir o complemento de carreira profesional do persoal que xa o percibe, como consecuencia de que o TSXG declarou que a Sección 2ª do Acordo de Concertación é discriminatoria?
Deixando claro que sería por iniciativa propia e non por mandato xudicial, sucederían tres cousas:- A Xunta de Galiza podería estar a violar a garantía de “indemnidade”, pola cal ninguén pode ser represaliado por solicitar a tutela xudicial efectiva dos tribunais. E, de certo, esa eventual acción carrexaría consecuencias de toda índole para os responsábeis de poñela en marcha.
- A Xunta de Galiza estaría a violar o dereito á carreira, que xa forma parte do núcleo das relacións laborais e administrativas dos “beneficiarios de boa fe”: laborais fixos e funcionarios de carreira.
- A Xunta de Galiza non estaría a dar cumprimento nen a esta sentenza xudicial, nen á do réxime extraordinario que ordena recoñecer ao persoal temporal a carreira profesional.
- Finalmente, non debemos confundir, como intencionadamente fan CCOO-UGT-Xunta, os seguintes tres conceptos: o "dereito á carreira profesional", a "convocatoria do grao extraordinario de carreira" e un "acordo sindical" ilegal.
- O dereito á carreira (derivado do EBEP e da LEPG) non hai resolución xudicial que poida derroga-lo porque é un dereito de configuración legal.
- A convocatoria do grao extraordinario dispón dunha sentenza propia que declara que hai que incluír ao persoal interino e temporal.
- O Acordo sindical UGT-CCOO-Xunta foi declarado discriminatorio co persoal con vínculo temporal e polo tanto nulo.
- O artigo 73 da Lei da Xurisdición Contencioso Administrativa é claro cando fixa que as sentenzas que anulen un precepto ou unha disposición xeral non han afectar, por si mesmas, á eficacia das sentenzas individuais ou actos administrativos firmes que o aplicasen.
Mais neste asunto, nen sequera a Orde do grao extraordinario de carreira constitúe un eventual acto de aplicación do “Acordo de Concertación”, xa que a Orde do grao extrarodinario é un acto de aplicación do dereito á carreira profesional (do EBEP), non do Acordo de Concertación. Este Acordo non é máis ca un pacto entre dúas partes, polo que determinaron unha forma (discriminatoria) de poñer en marcha o dereito á carreira do EBEP.
Por outra banda, o sistema ordinario de carreira nin está negociado, nin está implantado, nin a Xunta parece ter intención de facelo. Os sindicatos asinantes sabedores do fracaso están a intentar acusar á CIG do que non foron capaces de sacar para adiante xa que a Xunta nin sequera publicou o remendo que lle fixeron para incluír ao persoal funcionario interino nun sistema ordinario inexistente a día de hoxe.
Mesmo, o bifachito sindical, no canto de utilizar o instrumento que lles brinda a sentenza da CIG para forzar a inclusión de todo o persoal nas convocatorias de carreira, o que está a facer é pedir que a Xunta recorra para que o persoal temporal excluído siga sen cobrar.
En definitiva, menos manipulación dos que pactaron a discriminación e máis cumprimento do principio de igualdade.
Se queren, é moi doado de arranxar: convocatoria maña mesmo da Mesa Xeral de Empregados Públicos e negociar entre todos unha carreira profesional universal e sen discriminacións.
- Detalles
Unha nova sentenza do TSXG declara ilegal a carreira profesional da sección segunda do Acordo de Concertación por discriminación do persoal laboral, interino e temporal.
Esta é a segunda sentenza xudicial gañada pola CIG contra a exclusión da carreira profesional do persoal funcionario interino, laboral temporal e fixo que non optara por funcionarizarse. Neste caso afecta á sección segunda do Acordo de Concertación, o pacto da vergoña que asinaron Xunta, CCOO e UGT. Na CIG nunca tivemos dúbidas desta cuestión, que foi un dos motivos polos que non asinamos o Acordo de concertación. Para nós, o principio de igualdade é básico na negociación colectiva e por suposto é un dereito fundamental.
Os seus efectos:
- Non afecta ao réxime extraordinario, polo que seguiremos cobrando o primeiro grao e continua o dereito a cobrar o segundo, que recordamos está orzamentado para 2021.
- Anula o pacto sindical vergoñento entre a Xunta e CCOO/UGT que provocou a violación do dereito a igualdade e non discriminación do persoal empregado público.
- Axuda a reforzar as demandas individuais que procuran a declaración do dereito individual co cobro do sistema extraordinario dende o 1 de xaneiro de 2019.
- A Xunta terá que negociar unha nova carreira profesional coas organizacións sindicais que lle outorgue o dereito a todo o persoal, sen que iso implique que poda derrogar ou revogar os dereitos xa concedidos en base ao sistema extraordinario de carreira profesional.
- Ademais, complementa a sentenza previa sobre a Orde de carreira, determinando que o dereito á carreira profesional non pode ficar restrinxido ao persoal funcionario de carreira ou laboral fixo que decida funcionarizarse
Porén, a sentenza non é firme, e a Xunta pode recorrela en casación como fixo coa anterior, demandamos que non o faga e se sente a negociar xa o grao ordinario e recoñeza canto antes o grao extraordinario para o persoal que excluíu.
- Detalles
Recibimos documentación para unha modificación da Relación de Postos de Traballo de Medio Rural, coa que a consellería quere crear a "Unidade de Investigación de Incendios Forestais". No lote vai a amortización de cinco postos de traballo.
A primeira xuntanza vai ser o venres 23 de xullo, e xa co verán enriba, descoñecemos se o trámite de Mesa Xeral quedará para despois do verán. Se queres aportar algo, contacta coa CIG.