- Detalles
A Xunta presenta na Mesa Xeral (17/10/22) a súa proposta de salarios pola que o persoal empregado público perderá arredor dun 10% do seu poder adquisitivo nos próximos tres anos. A proposta é un “copia e pega” do “pacto a perdas” negociado ás agachadas e asinado na Mesa das AAPP do Estado por CCOO e UGT.
Con isto o salario vai subir un 3,5% (ao 2% de suba no 2022 se lle engade un 1,5% adicional con efectos retroactivos) un 2,5 % no 2023 e un 2% no 2024. Algo completamente insuficiente para paliar a perda de poder adquisitivo neste e nos vindeiros anos, tendo en conta que no 2022 no mes de outubro o IPC interanual na Galiza está no 9,2%.
A maiores este pacto de perdas contempla unhas subas adicionais se se cumpren determinadas condicións que en principio parecen que non se van cumprir, tal e como sucedeu co anterior acordo para os anos 2018- 2020.
A Xunta, sen intención de negociar nin salarios nin dereitos
A Xunta convocou (con carácter estritamente formal), unha Mesa xeral de Empregados Públicos (17/10/22) para dar traslado dun novo recorte de dereitos co que quere ser cómplice do goberno español e dos sindicatos que apoian a vergoña do “pacto de perdas” (CCOO e UGT). A CIG incidimos en que no noso país a perda de poder adquisitivo é aínda maior ao ser máis elevado o IPC que na media estatal e demandamos que a Xunta propoña un complemento para un incremento retributivo que poida mitigar a perda que implicará o pacto estatal.
Os dereitos mantéñenos suspendidos a pesar de que nada lle impide activalos
Denunciamos que na Lei de orzamentos para o 2023 a Xunta manterá suspendida a aplicación de todos os pactos e acordos retributivos e todos os dereitos recortados pola Lei de medidas 1/2012 cando xa é hora de recuperalos: o artigo 19 de V Convenio Colectivo, a suspensión de determinados artigos do Acordo de condicións do SPIF (nos que se regulan os descansos, as compensacións por noites ou domingos e festivos), os dias de libre disposición, etc.
Igualmente se mantén bloqueada a recuperación do Fondo de Acción Social (FAS) na contía e nas modalidades que existían até os recortes aplicadas polo PP.
Hipotecan por moitos anos a mobilidade do noso persoal, mediante a apertura de postos ao persoal doutras administracións públicas para a cobertura de prazas mediante comisións de servizos que durarán dous anos prorrogables de xeito indefinido.
Nesta Mesa Xeral demandamos ademais un complemento que incremente as indemnizacións por razón de servizo (axudas de custe e gastos de viaxe) xa que son totalmente insuficientes para cubrir os gastos de desprazamento ou manutención coa elevada carestía da vida e, especialmente, dos combustíbeis.
Contratacións a través de entidades instrumentais
A CIG opúxose a que se fagan contratacións financiadas cos fondos da UE ou do Plan de Recuperación, Transformación e Resiliencia, a través de entidades instrumentais ou mediante encomendas de xestión ao tempo que se limita a contratación propia.
Denunciamos que o mantemento da taxa de reposición nos leva a aumentar a temporalidade cando a propia Función Pública recoñece que imos ter un número importante de xubilacións que non van dar cuberto. Isto sumado a ineptitude para levar adiante as ofertas de emprego público nun prazo razoable, danos un panorama insoportable de colapso dos servizos públicos ou de privatizacións (como por exemplo a recente Residencia de Cerdedo ou Escola Infantil da Guarda).
Para máis, manteñen a limitación bestial para as substitucións ou a cobertura de prazas vacantes con interinos e interinas. No canto de estender esta posibilidade a toda a administración limítana ao que eles consideran servizos esenciais ao tempo que dan carta branca para a contratación por medio de encomendas de xestión.
Unha sentenza, unha creación: cando hai sentenzas de indefinición a administración debe crear a praza no prazo de tres meses e sacala nunha oferta de emprego. O que non se pode é asignar unha vacante existente porque iso mingua a oferta total destas prazas.
Modificación da Lei de Emprego Público de Galiza (LEPG)
En relación á Lei de medidas que modifica a LEPG, o director xeral de Función Pública apenas resposta a un par de alegacións e NON ACEPTA NADA e xustifica o seu silencio porque “moitas delas son reiteradas todos os anos” (en referencia a multitude de propostas de mellora de condicións salariais e de recuperación de dereitos ou de melloras a mobilidade e concursos que tentamos meter todos os anos).
A CIG esixe trasladar á LEPG os dereitos recollidos no V Convenio
Dende a CIG defendemos que os dereitos recollidos no V Convenio do persoal laboral, sexan trasladados á LEPG para a súa aplicación a todo o persoal. A tal efecto propuxemos negociar un acordo regulador antes de 6 meses. Mentres tanto, solicitamos a inclusión na LEPG dunha disposición transitoria que traslade os dereitos laborais do V Convenio ao persoal funcionario que non teña un acordo específico, que garanta así que non haxa perda de dereitos.
- Detalles
A Dirección Xeral de Defensa do Monte comunicounos unha proposta de instrución ás organizacións sindicais, que vai supor a gratificación extraordinaria das horas de prolongación de xornada realizadas polo persoal do SPIF no período comprendido entre o 14 de xullo e o 31 de agosto. A metade das horas realizadas vanse compensar en tempo de descanso e a outra metade de xeito económico. Esto foi nunha reunión mantida o día 5 de outubro e aínda estamos a espera de recibir a proposta concreta.
A nivel xeral, na CIG queremos manifestar o desacordo coas gratificacións económicas extraordinarias por exceso de xornada ao traballar nos lumes. Por suposto que se debe ver recompensado o sobreesforzo realizado dos máis de 2000 traballadores/as do SPIF, pero esta gratificación non pode tapar o feito de que se fixeron xornadas por riba do máximo legal permitido, motivadas en gran parte polo enorme número de prazas sen ocupar e a falta de reforzo no propio servizo.
Dende a CIG xa solicitamos a cobertura de todas as prazas, a substitución áxil das baixas e incluso a cobertura das vacacións e un SALARIO DIGNO para o persoal. Mais a Consellería do Medio Rural prefire agora retribuír os abusos realizados que ter o servizo cuberto ao 100% tal e coma se espera dun servizo de emerxencias, e cun respecto axeitado pola prevención de riscos laborais dunhas labouras de extinción cada vez máis perigosas.
Pagar os abusos nas xornadas significa pagar xornadas de mais de 12 horas loitando contra o lume. O que realmente nos preocupa é que se consolide esta práctica: abusar do persoal e logo tratar de compensar.
Por todo isto, dende a CIG acabamos de propoñerlle á Dirección Xeral de Defensa do Monte que compense todas as horas de prolongación realizadas con tempo de descanso. Ademais, que empregue os fondos previstos en ampliar o tempo de traballo do persoal descontinuo e contratar persoal para poder encher os ocos no servizo que xerarían estas compensacións.
Esto recoñecería o esforzo realizado que dignifica ao servizo: fortalecer o cadro persoal e negociar melloras nas condicións laborais O persoal descontinuo demanda ampliar o seu tempo de traballo e non vale facer trampas con declaracións coma as que fixo o presidente Rueda. O persoal de 9 meses ao que segundo as súas declaracións se lle ampliaba o tempo de traballo xa estaba previsto que se lle ampliara debido á funcionarización.
- Detalles
Na defensa do poder adquisitivo do persoal empregado público! Concentración da Área Pública da CIG, este venres ás 11 horas, diante da delegación do goberno en Coruña
A suba proposta consuma a perda de poder adquisitivo do conxunto do persoal. O pacto de perdas avalado por CCOO e UGT non recolle sequera a perda do poder adquisitivo que xa temos consolidada en 2022, de preto do 10%, a un trimestre de rematar o ano.
Xunto a isto é de subliñar que a suba acordada para os anos 2022-2024 non chega a contemplar a inflación de prezos deste ano. Neste sentido, lembra que neste setembro situouse o IPC nun 9%, mais que estivo por riba do 10% boa parte do ano.
En tres anos, no mellor dos casos, non se recupera sequera o poder adquisitivo perdido no 2022, e asínase un acordo que dá por boa unha perda de máis do 5% entre este ano e o próximo. Ao que habería que sumar preto do -20% que levamos desde 2010.
- Detalles
O Anteproxecto de Lei de medidas urxentes para a redución da temporalidade no emprego público da Comunidade Autonoma da Galiza pasou pola Mesa Xeral o 10 de outubro e apróbase na Comisión de Persoal do día 11 co voto favorable de CCOO, UGT e CSIF e en contra da CIG.
Esta norma reproduce a Lei 20/2021 de temporalidade coas súas discriminacións sen dar unha solución a moitas das eivas que se derivan da lei estatal. Cabe lembrar que a Administración Xeral da Xunta é a campioa da temporalidade, superando o 30% de media de persoal temporal e interino.
Fixemos un esforzo ata o derradeiro minuto para mellorar o texto pero esta lei aínda non responde as expectativas do persoal. E como isto non remata aquí, imos poñernos en contacto cos grupos parlamentares para que recollan as nosas emendas e as defendan na tramitación parlamentar da lei. Función Pública segue tratando de xeito vago moitas cuestións que deberían ser definidas nesta lei, e a maiores crea novas escalas e especialidades e modifica de xeito significativo funcións e requisitos para escalas xa creadas sen telas negociado previamente.
Destacamos:
- Limita a fase de concurso do concurso oposición a 30% experiencia-10% outros méritos.
- Cunha declaración responsable os/as aspirantes farán a autobaremación dos méritos pero Función Pública só vai revisar as de maior puntuación ata completar o número de prazas convocadas. Ademais se falseas ou erras podes ser expulsado/a do proceso. Normal no primeiro caso, unha aberración no segundo.
- Reduce os prazos a metade dos procesos selectivos pero á vez auméntanse os prazos sobre os límites da lei estatal para convocar ou incluso ter rematados os procesos.
- Para evitar a concorrencia limita as excedencias por interese particular e incompatibilidade por 2 anos e obriga a escoller entre escalas se superas varios procesos para que ninguén aprobe máis de un á vez ou tome posesión nun solicitando excedencia noutro.
- No concurso-oposición nin exames tipo test, nin se garante un único exercicio con nota de corte ponderada se hai varias probas. Eso si aceptan eliminar o corte por lei da metade de preguntas acertadas.
- Crean escalas e especialidades: capataz, patrón, guía, gobernante, técnica e superior de información xeográfica, reprodución cartográfica, agrupacións profesionais, etc.) e mudan funcións e requisitos. Anuncian que isto vaise negociar nas emendas á lei.
- As probas que van ser valoradas na fase de méritos se refiren unicamente a administración convocante.
- A lingua galega vai ser requisito previo e poderá facerse proba previa de coñecemento do nivel requirido.
- Outorgarase unha puntuación maior (sen aclarar canto) para os servizos prestados na administración convocante.
- Unicamente se valora o tempo traballado como temporal/interino ou INF.
- Muda a data de referencia para os méritos e requisitos a data de entrada en vigor da lei pola data da convocatoria.
- Dalle poderes a Dirección Xeral de Función Pública para mudar equivalencias e reducir prazos.
Estamos pendentes de que a Administración nos remita canto antes o documento definitivo para facelo público, pois na propia Comisión de Persoal mudaron cuestións. Mentres, tes a túa disposición o documento que foi a votación na Comisión de Persoal: descargar.
Apróbase tamén, co único voto a favor da CSIF, a modificación dos estatutos da Axencia de Calidade do Sistema Universitario Galego (ACSUG) para darlle entrada no seu Consello Reitor á Universidade privada unha porta aberta á privatización no ámbito universitario. A CIG, CCOO e UGT votamos en contra
Mais cousas nos rogos e preguntas:
- Vaise facer unha reunión técnica para ver que esta a acontecer coa certificación de servizos prestados como ámbito sociosanitario no SERGAS da OPE social.
- Están a traballar na RPT de medio rural, teremos borrador a finais de mes.
- A orde de integración do persoal do Consorcio vira nos vindeiros días a Mesa Xeral de empregados públicos.
- Detalles
A CIG vén de rexistrar sendos escritos dirixidos á Dirección Xeral de Función Pública onde pedimos unha rebaremación da fase de concurso dos procesos selectivos para o ingreso, pola quenda de acceso libre e promoción interna, nas especialidades de medicina e terapia ocupacional. Ao tempo, na Comisión de Persoal do 11 de outubro fixemos extensiva esa petición de rebaremación ao resto de procesos selectivos da OEP Social.
No apartado II.2.2.1. das bases deses procesos selectivos disponse como se valorará en ditos procesos a experiencia profesional. Nese apartado recóllese textualmente:
“Experiencia profesional, entendida como os servizos prestados nalgunha das actividades descritas no catálogo de servizos sociais, a que fai referencia o artigo 18 da Lei 13/2008, do 3 de decembro, de servizos sociais de Galiza, en calquera Administración pública...”
En función da área sanitaria o servizo de persoal do SERGAS acreditou ou non que os servizos prestados na mesma pertencen ao catálogo de servizos sociais sin ter un criterio homoxéneo nin unificado. O criterio nalgunha área sanitaria foi acreditalo dese xeito se a persoa interesada así o solicitaba.
Para a CIG isto é un claro erro de interpretación das bases da convocatoria, xa que os centros do SERGAS son centros sanitarios, non son centros prestadores de Servizos Sociais, polo que non pertencen ao citado catálogo de Servizos Sociais. Non poden ser puntuados consonte o apartado II.2.2.1. senón que lles correspondería ser baremados dacordo ao apartado II.2.2.2. das citadas bases: “Experiencia profesional, entendida como os servizos prestados en calquera Administración pública, como persoal laboral na categoría (...)
Isto supón unha situación moi discriminatoria por varios motivos: en primeiro lugar, persoas que prestan servizos no mesmo organismo (SERGAS) están sendo baremadas de maneira distinta en función da área sanitaria, e en segundo lugar, as persoas que si prestan servizos dentro do catálogo de servizos sociais vense perxudicadas por ese erro de baremación. Pode suceder que no prazo de presentación de reclamacións as persoas que saen beneficiadas por este erro non realicen ningunha reclamación, polo que o baremo definitivo estaría errado.
Cumpre lembrar que estas diferenzas de puntuación entre prestar servizos no Sergas ou noutras administracións públicas tamén se dan nas bases dos procesos selectivos convocados polo SERGAS, puntuándose tamén dobre a experiencia neste organismo fronte a outras administracións públicas, como a Xunta.
Esta situación estase a producir tamén noutros procesos selectivos da chamada OEP Social, polo que na Comisión de Persoal do 11 de outubro a CIG esixíullea Función Pública que se fixera unha revisión completa da valoración de méritos da fase de concurso dos procesos selectivos derivados da OEP Social onde se estaban a facer polo SERGAS esas certificacións erradas.
Ante a insistencia da CIG conseguimos arrancar de Función Pública o compromiso de convocarnos a unha sorte de "gabinete de crise" para valorar a situación en aras de buscar unha solución á desfeita provocada polo SERGAS.
Para a CIG a única solución pasa por facer unha rebaremación completa respectando o estipulado nas convocatorias dos procesos selectivos para non xerar inxustizas nin discriminacións entre as persoas participantes neses procesos selectivos, que se revisen tódalas certificacións emitidas, que non se puntúe do mesmo xeito o tempo traballado no SERGAS que na Xunta e que, en definitiva, non se xogue co posto de traballo nin o destino de moitos compañeiras/os.
- Detalles
Función Pública achéganos información relativa ao proceso de funcionarización de persoal laboral das categorías 1 (axudante de cociña) e 11 (limpador/a) do grupo V na escala de persoal de limpeza e cociña e recursos naturais e forestais (especialidade de persoal de limpeza e cociña) pertencente á Agrupación Profesional do persoal funcionario da Administración Xeral.
Podes consultar o documento aquí. O prazo de alegacións remata o día 21 de outubro ás 14:00 horas. Se tes algo que alegar faino a través desta ligazón.
- Detalles
Despois das nosas sentenzas favorables ao recoñecemento do dereito para todo o persoal a Xunta e os sindicatos asinantes poñen en marcha, despois de tela paralizado durante case dous ano, a carreira profesional.
Os novos acordos de carreira, se ben teñen melloras gañadas pola CIG nos tribunais seguen a ter fundamentalmente 3 eivas:
1) Non recoñecen o carácter retroactivo do grao I para o persoal interino e temporal.
A sentenza gañada contra a orde do grao I di textualmente que se recoñeza o dereito a este persoal a acceder ao mesmo. A Xunta, CCOO e UGT manteñen que se debe de recoñecer sen efectos retroactivos. Nós mantemos que si a sentenza recoñece ese dereito este se estende ata o 2019, ano no que comezou o grao I para o restante persoal.
A CIG solicitou no TSXG un acto de execución de sentenza ao entender que con este novo acordo non se ateñen á sentenza e polo tanto será este tribunal o que decidirá quen ten razón, se o persoal interino e temporal debe cobrar o grao I dende agora ou dende o 2019.
2) Manteñen a obriga de funcionarizarse para o persoal laboral fixo que queira acceder á carreira.
Outra das sentenzas gañadas anula as disposicións da orde de confección de nóminas onde se suspende o dereito á carreira ao persoal laboral fixo que non se queira funcionarizar e se lle esixe a devolución dos importes.
A Xunta non cumpre coa sentenza e mantén a exclusión, ademais de recorrer en casación ante o Tribunal Supremo. Haberá que esperar á sentenza deste recurso.
3) Non inician o recoñecemento do grao II no ano 2021 para os subgrupos C1, C2 e AP.
A Xunta, CCOO e UGT van asinar un novo acordo para pór en marcha o grao II pero con efectos de 2022.
Hai que lembrar que paralizaron a posta en marcha do acceso ao grao II, cando se tiña que regular no segundo semestre de 2020 e ter efectos dende o 1 de xaneiro de 2021.
A escusa que puxeron para non facelo é que a CIG presentara unha demanda, escusa de mal pagador, pois unha demanda non paraliza un procedemento, as sentenzas da CIG son de mediados do 2021, cando o grao II xa tiña que estar en marcha. E a maiores o discurso de que houbo un “parón xudicial” non cola cando nin había sentenzas, nin había medidas cautelares que paralizaran nada.
Para a CIG non retomar os prazos iniciais e recoñecer o inicio en 2021 para os subgrupos C1, C2 e AP significa unha perda de dereitos e dos importes do 33% do grao II do 2021 para estes subgrupos, algo que non é tolerable.
Aínda así queremos facer unhas consideracións xa que nestes acordos hai unha serie de avances que son derivados das sentenzas gañadas pola CIG ou da negociación dos mesmos:
1) Os tramos para acceder ao grao II se igualan para todos os subgrupos.
En tres anos se chega ao 100% do complemento de carreira. No anterior acordo para os subgrupos A1 e A2, o grao II se iniciaba en 2022 e se chegaba ao 100% en 4 anos. Nestes novos acordos se reduce a tres anos e se iguala ao resto dos subgrupos e isto é positivo. Pero non a costa de que o C1, C2 e AP non comecen a cobrar con efectos de 2021, algo que sería compatible coa reducción de tramos.
2) A carreira se estende ao persoal interino e temporal.
Obrigados polas sentenzas así o fan. Pero non recoñecen o efecto retroactivo.
Aínda que con avances produto das nosas accións, consideramos que a execución das sentenzas se fai de xeito torticeiro e que non se cumpre na súa integridade o sentenciado pola Xustiza, polo que seguiremos negociando ata a Comisión de Persoal, pero de non mudar nos aspectos antes enumerados dende a CIG non poderemos darlle o noso visto e prace a esta nova carreira.
- Detalles
A proposta, aceptada por CCOO e UGT, e rexeitada pola CIG, ELA e CSIF, non compensa sequera a perda do poder adquisitivo que xa temos consolidada en 2022, de preto do 10%, a un trimestre de rematar o ano
A suba acordada para os anos 2022, 2023 e 2024 non chega a compensar a inflación de prezos que xa temos neste ano 2022. Neste sentido, hai que ter en conta que en setembro o IPC interanual situouse nun 9%, mais que estivo por riba do 10% boa parte do ano.
Goberno, CCOO e UGT están a propoñer para o actual ano 2022 un incremento do 3,5%, que en realidade inclúe o 2% que xa está aplicado dende xaneiro e ao que lle sumarían un pago único do 1,5% en decembro. Xa que logo, o persoal ao servizo das administracións públicas perdemos como mínimo un 5,5% de poder adquisitivo só no ano 2022.
Para 2023 o incremento sería do 2,5%, ao que se lle podería sumar un 0,5% máis en outubro en función do IPC harmonizado 2022-23 (se suma máis do 6%), e outro 0,5% se o PIB nominal do 23 supera a previsión do Goberno.
E para 2024 a suba salarial sería do 2% coa posibilidade de sumar outro 0,5% se o IPC 2022-2024 harmonizado supera o incremento salarial previsto.
Poñéndonos no mellor dos casos, no 2022 xa perdemos como mínimo un 5,5%, e en tres anos, tendo en conta a evolución do IPC do 2022 a 2024 en total podemos ir a un 10% de perda do noso poder de compra. A esto hai que sumar o que levamos perdido en anos pasados. Esto é o que asinan CCOO e UGT co Goberno do Estado e que venden como un logro.
Diante desta situación, a CIG convoca unha concentración para o día 14 diante da sede da Delegación do Goberno na Coruña na defensa dos dereitos das persoas empregadas públicas e da medida de baterías ante a carestía da vida que xa ten presentado ante o Goberno.
- Detalles
En novembro do 2021 denunciamos a pretensión do director xeral de Xustiza de realizar convenios de colaboración cos colexios profesionais de psicoloxía e de traballo social de Galiza para a elaboración dos informes dos ámbitos penal e da familia.
A CIG rexeitou enerxicamente esta externalización, e apostamos decididamente polo incremento de equipos técnicos psicosociais que dean resposta ao incremento de informes nos procesos que afectan ás persoas máis vulnerábeis, como poden ser: as valoracións de vítimas de violencia machista, separacións, divorcios..; informes preceptivos para a asistencia técnica aos tribunais, da fiscalía e do xulgado.
Despois destas denuncias, o director xeral, en sede parlamentar, recoñeceu un “atraso puntual” e ofreceu o reforzo de equipos, contratación de interinidades, horas extras, etc. Ata o día de hoxe, non houbo nin incremento de equipos nin contratación de persoal e si ofreceu o desenvolvemento de horas extras.
Na apertura do ano xudicial, o Tribunal Superior de Xustiza de Galiza, diante do director xeral de Xustiza, reclamou o incremento de equipos técnicos por considerar que o atraso acumulado na emisión de informes así como as novas esixencias lexislativas non son situacións coiunturais, senón que se trata dunha necesidade estrutural que non pode resolverse con convenios de colaboración e si coa creación de novos equipos nas distintas subdireccións do IMELGA. Ao mesmo tempo, os colexios profesionais da abogacía e procuradores de Pontevedra tamén denunciaron estes atrasos e pediron máis equipos.
Os equipos psicosociais da subdirección do Imelga de Santiago e de Pontevedra acumulan atrasos que van para os dous anos, tanto na emisión de informes para o xulgado de familia como para o do penal. Na subdirección do Imelga de Lugo, os atrasos son considerables no que atinxe ao de instrución e instancia; e aceptables para o penal. Nas subdireccións de Ferrol, Vigo e Ourense estes atrasos poden considerarse aceptables.
Xa está ben de promesas valeiras de contido, de convenios imposibles e da desprotección das persoas máis necesitadas
A CIG exixe ao director xeral de Xustiza unha inmediata actuación que só pasa pola creación de novos equipos psicosociais, estables e profesionais, que resolvan os atrasos acumulados nas distintas subdireccións e as novas necesidades lexislativas; inxente aumento de probas preconstituídas e asistencia á declaración de menores e vítimas vulnerábeis que se incrementou coa nova Lei orgánica de protección integral da infancia e da adolescencia contra a violencia (Lei “Rhodes”)
- Detalles
Demandamos aos grupos do Congreso que condicionen a isto o seu apoio aos orzamentos
Os sindicatos CIG, ELA, LAB e Intersindical comparecimos en rolda de prensa ás portas do Congreso dos Deputados e Deputadas para informar das reunións celebradas cos distintos grupos políticos aos que solicitamos que condicionen o seu apoio aos próximos orzamentos á aprobación do dereito á xubilación do persoal da Sanidade e dos sectores sociosanitarios aos 60 anos, tanto no sistema público como no privado.
Ademais, coincidindo con esta comparecencia delegados e delegadas da CIG dos distintos sectores atinxidos concentrabámonos diante do edificio administrativo da Xunta de Galiza, en Compostela, para sumarnos á exixencia que as organizacións sindicais vascas, catalá e galega presentamos en Madrid.
Por parte da CIG participaron nas xuntanzas a responsábel do sector Autonómico da CIG-Administración, Zeltia Burgos, a secretaria nacional de CIG-Servizos, Tránsito Fernández e o secretario nacional de CIG-Saúde, Manuel G. Moreira.
A demanda de CIG, ELA, LAB e a Intersindical Catalá, concrétase na petición ao goberno de que respecte, de maneira inmediata, o dereito das e os profesionais da sanidade e dos sectores sociosanitarios, do ámbito público e privado, a xubilarse aos 63 anos, sempre que teñan cotizado o tempo esixido, e que negocie os cambios legais necesarios para conseguir a xubilación ordinaria aos 60 anos durante esta lexislatura.
Neste sentido, demandamos dos partidos políticos con representación en Madrid que, prioricen este asunto e que, mostrando o seu claro compromiso con este persoal esencial para a sociedade, para a aprobación dos próximos orzamentos, condicionen os seus votos á aprobación deste dereito.
Así mesmo, exiximos aos Gobernos e diferentes Administracións de Galiza, Euskal Herria e Catalunya, que articulen mecanismos para facilitar a xubilación anticipada deste persoal ou recuperen aqueles que foron recortados nos últimos anos como son as primas de xubilación anticipada.
Nese sentido, na comparecencia, lembramos que a actual lexislación, en materia de Seguridade Social, recoñece o dereito á xubilación anticipada ás persoas traballadoras incluídas en calquera dos réximes da Seguridade Social aos 63 anos, sempre que teñan cotizados entre 38 e 44 anos e 6 meses e que a idade sexa inferior en dous anos, como máximo, á idade esixida que resulte de aplicación en cada caso.
Sen penalizacións
Pero a articulación dese dereito, implica a aplicación de porcentaxes de redución á contía da pensión que poden alcanzar ata o 21% e que non é recuperable ao cumprir os 65 anos. A Lei 40/2007, do 4 de decembro, de medidas en materia de Seguridade Social, prevé que a idade mínima de 65 anos póidase rebaixar por Real Decreto para grupos ou actividades profesionais, categorías e especialidades cuxo traballo sexa de natureza penosa, tóxica ou perigosa. Tamén se terán en conta os efectos do traballo en quendas (penosidade por traballar en quendas de noite) e o esforzo físico para o desenvolvemento do traballo que se realiza.
Por iso reclamamos a aplicación da Lei 40/2007 para o dereito á xubilación aos 63 anos, sen penalización, este ano, para o persoal da sanidade e dos sectores sociosanitarios, incluídas en calquera dos réximes do sistema da Seguridade Social.
O que demandamos é que o persoal da sanidade e dos sectores sociosanitarios que teña os períodos de cotización recollidos na norma, e cumpra o requisito de cotización, póidase xubilar sen as penalizacións que marca a actual lexislación. E que ademais perciba o complemento de xénero.
Esta medida só precisa da aprobación dun Real Decreto en base á Lei 40/2007 polo que as Organizacións sindicais CIG, ELA, LAB e a Intersindical Catalá solicitaremos reunirnos coas organizacións políticas presentes no parlamento español para solicitar os apoios necesarios para a súa aprobación. “Á vista da actual aritmética parlamentaria, os seus votos son decisivos e é por iso que, de cara á aprobación dos próximos orzamentos, esiximos que prioricen este tema”.
Tamén instamos ao goberno a recoñecer, durante esta lexislatura, o dereito á xubilación aos 60 anos do persoal da sanidade e dos sectores sociosanitarios, do ámbito público e privado, e a que non se vincule este dereito á planificación dos cadros de persoal actuais ou futuros, que dependen de decisións políticas que non poden, en ningún caso, vulnerar os dereitos do persoal.
Cadros de persoal avellentados
Lembramos que “estamos diante de cadros de persoal cunha media de idade moi alta (máis de 50 anos) e cunhas condicións penosas no desempeño. Condicións que, como consecuencia das políticas de recortes, privatización e desmantelamento dos servizos públicos aplicadas os últimos anos, fan imprescindible a articulación deste dereito”.
Denunciamos que a situación actual de falta de profesionais na sanidade e nos sectores sociosanitarios “é consecuencia da planificación sanitaria realizada durante os últimos 10 anos”. Unha planificación baseada en “recortar persoal, suprimir postos de traballo e adelgazar e privatizar os servizos públicos, poñendo en cuestión o dereito da sociedade a unha prestación de calidade”.
Por iso CIG, ELA, LAB e a Intersindical catalá instamos tamén a que durante esta Lexislatura se abra un proceso negociador para a modificación da Lei 40/2007, para que o persoal comprendido neste ámbito de aplicación poida acceder á xubilación cando cumpra os 60 anos, e teña 35 anos cotizados.
