- Detalles
A CIG preguntou na Comisión de Persoal do día 20 sobre as seguintes cuestións:
Concurso administración especial: está parado pola RPT de Veterinarios-Sanidade. Na CP do 29/07/22 o director xeral dixo que esta RPT xa a están traballando e iría a negociación en setembro. Ademais para comezar a negociar o concurso non é necesario que estea publicada a modificación da RPT. Cando vamos a negociar o concurso?
Non contesta.
Proceso selectivo enxeñeiros técnicos forestais: as persoas das escalas de enxeñería de montes e de enxeñería técnica forestal que están a traballar na Xunta piden un adiamento da data do primeiro exame dos procesos selectivos convocados o 17 de decembro de 2021 logo dun verán cheo de lumes e coa campaña aínda sen rematar.
O director xeral non contestou a esta pregunta, e non só iso, senón que o día 23 publican no DOG que as datas dos exames serán para o 1 de outubro.
Comisión de servizos cruzadas: está conforme o director xeral co sistema abusivo de cruzar comisións de servizos? Séguese a producir nesta tempada posterior ao concurso un uso abusivo deste sistema na mesma magnitude que en tempos anteriores onde hai xente que leva máis de 10 anos alternando dous postos en comisión turnándose en ocupalos dúas persoas.
Non contesta.
Que vai pasar coas persoas das categorías de gobernantes e subgobernantes que están nas listas do C1 e na RPT aínda non se reflicte a condición das prazas?
Di que van facer as reformas correspondentes e acelerar o proceso o máis posible.
Outras información que da o director (xa que non nos contesta a moitas das preguntas) son:
Lei de impulso demográfico: por cuestións alleas á DXFP non se puido facer unha instrución pero van tratar de facela recollendo o asunto da conciliación ata a maioría de idade do menor.
Prazas de Orientación Laboral: seguirá o proceso negociador.
Decreto de mobilidade: entrará en vigor en outubro e logo se farán paulatinamente as convocatorias e a partir de aí se “liberarán” as comisións de servizos.
Funcionarización: comezarán polo persoal do grupo V e logo cos bombeiros forestais.
- Detalles
A pouca dilixencia da consellería de Educación en facer as súas previsións engadida aos recortes a nivel provincial que fixo Función Pública no persoal encargado da xestión das listas de contratación temporal provocou a saturación do servizo. A sobrecarga de traballo que soporta o persoal de listas de servizos centrais non se viu acompañada dun previsible e necesario incremento de persoal.
Comeza o curso e comezan os problemas
A Xunta coa modificación da RPT de Facenda cargouse o sistema de chamamentos provinciais tal e como xa anunciaramos aquí. Iniciado o curso 2022-2023 co novo sistema dependente de Función Pública e centralizado dende Compostela, comezan os problemas.
Os chamamentos de Educación non van pola vía da urxencia
Dende a CIG preguntámoslle aos responsables da consellería se non consideran urxente cubrir a praza de cociñeiro/a nun centro de ensino para evitar que trescentos pequenos e pequenas coman bocadillos durante tres días, ou cubrir a praza de coidador/a que necesita un cativo ou cativa para poder ser escolarizado nas mesmas condicións que o resto dos seus compañeiros/as.
De verdade non estamos a falar de situacións de urxencia? Para os responsables da Xunta semella que non.
O curso comezou máis tarde para as cativas e cativos con necesidades especiais pola falta de previsión nos contratos de persoal coidador
A Consellería de Educación ó comezo do curso crea as prazas de auxiliar coidador/a en función das necesidades que teñan os centros. Sendo certo que Educación debera ser máis previsora e non deixalo todo para o último intre, tamén é certo que cando os chamamentos se facían dende os servizos perífericos eran áxiles e estaban as prazas cubertas case ó momento. Este curso non foi así polo que os chamentos resolverónse tarde e a consecuencia desta situación é que alumnado con necesidades especiais non puido comezar o curso co resto de compañeiras e compañeiros, tendo que comezar, nalgúns casos, ata unha semana despois.
Falta de anticipación nos chamamentos, a tramitación non pode comezar ata a comunicación formal do cese
Outro problema serio é a imposiblidade que teñen dende as xefaturas territorias para solicitar a cobertura dunha persoa á que se lle adxudica unha adscrición temporal ou unha comisión de servizo por exemplo, xa que dende que o servizo está centralizado non se realiza o chamamento ata ter o cese da persoa que se vai, quedando descuberto o posto os días que se tarde en realizar o chamamento. Aparentemente isto podería non ser un problema en certos tipos de traballo, pero sí ten importancia cando isto supón que un centro non teña cociñeiro ou cociñeira porque cumpre lembrarlle aos responsables da consellería que o alumnado “acostuma” a comer todos os días…
Notificacións masivas para un posto
Tamén constatamos que para a cobertura dun único posto foron notificadas ata 40 ou 50 persoas. Esta situación non tería porque supoñer un problema a priori pero supuxo o colapso do sistema de notificacións facendo que os días 5, 6 e 7 de setembro houbera momentos nos que era imposible acceder o sistema de notifica.gal, que recordamos, non soamente se emprega para facer chamamentos de listas de contratación.
Chamamentos polo INEM pola saturación do sistema de chamamentos das listas
Déronse situacións, nalgunha provincia, que xa son totalmente surrealistas como a necesidade de facer seleccións de persoal con chamamentos polo INEM de persoal de limpeza ou de cociña porque non se poideron cubrír polo sistema ordinario de chamamentos pese a haber xente nesas listas e incluso en ámbitos limítrofes.
A responsabilidade única desta lamentable situación é de Función Pública e dos seus recortes cos que sobrecargaron de traballo ao persoal de listas de servizos centrais que se viu sobresaturado, desbordado de traballo e convertido nun damnificado máis da irresponsabilidade da Administración.
Función Pública ten que recuar e volver a restablecer os servizos periféricos
Por todo isto, dende a CIG esiximos que a Xunta recúe e que ademais de reforzar o persoal de servizos centrais restableza os servizos periféricos que funcionaban correctamente.
- Detalles
Na Comisión de Persoal do día 20/09/2022 o director xeral de Función Pública comentou como está a situación dos procesos selectivos en curso, tanto de libre como promoción interna:
- A1 iniciaranse os procedementos de actos de elección de destino do A1, a semana que ven, á última de setembro.
- A2 a semana que ven ou a seguinte, a primeira de outubro.
- C1 tardarán “un pouco máis”.
- C2 aínda falta o baremo. Finalizarían a finais de outubro.
- Escala de psicólogos, “pronto”.
- Traballo Social e Educación Social en setembro.
- Veterinarios e bombeiros forestais (1400 aspirantes polo que é complicada a baremación) irían “despois”.
Criterios para a elección de destino destes procesos
O director xeral explica que no caso do A1 hai 47 vacantes puras. Fíxose petición ás consellerías onde das prazas que figuran moitas pon que son para amortizar cando vacantes ou no caso de Sanidade son prazas de persoal estatutario. Outras están “comprometidas” (sic) en comisión de servizos. No caso de engadir máis incluirán as ocupadas por persoal interino coa menor antigüidade no posto.
Se van dar tomas de posesión provisional. O sistema de elección de destino será telemático, similar aos anteriores: 2 días para recibir a clave e 5 para elixir.
Nesta semana iran saíndo outros procesos e en outubro estará todo feito.
- Detalles
Á Mesa Sectorial e á Comisión de Persoal do día 20/09/2022 leváronse as modificacións de 3 RPT’s, que aínda que de xeito moi reducido todas implican a creación de postos de traballo, algúns de carácter temporal, e ningunha amortización, polo que nos tres casos votamos á favor.
1. RPT de Medio Rural
A CIG votou a favor desta modificación ao tratarse de creación de prazas, 1 praza de arquitecto/a superior e outra de arquitecto/a técnica.
2. RPT da Axencia Galega da Industria Forestal
Créase unha unidade temporal para a xestión de fondos do Plan de Recuperación, Transformación e Resiliencia. Son 3 postos de enxeñería de montes e dúas xefaturas de sección. A Administración atende a nosa petición, á que se suman os demais sindicatos, de abrir os postos á escala de enxeñería técnica forestal. Votamos a favor.
3. RPT do Instituto Galego de Estatística
Créase 1 praza para que poidan tomar posesión todas as persoas do último proceso selectivo. Votamos a favor.
- Detalles
Mediante Resolución da Dirección Xeral de Centros e Recursos Humanos da Consellería de Cultura, Educación, Formación Profesional e Universidades, do 7 de setembro do 2022, autorízase a difusión da campaña de vixilancia periódica da saúde para o persoal docente e non docente destinado en centros docentes públicos non universitarios dependentes da Consellería de Cultura, Educación, Formación Profesional e Universidades.
- Aplicable a persoal docente e non docente ( laboral e funcionario) que presta servizo en centros docentes públicos non universitarios.
- A inscrición realizarase de forma telemática no formulario de petición de recoñecemento que está dispoñible na páxina web da Consellería de Cultura, Educación, Formación Profesional e Universidades no seguinte enlace: https://revisionmedicaeducacion.xunta.gal
- A inscrición terá carácter voluntario e debe incluír todos os datos que figuren no formulario. A falta dalgún deles impedirá a súa tramitación.
- Prazos de inscrición do persoal docente e non docente (funcionario e laboral) que sexa interino/substituto: os establecidos no documento “Precisión dos prazos de inscrición”.
- Toda inscrición xerará un xustificante de consentimento que se deberá presentar o día concertado para realizar a vixilancia da saúde.
Prazo de inscrición ordinario ata o 10 de outubro
- Detalles
A Dirección Xeral de Función Pública convocou unha Mesa Sectorial de Negociación de Persoal Funcionario, e unha Comisión de Persoal, para o día 20/09/2022, e unha xuntanza previa o venres 16, para tratar tres Relacións de Postos de Traballo.
1. RPT do Instituto Galego de Estatística. Descargar
2. RPT da Consellería do Medio Rural. Descargar
3. RPT da Axencia Galega de Industrias Forestais. Descargar
- Detalles
Ante a protesta da CIG, o director xeral de Función Pública infórmanos que van rematar coa actualización das listas esgotadas antes de que remate o mes de setembro, entre elas as de axentes ambientais de Medio Rural e varias categorías da Consellaría de Política Social.
Esiximos que o fagan na maior brevidade posible a fin de evitar que os máis de 35 chamamentos pendentes da Consellaría de Medio Rural se fagan a través do Inem, o que constituiría unha fraude para todas aquelas compañeiras e compañeiros que pagaron unhas taxas para formar parte desas listas, ademais de xogar coas súas expectativas para acceder ao emprego público.
Dende a CIG denunciamos o abuso da Xunta de Galiza, máis se cabe neste momento no que o traballo non espera e sobrecarga aínda máis ao reducido cadro de persoal.
- Detalles
Esta regulación entra no miolo da organización do persoal ao servizo da Administración Autonómica ao procedimentar a maneira de como o funcionariado vai poder cambiar de posto de traballo.
A Xunta de Galiza publicou no DOG do luns 12 de setembro o Decreto que regula os procedementos de mobilidade do persoal funcionario da Administración xeral da Comunidade Autónoma e dos entes públicos autonómicos. A publicación chega ben fría, tres anos e medio despois de pasar polas mesas de negociación a comezos do ano 2019.
Daquelas, a Dirección Xeral da Función Pública fixera un "paripé" de negociación do texto, proposta que contou coa oposición frontal da CIG e do resto de organizacións sindicais, por falta de diálogo e verdadeiro espírito negociador, pois ningunha das alegacións ao texto fora recollida naquel momento.
En xeral, é unha oportunidade perdida para regular aspectos que necesitan unha revisión (por exemplo, as comisións de servizos), e no que si entra é no concurso específico, a verdadeira motivación deste decreto.
O Decreto regula as tres maneiras de acceso ordinario aos postos da Administración por parte do persoal funcionario: libre designación, concurso ordinario e a modalidade que leva anos agardando, o concurso específico.
Esta última modalidade (basicamente para xefaturas de servizo, habilitacións e direccións de centros), ten un marcado carácter discrecional. Constará dun baremo de méritos (55%) e valoración de capacidades a través de probas, test, memorias e mesmo entrevistas. No proceso de selección de cada posto intervirá unha comisión conformada polas persoas que decida a mesma consellería que ofrece o posto (e sen control sindical). Aos cinco anos do nomeamento haberá unha revisión, polo que veremos a moito xefe e xefa co cu apertadiño e compracente cos/coas superiores.
Menciona o concurso ordinario "permanente", pero non compromete ni prazos para convocar os concursos nin prazos para a súa resolución, e queremos lembrar que o último concurso tardou tres anos en finalizar, e que hai escalas que levan dez anos sen concurso.
En canto a regulación da provisión de postos de maneira excepcional non toca nada do xa regulado no anterior decreto. Así, as comisións de servizo seguirán sendo adxudicadas a dedo, sen baremación e sen transparencia, con rebasamento do tempo máximo de dous anos para varias modalidades, sen problemas a realizar cruzamentos ou encadeamentos. O importante aquí para as persoas que teñen a responsabilidade política da Administración é.. que nada cambie.
Tamén aproveita para meter no saco algo que non ten que ver en demasía coa mobilidade como son as áreas funcionais que permiten identificar as peculiaridades laborais de cada praza e acadar máis puntuación para o concurso de méritos.
Aínda que o texto regula a mobilidade do persoal funcionario de carreira, esqueceron regular a posibilidade de permutas entre persoal interino ao mesmo xeito do que xa fai a consellería de educación entre interinos/as docentes, para cumprir así coa doutrina sentenzada polo Tribunal Constitucional.
En definitiva, neste Decreto o que implica discrecionalidade non cambia. O que implica independencia nas funcións, queda máis sometido. O que implica avances, vai cara atrás ou se esquece. Unha oportunidade perdida.
- Detalles
O compromiso adquirido polo Consorcio de prestar atencións aos usuarios/as de forma directa, esfúmase.
A nova residencia de Cerdedo anexa á que xa está en funcionamento e que xa leva rematada desde novembro de 2021 vai cambiar o modelo de xestión e pasa a privatizar os seus servizos.
O 21/05/2019 despois de unha concentración no centro por parte das traballadoras solicitando un modelo de xestión público para o centro residencial o xerente do Consorcio Perfecto Rodríguez, adquiriu o compromiso do modelo de xestión pública para esta residencia, tal e como tamén se recolle na páxina do consorcio e en medios de prensa.
Pois lonxe de todo isto o 05/08/2022 a Xunta de Galiza publica no seu Portal de Transparencia e Goberno Aberto, (aberto a privatización) a licitación do servizo asistencial de atención diúrna e atención residencial nos centros de día de Cambados, Cuntis, Redondela, Centro Residencial de Redondela, (que sempre tiveron unha xestión indirecta) e a miniresidencia de Cerdedo (construtiva coma unha ampliación da que xa presta servizos de atención directa cen por cen públicos). Dende logo canto hai que mentir para o partido e xustificar os medios!!
Segundo a memoria xustificativa do contrato a desculpa do Consorcio e da Xunta para meterlle na man os seus amigos/as a xestión da residencia de Cerdedo, e os demais centros, “é propor unha xestión mediante unha fórmula que permita combinar ambas as dúas encomendas que a Lei de Servizos Sociais propón para a xestión deste tipo de servizos. Así, esta fórmula cumpre cos criterios de xestión e intervención interinstitucional e suporá o mellor control da calidade, eficacia e eficiencia na xestión dos servizos sociais, así como un aforro nos custos respecto da xestión directa”.
O anteriormente exposto non se sostén. Quere dicir que o barato sae caro, e que ese prezo é o que hai que pagar polo modelo ultraprivatizador dos servizos sociais, xerando á vez precariedade nas atencións que se prestan as/os nosos maiores e as/os propios traballadoras, como se puido comprobar nestes anos de pandemia onde se produciu unha porcentaxe bastante máis elevada de mortes nas residencias de xestión privada que nas de xestión pública.
Por outra banda no informe de insuficiencia de medios o Consorcio xustifica o inxustificable, “De conformidade co disposto no artigo 8 da Lei 14/2013, do 26 de decembro, de racionalización do sector público autonómico o Consorcio non conta con medios persoais suficientes para a prestación deste servizo e non é posible nestes momentos ampliar o seu cadro de persoal nin pola natureza da prestación cabe acudir á autoprovisión doutros órganos da Administración Xeral da Comunidade Autónoma".
O Consorcio ten as súas propias listas de contratación, non transparentes, pero ten, e nunca fixo nada para solucionar esta carencia de persoal cando as listas se esgotaban. É máis doado darlle o negocio os que peor xestionaron a atención dos nosos maiores.
Consorcio e Xunta paralicen a adxudicación dos centros privatizados e non engadan máis os que xa hai!!
- Detalles
O Presidente da Xunta realiza unhas declaracións cara a galería que amosan o seu perfecto descoñecemento do Servizo público contra incendios
O que non concorda coa actual realidade que temos no País é o que dixo. Se algo precisa a nova tipoloxía de lumes é de coñecemento e celeridade, tanto na previsión como na execución.
Entre as novas que avanza, chamounos a atención a aposta por brigadas multifunción cara ao futuro, cando as brigadas multifunción xa existen e están recollidas na normativa actual, tanto para a prevención e a extinción -no V convenio da Xunta dende hai 14 anos- como na Lei 17/2015, de protección civil, ao pasar a formar parte oficialmente dos servizos de emerxencias.
Xa ten delito que alguén que estivo de vicepresidente dende o 2009 descoñeza o funcionamento do servizo, máis cando foi o responsábel dos servizos de emerxencias (foi a súa consellería) ao longo dos anos.
A multitarefa mal xestionada e sen os recursos suficientes pode atrasar a actuación nun lume onde o tempo de reacción é básico
Ao respecto de dotar de maior temporalidade os contratos do persoal da loita contra incendios, BENVIDO SEXA!!, o goberno do que forma parte dende 2009 tivo numerosísimas propostas, demandas, informes do grupo de expertos de apoio á Comisión do Parlamento de Galiza sobre incendios forestais que así llo recomendaron e esixiron, aínda así, benvido sexa. Mágoa que non se concrete en tempo e forma e todo nos lembre a unha manobra mediática.
A Administración galega está nun bo intre para o incremento de tempo de traballo do persoal descontinuo, dado que cos procesos de funcionarización internos que se están a acometer, sería un momento idóneo para converter tódalas prazas descontinuas a todo o ano, e crear un corpo público único e homoxeneizado que tería moita maior eficacia no traballo e estabilidade laboral que o actual e desleixado modelo dos "sete mil efectivos".
Se algo precisa a lacra estrutural dos lumes do noso País no momento actual é non funcionar a golpe de nota de prensa buscando resultados electorais. Atopámonos dentro dun mal endémico e estrutural cronificado nas últimas décadas.
Dende os servizos de prevención e extinción públicos -SPIF- levamos anos esixindo melloras que nunca chegan, e que lembraremos de novo:
1.Pulamos pola a profesionalización de todo o SPIF, todo o persoal debe traballar todo o ano.
2.A prevención debe ser o eixo troncal do traballo. Hai que adaptar a prevención aos novos tempos e novos perigos.
3.O Pladiga é un plan obsoleto centrado en botar cifras á esgalla e orientado unicamente cara a extinción
4.Todo o persoal de prevención e extinción debe estar baixo o mando único do SPIF e formar parte deste.
5.As brigadas helitransportadas deben estar xestionadas e ocupadas por persoal do SPIF.
6.A formación integral nas multiemerxencias e en concreto na nova tipoloxía de lumes e o adestramento continuado nas situacións derivadas destes deben formar parte do día a día dos persoal do SPIF.
Dende a CIG levamos anos esixindo unha adaptación xeral do dispositivo diante do paso xa dos lumes da quinta á sexta xeración. A mestura do abandono do rural coa nefasta xestión do monte por parte da Xunta de Galiza, pon en perigo as poboacións. O incremento do modelo 4 de combustible nas zonas próximas ás casas fan de cada incendio de interface unha ameaza no só ao ecosistema, senón tamén ás vidas e bens da poboación.
Todas estas cuestións son modificábeis, tanto o medio sobre o que se pode actuar como a formación do persoal neste tipo de circunstancias.
Estamos dispoñíbeis para abordar todas estas cuestións -propostas concretas xa houbo dabondo e por escrito nos últimos anos- cando o Sr. Rueda e/ou o Conselleiro do Medio Rural o consideren.