- Detalles
A Xunta chama á incorporación presencial do seu persoal e programa a apertura de centros a partir deste luns 18 sen ter en conta as medidas previstas no seu protocolo de reincorporación.
As organizacións sindicais CIG, CCOO, CSIF e UGT, con representación na Mesa Xeral de Empregados Públicos, que ratificamos o Protocolo do Consello da Xunta polo que se establecen a reincorporación do persoal empregado público ao traballo presencial e as medidas de prevención fronte ao COVID-19, denunciamos o seu incumprimento pola propia Xunta de Galiza.
É inadmisible que centros de traballo como as bibliotecas e museos da Consellería de Cultura, as Oficinas de Emprego da Consellería de Economía, Emprego e Industria, as Oficinas Comarcais Agrarias da Consellería do Medio Rural, por exemplo da apertura sen contraste de toma de medidas preventivas, vaian a abrir as portas este luns cando nin sequera se rematou o informe de identificación e actuacións preliminares, nin foi revisado polos Servizos de Prevención de Riscos laborais nin aos Comités de Seguridade e Saúde Laboral correspondentes.
Moitas consellerías están a facer interpretacións torticeiras do Protocolo saltándose os pasos de control e avaliación e agora obrigan á incorporación mediante chamada telefónica para o luns 18 deixando desprotexido e en grave risco ao persoal, pois na maioría de centros non se tomaron as medidas preventivas necesarias nin este persoal tivo tempo a comunicar a sua situación.
Así, o venres a ultima hora da maña, á Dirección Xeral de Función Publica enviou unha nota informativa en relación á solicitude de permisos en Portax cara a reincorporación ao traballo presencial derivado do Acordo do Consello da Xunta de Galicia, do 8 de maio de 2020, polo que se aproba o Protocolo polo que se establece a reincorporación dos empregados públicos ao traballo presencial e as medidas de prevención fronte ao COVID-19. A pregunta lóxica que nos facemos é como lle vai dar tempo ao persoal a solicitar os permisos correspondentes á súa situación, e ás xefaturas a resolver o que sexa procedente no fin de semana? Esta imposición de reincorporación presencial “as bravas” supón poñer a todo o persoal en risco para a súa seguridade e saúde e o abandono de menores e maiores a cargo, desoíndo o acordado e ratificado polas Organizacións Sindicais..
O fomento do teletraballo así como a flexibilidade son os parámetros sobre os que debe articularse a reincorporación progresiva ao traballo presencial, aplicando ambos sobre os efectivos recoñecidos na Resolución do 12 de marzo do Cecop ao respecto do persoal especialmente sensible.
As organizacións sindicais rexeitamos esta actitude impositiva da Xunta que contradí o Protocolo, que pon en risco a persoas e usuarios de servizos públicos e tamén vai contra a prudencia e principio de precaución que a Administración debera ter na reincorporación ao traballo presencial, que debe regularse polos principios de progresividade e toma de medidas de protección adecuadas.
- Detalles
Os centros dependentes da Consellería de Cultura que dan servizo ao público, falamos de arquivos, bibliotecas e museos, teñen unhas particularidades específicas para que tanto o persoal como os usuarios se doten de medidas axeitadas para a loita contra a pandemia.
Así, a semana pasada a consellería elaborou un documento de reincorporación e posta en marcha dos centros, ao que a CIG fixo alegacións no sentido de que antes de poñer en marcha os centros e que voltara o persoal tíñase que facer unha avaliación de riscos laborais unidade a unidade para recoller a infinidade de problemáticas diferentes que teñen cada arquivo, cada biblioteca e cada museo dependentes da Xunta de Galiza.
O dito protocolo polo que sabemos non foi aprobado e aquí estamos esperando…
E todo se acelerou: o venres 15 pola tarde os traballadores de todos os centros reciben vía correo a comunicación de que o luns todos a traballar presencialmente.
Se anulaban todos os permisos de teletraballo e se debía acudir ao centro e de selo caso alí solicitar un novo permiso.
Obviamente os responsables da consellería nen se leran o Protocolo de carácter xeral de reincorporación do persoal empregado público da Xunta de Galiza e nen sequera se leran o propio borrador de protocolo da propia consellería que remitía ao primeiro onde a partir do luns so traballarán os afectados pola fase 1, recordemos, xefes de servizo e persoal que non poida teletraballar.
Ao longo da tarde, e polas críticas do persoal e dalgunhas direccións, foron recuando e deberon botar un ollo ao DOG e xa consideraron que os que estaban teletraballando seguiran nesa situación.
Que temos a día de hoxe:
- Entre luns e martes van abrir todos os centros; non sabemos se xa ao público ou con traballos internos.
- O número de persoal que se vai incorporar vai ser en moitos casos superior ao 80% dos efectivos, co que vai ser moi difícil manter distancias de separación ao longo da xornada.
- Cónstanos que a maioría dos centros aínda non contan nen con mamparas de separación, luvas, hidroxel nen a organización de espacios para manter adecuadas medidas sanitarias.
- Temos centros que polo seu exiguo tamaño habería que iniciar o teletraballo entre persoal que aínda non o solicitara e que podería desenvolvelo.
- Non se ten planificado a relación entre usuario/traballador no tocante á venda de entradas, cobro, entrega de documentos, depósito de documentos, etc.
- Non se dotou nas dependencias de ordenadores diferenciados para traballadores e tampouco sabemos nada do plan especial de limpeza e desinfección.
En fin, unha desfeita que se intenta solucionar coa boa vontade de moitas direccións pero que se ve superada pola realidade e que representa unha irresponsabilidade enorme no momento de pandemia que vivimos.
Dirixímonos aos responsables desta desfeita, a saber o director xeral de Políticas Culturais e secretario xeral técnico para que por un lado aproben un protocolo que recolla todas as eivas que sinalamos e por outro que faga unha desescalada progresiva e que non queiran facer puntos diante do xefe para ser os primeiros en chegar a unha “falsa normalidade” pois están a xogar coa saúde dos traballadores e tamén dos usuarios, polo que de non haber medidas que garantan a seguridade NON SE DEBEN ABRIR OS CENTROS.
- Detalles
A CIG leva días instando á Consellería de Educación a que se sente a negociar a reincorporación do seu persoal non docente.
Non están dispostos a facelo, nin despois da denuncia presentada pola CIG en inspección de traballo por incumprir a lexislación en prevención de riscos laborais pola incorporación de parte do persoal este pasado luns 11 de maio.
Educación nin negociou nada, nin publicou ningún texto normativo oficial, nin programou o estudo das necesidades con antelación á incorporación de máis persoal.
A conselleira de educación está esperando a que o Goberno do Estado lle faga o traballo....
Para a CIG Autonómica é necesaria a apertura dunha mesa de negociación real. Non podemos quedarnos cunhas “Recomendacións sanitarias a establecer nos centros educativos”, e menos aínda cando o vindeiro 25 de maio haberá alumnos nos centros de ensino.
Por todo isto, a CIG Autonómica acaba de achegarlle á Consellería de Educación unha serie de consideracións e propostas preventivas ao COVID19 ante a incorporación e traballo nos centros educativos para o persoal non docente. Estas propostas inclúen aspectos xerais pero tamén entramos polo miúdo a valorar todo aquelo que o noso persoal pode necesitar para protexer a súa saúde.
Estas achegas non pretenden substituír ás avaliacións de riscos laborais ao COVID19 que se deben facer en cada centro de traballo dependendo das súas especiais características.
Para a CIG é esencial facer unha avaliación individual coas ferramentas xa reguladas que, apoiadas co Servizo de Prevención de Riscos Laborais e coa participación da representación do persoal e dos Comités de Seguridade e Saúde Laboral, aseguren a incorporación co mínimo risco posible.
Descarga o Escrito da CIG con achegas para un protocolo de reincorporación ante o silenzo de Educación
- Detalles
Consecuencia do Estado de Alarma, determinadas empregadas e empregados públicos viron incremendata a súa carga de traballo, en moitos casos sen ningún tipo de compensación.
Poñemos o caso, por exemplo, do persoal que tramita os ERTE que viron moi incrementada a súa carga de traballo. Estas compañeiras e compañeiros levan dende o comezo do Estado de Alarma tramitando expedientes baixo presión para “avanzar”, traballando fora de horario, festivos e domingos. Este persoal encárgase dunha primeira parte da tramitación dos ERTE. Posteriormente o persoal do SEPE encárgase dunha segunda parte da tramitación. Este último persoal, dependente da Administración Xeral do Estado, van recibir un complemento de produtividade. O persoal da Xunta non.
A CIG dirixiu escrito a Función Pública solicitando que se identifique a todo o persoal empregado público que, en calquer ámbito relacionado co Estado de Alarma, realizou traballos extraordinarios ou, sendo ordinarios, estivo sometido a unha alta carga de traballo.
E unha vez identificado, se negocie coa representación sindical a gratificación dese esforzo, preferentemente mediante compensación con descanso e, se non é posíbel, mediante gratificacións extraordinarias.
- Detalles
Recomendacións para a operación de sistemas de aire acondicionado. Outro exemplo da improvisación da Xunta de Galicia.
Durante as próximas semanas producirase o progresivo retorno do persoal da Xunta de Galiza os seus respectivos locais de traballo. Dada as dúbidas existentes respecto aos sistemas de ar acondicionado queremos informarte das medidas adecuadas e as recomendacións feitas en materia de sistemas de climatización propostas pola: ATECYR (Asociación Técnica Española de Climatización y Refrigeración), REHVA (Federation of European Heating, Ventilation and Air Conditioning Associations), ou ASHRAE (American Society of Heating, Refrigerating and Air-Conditioning Engineers), para evitar a propagación do COVID-19, e que de seguro a Xunta de Galiza non seguirá:
- NON APAGAR O AIRE ACONDICIONADO, xa que o estrés térmico causado por un mal sistema de climatización da lugar a caída das defensas, e esta caída de defensas xera un risco que é maior co risco de contaxio polo sistema de climatización.
- Revisar as instalacións de aire acondicionado / ventilación antes do inicio da desescalada para verificar o seu correcto funcionamento e facer os axustes e arranxos pertinentes. (Evitar que por falta de uso exista proliferación de bacterias no sistema, como por exemplo a lexionela).
- Activar os sistemas de aire acondicionado horas antes do inicio da xornada laboral e mantelos despois ou un mínimo do 25% do caudal máximo para favorecer a eliminación de partículas infecciosas. Se é posible manter os sistemas funcionando en continuo 24/7.
- Aumentar o caudal o máximo posible da instalación, durante as horas de traballo; recomendase un caudal mínimo de 12,5 litros/segundo/persoa, segundo indica o “Real Decreto 1027/2007, do 20 de xullo, polo que se aproba o Regulamento de instalacións térmicas nos edificios” nos apartados IT 1.1.4.2.3 para os locais de tipo IDA 2 do apartado IT 1.1.4.2.2 no que están tódolos locais da Xunta de Galicia). Manter os maiores niveis de impulsión e expulsións que sexan posibles.
- Cerrar completamente a recirculación de aire, é dicir, facer co 100% do ar veña do exterior e non aproveitemos parte do aire interior do edificio para volvelo facer pasar dentro, taxa de renovación de aire do 100%. Os filtros situados nos recirculadores non son quen de reter partículas de virus.
- Evitar cos sistemas de entrada e extracción de aire nas estancias xeren correntes que pasen partículas con virus duns traballadores a outros, segundo o establecido no “Real Decreto 1027/2007” no apartado IT 1.1.4.1.3.
- Vixiar fugas naqueles intercambiadores de calor nos que exista separación entre o aire de entrada e o da saída; no caso de que non exista separación (ex: intercambiadores rotatorios) directamente apagalos.
- No caso de cambio dos filtros do sistema de de ventilación estes serán tratados como material de risco biolóxico e tomaranse as correspondentes medidas de protección individual (luvas, máscaras, gafas, botas e traxe de protección). Non é recomendable subsistir os filtros por uns de maior filtraxe (mais finos) xa que a perda de fluxo de aire é peor ca ganancia na filtraxe. Non se deben limpar os filtros (con aire, auga , UV-C etc), nin manipular (recortar, axustar etc); hai que substituílos.
- Instalar en oficinas de traballo con grande cantidade de persoal, como por exemplo San Caetano, sistemas extra de purificación de aire que reduzan a carga de virus (UV-C, filtración electrostática, xeradores de ións, etc).
- Manter a ventilación dos baños de forma continua e descargar os inodoros coa tapa pechada.
- En todos os centros e, especialmente, naqueles con maior cantidade de traballadores e peores condicións de climatización, facer obrigatorio o uso de máscaras para reducir en maior medida a cantidade de partículas de virus no ambiente.
Na CIG seguimos reclamando a convocatoria dos comités de saúde e seguridade laboral, para realizar plans de prevención de riscos laborais e avaliacións de riscos personalizadas para cada centro e non protocolos de medidas xerais que non abranguen toda a actividade realizada nos centros, e que deixan a xente desamparada ante a pandemia do COVID-19, eludindo a súa responsabilidade como garantes da saúde e seguridade dos traballadores como di a Lei 31/1995, de 8 de novembro, de Prevención de Riscos Laborais.
- Detalles
O día 5 de marzo 2020 solicitamos a reunión urxente do Comité de Seguridade e Saúde Laboral do Edificio Adminsitrativo do Ourense. A día de hoxe esta reunión non se chegou a producir.
O próximo 18 de maio comenza a primeira das tres fases que inclúe o Protocolo de incorporación gradual do persoal empregado público. Rematadas as actuacións preliminares de identificación do protocolo e antes da reincorporación do persoal, é necesario coñecer as avaliacións de riscos realizadas e as medidas previstas. Tamén é necesaria unha reunión urxente do Comité de Seguridade e Saúde Laboral do Edificio Administrativo de Ourense no que se teñan en conta novas medidas organizativas.
- Detalles
A CIG ven de poñerse en contacto coas outras organizacións sindicais para instar a reunión urxente da comisión de seguimento do acordo do protocolo de reincorporación e o grupo de traballo sobre o teletraballo, para avaliar a fase preliminar, estudar a ampliación temporal e a outros colectivos do teletraballo.
A comisión de seguimento é un instrumento de traballo para a mellora do protocolo, e este debe ser un documento vivo e aberto a cambios. Cremos que a comisión debe ter carácter permanente e a primeira xuntanza ten que realizarse esta semana.
Hai varias cuestións que deben ser tratadas:
1. Teletraballo: ampliar o seu prazo e o seu ámbito subxectivo
Por seguridade a presenza nos centros debe ser mínima, polo que dende a CIG cremos que se debe incentivar o teletraballo e amplialo a máis alá da terceira fase. Isto pode facerse ou ben aumentando o prazo de incorporación da terceira fase ou simplemente ampliando o teletraballo. A normativa do Estado é clara: propón que o teletraballo se prorrogue ata tres meses despois do estado de alarma, (Real Decreto-lei 15/2020) polo que antes de entrar na fase 3 este asunto debe quedar resolto.
Esta medida debe contemplarse independentemente do carácter de permanencia que consideramos que debe ter esta opción e que será obxecto de análise no grupo de traballo para o teletraballo.
2. Estudo e análise dos traballos de adaptación da fase preliminar
A maiores dos asuntos de contido que levaremos a esta comisión de seguimento, consideramos que a mesma debe reunirse para que se dea conta e avaliar como van os traballos da fase preliminar de adaptación dos postos de traballo.
3. Avaliacións de riscos laborais ao COVID19 dos centros de traballo e postos con tarefas de campo e convocatoria dos comités de seguridade e saúde laboral
É moi importante que os centros se analicen dende outro punto de vista, como no caso da ventilación, poñendo énfase no control dos sistemas de ventilación forzada e correntes de ar, as sinalizacións, a formación do persoal en materia de prevención ao COVID19 ou o aforo dos locais.
4. Centros dependentes da Consellería de Educación
A Xunta debe obrigar á Consellería de Educación á negociar un protocolo de reincorporación acaído ás circunstancias destes centros para manter sistemas de teletraballo ou de flexibilidade horaria compatible coa prestación do servizo, pero que permita exercer os dereitos de conciliación, de entrada durante esta crise, pero con vocación de futuro.
Así, ao igual que fixeron outras consellerías co persoal con funcións “especiais” (como bombeiros forestais, ou persoal de Cultura), esiximos á Xunta que obrigue á Consellería de Educación a negociar inmediatamente un protocolo axeitado ás especificacións laborais de dito persoal.
Independentemente da necesidade dunha avaliación específica ao COVID19 nestes centros hai que ter en conta as súas especiais características (número de alumnado, espazos comúns, conformación de aulas, disposición da secretaria e lugar e medios de traballo do persoal subalterno, protocolos e medios para persoal de limpeza, etc).
5. Flexibilidade e conciliación no caso do persoal con fillos/as menores e maiores a cargo
Todo o persoal con menores e maiores a cargo verá aumentado o seu período de teletraballo máis alá da terceira fase ata que a actual situación sanitaria permita abrir os centros de ensino, garderías e centros de día.
Ademais, no caso de non ter capacidade de teletraballo, e seguindo o protocolo aprobado, haberá que buscar outras fórmulas para que se poida prestar ese servizo e desenvolver as tarefas asignadas de xeito non presencial, como despacho ordinario de asuntos dende o domicilio, tal e como se recolle no punto 3 do protocolo. No caso de persoal convivinte con persoas de risco esta modelo equivalente ao teletraballo é esencial.
O fin último é buscar unhas ferramentas de flexibilidade laboral (teletraballo) que nos permitan conciliar a seguranza sanitaria, a atención familiar e a continuidade ordinaria dos servizos administrativos na Xunta de Galiza.
Consideramos que urxe poñerse xa a traballar neste asunto sen dilación.
- Detalles
Na reunión que tivemos as organizacións sindicais coa conselleira de Medio Ambiente o martes 12 para informar das actuacions realizadas polos axentes ambientais en relación ao COVID19, aproveitamos para pór enriba da mesa cuestións que afectan ao servizo dos axentes e ao persoal da Dirección Xeral de Patrimonio Natural.
A conselleira comezou dando conta ás organizacións sindicais do traballo voluntario realizado polo persoal axente ambiental cos servizos sociais dos concellos nos que se deu apoio a persoas maiores que vivían en situación de illamento. Outra das funcións dos axentes foron o control da presenza en camiños rurais e espazos naturais. Destacou o grande número de actuación: 2095 visitas en 54 concellos e se interceptaron 879 persoas saltandose as restricións cun resultado de 22 denuncias. Dos datos desagregados completos fixo un comunicado público.
A CIG puxemos na palestra as seguintes cuestións:
- Queixa polo comezo anticipado da pesca, tanto pola forma (cunha interpretacion de actividade deportiva na web en troques do DOG) como polo improcedente e precipitado da medida da que finalmente tivo que recuar o sabado polo decreto do Estado, cun novo caos entre o persoal e pescadores.
- Necesidade urxente das Avaliacións de Riscos Laborais ao risco biolóxico do COVID19 xa que en dous meses non llas fixeron nin ao persoal activo.
- Recordámoslle que teñen que dar conta dos resultados da identificación de riscos da fase preliminar e medidas a aplicar antes da reincorporacion do persoal, e esiximos potenciar o teletraballo ao máximo de xornadas posibles.
- Persoal sensible: deixar preventivamente a este persoal na casa ata que non se resolva a tramitación das solicitudes (traballo remoto ou teletraballo).
- Parque das Illas Atlánticas: aínda non hai plan preventivo das instalacións e vivendas compartidas de traballadores nin das embarcacións.
- Comité de seguridade e saúde laboral: Convocarán para o venres 15.
- Formación e información ao persoal sobre o risco ao COVID19 antes de comezar co traballo presencial.
- Revisións de EPIs COVID e outros EPIS para o traballo. Salientamos a falta de roupa que xa está en moi mal estado (uniforme e mais) e EPI de embarcacion.
- Reclamamos a comisión de seguimento do acordo de axentes para a colocación dos períodos extraordinarios (son todos dispares e non se xustifican), carteleiras, etc.
- A consellería quere abrir os parques naturais a toda costa ao público. Vai comezar xa cos naturais, pero no das Illas Atlánticas teno mais difícil pola limitación a grupos de 10 persoas: a nosa proposta é que agarden ata que o risco baixe ou remate o estado de alarma.
Ademais o resto de organizacións sindicais complementaron as demandas da CIG con:
- UGT cuestiona a pesca como elemento de aproveitamento e solicita limitacións horarias e diarias como deporte entre outras cuestións do colectivo (retraso en cobros, etc).
- A CSIF reitera que os protocolos especificos como vehiculos, etc, non están accesibles na web, recalcan necesidade de formación e que co Protocolo xeral asinado non toca a volta o 18.
- Hai que estudar os problemas que teñan as persoas con fillos/as e maiores a cargo e as vulnerables e CCOO ademais lle explica á conselleira a diferenza entre comunicación e negociación, moi acertada xa que ainda non tivemos a primeira mesa de negociación dende o 12 de marzo en toda a Xunta.
- Pedíronse tablets para os axentes para non ter que acudir tanto aos distritos a activar as gardas nocturnas para o control do furtivismo.
Nesta reunión informativa (sen negociación) quedaron cousas sen tratar como a saturación dos servizos xurídicos, e moitas máis sen respostar. A conselleira non se comprometeu a nada, deunos xabón cun ton amable e distendido, e pouco máis.
Esperamos avanzar na seguridade e incorporación no Comité de Seguridade e Saúde Laboral e estaremos pendentes para que non se atrevan a inclumprir o Protocolo de desescalada, que na Xunta cheira a que cada consellería fai o que lle peta.
- Detalles
A día 1 de marzo de 2019 estabamos negociando o Fondo de Acción Social (FAS) do ano 2018. Coa emerxencia sanitaria derivada do COVID-19 a Xunta de Galiza esqueceu o FAS 2019. Desde o ano 2012 o Fondo de Acción Social quedou recortado ao mínimo. En ningún destes nove últimos exercicios orzamentarios amosou a Xunta a máis mínima intención de reverter eses brutais recortes nos dereitos sociais do persoal.
Dende a CIG exiximos:
- Dotar o Fondo de Acción Social da Xunta de Galiza co 1% da masa salarial.
- Recuperar todas as axudas do Fondo de Acción Social que tiñamos antes da crise e aumentalas progresivamente.
- Compatibilizar as axudas do Fondo de Acción Social que se reciban por parte dos e das empregadas públicas da Xunta con outras que poidan percibir como cidadán e cidadás beneficiarias.
- Respectar unha distribución inversamente proporcional o nivel de renda das familias.
- Inclusión no FAS da Xunta de Galiza dos beneficios ou axudas que existen noutras administracións ou mutualidades como MUFACE.
- Que a solicitude de informes á Seguridade Social ou outro organismo para a xustificación da percepción das axudas do FAS debe facela directamente a Xunta de Galiza co permiso da persoa solicitante.
- A resolución e aboamento do Fondo de Acción Social debe ser no mesmo ano natural da convocatoria para evitar ter que recorrer a declaracións complementarias do IRPF.
Na CIG consideramos que xa cumpre a recuperación das axudas recortadas dende o ano 2012, polo que esiximos a convocatoria inmediata da negociación do Fondo de Acción Social 2019 e o estudo da incorporación de posibles novas axudas urxentes para mitigar as consecuencias do COVID-19 no persoal empregado público da Xunta de Galiza.
- Detalles
O que se está a vivir nos centros de Política Social, por mor da afectación do coronavirus, vén a confirmar as carencias que leva denunciando a CIG dende hai anos.
Dende o día 16 de abril de 2012, a raíz da entrada en vigor da Lei 1/2012, do 29 de febreiro, e en concreto da aplicación do seu artigo 6º e a suspensión de varios artigos do V Convenio Colectivo Único para o Persoal Laboral da Xunta de Galiza, o persoal da Consellería de Política Social foi un dos colectivos de traballadores/as máis directamente afectados por esta normativa, de carácter supostamente temporal. O persoal desta consellería, nalgúns casos, foi ninguneado e ata denigrado no seu labor.
As quendas de traballo anuais son esgotadoras por mor da suspensión do artigo 19 do Convenio Colectivo, o que impide, entre outras, a conciliación do persoal.
O presente non é bo, máis o futuro preséntanse con piores perspectivas. A crise sanitaria estase a afrontar, nalgúns casos, cos efectivos existentes, estando os centros todos os días con servizos mínimos. En poucos centros reforzouse o persoal, demostrando a necesidade do mesmo permanentemente.
Nos centros de Política Social conseguiuse, co esforzo do persoal e sen apenas medios, e nalgúns casos, nin coa axuda por parte das xefaturas, que a incidencia da pandemia fora mínima en comparación coa incidencia en residencias privadas e privatizadas.
Na actualidade, nos nosos centros, a Xunta está a trasmitir unha sensación irreal de normalidade, mantendo a sobrecarga de traballo debida a pandemia, reducindo o persoal de reforzo para quedarse só co persoal existente de base, o que lle supón un gasto menor en salarios e complementos.
Por mor do anterior, a CIG solicita do Goberno Feixoo, as seguintes medidas para o persoal da Consellería de Política Social:
- Ampliación dos actuais cadros de persoal, e revisión da ratio de efectivos dos centros (moi antiga e obsoleta a día de hoxe). Reforzo do persoal sanitario e non sanitario dos centros.
- Devolución inmediata do artigo 19 do V Convenio Colectivo Único (compensacións por traballar domingos e festivos, en días de descanso e dereito de descansar a metade dos festivos anuais e fins de semana de xeito alterno; descanso do 24 e 31 decembro, e de non ser posible, compensación igual á que teñen os domingos e festivos).
- Supresión da contratación precaria de contratos de fin de semana, por horas, medias xornadas, etcétera, e substitución destes contratos por traballo estable e continuado.
- Cobertura do persoal con adaptacións de posto derivadas dunha situación médica, así como das reducións de xornada por conciliación familiar, para non sobrecargar ao resto do persoal.
- Cobertura de todos os permisos, vacacións, baixas laborais, excedencias,…
- Supresión inmediata do exceso de burocracia e requisitos para a contratación habitual e extraordinaria que se necesita diariamente nos centros.
- Inmediata dotación de medios, consolidados e permanentes, para afrontar a crise actual e as futuras, sen ter que acudir á improvisación que pon e puxo en risco a saúde das persoas usuarias e do persoal dos centros.
- Sostemento, e gradual implantación, de medidas de prevención, nos nosos centros residenciais, así como noutros centros de futura apertura, dado que seguiremos padecendo risco sanitario real, tendo en conta tamén o tipo de persoas que atendemos.
- Revisión dos pluses pagados durante a alarma sanitaria consolidando aqueles que deban manterse.
Levantamento inmediato das restricións laborais. Levamos moitas semanas con dereitos laborias cancelados, de suspensión de todo tipo de permisos, de vacacións, cambios de quenda, etcétera. A Xunta, sen baixar a garda en prevención, ten que asumir o custo económico, e non manter eternamente limitacións de todo tipo, ao persoal de Política Social, que é un dos colectivos que máis esforzo e entrega achegaron nesta crise sanitaria.
Ademais dos puntos anteriormente citados, solicitamos, para as traballadoras/es do Consorcio Galego de Servizos de Igualdade e Benestar, que tamén pertencen á Consellería de Política Social o seguinte:
- Equiparación salarial inmediata.
- Transparencia na xestión da área de Benestar. Que cesen as ameazas ao persoal por parte das técnicas da Área e que se depuren responsabilidades pola súa actuación nesta crise.
- Na contratación temporal, total transparencia.
O dito, se a Xunta, se o Goberno galego, se a nosa Consellería, se as Xefaturas Territoriais, se Feixoo, queren agradecernos os nosos servizos na crise sanitaria teñen medidas de sobra para facelo.
Non queremos cartas de agradecemento. Non queremos visitas guiadas e preparadas aos centros. Non queremos discursos falsos dende a tribuna do Parlamento galego. Non queremos máis gastos en propaganda. Non queremos esmolas por un tempo...
QUEREMOS O QUE É XUSTO E SE NECESITA: MEDIOS, PERSOAL E RECUPERACIÓN DE DEREITOS LABORAIS. MÁIS NADA.
Póñanse a traballar. Sigan o exemplo do persoal de Política Social.