- Detalles
A Xunta de Galiza segue pasando de negociar o teletraballo e pretende incorporar presencialmente a toda costa a todo o persoal a partir do 15 de xuño, finxindo unha normalidade que non existe.
A Xunta incorporou a persoal que tiña teletraballo COVID a pesar de que esta é a mellor opción para reducir o risco de contaxio fronte ao coronavirus tanto nos centros de traballo como na sociedade. Para a CIG Autonómica é unha barbaridade mobilizar a milleiros de empregadas/os que están a facer teletraballo con eficacia dende os seus fogares, e apelamos á normativa básica dos decretos do Estado, nos que se insta a ampliar o teletraballo tres meses máis aló do remate do estado de alarma.
Así, a Xunta incumpriu o seu propio Protocolo de incorporación e medidas xerais e chamou para o traballo presencial ao persoal. Fallaron as garantías previstas nel e, no nivel formal, en moitas das consellarías pasaron á fase dúas sen a comprobación previa dos Servizos de Prevención de Riscos Laborais, e sen tratar o informe de fin de fase no Comité de Seguridade e Saúde Laboral respectivo. Esta situación provocou numerosas denuncias e protestas, algunhas das cales remataron na Inspección de Traballo e Seguridade Social.
Con estes antecedentes é doado supor que o día 15 de xuño comece a terceira fase e reincorpore ás bravas a todo o persoal, incluído o que esta teletraballando por conciliación.
Non aceptamos esta estratexia da Xunta de finxir unha normalidade que xustifique a campaña electoral, e imos seguir a denunciar e reclamar o que é xusto.
Polo de agora pomos ao teu dispor unha solicitude individual co fin de tentar ampliar o teletraballo COVID por conciliación nos termos que marca a lexislación do Estado español. Ten en conta que a opción de redución de xornada ten redución proporcional de salario. Descargar o modelo.
Se te chega resposta da Xunta, ponte en contacto coa CIG para estudar a súa defensa xurídica.
- Detalles
Poñemos a túa disposición as achegas que presentamos aos informes de finalización da primeira fase que nos remitíu a Administración.
Como xa sabes, a Xunta está a incumprir o seu propio Protocolo de incorporación ao traballo presencial. Entrou na súa segunda fase a pesares de que para pasar dunha fase a outra era preceptivo un informe no que se especificaran, a maiores da identificación dos postos, as medidas implementadas por centro directivo/xefatura territorial coa comprobación do Servizo de Prevención de Riscos Laborais (SPRL) e o tratamento previo nos Comités de Seguridade e Saúde Laboral (CSSL).
Pois ben, do SPRL pouco ou nada sabemos pois debe estar máis que desbordado e a Xunta nin reforza ese servizo propio, nin resposta que pasa co ERTE de Cualtis, entidade allea coa que a Xunta ten concertada a Prevención de Riscos Laborais. Dos CSSL sabemos que na maioría deles, agás o de Economía, Emprego e Industria e o de Cultura, non houbo xuntanza previa e incorporaron ás bravas ao persoal. Porén, dende a CIG seguimos a reclamar que se tomen medidas preventivas fronte ao coronavirus e que non se reincorpore ao persoal ata estar seguros e con garantías: o persoal empregado publico non queremos un rebrote da pandemia e non queremos enfermar, por iso na CIG acordamos alegar para que o teñan claro e demandar á Xunta se non actúan.
Alegacións da CIG aos informes de finalización da primeira fase:
- Consellería de Economía, Emprego e Industria (presentadas na xuntanza)
- Consellería de Educación, Universidade e Formación Profesional
- Consellería de Infraestruturas e Mobilidade
- Consellería de Medio Ambiente, Territorio e Vivenda
- Consellería de Cultura e Turismo
- Consellería de Facenda
- Consellería do Mar (Presentadas na xuntanza CSSL 06.06.2020 e complementadas por escrito)
- Consellería do Medio Rural
- Consellería de Política Social
- Consellería de Presidencia
- Vicepresidencia
- Consellería de Sanidade
Non somos perfectas e perfectos, e seguro que nos quedan cousas por dicir, polo que se queres engadir algo, ponte en contacto coa CIG.
- Detalles
Contámosche os pasos a seguir para a presentación das solicitudes e documentación das listas de contratación da Xunta, unha vez reiniciado o prazo para anotarse tras o parón polo COVID19.
1º. Encher a solicitude no web de Función Pública: ligazón.
Esta solicitude non admite presentación telemática, xa que debe vir acompañada de documentación que actualmente non pode ser consultada por medios telemáticos.
2º. Encher o impreso de taxas ( 18.04€ no ano 2020)
Estarán exentas do pago da taxa para a inscrición nas listas de contratación:
- Persoas con discapacidade igual ou superior ao 33%. Esta circunstancia acreditarase coa copia cotexada do certificado de discapacidade.
- Persoas que sexan membros de familias numerosas clasificadas na categoría especial. No caso de membros de categoría xeral terán unha bonificación do 50%. Este extremo acreditarase coa copia cotexada do título de familia numerosa.
Bonificación do 50%
- Persoas que figuren como demandantes de emprego desde, polo menos, 6 meses antes da data de convocatoria.
- Será requisito para o goce da exención do 50% do importe da taxa non estar a percibir prestación ou subsidio por desemprego. A acreditación desta situación farase coa certificación expedida pola oficina de emprego na que conste que a/o aspirante figura como demandante de emprego desde, polo menos, o 1 de setembro de 2019 ata a data da súa solicitude, e que na data da solicitude non percibe prestación ou subsidio por desemprego.
Estarán exentas da presentación destas certificacións as persoas interesadas que manifesten na solicitude o consentimento expreso para que o órgano convocante poida acceder á comprobación destes datos.
3º. Presentar nun rexistro a solicitude cuberta e o impreso de pago de taxas xunto con:
- Certificado debidamente compulsado do grado de coñecemento do idioma galego.
- Fotocopia, debidamente compulsada, da titulación requerida.
- Fotocopia do Documento de Identidade.
Os puntos B e C poden substituírse polo seu consentemiento expreso na solicitude para que o órgano convocante poida acceder a estes datos e os demais requisitos da lista.
PROCEDEMENTO PARA PRESENTAR NO REXISTRO
Ata o 16 de xuño os rexistros de Vicepresidencia dos edificios administrativos da Xunta estarán traballando no horario normal de maña, tarde e sábado; pero por control de fluxos de xente entrando nos edificios É OBRIGATORIA A CITA PREVIA, que se pode pedir a través da web no enlace https://www.xunta.gal/cita-previa ou no 012 (ou 981 900 643).
A partir do 16 de xuño comenzará o horario de verán e só atenderán de luns a venres en horario de mañá; pero seguirán con cita previa.
Permanecen abertos tamén os rexistros das oficinas comarcais de Vicepresidencia nos seus horarios habituais de maña.
Respecto doutros rexistros, estanse adaptando á situación e abrindo pouco a pouco. Recomendamos informarse de si están ou non abertos e si se precisa cita previa antes de acudir a calquer rexistro destes.
- Detalles
No DOG do 4 de xuño de 2020 vén de publicarse unha Orde pola que se dispón que o 15 de outubro de 2020 entrará en vigor o novo sistema de chamamentos electrónicos das listas de contratación do Decreto 37/2006 a través do Sistema de notificación electrónica de Galicia-Notifica.gal.
Para a posta en funcionamento do sistema de citacións electrónicas realizarase un proxecto piloto nos ámbitos da provincia de Pontevedra nos grupos II-006 (Educador/a. Profesor/a especial), V-001 (Camareiro/a-limpador/a. Axudante cociña. Pasador/a de ferro-lavandeiro/a. Costureiro/a. Cortador/a. Pasador/a de ferro. Lavandeiro/a) e V-011 (Limpador/a. Fregador/a. Empregado/a comedor. Empregado/a cociña-pinche. Servizo doméstico. Mozo/a de limpeza. Pinche de cociña. Persoal servizos xerais)
A realización dese proxecto piloto levarase a cabo desde o 15 de xuño ata o 14 de outubro de 2020.
- Detalles
Función Pública enviounos un novo buzón de postos coas vacantes do concurso de traslados de corpos xerais. Podes descargalo dende aquí. Aseguran que ese novo listado incorpora todas as vacantes que se produciron dende a publicación do listado inicial que acompañaba á convocatoria do concurso (DOG 27/11/2019).
Non nos dan moito tempo: temos que ter mecanizadas as alegacións antes do xoves 4 ás 12h. Convidámosche a que se sabes de novas vacantes dende novembro/2019 (xubilacións, falecementos ou excedencias), contactes coa CIG.
Con isto, cal vai ser o novo cronograma? Pois sinceiramente, polo de agora non temos nin idea; e xa postos, tampouco é que nos fiemos moito do que nos conten, porque unha e outra vez incumpriron a súa palabra. A previsión era que por xaneiro, unha vez que xa rematara o prazo de presentación de solicitudes para participar no concurso, Función Pública sacaría un listado con todas as vacantes (publicadas no DOG da convocatoria do 27 de novembro) máis as prazas das persoas que solicitaron participar no concurso, e sobre ese listado final sería a solicitude de prazas. Pero pasou xaneiro, e febreiro, e marzo, e chegou o COVID19. Nunca chegaron a sacar ese listado sobre o que realizar as solicitudes, e do que estamos a falar agora é actualizar o listado inicial de vacantes, non o listado sobre o que realizar as solicitudes.
Como pasou tanto tempo dende a convocatoria, non nos queda outra que aceptar a actualización de vacantes. Foron demasiados meses durante os que se foron producindo vacantes. Esperemos que esto non sexa unha nova xustificación para un novo retraso de moitos máis meses.
- Detalles
No DOG do 3 de xuño de 2020 veñen de publicarse as listaxes provisionais de persoas admitidas e excluídas no procesos selectivos para o ingreso, pola quenda de promoción interna, no corpo superior subgrupo A1, corpo de xestión subgrupo A2, corpo administrativo subgrupo C1 e corpo auxiliar subgrupo C2 da Administración xeral da Comunidade Autónoma de Galicia.
As listaxes de persoas aspirantes admitidas poderanse consultar no portal web corporativo funcionpublica.xunta.gal. As persoas aspirantes excluídas, así como aquelas persoas que non figuren en ningunha das listaxes, disporán dun prazo de dez (10) días hábiles, contados a partir do día seguinte ao da publicación desta resolución no DOG.
- Detalles
“As gotas co virus van ao chan”, todo controlado ...
A volta ao traballo nos edificios administrativos foi unha das grandes preocupacións da CIG, pero a tardanza xeral nas convocatorias dos comites de seguridade e saude laboral, a pesares da situación epidemiolóxica e o extraordinario desta realidade sen precedentes, fíxonos sospeitar que o proceso de reincorporación sería unha improvisación sen contar co que teñan que dicir as traballadoras e traballadores. Nesta ocasión superaron as nosas expectativas.
O 29 de maio reuniuse o Comité de Seguridade e Saúde Laboral (CSSL) do edificio administrativo de Lugo e a sensación de formar parte dun trámite incómodo para o presidente do comité foi esaxerada. As presas na exposición dos asuntos e o desinterese nos temas que preocupan aos traballadores marcou por completo a reunión.
- Ante a petición de avaliación de risco biolóxico por COVID-19, din que non é necesaria.
- Ante a falla de contedores con tapa, bolsa e pedal para depositar máscaras, luvas e outros residuos relacionados, din que hai baldes e servizo de limpeza (consideran inmunes o persoal que presta estes servizos).
- Ante as dúbidas sobre a climatización do edificio e a recirculación do aire que puidera estar contaminado, e por tanto a posibilidade de que o sistema sea dispersor do virus, afirman que “as gotas co virus van ao chan e así o virus non anda polo aire”. Sobran comentarios e estudios científicos que din todo o contrario… , de todos os xeitos comprometéronse a revisar a eficacia dos filtros.
- Ante a obriga de facilitar máscaras ao persoal, contestan que dado que son de uso obrigado en xeral e non só no traballo, que as paguemos dos nosos petos. Parece ser que nestes edificios non existen os corredores, aseos, zonas de fotocopiadoras, etc. e por suposto tampouco existe a Lei de prevención de riscos laborais (LPRL) e demais lexislación relacionada co asunto, da que lles facilitamos unha escolma dende a CIG.
- Ante a inminencia da volta ao traballo presencial, fíxose por parte do presidente unha valoración moi positiva do teletraballo e as súas virtudes, para despois recoñecer que na terceira fase todos os empregados e empregadas voltarán ao posto de traballo presencial (agás se o solicitamos por motivos xustificados). Recoñecéndose así, unha vez máis, que para as xefaturas o importante é a presenza e non tanto o traballo feito.
A CIG nunca vai admitir como válidos estes comportamentos prepotentes a vez que irresponsábeis. Estanse a tomar a cachondeo a prevención de riscos laborais, poñendo en risco sen necesidade aos seus propios traballadores e traballadoras, as súas familias e a mesma loita contra o virus.
- Detalles
O Consello da Xunta do 15/05/2020, aprobou o “O Plan de dixitalización dirixido a autónomos, comercios e Pemes". Vai ser un impulso da Xunta dotado con 23,5 millóns de euros para que esas empresas gañen en competitividade no novo contexto económico. Ainda non publicaron a orde no DOG pero xa están a facer propaganda (ver cartace) (ver no web do IGAPE)
Con esta medida, a Xunta vai subvencionar ás pequenas e medianas empresas ata 80% da compra de material informático que necesiten así como a asistencia técnica necesaria para que os seus traballadores e traballadoras poidan teletraballar. Por lóxica, o restante 20% vai ter que asumilo cada empresa subvencionada.
E mentres, que fai a Xunta co seu propio persoal e o seu teletraballo? Vampirizalo.
A Xunta non vai darse unha subvención a si mesma para a adquisición do material. O que vai facer e recibir a subvención, do seu propio persoal, xa que vai ser cada empregado e empregada da Xunta quen vai subvencionar o 100% da adquisición do material informático para realizar teletraballo.
Poñer en marcha o teletraballo xa
Durante esta crise sanitaria quedou demostrado que a Administraciou pode funcionar con moito persoal realizando teletraballo dende os seus domicilios. Pero a pesares da insistencia da CIG, Función Pública négase á constitución do grupo de traballo para avanzar no desenvolvemento normativo do teletraballo recollido no Protocolo de reincorporación ao traballo.
Na CIG estamos convencidas/os de que o teletraballo é a modalidade de prestación do traballo do presente e do futuro máis inmediato por razóns económicas de aforro, de produtividade e, sobre todo, por ser unha ferramenta valiosísima para afondar nunha verdadeira conciliación da vida laboral e familiar do conxunto dos/as empregados/as públicos/as.
Non hai ningunha escusa válida para negarse a tal evidencia salvo que a intención da Xunta de Galiza sexa dar pasos atrás na conciliación laboral e familiar no canto de erixirse nunha Administración moderna, eficaz e preocupada polo benestar do seu persoal.
- Detalles
As medidas preventivas que se establezan no meu centro e posto de traballo teñen que vir reflectidas na Avaliación de Riscos Laborais ao COVID19. Como empregada/o teño dereito a coñecelo e o deber de aplicalas, e a Lei de Prevención de Riscos Laborais é a norma básica que prevalece ante calquera outra resolución, protocolo, decreto, etc., nesta materia.
Porén, a empresa debe informarme das medidas que aplicou para protexer a seguridade e saúde no meu centro de traballo, e debe formarme axeitadamente para que desenvolva as miñas funcións laborais coa máxima seguridade posíbel para as persoas usuarias, os/as meus/miñas compañeiros/as e para min mesma/o.
No Protocolo para a incorporación do traballo presencial e de medidas xerais veñen unhas recomendacións que se deben adaptar a cada centro e que son mínimas ou xerais: evitar a concorrencia mediante o teletraballo, 2 metros de separación e mamparas para o público, medidas organizativas como o estabelecemento de quendas voluntarias, cita previa e control de acceso.
Así, na Avaliación de riscos laborais do teu centro virán aquelas máis específicas, como entrada e saída, uso de espazos comúns (wc, salas, etc.), equipamentos como impresoras, ou postos. Ademais, debe especificar como realizar inspeccións, o uso de medios compartidos, protocolos para funcións específicas ou traballos de campo, equipamentos auxilares, etc.
Se non che informaron nin che formaron, teñen que facelo, é a obriga da empresa.
Poñemos á túa disposición un modelo para que solicites a avaliación de riscos do teu centro de traballo. Podes adaptalo ás túas circunstancias. Descargar modelo.
- Detalles
A Dirección Xeral de Función Pública anuncia no seu web a reanudación do prazo para a presentación de solicitudes de inclusión nas listas do Decreto 37/2006 do 1 de xuño ao 18 de xullo de 2020, con efectos dende o 1 de xuño.
Esto di o anuncio de Función Pública:
O prazo para a presentación de solicitudes de inclusión nas listas para o nomeamento de persoal funcionario interino, e a contratación temporal de persoal laboral da Xunta de Galiza, inicialmente establecido do 1 de marzo ao 30 de abril de 2020, atópase suspendido dende o 14 de marzo de acordo co establecido na Disposición Adicional Terceira do Real decreto 463/2020, do 14 de marzo que declarou o estado de alarma para a xestión da situación de crise sanitaria ocasionada polo COVID-19.
Con data 23/5/2020 publicouse no BOE a Resolución do 20 de maio de 2020, do Congreso dos Deputados, pola que se ordena a publicación do Acordo de autorización da prórroga do estado de alarma declarado polo Real Decreto 463/2020, do 14 de marzo, na que se establece no seu apartado décimo:
“Con efectos desde o 1 de xuño de 2020, derrogarase a disposición adicional terceira do Real Decreto 463/2020, do 14 de marzo, relativa á suspensión de prazos administrativos. Desde esa mesma data, o cómputo dos prazos que fosen suspendidos renovarase, ou se reiniciará, se así se previu nunha norma con rango de lei aprobada durante a vixencia do estado de alarma e as súas prórrogas.”
Por este motivo, infórmase da reanudación con data de efectos do 1 de xuño de 2020 do prazo para a presentación de solicitudes de inclusión nas listas para o nomeamento de persoal funcionario interino e a contratación temporal de persoal laboral da Xunta de Galicia polo tempo equivalente ao que permaneceu suspendido.
O persoal interesado en formar parte das listas de contratación temporal, constituídas ao abeiro do Decreto 37/2006, de 2 de marzo, que se atopaban abertas para anotarse nelas antes declaración do estado de alarma, poderá continuar coa presentación das solicitudes de inclusión a partir do día 1 de xuño de 2020 ata o 18 de xullo do ano 2020 ambos incluídos.
