- Detalles
No DOG do martes 29/12/2020 publican as listas definitivas para o desempeño transitorio de prazas reservadas a persoal funcionario e a contratación temporal de persoal laboral da Xunta de Galiza, reguladas polo Decreto 37/2006.
Nos anexos I e II poden consultarse a relación de corpos e escalas de persoal funcionario, e de grupos e categorías de persoal laboral que quedan incluídas nesta Resolución.
A consulta das listas pode facerse dende o web de Función Pública, no Servizo de Atención e Información á Cidadanía a través do teléfono 012 e nas oficinas de Rexistro e Atención á Cidadanía da Xunta.
As persoas excluídas disporán dun mes para solicitar a devolución das taxas de inscrición.
- Detalles
TEMARIOS AXI E GARDERÍA FLUVIAL
A negociación dos procesos selectivos, en todos os casos, é competencia de Función Pública. E así está escrito tanto no Acordo que asinou a CIG coa consellería, como a addenda posterior.
Defendemos substituír os temas por normas de dereito. Se manteñen os temas, entón que indiquen as normas de referencia e desenvolvan manuais, mesmo elaborados pola EGAP. O Secretario Xeral Técnico di que facer iso atrasaría o proceso.
A CIG está conforme coa funcionarización do persoal laboral fixo, pero a diferenza de CCOO e UGT, pensamos que as cousas se fixeron ao revés. Primeiro debería ser un concurso de traslados, despois a reclasificación e promoción interna como laboral, seguido da negociación de escalas e futuros niveis e por último, o proceso de funcionarización. Comezando polo que debería ser o último, o que están a facer é pedirlle á xente que se funcionarice a cegas, sen saber como vai quedar para decidir se lle interesa ou non.
O SXT di que o proceso pode ser para o 3º ou 4º trimestre do ano que vén (setembro?).
En canto á titulación académica requirida para participar no proceso, o SXT di que xa falou con Emprego e Función Pública. En canto saiban quen o xestionará en Educación, convocarán unha xuntanza.
A negociación cos sindicatos continuará para despois do Nadal.
RPT DE AUGAS DE GALIZA
A CIG rexeita a cobertura de postos mediante Libre Designación. Tamén rexeitamos a figura de persoal directivo. O SXT di que está xustificado, polo que non acepta a nosa petición.
Dende o ano 2011 houbo 12 traballadoras e traballadores declarados indefinidos por cesión ilegal. Nada en contra de quen defende os seus dereitos. Pero esiximos as cabezas e responsabilidades patrimoniais das persoas que polos seus actos ou omisións son causantes de que ano tras anos teñamos sentenzas por cesións ilegais. Hai que incorporar as sentenzas á RPT, pero non pode continuar isto no futuro. O SXT non asume ningunha responsabilidade.
Defendemos que se cumpran as sentenzas e se adscriban as persoas a postos de persoal laboral e coa titulación correspondente, algo que non podemos verificar co breve extracto que nos aportan, polo que reclamamos as sentenzas completas.
Solicitamos información da situación de ocupación dos postos que amortizan. Aseguran que son todos eles vacantes sen ocupación.
Reclamamos equiparar Lugo con outras localidades, mediante a creación dun negociado.
Advertimos dun erro na creación dun posto por execución de sentenza do concurso de traslados do persoal laboral.
O SXT non acepta o incremento de niveis proposto por outro sindicato, xa que iso implicaría máis amortizacións de postos para financialo.
Convocarán máis xuntanzas pola RPT. Mesmo informa que van traer a RPT completa. É dicir, que isto vai para longo.
- Detalles
O día 17 de decembro de 2020 reuniuse a Comisión de Seguimento do Acordo dos Axentes Ambientais/Forestais para a sua constitución.
A maiores da constitución da comisión, tratáronse os seguintes asuntos:
- Solicitase o pase á segunda actividade do persoal que teña feitos os 60 anos. No primeiro trimestre do ano 2021 enviarán borrador de acordo de 2 ª actividade ás organizacións sindicais para que estea resolto antes da campaña do 2021.
- Solicítase a negociación das condicións de traballo dos compañeiros e compañeiras que están a traballar no Parque Nacional Illas Atlánticas. No primeiro trimestre iniciaranse as negociacións para ter rematado nese mesmo ano.
- Solicítase a creación dun grupo de traballo para elaborar o regulamento de funcións da nova escala de axentes técnicos en xestión ambiental.
- Orde de horarios. Solicitase que manden uns cadrantes homoxéneos para toda Galiza e se envíen a comisión de seguimento para revisalos. O director xeral de Función Pública solicita que se envíen as propostas por escrito cos erros detectados. E nos meses de xaneiro ou febreiro teremos unha segunda reunión para para tratar os detalles da orden.
- Coeficientes redutores. A consellería de Facenda enviou varios escritos ao Ministerio para solicitar que se incluíran na lexislación do Estado.
- Pídese un terceiro mes de período extraordinario en MA para poder atender a vixilancia de caza e Pesca. Insistese que é necesario regular o horario nocturno para poder atender o furtivismo.
- Solicitase unhas instrucións claras para a certificación de produtividade e dietas homoxénea en toda Galiza.
- Solicitase a modificación da rpt de Medio Rural para adaptar os niveis actuais, solicítase que se o persoal de Lourizán se lle aplique a suba de niveis.
- Detalles
Función Pública achegáranos fai unhas semanas o borrador da relación de prazas que pretendían ofrecer ás persoas que superaron os procesos selectivos de auxiliar de enfermería-IV-003 (promoción interna e cambio de categoría) e camareiro/a-limpador-V-001 (acceso libre e promoción interna).
A referida relación de prazas non viña acompañada de ningún tipo de información adicionalo, como o tipo de destino (provisional ou definitivo) ou os criterios seguidos á hora de seleccionar as prazas.
A resposta da CIG foi:
- Que informen o tipo de destino. A xuizo da CIG, debe ser provisional xa que non existe un concurso de traslados previo.
- Supoñendo que se trata dun destino provisional, que oferten todas as vacantes, agás aquelas que teñan algún impedimento legal.
- Que en todo caso, os criterios, sexan ou non conformes co parecer da CIG, sexan aplicados por igual aos postos que estean nas mesmas condicións, evitando discriminacións entre uns e outros.
O mércores pasado recibimos a resposta de Función Pública. O destino será provisional e fixan os seguintes criterios:
Prazas para auxiliar de enfermería: necesitan 40 prazas, non teñen ningunha vacante sen ocupación, non teñen prazas ocupadas por persoal temporal de menos de 3 anos, así que botan man de prazas ocupadas por persoal temporal de menos de seis anos. Total, que ofertan 45 prazas.
Prazas para camareiro/a-limpador/a: necesitan 125 prazas, e coas ocupadas por persoal de menos de tres anos non lles chegan, polo que tamén botan man das ocupadas por persoal temporal de menos de seis anos, ofertanto así 162 prazas.
A CIG non comparte estes criterios, pero unha vez fixados, teñen que aplicalos a todos os casos por igual. Se sabes dalgún posto que non cumpre, contacta coa CIG.
- Detalles
No DOG do 16 de decembro de 2020 sae publicado o prazo de presentación de solicitudes para a segunda actividade no ano 2021. Poden solicitar o pase á segunda actividade as traballadoras e traballadores fixos e temporais das categorías de bombeiros/as forestais que fagan ou teñan feitos xa no ano 2021 os 60 anos de idade, que non estean acollidos á xubilación parcial e que se comprometan a xubilarse á idade legalmente establecida ou, de seren maiores de 65 anos, no prazo dun ano despois de concedida a segunda actividade.
Para os efectos do pase á segunda actividade, as persoas interesadas terán que solicitar no modelo do anexo II os postos de traballo que figuran no anexo I dese anuncio dos centros situados dentro da súa comarca de adscrición. De non haber postos dentro da súa comarca, poderán solicitar simplemente o pase á segunda actividade para realizar tarefas preventivas ou de apoio loxístico ao Servizo de Prevención e Defensa contra
Incendios Forestais sen vinculación directa á extinción de incendios, ben que tamén poderán pedir voluntariamente postos do referido anexo situados noutras localidades e, mesmo, adscrición a comarcas ou distritos distintos daquel en que prestan servizos.
As solicitudes (anexo II) deberán ir acompañadas do compromiso de xubilación (anexo III) e remitiránselle á Consellería do Medio Rural, que será a competente para realizar a proposta de adscrición a segunda actividade á Dirección Xeral da Función Pública, que é a competente para resolver todas as solicitudes presentadas.
Para os efectos de resolver as adscricións á segunda actividade, terá preferencia quen teña destino definitivo no mesmo ámbito, a seguir quen teñan destino provisional e, por último, quen teña o destino definitivo noutro ámbito. No caso de empate dentro das persoas integrantes de cada un dos tres grupos sinalados anteriormente, terá preferencia na localidade quen teña máis antigüidade e, se persiste o empate, resolverase a prol de quen teña maior idade.
- Detalles
Ten a cualidade de estar en dous estados á vez na mesma mesa de negociación sendo empresa e parte social, representando á Xunta e aos seus funcionarios.
No 1935 o físico Erwin Schrödinger formulou un dos paradoxos máis famosos da ciencia a través dun experimento coñecido como o “Gato de Schrödinger” onde para dar cumprimento aos postulados da mecánica cuántica o gato tiña que estar vivo e morto á vez.
Esta cualidade resulta que tamén a ten o SEPGA. Xa describimos aquí ou aquí como os membros de SEPGA participan nas negociacións dende un e outro lado da mesa. Foilles dado o don da ubicuidade, unha propiedade cuántica é tamén o vello soño do nacionalsindicalismo, agrupar nun sindicato vertical a patróns e obreiros, que é sublimado no SEPGA.
Todo isto vén a conto porque un membro da Xunta de persoal funcionario de Pontevedra, delegado sindical do SEPGA, vén de ser nomeado en libre designación xefe territorial da Vicepresidencia Segunda e Consellería de Economía, Empresa e Innovación.
Queren facernos crer que ser membro deste sindigato cuántico implica, segundo eles, que non van ter ningún tipo de problema para compatibilizar a acción sindical co novo cargo directivo.
Pero para nós é evidente que SI, e que na Xunta de Galiza, que está fóra do mundo das partículas subatómicas, quen ostenta a titularidade dun órgano de dirección da Administración xeral non pode ser delegado sindical. Así que lle desexamos sorte a este compañeiro e lle esiximos a súa demisión como delegado sindical.
- Detalles
A CIG, xuntamente coas restantes organizacións sindicais,, sempre instaron de Función Pública que para a cobertura das vacantes de persoal laboral houbese un criterio unificador para todas as consellerías, de xeito que, en primeiro lugar, se ofertasen en adscrición temporal, posteriormente en traballos de superior categoría e, por último, se recorrese ás listas de contratación temporal.
As adscricións e as superiores categorías posibilítanlle ao persoal laboral superar, minimamente, a parálise na convocatoria dos concursos de traslados e dos procesos selectivos de promoción interna.
A Consellería de Política Social convocou neste ano, en adscrición e superior categoría, as vacantes da direccións dos centros sociocomunitarios de Tui, Corcubión, Santa Comba, Mondoñedo.... Sen embargo, para a cobertura da vacante do dirección do Centro Sociocomunitario de Bouzas, a Xefatura Territorial de Vigo de Política Social obviou este criterio xeral; saltouse a oferta en adscrición e superior categoría e ofertou a vacante ás listas de contratación temporal.
Curiosamente, a persoa que ocupaba o 1º lugar para o chamamento da lista de vacantes é moi coñecida dos altos cargos do PP que viñeron ocupando postos de delegadas territoriais da Xunta de Galiza en Vigo, tanto de Lucía Molares como de Corina Porro; máis aínda, esta última foi convidada ao casorio da contratada.
Ás listas de contratación son públicas e todos coñecemos como está a orde de prelación. Polo tanto, quen ten mando en praza pode saltarse o criterio de adscrición e superior categoría e caciquear cos contratos de traballo.
- Detalles
Levamos varias semanas en que o DXFP é o primeiro en levantarse de todas as xuntanzas e mesas ás que el mesmo nos convoca aos sindicatos. E faino tan de súpeto, que quedamos parvos, sen marxe de reacción e coa palabra na boca, sen poder facerlle preguntas ou trasladarlle queixas.
El, quen ata o de agora presumía de respostar a todas as cuestións que as organizacións sindicais lle solicitabamos nas xuntanzas, pese a que á CIG en infinidade de ocasións non nos dou contestación ás preguntas feitas, sorprendeunos agora a todos e todas coa súa nova faceta de “fuxido”. Moito nos tememos que na próxima reunión nos teña desactivado o micro ao resto dos participantes e que el apareza agochado debaixo da mesa ou detrás dunha porta.
Non sabemos se é que sabe algo que non quere soltar, se ten medos ocultos, ou se simplemente manifesta ter remordementos de conciencia pola súa nefasta xestión no cargo que lle impiden respostar ás cuestións.
O certo é que, por lei, os sindicatos, en exercicio do noso papel de representantes dos traballadores e traballadoras, temos dereito á información, e as partes estamos sometidas ao principio de boa fe negocial. Por esas razóns, ata o de agora o DXFP non tiña problemas en respostarnos ás cuestións que lle manifestabamos nas mesas de negociación (ainda que demasiadas veces facíao daquela maneira, facéndose o avión, contándonos unha película ou desculpándose cun “erro miño”).
Parece que as musas non bendeciron a este director cos dons da oratoria ou da locuacidade, polo que agora vaise limitar a contestar só ás preguntas que se lle fagan por escrito. É isto poñer pedras no camiño? Quere impedir o dereito dos empregados públicos a ter información veraz sobre os asuntos que lles afectan? Ou oculta algo?
Semella que o director ou nos quere máis burocratizados aos sindicatos ou, sendo mal pensados, a súa pretensión é non deixar pegada da súa inoperancia nas actas das mesas de negociación, adoptando a decisión salomónica de só respostar ás cuestións que previamente lle presentemos por escrito.
- Detalles
A Xunta ten que protexer ao seu persoal fronte a Covid, identificando ao virus como risco biolóxico do grupo 3 nas Avaliacións de riscos laborais.
Entra en vigor a Orde TES/1180/2020, do 4 de decembro, por la que se adapta o Real Decreto 664/1997 coa incorporación do Sars-Cov-2, responsable da Covid 19, como risco biolóxico de grupo 3 na lexislación laboral.
Na CIG demandamos a necesidade de adaptar as Avaliacións de riscos laborais ao risco biolóxico da Covid 19, xa que o 3 de xuño a Directiva (UE) 2020/739 xa establecera unha categoría de risco de contaxio máis elevada que a prevista nas Avaliacións que estaba a realizar Cualtis. Os seus efectos son, por exemplo, a identificación de a qué postos e cando se ten que proporcionar máscaras FPP2 ou establecer maiores medidas fronte aos aerosois.
Así tamén o constatou a inspección de traballo en varios requirimentos e resolucións, ante as denuncias da CIG á Xunta, onde indica "[..] debe atenderse a sua clasificación como AB do grupo 3, ante a modificación aprobada pola Comisión Europea [..]".
A consideración do axente biolóxico nun ou noutro grupo responde a capacidade infecciosa, segundo o criterio de capacidade que ten o virus para acusar unha enfermidade e a súa gravidade, a posibilidade da sua propagación e que exista ou non unha profilaxe ou tratamento eficaz. En definitiva, esta declaración, é a que serve para determinar as medidas preventivas e de protección dos traballadores contra os riscos para a súa saúde.
A pesar do anterior a Xunta fixo caso omiso pasando por riba sen escrúpulos do deber de protección do seu persoal fronte este risco laboral e do principio de precaución que o rexe.
Agora non lles queda outra: o 10 de decembro de 2020 incorporouse á normativa laboral directa coa modificación do anexo II do Real decreto 664/1997, de 12 de maio, sobre a protección dos traballadores contra os riscos relacionados coa exposición a axentes biolóxicos durante o traballo. Así o termo «Coronaviridae», con clasificación no grupo 2, substitúese polos seguintes termos e clasificación no 3: “Coronaviridae (F) Betacoronavirus (G) Coronavirus del síndrome respiratorio agudo grave (SARS-CoV) Coronavirus del síndrome respiratorio agudo grave 2 (SARS-CoV-2)(1) ..”
En conclusión, a Xunta ten que modificar e elaborar urxentemente adecuadas Avaliacións de riscos laborais dos centros de traballo cos seus protocolos ou plans para establezan as medidas preventivas reais ao risco do virus da Covid 19 (grupo 3).
- Detalles
Vai xa para un ano, cando a Xunta de Galiza nos facilitou o famoso "buzón" de postos vacantes para o concurso xeral, retirou varios deles coa desculpa de que se ian amortizar. Xa daquelas a CIG non o creu, pois entre os postos que retiraban estaban varias xefaturas de sección.
Durante a negociación, a CIG solicitou que se incluíran todos os postos que estaban vacantes. A Xunta, a través da súa Dirección Xeral de Función Pública, non aceptou a proposta da CIG, argumentando que os postos a amortizar non podían saír no concurso xa que terían problemas se adxudicaban postos que no medio do proceso eran eliminados. Función Pública responsabilizaba as distintas consellerías, axencias ou entes públicos da decisión de cubrir ou amortizar as prazas. Ata podemos comprender a súa lóxica.
En plena negociación da relación de prazas vacantes a convocar no concurso, atopamos cunha sección que retiraban por proposta de amortización e que para sorpresa de todos e todas, estaba ofertada para cobertura mediante Comisión de Servizos. O posto foi o PXA110000215770077, denominado “xefatura de sección no centro de destino Axencia para a modernización tecnolóxica de Galiza (AMTEGA)”.
A Xunta, mófase do seu persoal
A CIG amosoulle o seu malestar aos negociadores de Función Pública, pois non é lóxico que oferten en Comisión de Servizos un posto que retiran do concurso de traslados porque din que o van a amortizar.
Isto é unha insensatez por parte da Xunta, xa que as Comisións de Servizo, entre outras motivacións, teñen que ser por imperiosa e urxente necesidade de cobertura, estar vacantes e dotadas orzamentariamente.
A CIG exixíulle explicacións a Función Publica e o único que nos dixeron foi que era AMTEGA, neste caso, quen dixo que se ia a amortizar o posto, e que de momento non o fixo.
Nesa relación de postos vacantes tamén se retiraron a praza PXA20000215770013, denominada xefatura de sección de xestión económica no centro de destino Axencia de Turismo de Galiza (ATURGA), polo mesmo motivo que o anterior, amortización. E cal foi a nosa que fai uns días tamén saíu ofertada en comisión de servizos.
Esta praza tíñana reservada para un amigo adecuado que non chegou ata uns meses despois de publicar o concurso. Por iso con esta praza non foron tan descarados como coa primeira. Isto é un pitorreo.
Rematamos dicindo que a CIG, a maiores da denuncia pública, vai ir ao xulgado para facer valer a normativa, ante esta desvergonzaría de Función Pública, que é a que autoriza a cobertura por comisión de servizos dos postos das distintas consellerías, axencias e demais entes públicos que fan trapalladas e pisan as normativas sobre este tema para reservar as mellores prazas de concurso para cando apareza un amigo adecuado.
