- Detalles
A CIG apoia en solitario o Acordo de teletraballo na Administración galega. Esta nova regulación dá carpetazo ao lesivo acordo de teletraballo asinado en 2013 e 2014 por CCOO, CSIF e UGT. Durante a negociación conseguimos introducir flexibilidade a todas as limitacións propostas por Función Pública.
A regulación anterior nacera obsoleta. Era un acordo discriminatorio e excluínte que restrinxía o teletraballo a practicamente unhas poucas escalas e a algunhas “elites”, sendo anecdótico para a maioría do persoal empregado público. Na conxuntura actual, e premidos polas circunstancias sanitarias, a Administración veuse obrigada a formular unha nova regulamentación do teletraballo.
Partiamos duns posicionamentos moi enfrontados nos que a proposta inicial da Administración era seguir a excluír do teletraballo a certos colectivos de traballadores/as como fixera no anterior acordo. Toda a negociación virou darredor desa pretensión. Na negociación do anterior e do actual acordo, a CIG defendeu un modelo de teletraballo garantista e aberto para todas as persoas empregadas públicas que polas súas tarefas e funcións puidesen acollerse a esta modalidade de prestación do servizo.
Pese a que a Administración semellaba non querer dar o seu brazo a torcer, dende a CIG formulamos redaccións alternativas para a eliminación de raíz de calquera referencia á exclusión de inicio de colectivos concretos.
A nosa loita non foi baldía. Con este acordo conseguimos poñer fin a unha das principais eivas do anterior acordo ao abrir a posibilidade do teletraballo a todas as persoas que poidan realizalo. Incluíndo corpos, escalas e colectivos que a Xunta quería excluír enteiros, para os que queda aberta a porta para que, motivadamente, poidan acceder ao teletraballo.
A nova norma é de aplicación á Administración xeral, organismos autónomos, axencias, entidades públicas empresariais e consorcios autonómicos. Tan só quedan fora as sociedades mercantís públicas e as fundacións do sector público autonómico, que terán que negociar a súa propia regulación.
Partiamos dunha proposta inicial da Administración que incorporaba excesivas autolimitacións que inclusive impedían á Administración adaptarse ás súas propias necesidades segundo as circunstancias. No proceso de negociación foron mudando as cousas, pois conseguimos meter algún tipo de flexibilidade a todos os límites e vetos, de xeito que todos eles poden ser superados.
| PROPOSTA INICIAL DE FUNCIÓN PÚBLICA | TEXTO FINAL APOIADO POLA CIG |
| COLECTIVOS QUE PODEN TELETRABALLAR | |
| Relacionaba unha serie de colectivos aos que en ningún caso se lles permitiría o teletraballo | Xeneralízase o teletraballo aínda que manteñen excepcións por entender a Administración que certas funcións e tarefas son incompatibles co teletraballo. Pero inclusive nestes casos pode autorizarse se está suficientemente motivado. Esta autorización permitirá aos postos ou colectivos que en determinadas épocas do ano requiren traballo presencial a teletraballar durante os períodos nos que non estean sometidos á incompatibilidade |
| A PRESENZA FÍSICA OBRIGATORIA | |
| Esixía en todos os casos a presenza diaria mínima do 40% do persoal dun órgano ou centro | Manteñen o 40%, pero esa porcentaxe pode ser inferior se está suficientemente motivado |
| Todo o cadro de persoal da unidade tiña que prestar servizos de forma presencial simultaneamente un día de cada semana (o día do contaxio) | O titular do centro poderá (ou non) dispor que un día da semana, da quincena ou do mes, todo ou parte do persoal preste servizos presencialmente |
| XONADAS MÁXIMAS MENSUAIS DE TELETRABALLO | |
| Limitaba o teletraballo a un máximo do 50% das xornadas mensuais, sempre | Segundo os datos de FP, actualmente o 80% das persoas que teletraballan fano 1 ou 2 días á semana (menos do 20% supera o 40% das xornadas). Coa redacción final do Acordo fixan un máximo do 50% das xornadas mensuais, pero esta barreira pode ser superada se está suficientemente motivado |
| ANTIGÜIDADE REQUIRIDA | |
| Para conseguir autorización era necesaria unha antigüidade de dous anos no posto de traballo para o que se solicita o teletraballo ou experiencia en postos con funcións e tarefas análogos aos do posto de traballo | A antigüidade requirida pasa a ser de un ano en postos con funcións e tarefas análogas. Permítese que sexa menos se hai un correcto coñecemento das funcións a xuizo da persoa supervisora. |
| HORARIO DE TELETRABALLO | |
| Impoñía un horario de referencia de 9 a 14:30 h. para as persoas teletraballadoras con flexibilidade por conciliación | Mantense o horario de referencia, con carácter xeral, de 9 a 14.30 h., para garantir o dereito efectivo á desconexión dixital da persoa teletraballadora, da supervisora e demais persoal dos órganos. Pero aínda así permiten realizar un horario diferente mediante acordo no plan individual de traballo |
| CONTROL SINDICAL | |
| O papel da representación sindical do persoal limitábase ao coñecemento dun informe anual. Xa que logo, non existía ningún tipo de control que vixiase a aplicación do teletraballo. E como sempre, para chantaxear, só para as organizacións que asinasen o acordo | Mensualmente comunicarán as autorizacións e as denegacións aos sindicatos con presenza na Comisión de Persoal (CIG, CCOO, CSIF e UGT). E entregarán as motivacións das denegacións aos sindicatos que asinan o acordo. A CIG mantén a defensa de que todas as organizacións sindicais máis representativas formen parte das comisións de seguimento, pois rexeitamos que utilicen isto como chantaxe. |
| VIXENCIA DO ACORDO | |
| Vixencia indefinida. | Propuxemos, e aceptaron, limitar os efectos a tres anos, prorrogables, de xeito que poidamos denuncialo e renegocialo se non funciona correctamente. |
A maiores, queremos subliñar que no Acordo xa se contempla un réxime especial de teletraballo, que permitiría estender esta modalidade de traballo a situacións de violencia de xénero, vulnerabilidade, obras ou traslados de instalacións, ou emerxencias climáticas, sanitarias (como a actual polo COVID) e outras.
Para rematar, non estamos ante unha simple actualización da anterior normativa de teletraballo do ano 2013. Estamos ante un cambio de modelo pola extensión dunha nova forma de traballo e pola futura aplicación do traballo por obxectivos aínda inexistente. O proceso requirirá a dixitalización dos expedientes, a supresión do papel,.. e un tempo de experimentación que pode ser positiva ou que requirirá renegociar as condicións dentro de tres anos.
Dende esta ligazón podes descargar o texto final do Acordo de teletraballo
- Detalles
Entre o venres 6 e o mércores 11 de novembro tivemos tres reunións co director xeral de Función Pública, principalmente para falarmos sobre o teletraballo (vai ir noutra nova), pero tamén de moitos outros asuntos que poden ser do teu interese.
Concursos de traslados
Do de corpos xerais, unha vez máis seguimos sen información concreta interesante, máis que están coa lista de persoas admitidas/excluídas case rematada. Non temos previsión, pero a cousa pinta que vai para moi lonxe polas interferencias que ten cos procesos selectivos paralizados polo COVID.
Dos demais concursos, nin unha palabra. Como moito, o DXFP xustifica o atraso do de persoal veterinario (enviaran o borrador en xaneiro/2020) nalgunha proposta pendente de modificación de RPT, pero sen compromiso algún.
Persoas que superaron a promoción interna de corpos xerais e participaron no concurso de traslados
Por fin se molla e nos di algo firme: quen obteñan posto no concurso de traslados, tomarán pose do mesmo no grupo dende o que concursaron; e esto será simultáneo (fala de un día de diferenza) á toma de pose de destino definitivo da promoción interna. Quen no concurso obtivese posto aberto ao grupo superior, xa se quedaría no mesmo na elección de destino definitivo. Os demais terían que escoller destino definitivo.
Eleccións de destino pendentes dos procesos selectivos de corpos xerais
- Será destino provisional. Probablemente neste mes de novembro.
- O DXFP opta por esta orde de elección: A1-P.I., A2-P.I., A1-libre, A2-libre, C2-P.I., C2-libre. A CIG propón que sempre escollan primeiro as persoas de promoción interna, e existindo prazas abertas a A2 e C2, entón defendemos a seguinte orde: primeiro todas as de P.I. (A1, A2, C2), e a continuación todas as de libre (A1, A2, C2). O DXFP non comparte a postura da CIG pero comprométese a revisar as implicacións que tería a proposta da CIG.
- En canto ás prazas a ofertar, temos controversia. Algún sindicato opta por non ofertar as ocupadas en comisión de servizo, outros en non ofertar as ocupadas por persoas interinas dunha antigüidade determinada. A CIG defende que no destino provisional se oferten todas as vacantes que non teñan algún tipo de impedimento legal. Pero en todo caso, que o criterio que se aplique sexa o mesmo en todos os casos (todo o persoal interino ou en comisión de servizos que estea en circunstancias similares, ten que estar en igualdade de posibilidades de manter ou perder o posto que ocupe). E o que parece que vai ser é que segundo o caso, e con idénticas condicións, uns postos sexan ofertados e outros non.
- Enviarán un novo listado de postos cos criterios que decidan aplicar.
Prórroga das comisións de servizo
A norma de aplicación fala de que esta forma de cobertura temporal de postos de urxente necesidade é por un ano, prorrogable por outro máis. Cando o concurso de traslados parecía que estaba a piques de saír do forno (xa choveu), os sindicatos asumimos a decisión de Función Pública de prorrogalas ata rematar o concurso. Pero vai xa demasiado tempo, e moito máis que pode faltar (como dixemos, a cousa pinta que vai para lonxe). Así que preguntamos ao DXFP pola súa intención de manter ou non as prórrogas. Non quere tomar decisións, contándonos que o están a valorar e xa nos contarán.
Procesos selectivos pendentes e Oferta de Emprego Público-2020
O director de FP non acaba de darnos unha previsión para a reactivación dos procesos pendentes. Mantén que están en contacto permanente coas autoridades sanitarias, pero nada. Manteñen en FP que avisaran aos sindicatos da reactivación dos procesos con un mes (ou catro semanas) de antelación.
O Presidente da Xunta declarou á prensa o xoves 12 que o máis probable era que no que resta de 2020, non haxa exames de oposición. Os sindicatos non temos comunicación oficial.
En canto á Oferta de Emprego Público-2020, asegura que en dúas semanas estaremos negociándoa. Limítase a dar informacións moi superficiais. Na rolda de prensa do xoves 12, o Presidente da Xunta deu algúns datos numéricos á prensa (datos que ainda non trasladou aos sindicatos para negocialos). Fala de 2.741 prazas, das que 2.346 serían de acceso libre e 395 para promoción interna. Das de acceso libre, 1.215 corresponderían a procesos de estabilización e consolidación de prazas do Consorcio de I+B. Veremos como concretan a cousa.
Consorcio I+B
Neste mes de novembro negociariase e adaptariase os estatutos, e na OEP-2020 irían as prazas de estabilización+consolidación.
CIXTEC e AMTEGA
Asegura que o Cixtec estará integrado en Amtega en 2-3 meses, cos estatutos modificados e a RPT de Amtega adaptada (os sindicatos aínda non temos a documentación). A funcionarización do persoal laboral fixo sería máis adiante (non hai concreción). Este proceso implicaría a negociación da RPT completa de Amtega.
A carreira profesional do persoal do Cixtec quedaría para unha vez integrados, e xa coas mesmas condicións que o resto de persoal de Amtega.
A maiores, os catro sindicatos con presencia na Comisión de Persoal (CIG, CCOO, CSIF e UGT) votamos o mércores 11 en contra da proposta de modificación da RPT de Amtega, consistente na apertura dun posto á adminsitración local. Din que por ser un posto de difícil cobertura. Seguro que o nome e apelidos da persoa que queren colocar no posto xa está escrito nalgún papel xunto coa documentación xustificativa da proposta.
Carreira profesional
A convocatoria que tiñan que publicar no segundo semestre do 2020 vai con atraso por mor dos orzamentos. Teñen moi caladiño o que vai pasar no 2021. Alguén se atreve a apostar?
Reformas lexislativas no emprego público
Está prevista unha xuntanza o venres 13 para falarmos sobre as modificacións da Lei do emprego público de Galiza mediante a Lei de medidas do ano 2021. Din estar abertos a recibir propostas (veremos).
Decreto de provisión
Foi aprobado en Comisión de Persoal fará un ano, e xa conta con informe do Consello Consultivo. Porén, continúa sen ver a luz. Pero que présa van ter, se mentres sigamos así van manter os postos de “concurso específico” ocupados por quen lles pete!
Funcionarización do persoal laboral fixo (de quenes xa se examinaron)
Contan rematar o proceso no primeiro trimestre do 2021. Esperamos ter antes a sentenza do conencioso-administrativo que a CIG interpuxo no 2019 no Tribunal Superior de Xustiza de Galiza contra o acordo de concertación, e así desapareza a chantaxe da carreira profesional que foi o que motivou á maioría do persoal laboral fixo a querer pasar a persoal funcionario para poder cobrar a carreira.
Convocada a Mesa Sectorial de Negociación de Persoal Funcionario
Como curiosidade final, contámosche que despois de máis de unha década sen convocar a “Mesa Sectorial de Negociación do Persoal Funcionario”, e tras anos coa CIG dando a paliza pedindo a súa convocatoria, por fin a convocaron, seguramente porque é o único foro no que ten cabida o sindicato corporativo Sepga. Total, algún que fala dende a bancada sindical, ata fai pouco falaba dende a bancada da Administración.
- Detalles
Función Pública envíanos os buzóns de postos para o acto de elección de destino de Gardacostas derivados dos procesos selectivos da OEP de 2017, para alegacións.
PROCESOS SELECTIVOS AFECTADOS: Orde do 2 de decembro de 2016 pola que se convoca proceso selectivo para o ingreso no corpo de axudantes de carácter facultativo de administración especial da Administración xeral da Comunidade Autónoma de Galicia, subgrupo C1, escala de axentes do Servizo de Gardacostas de Galicia.
PRAZO ALEGACIÓNS: 3 días
- Detalles
Recomendacións para a operación de sistemas de aire acondicionado. ¡Basta xa de oficinas ateigadas sen ventilación!
Fai xa case cinco meses que dende a CIG lle lembramos a Xunta de Galiza as recomendacións que en materia de sistemas de climatización feitas por: ATECYR, REHVA ou ASHRAE ou o Ministerio de Sanidade (https://i.gal/be2Lo) para evitar a propagación do COVID-19.
Aínda así, despois do retorno o traballo presencial atopámonos unha vez mais con oficinas e edificios ateigados de persoal e sen as condicións mínimas de ventilación necesarias para evitar a propagación do virus; especialmente sanguento se consideramos que a maioría dos contaxios danse en espazos pechados, con tempos de exposicións longas e con ventilación inadecuada. Estas situacións producen que a Xunta reduza a capacidade de cines, ximnasios, teatros.... pero non nos edificios da Administración de Galiza.
A todo isto únese a reticencia da Xunta en subministrar mascaras a todo o persoal, a súa insistencia en manter a todo o persoal en traballo presencial, a tardanza en negociar o acordo sobre o teletraballo, a falta de información de contaxios.... Vamos, o caldo perfecto para unha explosión de contaxios.
Ante esta inoperancia e desidia queremos reiterar o noso compromiso coa protección da saúde dos traballadores e traballadora mediante a nosa insistencia de que se apliquen as recomendacións en materia de sistemas de aire acondicionado:
- NON APAGAR O AIRE ACONDICIONADO, xa que o estrés térmico causado por un mal sistema de climatización da lugar a baixada das defensas, que é un risco maior que o de contaxio polo sistema de climatización.
- Revisar as instalacións de aire acondicionado, verificando o seu correcto funcionamento e facendo os axustes pertinentes para adaptalos a esta nova situación.
- Activar os sistemas de aire acondicionado como mínimo 2 horas antes do inicio da xornada laboral e mantelos despois outras 2 horas, continuando logo a un mínimo do 25% do caudal máximo para favorecer a eliminación de partículas infecciosas. Se é posible manter os sistemas funcionando en continuo 24h/7d.
- Aumentar o caudal o máximo posible da instalación, durante as horas de traballo; recoméndase un caudal mínimo de 12,5 litros/segundo/persoa, segundo indica o “Real decreto 1027/2007, do 20 de xullo, polo que se aproba o Regulamento de instalacións térmicas nos edificios” nos apartados IT 1.1.4.2.3 para os locais de tipo “IDA 2: aire de boa calidade” do apartado IT 1.1.4.2.2 no que están tódolos locais da Xunta de Galiza). Manter os maiores niveis de impulsión e expulsións que sexan posibles. Ventiloconvectores e divisores deben funcionar de maneira continua a sua velocidade mínima, para evitar a deposición dos virus.
- Cerrar completamente a recirculación de aire, é dicir, facer que o 100% do aire veña do exterior e non aproveitemos parte do aire interior do edificio para volvelo facer pasar dentro, taxa de renovación de aire do 100%. Os filtros situados nos recirculadores non son quen de reter partículas de virus. Se a instalación o permite, crear zonas limpas dentro do sistema de ventilación illadas das zonas de maior risco como por exemplo a recepción de usuarios.
- Evitar que os sistemas de entrada e extracción de aire nas estancias xeren correntes que propaguen o virus duns traballadores a outros, segundo o establecido no “Real decreto 1027/2007” no apartado IT 1.1.4.1.3. No caso de os ventiladores a saída do aire ten que ser dirixida ó exterior.
- Vixiar fugas naqueles intercambiadores de calor nos que exista separación entre o aire de entrada e o da saída; no caso de que non exista separación (ex: intercambiadores rotatorios) apagalos.
- Abrir as fiestras para favorecer a renovación de aire e a ventilación cruzada de forma periódica, e un mínimo de 15 minutos antes de empezar a traballar.
- Durante o reemplazo dos filtros do sistema de ventilación estes serán tratados como material de risco biolóxico e tomaranse as correspondentes medidas de protección individual (luvas, máscaras, gafas, botas e traxe de protección). Non é recomendable subsistir os filtros por uns de maior filtraxe (mais finos). Non limpar nin manipular os filtros, hai que cambialos.
- Instalar sistemas extra de purificación de aire que reduzan a carga de virus (UV-C, filtración electrostática, xeradores de ións, etc).
- Manter a ventilación dos baños de forma continua e descargar os inodoros coa tapa pechada.
Na CIG seguimos reclamando a convocatoria dos comités de saúde e seguridade laboral, informes dos contaxios nos centros para poder tomar as medidas axeitadas, avaliacións de riscos personalizadas para cada centro e non protocolos de medidas xerais, e a modificación dos plans de prevención de riscos laborais para adaptalos a nova clasificación do COVID-19 (SARS-CoV-2) como patóxeno humano do grupo de risco 3 do anexo III da Directiva 2000/54/CE. Este cambio de nivel que implica que en tódalas avaliacións de risco o perigo do contaxio por COVID-19 esta minusvalorado. A Xunta non pode eludir a súa responsabilidade como garante da saúde e seguridade das persoas traballadoras (Lei 31/1995, de 8 de novembro, de prevención de riscos laborais).
- Detalles
Dende o venres pasado en Galiza a cousa púxose fea en canto aos datos do COVID19 e así:
- Terrazas....NON
- Restaurantes ....NON
- Deporte.... SÓ INDIVIDUAL
- Cidades....CONFINADAS
- Reunións... SÓ CONVIVINTES.
- BUSES.....O QUE QUEIRA MONBÚS. (e os demais).
No DOG do día 4 menciónase expresamente que só os buses con reserva de praza son os que poderán vir ao 100%. Temos que recordar que as decenas de buses que reparten persoal da Xunta por toda Galiza non son servizos con reserva de praza, pois o persoal pode voltar a calquera hora en calquera bus e calquera horario. Xa antes disto advertimos aquí do risco que isto supoñía.
Hoxe, martes 10 de novembro, publica a Xunta a baixada de pantalóns na que "de todo o dito non quero saber nada" e todos os buses xa poden vir ao 100%, obviase a medida da separación de asentos e impleméntanse as grandes medidas (avaladas pola OMS e por todos os expertos virólogos) de NON COMER e NON FALAR nos buses para non contaxiarse.
Temos que lembrar que hai persoal que bota máis de 3 horas!!! ao día nos buses, cheos coma feiras de San Froilán, sen ventilación axeitada e onde o contaxio ten unhas posibilidades moi altas.
E para colmo agora parece que é máis importante rastrexar que evitar o contaxio, ou sexa en vez de diminuír o aforo dos buses, é mellor gardar o billetiño para saber onde estivemos sentados (ou sexa que o da reserva de asento xa se sabe que non) porque así nos rastrexan ben de alí a unha semana.
Hai uns días nun artigo que publicabamos referente ao teletraballo e ao día de reunión obrigatoria de todo o persoal, falábamos do "Día do contaxio"; agora co tema dos buses xa temos que falar do "Infectódromo diario legalizado".
No día de onte, luns 9 de novembro, varias compañeiras de varias liñas interpuxeron denuncias ante Sanidade e a Dirección Xeral de Mobilidade. E a Xunta moveuse rápido para legalizar a desfeita, pero o problema segue; esperamos que non haxa contaxios testemuñados nos buses do persoal, porque entón terase que acudir á fiscalía.
Dende a CIG non sabemos que opinará o Comité de expertos de Sanidade, o que si sabemos que o señor Conselleiro de Sanidade non vai para casa en bus...
- Detalles
No apartado Funcionarización da web de Función Pública están publicadas as listaxes coas calificacións das persoas que participaron nos procesos de funcionarización que tiveron lugar os días 3 e 4 de outubro na localidade de Silleda.
- Detalles
O persoal desenvolveu novas protestas en defensa das súas condicións laborais
As traballadoras e traballadores dos centros de atención directa da Consellaría de Política Social seguiron na mañá do xoves 5 de novembro coas protestas que manteñen dende hai meses en demanda da recuperación dos dereitos laborais recortados coa escusa da crise en 2012 e para esixir uns servizos de atención ás persoas 100% públicos e de calidade. A CIG denuncia ademais a falta de medidas de prevención en moitas destas instalacións, o que está a provocar un aumento de casos de contaxio da covid entre o persoal e as persoas residentes e usuarias.
Algo está a facer mal a Xunta se sete meses despois da primeira onda do virus as residencias continúan a rexistrar altos niveis de contaxio. En concreto, denunciamos que os responsábeis autonómicos se neguan a revisar as avaliacións de risco e a analizar o que aconteceu despois de cada contaxio para que non volva suceder.
- Detalles
Carreira profesional
Polo Acordo de concertación, no segundo semestre do 2020 tiñan que publicar a convocatoria para que aquelas persoas que teñan recoñecido o grao I e conten cunha antigüidade de 11 anos poidan solicitar o encadramento no grao II. Estamos en novembro e non hai novidades. O director xeral di que non pode comentar nada ata falar con Orzamentos.
Concurso de traslados (corpos xerais e veterinarios/as)
- Volvimos a demandar información da situación do concurso de traslados de corpos xerais. Como aconteceu na xuntanza da semana pasada, o director xeral non di nada e escúdase en que está pendente de que lle envíen información a el.
- Preguntamos polo concurso de traslados de persoal veterinario. En xaneiro enviáronnos un borrador da convocatoria ao que presentamos alegacións. Dende entón non se soubo nada máis. O persoal de novo ingreso xa tomou posesión provisional, e non pode ser que estean nesa situación durante anos. Así que queremos que se retome o concurso. O DXFP explica que daquelas (xaneiro-febreiro), unha das consellerías pretendía amortizar moitos postos e modificar a RPT, o que paralizou o proceso. Por outra referencia que fixo posteriormente, podería ser a DX de Saúde Pública.
Elección de destinos
- Corpos xerais: van convocar unha xuntanza para fixar criterios polos postos de corpos xerais A1, A2 e C2 de libre e promoción interna. A elección sería en novembro.
- Gardacostas: para novembro terían a elección de destino definitivo.
Procesos selectivos cos tribunais constituídos e pendentes do primeiro exame
Trasladamos un ruxe-ruxe que anda a circular segundo o cal as autoridades sanitarias pronunciáronse en contra de facer procesos de máis de 1000 persoas, polo que pedimos información. O DXFP nega tal información e manifesta que están en contacto permanente con Sanidade avaliando a situación.
Problemas no acceso a centros de traballo
Denunciamos que delegados/as sindicais da CIG están a ter problemas para acceder a determinadas instalacións da Xunta. Mencionamos casos como Atriga-Ourense, San Caetano ou algún centro de ensino. O DXFP comprométese a interesarse polo asunto e dar resposta.
- Detalles
O director xeral de Función Pública acepta darlle unha volta ás limitacións que se autoimpuxeron, e que impedirían teletraballar a determinados colectivos, que fixan un máximo de xornadas no 50%, que obrigan á presenza do 40% do persoal, ou o requisito de levar dous anos no posto de traballo.
Na xuntanza entre CIG e director de Función Pública, martes 3 de novembro, o primeiro que reclamamos ao director foi que ante a situación de alerta sanitaria, tiñan que potenciar sen máis dilación o teletraballo COVID e a necesidade de que o servizo de prevención adapte os protocolos ás novas evidencias científicas de propagación do virus mediante aerosois.
Trasladámoslle que algunhas consellerías xa de motu propio extenderon o teletraballo con carácter xeral, e insistimos en que esto é unha medida básica para minguar os contactos entre o persoal e, por extensión, o risco de posibles contaxios.
Expusémoslle que non entendíamos as limitacións que se autoimpoñía a Administración. Ao noso ver, a decisión de conceder ou non o teletraballo debe estar en función de se esta modalidade de traballo cubre as necesidades do servizo público. Neste sentido non entendemos que se poñan limitacións a priori, como son:
- A exclusión de determinados servizos.
- Fixar un máximo do 50% da xornada mensual.
- Esixir a presenza física do 40% do persoal.
- Ou requirir unha antigüidade de dous anos no posto de traballo.
O director comprométese a darlle unha volta a esta petición da CIG. Recoñece que teñen a suficiente capacidade autoorganizativa como para valorar cada caso individualmente e, xa que logo, non é preciso poñer límites previos.
En canto ao horario de presenza obrigatoria en teletraballo (de 9 a 14.30), manteñen a súa intención, pero valoran facer matizacións. A ver co que nos veñen.
Defendemos que a representación do persoal ten que ter coñecemento das solicitudes de teletraballo concedidas e denegadas. E volven coa chantaxe habitual de permitir estar na “comisión de seguimento” só ás organizacións sindicais asinantes.
Este asunto vai ir a unha próxima Mesa Xeral de Negociación de Empregados Públicos (xa convocada para o luns 9); en principio irá co borrador que xa temos, pero seguirán as negociacións de cara á Comisión de Persoal onde definitivamente se aprobará o texto.
En canto á situación polo Covid, o director limítase a dicir que:
- Di que están con seguimento diario e contacto permanente con Sanidade, e non descarta ampliar o teletraballo Covid.
- Falarán co servizo de prevención polo tema das novas evidencias científicas da propagación do virus a través dos aerosois.
- Detalles
Publicada no DOG do 3 de novembro de 2020 a resolución da Dirección Xeral da Función Pública, pola que se anuncia a exposición das listaxes definitivas de axudas aprobadas e denegadas dos criterios de repartición do Fondo de Acción Social do exercicio económico 2019, relativos á axuda para a atención de persoas con discapacidade para o persoal da Administración da Xunta de Galicia.
Pódense consultar as listaxes definitivas das axudas aprobadas e denegadas na páxina web da Dirección Xeral da Función Pública http://funcionpublica.xunta.es/?q=FAS.
O Fondo de Acción Social foi un dos recortes derivados da Lei 1/2012, do 29 de febreiro, de medidas temporais en determinadas materias do emprego público da Comunidade Autónoma de Galicia. Esta lei "naceu" inicialmente cunha vixencia temporal de dous anos, pero oito anos despois, os recortes temporais continúan. Desde a CIG continuamos na loita pola derrogación desa lei e por recuperar todo o arrebatado e incrementar as axudas.
