- Detalles
Que hai de certo en toda a información que están a recibir as compañeiras e compañeiros do Consorcio Galego de Servizos de Igualdade e Benestar sobre a fixeza, a indefinición a oferta de emprego, os procesos selectivos, etc?
Se é do teu interese, a CIG-Autonómica convídate a asistir á asemblea que imos ter este xoves día 4 de febreiro, ás 19:30 horas, en directo a través de YouTube. Poderás intervir a través dun chat.
Ollo: YouTube require que te identifiques cunha conta de gmail para poderes empregar o chat.
Lembra que YouTube permite modificar a calidade dos videos. Nós imos emitir a 720 píxeles. Revisa a túa calidade premendo na roda dentada que verás no curruncho inferior dereito da pantalla.
Ir á emisión en directo da Asemblea: https://i.gal/consorcio040221
- Detalles
A Dirección Xeral de Función Pública achegounos un borrador da convocatoria do proceso selectivo para a escala de letrados/as da Administración Autonómica de Galiza. Son 8 prazas (1 para persoas con discapacidade, e 2 para promoción interna), correspondentes á Oferta de Emprego Público do ano 2019.
Temos de prazo para presentar alegacións ata o martes 9 de febreiro. Asi que se tes algo que dicirnos, podes contactar coa CIG.
- Detalles
A CIG solicitou a convocatoria da comisión de seguimento do Acordo de Integración no V Convenio do Consorcio Galego de Servizos de Igualdade e Benestar.
Na Resolución de 8 de xuño de 2017 (DOG 30/06/2017) publícase o Acordo de integración do Consorcio Galego de Servizos de igualdade e Benestar no V Convenio Colectivo Único do Persoal Laboral da Xunta, e constitúese unha comisión de seguimento para velar polo cumprimento do dito Acordo e dirimir todas aquelas cuestións susceptibles de interpretación e/ou negociación.
O día 29 de decembro de 2020 publícase no DOG a Oferta de Emprego Público do ano 2020, no que se recollen prazas do Consorcio Galego de Servizos de Igualdade e Benestar. Algunhas delas están ocupadas permanentemente por persoal temporal dende o ano 2007, que teñen o carácter de indefinido non fixo, e que superaron un concurso-oposición para acceder a postos temporais. O resto das prazas que se contemplan nesta OEP son as creadas e ocupadas entre os anos 2007 e 2017, ambos os dous incluídos.
A CIG insiste en que se negocie a relación de postos de traballo coa identificación correcta das prazas e solucionar as eivas que están a impedir, entre outras cuestións, a baremación das listas de agarda e identificar con claridade cal é a situación contractual de cada posto ocupado na actualidade.
Para tratar estas e outras cuestións que afectan practicamente a todo o cadro de persoal do Consorcio Galego de Servizos de Igualdade e Benestar e, xa que logo, pode causar grande impacto en todo o servizo e nas traballadoras e traballadores solicitamos, con carácter urxente, a convocatoria da dita comisión de seguimento do Acordo.
Dende a CIG informaremos puntualmente de todas aquelas cuestións que se traten e que afecten ao cadro de persoal.
- Detalles
A disposición adicional terceira da Lei 4/2021, do 28 de xaneiro, de medidas fiscais e administrativas publicada no DOG do 29 de xaneiro, vén de modificar, con carácter temporal, o Decreto 37/2006 de listas de contratación nos seguintes termos:
- O período de penalización nas listas para o nomeamento de persoal interino para o desempeño con carácter transitorio de prazas reservadas a persoal funcionario e a contratación temporal de persoal laboral da Xunta de Galicia terá unha duración de seis meses (antes era dun ano).
- A solicitude de reincorporación formulada polas persoas integrantes das listas que solicitasen previamente a suspensión das citacións, por non estaren prestando servizos a través delas, producirá efectos ao día seguinte ao da súa presentación (antes era aos 10 días).
- Estas modificacións estarán vixentes en tanto se manteña a declaración de situación de emerxencia sanitaria de interese galego efectuada polo Acordo do Consello da Xunta do 13 de marzo de 2020.
Por outra banda, da Comisión de Listas de Contratación comunicáronnos que a finais do vindeiro mes de febreiro publicarase a actualización de méritos e a resolución de apertura de listas, así como que poderanse presentar solicitudes electrónicas a partir do 1 de marzo.
- Detalles
A Lei 4/2021, de medidas fiscais e administrativas (disposición adicional segunda) dispón que a situación de emerxencia sanitaria derivada da pandemia da covid-19 constitúe unha causa de forza maior que xustifica, naqueles procesos selectivos convocados ou pendentes de convocatoria ou de provisión que, pola dita causa, non poidan desenvolverse regularmente, a adopción das seguintes medidas:
• A ampliación dos distintos prazos de realización dos exercicios dos procesos selectivos ata que a situación derivada da pandemia permita un adecuado desenvolvemento deles.
• A realización dos exercicios dos procesos selectivos en distintas quendas, con distintos exercicios sobre o mesmo temario, así como a realización dos exercicios en distintas sedes, distribuíndose as persoas aspirantes da forma que determine o órgano convocante dos procesos, sempre que, en todo caso, quede garantido o respecto aos principios de igualdade, mérito, capacidade e publicidade no acceso ao emprego público.
• A fixación de datas alternativas para a realización de exercicios de procesos selectivos a persoas aspirantes que non poidan participar neles na data inicialmente sinalada por estaren cumprindo unha medida de illamento ou en corentena que teñan prescrita por ser persoa infectada por covid-19 ou contacto estreito, debendo fixarse a data alternativa con garantías de non alteración do desenvolvemento normal do correspondente proceso selectivo.
• A ampliación dos distintos prazos para a resolución dos procesos de provisión.
• A posibilidade de alterar a orde de realización das probas dos procesos selectivos.
• A adopción de calquera outra medida, debidamente xustificada, por proposta da autoridade sanitaria autonómica competente.
- Detalles
A EGAP publica no DOG do 1/2/2021 a Resolución pola que se convocan as actividades de formación continua en materia de idiomas para o persoal ao servizo da Administración pública da Comunidade Autónoma, das entidades públicas instrumentais, da Administración institucional de Galiza, da Administración de xustiza, das entidades locais e de administración e servizos (PAS) das universidades do Sistema universitario de Galicia (SUG).
Os prazos para presentar as solicitudes é de dez días a partir do seguinte ao da publicación no DOG.
As solicitudes teñen que facerse dende a URL: https://egap.xunta.gal/matricula
O número máximo de actividades formativas que se poden solicitar limítase a dúas.
Entre os criterios de selección hai unha proba de nivel, tanto en modalidade de teleformación como presencial.
- Detalles
“No segundo semestre do ano 2020, a Dirección Xeral da Función Pública publicará a convocatoria para que aqueles que teñan recoñecido o grado I e conten cunha antigüidade de 11 anos, a través deste réxime transitorio e excepcional, poidan solicitar o encadramento no grao II. [..]”
O parágrafo anterior, é un extracto do apartado referido á carreira profesional do Acordo de concertación do emprego público de Galiza, asinado entre Xunta, CCOO e UGT, publicado no DOG do 28/01/2019, un acordo que a xuízo da CIG foi insuficiente, e como se ve, incumprido.
O texto continúa indicando uns efectos económicos a partires do 1 de xaneiro de 2021 ou 2022 (dependendo do grupo de pertenza). Pero independentemente dos efectos económicos, o encadramento no grao II sería solicitado trala publicación dunha convocatoria nese segundo semestre do ano 2020.
Os acordos que asina a Xunta, sexa con quen sexa, teñen que cumprilos, pero a 31 de xaneiro de 2021 non hai nin convocatoria no DOG nin opción de solicitar o grao II no Portax.
- Detalles
A CIG Autonómica denuncia que Protocolo de intervención do acoso laboral na Xunta non funciona e esixe dar resposta as persoas solicitantes para que se poidan defender noutras vías.
A Xunta abandona as vítimas e non resposta as solicitudes de intervención ante o acoso laboral, peticións que leva ata dous anos de atraso.
Ante a súa propia inutilidade e inoperancia co Protocolo de intervención contra o acoso e outras discriminacións laborais, o que fai a Xunta é aumentar os prazos de un a seis meses. Así que, si un mes “xa era moito” para moitas compañeiras e compañeiros que están a sufrir esta situación, decidiron agora atrasar a seis o prazo para intervir e resolver as peticións de axuda que cheguen ao Comité de Intervención.
Ademais o feito de que “exista o Protocolo” pero non funcione, provoca un bucle de indefensión intolerable. A vía de denuncia e resolución dunha situación de acoso laboral é a prioritaria no caso de denuncia por acoso laboral, sobre a denuncia na inspección de traballo ou o xulgado. Así que, a resposta moitas veces de inspección de traballo é que ten acudir “ao protocolo contra o acoso”.
Ante isto a CIG Autonómica denunciamos a parálise e esiximos á Secretaria Xeral Técnica a reactivación do protocolo e a convocatoria do comité de intervención. Ademais solicitamos que resposte ás persoas solicitantes, ás que manteñen parado o seu expediente, para que se poidan defender no seu caso por outra vía (fiscalía, inspección de traballo ou no xulgado).
En definitiva, á Xunta é cómplice do acoso e dos acosadores e acosadoras, promovendo un sistema torto no que o Protocolo para a prevención, a detección, a actuación e a resolución de situacións de acoso laboral e outras discriminacións no traballo na Administración da Comunidade Autónoma de Galiza é a ferramenta para perpetuar a situación, e en definitiva aumentar o conflito e reforzar ao acosador/a.
Unha mostra máis da actuación da Xunta é a propaganda que fornecen no seu web, cargada de declaracións de boas intencións que non coinciden, na práctica, coa teoría que venden: non teñen intención real de loitar e erradicar esas situacións dramáticas, dantescas e mesmo traumáticas que moitos traballadores e traballadoras da Xunta sofren todas as xornadas laborais, de xeito que para eles/elas, vir a traballar acaba sendo un calvario.
Ante a solicitude da intervención por unha situación de acoso ou discriminación, a Xunta de Galiza nin resposta se chegou, nin acorda medidas cautelares, nin reúnen ao comité de intervención, nin separa preventivamente á persoa acosadora... e ao fin aumenta o conflito no lugar de traballo, abuso, sometemento, terror, acoso, depresión, baixa.. Estas son palabras que soan nestas situacións.
Pode ser o xefe ou xefa, o compañeiro ou compañeira, quen che faga a vida imposible. O caso é que cando se decide a actuar normalmente xa hai un longo percorrido de insultos, menosprezos, ou accións máis maquiavélicas e ben elaboradas por auténticos/as psicópatas, con derivas a baixas longas, intervencións sanitarias por estrés, depresión ou cadros similares. Chegan cun importante esnaquizamento que mesmo bate na súa vida familiar.
En vista do nulo funcionamento do Protocolo, haberá quen xa nin se atreva a presentar os papeliños por rexistro, non vaia ser peor o remedio que a enfermidade. As persoas responsábeis da Secretaría Xeral Técnica da Vicepresidencia primeira e da Subdirección Xeral de Coordinación de Servizos Transversais, poden durmir tranquilas ante esta responsabilidade?
É penoso que nestes tempos que corren sigamos coma naquelas administracións decimonónicas onde había que agocharse ao paso de señor secretario e saudalo cun “muy buenos días tenga usted don Julián, cafelito talvéz?”
- Detalles
Función Pública ven de comunicarnos que o próximo luns 1 de febreiro esta prevista a publicación no DOG da resolución pola que se da publicidade á relación de admitidos e excluídos do concurso xeral de persoal funcionario.
Pero seguen sen darnos conta da solución que lle aportamos aquí para axilizalo. Polo que volvemos a instalos a negociar sobre esa proposta.
- Detalles
A CIG solicita aos grupos parlamentares que se opoñan á modificacion da Lei de emprego público sen respectar a negociación colectiva. O Partido Popular emprega a vía das emendas no debate da lei de reactivación económica que está hoxe, xoves 28, no Parlamento para impoñer a mobilidade forzosa do persoal empregado público da Xunta. Deste xeito a Xunta do partido popular habilítase a si mesma para mover o persoal como lle de a gana, sen negociación previa e sen xustificación.
Para a CIG-Autonómica é unha perversión intolerable do sistema que se carga a seguridade xurídica do persoal e denunciamos que non se trata dun caso illado, senón que a Xunta esta a normalizar a emenda dos seus propios anteproxectos co grupo parlamentario do Partido Popular para aforrar a negociación e evitar que os denunciemos no xulgado. Así xa o fixeron recentemente na lei de acompañamento dos orzamentos 2021 onde modificaron a lei de emprego para permitir o mantemento dos altísimos salarios de directivos na integración de entes na Xunta ou limitar a segunda actividade ao persoal bombeiro forestal.
O emprego desta fórmula de eutoemenda xunto desaparición e das mesas de representación ordinarias mostra que a pandemia esta a ser a escusa do PP para empeorar as condicións de traballo do persoal empregado público.
Para a CIG o fundamental é o reforzo do persoal polas listas de contratación e recordamos que na lei de emprego público xa existen fórmulas para facelo, coma a contratación por acúmulo de tarefas, tanto para o reforzo de persoal como no traslado voluntario. Porén o lóxico é a contratación de persoal polas listas de agarda nos servizos que sexa necesario reforzar, un sistema rápido e eficaz e de responsabilidade social. Logo de máis de dez anos de recortes continuados non temos ningunha unidade onde sobre persoal, senón máis ven a contrario, e a crise social derivada da pandemia necesita duns servizos públicos reforzados.
Pois nin reforzo do emprego nin mobilidade voluntaria. A Xunta do PP opta por impoñer a mobilidade forzosa a dedo e pola porta de atrás creando unha ferramenta máis para abusar do persoal empregado público.
Esta é unha medida máis que se suma á privatización progresiva e implacable dos servizos públicos, produto dunha estratexia elaborada dende hai moitos anos polo PP para desmontar pouco a pouco a xestión directa dos servizos públicos entregándollos a empresas privadas que priman á rendabilidade económica sobre a atención á cidadanía.
A constante entrega ao capital privado da cobertura das necesidades básicas das persoas conleva unha merma de efectivos, a sobrecarga de traballo, o empeoramento das condicións laborais e o consecuente deterioro dos servizos públicos á cidadanía.
Pero para o PP de Galiza isto non é suficiente para sacarlle beneficios económicos e partidistas ao control da administración autonómica. Quere que os minguados efectivos de persoal propio da administración autonómica estean á súa completa disposición. E, para iso, ditan normas que buscan menoscabar a independencia e a obxectividade das persoas empregadas públicas, como a:
- Ampliación das libres designacións e creación dos concursos de traslados “especiais” para decidir arbitrariamente quen debe ocupar os postos mellor remunerados ou de funcións de inspección e control.
- Modificación do sistema retributivo e da promoción profesional para que os responsábeis políticos decidan sobre as condicións económicas e laborais do persoal.
E, tamén, utilizan outra estratexia deseñada dende a dirección xeral da Función Pública, que é obstaculizar dun xeito burdo e descarado os poucos recursos dos que dispoñen as persoas empregadas públicas para mellorar as súas condicións económicas e laborais:
- Negarse a convocar concurso de traslados entre o persoal laboral durante máis de 9 anos, cando o convenio colectivo vixente di que o concurso de traslados debe ser permanente.
- Excluír ao persoal laboral do cobro da carreira profesional senón aceptan obrigatoriamente a funcionarización.
- Non resolver o concurso de traslados dos corpos xerais do persoal funcionario durante meses, despois de convocalo con retraso. Do concurso de corpos especiais nin se sabe.
- Non cumprir ningún dos prazos nin dos compromisos acadados nas negociacións colectivas.
A parálise da xestión de persoal na administración autonómica non é só consecuencia da incapacidade manifesta do director xeral da Función Pública e da falta de persoal é, en definitiva, a estratexia de demolición dos servizos públicos por parte do PP de Galiza e a doma e castración da administración autonómica para poñela ao servizo duns intereses partidistas.
