Novas por contido

A Xunta suspende de novo en igualdade.

A Lei 4/2024, do 8 de novembro, básica de axentes forestais e medioambientais, establece unha obriga específica para as administracións competentes. O seu artigo 14 (Igualdade de xénero), dispón literalmente:

As administracións responsables, de acordo co fundamento de actuación de igualdade de trato entre mulleres e homes do artigo 1.3.d) do texto refundido da Lei do Estatuto Básico do Persoal Empregado Público, asegurarán o cumprimento das disposicións establecidas no marco do citado Estatuto Básico e na Lei Orgánica 3/2007, do 22 de marzo, para a igualdade efectiva de mulleres e homes.

As administracións públicas competentes elaborarán, no prazo máximo dun ano, un plan de igualdade específico para as axentes forestais e medioambientais no que se avalíen e se propoñan medidas concretas en relación cos medios materiais, uniformidade, medidas de conciliación e corresponsabilidade, desigualdades en saúde ou riscos psicosociais, desde a perspectiva de xénero, entre outras.

A lei entrou en vigor o 10 de novembro de 2024 e, polo tanto, o prazo para elaborar este plan rematou o 10 de novembro de 2025. A Xunta leva xa case un ano incumprindo unha obriga legal expresa.

E non se trata so dunha cuestión formal. As axentes ambientais seguen a atopar dificultades reais para exercer os seus dereitos de conciliación nun servizo con quendas, tardes, noites e gardas, así como atrancos nas medidas de protección durante o embarazo e lactación. Non é aceptable que exercer dereitos recoñecidos legalmente obrigue as traballadoras a acudir á vía xudicial polo capricho dunha xefatura.

Pero é que, ademais, facer o plan non é só trasladar a Lei orgánica 3/2007 para a igualdade efectiva de mulleres e homes, senón que cómpre elaborar un plan específico, precisamente porque as condicións de traballo das axentes ambientais, ademais da súa infrarrepresentación presentan singularidades como desempeño do traballo en zonas rurais e forestais, en illamento, con relación directa con sectores fortemente masculinizados e nos que persisten condutas machistas, como a caza, a gandaría, a pesca, o sector madeireiro ou as obras forestais ou de infraestruturas. A isto engádense as intervencións con persoas infractoras da normativa ambiental, incendiarias ou furtivas. Esta realidade laboral debe analizarse dende a perspectiva de xénero, prestando especial atención aos riscos psicosociais e ás posibles situacións de acoso, discriminación ou violencia.

Non abonda, polo tanto, coas medidas xerais de igualdade da Xunta, que son papel mollado e que non serven para nada. Segundo a norma, o plan específico debe incorporar medidas concretas e avaliables de conciliación e corresponsabilidade, protección do embarazo e lactación, saúde laboral, uniformidade e equipamentos, prevención dos riscos psicosociais, promoción profesional e acción positiva para corrixir o desequilibrio de xénero. E non son as únicas escalas onde se deberan aplicar estas medidas, pero, polo menos, teñen a sorte de contar cunha lei básica onde se aceptaron e introduciron as achegas presentadas pola CIG.

Hai administracións que xa están aplicando medidas cuantificables ou incluso que o facían de antes. En Cataluña, os Agents Rurals teñen actualmente un 40 % das prazas reservadas para mulleres nas convocatorias de acceso. É unha medida de acción positiva temporal destinada a acelerar o reequilibrio dun cadro de persoal historicamente masculinizado. E funciona. En 2026, a propia Generalitat sinala que as mulleres xa representan o 22,34 % do corpo, fronte ao 13 % de 2020.

A CIG esíxelle ás consellarías de Medio Ambiente e Cambio Climático, Economía e Industria e Medio Rural, que son as que teñen axentes ambientais, que cumpran inmediatamente o artigo 14 da Lei 4/2024 coa negociación dun plan de igualdade específico para as escalas de axentes ambientais, cunha diagnose propia, medidas concretas, obxectivos cuantificables, prazos e indicadores de cumprimento. Porén, lembramos que aínda que non teñamos plan hai que cumprir as leis de igualdade e conciliación laboral e familiar.

Outras novas recentes

Venres, 13 Novembro 2026

RPT Emprego, Comercio e Emigración (11/11/26)

A Consellería de Emprego, Comercio e Emigración, convocou aos sindicatos a unha xuntanza para falar da súa proposta de modificación da Relación de Postos de Traballo da consellería. Descargar Contactamos coa consellería para pedir explicacións polo feito de que nos convocasen con menos de 48 horas de antelación (restando a xornada de Folga Xeral), o que imposibilita estudar...
Venres, 13 Novembro 2026

Promoción interna de corpos xerais; funcionarización en excedencia; finanzas-veterinarios/as-agacal-gain-intecmar (MSF e MX 10/11/26)

O martes 10, véspera da Folga Xeral, asistimos á Mesa Xeral e Mesa Sectorial de Persoal Funcionario, nas que se trataron as convocatorias de promoción interna a corpos xerais e dos procesos de funcionarización de persoal laboral fixo que está en excedencia. Na rolda aberta de intervencións a DXEP deu información da escala de finanzas, da repesca de funcionarización de...
Venres, 13 Novembro 2026

Promoción interna corpos xerais; funcionarización en excedencia (para CP 17/11/26)

A directora xeral de Emprego Público e Administración de Persoal convocounos a unha xuntanza da Comisión de Persoal que será o martes 17 de  novembro, coa seguinte Orde do día: Convocatoria do proceso de funcionarización para o persoal laboral fixo que está na situación de excedencia. Descargar Convocatoria de promoción interna ao corpo superior-A1. Descargar Convocatoria...