- Detalles
O martes 10 acudimos á xuntanza convocada polo director xeral de Función Pública para tratar a Oferta de Emprego Público extraordinaria obrigada pola Lei 20/21 (temporalidade). Esta xuntanza era inicialmente para o día 4, pero sufriu moitos adiamentos. Tratáronse os criterios da oferta e comezamos coas primeiras alegacións xerais aos listados de postos.
Durante estes días previos na CIG recibimos varios centos de alegacións (máis de 500). O enorme volume de correos que recibimos non nos permitiu respostar individualmente a cada unha delas, pero o noso traballo está feito: as alegacións están mecanizadas na aplicación indicada pola DXFP. Aínda así á Administración quédalle moito traballo por facer, non só por revisar todos os datos pola cantidade de erros que hai, senón porque está pendente que varios entes se poñan as pilas. O tempo bótaselle enriba a Función Pública.
Esto é o que informou o director xeral na xuntanza:
- O que van publicar agora (antes do 1/6/22) é a OEP extraordinaria pola lei 20/21. Deixan para máis adiante a OEP ordinaria do 2022 (a derivada da cobertura de prazas por taxa de reposición de efectivos)
- Nos criterios da OEP non van a entrar na baremación das fases de concurso. Eso quedará para máis adiante. En todo caso a baremación será idéntica para todas as convocatorias do mesmo tipo (distinguindo entre as prazas que van por unha ou outra forma de acceso)
- Definitivamente toman o criterio de 3 meses como o período de tempo máximo para considerar que non hai interrupción na cobertura da praza e no concepto de interrupción do vínculo nas persoas interinas ou temporais. Nas prazas a tempo parcial e prazas de carácter descontinuo non terán en conta o prazo de inactividade
- Os postos que non están en RPT tamén teñen que ir nesta OEP
- As prazas creadas no Spif no ano 2019 provintes de Seaga tamén se incluirán na OEP extraordinaria. Computaráselles o tempo traballado na Xunta e en Seaga (o que non sabemos é como, ata que se negocien os baremos despois da oferta)
- Non penalizarán coa exclusión das listas a quen cobre a compensación económica prevista na lei
- Unha vez aprobada a OEP, resérvanse o dereito a mover a escala daquelas prazas en que se observe un erro, sen que isto poida supoñer alteración no cómputo global das prazas
- Haberá requisito de proba física para certas categorías
- O requisito do galego non aclara se si ou se non, ou se Celga ou se proba, ou se vai ou se ven
- Non se move da data de referencia do 30/12/2021 e non cede en eliminar a observación de “convocados” que exclúe as prazas do listado 1
- O director xeral traslada o seu criterio de que o exame será eliminatorio, sen comprometerse a criterios claros nas convocatorias (nota de corte, proba única e obxectiva, procesos áxiles e tribunais negociados e con representación sindical)
- O destino será provisional con carácter xeral, agás se xa estivera resolto o concurso de traslados da escala correspondente. O persoal fixo e funcionario que xa está na escala terá prioridade para escoller os postos. O destino adxudicado será escollendo segundo a orde de puntuación do proceso
- Ten dúbidas en distinguir a valoración do tempo traballado entre temporal e fixo xa que di que podería producir problemas de seguridade xurídica
- Están dispostos a “modular a puntuación” do tempo traballado distinguindo administración/ entes de forma diferente segundo cada caso. Os criterios e baremos se negociarán conxuntos pero as convocatorias estudaran si propoñen separadas ou conxuntas
Falamos dun asunto que pode ser un atranco: como baremar o tempo traballado
O DXFP afirma que os sindicatos solicitan que se potencie o tempo na propia Administración, pero di que non o ve. Afirma que os sindicatos facemos referencia a sentenzas do Supremo, pero el non a ten, así que solicita que lla enviemos (e que teñen que ser recentes), e tamén as convocatorias doutras administracións. Di que está disposto a valorar ata onde poida chegar, pero sempre garantindo a seguridade xurídica a que se acolle cando lle convén.
Problemas coas titulacións
Observamos como numerosas alegacións aos postos están referidas ás titulacións. Como a Xunta vai convocar as prazas como persoal funcionario hai que fixarse nas titulacións que corresponden a cada escala. Se hai modificacións ou a escala non é a correcta aléganse. Aínda así a Xunta recoñece erros no Consorcio e vai revisar outras. O problema ven cando unha persoa accedeu hai anos e agora mudaron os requisitos ao funcionarizarse a praza e non vai poder acceder.
Esto é produto dunha funcionarización chapuceira, ás bravas. E agora CCOO e UGT si que o ven, e piden solucións a un problema que eles mesmos axudaron a crear.
O Consorcio: Un caso aparte
A xestión do persoal no Consorcio sempre foi desastrosa, e con esta listaxe que traen para a oferta alucinamos aínda máis. Función Publica di que vai revisar os criterios polos que fixeron a listaxe. Teñen que incluír as encomendas entre temporais, completar as eivas, moitas prazas que faltan e non hai ningunha da disposición adicional 8. Aparecen datas de sentenzas en troques da toma de posesión, mesturan creación de prazas con data de ocupación, e tipos de contratos. E aclaramos, que aínda que sexa un contrato de substitución, si é en praza vacante e estrutural xera que esa praza saia a oferta. Segue aberto o prazo para alegar.
A negociación mal ordenada por Función Pública
Na CIG solicitabamos negociar primeiro tendo os datos de todas as prazas vacantes cos criterios da oferta, e de forma conxunta cos baremos, xa que as decisións tomadas teñen efecto bolboreta no resto. Entendemos que esta lei non é boa pero estamos a aportar o noso esforzo para amortecer a discriminación e posibilitar que as persoas que ocupan postos na administración autonómica teñan maior valoración fronte as outras administracións, que ademais si están a baremar diferente puntuando mais o tempo traballado do seu persoal fronte o doutras como concellos, deputacións, AGE, etc.
Sobre os entes instrumentais alegamos numerosas eivas e seguimos traballando nas achegas xa que suceden cousas raras (algunhas que tiñan prazas e de súpeto xa non teñen) e moitas delas ademais non se negociaron con carácter previo cos comités de empresa.
Houbo máis cuestións pero estas son as quedaron mais avanzadas. O venres 13 teremos unha nova reunión e mentres seguiremos atendendo as achegas que recibamos. Podes contactar coa CIG.
- Detalles
No DOG do 10/05/2022 publican a RESOLUCIÓN do 3 de maio de 2022, da Dirección Xeral da Función Pública, pola que se fai pública a relación de persoas admitidas e excluídas con carácter definitivo que solicitaron a inclusión nas listas únicas para a cobertura con carácter transitorio de prazas reservadas a persoal funcionario de determinados corpos, escalas ou especialidades, ao abeiro do establecido no artigo 5.2 da Orde do 20 de xullo de 2021 e a nova valoración definitiva dos méritos de todas as persoas admitidas nas devanditas listas.
Fan públicas as listas definitivas únicas para o desempeño transitorio de prazas reservadas a persoal funcionario dos corpos, escalas e especialidades que se relacionan no anexo desta resolución
As listas poderán consultarse no portal web corporativo da Xunta de Galiza, http://funcionpublica.xunta.gal, epígrafe de <listas de contratacion>; e nas oficinas de rexistro e atención á cidadanía da Xunta de Galiza (oficinas dos edificios administrativos da Vicepresidencia Primeira e Consellaría de Presidencia, Xustiza e Turismo).
As listas entrarán en vigor a partir do día seguinte ao da publicación desta resolución no DOG.
ANEXO
Corpos e escalas de persoal funcionario
| Grupo | Corpo/escala | Denominacion |
| A1 | 205G | Escala de sistemas e tecnoloxía da información |
| A1 | 2060 | Corpo superior da Administración xeral da Comunidade Autónoma de Galicia |
| A1 | 2062 | Escala de enxeñeiros. Especialidade de enxeñaría de camiños, canles e portos |
| A1 | 2064 | Escala de enxeñeiros. Especialidade de enxeñaría industrial |
| A2 | 2051 | Corpo de xestión da Administración xeral da Comunidade Autónoma de Galicia |
| A2 | 205H | Escala de xestión de sistemas de informática |
| A2 | 2077 | Escala de enxeñeiros técnicos. Especialidade de enxeñaría técnica agrícola |
| C1 | 2053 | Corpo administrativo da Administración xeral da Comunidade Autónoma de Galicia |
| C1 | 205I | Escala técnica auxiliar de informática |
| C2 | 2059 | Corpo auxiliar da Administración xeral da Comunidade Autónoma de Galicia |
| 2055 | Agrupación profesional do persoal funcionario subalterno da Administración xeral da Comunidade Autónoma de Galicia |
- Detalles
No DOG do 6 de maio de 2022 publícase a Resolución pola que se convocan para a elección de destino definitivo as persoas aspirantes que superaron os procesos selectivos para o ingreso... de distintas quendas dos corpos xerais, tanto de promoción interna como de libre.
Ao problema de non ofertar todas as vacantes que teñan pasado polo concurso se lle suma agora o de ofertar vacantes que non pasaron polo concurso, entre elas, vacantes con nivel, como xefaturas de sección ou negociados.
Para retorcer isto aínda máis e seguir creando problemas e agravios, Función Pública decide que a orde de elección de destino será a seguinte: A1 PI, A1 libre, A2 PI, A2 libre, C1 PI, C2 PI, C2 libre.
En definitiva, que sobre a natureza do proceso (libre-promoción interna), priman o subgrupo/corpo na elección de destino:e establecen unha orde onde as persoas aspirantes que aprobaron na promoción interna van antes que os de libre do seu mesmo corpo, pero van despois dos aspirantes de acceso libre dos corpos superiores a eles.
Isto non sería un problema se os postos ofertados fosen pechados a cada subgrupo, pero temos moitos postos que están abertos a varios subgrupos. En concreto 189 dos 661 ofertados.
- No caso de postos C1-C2 e C1-C2-AP non tería relevancia pois en C1 non hai acceso libre e en AP, o proceso é posterior e é libre. Pero no caso de postos A1-A2, A1-A2-C1 e A2-C1-C2, si existe un problema na prelación de aspirantes onde a orde de elección intercala libre con promoción interna.
- Por exemplo, no caso dos postos A1-A2 se ofrecen 3 postos de nivel 25, 3 de nivel 24 e 2 de nivel 22. Dous deles en localidades de alta demanda como Ourense, o que significa que compañeiros/as de acceso libre poidan coller, recen chegados e en destino definitivo, unha xefatura de sección en Ourense antes que quen aprobou a promoción interna ao A2.
- En A1-A2-C1 son 16 postos de nivel 25 en Compostela. Sucede exactamente o mesmo que no caso anterior. E o mesmo en A2-C1-C2, con 25 postos de nivel 18.
Como xa dixemos, a isto hai que sumarlle que Función Pública optou por ofertar moitos deses postos que non pasaron polo concurso de traslados.
O que pretenden con esta decisión é trasladar o problema de que se as persoas opositoras dun subgrupo inferior de promoción interna collen postos abertos a un subgrupo superior, as persoas de libre poderían quedar sen prazas. Pero este é un problema que creou Función Pública ao non ofertar todas as vacantes que teñan pasado polo concurso. É doado que as consecuencias da súa incompetencia a paguen as persoas funcionarias.
Como aínda están a tempo de facer unha modificación no DOG, dende a CIG presentamos un escrito en Función Pública e reclamamos que isto se modifique segundo o criterio que sempre expuxemos: que a promoción interna teña preferencia sobre o acceso libre. Isto pode gustar a uns compañeiros e disgustar a outros, pero nós sempre mantivemos que este era a orde lóxica e xusta. Todo o demais o único que causa é agravios e inxustizas. E si Función Pública ten un problema de xestión quen non o ten que pagar son os funcionarios e funcionarias.
- Detalles
O dia 3 de maio tivemos a primeira reunión coa consellería de Medio Rural para a modificación da súa RPT e a do FOGGA. Alí presentamos moitas cuestións á documentación que enviaron ás organizacións sindicais nas que destacamos a destrución de emprego; incluso desmontan a estrutura de traballo para crear unhas raquíticas unidades de investigación forestal ou para crear itinerancias para atender as oficinas agrarias. Na consellería lucíronse coas respostas que nos deron para xustificar este despropósito. Contámosche as mellores “perlas”.
A creación das raquíticas Unidades de Investigación de Incendios Forestais a costa de cargarse as prazas e o sistema de traballo nos distritos
Lembrámoslle o que anunciou o Presidente da Xunta en sede parlamentaria no ano 2017 da creación de 95 postos de axentes ambientais (57 para equipos forestais de investigación e 38 para equipos de vixilancia de incumprimento) que quedou reflectido nas medidas anunciadas após os incendios do 2017. Tráese agora a creación dunha “unidade” para todo o territorio galego en vez das brigadas de investigacións comprometidas no Parlamento. Dos segundos equipos para vixilancia e cumprimento das infraccións, nada se sabe...
O xefe de servizo de Persoal contestou que el non é responsable do que anuncian os políticos no Parlamento Galego. Que tipo de resposta e esta? É esa a opinión do Conselleiro da Consellería de Medio Rural e mesmo do futuro Presidente da Xunta o Sr. Rueda? Queda claro que as promesas do Presidente da Xunta (agora ex-) son contratos en papel mollado.
As oficinas agrarias cubertas con itinerancias: o primeiro camiño cara a extinción do servizo
En canto as Oficinas Agrarias, a Administración deu a sua palabra polo ano 2018 de facer un estudo en profundidade das necesidades destas oficinas. Mais chegan a esta reunión coa idea de crear 4 postos (un por provincia) de xefatura de area para coordinar as oficinas, sen ter en conta que, por lei, para os servizos veterinarios xa ten esa función o Servizo de Gandería de cada provincia, e que para os servizos agrarios esa función está atribuída o Servizo de Explotacións Agrarias. Opoñémonos á amortización dunha gran cantidade de postos para a creación de xefaturas floreiro.
Con esta modificación amortízanse 80 postos de traballo
Aínda así insistimos en que nos facilitasen o estudo das oficinas agrarias que, ou non o fixeron, ou o teñen agochado, ou aportan datos ou algunha xustificación funcional desta “reorganización” que supón a amortización de máis de 80 postos na consellería.
Porén, a subdirectora, na súa única intervención deixou claro que non teñen datos ningún para aportar sobre cargas de traballo e outros datos que poidan ser avaliables, e con elo poder decidir que postos serían en todo caso factibles de amortizar. Salientamos que incluso amortizan postos de nivel cortando a promoción do persoal nun futuro concurso de traslados dos corpos especiais.
Entón se non poden aportar datos, como poden amortizar 80 postos de traballo, moitos deles afectando directamente as estruturas das oficinas agrarias, e outros afectando directamente a estrutura á que se chegou para a prevención e extinción de incendios.
Ou os titulares desta consellería meten man desta RPT ou moito nos tememos que unha vez mais vai implicar unha gran destrución de postos de traballo cun resultado nefasto para os servizos públicos que debe aportar ao rural galego.
RPT do FOGGA
En canto a rpt do FOGGA, expuxemos algúns datos como o de non pechar posto de traballo á titulación de veterinarios (mesmo nalgún posto que o está a ocupar un veterinario e procederían a súa expulsión do posto por non cumprir co requisito), e tamén indicamos que tipo de mérito é que os postos de auxiliar administrativo teñan o permiso de conducir B1. Indicáronnos que ian revisar a rpt e que nos enviarían unha nova proposta modificada.
Quedamos a espera. Agradecemos todas as achegas que nos fagas. Temos ata o día 11 de maio para presentar alegacións. Podes contactar coa CIG.
- Detalles
No DOG do 06/05/2022 publican a Resolución do 2 de maio de 2022 pola que se convocan para a elección de destino definitivo as persoas aspirantes que superaron os procesos selectivos para o ingreso, pola quenda de promoción interna, no corpo superior da Administración xeral da Comunidade Autónoma de Galiza, subgrupo A1, convocado pola Orde do 1 de marzo de 2018 (DOG número 48, do 8 de marzo); para o ingreso no corpo superior da Administración xeral da Comunidade Autónoma de Galiza, subgrupo A1, convocado pola Orde do 1 de marzo de 2018 (DOG número 47, do 7 de marzo); para o ingreso, pola quenda de promoción interna, no corpo de xestión da Administración xeral da Comunidade Autónoma de Galiza, subgrupo A2, convocado pola Orde do 1 de marzo de 2018 (DOG número 48, do 8 de marzo); para o ingreso no corpo de xestión da Administración xeral da Comunidade Autónoma de Galiza, subgrupo A2, convocado pola Orde do 1 de marzo de 2018 (DOG número 47, do 7 de marzo); para o ingreso, pola quenda de promoción interna, no corpo administrativo da Administración xeral da Comunidade Autónoma de Galiza, subgrupo C1, convocado pola Orde do 1 de marzo de 2018 (DOG número 48, do 8 de marzo); para o ingreso, pola quenda de promoción interna, no corpo auxiliar da Administración xeral da Comunidade Autónoma de Galiza, subgrupo C2, convocado pola Orde do 1 de marzo de 2018 (DOG número 48, do 8 de marzo); e para o ingreso no corpo auxiliar da Administración xeral da Comunidade Autónoma de Galiza, subgrupo C2, convocado pola Orde do 1 de marzo de 2018 (DOG número 47, do 7 de marzo).
Publican como anexo I a relación de persoas aspirantes que superaron os procesos selectivos e que, segundo a base IV.6 das respectivas convocatorias, son convocadas á elección de destino definitivo, segundo a orde que, en aplicación das bases das respectivas convocatorias, deberá seguirse para os efectos da adxudicación de destino.
Os postos ofertados e os requisitos exixidos para a súa ocupación figuran como anexo II desta resolución. As persoas aspirantes elixirán as prazas ao subgrupo ao que acceden e de conformidade co indicado no anexo II desta resolución.
Para o acceso á aplicación informática para a elección de destino, a Dirección Xeral da Función Pública remitirá ás persoas aspirantes un correo electrónico co usuario e a clave de acceso á aplicación de cada un dos procesos selectivos.
No prazo máximo de dous (2) días hábiles contados a partir do día seguinte ao da publicación desta resolución no DOG, a persoa aspirante, no suposto de que non recibise correctamente o seu usuario e clave, deberá poñerse en contacto co servizo informático da Dirección Xeral da Función Pública, no teléfono 881 99 98 83, para que se lle faciliten os datos necesarios.
Unha vez transcorrido o prazo sinalado no parágrafo anterior, abrirase un prazo de cinco (5) días hábiles para que as persoas aspirantes que constan no anexo I desta resolución seleccionen telematicamente, a través do sistema electrónico, os destinos ofertados por orde de prelación.
- Detalles
Novo listado enviado dende a Dirección Xeral de Función Pública, o xoves 5 pola tarde.
Esta é a comunicación que recibimos:
Seguindo instrucións da subdirectora xeral de Provisión de Postos e Selección de Persoal, da Dirección Xeral da Función Pública, achégase arquivo Excel coas prazas ofertadas (anexo II) na resolución pola que se convocan para a elección de destino definitivo das persoas aspirantes que superaron os procesos selectivos para o ingreso en A1 Promoción interna, A1 libre, A2 PI, A2 libre, C1 PI, C2 PI e C2 libre, que se publicará mañá no Diario Oficial de Galicia.
As claves para as persoas aspirantes serán enviadas o luns e martes, 9 e 10 de maio.
Desde o 11 ao 18 de maio, inclusive, deberase realizar a elección correspondente.
Seguimos sen recibir resposta ás numerosas alegacións que mecanizamos na aplicación de postos de Función Pública.
- Detalles
A Dirección Xeral de Función Pública enviounos o luns 2 de maio novos documentos referentes á relación de postos de traballo (RPT) do Consorcio Galego de Servizos de Igualdade e Benestar, de cara a unha futura mesa de negociación.
Non hai memoria explicativa, nin económica. Tan só envían un anexo da cal sería a situación final das prazas e unha táboa de equivalencias entre antigos e novos postos (en versión de documento de texto e folla de cálculo).
Temos ata o luns 16 de maio para presentar as nosas alegacións, así que se queres dicirnos algo, faino un pouco antes: contactar coa CIG.
- Detalles
Á espera da xuntanza que vamos ter o martes 10 (corresponde á prevista para o mércores 4 e que foi aprazada varias veces), facemos públicos os últimos listados de prazas que temos (non serán os definitivos):
- Listado 1 (prazas para concurso). Actualizado a 05/05/2022
- Listado 2 (prazas para concurso-oposición). Actualizado a 05/05/2022
- Listado 3 (segundo FP: persoal indefinido non fixo sen RPT). Actualizado a 05/05/2022
- Consorcio (con localidades, categorías e equivalencias). Actualizado a 04/05/2022
- Entes (incluíndo os do ámbito de Medio Rural). Actualizado a 04/05/2022
Función Pública ampliou o prazo para presentar alegacións, que vai ser ata o luns día 9 de maio. Así que podes contactar coa CIG.
Estes novos listados son enviados por Función Pública ou xerados dende a súa aplicación. Advertimos que na CIG temos moitisimas alegacións (centos), e ainda estamos no proceso de verificación e mecanizado cos datos que temos e que nos son facilitados polas persoas interesadas.
- Detalles
O listado de prazas difundido por Función Pública pode non ser definitivo
Nota: ao final do día do mércores 4/5/22, recibimos un novo listado de Función Pública. Fixérono sen acompañalo de ningún comentario, explicación nin sequera resposta ás alegacións que presentamos no seu día por escrito e mecanizadas na aplicación correspondente de Función Pública.
A dirección xeral de Función Pública enviou ao DOG a Resolución que publicarán o venres 6 de maio, relativa á convocatoria de elección de destino definitivo das persoas que superaron os procesos selectivos de A1-promoción interna e libre, A2-promoción interna e libre, C1-promoción interna e C2-promoción interna e libre, da Oferta de Emprego Público de 2017.
Posteriormente enviaron un aviso dun erro na comunicación, sinalando que cómpre eliminar o parágrafo que se achega (último parágrafo do punto oitavo, páxina 3).
“As persoas aspirantes nomeadas persoal funcionario de carreira e adxudicatarias definitivas dos postos de traballo relacionados nesta resolución disporán do prazo dun mes para tomar posesión do seu destino, desde o día seguinte ao da publicación no DOG.”
Nas respectivas resolucións de nomeamento concretaranse os prazos de toma posesión.
Na xuntanza que tivemos co director xeral de Función Pública o venres 29 de abril, este informounos de:
- As tomas de posesión serán en paralelo coas do concurso.
- A partir da semana que ven sairán as resolucións para elixir destino.
- Ao longo do mes de maio enviarán o listado de postos.
- As persoas en provisional xa coñecerán cal é o seu destino na terceira semana de maio.
- Na última semana de maio, ao redor do 30/31 ou 1 de xuño comezará o prazo de toma de posesión.
En canto ás prazas, insuficientes nalgún caso, esto é o que decidiron:
- A1: deciden incluír as vacantes de nivel 20 de toda a Comunidade que non pasaron polo concurso de traslados.
- A2: non chegan as vacantes puras (aquelas non ocupadas por persoal interino) así que ofertarán vacantes cubertas temporalmente con posterioridade ao 1 de xaneiro de 2018.
- C1 e C2: só incluirán vacantes puras.
Función Pública non facilitou ningunha resposta ás alegacións que presentou a CIG, tanto por escrito como mecanizadas directamente na aplicación de postos de Función Pública. Ao día seguinte de rematado o prazo de alegacións, retiraron o listado da aplicación e non nos deron ningunha explicación.
Tras múltiples correos e chamadas, por fin, o mércores 4 conseguimos localizar a alguén que nos atendera:
- A relación de postos vai ter cambios respecto á xa anunciada (novo listado 4/5/22 pola noite)
- Os sindicatos teremos acceso ás respostas da DXFP ás nosas alegacións (esto ainda non o cumpriron)
- Detalles
O Consorcio Galego de Servizos de Igualdade e Benestar saca a licitación os servizos de atención educativa da escola infantil de A Guarda, de nova creación
O concello de A Guarda asinou un convenio de colaboración coa Consellaría de Política Social, a través do Consorcio Galego de Servizos de Igualdade e Benestar, en xuño de 2020, para a construción dunha escola infantil de 0 a 3 anos, de tres unidades (41 prazas).
A escola infantil de A Guarda ten previsto comezar a actividade en setembro, co inicio do curso 2022/2023 e, até agora, nunca se puxera en dúbida que a xestión fose a ser directa, con persoal propio.
Ás agachadas, o Consorcio publicou o día 26 de abril no seu web a licitación do servizo de atención educativa, que non é nin máis nin menos que a xestión privada deste centro, construído con fondos públicos no espazo publico municipal que son as antigas instalacións do comedor e vivenda do profesorado dun colexio público.
Á empresa que se lle adxudique a xestión non terá que investir capital nin infraestrutura. Se lle garante unha cifra de negocio e de beneficio sen ningunha exposición ao risco empresarial. Será chegar e encher, beneficios a costa dun servizo publico subvencionado.
O Consorcio ten unha estrutura organizativa que, ademais de xestionar os chamamentos para a selección do persoal, tamén centraliza as compras de material, elaboran os criterios educativos, control dos menús máis saudábeis..
Para a CIG a única garantía de calidade de servizo e de emprego digno é a xestión directa dos servizos, integramente públicos, dende a atención educativa ata a limpeza e os comedores. Esiximos a suspensión desta licitación e que se dote de inmediato esta escola infantil con persoal propio.
O publico é servizo, o privado beneficio!