- Detalles
No DOG do 11/05/2021 a EGAP convoca actividades de formación continua.
Dirixido a: persoal ao servizo da Administración xeral, das entidades públicas instrumentais do sector público autonómico e da Administración institucional.
Prazo de presentación de solicitudes: do 12 ao 20 de maio de 2021.
O número máximo de cursos que se poden solicitar é de cinco.
Hai cursos de distintas modalidades: teleformación, telepresenza+teleformación e presencial.
- Detalles
Pois si, cumpriu a palabra que nos deu fai dúas semanas, de que o venres 7 de maio publicarían no DOG a relación definitiva de persoas admitidas e excluídas no concurso para a provisión de postos de traballo vacantes de corpos xerais.
Pero aí remata o cumprido. Porque se vamos uns meses para atrás, a palabra era que esa mesma resolución publicaríana en marzo, que o baremo provisional sería para marzo/abril e a resolución definitiva para xullo. Así que como mínimo levamos dous meses de atraso sobre o previsto e case ano e medio para publicar un puto listado, porque iso é o que é unha relación de persoas admitidas.
Pero, dous meses de atraso non é nada no calendario do director xeral, sempre e cando non teñamos en conta a demora que acumulamos:
- Convocouse a finais do 2019 (ano e pico máis tarde do previsto).
- Publicaron a relación de prazas a solicitar (vacantes máis resultas) a finais de xuño e 2020 (estaba previsto para xaneiro [aquí ou aquí] dese ano).
Total, que estamos en maio de 2021, pasaron case tres anos dende que tiña que ser convocado no 2018 e ano e medio dende que se convocou no 2019, e non se albisca nin a baremación provisional (tentarán que sexa en maio, din), nin a definitiva, nin a resolución, nin a data de toma de posesión. E iso que é o único concurso que está activo, hoxe, na Administración da Xunta de Galiza.
Concurso de persoal laboral
A decisión política do goberno de Feijoo é que nunca máis haberá concurso de traslados de persoal laboral, porque decidiron que todo o persoal vai ser funcionario. Dende unha óptica sindical, temos un problema: CCOO e UGT concordan totalmente co goberno, e comezaron a casa polo tellado.
O concurso de traslados de persoal laboral é algo previsto no V Convenio Colectivo, polo que con ese argumento a CIG, xunto a CSIF, presentamos demanda xudicial polo incumprimento do convenio. A CIG defende que aínda que todos e todas pasasen a ser persoal funcionario, antes teñen dereito a un concurso de traslados como persoal laboral.
Concurso de escalas e administración especial
Onde agocha Barreiro os concursos de administración especial e escalas?
Hai que rebuscar moito para atopar a convocatoria do último concurso de administración especial. Pasaron xa oito anos e medio dende que o convocaran no Nadal do 2012, resolto en abril de 2014.
De escalas de administración xeral, vai por barrios:
- Informática: convocado en xuño/2013, resolto en abril/2014.
- Outros son máis próximos (dous, tres anos de marxe): estatística, gardacostas, finanzas, etc.
- E de moitas máis escalas simplemente xa nin memoria temos.
O concurso de persoal veterinario comezamos a “negocialo” en xaneiro do 2020. Daquelas enviaran un borrador; alegamos por escrito. E nunca máis. En marzo deste ano dignáronse a respostarnos algo ante a nosa insistencia: seica estaban pendentes de que Sanidade modificara a súa RPT. Non hai máis información nin movementos.
Fai uns días enviaron un borrador do concurso de finanzas. Ese borrador era para marzo, pero finalmente conseguiu chegar en maio.
Como dato curioso dicir que as escalas de gardacostas tiveron un único concurso en toda a historia desas escalas. Alucinante!
Concurso específico
Os sindicatos chegaramos a un acordo co goberno bipartito de que as xefaturas de servizo e inferiores serían postos de concurso, agás aqueles postos que cumpriran unha serie de criterios que xustificasen a súa cobertura mediante libre designación. Esta medida non se chegou a materializar, xa que nada máis chegar ao goberno, o Presidente Feijoo reverteu o pacto: impuxo que os servizos e algunhas seccións, serían cubertas mediante libre designación ou concurso específico.
A CIG rexeita esta forma de cobertura, que ven a ser unha libre designación por cinco anos, cunha entrevista persoal, que vai implicar o sometemento á vontade da persoa superior que vai ter que elaborar un informe.
Pasaron mais de dous anos dende que en marzo do 2019 fora aprobado o Decreto de mobilidade que habilita o Concurso Específico, co voto en contra de todos os sindicatos con presenza na Mesa Xeral (CIG, CCOO, CSIF e UGT), e nen tan sequera foi publicado en DOG. Pasan os anos e non hai no horizonte ningunha sinal de que algún día se poña en marcha. E mentres tanto, son moitas as xefaturas de servizo e sección que levan anos cubertos en comisión de servizo, cos seus ocupantes amarrando outro posto que tampouco pode ser ofertado en concurso ordinario.
Concurso de traslados: 8.000 postos adxudicados e resolto en menos de 3 meses... pero falamos de docentes
En xaneiro deste ano faciamos unha comparativa co que ocorre en ensino, onde todos os anos executan dous concursos nos que se adxudican 8.000 postos. Un deses dous concursos se resolve en dous meses e medio, e o outro en seis meses. Así todos os anos.
Para que nos fagamos unha idea, e arredondando, podemos dicir que no concurso xeral de Función Pública ofertáronse 4.700 postos, 1.900 vacantes na primeira fase e 2.800 de resultas. Nin é anual, nin é para todos os corpos, nin se resolve en seis meses.
- Detalles
O mércores 5 de maio, ás 17.30 horas, teremos unha asamblea adaptada aos tempos de pandemia. Faremos un repaso á actualidade do SPIF, en directo por YouTube, dende a ligazón https://i.gal/spif050521.
Poderás participar a través do chat, pero lembra que para poder utilizalo, YouTube require que te identifiques cunha conta de google (gmail).
- Detalles
Así o acaba de determinar a Inspección de Traballo e Seguridade Social despois da denuncia interposta pola CIG na provincia de Ourense
Unha vez máis a inspección constata o incumprimento por parte da Consellería de Educación no que a riscos laborais respecta.
Segundo a resposta da inspección á denuncia interposta pola CIG queda claro que esta consellería non está a cumprir a Lei de Prevención de Riscos Laborais xa que non existen avaliación de riscos feitas para o persoal coidador (nin para o resto do persoal...) polo que decide acollerse a única que realizou nun centro concreto da provincia de Ourense; dito sea de paso que esta avaliación se fixo pola denuncia presentada por unha traballadora a instancias da nosa central sindical.
A consellería acóllese así á avaliación realizada para este centro e asume que o resultado da mesma o vai aplicar no resto dos centros onde conten no cadro de persoal con esta categoría de traballadoras e traballadores, polo que entendemos que se inclúen todos os centros do país. Desta avaliación resultou a necesidade de dotar a este persoal dos seguintes elementos de protección:
- Máscara FFP2
- Bata (ou mandil + manguitos)
- Guantes
- Pantalla
Segundo a Inspección o director xeral de Centros e Recursos Humanos comprometeuse o pasado 26 de marzo a cumprir con este compromiso de facilitarlle o persoal coidador os equipos necesarios para poder facer o seu traballo en condicións seguras, esperamos que sexa de xeito inmediato xa que o curso está a piques de rematar.
Dende a CIG animámoste a que solicites os equipos de protección que che corresponden no teu centro e se non chos facilitan non dubides en poñerte en contacto con nos.
- Detalles
Aínda que se aceptaron as achegas máis importantes da CIG, retirando as barbaridades que pretendían impoñer con esta norma, non se cumpriu cos requisitos mínimoslegais da negociación
Na Comisión de Persoal do 28 de abril quedou aprobado o borrador de Orde pola que se desenvolve o Decreto 229/2011, que regula a atención á diversidade do alumnado dos centros docentes da Comunidade Autónoma de Galiza, nos que se imparten as ensinanzas establecidas na Lei orgánica 2/2006, do 3 de maio, de educación coa abstención das catro centrais sindicais mais representativas: CIG, CCOO, CSIF e UGT.
Aínda que se aceptaron algunhas das achegas mais importantes presentadas pola CIG, como a obrigatoriedade de permanencia dentro das aulas, atender a 7 alumnos/as ó tempo ou ata administrar medicacións.., que se matizaron ou eliminaron na versión que foi a Comisión de Persoal, o malfacer durante a negociación e a falta de tratamento previo co Comité Intercentros do persoal laboral das modificacions de funcións e ratios do persoal coidador e de lingua de signos, fixo que non puideramos dar o noso apoio a esta norma.
En resumo estas son as cuestións que variaron do documento inicial:
- Retiran a administración de medicación e tamén a obriga de atención durante ás actividades extraescolares.
- Cambian a redacción do punto que se refire á atención dentro da aula quitando a obriga permanente.
- Cambian a redacción do punto que se refire á atención na ruta de autobús. Pero non nos fiamos: non esquezamos que xa se obrigou a algún persoal a empezar e rematar a xornada nunha parada de bus.
- Baixan pero non eliminan a ratio nin aceptan valorar ás necesidades de atención do alumno/a como único criterio.
- Cambian a redacción do punto k) "caixón desastre", indicando que poden encomendarse outras tarefas que teñan relación coas suas funcións. Por experiencia non nos fiamos das direccións polo que preferíamos que se eliminase.
- Corrixen os erros a hora de nomear as profesionais e as tarefas.
- Detalles
A CIG rexistra diante da Dirección Xeral da Defensa do Monte as propostas de calidades mínimas para os Epis e roupa de inverno do SPIF. Tamén fixemos chegar á subdirección xeral de persoal os continuos abusos que se acometen nos cuadrantes tal e como comprometeramos na comisión.
O pasado venres (23 de abril) fixemos chegar á Dirección xeral de Defensa do Monte os documentos que recollían polo miúdo dous dos compromisos que sacaramos da Comisión de seguimento do acordo de condicións especiais do SPIF, celebrada uns día atrás.
Estes escritos recollían as nosas demandas tanto en cuestións referentes aos Epis de traballo e roupa de inverno como en varios incumprimentos do convenio na confección de cuadrantes.
En canto aos Epis e roupa de inverno, achegamos as composicións mínimas nos materiais para que queden recollidas nos diferentes documentos onde se recollen os elementos que os compoñen.
Sabedores de que dentro da lexislación e cumprindo estritamente o marco establecido, nos últimos anos houbo unha importante oscilación -á baixa- nas calidades dos materiais entregados aos traballadores e traballadoras.
Tal e como deixamos constancia na reunión, os Epis de extinción que se entregan a día de hoxe, son de boa calidade en canto aos compoñentes, aínda que poderían ter algunha pequena melloría. Basicamente, a proposta da CIG neste senso, é introducir na propia relación das prendas para futuras contratas, as porcentaxes mínimas de compoñentes (viscosa fr., meta-aramidas, para-aramidas....) que deben levar como mínimo, tomando as actuais de referencia para evitar entregas de baixa calidade -como as que tivemos anos pasados - cando xa existía a mesma lexislación na roupa que agora.
Na roupa de inverno, a parte de esixir a entrega inmediata -non se dá dende o ano 2008-, fixemos o mesmo. Entregamos as composicións que consideramos mínimas dos tecidos que compoñen as prendas, para igualar por abaixo as calidades.
En canto á continua vulneración de dereitos coa confección dos cuadrantes, entregamos materiais xa recollidos en denuncias de Inspección de Traballo tanto de Ourense como de Pontevedra, onde entre outras cousas relatamos o continuo incumprimento na asignación das vacacións, na entrega dos cuadrantes así como na aleatoriedade na asignación das quendas.
Conscientes de que os cuadrantes son materia de negociación provincial, e sen entremeternos neste eido, o que si reclamamos diante da subdirección xera de persoal, e é materia da súa custodia, é que se cumpran os mínimos marcado polo acordo de condicións especiais, motivo polo cal, e en presencia dos xefes provinciais responsables do seu cumprimento, o subdirector xeral de persoal de Medio Rural pediunos que achegaramos estas eivas que segundo as súas palabras eran de obrigatorio cumprimento e non podía estar acontecendo. Veremos!.
- Detalles
Coa aprobación na Comisión de Persoal do 23 de abril dunha segunda convocatoria de funcionarización do persoal laboral fixo aos grupos A1, A2, C1 e B, a Xunta, CCOO e UGT seguen avanzando nos procesos de funcionarización “a cegas”.
Xunta, CCOO e UGT, como negociadores únicos fóra do marco legal empregando a súa Comisión de seguimento do Acordo de Concertacion, están a levarnos a unha funcionarización desastre. Comezan a casa polo tellado e, inda por riba fano mal ao deixar fóra a moito persoal ao resolver mal as equivalencias de titulacións e as reclasificacións, varias promocións internas á baixa e "deshabilitando" o B.
As presas non son boas, e antes dos exames cómpre saber cales van ser as condicións do novo vínculo de persoal funcionario. Se nos queren funcionarizar que sexa con garantías.
A realidade é que esta funcionarización, na vez de supor unha oportunidade de forza para recuperar dereitos do V Convenio Colectivo eliminados unilateralmente pola Xunta e gañalos para o actual persoal funcionario, é unha auténtica desfeita. Polo que a CIG vimos de reclamar por enésima vez na Mesa Xeral de Empregados Publicos que paren estes procesos ata ter negociado un acordo marco que leve os dereitos salariais e laborais do V Convenio á Lei de Emprego Público de Galiza e que desta forma todo o persoal en base as suas condicións de traballo poda ter:
- Un trienio mínimo de 31,25 €
- Pluses en níveis e complemento específico
- A compensación por traballar os domingos e os festivos
- Descansos en fin de semana alternos
- Concursos de traslados anuais
- Comisións de servizo obxectivas
- Roupa e calzado de traballo periódicos
- Vacacións de 30 días laborais cando obriguen a non disfrutalos no verán
- Acordo de xubilación parcial
- Promoción interna ao 50%
- Negociación de carteleras de traballo
Para máis ao director xeral da Funcion Publica, CCOO e UGT non lles chegou con que o xulgado declarara ilegal a súa carreira profesional que agora queren seguir a discriminar de novo ao persoal laboral temporal ao que obriga a funcionarizarse baixo a ameaza do despedimento. Neste caso o cambio de persoal laboral temporal a funcionario/a interino faise sen complementos salariais e sen dereitos, sen poder elixir e dunha forma totalmente abusiva e afecta nada mais e nada menos que a 4.687 compañeiros e compañeiras, o 46% do total.
- Detalles
Na Comisión de Persoal do venres 23 de abril foron aprobados os procesos de funcionarización do persoal laboral fixo dos grupos I, II e III correspondentes á OEP dos anos 2020 e 2021. E en rogos e preguntas falamos do estado dos procesos selectivos, concurso de traslados xeral, preguntamos polas máscaras, integración da Axencia de Turismo, a carreira profesional. A maiores o DXFP informou algo sobre o decreto de atención á diversidade nos centros educativos e algunha toma de posesión.
Funcionarización
Son as convocatorias de funcionarización da OEP do 2020 e 2021 do actual persoal laboral fixo dos grupos I, II e III que irán a escalas dos grupos A1, A2, B ou C1. Foron aprobadas co apoio de CCOO e UGT e voto en contra de CSIF. A CIG abstívose en grupo A1 e A2, e votamos en contra de B e C1.
A CIG está conforme en que exista un vínculo único de empregado público, sen diferencias en dereitos e deberes entre persoal funcionario e persoal laboral. Así que nada temos en contra de que exista un proceso de funcionarización do persoal laboral fixo. Pero non así.
Ao noso entender, o proceso de funcionarización debería ser o último paso despois de que se convocase un concurso de traslados previo e procesos selectivos como persoal laboral, así como iniciar unha negociación que defina os complementos de destino e específico de cada posto, de xeito que o persoal laboral fixo coñeza as condicións do cambio de vínculo, e a funcionarización non sexa un salto a cegas.
Sabemos diferenciar entre o deseño do proceso de funcionarización e as convocatorias que executan o que debería ser o último paso do proceso. E xa que logo, a CIG abstívose en A1 e A2.
En canto ao grupo B e C1, temos discrepancias nas titulacións e no grupo de destino do proceso, polo que non podemos apoiar a convocatoria e votamos en contra.
Polo que respecta aos outros sindicatos, para CCOO e UGT está todo ben. E para CSIF está todo mal.
Rogos e preguntas
Orde de atención á diversidade nos centros de ensino: van a enviarnos un novo borrador con modificacións feitas en base ás alegacións dos sindicatos. Previsiblemente sexa aprobado o mércores 28 nunha nova Comisión de Persoal.
Toma de posesión de auxiliar de enfermaría, camareiro-limpador e subalterno (Dl): afirma o DXFP que a publicación vai ser “pronto”, estando prevista para o día 10 ou 17 de maio.
Concurso de traslados de corpos xerais: conta o DXFP que enviaron ao DOG o listado definitivo de admitidos/excluídos (publicarían o 7 de maio). Insistimos en que fai meses dixera que esa publicación era para marzo, e que entre abril e maio sería a publicación provisional do baremo. Resposta que están a traballar no baremo provisional, que debería estar “pronto” (tentará dar data na seguinte xuntanza). Non resposta á pregunta de cando sería a resolución (prevista fai meses para “antes” do verán).
Carreira profesional. Preguntamos se recorreron ou non a sentenza do Tribunal Superior de Xustiza de Galiza que deu a razón á CIG. O DXFP di que non ten certeza pero que pensa que si está recorrida. Non resposta á nosa petición a sentarnos a falar do asunto.
Máscaras: Na Mesa Xeral do martes 20 denunciamos que as máscaras que nos deron a parte do persoal tiñan unha duración máxima de 40 días, e van máis de sesenta. Na Comisión de Persoal reiteramos a pregunta, e resposta que “vai preguntar”.
Integración da Axencia de Turismo: preguntamos cales son as previsións. Nin se molesta en facer mención algunha ao asunto.
Previsión de procesos selectivos. Aínda que na MX anterior deu algunha información, reiteramos o noso interese en ter máis información. Di o DXFP que esperan ter autorización (en 15 días) para promoción interna e libre de corpos xerais antes de agosto, prevendo os exames para “xuño ou xullo”. Esa previsión sería para a promoción interna de corpos xerais, o primeiro exercicio de libre e o segundo para A1 e A2. Engade que os exames de incendios e ISSGA serían en novembro.
- Detalles
Na mesa xeral do 20/04/2021 preguntamos por enésima vez polas datas dos exames dos procesos selectivos e da previsión da publicación dos non convocados.
O director xeral de Función Pública dá información xenérica, de que continuarán con normalidade os procesos que xa teñen preparados (sic), sempre e cando teñan autorización de Sanidade, mantendo o compromiso de que informarán con tempo abondo. Fai algunha referencia ambigua a que “probablemente antes do verán se os contaxios son aceptables”. Ollo, que “antes do verán” quere dicir que pode haber exames en xullo (para el, o verán é só agosto, que é o mes das súas vacacións).
Toda a promoción interna de corpos xerais está parada. Hai ruxe-ruxe nalgunha academia de que xa estarían postas as datas de exame para maio, pero o director de Función Pública non se molla. Entendemos que esa probabilidade de antes do verán sería de aplicación a estes procesos.
En acceso libre de corpos xerais, xa se realizaron os primeiros exames de A1 e A2. Está pendente C1, C2 e AP. Tampouco fixo referencias expresas a estes procesos, pero ao noso xuizo, estes tamén serían dos “probablemente antes do verán”.
Os primeiros exames de incendios (SPIF), quedarían, segundo o DXFP para novembro.
Non informa nada dos procesos das restantes categorías e escalas (“hoxe non toca”, espetounos vacilón).
En canto aos procesos ainda non convocados, nun primeiro momento irían finanzas e algunhas enxeñarías, pero en todo caso serían aquelas escalas que non teñan convocatoria actualmente en execución.
Queremos lembrar que ainda temos ofertas pendentes dos anos 2017, 2018, 2019 e 2020 (a maiores da recentemente publicada do 2021). Nun escenario “normal”, sen pandemia por medio, no que rexese a obriga de executar no prazo de tres anos, todo o ainda non convocado do 2018 caducaría en decembro deste ano. E o pendente do 2017 (algo queda ainda), xa estaría caducado, como por exemplo a oferta que venderon moi ben na prensa para persoas con discapacidade intelectual (corpo auxiliar administrativo) ou varias categorías dos grupos I, III e IV de persoal laboral.
E non nos esquecemos das ofertas de persoal funcionario de Administración especial de escalas sanitarias, íntegramente sen convocar (anos 2018, 2019 e 2020). Nin unha palabra de resposta ás nosas preguntas.
- Detalles
A Xunta quere validar cun paripé de negociacion na Mesa Xeral de Empregados Publicos do 20 de abril de 2021, unha Orde pola que se desenvolve o Decreto 229/2011, do 7 de decembro, polo que se regula a atención á diversidade do alumnado dos centros docentes da Comunidade Autónoma de Galiza. Esta Orde modifica substancialmente as condicions laborais do persoal coidador e interprete de lingua de signos dos centros educativos.
Na CIG-Autonomica levabamos mais dun mes loitando pola negociación desta Orde, que xa fora previamente tratada coa representación sindical do profesorado na súa Mesa Sectorial Docente. Deste xeito, e a golpe de martelo, planean modificacións de ratios que chegan a sete alumnos/as con diversidade por coidador/a, ou que a atención ten que ser continuada dentro e fóra das aulas, ata nas actividades extraescolares, ou un caixón “desastre” onde meten todas as funcións que lle encomenden.. (“amen e asi sexa, señor director”, “farei o que vostede diga”).
A proposta altera moito máis das condicions laborais deste persoal non docente, polo que esiximos negociar xa que as queren modificar por esta vía e cargarse o convenio de funcións actual. A maiores, a consellaría non resposta a ningunha das alegacións que presentamos os sindicatos nesta reunion.
Lembrámoslles que o ámbito de negociación para as condicións de traballo do persoal laboral da Xunta é o Comite Intercentros, e que a negociación debe ser previa á elaboración de calquera planificación. O director xeral defende o ámbito da Mesa Xeral porque di que no futuro serán funcionarizados/as. É indignante, segue empeñado en restar dereitos antes sequera de que sexan funcionarios e funcionarias.
En conclusión, como van sacar adiante a atención da diversidade se non contan co persoal que ten que asumila? Van seguir a pretender impoñelo a golpe de decretazo obviando ao persoal?
Na CIG afeamos á Xunta e esixímoslle a retirada destas modificacions de funcións e ratios e a xustificamos con estas alegacións que presentamos na MXEP e que podes consultar aquí.
Se non atenden a razóns remataremos co conflito no xulgado, será que ao director xeral da Función Publica e a Consellería de Educacion lles sae gratis perder e por iso pasan de todo?