- Detalles
O pasado martes 18 de abril tivo lugar unha xuntanza da Mesa Xeral de Negociación de Empregados Públicos (MX) e da Mesa Sectorial de Negociación de Persoal Funcionario (MSF), nas que se trataron os seguintes asuntos: RPT de Sanidade e do Sergas, RPT do IGE e proposta de acordo das condicións de traballo do persoal Farmacéutico Inspector de Saúde Pública (FISP).
RELACIÓN DE POSTOS DE TRABALLO DO IGE
Traen a proposta de crear unha sección, que financian coa amortización de dous auxiliares administrativos-C2. Aseguran que estes dous postos que amortizan levan tempo vacantes e sen ocupación. O IGE afirmara que solicitara a cobertura deses postos con persoal interino e non llo permitiran. E un deses dous postos tiña un titular (ata a súa xubilación) que nunca traballara nel, senón que “misteriosamente” estaba a prestar servizos en Ourense.
A CIG manifestou que non queremos amortizar dous postos para financiar un, e pedimos explicacións:
- Cal é o motivo polo que non se lle permitiu ao IGE cubrir os postos.
- Como é que a persoa que ocupaba o posto en propiedade nunca estivo traballando en Santiago (localidades do posto), e sempre estivo en Ourense (ás furtadelas).
O director xeral de Función Pública (DXFP) afirmou que non ten coñecemento da situación da persoa desprazada a Ourense. En canto ás prazas que se amortizan, estas non se ofertaran no concurso de traslados por proposta de amortización do IGE.
RELACIÓN DE POSTOS DE TRABALLO DE SANIDADE E SERGAS
Nesta proposta exclúen a parte relativa ao persoal veterinario e ao FISP.
O primeiro que chama a atención é que a proposta tenta adaptar a RPT á estrutura da consellería aprobada no ano 2019 (e posteriores modificacións). Estamos no ano 2023, así que xa pode estar ben feita, que tempo tiveron abondo.
Crean e modifican postos para deixalos abertos a persoal estatutario, do estado, doutras CCAA, persoal inspector médico do INP ou ISM, persoal farmacéutico do INP, escalas sanitarias de calquera administración ..
- Incomprensible que nalgúns postos permitan ocupalos con persoal estatutario e non co noso persoal funcionario de escalas sanitarias.
- O persoal estatutario sanitario do Sergas ten unha función clara: a asistencia sanitaria. E non andan moi sobrados de persoal. Que deixen de traelos a postos da Administración.
- Se necesitan traer persoal de fora, están a demostrar que consideran que o persoal funcionario da Xunta é incompetente.
- E de paso, están a reducir as posibilidades de promoción ao noso persoal.
En varios postos dos que amortizan non indican se están vacantes ou non (e tampouco se están ocupados).
Finalmente, o DXFP emprázanos a que presentemos alegacións ata o xoves 20, e convócanos a unha xuntanza para o día seguinte, venres 21.
ACORDO DAS CONDICIÓNS DE TRABALLO DO PERSOAL FARMACÉUTICO INSPECTOR DE SAÚDE PÚBLICA (FISP)
Despois da folga do persoal FISP, xa dende o ano 2017 comezamos a solicitarlle a Sanidade que se sentase a negociar a homologación das condicións de traballo deste persoal cos de outros corpos de inspección. Sanidade desatendeu todas as nosas solicitudes.
E de súpeto, recibimos unha proposta case que dun día para o seguinte. E non sería por falta de tempo por parte da consellería, xa que o documento que nos enviaron foi editado 281 veces. Así que o primeiro que reclamamos é sentarnos a falar e tempo para facelo en condicións.
Consecuencia da folga do ano 2016, a consellería decidiu “externalizar” certos traballos de inspección de augas de baño. Así que vai por diante unha pretensión da CIG: recuperar para o servizo público os traballos de inspección externallizados.
O acordo pretende ser similar ao de outros corpos de inspección do mesmo servizo de Saúde Pública. Pero non igual, xa que hai numerosos aspectos que son modificados “á baixa” (máis quendas de tarde, máis gardas localizadas, máis días de mobilidade fora da zona, .. e menor complemento específico).
O DXFP abre un prazo para presentar alegacións (a CIG xa as presentou), e comprométese a que teremos unha posterior xuntanza.
Como curiosidade, a representante da Consellería de Sanidade falou de que lles gustaría unificar nun único corpo os actuais servizos de inspección. Isto non parece moi realista, e semella non ser máis que a declaración dun desexo sen maior transcendencia.
- Detalles
Na Comisión de Persoal do 17/04/2023 onde se aprobou a RPT de funcionarización do persoal de limpeza e cociña, dende a CIG formulamos as seguintes cuestións:
• Para cando estiman que estean resoltos os procesos selectivos de enxeñeiros agrónomos, de montes, técnicos agrícolas e técnicos forestais que agora están en fase de acreditación de méritos e cal vai ser a orde de prelación entre as distintas escalas?
DXFP: É probable a resolución sexa para despois do verán é en relación á orde, primeiro habería que ver a disposición de postos para ofertar entre outras cousas.
• Promoción interna corpos xerais: seguen sen convocarnos a negociar as bases e xa saíron listaxes de libre e as datas dos primeiros exames.
DXFP: Están rematando moitos procesos pero poden adiantar que nunhas semanas (logo din un par de meses) se vai comezar a negociación bases, sobre todo na PI da OEP 2020 para que non caduque.
• Procesos estabilización: dixeran que tiñan case rematadas as listas provisionais de admitidos duns 50 procesos. Cales son? Que previsións teñen?
DXFP: Darán un cronograma para a semana que vén e se poden mañá avanzan algo.
• RPT do Consorcio e integración.
DXFP: Están pendentes do informe asesoría xurídica. Queren que se publique o antes posible.
• Comunicacións ITs en Educación: facemos constar o inapropiado da instrución. Poñemos por diante que consideramos que as substitucións se deben axilizar e cubrir as IT´s canto antes, pero a vía é tratar de consensuar un protocolo co SERGAS para automatizar o proceso.
Educación: están traballando co CIXTEC para que se poida facer un procedemento sen a intervención das persoas que entran en IT.
A maiores a DXFP tamén comenta que:
• A negociación da RPT de funcionarización do persoal de Medio Rural farase despois da do grupo V e será para o mes de xuño.
• E que se está traballando tamén sobre a RPT de Consumo e sobre procesos selectivos das escalas de Consumo con prazas que non están afectadas pola derogación do decreto da OEP de 2022 e non están afectadas pola estabilización.
- Detalles
Na Comisión de Persoal do 17 de abril aprobouse a RPT de funcionarización do persoal de limpeza e cociña cos votos a favor de CCOO, UGT, abstención da CSIF e o voto en contra da CIG. Aprobarase no Consello da Xunta o xoves 20 de abril, publicarase no DOG do luns 24 de abril e aplicarase o 1 de maio.
O pasado mes de agosto a Xunta modificaba o Decreto 93/1991, do 20 de marzo para crear “ad hoc” o nivel 9 como nivel mínimo para a Agrupación Profesional, que ata entón era o 10.
Polo tanto, a primeira proposta da Xunta para esta RPT foi a adxudicación deste novo e máis baixo nivel a todo o persoal de limpeza e cociña que como laboral non ten recoñecido ningún plus. Ao persoal que tiña recoñecido algún plus de singularidade de posto (especial dedicación, perigosidade, toxicidade ou penosidade) adxudícalle un nivel superior ata o máximo (nivel 14) en función dos pluses recoñecidos.
Dende o primeiro intre, para a CIG esta proposta de rebaixar ao persoal de limpeza e cociña ao nivel 9 foi inaceptable por discriminatoria (créase este nivel expresamente para este persoal cando xa se levou a cabo a funcionarización doutro persoal do mesmo grupo V ao que se lle adxudicou o nivel 10) e sexista (a maioría do persoal destas categorías son mulleres).
A contraproposta da CIG foi que se establecera o nivel 10 como mínimo e atendendo a iso, os complementos de singularidade de posto se abonaran correlativamente a partir dese mínimo.
Na derradeira proposta a Xunta recuou e fixo o correcto, adxudicando como nivel mínimo o 10. Isto supón un pequeno incremento retributivo dunha media de 260 € anuais (estando arredor dos 740 € anuais para o persoal sin ningún complemento e arredor dos 160 € anuais para aquel persoal que ten tres complementos), mais non aplica ningunha diferenza entre o persoal que traballa a quendas e ten recoñecido o plus de especial dedicación e o persoal que non fai quendas.
A CIG foi a única organización sindical que solicitou a rectificación da situación na que queda o persoal que traballa a quendas, propoñendo unha diferenciación no complemento específico tal e como se fixo noutras funcionarizacións ou de xeito similar ao que se lle aplica ao persoal subalterno e administrativo dos centros de ensino, pero a Xunta non acepta.
Tamén quedaron fóra desta RPT reivindicacións importantes para a CIG como a de que todos os postos de media xornada, fins de semana, de 4 e 2 horas, persoal fixo-descontinuo... se reconverteran en postos de xornada completa.
A CIG propuxo unha RPT de funcionarización máis ambiciosa e xusta para o persoal afectado, pero a Xunta, coa connivencia de CCOO e UGT, desbotou as nosas propostas.
Aínda así, nesta negociación grazas á CIG mudáronse cuestións moi lesivas da primeira proposta e acadáronse certas melloras (nivel 10, homoxeneización das retribucións do persoal que realiza as mesmas funcións nun centro de traballo), mais é insuficiente.
Para a CIG é importante todo o persoal e non podemos admitir que traballar a quendas supoña o mesmo que traballar de luns a venres no mesmo horario.
- Detalles
Coa proposta remátase coa privatización das brigadas do servizo de incendios en varias bases da Galiza, unha demanda histórica da CIG
O venres 14 de abril en reunión previa para a negociación da modificación da RPT coa consellería de Medio Rural explicaron a proposta de creación de prazas para dotar as brigadas helitransportadas das bases de Muiños, O Barco e Queimadelos (Mondariz), ademais de reforzar as de Vilamaior (Verín) e Marroxo (Monforte). Con isto camíñase cara un servizo público na defensa contra os incendios forestais na Galiza, mais estamos vixiantes de como se pretenden artellar as brigadas e a forma de acceso.
Esta creación de prazas é posible coa adición de 1.500.000 euros orzamentados no 2023 para o capítulo 1 de persoal (551B), que é froito da extinción da contratación privada do persoal das bases pero ao que lle suman o orzamento de amortizar 6 prazas. Para poder valorar demandamos unha memoria económica máis completa que compare emprego neto destruído na privada e o seu custo co emprego neto na pública. Ademais lembramos que na CIG opoñémonos a amortizacións sen xustificación funcional e máis se son prazas ocupadas co que mandarían ao persoal a rúa.
Salientamos:
- Crean 45 prazas de persoal de brigadas helitransportadas lixeiras, polo que non levarían técnico/a de brigada. As prazas se crean coma de persoal laboral aínda que nun futuro serán obxecto da súa funcionarización.
- Corrixirán o erro que existía no custo anual das prazas, que eran desiguais entre bases.
- Contemplan a posibilidade de retirar a necesidade de proba física anual (esta cuestión negociaríase máis adiante).
- As prazas cubriranse transitoriamente por adscrición/comisión de servizos.
- Valorarán corrixir outras cuestións tales coma a oferta de tódalas prazas de bombeiro/a forestal coma bombeiro/a forestal condutor/a(xa que podería causar problemas na súa cobertura) ou a inclusión das prazas a nivel distrito e non a nivel provincial tal e coma está na proposta actual.
- Crean 6 prazas de persoal emisorista que prestaría servizo na base das brigadas helitransportadas mentres estea o helicóptero, e no centro de coordinación de distrito o resto do ano.
Ábrese prazo de alegacións desta RPT ata o mércores 19 de abril, podes facernos as túas suxestións aquí.
- Detalles
O director xeral de Función Pública convocounos a unha xuntanza da Mesa Xeral de Empregados Públicos e da Mesa Sectorial de Persoal Funcionario que será o martes 18/04/23, coa seguinte Orde do día:
1. Proposta de acordo sobre as condicións de traballo da clase de Farmacéuticos/as Inspectores/as de Saúde Pública (FISP). Descargar
2. Modificación da Relación de Postos de Traballo (RPT) do Instituto Galego de Estatística (IGE). Descargar
3. Modificación da RPT da consellería de Sanidade. Descargar
As convocatorias e documentación chegaron ao final da mañá do venres 14, e cun luns por medio saturados de asuntos. Non teñen vontade de negociar en condicións, especialmente a consellería de Sanidade.
- Detalles
Resumo de "outros temas" da xuntanza que tivemos o pasado venres 14 de abril co director xeral da Función Pública (DXFP):
RPT de Sanidade
Informa o DXFP que esta RPT está "negociada de fai tempo" e que está para ir á Mesa. Levará amortización de postos vacantes que se transformarán en estatutarios, e adaptan aos decretos de estrutura. Tentarán que no futuro (fala en xeral), cando se adapte a estrutura se adapte a RPT. Non vai a parte de saúde pública (escalas de persoal farmacéutico [FISP] e veterinario, para o que tentarán avanzar nas seguintes semanas). Menciona o acordo dos/das FISP, deixando a súa modificación de RPT para cando haxa acordo.
Procesos de estabilización
Prazas que engaden aos procesos: Publicarán nuns días as prazas que se engaden nos procesos de estabilización que estaban convocadas en procesos selectivos e quedaron desertas. Informa de cambios de números en “A1, A2, médicos, terapia ocupacional, C2 (prazas de grupo IV)”. O luns dará os números.
Cronograma: está pendente de que lle entreguen un cronograma de publicación de listas provisionais de persoas admitidas dos procesos selectivos de estabilización (son 211 procesos).
Datas de exames de procesos selectivos
Refírese a aqueles para os que fai tempo anunciaran o mes de reallización. Agora fai saber que nuns días publicarán as datas concretas.
Negociación das condicións de traballo do persoal FISP
O DXFP anunciara nunha xuntanza previa que enviarían un texto de "acordo" sobre as condicións de traballo do persoal da escala de Farmacéuticos/as Inspectores/as de Saúde Pública (FISP). A CIG indica que xa sabiamos que estaban a piques de enviárnola, que estiveron a negociar cunha asociación que só ten lexitimación para representar aos seus afiliados, cando os sindicatos temos legalmente a representación de todo o persoal. Comunicamos que a CIG non vai asinar o que nos poñan enriba da mesa sen unha negociación real, un debate interno e consultas co persoal ao que representamos.
A primeira (e houbo máis) petición de xuntanza (asinada por CIG, CCOO, CSIF e UGT), para tratar o asunto foi presentada no ano 2017, e nuncia tivemos resposta. Agora non vamos tragar cun documento cociñado ás agachadas da CIG e que queren despachar en dous días. O DXFP resposta que é "probable" que non o levne á Comisión de Persoal para a semana, senon máis adiante, e que sería un texto similar ao do persoal "biólogos/as de zona".
Enquisa Plan de Igualdade
Na CIG temos constancia da non remisión da enquisa aos enderezos do dominio "edu.xunta.gal". Pedimos que se envíe e se abra novo prazo. Xa avisaramos das dificultades telemáticas que podía haber e isto pode desvirtuar os datos recollidos. Faltan máis de 4.000 persoas por recibir o correo. Solicitamos que abran un novo prazo e a opción de cumprimentar a enquisa en papel.
O DXFP resposta que se interesará polo que puido pasar pero manten a súa postura de que os datos recollidos "son os que son" e a xente non participa.
Concursos de traslados
O DXFP anunciara en xuntanzas previas que ao longo do mes de abril falariamos das prioridades nos concursos de traslados. Como para a presente xuntanza había un punto de "outros temas", a CIG traslada a súa sorpresa por non tratar este tema que demandamos debe ser tratado.
Insiste o DXFP en que falaremos dos concursos nas vindeiras semanas do mes de abril. Afirma que ao longo do mes resolverán os problemas de estrutura na DXFP (máis medios), o que lles permitirá abordar os procesos “con optimismo”. O 31/12/24 teñen que estar rematados os procesos de estabilización, e para esa data tentarán "sincronizar" as tomas de posesión na maioría dos procesos selectivos co concurso de traslados (di que será imposíbel facelo en todos).
- Detalles
A Xerencia da Axencia Galega de Calidade Alimentaria (AGACAL) convocounos a unha xuntanza para o día 17 de abril, para tratar unha proposta de pluses salariais no ámbito do persoal laboral da axencia. Se é do teu interese, aquí tes a súa proposta: descargar.
Nunha ollada rápida, a proposta é un despropósito. Para achegarnos o que consideres, podes contactar coa CIG.
- Detalles
Como todos os anos, durante a campaña de realización do Imposto sobre a Renda das Persoas Físicas (IRPF) desde a CIG ofertamos o servizo de realización da declaración da renda a todos aqueles afiliados e afiliadas que teñan as cotas ao día (no caso de non estar por algún motivo pódense regularizar).
Lembrámosche que temos en marcha un sistema para pedir cita que está habilitado na seguinte ligazón: https://oficina.cig.gal/renda da web da CIG no que poderás escoller quenda para facer a túa declaración.
Se tés algún problema para solicitar a cita a través da web tamén te podes anotar chamando á túa comarca de referencia.
Con carácter xeral o prazo para presentar a declaración da renda remata o 30 de xuño. Recordamos que as cantidades satisfeitas en concepto de cotas sindicais desgravan no teu IRPF. Simplemente tés que indicar a cantidade satisfeita no cadro 0014 da túa declaración.
- Detalles
O director xeral de Función Pública convocounos a unha xuntanza da Comisión de Persoal e da Mesa Xeral de Empregados Públicos que serán o luns 17/04/23. Tamén estamos convocados a unha xuntanza previa para o venres 14/04/23. Esta é a Orde do día:
RPT de Funcionarización dos postos de persoal laboral das categorías V-001 e 011 (limpeza e cociña)
Vai á Comisión de Persoal. Posteriormente terá que aprobalo o Consello da Xunta e publicarse no DOG para que poidan proceder coa funcionarización do persoal laboral fixo.
Hai cambios no nivel mínimo, pois aceptan que quede no 10 (e non no 9 como pretendían). Descargar
Anteproxecto de Lei de igualdade efectiva entre mulleres e homes de Galiza
Vai á Mesa Xeral como paso previo á súa aprobación en Comisión de Persoal. Descargar.
- Detalles
Publicada a convocatoria das probas libres para a obtención do título de Técnica/o en Educación Infantil, ciclo formativo de grao superior CSSSC01 Educación infantil da familia profesional Servizos socioculturais e á comunidade
Os módulos que forman parte da oferta e que non se poden superar mediante as acreditacións son: MP0020 Primeiros auxilios e MP0022 Empresa e iniciativa emprendedora. O módulo MP0021 Formación e orientación laboral pódese validar con todas as unidades de competencia (UC) acreditadas por procedemento de acreditación, un ano de experiencia laboral e Prevención de Riscos Laborais (PRL) de nivel básico segundo o Real Decreto 39/97 (30 horas ou máis), contidos detallados e certificado, antes da matrícula en FOL, polo que só haberá que matricularse por libre de:
- MP0020 Primeiros auxilios
- MP0022 Empresa e iniciativa emprendedora
Os outros módulos dos que hai que matricularse cando se teñan superados todos os demais son: Formación en centros de traballo (prácticas), Proxecto de atención á infancia e FOL. Das prácticas e de FOL hai que matricularse igualmente para solicitar a validación. Polo tanto, unha vez obtidas as acreditacións mais superados os módulos por libre, quedaría matricularse destes tres módulos.
Lugar de presentación de solicitudes
As solicitudes de inscrición para participar nas probas libres de formación profesional presentaranse na secretaría de calquera centro público en que se oferten probas libres para a obtención de títulos LOE, malia que non sexa o centro elixido en primeira opción.
A solicitude poderá realizarse mediante o asistente informático vía web. Logo de realizada, a aplicación informática xera un impreso de solicitude que terá que ser entregado para a súa validación en calquera centro educativo de Galicia con oferta de ciclos de formación profesional sostida con fondos públicos. Se este impreso non se entrega en prazo, a solicitude non terá carácter oficial e non se considerará realizada para os efectos da admisión.
Prazo de presentación
O prazo de presentación de solicitudes de admisión (período ordinario) vai do 17 ao 28 de abril de 2023 ata as 13:00 h.
Na ligazón da convocatoria figuran tamén as instrucións para facer a solicitude, que se deberá realizar usando o asistente informático na seguinte ligazón asistente informático (Solicitude web), que estará activa só a partir do 17 de abril. Tamén aparece relacionada toda a documentación que é preciso achegar e que as persoas interesadas cumpre que vaian xa recompilando.