- Detalles
As tres organizacións sindicais, CIG (Ensino e Autonómica) - CUT - SNEP, chamamos o próximo mércores 3 de xuño á loita e mobilización dos 3 sectores cun mesmo fin: “Melloras laborais, sociais e salariais: convenios dignos e xustos”, así como baixada das ratios, máis persoal na atención directa, xornadas xustas, máis recursos, mellores instalacións... A CIG, CUT e SNEP, convocamos folga no sector de Infantil 03 da pública e da privada, chamamos a encher as rúas galegas a todo o persoal traballador dos tres sectores e aumentamos o paro parcial de 9h a 15h
Tamén facemos unha chamada pública de unidade de acción reivindicativa nas rúas galegas, organizada por todas as entidades sociais, organizacións, plataformas, e asociacións que aposten polas mobilizacións e a folga, tendo claro que a loita é o único camiño e miren polo interese colectivo e non polo propio.
E, por suposto, dirixida á Xunta de Galiza, concretamente á Consellaría de Política Social, que é quen ten todas as competencias e o poder de modificar a mesma situación de precariedade que sofren estes 3 sectores.
Coincidindo as reivindicacións nos 3 sectores e tendo as competencias a Xunta de Galiza, que se comporta como un bunker, xuntemos as nosas forzas na Galiza os tres sectores e negociemos nós as nosas condicións!!!
Recordámosvos as tres accións reivindicativas a levar a cabo:
|
Un CAMIÑO DE SANTIAGO REIVINDICATIVO de 3 etapas, cunha XORNADA DE FOLGA (na última etapa): - O 1 de xuño 1ª etapa saída 11:30 h. Arzúa ate Arca, con caravana de coches cos delegados/as de cada sindicato que teñen horas sindicais. - O 2 de xuño 2ª etapa saída 11:30 h. Arca ate Monte do Gozo, igual á 1ª etapa cos delegados/as aos que se pode unir persoal traballador que poida e queira participar. - O 3 de xuño 3ª etapa con MANIFESTACIÓN, saída 11:00 h. do Monte do Gozo á Xunta (San Caetano), nunha xornada de folga cun paro parcial de 6 horas (das 9:00 ás 15:00h.), ao que está chamado todo o persoal traballador, que non teña SS.MM de mañán, ou non estea en quenda de mañán no seu posto de traballo. Aumentamos 1h. o paro parcial pola solicitude feita polos centros de traballo máis alonxados de Santiago de Compostela. |
Dende a CIG, chamamos públicamente á unidade de acción mobilizadora nas rúas de Galiza aos 3 sectores: Discapacidade, Menores e Infantil 0-3 (este pública e privada), así como dar continuidade mañán, a un novo “Mércores en loita” nos centros de traballo. As accións desenvolvidas polo persoal traballador destes tres sectores, baixo o lema "PolíticaSocialenLoita" pretende visibilizar, unha vez máis, as súas condicións precarias diante da sociedade para chamar a atención da conselleira Fabiola García.
A CIG anima ao persoal dos centros de traballo que aínda non participou nesta acción a facelo mañá e a compartir nas súas redes sociais e no correo unitario das tres organizacións sindicais politicasocialenloita@gmail.com as imaxes nas que se amosen as súas principais reivindicacións. Ademais, en paralelo, tamén se está a mover outra iniciativa baixo o título "Concienciación Social" a través da cal se detalla en vídeos e imaxes o día a día do persoal traballador e que compartimos canle de Youtube.
- Detalles
Dende a CIG-Autonómica denunciamos que máis do 30% dos postos do Servizo de Gardacostas de Galiza (ao menos 38 do arredor de 125 postos das bases operativas) continúan sen cubrir após das tomas de posesión realizadas en decembro de 2025, una situación que está a provocar que haxa horarios no que as bases estean inoperativas ou servizos que directamente non se poden prestar.
A pesar das reiteradas demandas da CIG e das promesas feitas tanto pola Consellaría do Mar como pola Dirección Xeral de Emprego Público, transcorreron xa máis de seis meses sen que se adoptase una solución real para cubrir os postos e con isto o servizo continúa deteriorándose día tras día.
En febreiro deste ano aceptaron finalmente, tras as presión da CIG, realizar un chamamento conxunto e dunha soa vez que permitiría cubrir todas las prazas libres existentes para que o persoal das listas das distintas especialidades poida optar por achegarse o máximo posible ao seu domicilio, dada a dispersión das bases pola costa galega.
Entendiamos que esta xestión podía levar unhas semanas, pois antes de cubrirse por listas tiñan que saír todas a comisión de servizos para dar opción ao persoal funcionario de carreira. Porén a día de hoxe seguimos a espera e aínda que a Consellería do Mar manifestou que presentou a proposta de chamamento á Dirección Xeral de Emprego Público o 20 de abril, non hai chamamentos. En definitiva: 6 meses sen cubrir o 30% dos postos das bases de Gardacostas.
Nestes momentos temos as seguintes vacantes sen cubrir (38) nas bases do servizo (pode haber variacións de bases por cambios de persoal pero non do número de postos sen cubrir):
• A Coruña: 2 mecánicos/as, 2 vixilantes e 1 subinspector/a
• Muxía: 2 patróns/as, 2 vixilantes e 1 mecánico/a
• Portosín: 1 patrón/a, 1 mecánico/a e 1 vixilante
• Celeiro: 1 patrón/a, 2 mecánicos/as e 4 vixilantes
• Vigo: 2 mecánicos/as e 2 vixilantes
• Ferrol: 1 patrón/a e 1 mecánico/a
• Ribeira: 2 patrón/a, 1 mecánico/a e 4 vixilantes
• Pontevedra: 2 vixilantes
• Vilagarcía: 3 vixilantes
Esta situación está a obrigar, en moitos casos a realizar saídas ao mar con dotacións incompletas asumindo riscos e maior carga de traballo e, noutros, directamente a paralizar embarcacións ou servizos por falta de persoal suficiente para garantir la operatividade e a seguridade da tripulación.
Non é a primeira vez que denunciamos o deterioro progresivo do servizo. Xa no ano 2024 advertiamos da paralización da embarcación Punta da Guía en Vigo pola falta de efectivos, consecuencia directa da ausencia de cobertura de prazas e da inacción da Administración.
A lentitude da Xunta do PP na cobertura de postos non é cousa nova e menos no Servizo de Gardacostas. Como pode entenderse que xusto tras as oposicións e a toma de posesión xa exista un 30% de vacantes? Urxe unha nova oferta de emprego con convocatorias e oposicións áxiles e que non demoren anos e, por suposto, co seu concurso de traslados previo.
Lembramos que levamos anos denunciando una situación de precarización e abandono que sofre o persoal gardacostas polo goberno galego, xa que, malia desenvolver funcións esenciais a día de hoxe aínda non é considerado un servizo de emerxencias, nin é prioritario nas leis de orzamentos para a súa cobertura áxil é directa como pasa no Servizo de Incendios Forestais, por exemplo.
Galiza necesita hoxe máis ca nunca dun dun Servizo de Gardacostas forte, operativo e suficientemente dotado para garantir a loita contra o furtivismo e a pesca ilegal, o control da actividade extractiva e marisqueira, a vixilancia ambiental fronte aos episodios de contaminación mariña e a protección da saúde pública mediante o seguimento das zonas de produción e das vedas derivadas das mareas vermellas e doutros episodios biolóxicos. O desleixo á hora de cubrir os postos de gardacostas é tamén mostra da nefasta xestión da Xunta do PP co sector marítimo pesqueiro galego.
Desde a CIG-Autonómica esiximos á Xunta de Galiza que deixe de demorar os chamamentos e proceda de maneira inmediata á cobertura de todas las vacantes existentes para recuperar a plena operatividade dun servizo público estratéxico para o país e que se sente a negociar medidas efectivas para que esta situación non se volva a repetir.
- Detalles
Chamamos a todo o persoal a participar nas concentracións convocadas contra o Decreto 40/2026, que modifica o 37/2006 de listas de substitucións. Aféctanos a todas e todos, no só ás persoas que están nas listaxes: falta de coberturas, denegación de permisos, vacacións... vai ligado a este despropósito. Esta é una modificación que recorta dereitos, limita as posibilidades de mellora laboral e impón condicións cada vez máis precarias e inxustas ao persoal interino e temporal da Administración Autonómica.
Non podemos permitir que a falta de planificación da Xunta se traduza en máis presión, menos garantías e peores condicións para as traballadoras e traballadores. A eliminación da mellora de emprego, os chamamentos urxentes con prazos mínimos, a suspensión automática nas listas ou a imposición exclusiva dos medios electrónicos son medidas inaceptables.
É o momento de responder colectivamente e defender os nosos dereitos, a conciliación, a estabilidade laboral e uns servizos públicos dignos.
Participa nas concentracións do martes 26 de maio ás 11:00 horas.
- Pontevedra: Edificio Administrativo Xunta de Galicia (Campolongo)
- Vigo: CRAPD 1-Meixoeiro
- A Coruña: Edificio Administrativo Monelos
- Lugo: Edificio Administrativo Xunta de Galicia (Rolda da Muralla)
- Ourense: Edificio Administrativo Xunta de Galicia (Casa de Chocolate)
- Ferrol: Edificio Administrativo Xunta de Galicia
- Compostela: Edificio Administrativo San Caetano ( explanada de arriba)
Asina en https://change.org/decreto40-2026
- Detalles
O mércores 27 as compañeiras e compañeiros da promoción interna do 2023 imos concentrarnos para esixir á directora xeral de Emprego Público é ao conselleiro de Facenda, o dereito que temos a que se nos dea destino definitivo simultaneamente co resto dos outros 8 procesos de corpos xerais que van poder facelo en breve.
Esta situación é unha mostra máis da falta de criterio e da indolencia desa dirección xeral. E ao mesmo tempo do escurantismo co que están a manexar esta situación. Nin dan destinos nin queren explicar por que. Eles teñen os datos, que se lles demandaron en infinidade de ocasións e non os quixeron aportar. Datos tan simples como cal é o total de postos de cada corpo que quedaron sen cubrir na fase de resultas do concurso de traslados, ou cantas persoas van ter que elixir destino da promoción interna de 2023, se ocultan.
Deixan sen destino definitivo a unha promoción das 8 pendentes é un claro caso de discriminación que non se pode consentir.
Acude á concentración o mércores 27 ás 11:00 diante da Consellería de Facenda en San Caetano.
Destinos definitivos XA para a promoción interna do 2023!!
PROMOCIÓNS INTERNAS... E NON ETERNAS!!
+ axilidade - dilacións
- Detalles
O nomeamento da docente de ensino secundario Eva López Tarrío prodúcese após a modificación da RPT en febreiro para abrirlle o acceso á dirección a persoal funcionario desde corpos e escalas sen relación directa co ámbito museístico nin coa dirección de institucións culturais.
A Xunta decidiu adaptar a praza da dirección do Centro Galego de Arte Contemporánea (CGAC) para facilitar unha designación discrecional allea ao perfil técnico, museístico e cultural que require unha institución estratéxica para o país e que foi un referente no nivel galego, do Estado español e incluso internacionalmente.
Así se explica que o pasado 20 de febreiro de 2026, a Administración levara á Mesa Sectorial a proposta de modificación da RPT da Consellaría. A medida principal consistía en abrir a dirección do CGAC —até entón reservada a persoal da Administración xeral e corpos vinculados ao ámbito museístico— á Administración do Estado, outras comunidades autónomas, Administración local e mesmo ao persoal docente.
A propia memoria xustificativa da modificación afirmaba que o posto posúe un “claro perfil técnico relacionado con coñecementos imprescindíbeis en arte contemporánea” e que a ampliación respondía á necesidade de garantir candidaturas con “formación e capacidade necesaria” para asumir a dirección do centro.
Porén, se realmente se recoñecía que a dirección do CGAC require coñecementos especializados e experiencia específica en arte contemporánea, o coherente tería sido reforzar os requisitos profesionais vinculados á museoloxía, á xestión cultural, á conservación patrimonial, á investigación e ao comisariado artístico. O que fixo a Xunta foi exactamente o contrario: diluír o perfil técnico até permitir o acceso desde corpos e escalas sen relación directa co ámbito museístico nin coa dirección de institucións culturais.
Sete días despois, o 26 de febreiro, a Comisión de Persoal aprobaba definitivamente a modificación da RPT co voto en contra da CIG e de CCOO, a abstención de CSIF e o apoio de UGT.
Consumouse así unha operación orientada a flexibilizar ao máximo os requisitos de acceso a unha das principais responsabilidades culturais da Xunta de Galiza.
A consecuencia directa do que denunciamos dende a CIG vémola agora nun grave conflito que abrangue ao propio persoal do CGAC e ao sector profesional da arte galega ao completo, que están a amosar a súa indignación e rexeitamento mediante o lema SÓS CGAC.
Isto é un chanzo máis no desmantelamento efectivo dos servizos públicos e, nomeadamente, da cultura e a arte de Galiza, que a Xunta do PP executa cunha patente falla de investimento real, e que agora vén de provocar, amais, a dimisión de tres dos cinco vogais do Consello Asesor do CGAC.
- Detalles
A vergonzosa realidade que estamos a vivir nos centros do Consorcio e da que a Xunta de Galiza permite mirar para outro lado.
Vas ao supermercado a facer a compra, hai cola e preguntas "quen vai de última?". Alí danche un número e sabes que se respecta a quenda. Pois ben, traballar para o Consorcio Galego de Servizos de Igualdade e Benestar hoxe en día é peor que ir ao súper: non hai números, non sabes en que posto estás, nin a quen tes diante.
1. O caos cronolóxico: Listas sobre listas
Temos un caixón de xastre onde se acumulan convocatorias sen actualizar con criterio: listas de 2007, 2008, 2019, 2023, as actuais de 2026 e as listas do INEM. Unha lea monumental cuxo único resultado é a opacidade máis absoluta. Como pode ser que en pleno ano 2026 un traballador non poida consultar de xeito limpo e transparente a súa posición real nunha listaxe pública?
2. Contratos de 3 anos que "caducan" pero non de todo
A lei di claramente que o máximo que se pode ocupar un posto de xeito temporal son 3 anos. Con todo, estamos vendo como a traballadores/as que lles remata ese contrato de 3 anos, os volven admitir para o mesmo posto e no mesmo centro de traballo sen respectar o descanso de 4 meses, tal e como recolle o Decreto de listas.
3. ¿Por que non se nos aplica o Decreto de listas?
A resposta é tan sinxela como dolorosa: porque se se aplicase o Decreto de Listas que rexe para o resto da Xunta, non poderían facer as falcatruadas que fan ata o de agora. Ao Consorcio vaille moi ben funcionar como un "chiringuito" aparte, onde chaman como queren sen ter que aterse a un decreto estrito. Sentímonos totalmente ninguneadas e utilizadas.
4. Pagamos por estar nas listas: onde están eses cartos?
Moitas pagamos as taxas de inscrición varias veces ao longo destes anos (2019, 2023, 2026...). Pagamos relixiosamente para estar nunhas listas que despois xestionan de costas a nós. Esiximos saber que se fai con eses cartos se o servizo que se nos devolve é o escurantismo.
Cal é a realidade: deixárono por imposible ou hai algo máis?
O persoal de PSX e xeros, xunto co resto de categorías, somos o sustento real dos centros de maiores e EI de Galiza. Sen nós, os centros non abren. O que está a pasar con este ente é noxento e indigno dunha administración pública.
Dende a CIG non imos calar: Esiximos unha ferramenta pública onde se poida ver en tempo real "quen vai de última", o cesamento inmediato dos contratos que esquivan o límite dos 3 anos, responsabilidades claras das persoas que permiten contratos en fraude de lei, dereito iguais: a integración total do Consorcio Galego de Servizos de Igualdade e Benestar no Decreto de listas xeral da Xunta.
Basta xa de ninguneo e de xogar co pan das nosas familias.
A TRANSPARENCIA NON É UN FAVOR, É O NOSO DEREITO!
- Detalles
Este luns 18/05/26, a CIG solicitoulle ao conselleiro de Facenda unha xuntanza para dar solución e que nos actos de elección de destino participen todas as promocións que estean nesa situación, sen que ningunha quede relegada a un futuro incerto.
As case 500 persoas funcionarias de corpos xerais que concorreron á promoción interna do ano 2023 en convocatorias derivadas das ofertas de emprego dos anos 2020 e 2021 non van poder acceder ao destino definitivo por unha decisión da directora xeral de Emprego Público e Administración de Persoal.
Das oito promocións de corpos xerais que están pendentes de obter o seu destino definitivo, unha delas, a promoción interna do 2023 non vai poder facelo, coa conseguinte perda de dereitos.
E todo isto pola decisión, ou mellor dito, pola indecisión e inhibición da directora xeral, de Emprego Público. Descoñecemos os motivos pois o argumento empregado en primeiro lugar foi que “non toca”. Despois, que “os procesos aínda non están aínda rematados”, cando si o van estar antes de que se convoquen todos os actos de elección de destino (as resolucións coas relacións de persoas que superaron os procesos publicouse no DOG do 30 de abril e a entrega de documentación remata a final de mes).
Ao mesmo tempo esta directora xeral non nos proporcionou datos, nin de cantas persoas teñen que elixir posto nesta promoción interna, nin de cantas na anterior (hai persoas que no concurso obtiveron postos abertos), nin de cantas prazas concretas faltarían para poder levar adiante todas as eleccións de destino, xa que a información foi xenérica.
Ás persoas que aprobaron a promoción interna hai que darlles destino definitivo, e adiar esa decisión non soluciona o problema da falta de prazas e resta dereitos ás persoas funcionarias problemas causados por unha decisión inxusta e incomprensible.
E si unha dirección xeral se inhibe nas súas funcións, o conselleiro ten que chamala á orde e obrigala a dar unha solución, aínda que moito nos tememos que despois de 3 días sen resposta, o problema tamén debe ser o conselleiro.
- Detalles
Podes consultar a resolución do DOG.
No DOG de hoxe 19.05.26, publícase a Resolución do 11 de abril de 2026, do tribunal designado para cualificar o proceso selectivo para o ingreso mediante o sistema de oposición, pola quenda de acceso libre e promoción interna, no corpo de auxiliares de carácter técnico de Administración especial da Administración xeral da Comunidade Autónoma de Galicia, subgrupo C2, escala auxiliar de cociña, convocado mediante a Resolución do 24 de xuño de 2025 (Diario Oficial de Galiza número 123, do 30 de xuño), modificada pola Resolución do 7 de xullo de 2025 (Diario Oficial de Galiza número 123, do 130 de xuño).
En relación co primeiro e segundo exercício do proceso selectivo:
• Anúlanse as preguntas número 24, 29 e 57 da parte específica do primeiro exercicio de promoción interna. As ditas pregunta son substituídas polas preguntas de reserva número 101, 102 e 103 respectivamente. Así mesmo, anúlase a pregunta 61 correspondente ao segundo exercicio, que se substitúe pola pregunta 104. Desestímanse na súa totalidade as restantes alegacións.
• Anúlanse as preguntas número 44, 49 e 77 da parte específica do primeiro exercicio da quenda libre. As ditas pregunta son substituídas polas preguntas de reserva número 123, 124 e125 respectivamente. Así mesmo, anúlase a pregunta 81 correspondente ao segundo exercicio, que se substitúe pola pregunta 126. Desestímanse na súa totalidade as restantes alegacións.
• O primeiro exercicio cualificarase de 0 a 60 puntos e para superalo será preciso obter un mínimo de trinta (30) puntos. Para estes efectos, nos criterios de corrección, publicados no portal web da Xunta de Galiza funcionpublica.xunta.gal, estableceuse que, no acceso pola quenda de promoción interna, superarían o primeiro exercicio as persoas aspirantes presentadas que teñan un mínimo do 40% das respostas correctas, unha vez feitos os descontos correspondentes. Nesta quenda acadou a puntuación mínima de 30 puntos unha persoa aspirante no seu conxunto, e fixouse en 24 o número de respostas correctas necesarias para conseguir a dita puntuación, unha vez feitas as deducións previstas.
• Na quenda de acceso libre superarán este exercicio as persoas aspirantes que teñan as mellores puntuacións ata completar o número máximo de persoas aspirantes determinado polo resultado de multiplicar por catro (4) o número de prazas convocadas por esta quenda, sempre que acaden o mínimo do 40% das respostas correctas unha vez feitos os descontos correspondentes. Na quenda de acceso libre acadaron a puntuación mínima de 30 puntos un total de 71 persoas aspirantes no seu conxunto, e fixouse en 32 o número de respostas correctas necesarias para conseguir a dita puntuación, unha vez feitas as deducións previstas.
• Asignarase a valoración de 30 puntos no exercicio ás persoas aspirantes que obteñan unha nota equivalente á nota de corte fixada. O resto das persoas declaradas aptas terán unha cualificación distribuída entre os 30 e os 60 puntos, proporcional ao número de respostas correctas (unha vez feitas as deducións por respostas incorrectas). Do mesmo xeito, asignarase a puntuación proporcional que corresponda ás persoas aspirantes declaradas non aptas.
• A corrección deste segundo exercicio unicamente se realizará no caso de superar as persoas aspirantes o primeiro exercicio. Asignarase a valoración de 20 puntos no exercicio ás persoas aspirantes que obteñan unha nota equivalente á nota de corte fixada. O resto das persoas declaradas aptas terán unha cualificación distribuída entre os 20 e os 40 puntos, proporcional ao número de respostas correctas.
• Na quenda libre superarán este exercicio as persoas aspirantes que acaden o mínimo do 50% das respostas correctas, unha vez feitos os descontos correspondentes. Se o número de aspirantes que superan o exercicio resulta inferior ao número de prazas convocadas, o tribunal declarará, ademais, que superaron o exercicio aquelas persoas aspirantes que acaden unha mellor puntuación ata completar o número de prazas convocadas. Neste suposto, será imprescindible que os aspirantes acaden o mínimo do 40 % das respostas correctas, unha vez feitos os descontos correspondentes.
Realizada a corrección, na quenda de acceso libre acadaron a puntuación mínima de 20 puntos un total de 38 persoas aspirantes no seu conxunto, e fixouse en 20 o número de respostas netas correctas necesarias para acadar a dita puntuación, unha vez feitas as deducións previstas.
• Na quenda de promoción interna acadaron a puntuación mínima de 20 puntos un total de 1 persoa aspirante no seu conxunto, e fixouse en 16 o número de respostas netas correctas necesarias para acadar a dita puntuación, unha vez feitas as deducións previstas.
• Estarán exentas de realizar o exercicio de coñecemento da língua galega as persoas aspirantes que acrediten a posesión, no día da finalización do prazo de presentación de instancias neste proceso, do Celga 4 ou do título equivalente debidamente homologado. Administración de Persoal publicará, no portal web corporativo funcionpublica.xunta.gal, unha listaxe de persoas aspirantes que deben realizar a proba por falta de acreditación do coñecemento do idioma galego.
• As persoas aspirantes poderán presentar as alegacións que consideren oportunas con relación ás puntuacións no prazo de dez (10) días hábiles contados desde o día seguinte ao da publicación no Diario Oficial de Galiza das cualificacións do segundo exercicio e deberá tramitarse a través da aplicación Fides.
• Contra esta resolución poderase interpoñer recurso de alzada perante a persoa titular da consellería competente en materia de emprego público.
- Detalles
Podes consultar a resolución do DOG.
No DOG de hoxe 19.05.26, publícase a Resolución do 30 de abril de 2026, do tribunal designado para cualificar o proceso selectivo para o ingreso mediante o sistema de oposición, pola quenda de acceso libre e promoción interna, no corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de coidadores, convocado mediante a Resolución do 24 de xuño de 2025 (Diario Oficial de Galiza número 123, do 30 de xuño), modificada pola Resolución do 7 de xullo de 2025 (Diario Oficial de Galiza número 133, do 14 de xullo).
En relación co primeiro e segundo exercicio do proceso selectivo:
• Anúlase a pregunta número 44 do primeiro exercicio de promoción interna e a correspondente pregunta número 64 do primeiro exercicio de acceso libre. A dita pregunta é substituída pola pregunta de reserva número 101 do exercicio de promoción interna e a correspondente pregunta número 123 do exercicio de acceso libre.
• O primeiro exercicio cualificarase de 0 a 60 puntos e para superalo será preciso obter un mínimo de trinta (30) puntos. Para estes efectos, nos criterios de corrección, publicados no portal web da Xunta de Galiza funcionpublica.xunta.gal, estableceuse que, no acceso pola quenda de promoción interna, superarían o primeiro exercicio as persoas aspirantes presentadas que teñan un mínimo do 40% das respostas correctas, unha vez feitos os descontos correspondentes, e na quenda de acceso libre superarán este exercicio as persoas aspirantes que teñan as mellores puntuacións ata completar o número máximo de persoas aspirantes determinado polo resultado de multiplicar por catro (4) o número de prazas convocadas por esta quenda, sempre que acaden o mínimo do 40% das respostas correctas unha vez feitos os descontos correspondentes.
• Asignarase a valoración de 30 puntos no exercicio ás persoas aspirantes que obteñan unha nota equivalente á nota de corte fixada. O resto das persoas declaradas aptas terán unha cualificación distribuída entre os 30 e os 60 puntos, proporcional ao número de respostas correctas (unha vez feitas as deducións por respostas incorrectas). Do mesmo xeito, asignarase a puntuación proporcional que corresponda ás persoas aspirantes declaradas non aptas.
• No acceso libre, superarán este exercicio as persoas aspirantes que acaden o mínimo do 50% das respostas correctas, unha vez feitos os descontos correspondentes. Se o número de aspirantes que superan o exercicio resulta inferior ao número de prazas convocadas, o tribunal declarará, ademais, que superaron o exercicio aquelas persoas aspirantes que acaden unha mellor puntuación ata completar o número de prazas convocadas. Neste suposto, será imprescindible que os aspirantes acaden o mínimo do 40% das respostas correctas, unha vez feitos os descontos correspondentes.
• A corrección deste segundo exercicio unicamente se realizará no caso de superar as persoas aspirantes o primeiro exercicio.
• Realizada a corrección, na quenda de acceso libre acadaron a puntuación mínima de 20 puntos un total de 118 persoas aspirantes no seu conxunto, e fixouse en 20 o número de respostas netas correctas necesarias para acadar a dita puntuación, unha vez feitas as deducións previstas.
• Na quenda de promoción interna acadaron a puntuación mínima de 20 puntos un total de 13 persoas aspirantes no seu conxunto, e fixouse en 17,50 o número de respostas netas correctas necesarias para acadar a dita puntuación, unha vez feitas as deducións previstas.
• Estarán exentas de realizar o exercicio de coñecemento da lingua galega as persoas aspirantes que acrediten a posesión, no día da finalización do prazo de presentación de instancias neste proceso, do Celga 4 ou do título equivalente debidamente homologado. Administración de Persoal publicará, no portal web corporativo funcionpublica.xunta.gal, unha listaxe de persoas aspirantes que deben realizar a proba por falta de acreditación do coñecemento do idioma galego.
O prazo de acreditación referido no parágrafo anterior será de dez (10) días hábiles contados desde o seguinte ao da publicación no DOG da resolución pola que o tribunal faga públicas as cualificacións do segundo exercicio e deberá tramitarse a través da aplicación Fides.
• As persoas aspirantes poderán presentar as alegacións que consideren oportunas con relación ás puntuacións no prazo de dez (10) días hábiles contados desde o día seguinte ao da publicación no Diario Oficial de Galiza das cualificacións do segundo exercicio e deberá tramitarse a través da aplicación Fides.
• Contra esta resolución poderase interpoñer recurso de alzada perante a persoa titular da consellería competente en materia de emprego público.
- Detalles
O concurso específico, xunto co concurso ordinario e a libre designación, é unha das formas de provisión de postos previstas na Lei do emprego público de Galiza, unha lei que é do ano 2015. Dende esa data, non se convocou ningún concurso específico, o que produciu que máis de 800 postos (básicamente xefaturas de servizo e sección), estiveran ocupadas en comisión de servizos, o que produciu un montón de postos bloqueados nos concursos ordinarios.
En xuño do 2025, a Xunta aprobou un modelo de bases de concurso específico. Ese modelo era moi aberto, moi xenérico, totalmente adaptable a que cada consellería publicase as respectivas convocatorias segundo o seu interese. Non era o modelo da CIG. Nen sequera nos gusta esta forma de provisión. Pero nin coa capacidade tan grande que tiñan para adaptalo e seleccionar, as consellerías tiveron a ben convocar as prazas. E así chegamos ata agora dende o ano 2015.
Temos xa a primeira consellería que convoca o concurso específico: a consellería de Facenda, incluíndo Atriga. No DOG do 20/05/2026 publican:
- RESOLUCIÓN do 12 de maio de 2026 pola que se convoca o concurso específico para a provisión de postos de traballo vacantes nesta consellaría (Facenda e Administración Pública).
É obxecto da presente convocatoria a provisión dos postos de traballo vacantes na Consellería de Facenda e Administración Pública que se relacionan no anexo I, mediante o procedemento de concurso específico.
As persoas interesadas en participar no concurso específico deberán presentar a súa solicitude do seguinte xeito:
a) Para persoas aspirantes da Administración da Xunta de Galiza, accedendo ao Portal do empregado público no enderezo electrónico https://portax.xunta.es
b) Para persoas aspirantes doutras administracións públicas, a través da sede electrónica da Xunta de Galiza.
As solicitudes presentaranse no prazo de vinte (20) días hábiles, que se contarán desde o día seguinte ao da publicación da correspondente convocatoria no Diario Oficial de Galiza.
- RESOLUCIÓN do 12 de maio de 2026 pola que se convoca o concurso específico para a provisión de postos de traballo vacantes na Axencia Tributaria de Galicia.
É obxecto da presente convocatoria a provisión dos postos de traballo vacantes na Axencia Tributaria de Galicia (Atriga) que se relacionan no anexo I, mediante o procedemento de concurso específico.
As persoas interesadas en participar no concurso específico deberán presentar a súa solicitude accedendo ao Portal do empregado público no enderezo electrónico https://portax.xunta.es
As solicitudes presentaranse no prazo de vinte (20) días hábiles, que se contarán dende o día seguinte ao da publicación da correspondente convocatoria no Diario Oficial de Galiza.
O concurso específico consiste na valoración dos méritos e das capacidades, os coñecementos ou as aptitudes determinados na convocatoria e relacionados cos postos de traballo que se vaian prover.
O concurso constará de dúas fases, na primeira valóranse os méritos, xerais ou específicos, e na segunda, as capacidades, as aptitudes ou os coñecementos que deberán gardar relación directa co perfil do posto que se vai prover, garantindo o respecto do principio de obxectividade.
