- Detalles
Na xuntanza á que asistimos o luns 11 de maio coa directora xeral de Emprego Público e Administración de Persoal (DXEP) para falarmos da resolución do concurso de traslados de corpos xerais e dos criterios para a elección de destino dos procesos selectivos, a DXEP deu a seguinte información:
- O prazo para a toma de posesión (concurso e procesos selectivos) podería ir ata mediados de xullo. A incorporación aos postos de traballo non será, segundo a súa previsión, máis aló do 15 de xullo.
En canto á orde de prelación para a elección de destino, a Xunta mantén a súa decisión anunciada unhas semanas atrás (con algún cambio):
- Dous bloques con criterios diferentes: os que non son de estabilización (1º bloque), e os que son de estabilización (2º bloque)
- Primeiro bloque: a orde de escolla é primeiro todos os A1 deste bloque, e sucesivamente os seguintes subgrupos; e dentro de cada subgrupo seguirían a orde: 1º funcionarización, 2º promocion interna 2020, 3º libre de 2019, 4º promocion especifica, 5º libre do 22
- Estabilización: irán a continuación, e escollerían por orde de convocatoria e dentro desta por subgrupo
- A promocion interna do 2023 non elixirá destino e non din cando o van facer. Insistimos en que se incluíran
Nota: Esta información pode ser ampliada. Para máis información pulsa aquí
- Detalles
O 24 de abril de 2026 fomos convocadas á xuntanza do Comité de Seguridade e Saúde Laboral (CSSL) da Consellaría do Medio Rural, cun atraso de máis de 3 meses. Nela tratamos as actuacións nos laboratorios de sanidade animal; a avaliación da maquinaria e o acordo da mesa de traballo da roupa de Agacal; as deficiencias das oficinas agrarias comarcais; a planificación preventiva para 2026; e as obrigas de fotoprotección do persoal e as medicións de radon na Consellaría.
Após do remate abrupto da anterior xuntanza, na cal non se trataron todos os puntos, aínda tiveron que pasar máis de 6 meses para esta convocatoria. Neste senso, levamos tempo reclamándolle á presidencia do Comité que a periodicidade das xuntanzas ten que ser trimestral, tal e como indica a Lei 31/95 de prevención de riscos. Após un novo compromiso da presidencia, e pola insistencia da CIG, a vindeira xuntanza do CSSL do Medio Rural será na semana do 15 ao 19 de xuño.
Deseguido achegamos os temas tratados, que poden ser do teu interese:
1. Actuacións nos laboratorios de sanidade animal
Despois de enviar un escrito, após as queixas recibidas por parte das persoas traballadoras, solicitamos información sobre os seguintes laboratorios.
• Laboratorio de Salcedo: comunican que xa puxeron unha porta de seguridade e un xerador eléctrico para corrixir as eivas. Teñen pendente de realizar unha obra estrutural da que irán informando.
• Laboratorio de Mabegondo: ante as peticións de aumento da seguridade, xustifican que ten a mesma que o Laboratorio Interprofesional Galego de Análise do Leite e o Laboratorio Agrario e Fitopatolóxico de Galiza.
• Laboratorio de Sanidade e Produción Animal de Galiza: din que as gardas de noite están no acordo de alertas sanitarias veterinarias e é neste acordo onde se deben de negociar.
2. Avaliación de toda a maquinaria de Agacal. Situación actual e medidas correctoras
• Por mor da demanda interposta pola CIG na Inspección de Traballo, retiráronse as máquinas que incumprían a normativa no CIAM e realizaron investimentos en renovación de maquinaria e apeiros.
• Realizaron unha auditoría no resto de centros de investigación de Agacal. Están a precintar os equipos que non cumpren. Solicitamos que se lle comunique ás traballadoras que equipos non se poden empregar.
• Afirman ter realizada unha auditoría de todos os centros de Agacal. Porén, reclamamos que nos centros de formación e experimentación agroforestal, nomeadamente o CFEA de Sergude, non implantaron até o momento as medidas correctoras.
3. Deficiencias nas oficinas agrarias comarcais
• Oficina Agraria Comarcal de Caldas: mudouse o sistema de climatización, pero recoñecen que aínda non quedou solucionado o problema. Están pendentes de arranxalo.
• Oficina Agraria Comarcal da Estrada: solucionaron os problemas de humidade e desconforto térmico.
4. Planificación preventiva para o 2026. Avaliación de riscos
Solicitamos de novo información sobre a previsión de peche e apertura dos centros, sobre todo do SPIF, xa que non pode ser que a información veña pola prensa ou polo ruxe-ruxe do servizo. Ademais, cando asistimos ás avaliacións iniciais, detectamos incumprimentos básicos (nos circuítos limpo-sucio, nas zonas de descanso, etc.).
Seguimos insistindo tamén en que non se pode poñer en funcionamento ningún centro sen avaliar, cousa que xa ten sucedido.
5. Acordo da mesa de traballo da roupa de Agacal
A roupa entregada a raíz da mesa de traballo introduce melloras, mais o acordo non se cumpriu na súa totalidade e as persoas delegadas da CIG así llo fixemos saber.
Solicitamos unha nova reunión da mesa de traballo, a documentación das licitacións e o cumprimento do pactado coa representación sindical.
6. Cumprimento da normativa de fotoprotección no ámbito laboral para todo o cadro de persoal da Consellaría do Medio Rural
Reclamamos que se lle proporcione fotoprotección a todo o persoal de campo da Consellaría. Na próxima xuntanza do Comité traerán datos da protección entregada.
7. Informe de medicións de gas radon nos centros da Consellaría do Medio Rural
Informan de que aínda están tomando datos. Dende a CIG solicitamos que se informe ao persoal das actuación que se están a levar a cabo e que, en canto teñan eses datos, se nos trasladen de xeito inmediato. As medicións fixéronse primeiro nas oficinas agrarias comarcais, agora estanse a realizar nos distritos e, por último, irán aos centros de Agacal.
Se tes algunha achega para este Comité, contacta coas delegadas e delegados da túa provincia; elas e eles transmitirannos as túas contribucións. Tamén podes enviarnos unha mensaxe á CIG-Autonómica.
- Detalles
A CIG convoca dúas novas asembleas abertas a través de internet para falarmos das condicións de traballo do Persoal Non Docente dos centros de ensino, e do persoal de cociña en xeral.
O obxectivo é que a Xunta se sente a negociar coas organizacións sindicais un acordo que regule as condicións laborais deste persoal.
As asembleas van ser en dous días e horarios diferentes, para facilitar así a participación de máis compañeiras e compañeiros:
- Mércores 13 de maio, ás 18:00 h
- Mércores 20 de maio, ás 11:00 h
Para acceder, vai á ligazón https://i.gal/pndmaio26
A diferenza da videoxuntanza do 15 de abril, estas dúas novas sesións van ser coas cámaras conectadas de todas as persoas participantes, e xa que logo, poderás intervir coa túa voz (non será necesario empregar o chat).
- Detalles
O mércores 06 de maio de 2026 tivo lugar unha xuntanza da Mesa de Diálogo de SEAGA onde se nos informou da creación de 42 brigadas de “reforzo” para o Servizo de Prevención de Incendios Forestais (SPIF). A duración dos contratos sería de 90 días e a súa xustificación viría dada pola falta de recursos en determinados períodos e localizacións.
Dende a CIG Autonómica non podemos compartir a volta a este sistema do pasado e a asumir que o problema dos lumes en Galiza é estacional. A experiencia destes anos amosoulle á Consellería do Medio Rural que os problemas de persoal do servizo de incendios non se solucionan cun mal chamado “reforzo” nin coa contratación de persoal a través de concellos ou sociedades, senón tendo un servizo estable e único que traballe todo o ano para poder realizar tarefas de prevención, extinción e atender as distintas multiemerxencias….e para iso xa existe o SPIF.
Estamos en total desacordo con este proceder e coa creación de postos de traballo de reforzo do SPIF con distintas condicións laborais. O único que si podemos celebrar é que por fin caeran na conta que en distintos territorios a falta de persoal é inadmisible. Mais non podemos esquecer que todo isto deriva da nefasta política de contratación de persoal de reforzo a través dos concellos e do desleixo da propia Consellería á hora de asumir as necesidades reais de persoal e proceder á súa cobertura en tempo e forma.
Por iso, instamos á Consellería do Medio Rural a que recapacite e implante xa a creación de postos no SPIF atendendo ás necesidades reais de cobertura do territorio e á nova tipoloxía de lumes cada vez máis virulentos e desestacionalizados. E por suposto, que esta cobertura de postos se faga directamente a través da propia Xunta de Galiza, homoxeneizando dunha vez por todas os dereitos laborais das persoas traballadoras do SPIF.
- Detalles
O Consorcio reclámalle ao persoal cartos que non lle aboou previamente en concepto de IRPF
Na prestación por risco durante o embarazo, as traballadoras tardan en cobrar a prestación varios meses, adiantándolle o Consorcio Galego de Servizos de Igualdade e Benestar o salario na contía correspondente á prestación. Esta situación ocasiónaa a demora na tramitación da prestación, por mor de causas imputables á propia entidade (demóranse en mandar a documentación á traballadora, ás veces meses, nun trámite que tería que ser inmediato).
Reclaman o que non se cobrou
Unha vez que a Mutua lle aboa á traballadora a prestación, con efectos que se retrotraen á data da suspensión, o Consorcio reclámalle as cantidades ingresadas en concepto de adianto.
O Consorcio esixe a devolución do importe bruto máis unha cantidade adicional en concepto de IRPF (que a traballadora non percibiu).
Esta práctica é común non só nas situacións de suspensión por risco para o embarazo, senón que a aplican tamén a outros supostos de cobramentos indebidos atribuíbles á empresa, onde se fixo un ingreso duplicado do IRPF.
Deixan nóminas mensuais a 0 €
Ademais de todo o anterior, o Consorcio adoita deixar a nómina a cero cando a cantidade requirida é superior ou igual ao salario mensual, sen negociar coa traballadora os termos da devolución. Esta práctica pode ser interpretada como unha penalización encuberta cando non existe acordo expreso ou resolución xudicial que avale a compensación total das cantidades.
O Estatuto das Persoas Traballadoras garante a percepción, como mínimo, do salario mínimo interprofesional, que ten carácter indispoñible e inembargable nos termos estabelecidos legalmente. A compensación ou desconto de cantidades non pode implicar, en ningún caso, que a persoa traballadora quede sen ingresos ou por debaixo dos límites legalmente protexidos.
Denuncia diante da autoridade laboral
En consecuencia, dende a CIG, denunciamos ao Consorcio na Inspección de Traballo e Seguridade Social por estas prácticas abusivas. Non son situacións que se produzan esporadicamente; afectan a todas as traballadoras en risco por embarazo e tamén aos pagamentos indebidos que se producen por mor da fallla de persoal no departamento de xestión de nóminas, entre outras causas.
- Detalles
A directora xeral de Emprego Público e Administración de Persoal convocou Comisión de Persoal para o venres 8 de maio, na que se van aprobar as convocatorias dos procesos selectivos de C1 e C2 de condución, e C1 e C2 de mantemento. Os documentos son exactamente iguais que os que enviaron para a MSF do luns 4 de maio.
Os catro teñen as seguintes características: forma de acceso mediante oposición; promoción interna conxunta con libre, co 25% das prazas, vertical e horizontal dende calquer escala do mesmo e inferior subgrupo. Para condución, habendo 3 exercicios puntuables deciden que despois de aplicar a puntuación do 1º para o desempate, xa pasamos á letra do apelido en troques de acudir ao 2º exercicio. E tamén para condución, néganse a fixar que a asignación do vehículo no que realizar o 3º exercicio será por sorteo e non a dedo polo tribunal.
- Detalles
A CIG demanda a apertura con carácter inmediato dunha negociación para corrixir as inxustizas que sofre o persoal de limpeza nos centros de ensino
Os rateos do persoal de limpeza nos centros de ensino continúan rexéndose por unha circular do ano 1994, unha normativa completamente desfasada que a Administración se nega a actualizar, malia a evidencia do cambio radical que experimentaron os centros educativos. Dende a CIG denunciamos esta situación como unha mostra máis do abandono e da falla de vontade política para dignificar as condicións laborais do persoal non docente.
Non é aceptábel que se sigan aplicando criterios pensados para aulas con mobiliario básico cando a realidade actual pasa por centros con laboratorios, talleres de formación profesional, aulas tecnolóxicas e espazos especializados que multiplican a carga de traballo. Esta situación non é froito do descoñecemento, senón dunha decisión consciente de non investir nin mellorar as condicións deste colectivo.
A comparación co persoal das empresas concesionarias da Xunta resulta demoledora: mentres estas establecen rateos de arredor de 1.300 m² por persoa, o persoal de limpeza de Educación ten que asumir até 1.800 m², nun claro exemplo de explotación laboral dentro da propia Administración. A isto hai que engadir que seguen a manterse as medias xornadas, perpetuando a precariedade, e que as baixas por incapacidade temporal non se cobren con axilidade, obrigando ao resto do persoal a asumir cargas de traballo absolutamente inasumíbeis.
Estamos ante un colectivo invisibilizado, que soporta as peores condicións laborais e salariais de toda a Administración. Unha situación que se agrava coa discriminación sufrida no proceso de funcionarización, no que o persoal de limpeza da Consellaría de Educación quedou excluído do recoñecemento de pluses como a penosidade, perigosidade ou toxicidade, a pesar de realizar tarefas que encaixan plenamente nesas condicións.
Dende a CIG temos claro que esta situación non pode continuar. Non abonda con medidas parciais nin con promesas baleiras. É imprescindíbel abrir de maneira inmediata unha negociación real que culmine nun acordo de condicións laborais para o persoal non docente que corrixa estas inxustizas.
Un acordo que revise en profundidade os rateos de limpeza adaptándoos á realidade dos centros, que elimine a precariedade das medias xornadas, que garanta a cobertura inmediata das baixas e que recoñeza economicamente a penosidade do traballo realizado. En definitiva, un acordo que dignifique este colectivo e que garanta tamén un servizo público de calidade para o conxunto da cidadanía.
A CIG non vai aceptar máis dilacións nin escusas. É o momento de actuar e de poñer fin a anos de abandono e discriminación.
- Detalles
A directora xeral de Emprego Público (DXEP) informou na Mesa Sectorial de Negociación do Persoal Funcionario (MSF) da data da xuntanza que os sindicatos solicitamos para falar dos problemas que hai coas eleccións de destino definitivo do persoal funcionario de corpos xerais. Finalmente a xuntanza vai ser o luns 11 de maio. No momento de escribir esta información non enviaran datos, tan só a convocatoria da xuntanza. Esa xuntanza debería ter sido na semana do día 20 de abril, que era cando estaba “previsto” publicar a convocatoria de elección de postos.
En canto aos puntos da Orde do día da MSF, discutimos as convocatorias de oposicións de condución (C1 e C2) e mantemento (C1 e C2).
Para as catro convocatorias, defendemos: o acceso mediante concurso-oposición; que dende a convocatoria ata a elección de destino non pase máis dun ano; a promoción interna separada e co 50%; etc.
Fixemos fincapé na proba con vehículo para os procesos de condución: esiximos que a adxudicación do vehículo sexa por sorteo, pois xa tivemos malas experiencias no pasado por números de aprobados moi diferentes entre os vehículos. Tampouco nos gusta que se midan os tempos, pois ante supostos diferentes para cada persoa candidata, os tempos de resolución tamén van ser diferentes, e iso rompe o principio de igualdade.
Como novidade respecto doutras convocatorias, satisfainos o cambio de criterio da DXEP por permitir a promoción interna vertical e horizontal dende calquera escala do mesmo e inferior subgrupo. A CIG leva anos reclamando que sempre, reciprocamente en todos os casos, se permita participar na promoción interna a calquera funcionario/a que teña a titulación requirida, dende outras escalas de igual ou inferior subgrupo.
- Detalles
A directora xeral de Emprego Público e Administración de Persoal convocou aos sindicatos a unha Mesa Sectorial de Negociación do Persoal Funcionario, na que se van tratar as seguintes convocatorias de procesos selectivos de acceso libre e promoción interna:
- C1-Mantemento de servizos (6 prazas, da OEP 2024). Descargar
- C2-Aux. de mantemento (20 prazas, das OEP 2024 e 2025). Descargar
- C1-Condución (19 prazas, das OEP 2023 e 2024). Descargar
- C2-Aux. de Condución (9 prazas, da OEP 2024). Descargar
Na proposta que envían, todas elas teñen a forma de acceso mediante oposición.
- Detalles
Despois de terllo solicitado, a Xunta segue sen aportarnos o dato clave que falta: o número de prazas vacantes que se xeraron na fase de resultas do concurso.
Na última mesa anunciaron que nos convocarían para dar unha explicación técnica sobre como van ordenar os procesos para evitar o problema de que puidesen quedar sen prazas para algúns corpos, pero polo de agora nin nos chamaron nin nos facilitaron os datos.
Cos datos aos que podemos acceder EXISTE un problema evidente: hai 376 persoas do subgrupo A1 que teñen que tomar posesión e hai no mellor dos casos, e non vai ser así, 378 prazas sobrantes do concurso abertas ao A1. E si sumamos a promoción interna do 2023 (da que non sabemos cantas persoas van ter que escoller posto), a cousa vaise complicar bastante.
Isto é resultado da falta de planificación, de retirar alegremente prazas do concurso (lembremos as 200 retiradas, grande parte delas das oficinas de emprego), etc.
Para algún sindicato isto é unha mensaxe “apocalíptica”. Nós intentamos primeiro, buscar explicacións, e segundo, buscar solucións. O que non facemos é mirar para outro lado.
As primeiras medidas que parece querer tomar a Xunta é facer dous bloques cos actos de elección de destino e non incluír en ningún deles ás persoas da última promoción interna, o cal lles vai supoñer unha perda de dereitos, e aínda así vai seguir habendo problemas.
O que temos claro é que se non hai postos dabondo o que hai que facer en primeiro lugar é CREALOS, cousa que a Xunta xa ten feito noutros casos análogos este mesmo ano. E se así non chegan haberá que buscar outras fórmulas alternativas, porque se non como van facer coas promocións do bloque 2 e coa última promoción interna?
Cos datos que puidemos recopilar ata o de agora a situación é a seguinte:
Persoas pendentes de destino definitivo (a orde das promocións dentro dos bloques, e coa que non estamos dacordo, é a que comentou a DXEP na mesa xeral do 14 de abril)
*Na promoción interna do 2023 o reflectido é o número de persoas aprobadas, non ó número de persoas que terían que elixir destino.
Postos non adxudicados no concurso
Vendo isto, calquera persoa pode deducir que, sin ser “apocalípticos”, hai un problema. Dos 1.287 postos non asignados en resultas, aínda que non se nos aporten os datos, pódese intuír que gran parte deles non foron asignados porque ao titular ou non lle deron o posto desexado no concurso ou renunciou. Sería o caso das 96 seccións e 241 negociados das 7 grandes cidades que non se asignaron en resultas e por tanto non quedaron vacantes.
Por todo isto esiximos á Xunta que aporte os datos e nos convoque XA!
