- Detalles
Fomos convocadas á negociación dunha modificación da RPT con cambios debidos á redistribución de competencias entre Educación e Industria, co paso da Axencia Galega de Innovación (Gain) a Educación. Opoñémonos ás modificacións das xefaturas de negociado, e solicitamos a revisión das áreas funcionais.
A respecto da proposta de modificación de RPT que trae á mesa de negociación Gain, as nosas principais alegacións foron as seguintes:
- Creación do posto de dirección da Área de Servizos, aberto a outras administracións: indicamos que lle falta o código 640- PARA PERSOAL DOUTRA ADMINISTRACIÓN, CURSO DE PERFECCIONAMENTO DE GALEGO (R.I.). Ademais, criticamos os cambios no sistema de provisión, que deben xustificarse na memoria, e esta información non está. E non concordamos coa apertura ao Estado e outras comunidades autónomas, mentres que na Axencia argumentan que queren garantir a cobertura dun perfil moi técnico.
- Modificación do posto de Dirección da Área de Talento e Transferencia: non aparece modificado no listado de equivalencias da RPT, aínda que se menciona na memoria.
- Modificación do posto de xefatura de Centros (Ferrol): non entendemos por que se lle pon entre parénteses “Ferrol”, cando a súa codificación xa indica este muicipio co código 15350.
- Modificación das xefaturas de negociado da Área de Xestión: opoñémonos ao cambio de disposición, pois ditos postos estarán traballando nalgún dos departamentos, non para a dirección de Área da que pasan a depender; é máis, prodúcese un agravio ao non poñerlle a área funcional (ben sexa económica ou de contratación).
- Revisión das áreas funcionais: consideramos que existen postos que non teñen o que deberían ter como, por exemplo, a xefatura de sección de Xestión de Axudas, xa que a súa área funcional sería ECO (ECONOMÍA); ou a xefatura de sección do Departamento de Xestión Financeira e Contratación, que posiblemente podería ter a área funcional CON (CONTRATACIÓN). Por ese motivo solicitamos a revisión das áreas funcionais. Por parte de Gain contestaron que o van revisar.
Por outra banda, Gain aclarou que, a respecto as convocatorias de concurso específico, non teñen previsións, e están á expectativa do que faga Emprego Público, e das condicións doutros departamentos da Xunta, para manter unha coherencia.
- Detalles
Na rolda de intervencións da Comisión de Persoal do venres 3 de xullo preguntamos polas solicitudes da carreira pendentes de resolución, así como pola concreción de datas das distintas fases dos concursos F0425, F0326 e F0525.
Resolucións pendentes da carreira profesional
- Preguntamos pola situación na que está a tramitación das solicitudes, dado que nos consta que a día de hoxe continúan sen estar resoltas algunhas, cando o prazo de 6 meses para resolvelas xa rematou o 30 de xuño.
- A DXEP dinos que non lles faltan moitas por estimar, a día 30 de xuño tiñan practicamente todo feito, e o resto serían solicitudes inadmitidas ou desestimadas. Estes días a directora asinou varias resolucións estimatorias, que lles chegarán nos vindeiros días ás persoas solicitantes.
Previsións do concurso F0425 (mantemento, recursos naturais e forestais, cociña, condución, laboratorio e limpeza)
- Unha vez resolto o concurso, preguntamos se poden concretar a data de toma de posesión, así como as datas das eleccións de destino e tomas de posesión dos procesos selectivos derivados deste.
- A DXEP responde que o 26 de xuño se publicou a resolución do acto de elección de destino, pero o nomeamento e adxudicación de destino non van realizala no mes de xullo. Van ter a elección de destino e toma de posesión en setembro, e incluirán procesos de acceso libre de convocatorias de 2023 e 2024 (que elixirán despois das persoas que superaron os procesos selectivos de estabilización).
Previsións do concurso F0326 (educador/a infantil, educación infantil e persoal coidador)
- Preguntamos pola data concreta da adxudicación de postos e toma de posesión, e dos procesos selectivos derivados deste concurso.
- A DXEP responde que manteñen a previsión e publicarán na primeira quincena do mes de xullo a resolución de elección de destino e a resolución de adxudicación de postos. A toma de posesión en todos estes casos será o 1 de setembro, para que estas persoas estean incorporadas co comezo de curso o 4 de setembro.
Previsións do concurso F0426 (persoal xerocultor e PSX)
- Pedimos a concreción da data de xullo na que se publicará o baremo provisional, así como a previsión das datas para a elección de destino, adxudicación de postos e toma de posesión.
- A directora xeral só confirma que o baremo provisorio se publicará en xullo, sen aclarar máis datas.
Previsións do concurso F0525 (persoal facultativo, técnico facultativo, gobernante e auxiliar de clínica)
- Preguntamos pola adxudicación de postos do concurso e dos procesos selectivos derivados del.
- A DXEP indica que se publicará a semana do 9 de xullo a resolución de elección de destino e de adxudicación de postos, e publicarán procesos de 2024.
- Detalles
Na Comisión de Persoal (CP) do 3 de xullo de 2026 tratamos a convocatoria de oposicións (acceso libre e promoción interna) de enxeñaría de camiños, canles e portos e de análises de laboratorio. A Administración non tivo en conta ningunha das nosas alegacións, polo que votamos en contra das propostas de ambos os dous procesos.
A Dirección Xeral de Emprego Público (DXEP) trouxo á Comisión as mesmas propostas que levou á Mesa Sectorial, só cuns últimos retoques de trámite, tanto no caso de enxeñaría como de análises de laboratorio.
Solicitudes da CIG para todos os procesos selectivos
Na CIG mantemos en pé as nosas solicitudes para todos os procesos selectivos, que pasan necesariamente, entre outros, polos seguintes cambios, cara a uns procesos máis rigorosos, igualitarios, obxectivos, transparentes e democráticos:
- Concurso-oposición en vez de oposición.
- Modificación da lei para a substitución da proba de galego pola realización do 1º exercicio só en galego.
- Promoción interna separada e dun mínimo do 50%.
- Substitución da parte específica por normas de dereito positivo.
- Puntuación dos temas reducida ao 50% da puntuación dos test.
- Eliminación dos tribunais designados a dedo, e substitución pola designación por sorteo.
- Ampliación a todos os supostos da exención do 100% das taxas, incluíndo expresamente tamén as familias monomarentais/monoparentais (pedimos que se insten as modificacións normativas precisas), tendo en conta a situación de crise actual.
Cambios nas convocatorias de enxeñaría de camiños, canles e portos e de análises de laboratorio
A respecto dos cambios nas propostas que Emprego Público fixo nos borradores dende a Mesa Sectorial salientamos a modificación das notas de corte, no caso da enxeñaría, á que non lle vemos problema; e a redución do temario de 28 a 26 temas, no caso de análises de laboratorio, pero en apariencia, porque refunden os temas 20 e 21 do borrador nun único tema 20; e refunden o 22 e 23 do borrador nun único tema 21.
Votacións
Tendo en conta o anterior, o sentido do voto nesta Comisión foi o seguinte:
- Borrador da convocatoria do A1-Escala de enxeñaría, especialidade de camiños, canles e portos: CIG: voto en contra. Quedou aprobado.
- Borrador da convocatoria do C1-Escala técnica de análises de laboratorio: CIG: voto en contra. Quedou aprobado.
- Detalles
O venres 3 de xullo de 2026 tivemos unha xuntanza informativa coa directora xeral de Emprego Público na que deu unha serie de información a respecto dos autos de extensión de efectos de sentenzas de destino definitivo
O 29 de abril a Xunta de Galiza recibiu o fallo do Tribunal Supremo polo que desestimaba o recurso de casación interposto pola Xunta de Galiza contra tres sentenzas de autos de extensión de efectos.
A Xunta tiña presentados recursos de casación contra todos os autos de extensión de efectos que foron saíndo, pero unha vez emitido este fallo, o Tribunal Supremo estaos inadmitindo, polo que todos os autos adquiren firmeza e xeran xurisprudencia.
O 22 de maio tivo lugar unha xuntanza cos sindicatos para informar que ían enviar unha serie de comunicacións a todas as persoas que promoveran autos de extensión de efectos, e que dependendo da situación desas persoas elaboraron diferentes modelos de comunicacións.
Tiñan un modelo para aquelas persoas que solicitaran medidas cautelares e xa estaban ocupando o posto con carácter definitivo por execución provisional do auto. A esas persoas o que lle indicaron nese modelo é que permanecerían nese posto no que xa tiñan unha resolución de adxudicación e que, por tanto, non as convocarían para a elección de destino.
Despois había outras solicitudes con autos que non estaban executados de forma provisional ou incluso que aínda non tiñan auto porque estaban suspendidas polo TSXG en tanto en canto non se pronunciase o Tribunal Supremo.
Agora que o Tribunal Supremo se pronunciou, os autos das solicitudes de extensión de sentenza adquiriron firmeza e xa lle están chegando ás persoas afectadas, que xa poden instar a súa execución á Xunta de Galiza. Para todas estas persoas, segundo a súa situación, Emprego Público elaborou dous modelos:
- Un modelo para o caso dos concursos de traslados que non están resoltos e que non teñen unha resolución de adxudicación, no que lle indicaban as persoas afectadas que tiñan dúas opcións: ou continuar coa súa pretensión de extensión de efectos, co que de estar o seu posto incluído no concurso de traslados sería retirado, ou que os convocarían á elección de destino. Neste caso, se o posto se adxudica no concurso de traslados pois así quedaría, e se non fose adxudicado, iría para a elección de destino.
- Un segundo modelo para o caso do concurso de traslados de corpos xerais, no que xa había unha resolución de adxudicación. Neste caso, o que lle indicaban ás persoas era que se continuaban coa súa pretensión de solicitude de extensión de efectos sacarían unha modificación da resolución da adxudicación de postos do concurso publicada no DOG do 17 de abril.
As comunicacións realizáronas o 28 de maio e enviaron comunicacións relativas a postos de facultativos e de escalas sociais e corpos xerais. O 5 de xuño enviaron comunicacións a postos da escala de persoal veterinario e o 9 de xuño a postos da escala de informática.
Como resumo da situación dos postos afectados nos concursos de traslados, no caso do concurso de corpos xerais, na xuntanza do 22 de maio dixeran que eran 18 postos, pero finalmente quedáronse en 15. No caso das escalas sociais, indicara que eran 41 postos os afectados, pero finalmente son 37 e no caso do concurso de persoal veterinario, son 19 postos que aparecen retirados do concurso no DOG do 3 de xullo, que se engaden aos 6 postos que xa retiraran no seu momento na resolución de solicitude de postos do concurso.
Xustifícase a DXEP en que enviaron todas estas comunicacións para poder finalizar os concursos de traslados. Dixo que se non as enviaran terían que paralizar os concursos ata que as persoas que promoveron os autos instasen á Xunta de Galiza a executalos unha vez declarados firmes. E tamén quedarían afectadas todas as persoas dos procesos selectivos que están á espera de elección de destino.
Dixo tamén que para poder continuar cos concursos de traslados con seguridade xurídica e para poder dar destino a todas as persoas afectadas, fixeron esas comunicacións tras pedir asesoramento á Asesoría Xurídica Xeral.
No caso das comunicacións nas que as persoas tiñan que optar por continuar coa súa pretensión ou por ir á elección de destino, no propio texto xa poñía que no caso de que non optaran por ningunha desas dúas opcións, consideraban que o que prevalecía era a súa pretensión de continuar coa solicitude de extensión de efectos e, polo tanto, a esas persoas non as convocaban para o acto de elección de destino.
No caso de ter que modificar a resolución da adxudicación de postos do concurso de corpos xerais, faríano neste mes de xullo para que as persoas afectadas poidan tomar posesión cos mesmos efectos nun posto de similares características o 15 de setembro.
Na vindeira semana publicarán tanto a resolución de adxudicación de postos como a resolución de elección de destino pendentes e nas vindeiras semanas publicarán o resultado de adxudicación de destino de corpos xerais e das escalas sociais, e no caso da escala de veterinaria o baremo provisional xa o publicaron no DOG do 3 de xullo.
Na rolda de intervencións, como CIG preguntamos pola situación á que se viron avocadas as persoas ás que lles foi adxudicado un posto no concurso de traslados e que agora se ven afectadas polos autos de extensión de sentenza.
A DXEP respostou que o 25 de xuño enviaron unha comunicación a través do sistema Notifica.gal para abrir un trámite de audiencia coas 15 persoas afectadas adxudicatarias dun posto no concurso de traslados de corpos xerais para ofrecerlles un posto de similares características, entendendo por similares características o mesmo nivel, a mesma localidade e as mesmas retribucións. Dixo que en calquera caso queren chegar a un acordo con esas persoas.
- Detalles
A solicitude da identificación dos postos presentada pola CIG o 3 xullo de 2025 non recibiu resposta da Dirección da Gain até a data, incumprindo a lexislación vixente.
A CIG vén de reiterar a súa reclamación ante a Axencia Galega de Innovación (Gain) para que publique e identifique os postos de traballo que serán ofertados no acto de elección de destino do proceso extraordinario de estabilización derivado da Lei 20/2021.
O sindicato lembra que as persoas aspirantes levan un ano e medio agardando pola continuación do proceso e denuncia que, malia as solicitudes realizadas xa en 2025, Gain segue sen facilitar unha relación completa das prazas nin das súas características.
A CIG advirte de que a Axencia carece dunha relación de postos de traballo aprobada e considera inaceptábel que se obrigue ás persoas participantes a escoller destino sen coñeceren aspectos esenciais como a localización, a unidade de adscrición, as funcións, a xornada ou as condicións económicas das prazas.
Para esta organización sindical, unha elección «ás cegas» vulneraría os principios de igualdade, mérito, capacidade, publicidade, transparencia, seguridade xurídica e boa administración, e podería supoñer diferenzas de trato ou eleccións condicionadas pola falla de información.
Esta información tamén é necesaria dende a perspectiva de igualdade retributiva, dado que o Real Decreto 902/2020 esixe coñecer e valorar correctamente os postos de traballo para comprobar a aplicación efectiva do principio de igual retribución por traballo de igual valor.
Así mesmo, a Directiva (UE) 2023/970 reforza a esixencia de transparencia retributiva, ao proclamar que as persoas traballadoras temos dereito a coñecer os criterios de fixación salarial e a información necesaria para comprobar a igualdade retributiva.
Por iso, a CIG solicita que, antes da convocatoria do acto de elección, se publique a relación completa e detallada dos postos, incluíndo a súa denominación, centro de traballo, funcións, horario, requisitos e retribucións, garantindo que todas as persoas aspirantes poidan exercer o seu dereito de elección con pleno coñecemento das condicións das prazas.
- Detalles
Na Comisión de Persoal do venres 26 de xuño de 2026, o único punto da orde do día foi a modificación da RPT da Axencia de Turismo de Galiza (Aturga) na que non se tivo en conta ningunha das alegacións feitas pola CIG na mesa sectorial de persoal funcionario ante a D.X. de Emprego Público e onde a súa directora cercenou a negociación previa dos sindicatos coa Axencia na cal se conseguira a posibilidade de incremento do complemento especifico dos dous postos de técnicos/as de cociña, polo cambio substancial de horario. Ante iso, o noso voto foi en contra desta modificación.
Na rolda de intervencións recordamos que o día anterior rexistramos un escrito dirixido á DXEP no que expresamos o noso total desacordo coa retirada para os vindeiros actos de elección de destino de postos que xa pasaron polos concursos de traslados. Pedimos transparencia nestes procesos e esiximos unha explicación de por que actúan como actúan, así como polos criterios de elaboración das listaxes de postos para os diferentes actos de elección de destino.
Cando o normal sería que esas listaxes estivesen conformadas cos postos que non se adxudicaron no concurso de traslados, o que nos atopamos son listaxes nas que desaparecen postos sen argumento ningún, tendo que facer investigacións e suposicións do que sucede, xa que recibimos multitude de chamadas de parte do persoal notificando que faltan postos, en moitos casos en centros periféricos, co que supón isto nun acto de elección de destino tan masificado. Mentres, o que si inclúen son postos que non pasaron previamente polo concurso de traslados.
As respostas da directora xeral resultan abraiantes, tanto como a súa actitude non negociadora, xa que o que nos viu a dicir en repetidas ocasións no transcurso da xuntanza é que a única obriga que ten é a de ofrecer tantos postos como persoas aprobadas. Que simpática! Sen máis explicacións nin argumentos sólidos, resulta cruel a súa negativa a incluir todos os postos vacantes, como sempre esiximos dende a CIG, condenando ao persoal a ter que desprazarse ao longo da xeografía galega en busca dun destino definitivo.
Tamén insistiu en que as listaxes de postos que figuran na web de Emprego Público son totalmente informativos, que os postos que van para o acto de elección de destino son "cousa" da dirección xeral de Emprego Público, co cal "non se retira nada" e que a directora creou esas listaxes como considerou oportuno. Tal cual.
Pedimos explicacións polas comunicacións que se fixeron por carta ás persoas que demandaron o destino definitivo nos postos que ocupan actualmente en destino en provisional, nas que se lles cominaba a elexir entre continuar coa demanda ou optar por presentarse no acto de elección de destino.
Fixemos tamén unha interpelación polas chamadas telefónicas que recibiu parte do persoal para que optase por acudir ao acto de elección de destino co argumento de que as extensións de sentenza estaban sendo desestimadas. Pedimos máis información ao respecto, mais o único que dixo é que é cousa da semana pasada e que van sair todas así. Se logo alguén recorre xudicialmente e gaña, di que xa se verá, pero que de momento actúan así.
Ante a cuestión de se consideraban axeitado que unha administración pública se comunique co seu persoal a través de chamadas telefónicas cando menos intimidantes ou pouco defendibles, a súa resposta é que si que poden, que de non facelo así, o persoal directamente se daría por enterado a través da publicación no DOG. Ou sexa, que as chamadas foron un acto de xenerosidade pola súa parte.
En relación a outras cuestións vinculadas cos concursos de traslados pendentes, actos de elección de destino e convocatorias afectadas, nin se molesta en contestar.
Dende a CIG consideramos que deberían chamarse mesas de non negociación xa que actúan con mala fe a cada decisión que toman.
A Xunta debería recapacitar sobre a quen puxo diante desta dirección xeral de Emprego Público, pois temos unha directora que non dirixe. Aínda que... quen sabe, ao mellor ese é o obxectivo.
- Detalles
Dende a CIG solicitámoslle a Emprego Público que nos aclare posto a posto a tremenda desfeita que está a facer nos procesos de elección de destino dos corpos xerais.
Temos moitísimas queixas de persoas traballadoras que están nestes procesos e que non saben o motivo de que se “comeran” tantos postos.
Non sabemos se en Emprego Público pensan que só son “dúas ou tres persoas afectadas”; por iso, achegamos uns modelos de queixa para remitirllos á directora xeral de Emprego Público e á Valedora do Pobo e así poñer de manifesto a verdadeira dimensión do cristo e descontento do persoal co seu proceder.
- Detalles
Hai días nos que un pensa que a capacidade de Emprego Público para sorprendernos chegou ao límite, pero despois supéranse. Vaia cristo formaron! Se o obxectivo era xerar o caos absoluto e cabrear a todo o persoal, temos que darlles un aplauso. Conseguírono.
Non sabemos moi ben quen está aos mandos da cociña en San Caetano, pero decidiron que a mellor forma de xestionar os recursos humanos era facer unha boa queimada administrativa: todo para dentro, que arda, e que Deus reparta sorte.
Cunha falta de respecto total e absoluta para os que levamos anos traballando aquí, meteron nunha barafunda monumental a todo quisqui. Da igual a túa categoría, a túa traxectoria ou o teu esforzo. Na pota de Emprego Público entrou por igual o persoal dos subgrupos A1, A2, C1, C2 e maila Agrupación Profesional de persoal funcionario subalterno da administración xeral.
Todos xuntos e revoltos, sen orde nin concerto. Procesos cruzados onde mesturaron sen pudor o acceso libre, a promoción interna (esa gran esquecida á que agora lle dan a estocada final), os procesos de funcionarización e como o ingrediente estrela, para que a mestura fose aínda máis explosiva, sumáronlle as prazas de estabilización da Lei 20/21.
O resultado? Unha elección de destino que parece un xeroglífico exipcio redactado tras unha noite de verbena. Unha auténtica falta de consideración para miles de opositores/as e persoal funcionario que se xoga o seu futuro laboral nestes procesos e que merece claridade, non unha tómbola.
Sinceramente, dende a CIG non atopamos unha explicación lóxica nin racional para este despropósito. Para darlle o visto bo a semellante desfeita hai que estar moi fóra da realidade.
En vez de traballar con rigor, de planificar de xeito transparente e de respectar os dereitos de cada colectivo, a Administración optou pola vía rápida: a do chapeu e o barullo.
Toca amañar isto XA!
Dende a CIG advertimos: por aí non imos pasar. Non imos ser cómplices deste circo nin imos permitir que se tire ao lixo o respecto polo persoal funcionario. Esiximos a Emprego Público que baixe do planeta no que está a vivir.
Se pensaban que iamos tragar con esta receita do caos, esquecéronse de que o persoal ten memoria e moito orgullo. Imos dar a batalla para que se rectifique de inmediato. Se non hai cambios rápidos, que teñan por seguro que nos van ter en fronte.
UNIÓN E LOITA !!!
- Detalles
No DOG do 23/06/2026 publican a RESOLUCIÓN do 19 de xuño de 2026 pola que se convocan para a elección de destino definitivo as persoas aspirantes que superaron os procesos selectivos para o ingreso no corpo superior da Administración xeral da Comunidade Autónoma de Galiza, subgrupo A1, no corpo de xestión da Administración xeral da Comunidade Autónoma de Galiza, subgrupo A2, no corpo administrativo da Administración xeral da Comunidade Autónoma de Galicia, subgrupo C1, no corpo auxiliar da Administración xeral da Comunidade Autónoma de Galiza, subgrupo C2, e na agrupación profesional de persoal funcionario subalterno da Administración xeral da Comunidade Autónoma de Galiza.
Publican como anexo I a relación de persoas aspirantes que superaron algún dos procesos selectivos sinalados anteriormente no mesmo DOG e que son emprazadas á elección de destino definitivo, segundo a orde que, en aplicación das bases das convocatorias, deberá seguirse para os efectos da adxudicación de destino. Exclúense deste acto de elección de destino as persoas que adquiriron a condición de persoal funcionario de carreira mediante cambio de vínculo xurídico e que foron adxudicatarias dun posto definitivo no concurso de traslados. Igualmente, non son convocadas a este acto de elección aquelas persoas aspirantes que con posterioridade á adxudicación provisional dun posto obtivesen un destino definitivo no mesmo corpo mediante o sistema de libre designación.
Os postos ofertados e os requisitos exixidos para a súa ocupación figuran como anexo II desta resolución. As persoas aspirantes elixirán por orde as prazas correspondentes a subgrupo ao que acceden e de conformidade co indicado no anexo II desta resolución.
Para o acceso á aplicación informática para a elección de destino, a Dirección Xeral de Emprego Público e Administración de Persoal remitirá ás persoas aspirantes un correo electrónico co usuario e a clave de acceso á aplicación do proceso selectivo.
No prazo máximo de dous (2) días hábiles contados a partir do día seguinte ao da publicación desta resolución no DOG, a persoa aspirante, no suposto de que non recibise correctamente o seu usuario e clave, deberá poñerse en contacto co servizo informático da Dirección Xeral de Emprego Público e Administración de Persoal, no teléfono 881 99 98 83, para que se lle faciliten os datos necesarios.
Unha vez transcorrido o prazo sinalado no parágrafo anterior, abrirase un prazo de cinco (5) días hábiles para que as persoas aspirantes que constan no anexo II desta resolución seleccionen telematicamente, a través do sistema electrónico, os destinos ofertados por orde de prelación.
A elección de destinos deberá realizarse a través do sistema electrónico ao cal se poderá acceder a través da páxina web da Dirección Xeral de Emprego Público e Administración de Persoal https://www.xunta.gal/es/funcion-publica/procesos-selectivos/eleccion-destino
Finalizado o prazo para a elección de destinos, a aplicación efectuará a adxudicación automática de destinos, en función do subgrupo a que se accede e a orde de prelación acadada por cada persoa aspirante no proceso e atendendo á orde de preferencia na selección de destinos efectuada por esta.
- Detalles
No DOG do 23/06/2026 publican a RESOLUCIÓN do 12 de xuño de 2026, da Dirección Xeral de Formación Profesional, pola que se convocan, con carácter gratuíto, cursos de linguaxe administrativa galega e cursos preparatorios para a obtención dos certificados de lingua galega, Celga, que se realizarán en varias escolas oficiais de idiomas de Galiza no curso académico 2026/27.
Os cursos de linguaxe administrativa galega ofertados nas distintas escolas oficiais de idiomas de Galicia figuran no anexo I desta resolución. Os cursos do primeiro cuadrimestre impartiranse entre setembro e decembro; os do segundo cuadrimestre, entre xaneiro e abril.
A oferta dos cursos preparatorios para os certificados de lingua galega, Celga, figura no anexo II desta resolución. Os cursos do primeiro cuadrimestre impartiranse entre setembro e decembro; os do segundo cuadrimestre, entre xaneiro e maio.
As persoas que desexen participar nos cursos convocados nesta resolución deberán cubrir o formulario de inscrición telemática no enderezo www.eoidigital.com/preinslinguagalega. O proceso de inscrición non se considerará correctamente completado ata que as persoas seleccionadas presenten toda a documentación requirida, como se especifica no punto quinto desta resolución.
O prazo para a presentación das solicitudes será o seguinte:
– Desde o 29 de xuño ata o 10 de xullo de 2026, para os cursos do primeiro cuadrimestre.
– Desde o do 2 ao 13 de novembro de 2026, para os cursos do segundo cuadrimestre.
Se un curso ten un número de solicitantes que cumpran os requisitos maior que o número de prazas dispoñibles, a asignación farase por sorteo.
Os cursos de linguaxe administrativa galega de nivel medio e superior van dirixidos ao persoal ao servizo da Administración pública da Comunidade Autónoma, das entidades públicas instrumentais e da Administración institucional de Galiza; da Administración de xustiza, das entidades locais de Galiza, e ao persoal técnico, de xestión e de administración e servizos (PTXAS) das universidades do SUG.