- Detalles
Nota informativa enviada pola Dirección Xeral de Emprego Püblico e Administración de Persoal: días de asuntos paticulares para o ano 2025
A resolución do 24 de febreiro de 2016 da Dirección Xeral da Función Pública, pola que se ditan instrucción sobre o réxime de vacacións, permisos e licenzas, no seu apartado décimo cuarto (artigo 118 da Lei 2/2015, do 29 de abril, do emprego público de Galicia), punto 5, establece que:
“Incorporase un día adicional de asuntos particulares por cada unha das festividades laborais de ámbito nacional de carácter retribuído, cando coincidan con sábado en dito ano, agás os traballadores a quendas que xa teñen garantidos o número de festivos anuais a través das carteleiras”
No ano 2025 os festivos laborais de ámbito nacional que coinciden en sábado, segundo o calendario de festivos publicado no Boletín Oficial do Estado son o día 1 de novembro (festividade de todos os santos) e o día 6 de decembro (Día da Constitución).
Como consecuencia, no ano 2025 os días de asuntos particulares serán oito.(8)
https://www.boe.es/diario_boe/txt.php?id=BOE-A-2024-21316
- Detalles
Aínda que a administración xeral da Xunta ten personalidade xurídica ÚNICA, hai consellerías que non o queren entender e van por libre.
Esta insubmisión dalgunhas consellerías crea problemas coas vacacións xeradas polo persoal temporal e interino das listas cando están cubrindo un posto “non vacante” e son chamados para cubrir un posto vacante e aceptan.
É certo que nalgunhas consellerías isto non é un problema. A mecánica deste asunto é que as consellerías de procedencia fan certificacións de vacacións xeradas e non desfrutadas e a consellería de destino ten dúas opcións:
1.- Permitir o desfrute desas vacacións no novo posto.
2.- Informarlle que debe solicitar o pago das mesmas a consellería de procedencia (partimos da máis que dubidosa legalidade ao continuar a persoa a prestar servizos na Xunta).
E aquí xurde o problema que se da maioritariamente coas consellerías de Educación e de Política Social.
Política Social NON ADMITE o desfrute das vacacións xeradas noutra consellería pero si liquida as vacacións ao seu persoal cando se dan eses casos.
Educación si ADMITE EN OCASIÓNS as vacacións xeradas con anterioridade pero fai coincidir o seu desfrute con días/períodos non lectivos. Vamos, que fai trampa.
Pero o problema máis grave vén cando alguén pasa de non vacante en Educación a vacante en Política Social. Esta última négalle o desfrute das vacacións e Educación négase a pagalas co argumento de que o/a traballador/a renunciou voluntariamente e seguir prestando servizos no posto.
ISTO É UN ABSURDO xa que a persoa aceptou unha opción de mellora na mesma empresa: a XUNTA DE GALIZA
E para agravar máis este asunto, a resolución remite a vía administrativa (agora son maioritariamente funcionarios/as interinos/as) e na maioría dos casos é inasumible ir posteriormente a un contencioso para reclamar 6/7 días de vacacións.
Na mesa xeral do día 13/12/2024 instamos á Dirección Xeral de Emprego Público e Administración de Persoal a que adopte medidas e busque unha solución para esta asunto que necesariamente pasa por chamar ao orde ás consellerías insubmisas.
- Detalles
Para seguir a tradición, a Administración achéganos na propia mesa (para que non dea tempo a reflexionar nin a alegar) catro follas cos anexos das prazas da OEP 2024. Limítanse a contarnos o que hai nas táboas. Polo tanto, ademais de que poidamos impugnar a propia OEP, estudaremos impugnar a falta de negociación.
E ante a falta de datos ou de tempo para poder estudalos ou analizalos, imos avanzar as nosas primeiras impresións sobre esta oferta de emprego.
De entrada esta OEP é minúscula. Tanto no caso das prazas de libre como da promoción interna podemos observar que a administración racanea prazas en case todos os corpos e escalas, por non falar de que no caso da promoción interna, non só faltan prazas senón que non ofertan ningunha praza na maioría de escalas e especialidades.
O único dato salientábel e que supón unha novidade é que á promoción interna ao corpo auxiliar (subgrupo C2) van poder concorrer todas as escalas da agrupación profesional (persoal subalterno, limpeza e cociña e recursos naturais e forestais).
O problema deste cambio é que aínda que sexa correcto, o número de prazas convocadas (150 prazas da quenda xeral e 20 de discapacidade xeral), é mínimo para dar cabida ao aumento de aspirantes. Se contamos que ata o de agora só podían concorrer a esta promoción ao redor de 700 persoas da escala de persoal subalterno que tiñan a condición de funcionarios de carreira, agora nos atopamos con case 1.200 potenciais aspirantes.
Se ben levamos propoñendo cambios na promoción interna, especialmente á do C2, e iso non significaba só un aumento de prazas, neste caso o relevante é precisamente iso, a insuficiencia total de prazas. Dende a CIG esiximos, que para o corpo auxiliar como mínimo se incrementen nun 200% e que se acheguen ás 500 prazas convocadas.
Queremos lembrar que promoción interna NON CONTA na taxa de reposición, e que autolimitarse dese xeito é cercenar a progresión profesional das persoas empregadas públicas.
Finalmente preguntámoslles cando tiñan pensado executar as ofertas de emprego anteriores como a do 2022, onde hai moitos procesos sen convocar. Segundo eles convocarán o que reste no 2025.
- Detalles
A lei de Orzamentos para 2025 perpetúa os recortes de 2012 e non avanza nengunha mellora, excepto para a escala de letrados, polo que dende a CIG solicitamos a extensión desa mellora para todo o persoal
A CIG concentrouse o martes 17/12/2024 diante do Parlamento de Galiza, coincidindo co debate dos Orzamentos da Xunta para 2025 para denunciar que con esta lei se perpetúan os recortes de 2012, e para reclamar a recuperación dos dereitos do persoal das administracións públicas.
Reclamamos para todos os empregados e empregadas públicas a recuperación do 100% das pagas extras, a recuperación do Fondo de Acción Social coa asignación do 1% da masa salarial; a recuperación dos 9 días de asuntos propios, unha suba para todo o persoal equivalente á que a Administración da Xunta aplica aos letrados, a eliminación da taxa de reposición, e a xornada de 35 horas, entre outras demandas.
Dende a CIG-Autonómica denunciamos tamén que, coa lei de Orzamentos para o ano 2025, a Xunta continúa coa posibilidade de modular ou eliminar a percepción dos complementos específicos que retribúen as condicións de servizo específicas do persoal funcionario. “Desta forma pretenden reducir o salario do seu persoal nas baixas, conciliacións, vacacións... ou cando consideren que parte do servizo non se presta por carteleira ou polas condicións das funcións ou do traballador/a”.
Advertimos tamén que a lei de orzamentos perpetúa os recortes do 2012 no relativo a descansos e festivos do persoal que traballa a quendas e fin de semana, os dereitos de comedor, a gratificación por xubilación e cuestións relativas a períodos de descanso en Nadal e Semana Santa para o antigo persoal laboral que traballa en, fundamentalmente, Política Social e Educación. Ademais, denunciamos que segue sen aplicar o grupo B integrando ao persoal ao que se lles esixiu unha titulación de técnico superior nun grupo inferior (C1) e por outra banda mudan as funcións de varias escalas.
Dende a CIG denunciamos que a Xunta non aceptou ningunha proposta de mellora na Lei do Emprego Público de Galiza, como a de recoller os dereitos do V Convenio e que así o persoal laboral non perda os seus dereitos pola funcionarización masiva, ao tempo que o persoal funcionario puidese gozar de novos dereitos derivados dun convenio de persoal laboral a través dun acordo regulador das condicións de traballo, tal e como temos proposto.
E tamén fixemos constar como algo salientábel que a administración galega segue sendo unha das poucas que queda sen aplicar as 35 horas, ademais de negarse a tratar os concursos permanentes ou unha promoción interna real.
- Detalles
Durante anos sen convenio, sen trienios... e agora queren meter o acelerador para que apandemos con todo o que queiran impoñer
A directora xeral de Emprego Público e o xerente do organismo propoñen niveis e salarios máis baixos que na Xunta para o persoal do Consorcio de Igualdade e Benestar.
A nova RPT chega nos últimos días do ano 2024, non negociada, inzada de centos de erros e sen a debida documentación que posibilite a máis mínima negociación e a súa tramitación; e sen que sexa de ningunha maneira factíbel a revisión destes 1804 postos en 2 días; motivos máis que suficientes para que esixamos:
- A súa retirada
- A entrega de todas as memorias, datos e a documentación corrixida e sen as deficiencias detectadas
- O tempo preciso para poder valorala, atender a todas as reclamacións e queixas do persoal do Consorcio e presentar alegacións en detalle e con coñecemento de causa
- A negociación en condicións admisíbeis
Lembrámoslles tanto á directora xeral de Emprego Público como ao xerente do Consorcio que todos estes postos teñen persoas detrás deles, e que o Consorcio non é unha estrutura abstracta.
Pola súa banda, tanto a directora xeral como o xerente recoñecen que non houbo negociación nesta nova RPT 2024, e admiten que hai moitos erros (non erros illados), polo que lles esiximos que nos remitan a proposta actualizada para poder estudala. A resposta, tanto da directora como do xerente, foi que ían remitir o luns 16 de decembro a versión corrixida (de momento seguimos á espera...), dando un prazo de alegacións até as 10 h do mércores 18 de decembro e recoñecendo, tamén, que a nova versión vai seguir contendo erros, dado que o xerente do Consorcio non vai molestarse en corrixilos todos. Anticiparon que van seguir sen estar todos os datos de todo o persoal con sentenzas de indefinición e de fixeza. Aínda así, e con erros sen corrixir, queren darlle para adiante, para logo, supostamente, parcheala... Disque agora necesitan a RPT para que os centros poidan seguir funcionando!
Erros e chapuzas da RPT do Consorcio
Traen á Mesa unha RPT de persoal funcionario, cando todos os contratos do Consorcio son, de momento, de persoal laboral. A Dirección Xeral sempre informou que primeiro ían ser de persoal laboral e logo transvasaríanse á RPT de persoal funcionario. Consecuentemente, esiximos que todos os postos de RPT sexan de persoal laboral, pois este é o vínculo xurídico do persoal traballador no Consorcio. Incluso as sentenzas gañadas de indefinición son de persoal laboral. A xurisprudencia do Supremo é clara e coñecida.
- Carece de memoria económica e dunha memoria funcional cuns mínimos
Carece dunha mínima táboa de equivalencias das categorías profesionais, niveis e escalas do Consorcio coas mesmas ou comparábeis da Xunta. Esiximos que a presenten. Os niveis das distintas categorías do Consorcio teñen que ser iguais ás mesmas categorías da Xunta.
- Non se fan constar todos os postos da RPT ocupados polo persoal fixo, polo persoal con sentenza de fixeza ou persoal con sentenza de indefinición, postos que se ofertan á estabilización
- Saen na RPT datos que non se corresponden coa realidade dos servizos prestados no Consorcio, como prazas xa existentes que aparecen con itinerancias e non as teñen; ou como os postos de inclusión, que aparecen con dúas escalas (pedagoxía/psicoloxía ou educación social/traballo social). Esiximos coñecer con que criterios se establecen as itinerancias en cada caso, ámbitos, tempos e xustificación da súa creación, con independencia das flutuacións futuras nas matrículas de crianzas en centros do rural. No caso dos postos de inclusión, deben de aparecer como están neste momento e como foron ao proceso de estabilización.
- Opoñémonos a que se limiten as coordinacións e direccións a determinadas titulacións. Indicamos que estes postos deben abrirse a todas as titulacións da mesma área, dado que pode haber dificultades para cubrilos.
- Opoñémonos ás amortizacións de prazas de psicoloxía e traballo social ocupadas sen posto en RPT para crear coordinacións de centros da área de Benestar.
- Opoñémonos ás direccións de CEMVI e centros de maiores por libre designación. Advertimos que as LDs só poden ser ocupadas tanto en comisión de servizos como en propiedade por persoal funcionario de carreira.
- Nomean ao persoal da categoría de técnica/o en Xardín de Infancia (educación infantil) como axente en Educación Infantil. Preguntamos: van crear esta nova «categoría» na Lei de Emprego Público, vía Lei de medidas, para non pagar os mesmos salarios? Esiximos que se nomeen as categorías segundo se recolle na Lei de emprego público de Galiza.
- Non se dotan do persoal necesario determinados servizos, ou a dotación é insuficiente. En moitos casos nin se recollen no borrador os postos que xa están dotados de persoal. Solicitamos que para a dotación de persoal dos centros se siga o mesmo criterio.
Contacta coa CIG, no caso de que teñas observacións, reclamacións ou detectes máis irregularidades.
- Detalles
A última hora da xornada laboral do 16 de decembro, dende a dirección da Axencia Galega de Innovación (GAIN) remítesenos o texto oficial do 2º Acordo de traspaso: adscripción de postos con nivel orgánico inferior a sevizo e traspaso de créditos asignados aos servizos traspasado, entre a Consellería de Educación, Ciencia, Universidades e Formación Profesional e a Consellería de Economía e Industria, asinado polos Secretarios Xerais Técnicos de ambas Consellerías (Acordo Economía-Educación).
Segundo este acordo, a Axencia Galega de Innovación perde un total de 36 postos, dos cales 26 se van para a Consellaría de Economía e Industria e 10 para o Igape, postos que en parte son de persoal propio de GAIN, aínda que isto pareza un paradoxo e contrario á lóxica.
Así, pasan de GAIN á Consellaría de Economía e Industria os seguintes centros e servizos:
- CIS Galicia-Centro de Innovación e Servizos da Tecnoloxía de o Deseño (12 postos)
- Servizo Galego de Propiedade Industrial - Segapi (4 postos)
- Área de Coordinación do Polo Aeroespacial de Rozas (6 postos)
- 2 postos da Área de Xestión
- 3 postos da Área de Programas
Completan o reparto o traspaso de GAIN a Igape:
- 6 postos da Área de Servizos
- 4 postos do Departamento de Xestión de Axudas
Tanto a Consellaría de Educación (da que depende a GAIN coa administración Rueda) como a Consellaría de Economía e Industria (da que dependeu dende a súa creación en 2012), asinantes do acordo, non responderon á solicitude de negociación feita durante a xuntanza á que fomos convocadas o 18 de novembro de 2024, nin tampouco á feita formalmente por escrito.
Dende a CIG manifestáramos nesa data a nosa total oposición á sinatura deste acordo mentres non houbese negociación das modificacións dos postos de traballo, e consideramos que, se asinaban o acordo directamente, a nosa central sindical non participou en ningunha negociación. Así mesmo, dubidamos da legalidade do traspaso do persoal propio de GAIN ao Igape ou Economía pola súa casuística e situación específica, antes das resolucións da estabilización e do cumprimento dos acordos asinados entre determinados sindicatos e Emprego Público.
De feito, cumprimentos, ben poucos. O propio Acordo Economía-Educación, no seu artigo 6, fai referencia a que “as partes comprométense a respectar o establecido no Acordo entre entre a Consellaría de Facenda e Administración Pública e as organizacións sindicais CSIF, CCOO e UGT para a integración do persoal do GAIN nas estruturas da administración da Xunta de Galiza (artigo nº 6), en virtude do cal, rematado o proceso de estabilización procederase á apertura dun proceso único de integración no VCCU do Persoal Laboral da Xunta de Galiza das prazas obxecto de estabilización; e finalizada a integración procederase á apertura inmediata do proceso de funcionarización voluntaria. Unha funcionarización, que segundo o amentado Acordo Facenda-CSIF-CCOO-UGT (punto terceiro) estaría rematado «antes da finalización do primeiro semestre do ano 2024», ao tempo que tamén indica que a «RPT comezarase a negociar no segundo semestre de 2023 coa finalidade de que estea rematada antes da toma de posesión deste persoal como persoal laboral fixo do V Convenio colectivo» (punto terceiro).
Un dos poucos cambios do Acordo Economía-Educación do que xa tiveramos coñecemento con relación á proposta inicial de novembro é que o persoal foi avisado polas xefaturas de que finalmente o traspaso non ía efectivizarse con data do 1 de decembro de 2024, como estaba previsto, senón do 1 de xaneiro de 2025. O texto definitivo inclúe entre os cambios un anexo de créditos do capítulo I dos postos traspasados.
A negociación nin existe nin hai intención de facela, abocando ao persoal á vía xudicial.
- Detalles
O 17 de decembro recibimos a convocatoria da EGAP para asistir ao Consello Reitor, que este ano se estableceu o 26 de decembro de 2024.
Como é habitual na EGAP, a convocatoria non se remite coa documentación a tratar na xuntanza (a secretaria da EGAP indica que se enviará en "datas próximas"), quizais coa expectativa de que a leamos por Noiteboa ou Nadal...
Entre os puntos da orde do día figuran os convenios e protocolos de colaboración vixentes, as contas 2024 e orzamentos 2025 e un informe sobre as actividades para o ano 2025.
Se tes algunha pregunta, achega, queixa ou suxestión que queres que teñamos en conta nesta xuntanza, contacta connosco.
>>Actualización 20/12/2024: Documentación do Consello Reitor 26/12/2024 (remisión pola EGAP o venres 20 de decembro.)<<
- Informe da directora: resumo de actividades do ano 2024; informe sobre os convenios e protocolos de colaboración vixentes; informe sobre as actividades previstas para o ano 2025; execución orzamentaria 2024 e orzamentos 2025.
- Plan de formación para 2025
II. Convenios, acordos e protocolos
- Convenios:
- Convenio EGAP - Concello de Ponteareas (formación, divulgación e investigación).
- Convenio EGAP - Amtega (formación en e-administración e seguridade e protección de datos 2024).
- Convenio EGAP - Amtega (COMDIX-Marco galego de competencias dixitais 2024).
- Convenio EGAP - USC-UDC-UVIGO (formación).
- Convenio EGAP - Consellaría de Emprego, Comercio e Emigración (plan de formación do Servizo Público de Emprego de Galiza 2024).
- Convenio EGAP - Consellaría de Política Social e Igualdade (curso de capacitación para o desempeño da función de inspección de servizos sociais).
- Convenio EGAP - Consellaría de Presidencia, Xustiza e Deportes (curso de formación de persoal interino para o desempeño de postos reservados a persoal funcionario da Administración local con habilitación de carácter nacional.
- Acordos de colaboración:
- Acordo EGAP - Consellaría de Promoción do Emprego e Igualdade & Consellaría de Facenda e Administración Pública (formación en igualdade, prevención e loita contra a violencia de xénero 2024).
- Acordo EGAP - Consellaría de Promoción do Emprego e Igualdade & Consellaría de Facenda e Administración Pública (formación, divulgación e investigación).
- Protocolos de colaboración:
- Protocolo EGAP - Concello de Marín (formación, divulgación e investigación).
- Detalles
O día 13 de decembro 2024 celebrouse a 9ª reunión da mesa de seguimento do acordo de funcionarios do SPIF onde a Administración presentounos uns gráficos nos que se reflexa a porcentaxe de cobertura así como a de vacacións, comparando os anos 2023 con 2024. Dende a CIG insistimos que:
- Unha vez máis que, logo do traslado do acordo ao persoal laboral, é de recibo que se estude a fórmula antes do inicio da campaña, tal e como ven reflexado na Disposición adicional única: “O persoal laboral fixo-discontinuo que preste servizos no Servizo de Prevención de Incendios Forestais se lle seguirán aplicando as condicións de traballo establecidas no V Convenio colectivo único do persoal laboral da Xunta de Galicia”. A pesar disto, tras a sinatura deste acordo iniciaranse negociacións para adecuar a aplicación das condicións específicas de traballo fixadas neste acordo ao réxime xurídico do persoal discontinuo do Servizo de Prevención e Incendios Forestais. Dende a Dirección Xeral din que non é o lugar axeitado para tratar os temas do persoal Laboral, aínda así, contestarán nun prazo dunha semana dado que dende as provincias xa están solicitando reunións de cuadrantes. Dende a CIG intuímos que van facilitar os horarios pero non a parte económica e nos derivan a negociar a outro ámbito laboral mareando a perdiz.
- As brigadas deben ter un mínimo de 5 compoñentes dos cales un sexa Xefe de brigada. Para isto propomos a súa creación, evitando así o descolgue de brigadas cun compoñente o que resulta inoperativo, tanto en traballos de prevención como en incendios, tal e como está recollido no informe da inspección de traballo de Lugo. (A administración propon brigadas de 7 compoñentes)
- Horarios en brigadas con rotación de 5 secuencias o que provoca que haxa distritos que non cubran todas as quendas, sobre todo ao rematar o persoal fixo discuntínuo
- No caso de vixilantes-emisoristas a rotación de 4 secuencias deixa moitos ocos e quendas sen cumprimentar (chegando a seren os traballadores os que solicitan as adaptacions para cubrir as 24). Dende a CIG insistimos que deben ser quendas M-T-N para o que se precisan 8 persoas durante todo ano para cumprimentar as quendas e repartir vacacións e permisos. (Non contestan)
- Os batracios e tractores están dotados de material e equipos pero NON dotados de persoal o que provoca o desmantelamento de brigadas de distrito e inoperatividade de motobombas. (sen contestación)
- Conciliación no SPIF (que se están negando sistematicamente e son gañadas no xulgado). A administración contesta que “os efectos do acordo son para ben e para mal…”
- 2º Actividade do persoal Funcionario. (non contestan)
- Instalacións. Resulta curioso que neste ano as melloras que se fixeron nas bases, para denominalas "Buo", tocoulles a aquelas que menos o precisaban. Segundo o director elíxense os centros dentro das posibilidades de xestión pero teñen moitos centros cedidos “sen papeleo” ou alugados que están en tramitacións…
- Propostas da Administración:
1. Unificar brigadas: (7 compoñentes: 1 capataz+ 6 bombeiros/as). Dende a CIG mantemos a proposta de 5 compoñentes. Expoñemos que ante o reparto de secuencias de 5 semanas de rotación precísase un mínimo de 10 brigadas para cumprimentar as secuencias cada día. Coa proposición da Administración, onde o promedio de brigadas por distrito vai de 5 a 8, non se complementaria ningún día. (a capacidade organizativa é súa e dín que “asumen ese risco, que xa o teñen comtemplado”. Ante a insistencia da Administración solicitamos proposta por escrito da modificación e criterios ante a imposibilidade de desprazamento de máis de 5 compoñentes nun coche.
2. Actualizar os horarios de emisoristas e brigadas helitransportadas segundo haxa helicóptero nas bases e, de ser o caso, si se incrementasen as horas daranse compensacións en períodos nos que non haxa helicóptero. Dende a CIG aceptamos esta proposta instando a posibilidade de que as compensacións sexan solicitadas polos/as traballadores/as.
3. Solicitar a previsión de vacacións antes do 28 de febreiro (todas as vacacións incluídas, os canosos e os 5 días de compensación). Dende a CIG opoñémonos a esta pretensión de solicitar todos os días de vacacións tal e como se reflicte no punto 2 do Art. 132 da Lei de Emprego pública de Galiza: “Non obstante e sempre que as necesidades de servizo o permitan, dos días de vacacións no apartado un, poderse solicitar o gozo independente de ata seis días hábiles por ano natural, que poderán acumularse aos días de asuntos particulares”. Así como tamén no punto 14 do Art. 118 : “Ao longo do ano, o persoal funcionario e o persoal laboral teñen dereito a seis días de permiso por asuntos particulares, sen necesidade de xustificación”
4. Outras novas trasladadas dende a DIRECCIÓN XERAL:
- Os procesos selectivos de consolidación adíanse ante a nova necesidade de baremar a todos/as os/as compoñentes/as calculando rematar o proceso na primavera
- Apertura de listas do decreto 37/2006 para as categorías de funcionarios do SPIF a principios de ano.
- Actualización da situación en listas do persoal laboral que pasou de estar en praza non vacante (fixo-discontínuo e 6 meses) a praza vacante: neses días farán o volcado de datos e todos/as os/as que estaban nesa situación pasan a ocupar praza vacante (consecuencia: non se lles ofertarán praza vacantes)
- Probas físicas para as listas do decreto: entre xaneiro e febreiro.
- Seguinte reunión o 10 de xaneiro.
- Detalles
O día 09 de decembro de 2024 tivo lugar a reunión do Comité S.S.L. de Incendios onde se abordaron os seguintes temas:
-. Plan de formación 2025/2028. Dende a CIG pedimos que se abra un prazo de alegacións e que se incorpore a lexislación vixente da Lei básica de Bombeiros Forestais, de obrigado cumprimento, en canto neste caso permita un desenrolo do marco formativo, para acadar ao final deste Plan as unidades de competencia, que permitan obter os certificados de profesionalidade , tanto nivel 2 , como nivel 3. Consideramos vital incorporar un curso de Apoio en Continxencias, función que segundo a lei, lle corresponde a este colectivo realizar.
-. Informe do accidente de Campiño.
-. Estado das medidas preventivas derivadas da exposición a riscos químicos. Parece axeitado que para minimizar a cantidade de Hidrocarburos aromáticos policíclicos, ós que se expoñen os/as traballadores/as en tarefas de extinción de incendios forestais, se empreguen sopradores-aspiradores portátiles e toalliñas de limpeza, máis o que segue sen facerse correctamente é o plan de descontaminación total dos EPIS, algo no que levamos moito tempo sen dar coa solución axeitada, como xa hai anos que se fai noutras Comunidades. A Administración culpa disto ao mal funcionamento da primeira empresa á que se lle contratou este traballo e á propia idiosincrasia de distribución do persoal no territorio, que agardan solucionar coa contratación dunha nova empresa. Tamén se fai mención da posibilidade de especialización dalgún membro por equipo de traballo, nun grao maior de coñecementos en primeiros auxilios para mellorar a capacidade de atender situacións mais graves. Dende a CIG consideramos que o acaído sería elaborar un protocolo claro para así poder establecer accións preventivas que minimicen o risco para os/as traballadores/as.
-. Vehículos Autobomba URO VAMTAC. Logo da chegada de bastantes críticas polo funcionamento do sistema de freado do novo vehículo, constatadas pola propia Administración esiximos que se corrixa esta perigosa problemática en vehículos en período de garantía.
-. Reposición de los EPIS. Dende a CIG, expresamos a queixa de bastantes traballadores/as pola falta de entrega dos novos EPIS, e a importante dificultade que supuxo a non realización da tallaxe ós/ás traballadores/as o que trouxo consigo unha peor adaptación dos equipos. A identificación específica do posto concreto do traballador nas costas limita o intercambio entre prendas para adaptala mellor a cada traballador/a. Dende a CIG consideramos que a identificación do posto concreto do traballador debería ir en elementos extraíbles e adheribles, mantendo so cosido os elementos comúns a tódalas categorías en canto á identificación.
-. Instrucións sobre o acceso a puntos de vixilancia fixa. A circular que regula esta cuestión para a CIG é insuficiente, xa que non se adapta correctamente a todas as situación de riscos para os/as traballadores/as, xa que cruza datos do índice de risco, con previsións meteorolóxicas, e parécenos unha medida que pode traer certa falta de protección o/a traballador/a.
Volvemos insistir, no arranxo das vías de acceso ou no seu defecto que se utilice un coche do servizo para poder chegar a estes puntos de vixilancia de difícil acceso, así como a necesaria dotación dun portófono por vixiante, e que se poda dispoñer por posto de vixilancia dun teléfono co Xeocode lite integrado. Deberá tamén quedar claro quen é o responsabilidade da aplicación de ditas instrucións.
-. Estado da compra de auriculares para os condutores de bulldozer. Dende a CIG levamos tempo reclamando a necesidade deste equipo. A Administración confirmounos, que se lle fixera entrega ós condutores de bulldozer de 18 equipos Xiaomi Red 3 pro Vauds, e que para este ano vaise buscar elementos aínda mais eficientes para estes traballadores.
-. Rogos e preguntas.
.. Reclamamos que se trate no subcomité de EPI a necesidade dunha mochila para portar os case que 5 kg do auto-rrescatador, botiquín individual, cantimplora e semi-máscara, excesivo peso para portar sen elementos adicionais de suspensión.
.. Consideramos preciso a dotación de botas de monte que completen o uniforme dos Axentes Forestais e Medioambientais, que non incorporen reforzo la punta.
.. Expresamos a necesidade de incorporar un curso de Qgis para Técnicos e Axentes.
.. Preguntamos pola limitación para acceder ás bacas homologadas dos pick-up. Informan que so se poderá acceder á baca dende o chan, e dende ese punto deberemos extraer o equipamento, e tamén estibalo. Pensamos que este procedemento non é doado e precisaría dunha escada como se viña facendo ata o de agora. Tamén reclamamos a incorporación dos caixóns de transporte xa adquiridos.
- Detalles
A Dirección Xeral de Función Pública trouxo á Mesa Sectorial de Funcionarias (13/12/24) o Decreto da OEP 2024 das escalas sanitarias da Lei 17/89. Este persoal segue a ter unha xestión á marxe de Emprego Público, cando se trata de persoal funcionario de Administración.
Seguindo o seu modus operandi, onde a boa fe negocial brilla pola súa absoluta ausencia: enviáronnos a documentación da convocatoria sen tempo para revisala, incapaces por sistema de respectar o mínimo de 48 h. A secretaria xeral pide desculpas de novo, pero para a seguinte convocatoria repitirá a mesma técnica e mesmo procedemento. Veremos en que acaba todo isto.
Dende a CIG reclamamos e chamamos a atención sobre as seguintes cuestións:
- Que a xestión da OEP pase a Función Pública e se faculte ao conselleiro de Facenda a ditar as normas precisas para desenvolver este decreto.
- No referido á cuantificación: din que aplican o 110% da taxa de reposición, e ofertan 15 prazas (non temos xeito de verificalo).
- Habilitan que se convoquen prazas adicionais por previsión de xubilacións (dos dous anos seguintes). Cremos que isto crea incertidume e sorpresas por non coincidir o que se oferta e o que se convoca, ademais do risco de deixar fóra a xente que supera o proceso (o que pode ocorrer se non se efectiviza algunha das xubilacións previstas no prazo de dous anos).
- Acceso por concurso-oposición: concordamos, pero queremos que xa poñan cal é a porcentaxe. O vicesecretario xeral da Consellaría de Sanidade limitouse a dicir que se verá en cada convocatoria.
- Tribunais: indican que haberá unha composición paritaria para o conxunto da oferta, polo que indicamos que a paricade debe ser para cada convocatoria. Tamén queremos que os sindicatos poidamos propor a unha persoa.
- Promoción interna: limítanse a dicir que se respectará o mínimo (que é o 25%). Nós solicitamos que sexa do 50% en cada clase, que estea aberta a calquera escala de administración. Que os procesos sexan separados do acceso libre. Responden que o número de prazas o dirán no momento da convocatoria.
- Permiten que as convocatorias establezan o "carácter" do exame de galego, o que equivale a dicir que dicidirán no seu momento se será eliminatorio. Outros anos permitiron que supere o proceso alguén que poida obter un "cero" en galego. Así respetarán que o persoal funcionario estea en condicións de atender en galego ás persoas usuarias.
- Tempos: a OEP do 2024 vaise publicar cando falten días para rematar o ano. Pedimos que se engada a obriga de que a convocatoria sexa publicada no prazo de 1 ano e resolta noutro ano máis.
Botas algo en falta? Fainos as túas achegas, contacta coa CIG-Autonómica.
