- Detalles
A CIG-Autonómica chama ao persoal a participar na mobilización nacional do domingo 14 de setembro, para esixir a mellora das condicións laborais e a planificación preventiva no marco das medidas que eviten outra vaga de lumes
A manifestación terá lugar en Compostela o domingo 14 de setembro, ás 12:00 horas, e sairá dende a Alameda.
O persoal bombeiro e axente forestal, e o resto de persoal do SPIF, sufrimos de primeira man o descontrol e falla dunha xestión de persoal eficiente e a nula xestión forestal da Xunta, que nos puxo en gravísimo perigo ao converter Galiza nunha polvoreira.
Por isto, e para reivindicar melloras nas condicións laborais e na xestión da prevención no territorio galego, chamamos a todos os compañeiros e todas as compañeiras a participar nesta mobilización convocada pola plataforma «Por un monte Galego con futuro», e así visibilizar o traballo do persoal empregado público.
Lumes nunca máis!!!
- Detalles
Moitos dos concursos de traslados do persoal funcionario da Administración Autonómica actualmente convocados están parados ou gravemente afectados por medidas xudiciais. Dende a CIG convidámoste a asistir ás asembleas que convocamos para falarmos dos problemas e da situación de todos os concursos de traslados e das consecuencias das sentenzas e das medidas cautelares sobre prazas ofertadas que están ocupadas en destino provisional.
A asemblea prevista para o luns 8 de setembro en Compostela, que ía ser no salón de actos de San Caetano, pasa ao salón de actos de Sanidade (San Lázaro), mesmo día (luns 8) e mesma hora (11:00 h).
O motivo do cambio é que cando xa tiñamos confirmada a dispoñibilidade do salón de San Caetano, feita a reserva, e anunciada a asemblea, recibimos unha chamada da Consellería de Presidencia anulando a reserva porque seica necesitaban o salón para un acto. Esta non é a primeira vez que Presidencia nos denega un salón xa reservado, e como xunto con isto a EGAP tamén nos denegou o salón de actos para os días 9 ou 10, sospeitamos que o que hai en realidade é un intento do goberno do PP do Presidente Rueda de boicotear a acción sindical da CIG como lexítima representación do persoal empregado público.
Con isto, vémonos obrigados a modificar o lugar da convocatoria da asemblea de Compostela, mantendo a data e hora, trasladando a asemblea ao salón de actos de Sanidade (San Lázaro).
No resto de localidades non hai cambios, agás que engadimos unha asemblea en Ferrol:
Luns 8 de setembro
- Compostela, ás 11:00 h, no salón de actos de Sanidade (San Lázaro)
Martes 9 de setembro
- Pontevedra, ás 10:30 h, na sala de conferencias (fronte á cafetería)
- A Coruña, ás 11:00 h, no salón de actos
- Ferrol, ás 11:00 h, na sala de usos múltiples
- Ourense, ás 12:00 h, no salón de actos
- Vigo, ás 12:30 h, no salón de actos
- Lugo, ás 12:30 h, no salón de actos
- Detalles
Xa sabiamos que para o PP a culpa dos lumes é de todo o mundo menos deles. Agora ben hoxe coñecemos unha mensaxe tremenda da presidenta do PP do Barco de Valdeorras nas redes sociais.
Que esta señora afirme que a única culpa dos lumes a teñen os incendiarios e algún das brigadas forestais supera tódolos límites e ahí sí que se van atopar de fronte coa CIG.
E non contenta con iso, tamén di que se o persoal das brigadas quere traballo que se adique a outro que non sexa temporal. En conclusión non están nin se esperan melloras na política da prevención dos lumes cando cargos do PP se adican so a pensar na temporalidade asociada á extinción dos lumes.
O persoal bombeiro forestal da Xunta está facendo todo o que pode e mais contra esta lacra arriscando a súa vida e non so non se están a respetar os seus dereitos laborais senón que agora os cargos do PP se adican a calumnialos nas redes sociais.
O que deberan facer os do PP é disculparse públicamente e dende logo tomar medidas contra os seus cargos por estas saídas de testo.
Dende a CIG non imos tolerar este maltrato ao persoal do servizo de incendios e tomaremos as medidas oportunas.
- Detalles
Manter á conselleira e a unha cúpula de altos cargos incompetentes en Medio Rural faino máis cómplice do desastre
A traxedia dos lumes que está a padecer Galiza é en grande medida froito das políticas de prevención e extinción dos lumes do PP que a converteu nun polvorín. A CIG leva anos advertindo das carencias na prevención e na nefasta xestión da extinción que pon a sociedade e ao persoal de extinción en risco.
O persoal do Servizo de Incendios de Galiza está a facer máis do que a súa capacidade lle permite, evidenciando a súa profesionalidade na defensa do medio natural e dos pobos e vidas da cidadanía. Pero chegou o momento de esixir responsabilidades, non nos poden poñer máis en risco. Hai que actuar, e o goberno galego tiña que telo feito moito tempo atrás, tal e como lle leva demandando a CIG e gran parte da sociedade galega.
Rueda e a Consellería de Medio Rural levan anos inhibíndose de artellar políticas forestais activas, de fomentar a prevención dos lumes e de asentar un dispositivo contraincendios con medios e persoal para loitar contra unha nova tipoloxía de lumes moito máis agresivos e agravados polo cambio climático. As consecuencias de todo este mal proceder estamos a pagalas hoxe: máis de 150.000 ha. de monte queimado, a maior catástrofe ecolóxica dende o Prestixe. O ano que máis ardeu dende que se teñen rexistros nos últimos 60 anos, o dobre que no 2006 ou que no 1989.
O servizo de incendios minguado e mal organizado, en especial en Ourense
Fan falta mais efectivos para o servizo de incendios, tanto axentes como bombeiras e bombeiros forestais. Como exemplo no 2019, logo de meses de loita do persoal, a Consellería de Medio Rural volveu a asumir as brigadas de reforzo, pero o fixo de forma irregular e reduciu os medios existentes (procedentes de SEAGA), xa daquela advertimos que a provincia de Ourense ía ter serios problemas de cobertura do territorio. No ano 2019 en Ourense formáronse 29 brigadas namentres, por exemplo, na provincia de Pontevedra foron 48 (datos do PLADIGA).
Se temos en conta que a provincia de Ourense concentrou o 38,54% dos lumes en Galiza no período 2015-2024 e 34 grandes incendios forestais (dun total de 56). Esta carencia de persoal nun territorio tan amplo sumada a unha falta de infraestruturas e de mantemento, mingua da posibilidade de realizar un primeiro ataque de todos os lumes de xeito rápido, factor fundamental para que os incendios non se fagan grandes como pasou estes días.
A precariedade endémica do persoal do SPIF
O persoal que traballa no servizo de incendios atopase dividido en persoal funcionario e persoal laboral que é fixo-descontinuo. Custou anos de loita que o persoal laboral chegue a traballar 9 meses (farao no 2026). Na CIG insistimos en que este persoal ten que traballar todo o ano para poder ter unhas condicións laborais dignas, ser profesionais formados e, para poder realizar tarefas de prevención. Pero o que fai a Consellería de Medio Rural é seguir a discriminar ao seu persoal, tratando de xeito diferente ao persoal laboral e funcionario e incumprir os compromisos acadados no 2024 para igualar e mellorar as condicións laborais.
Cos lumes visibilízanse os incumprimentos en cuestións básicas de seguridade e saúde, co incremento dos riscos laborais: a superación da xornada máxima diaria de 12 horas, a falta de avituallamento de comida e bebida, carecer dun sistema para desinfectar os EPIS, coa conseguinte exposición permanente a sustancias carcinóxenas, carencias e defectos no material de protección…e na vez de buscar unha solución rápida o que fai a Administración é dar voltas con probas e protocolos que non se implementan de xeito efectivo. E non é admisible que non convocaran os comités de seguridade e saúde laboral despois de 20 compañeiros/as queimados/as.
As bases do persoal de terra seguen a presentar graves deficiencias, moitas veces son simples naves ou garaxes, con taquillas e casetos de obra en mal estado onde comparten espazo os vehículos e a maquinaria coas persoas durante quendas de 10 horas e sen unhas mínimas condicións de hixiene ou unha simple instalación para quecer o xantar.
A nefasta política de cobertura de postos pon en risco a todo o operativo
Este ano estamos a asistir a un despropósito inda maior, a Administración tiña centos de vacantes e substitucións sen cubrir, e se puxo a facer chamamentos en plena vaga de lumes. O 15 de agosto fixo o chamamento número 16 e 17 desta tempada. E, o que fai a Consellería do Medio Rural tras as protestas das organizacións sindicais é ocultar os novos chamamentos, e como mínimo levan tres máis nesta segunda quincena.
Como puideron esperar ata ter unha vaga de lume para cubrir os postos dos bombeiros e bombeiras forestais? E que non foron baixas novas por accidentes nesta vaga, senón que na maioría, a necesidade de substitución era de meses.
Dende a CIG estivemos intentando contactar coa consellería para aportar propostas para facer máis efectiva a extinción dos incendios e mellorar as condicións do persoal, pero na vez de atender o ofrecemento os responsables agocháronse nos seus despachos. A Consellería do Medio Rural actuou de forma opaca, mentireira, irresponsable pondo en risco ao seu persoal e a toda a sociedade galega.
Se no 2006, coa metade da superficie queimada o señor Rueda esixía responsabilidades, agora co dobre, por decencia debe el render contas. Debe cesar a quen tiñan a responsabilidade de protexernos e protexer os nosos montes: a conselleira de Medio Rural e a cúpula da súa consellería, por incompetentes e por aplicar políticas ineficaces, tanto o secretario xeral técnico, ao que corresponde a xestión de persoal como os directores xerais de Defensa do Monte e de Planificación e Ordenación Forestal. Non podemos tolerar que os responsables desta ineficaz e irresponsable xestión dos lumes sigan ao fronte. Trátase dun asunto de saúde pública democrática.
- Detalles
A CIG reclama medidas inmediatas para recuperar os bens e paliar as consecuencias, e un servizo público único, de xestión directa e dependente da Xunta de Galiza, para traballar na prevención e respostar ás multiemerxencias do medio natural e rural durante todo o ano.
Un total de 29 localidades de todo o país acolleron o 21 de agosto mobilizacións multitudinarias convocadas pola plataforma "Por un monte galego con futuro" para rexeitar a política forestal do PP, que queima os nosos montes e as nosas casas, e en solidariedade coas persoas afectadas pola actual vaga de lumes e co persoal do dispositivo contra incendios.
A CIG demandou solucións inmediatas para recuperar os bens e paliar as consecuencias do desastre medioambiental e urxe medidas para que o que estamos a padecer estes días non volva a acontecer.
A plataforma —integrada por máis de 50 colectivos, asociacións e organizacións; e que naceu en 2018 para promover varias ILPs de protección do bosque autóctono e de racionalización da xestión do monte e para amosar a súa oposición ao último plan forestal aprobado pola Xunta de Galiza— fixo público un manifesto no que lle traslada a súa solidariedade tanto ás persoas afectadas como a todo o colectivo de profesionais de prevención e extinción, que outra volta traballa en condicións de absoluta precariedade, abandono e falta de medios.
Tamén denuncia que esta traxedia ambiental, social, cultural e económica que están a provocar os lumes ten como causa directa o abandono do rural e a aposta polo monocultivo de especies de crecemento rápido, que son as que máis inflúen nas vagas incendiarias. Neste senso, e perante o inmediato fin da moratoria para novas plantacións de eucaliptos decretada pola Xunta de Galiza para o 31 de decembro, consideran necesario reclamar unha moratoria indefinida.
Lembran que o Plan de prevención e defensa contra os incendios forestais de Galiza (Pladiga) é unha ferramenta inútil, que foi aprobada sen debate nun Consello Forestal da Galiza no que non están representadas todas as organizacións e entidades relacionadas co monte e co medio rural.
Finalmente, inciden en que a verdadeira política de prevención pasa por ter un monte multifuncional e sustentábel coa implicación da veciñanza comuneira e das persoas titulares particulares nesta posta en valor. Para garantir esta multifuncionalidade faise preciso reclamar da Consellaría do Medio Rural que retome a liña de axudas para a valorización integral do monte, así como as unidades de xestión forestal (Uxfor).
Solucións inmediatas
A CIG, que fai parte da plataforma, esixe a dotación dunha partida económica urxente que permita aplicar solucións inmediatas para as persoas e os bens afectados pola vaga de incendios. Sinala que as mobilizacións teñen que servir como expresión de solidariedade do pobo galego con quen padece os danos e con quen loita contra o lume, mais tamén para forzar un cambio nas políticas forestais que evite que algo así volva suceder.
Denunciou que os incendios que ano tras ano afectan o noso país son consecuencia directa da polvoreira na que se ten convertido o monte galego pola política do PP de entrega do rural a intereses especulativos que provocan a destrución das actividades económicas produtivas que favorecen o asentamento da poboación nestas zonas. Unha poboación rural que se atopa totalmente abandonada polas administracións públicas.
Ao mesmo tempo, urxiu un plan de choque con accións inmediatas nos terreos queimados para evitar a erosión dos solos e procurar o antes posíbel a súa restauración, así como impedir a chegada de cinzas e outros contaminantes aos ríos e ás rías.
E demandou a creación dun único servizo público, de xestión directa e dependente da Xunta de Galiza, composto por profesionais adecuadamente formados en prevención, extinción de incendios e outras emerxencias, que poidan alternar os labores de extinción no verán e prevención durante todo o ano.
Finalmente, adiantou que esixirá a depuración de responsabilidades a todos os niveis polo que está a acontecer, comezando polas administracións públicas; e insiste en que estas protestas, e as que se poidan convocar nos vindeiros días, teñen que servir tamén para forzar un cambio nas políticas forestais que evite novas vagas de lume no futuro.
- Detalles
A CIG fai un chamamento a participar nas 26 concentracións que terán lugar en cidades e vilas de todo o país este xoves 21 a partir das 20:00h
A plataforma ‘Por un monte Galego con Futuro’ convoca mobilizacións para denunciar que a actual vaga de incendios que está a padecer Galiza é consecuencia directa da política forestal do PP, unha política forestal que, tal e como recolle o lema escollido para as protestas, “queima os nosos montes e as nosas casas”. A CIG, que fai parte da plataforma e que tomou a iniciativa de impulsar a convocatoria, fai un chamamento a participar nas 26 concentracións que terán lugar este xoves 21 de agosto por todo o país a partir das 20:00 horas.
Con estas protestas en resposta á “traxedia ambiental, social, cultural e económica” que provocan os lumes preténdese evidenciar que entre as múltiples causas que están na súa orixe, como a mudanza climática, o abandono do rural e a aposta polo monocultivo de especies de crecemento rápido son as que máis inflúen nas vagas incendiarias. Neste sentido, e perante o inmediato fin da moratoria para novas plantacións de eucaliptos decretada pola Xunta para o 31 de decembro, consideran necesario reclamar unha moratoria indefinida, tal e como sinala o secretario xeral da CIG, Paulo Carril.
Con esta iniciativa tamén se quere denunciar que o Plan de Prevención e Defensa contra os Incendios Forestais de Galiza (PLADIGA) “é unha ferramenta inútil”, que foi aprobado sen debate nun Consello Forestal da Galiza no que non están representadas todas as organizacións e entidades relacionadas co monte e co medio rural.
A plataforma -integrada por máis de medio cento de colectivos, asociacións e organización- aproveitará ademais as mobilizacións para trasladarlle a solidariedade do pobo galego tanto ás persoas afectadas como a todo o colectivo de profesionais de prevención e extinción, “que outra volta traballa en condicións de absoluta precariedade, abandono e falta de medios”. Polo que insiste na necesidade de contar cun Servizo Público de Bombeiros/as Forestais “coa dimensión necesaria para atender a realidade existente”.
Finalmente, incide en que a verdadeira política de prevención pasa por ter un monte multifuncional e sustentábel coa implicación da veciñanza comuneira e das persoas titulares particulares nesta posta en valor. “Para garantir esta multifuncionalidade faise preciso reclamar da Consellaría do Medio Rural que retome a liña de axudas para a valorización integral do monte, así como as Unidades de Xestión Forestal (UXFOR)”.
LUGARES E HORAS DAS CONCENTRACIÓNS
-A Coruña, 20h, Obelisco.
-Allariz, 20h, Campo da Barreira.
-Betanzos, 20h, Praza da Constitución.
-Cangas, 20:30h, diante do Concello.
-Carballo, 20h, Praza do Concello.
-Celanova, 20h, Praza Maior.
-Compostela, 20h Praza Roxa.
-Ferrol, 20h, Edificio da Xunta.
-Lalín, 20:30h, Praza da Igrexa.
-Lugo, 20h, Edificio da Xunta.
-Melide, 20h, Praza do Convento.
-Monforte, 20:30h, Praza de España.
-Monterroso, 20h, diante do Concello.
-Noia, 20h, diante do Concello.
-O Porriño, 20h, distrito forestal (Multiusos de Torneiros).
-Ourense, 20h, Praza Maior.
-Padrón, 20h, diante do Concello.
-Ponte Caldelas, 20h, Alameda.
-Pontevedra, 20h, Praza da Peregrina.
-Ribadeo, 20h, diante do Concello.
-Ribeira, 20h, Praza do Concello.
-Verín, 20h, Praza do Concello.
-Vigo, 20h, Farol de Urzaiz.
-Vilagarcía, 20h, diante do Concello.
-Vilalba, 20:30h, Praza da Constitución.
-Viveiro, 20h, diante do Concello.
- Detalles
Alertamos de que se están a facer chamamentos en plena vaga de lumes sen tempo para formar en prevención.
Dende a CIG-Autonómica denuncia a caótica xestión da Xunta de Galiza en materia de persoal do Servizo de Prevención e Defensa contra Incendios Forestais (SPIF), até o punto de que a día de hoxe aínda non se coñecen nin as vacantes que están por cubrir.
Temos datos de chamamentos en referencia ao aviso das coberturas que se van realizar, pero non sabemos cal é o criterio de cobertura, cantas prazas en total hai vacantes e se quedan prazas sen cobertura.
Lembramos que ano tras ano a CIG esixe a cobertura de todas as vacantes do SPIF antes de que comece a campaña para que dea tempo a formar nas tarefas do posto e en prevención de riscos laborais ás novas incorporacións e para que poidan coñecer minimamente a operativa do dispositivo.
Mais a Xunta vén de facer os últimos chamamentos de persoal o pasado venres 15, que constitúen os números 16 e 17 desta campaña dende que os chamamentos comezaron no mes de abril. Nesta ocasión cubríronse 198 baixas (non vacantes, senón substitucións) que non sabemos cando se xeraron, cando comezaron e por que non se cubriron antes.
Estas prazas cubriranse mediante as listas de contratación, polo que tal e como están as listas na actualidade moitas das persoas que van ser chamadas non teñen experiencia previa en lumes forestais e van a entrar cun dispositivo desbordado, colapsado, co persoal esgotado e coa presión psicolóxica de perigo e de risco grave debido á gran cantidade de lumes e do seu tamaño entre outras cousas porque xa se rexistráron máis de 20 grandes incendios forestais, algúns deles os maiores en superficie dende que hai datos, e temos 60.000 hectáreas queimadas só na provincia de Ourense. E todo isto cando aínda resta máis dun mes para que remate o período máis perigoso para a extinción dos lumes segundo as estatísticas.
Chegamos a isto porque dende a Secretaría Xeral Técnica da Consellería de Medio Rural negáronse a cubrir os postos vacantes e non vacantes antes da campaña de incendios a pesar de que as persoas expertas e a representación do persoal alertamos de que ía ser unha campaña difícil e que se tiñan que cubrir as prazas do persoal.
Queremos tamén denunciar que a Xunta intente responder ás críticas incluíndo no operativo contra incendios a persoal dos GES, Protección Civil, e membros dos distintos corpos policiais e militares. Cando se trata dos datos do SPIF, a realidade é que o Servizo conta con 2.888 persoas, entre bombeiros/as, vixiantes-emisoristas, axentes forestais ou persoal técnico, mais descoñécense canta prazas hai cubertas en realidade.
Existe un total de 458 axentes ambientais e enxeñeiros/as técnicos/as (directores técnicos/as de extinción, unidades de investigación, etc). Mentres que o resto do dispositivo (bombeiros/as, motobombistas ou vixiantes-emisoristas) está integrado por 2.430 persoas; destas, 1.434 son funcionarios/as e 996 laborais (a maioría persoal fixo-descontinuo que este ano traballará oito meses como máximo).
Trátase do persoal que ten funcións directas no operativo de incendios, entre o que non se inclúe o persoal de dirección e administrativo, os postos base, os codificadores e os oficiais de maquinaria do parque de vehículos.
Sen previsión nin planificación
A esta problemática hai que engadir as eivas na xestión dos propios medios materiais, xa que a mobilización de medios dende o norte de Galiza para os incendios de Ourense faise co peor material (especialmente motobombas, que tardan en chegar á área de incendios até tres horas, polo que o tempo de traballo efectivo na extinción se reduce ao destinar a maioría da xornada ao desprazamento).
Por outra banda, dende a CIG reclamamos que se axusten as quendas de traballo e que o persoal desprazado pernocte na zona para ser máis efectivo e poder descansar entre quendas. A CIG está a intentar abordar este asunto coa Dirección Xeral de Defensa do Monte, pero non obtivemos resposta. Tamén consideramos importante que o relevo se faga de forma organizada e que funcione o avituallamento e a substitución do material danado: quéimanse mangueiras e avaríanse as bombas de extinción, e sen equipos de seguridade e EPI en condicións aumentan os riscos. Levamos 15 días de vagas de lume xa tiñan que ter isto arranxado, pero a previsión e a planificación son nulas.
- Detalles
E solicitamos ter unha reunión, en canto remate a vaga de lumes, coa Consellería de Medio Ambiente e Cambio Climático.
No día de onte, 13 de agosto de 2025, enviouse comunicación aos axentes ambientais do Servizo de Patrimonio Natural das catro provincias galegas de que acudiran a apoiar nos incendios forestais. Esta comunicación foi feita principalmente por wassapp e por emisora, sen facer referencia a ningunha instrución ou indicación de actuación ou seguridade.
O persoal da provincia de Ourense esta en gardas (período extraordinario) durante o mes de agosto e setembro e algúns deles teñen emisora con canal co 085 por ter feito labores de vixilancia preventiva. Porén o resto dos compañeiros da Galiza NON TEÑEN EMISORA CON CANAIS DE INCENDIOS (nin 085, nin distritos) nin están en período extraordinario.
O persoal axente ambiental do Servizo de Patrimonio Natural non ten a formación en extinción de incendios forestais. Tampouco ten EPI nin material de seguridade.
Por todas estas razóns esiximos o seguinte:
1. Que a actividade nesta vaga de lumes sexa exclusivamente de vixilancia para evitar aparición de novos focos ou lumes, primando as zonas de alto valor ambiental - sen entrar nos incendios forestais -.
2. Que se abran prudentemente as emisoras para que poidan ter comunicación co SPIF.
3. Que se estableza o período extraordinario potestativo (gardas) previsto no Acordo para poder ter maior cobertura horaria en base o artigo 8.2 da ORDE do 18 de xaneiro de 2019, conxunta das consellerías de Medio Ambiente, Territorio e Vivenda e do Medio Rural, pola que se establece o réxime de prestación de servizos das escalas de axentes forestais e axentes facultativos ambientais:
“Artigo 8. Período extraordinario na consellería competente en materia de patrimonio natural
2. En caso de emerxencia ou ante necesidades do servizo sobrevidas, a consellería competente en materia de patrimonio natural, mediante resolución do órgano directivo con competencias na materia, poderá establecer un período extraordinario de servizos fóra das franxas horarias establecidas dentro do período ordinario. Este período extraordinario non poderá ser superior a dous meses en cómputo anual, que poderá fraccionarse en catro períodos de, como mínimo, 15 días de duración. O inicio de cada período anunciarase con 15 días de antelación sempre que as circunstancias o permitan.”
4. Que se respecten os permisos previos e as vacacións do persoal.
5. Que se envíe unha instrución por escrito ao persoal coas condicións de seguridade para previr accidentes e problemas de saúde no persoal.
6. Unha reunión ao rematar a vaga de lumes para tratar estas cuestións no futuro e evitar situacións improvisadas que poñen en risco ao persoal.
- Detalles
Aínda non chegamos a segunda quincena de agosto e as previsións cúmprense antes de tempo. Estamos tendo unha campaña de verán de lumes durísima, altamente perigosa e con milleiros de hectáreas queimadas. Máis os expertos anuncian que o peor virá nas próximas xornadas con Grandes Incendios Forestais (GIF) e condicións de alto risco para a cidadanía e para as bombeiras e bombeiros, axentes forestais e o resto do persoal que traballa na primeira liña do lume. Nestes días xa estamos a sufrir atrapamentos e situacións críticas, accidentes e lesións graves, que co cansanzo acumulado e as condicións climáticas extremas previsiblemente van ir a máis.
As profesionais que traballamos nos incendios da Galiza estamos acostumadas a situacións de vaga de lume cíclicas, e facemos un grandísimo esforzo cun grande compromiso co medio natural galego e a poboación. Máis temos que destacar a perigosidade e o risco de GIF é cada vez maior pois o combustible aumenta como consecuencia dunha mala xestión forestal da Xunta que prima as especies pirofitas e altamente inflamables.
O goberno da Xunta de Galiza responsabiliza desta situación a 2 meses de seca e a vaga de calor provocadas pola cambio climático o que nos parece un exercicio de escapismo para eludir o seu papel na xestión do territorio. Na CIG temos claro que o que pon en risco ao noso país é o modelo forestal do PP baseado na eucaliptización e na venda do recursos naturais con ausencia total dun planeamento do territorio baseado na prevención de incendios forestais.
E, ante o feito obxectivo que se revelou xa nos lumes do 2006 e do 2017, de que o problema era a biomasa forestal e o tipo de vexetación que temos no monte, o que fixo a Xunta foi aumentar irresponsablemente o risco permitindo e fomentando a acumulación de biomasa pirofita.
Se houbera planeamento non se permitiría plantar un só eucalipto máis, se faría unha xestión das faixas de biomasa e se recuperaría a estrutura mosaico con alternancia de cultivos agrícolas e gandería, na vez dos monocultivos forestais de crecemento rápido.
A xestión do persoal do servizo de incendios segue a ser un desastre
A xestión irresponsable do operativo de loita contra incendios segue a ser improvisada e está moi atomizada. Así para o Servizo de Prevención de Incendios Forestais da Consellería de Medio Rural levamos xa 14 chamamentos de persoal, de máis 550 prazas, das que a maioría se contrataron no mes de xullo. E as probas físicas/visuais realizáronse dos días 21 ao 23 de xullo, o que significa que moitas persoas das que están hoxe a loitar contra o lume teñen apenas días de experiencia e como entraron en plena campaña non se lles puido formar adecuadamente.
Ademais a Xunta teima no modelo de contratación de brigadas municipais, como na que traballaban os 3 compañeiros feridos no día de onte en Oímbra, que son brigadas non profesionais das que a contratación e xestión depende dos concellos e que tamén comezaron a traballar hai unhas semanas.
Diferencias nos horarios e na xestión de persoal que teñen distintas condicións laborais
Continuamos con diferencias de trato entre o persoal, sobrecargando con ampliacións de xornada e horario (de 8 a 12 horas) día si e día tamén unicamente no personal fixo-descontinuo xa que no persoal funcionario esa situación esta máis regulada. E, e aínda que dados os lumes que estamos a viver poderían parecer xustificables, estamos a falar dunha carreira de fondo que de non ter descansos vai a aumentar exponencialmente o cansancio do personal e polo tanto o risco de accidente. E por suposto seguen se cubrirse as accións e moitas das baixas que se producen: unha brigada minguada é unha brigada desprotexida; non é o mesmo traballar 2 ou 3 persoas que 6 ou 7.
A falta de medios materiais e deficiencias no avituallamiento aumentan a situación de risco
O personal non esta a recibir avituallamento nin auga nos incendios forestais evidenciando o total descontrol na xestión no coidado do persoal que traballa nos lumes.
Logo de varios dias seguidos de grandes incendios forestais, evidenciase o problema de falta de reposición de equipos de protección individual. E que levamos meses denunciando que a Administración non garante un estocaxe suficiente para repoñer por desgaste ou rotura ou simplemente para levar unha talla adecuada (fundamental para garantir a seguridade e non queimarse).
Lamentamos os accidentes de compañeiros das brigadas estes dias, alguns deles gravísimos, e solidarizamonos coas suas familias e con todas as habitantes das zonas afectadas.
Na CIG avisamos que imos proceder a denunciar cada vez que se incumpla a seguridade do personal e pediremos a investigación de cada accidente laboral e por suposto ESIXIREMOS RESPONSABILIDADES.
E seguiremos a loitar por unha xestión de persoal onde non se abuse do persoal, na mellora dos medios de extinción, na prevención e ante todo por unha xestión forestal e do territorio que free a conversión da Galiza nun auténtico polvorín.
- Detalles
Dende a CIG poñemos á túa disposición o listado completo de prazas que resultaron da funcionarización para o C1, C2 e AP de Recursos Naturais e Forestais da Consellaría de Medio Rural. Estas praza teñen agora varios procesos pendentes de toma de posesión. Descarga aquí o listado.
Aproveitamos para denunciar de novo como a funcionarización consolida e perpetúa as discriminacións salariais deste persoal. A CIG reclamou incasábel e insatisfactoriamente na negociación previa a equiparación de complementos. Agora, postos con idénticas funcións en distintos ou incluso nos mesmos centros, teñen nivel 12 ou 19 de xeito totalmente aleatorio, consecuencia desta funcionarización chapuceira da Xunta de Galiza.
