- Detalles
Dende a CIG apoiamos a loita do Comité de Empresa de Política Social fronte á posición de desleixo e inacción da Cosellaría, incapaz de aportar solución algunha ante o maltrato e as agresións que están a sufrir o persoal das residencias e as usuarias e usuarios.
Dende o Comité de Empresa de Política Social de Pontevedra convocouse o pasado venres 3 de outubro unha concentración diante do edificio administrativo da Xunta en Vigo para dar conta da situación límite que vive o persoal (maioritariamente mulleres e de máis de 50 anos) das residencias de maiores da Xunta de Galiza; con especial énfase no CRAPD Vigo 1 a causa das continuas agresións físicas, psíquicas e verbais por parte de certos usuarios.
Dita situación é consecuencia da política levada a cabo pola Xunta e a Consellaría de Política Social cando permite, consente e avala que, nun espazo residencial de maiores, se atenda inadecuadamente a colectivos que presentan distintas problemáticas. Os centros residencias para persoas maiores, ademais de que non foron deseñados arquitectonicamente para atender a persoas con problemas psiquiátricos, de adiccións, etc... non contan con persoal formado nin con medios especializados para atender a estas patoloxías.
Diante desta situación e desta decisión política, prodúcense continuamente nos nosos centros situacións de: ameazas, insultos, agresións, menosprezos, estrés laboral... sobre o persoal dos centros. Estase a pór en risco a saúde das traballadoras/es, tanto física como mental. A emoción que resume esta situación é o medo.
Estamos diante dunha situación de maltrato institucional por parte da Xunta e da Consellaría de Política Social, tanto aos cadros de persoal como ás persoas usuarias. De persistir esta situación arriscámonos a padecer algunha situación extrema de violencia con consecuencias irreparables que todas/os lamentariamos.
Dende o Comité levan máís de 3 anos denunciando que, co ingreso neste tipo de centros de persoas con patoloxías psiquiátricas ou adicións, a convivencia é case imposible. Tanto as persoas maiores como o persoal sofre a diario agresións mentras que a Consellaría mira para outro lado. Mantiveron reunións por este tema coa Secretaría Xeral Técnica o 02/12/2021, 27/04/2022 e 26/07/2023. En setembro do 2023 unha compañeira foi vítima dunha agresión sexual que o Comité denunciou na fiscalía e que logo a propia vítima denunciou no xulgado a instancia da fiscalía. Xa nesta ocasión puxémonos en contacto coa Consellaría e denunciamos publicamente a situación, advertindo que a falta de persoal ameazaba a nosa integridade.
Logo destas reunións, propostas e denuncias no Departamento Territorial e Secretaría Xeral Técnica, nada se fixo. A Consellaría sempre responde que non se pode estigmatizar ás persoas usuarias cando o Comité só pretende unha atención axeitada tanto para as persoas con patoloxías psiquiátricas (non hai psiquiatras nos centros) como para o resto das persoas usuarias.
Tamén, en setembro 2023, cursouse escrito á Fiscalía instando a que se tomasen medidas e se achegasen solucións para a protección de usuarios/as e persoal.
En abril do 2025 fíxose unha mobilización conxunta dos 4 comités de empresa de Política Social e o Comité Intercentros para reclamarlle á Consellaría Solucións axeitadas.
En setembro do 2025 volveron a posicionarse en contra do ingreso deste tipo de usuarios nestes centros mentres compartan o mesmo espazo, mesmo persoal e mesmos tempos que as persoas maiores.
O anuncio na prensa de que, por decisión xudicial, persoas responsables de delitos tan graves como homicidio ou agresións sexuais podían ser derivadas a este tipo de centros, que non contan nin co espazo nin co persoal necesario e formado para poder atendelos en óptimas condicións, fixo que se mobilizaran de novo.
O Comité manifesta ter moi claro que tanto as persoas maiores como as persoas de emerxencia social merecen unha atención e un trato digno; pero son conscientes de que non se lle pode dar ese trato aos dous colectivos ao mesmo tempo, no mesmo espazo e co mesmo persoal. É inviábel.
Presentaron denuncia na Inspección de Traballo e ante a Valedora do Pobo pola falta de persoal sobre todo nas quendas de noite e por toda a situación que estaban vivindo, pero a Consellaría segue sen tomar medidas para protexer ao seu persoal mentres, de foto en foto e de inauguración en inauguración, se nos acusa de estigmatizar ás persoas usuarias. Unha magoa que a Consellaría de Política Social e Igualdade teña moito de Política, pouco de Social e nada de Igualdade.
Por iso e para cambiar esta situación, dende o Comité denuncian publicamente e berran:
Pola dignidade e o respecto nas residencias.
O persoal, protexido; os maiores respectados.
Violencia cero nas residencias.
- Detalles
A CIG demanda unha prelación xusta, axilidade na resolución, máis medios e a duplicidade dos postos bloqueados por medidas xudiciais
Traballadoras e traballadores da Xunta de Galiza concentráronse na mañá do martes 30 de setembro de 2025 diante do edificio administrativo de San Caetano para esixir unha solución inmediata aos concursos de traslados, paralizados dende hai anos. Con esta protesta, convocada pola CIG, reclamamos que se garanta unha prelación xusta de dereitos na provisión dos postos, a axilización da resolución dos procesos multiplicando os medios humanos e materiais e a duplicidade dos postos bloqueados de maneira cautelar por resolución xudicial.
A CIG salientou que esta paralización afecta a milleiros de persoas empregadas públicas da Administración galega e culpou á Dirección Xeral de Emprego Público (DXEP) de provocar este descomunal problema ao non convocar concursos de traslados durante lustros ou décadas. A esta non convocatoria súmase que a Administración xeral da Xunta lle deu destino provisional a persoal que lle correspondía destino definitivo e que agora o reclama xudicialmente, ocasionando con isto unha situación de alteración moi grave da orde lóxica de adxudicación de postos, que ademais ten consecuencias sobre os procesos selectivos onde hai persoal pendente de nomeamento.
A CIG explicou que o concurso de traslados é un dos procedementos legais que ten o persoal empregado público para cambiar de posto e para poder moverse xeograficamente, e que as escalas afectadas, que levan 10 ou 15 anos sen traslados, son diversas: persoal veterinario, escalas sociais, enxeñarías, persoal de incendios forestais, e toda unha longa lista de escalas que verían alterada a orde lóxica de adxudicación de postos.
Nulidade dos destinos provisionais
A CIG lembrou que en decembro de 2022 aprobouse no Parlamento a Lei 5/2022, de medidas urxentes para a redución da temporalidade no emprego público na Comunidade Autónoma de Galiza, que estabelece que as persoas que aprobasen os procesos de temporalidade serían nomeadas en destino provisional. Porén, o Tribunal Constitucional xa declarara nulo un artigo similar da lei canaria, porque na normativa básica do persoal empregado público non existe a figura do destino provisional.
Como consecuencia, dende a CIG sinalamos que o 26 de xuño de 2024 temos a primeira sentenza do Tribunal Superior de Xustiza de Galiza cunha funcionaria en destino provisorio á que se lle tivo que transformar o destino en definitivo. A CIG tan pronto tivo coñecemento desta resolución, solicitou información a Función Pública quen, finalmente, en marzo acordou acelerar os concursos en marcha e convocar os pendentes, pero co problema de que comezaron a chegar máis sentenzas.
A DXEP ordena, entón, retirar do concurso os postos afectados por sentenzas ou medidas cautelares e adxudicarllos definitivamente a persoas que as ocupaban en destino provisional. No caso do primeiro concurso con problemas, o de enxeñerías, ciencias e arquitecturas, acaba de aprobarse a duplicación dos postos afectados, como xa propuñamos dende a CIG en agosto, pois era a única solución cabal.
A Dirección Xeral de Emprego Público non propón solucións
A CIG denuncia que esta duplicación só afecta a oito postos con medidas cautelares e non se estende a máis postos nin a máis concursos. Deste xeito, a Administración non aclara que pasará cos próximos concursos ou que van facer se chegan máis medidas xudiciais logo das tomas de posesión e, o que é máis grave, tampouco se propón ningunha outra medida efectiva para axilizar os concursos de traslados.
Mentres a DXEP escúdase na multiplicidade de concursos en marcha, na súa complexidade e na falta de medios materiais e persoais para levar adiante os 11 concursos iniciados. Para a CIG esta situación é produto da nefasta xestión de persoal da Administración xeral da Xunta dos últimos 15 anos, polo que reclama medidas para axilizar os concursos, que se garanta unha orde xusta de prioridade, e se respecte o dereito prioritario á provisión de postos mediante concursos de traslados ordinarios.
- Detalles
Persoal non docente da administración e servizos dos centros de ensino concentrouse na tarde deste mércores, día 1 de outubro, diante das xefaturas territoriais de Educación para reclamar a negociación dun acordo de condicións de traballo que teña en conta as características específicas da prestación deste servizos, a creación dunha estrutura profesional nas cociñas, e recuperar e mellorar os dereitos do V Convenio colectivo.
Con estas protestas simultáneas, a CIG dá continuidade á manifestación realizada o pasado 30 de xuño diante do edificio da Xunta en Santiago de Compostela na que participaron máis de 300 traballadores e traballadoras. Porén, a Consellaría de Educación segue a ignorar ao seu persoal dando largas a unha negociación que se tiña que ter producido xa hai anos.
Están sen negociar ratios e itinerancias, que na Xunta hoxe xa son peores que no sector privado; o persoal funcionario e administrativo leva máis de 20 anos sen negociar condicións; e agora tampouco están reguladas as funcións e as condicións laborais do persoal que quedou sen convenio logo da funcionarización.
Un proceso, ademais, no que algunhas categorías foron funcionarizadas á baixa, desprofesionalizándoas, como é o caso do persoal coidador ou o persoal de cociña.
Abusos e arbitrariedades
Neste escenario, o persoal non docente dos centros de ensino é presa dos abusos e arbitrariedades das direccións e xefaturas territoriais. Mesmo empregan, cando hai conflito, á Inspección Educativa malia que este persoal non é docente, senón que pertence á Administración Xeral.
Por outra parte a falta de negociación das condicións laborais deixa ao persoal coidador, limpador, interprete de signos, persoal das cociñas, conserxe e administrativo, persoal de enfermeiría e mantemento como o último grande colectivo de traballadores e traballadoras da Administración Autonómica sen un acordo de condicións de traballo e sen ter sequera unha mesa de interlocución para a negociacións das cuestións que lles afectan.
Neste senso, a CIG critica que as persoas con responsabilidade da Consellería de Educación, cando aparece nas mesas xerais de negociacion, non queren tratar as cuestións do seu persoal. A estes colectivos pertencen máis de 4.800 compañeiros e compañeiras da Administración da Comunidade Autónoma de Galiza, que están clamando porque a Consellería atenda as súas reivindicacións.
Como medidas máis urxentes, dende a CIG esiximos:
- A negociación dun acordo de condicións de traballo que recupere e mellore os dereitos do V Convenio, para todo o persoal non docente, da administración e servizos dos centros de ensino (PAS)
- O encadre das escalas segundo a titulación requirida para o acceso, dacordo coa Lei do emprego público de Galiza e o Estatuto básico do persoal empregado público. Conformando unha estrutura profesional nas cociñas
- A eliminación da agrupación profesional e a promoción ao subgrupo C2
- A separación das escalas de axudante de cociña e camareira-limpadora
- A negociación de “ratios” para o persoal non docente, subalterno, limpador e auxiliar
- A negociación das funcións e condicións de traballo do persoal coidador, administrativo, subalterno e resto de escalas que prestan servizo nos centros de ensino
- Estabelecer tempo para a preparación da interpretación para o persoal intérprete de linguaxe de signos
- A mellora salarial de todo o persoal non docente
Por todo isto, o persoal continuará mobilizándose até sentar nunha mesa á Consellaría e poñer as bases dun Acordo que recolla estas e outras reivindicacións que dignifiquen as nosas profesións e respecten os nosos dereitos.
- Detalles
O venres 26/09/2025 celebrouse a Comisión de Persoal onde se levaban dous asuntos,
RPT de Medio Rural
Estamos en contra dunha modificación de RPT na que se amortizan 14 postos de traballo para crear 7. Sen os postos derivados do decreto de estrutura temos que se destrúen 7 postos para crear 2 e para financiar a inmoral e insolidaria suba do complemento específico dos letrados ata os máis de 30.000 euros.
CIG - En contra
CCOO - A favor
CSIF - A favor
UGT - Abstención
RPT de administración especial
Traen á Comisión de Persoal unha nova memoria con novas creacións de postos.
Crean postos duplicados de aqueles afectados por medidas cautelares; crean máis postos, especialmente na escala de enxeñaría técnica forestal, para poder ter postos suficientes para dar as tomas de posesión; pola contra non aceptan nin establecer un nivel dos postos creados en consonancia cos niveis medios da escala, e no caso dos postos de bioloxía, optan por non crealos senón por modificar os requisitos pasando o doutoramento a mérito.
Valoramos que se acepten grande parte das nosas alegacións é aínda que non é suficiente como para votar a favor, consideramos que o máis importante é poñer a andar xa o concurso e os actos de elección de destino previos.
CIG - Abstención
CCOO - A favor
CSIF - A favor
UGT – Abstención
En relación ao orde en que pedirán as distintas escalas nos actos de elección de destinos definitivos do persoal que está en provisional nas escalas que concursan, aclaran que cada escala levará un anexo de prazas, co cal, se garantirá, como non pode ser doutro xeito, que todas as persoas poidan ter destino definitivo, sexa nun posto exclusivo da escala ou nun aberto a varias. E tamén comentan que non hai novas medidas cautelares.
Dende a CIG esixímoslle que nos achegue unhas datas certas sobre a resolución dos concursos. Din que estudarán aportalo.
- Detalles
No DOG do 01/10/2025 publican a RESOLUCIÓN do 24 de setembro de 2025, da Dirección Xeral de Emprego Público e Administración de Persoal, pola que se modifica a Resolución do 9 de xullo de 2025 pola que se resolve o concurso ordinario para a provisión de postos de traballo vacantes de corpos e escalas de Administración especial da Administración xeral da Comunidade Autónoma de Galiza, escalas de enxeñeiros, enxeñeiros técnicos, arquitectos, arquitectos técnicos e ciencias, e se abre o prazo posesorio dos postos adxudicados no concurso de traslados convocado pola Resolución do 27 de febreiro de 2024.
Abren o prazo de toma de posesión que se establece no punto terceiro da Resolución do 9 de xullo de 2025, que se producirá o día seguinte ao do cesamento. O cesamento deberá efectuarse o día 21 de outubro de 2025.
De conformidade co previsto na Lei 2/2015, do 29 de abril, do emprego público de Galicia, e no artigo 8 do Decreto 151/2022, do 4 de agosto, polo que se aproba o Regulamento dos procedementos de mobilidade do persoal funcionario de carreira de Administración xeral da Comunidade Autónoma de Galiza e das entidades públicas instrumentais integrantes do sector público autonómico, o prazo da toma de posesión comezará a contar a partir do día seguinte ao do cesamento e será de tres días hábiles se non implica cambio de residencia, ou de sete días hábiles se comporta cambio de residencia.
Se a adxudicación comporta o reingreso ao servizo activo, o prazo de toma de posesión será dun mes e empezará a computarse o día 22 de outubro de 2025.
- Detalles
Aplicable ao persoal docente e non docente (funcionario e laboral) en activo, que presta servizos nos centros docentes públicos non universitarios, dependentes da Consellería de Educación, Ciencia, Universidades e Formación Profesional.
A inscrición ten carácter voluntario, polo que se realizará previa solicitude das persoas interesadas conforme ás instrucións deste procedemento enviadas aos distintos centros de traballo. As persoas responsables dos distintos centros de traballo facilitarán a información necesaria para a inscrición das persoas traballadoras que o requiran.
A dita inscrición realizarase de forma telemática no formulario de petición de recoñecemento que está dispoñible na páxina web da Consellería de Educación, Ciencia, Universidades e Formación Profesional no seguinte enlace:
https://revisionmedicaeducacion.xunta.gal
A solicitude de inscrición debe incluír todos os datos que figuren no formulario. A falta dalgún deles impedirá a súa tramitación.
Toda inscrición xerará un xustificante de consentimento que se deberá presentar o día concertado para realizar a vixilancia da saúde.
Prazos de inscrición:
Para o persoal interino ou temporal substituto: Do día 1 ao 20 do mes seguinte a aquel no que se cumpran os 65 días traballados de forma ininterrompida, contados dende o 01/09/2025, ou dende o día seguinte ao nomeamento se fora posterior a esa data.
Para o persoal nomeado con anterioridade ao 26/09/2025: Do 26/09/2025 ao 31/10/2025.
Para o persoal nomeado con data igual ou posterior ao 26/09/2025: Do día 1 ao 20 do mes seguinte a súa toma de posesión.
Resolución do DX de Centros e RRHH da difusión da campaña
Resumo dos prazos de inscrición dos interesados
- Detalles
Xa non era sen tempo! Por fin van comezar a citar ás persoas traballadoras para as revisións de saúde de 2025!
Despois de poñernos en contacto co Servizo de Prevención propio da Xunta e con Vitaly, esta última comunícanos que van comezar a citar ao persoal para as revisións médicas ordinarias.
Unicamente as avaliacións que se fixeron este ano foran petición propia dun centro de traballo ou das traballadoras despois dunha baixa prolongada. Pero non se atenden as demandas das traballadora/es nun prazo razoable, cando solicitan a avaliación para unha posible adaptación de posto por saúde, someténdoas a un risco innecesario.
As delegadas de prevención da CIG denunciamos que o servizo prevención alleo non estaba a citar ao persoal para as avaliacións de saúde. E pedimos á Xerencia que, sempre que se adapte por saúde un posto, asista unha persoa técnica do servizos de prevención ao centro de traballo para facer a adaptación. Por fin conseguimos que o persoal técnico de Mugatra faga correctamente as adaptacións no centro, comprobando as tarefas.
Contacta coa CIG, e coas túas delegadas/os de prevención se o teu caso de avaliación de saúde é urxente para axilizalo!
- Detalles
Tal e como anunciamos nas Asembleas realizadas por todo o País, o vindeiro martes día 30 de setembro ás 11 horas, convocamos diante do edificio Adminitrativo de San Caetano en Compostela unha concentración para deixarlle ben claro a esta Adminsitración que necesitamos solucións XA para os concursos de traslados:
- Que se garanta unha xusta prelación de dereitos na provisisión de postos
- A axilización dos concursos multiplicando XA medios humanos e materiais
- Ante as medidas cautelares que bloquean postos dos concursos: "posto bloqueado, posto duplicado!"
- Detalles
Un ano máis a EGAP solicita á CIG a achega de propostas de actividades formativas de cara á elaboración do seu plan de formación anual, manténdonos á representación legal do persoal á marxe dos criterios de selección empregados.
Na CIG volvemos recibir a invitación da EGAP para facérmoslle «propostas» de accións formativas para o ano 2026.
Como vén sendo habitual até agora, a Escola maniféstanos que fará unha selección das propostas de formación transversal, mentres que no caso das materias específicas trasladará as propostas recibidas ao persoal coordinador de cada consellaría, que será o que tome as decisións. Seguimos sen coñecer a día de hoxe cales son os criterios desta selección manexados tanto pola EGAP como polas persoas coordinadoras de cada consellaría.
Neste proceso de elaboración do plan de formación anual a participación directa do persoal é inexistente. A EGAP non atende a petición reiterada por parte da CIG de que, ao igual que fan outras escolas de Administración Pública, o proceso de elaboración do plan anual de formación sexa transparente, negociado coa representación do persoal e conte cunha enquisa de detección de necesidades previa que guíe a toma de decisións, de xeito que a oferta se axuste ás demandas reais de todo o persoal da Administración autonómica por igual.
Así e todo, e tendo en conta as habituais limitacións, podes facernos chegar as túas suxestións e incorporarémolas á nosa proposta. O prazo para que a CIG as presente é até o 8 de outubro, así que procura enviárnolas até o mércores 1 de outubro, para dispormos de tempo suficiente para recompilalas todas.
Mentres, continuamos a traballar «POR UNHA EGAP TRANSPARENTE E EN GALEGO»!
- Detalles
O obxectivo é a elaboración dunha alternativa que concrete os incumprimentos do Plan Xeral de Normalización da Lingua Galega (PXNLG), así como dos acordos nacionais e internacionais que amparan o galego, e propoña accións concretas que comprometan a colectivos sociais e institucións na súa execución, partindo dos acordos unánimes.
Coa finalidade de acadar avances na normalización da nosa lingua e garantir a súa presenza e oferta en todos os espazos e para todos os usos, acadáronse e ratificáronse acordos nacionais e internacionais, entre os que salientan a Declaración Universal de Dereitos Lingüísticos (1996), a Carta Europea de Linguas Rexionais e Minorizadas (2001), o Plan Xeral de Normalización da Lingua Galega (PXNLG, 2004), o Protocolo de Donostia para a garantía de dereitos lingüísticos (2016) e a Lei Paz Andrade (2014)
Porén, estes acordos non se respectaron e as medidas que sinalaban non se aplican. Chegouse, incluso, a lexislar na súa contra, co resultado da aceleración da tendencia negativa no uso do galego e unha porcentaxe de incapacidade para falalo inédita até agora. Co obxectivo de mudar este rumbo do galego e parar a emerxencia lingüística, a CIG forma parte da plataforma Queremos Galego, e participa activamente no Proceso social de Lingua Vital.
O sábado 20 de setembro tivo lugar a primeira xuntanza dos grupos de traballo deste Proceso social de Lingua Vital, para elaborarmos unha alternativa que dea resposta ás necesidades lingüísticas actuais. Estes grupos abranguen os 7 sectores seguintes:
- dereitos lingüísticos
- onomástica, toponimia e corrección lingüística;
- servizos públicos (saúde, xustiza, administracións: local, autonómica e estatal)
- ensino e mocidade
- medios de comunicación e novas tecnoloxías
- ámbito socioeconómico
- lusofonía e proxección exterior
Un primeiro paso dos traballos é debater, decidir e poñer en común as propostas. No caso do PXNLG os nosos obxectivos son:
- Avaliar o cumprimento das medidas contempladas no PXNLG: cada sector e ámbito ten unha serie de medidas no PXNLG. Trátase de identificar o grao de cumprimento e efectividade de cada unha delas.
- Identificar os principais obstáculos para a efectivización das medidas incumpridas: coñecer o motivo polo que as diferentes accións propostas foron incumpridas e que cómpre remover, modificar ou aplicar para a súa execución.
O proceso continuará nos plenarios comarcais de Queremos Galego durante o mes de outubro, coa participación de asociacións e colectivos de ámbito local e persoas a título individual que realizarán achegas ao proceso.
Para o mes de novembro os grupos de traballo debaterán todas as propostas recollidas e acordaremos os resultados que serán plasmados no documento final, que recollerá as prioridade das accións e un calendario de execución.
Lingua Vital Xa!
