- Detalles
O director xeral de Orzamentos e Financiamento Autonómico expuxo na Mesa Xeral de Empregadas Públicas a materia relativa ao persoal incluída no Anteproxecto de Lei de orzamentos para 2025.
O director xeral aclarou que o comezo do orzamento data de xullo de 2024 coa aprobación do teito de gasto, o cal contempla un incremento dos recursos públicos dun 3.2%.
Outra información que facilitou foi que as previsións de incrementos salariais van estar incluídas nun fondo retributivo, no art. 18 dentro da Lei de orzamentos, para poder facer fronte aos posíbeis incrementos derivados das medidas salariais. A disposición adicional 8ª é a que habilita ao pagamento unha vez autorizado. Prevé que no mes seguinte se fará efectivo o cumprimento da disposición, nos mesmos termos que o ano 2024.
Tamén enumerou moi brevemente as principais medidas para 2025 en materia de persoal contempladas nos orzamentos, dando varias porcentaxes e cifras de gasto en relación coas medidas máis destacadas:
PRINCIPAIS MEDIDAS ESTABLECIDAS NOS ORZAMENTOS PARA 2025
1 PERSOAL EMPREGADO PÚBLICO DA ADMINISTRACIÓN XERAL DA XUNTA
- ACORDO MARCO PARA A ADMINISTRACIÓN DO S. XXI
- Finalizaba en 2024, ao establecer unha parte variábel nas retribucións condicionada ao cumprimento de que o IPC no período 2022-24, de forma acumulada, superara o incremento salarial fixo
- Establecía un incremento do 0.5%, a aplicar en 2025, con efectos retroactivos dende o 1 de xaneiro de 2024
- As previsións de incremento salarial van estar incluídas no art. 18 da Lei de orzamentos.
- GRAOS II E III DA CARREIRA PROFESIONAL/COMPLEMENTO DE DESEMPEÑO
- Custo total de 11M€
- No 2025 confírmase o incremento do segundo tramo de carreira (66% do grao II), e está previsto o recoñecemento do grao III da carreira.
2 ÁMBITO SANITARIO
- APLICACIÓN DO ACORDO DA MESA SECTORIAL DO 20 DE ABRIL
- Custo total de 18M€
- Redución progresiva das horas de traballo
- Creación de 523 novas prazas
- PLAN DE ESTABILIZACIÓN DO PERSOAL
- Custo total de 28M€
- Incremento de prazas de formación: creación nos últimos 5 anos de 623 prazas MIR e EIR
- Posta en funcionamento do centro de protonterapia
3 ÁMBITO DOS SERVIZOS SOCIAIS
- IMPLANTACIÓN DO PLAN DE REFORZO DOS EQUIPOS DE VALORACIÓN E ORIENTACIÓN - EVOS
- APLICACIÓN DO ACORDO DAS CONDICIÓNS DE TRABALLO DO PERSOAL DOS CENTROS PROPIOS DA CONSELLARÍA DE POLÍTICA SOCIAL
- Compensacións por traballos en domingos e festivos
- CREACIÓN NO CONSORCIO DE 33 NOVAS PRAZAS
4 ÁMBITO EDUCATIVO
- APLICACIÓN DO ACORDO DA CONSELLARÍA DE EDUCACIÓN COAS PRINCIPAIS ORGANIZACIÓNS SINDICAIS DE 12 DE OUTUBRO DE 2023
- Actualización de complementos retributivos
- Creación de 83 novos postos como consecuencia do Plan Mega
5 ÁMBITO DE XUSTIZA
- CUSTOS DERIVADOS DO RECOÑECEMENTO DA CARREIRA PROFESIONAL
6 CONSELLARÍA DO MEDIO AMBIENTE
- ESTABILIZACIÓN DE PARTE DO PERSOAL QUE ATÉ AGORA ESTABA TRABALLANDO NO PLAN EÓLICO
- Consolidación do 15% deste persoal como parte da estrutura
7 CONSELLARÍA DO MEDIO RURAL
- ACORDO DAS CONDICIÓNS DO PERSOAL DO SPIF
- Compensacións por traballar en domingos e festivos
- ACORDO DO PERSOAL FIXO DESCONTÍNUO
- Incremento do período de contratación de 6 a 9 meses
- En 2024 pasa a 7 meses
- En 2025 para a 8 meses
Dende a CIG presentamos unha enérxica queixa, dado que consideramos totalmente inaceptábel a mala fe negocial amosada por Emprego Público, dado que non puidemos ver a documentación da xuntanza, por sernos facilitada por email pouco antes do comezo da reunión.
Imos formular as nosas alegacións por escrito, e tomar as medidas que consideremos oportunas ante a AUSENCIA DE NEGOCIACIÓN COLECTIVA E DE BOA FE NEGOCIAL.
- Detalles
No DOG do 18/10/2024 publican a CORRECCIÓN DE ERROS. Orde do 1 de outubro de 2024 pola que se resolve o procedemento de integración como persoal laboral da Xunta de Galiza do persoal laboral fixo do Consorcio Galego de Servizos de Igualdade e Benestar.
O prazo para a toma de posesión finaliza o día 31 de outubro de 2024.
- Detalles
MESA PREVIA E MESA XERAL DE EMPREGADAS PÚBLICAS DO 15/10/2024. COMISIÓN DE PERSOAL E MESA XERAL DE EMPREGADAS PÚBLICAS DO 16/10/2024
Señoras, señores, pasen e vexan! O maior espectáculo do mundo… está en San Caetano e é de balde, aínda que de entretido ten ben pouco…
Nun novo alarde de hipocresía e desvergoña inadmisíbeis, propios de sistemas de ultradereita, que dinamitan calquera posibilidade de albiscar ese fenómeno estraño que, para eles e elas, é a BOA FE NEGOCIAL, dende a Dirección Xeral de Emprego Público convócasenos a un maratón de mesas de «negociación» onde o eixo central, como ben di o seu nome, é supostamente a NEGOCIACIÓN, neste caso a «negociación» nin máis nin menos que do Anteproxecto da Lei de medidas (materia de persoal) e da Lei de orzamentos para 2025.
Pois nada máis lonxe da realidade, porque a NEGOCIACIÓN desaparece debaixo da chisteira da directora-maga xeral de Emprego Público dende o minuto un, non vaia a ser que os e as representantes do persoal poidamos cumprir coa nosa misión e facer o noso traballo.
O modus operandi do espectáculo é rudimentario, pero efectivo para o PARIPÉ NEGOCIAL, cuxos pasos saben ao dedillo:
1) Enviar a documentación por email aos sindicatos instantes antes do comezo das xuntazas para impedir ao máximo a posibilidade de que os e as representantes das traballadoras e dos traballadores poidamos ler, valorar e estudar as propostas.
2) Unha vez se inicia a xuntanza dicir, sen inmutarse, que houbo moitas dificultades para conseguir ter a documentación lista a tempo e poder enviárnola cun mínimo de 48 horas de antelación, e por iso nola envían minutos antes de comezar a xuntanza.
3) Para suavizar o ambiente, o seguinte paso é —se cadra— pronunciar un breve discurso de desculpas, o cal volve repetir en cada ocasión o cargo que intervén na mesa.
Así actúan estes mandamáis que se excusan, sen o máis mínimo rubor, por non saber planificar e facer correctamente o seu traballo ou, máis ben, por tentar disimular a súa estratexia de non cumprir coas súas obrigas, mentres seguen a cobrar as súas avultadas nóminas, fagan o que fagan.
4) Acto seguido, o seu é comezar o numeriño central: ler a toda présa o resumo que teñen preparado sobre as propostas contidas na documentación; propostas que ningún dos sindicatos puidemos chegar a ler.
5) Preguntarnos aos sindicatos se temos algo que engadir… sobre toda esa información á que non tivemos acceso.
6) Dar por rematada a función circense coa APROBACIÓN DE TODAS AS PROPOSTAS NON NEGOCIADAS CO VOTO EN CONTRA DE TODAS AS CENTRAIS SINDICAIS.
Señoras e señores de Emprego Público: o seu numeriño de «maxia» está moi visto xa, e o truco do PARIPÉ NEGOCIAL, ademais de incumprir os mandatos legais, indigna moito ao persoal.
Na CIG non estamos para asistir como meros e meras espectadores/as ao seu circo, nin para escoitar estoicamente cando e onde a vostedes lles pete os seus longos e soporíferos espectáculos.
Cumpran coas normas, coa BOA FE NEGOCIAL e coas súas responsabilidades, ou váianse coa súa función a outra parte!!!!
- Detalles
Nas mesas xerais dos días 15 e 16 de outubro se nos trouxeron varias modificacións normativas.
MODIFICACIÓNS DO DECRETO 151/2022 DE MOBILIDADE DO PERSOAL FUNCIONARIO DE CARREIRA
A maiores da aberración na que finalmente deron marcha atrás en relación á medida a prol dos homes, manteñen estas outras outras:
1. Modifican o artigo 15.2 para que as persoas das comisións de valoración dos concursos ordinarios non teñan que pertencer ao corpo ou escala do concurso de que se trate senón simplemente a un grupo de titulación igual ou superior ao esixido nos postos convocados. Isto débese a que en escalas con pouco persoal e onde pode concursar un grande número de efectivos pode haber problemas para constituír as comisións.
2. Outra modificación é a dos puntos 3 e 4 do artigo 38 relativa á obriga das persoas a dispor ou adscritos provisionalmente de solicitar determinados postos nos concursos ordinarios, onde suprimen a opción de facelo a unha das grandes cidades, por a elección da localidade do posto ao que estea adscrito provisionalmente a persoa funcionaria. Argumentan que ás veces é difícil en determinadas escalas dar postos definitivos nalgunhas localidades.
Neste punto observamos aspectos positivos pero tamén o perigo de que se poida utilizar, en prexuízo das demais persoas concursante, ao poder adscribir a unha persoa á localidade onde pretenda concursar.
Evidentemente opoñémonos a que unha modificación deste calado se leve a cabo querendo despachar este asunto enviando a documentación horas antes para que non poidamos estudala.
ROLDA ABERTA DE INTERVENCIÓNS
Preguntamos, entre outras, polas seguintes cuestións:
Permiso de lactación: facemos constar que nas anteriores Lei de Medidas cambiaron o permiso de lactancia. E non nos decatamos. Agora xa non se pode coller a lactación mixta, hai que optar por acumulada ou redución diaria. E tamén mudaron o momento do desfrute. Se se colle acumulada hai que collela pegada ao permiso de maternidade. Dous cambios: dous goles que nos marcaron.
Acordo do persoal das illas atlánticas: preguntamos en xullo e a DX contestou que estaban mirando “unhas cousiñas”. Agora nos di que se impulsará pero que o están revisando en Facenda.
Contía dos trienios do persoal temporal que aproba procesos selectivos: facémoslle constar as recentes sentenzas do Tribunal Supremo que confirman que os trienios perfeccionados como persoal laboral se deben de retribuir na mesma contía ao adquirir a condición de funcionario, sexa de carreira ou interino. Esiximos que non poñan atrancos e cumpran as sentenzas.
E aproveitamos para lembrarlles que moitas administración establecen complementos de antigüidade para unificar e homologar trienios de todo o persoal, e que deberíamos sentarnos a falar disto.
Lei de medidas do 2012: esiximos que cese a suspensión dos dereitos suspendidos por esa lei, como son a dos conceptos do Fondo de Acción Social, e a do artigo 19 o Convenio.
OUTRAS INFORMACIÓNS
• Anuncian que non lles vai quedar máis remedio que dar destino provisional ás persoas que aproben os procesos da lei 20/2021 porque non se van poder finalizar antes os concursos de traslados. E que para as tomas de posesión provisionais analizarán caso por caso os postos a ofertar.
• Se negociará o grao III da carreira profesional neste trimestre para que teña efectos do 2025.
• Revisarán o que esta a acontecer coa valoración dos fixos-descontínuos nos procesos da lei 20/2021, despois de que llo solicitáramos dende a CIG.
- Detalles
Aproveitando a negociación do proxecto de Lei de medidas fiscais e administrativas onde se poden crear ou modificar as escalas, facémoslle constar que o grupo III-99 foi castigado cunha degradación no proceso de funcionarización, creando unha escala no subgrupo C2.
Demandamos a creación da escala no subgrupo C1, para acoller ás persoas do grupo III-99 que se funcionaricen e para que o persoal do grupo IV-004, ao funcionarizarse, poida ter un itinerario profesional para poder realizar a promoción interna aos subgrupo C1.
E facemos constar tamén que hai outros casos de reclasificacións que basta con respectar as sentenzas porque nese caso xa hai creadas escalas que se corresponden coa reclasificación.
A directora comenta que no caso do III-99 se decidíu encadralas no subgrupo C2 dacordo cos INFORMES DE EDUCACIÓN E POLÍTICA SOCIAL.
- Detalles
No DOG do 14/10/2024 publican a ORDE do 1 de outubro de 2024 pola que se resolve o procedemento de integración como persoal laboral da Xunta de Galiza do persoal laboral fixo do Consorcio Galego de Servizos de Igualdade e Benestar.
Nesta orde se establecía un prazo de 6 días hábiles para a toma de posesión, pero NON SE INDICABA COMO PROCEDER.
Despois da inhibición do Consorcio, do descoñecemento de Emprego Público, e de dar mil voltas, dende a dirección xeral de Emprego Publico comunícannos VERBALMENTE que se van ampliar os prazos ata o 30 de outubro e que o Consorcio xa se comunicará co persoal.
A maiores na mesa xeral se nos comunicou que SEGUEN TRABALLANDO na RPT do Consorcio.
- Detalles
Nas mesas xerais que se celebraron estes días insistimos no que preguntamos na anterior Comisión de Persoal do 19/09/24: cal é a situación de TODOS os concursos de traslados convocados (listados provisionais de admitidos, elección de postos, toma de posesión), e dos NON CONVOCADOS (cando pensan comezar as negociacións, cando convocan, etc...)?
Facemos constar que neste momento hai convocados 6 concursos e queremos coñecer en que estado están:
F0424 - CONCURSO DE ADMINISTRACIÓN XERAL 2024.
F0324 - ESCALAS DE ENXEÑARÍAS, ARQUITECTURAS, CIENCIAS.
F0224 - INSPECCIÓN E AXENTES INSPECCIÓN DE CONSUMO.
F0124 - CONCURSO DE GARDACOSTAS 2024.
F0223 - ESCALAS SERVIZO DE PREVENCIÓN DE INCENDIOS.
F0123 - AXENTES AMBIENTAIS/FORESTAIS.
Non acabamos de entender por que non se convoca o resto tendo en conta que en moitos deles o número de efectivos que vai concursar é mínimo, poñemos por exemplo a escala de arqueoloxía onde ademais o anterior concurso se convocou dentro do de especiais.
De telos convocados e resoltos “sobre o papel” xa se tería avanzado para no momento de finalización de procesos selectivos e promocións internas, facer todas as tomas de posesión simultáneas.
Están traballando neles.
Están traballando coas consellerías o asunto dos concursos específicos.A directora xeral comenta que están traballando nas listas definitivas de algúns como por exemplo o de administración xeral. E aí remata a explicación.
Procesos selectivos
Listas provisionais admitidos/excluídos: a finais do 2023 publicaron varias convocatorias de oposicións. Moitos meses despois (vai para un ano), varios procesos seguen sen publicar as listaxes provisionais de persoas admitidas/excluídas. Cando as van a publicar? Van a compensar os gastos de academias e ou de quen deixou de traballar, a quen quede excluído despois dun ano en academias? Aquí poñemos algúns casos:
De acceso libre:
• Xuño/2023: letrados
• Novembro/2023: delineantes, mantemento de servizos, análise de laboratorio, PSX (intelectuais), limpeza e cociña (D.I.)
• Xaneiro/2024: veterinarios, bioloxía, subinspección urbanística, auxiliar de laboratorio, xerocultor, PSX, subalterno (D.I.), téc. de finanzas, enfermaría, educadores.
De promoción interna:
• Novembro/2023: corpo superior, xestión, administrativo, auxiliar.
• Xaneiro/2024: informática-A1 e A2, finanzas-A1, varias enxeñarías-A1 e A2, inspección de consumo.
A directora di que se está cumplindo o cronograma publicado o 6 de agosto, que hai anunciados exames para o 19 de outubro, para o 16 e 17 de novembro, para o 14 de decembro e no caso da promoción interna de corpos xerais para finais de xaneiro e principios de febreiro. Que se publicarán listas de admitidos e se irán nomeando tribunais. Que están traballando
Modelo de promoción interna: volvemos a insistir na necesidade de cambiar de modelo. O caso da promoción interna ao C2 é sangrante. E facemos a reflexión necesaria de que si é posible acceder á condición de persoal funcionario por sistemas diferentes ao do concurso-oposición, tamén o debe ser para a promoción interna.
- Detalles
Na produtiva mesa xeral do día 15/10/2024 agromaron unha serie modificacións normativas que parecen ditadas pola ultradereita unhas e pola facción da boina outras, pero todas cunhas marcadas connotacións ideolóxicas e políticas.
Os homes por riba, por suposto...
En algo tan sinxelo como unha modificación do Regulamento dos procedementos de mobilidade do persoal funcionario de carreira relativa ás comisións de valoración dos concursos ordinarios introducen unha CLÁUSULA IDEOLÓXICA, que parece sacada dun texto de VOX: aplicar unha medida de discriminación positiva A FAVOR DOS HOMES, no sentido inverso ao que se establece na normativa en materia de igualdade utilizando medidas de acción positiva no sentido contrario. Non sabemos de onde saíu ese texto ou quen lle intentou colar este catecismo á DXEP.
O caso é que despois de que puxéramos de relevancia tal asunto e de que lles fixéramos ver que incluso iría contra a normativa de igualdade, a directora xeral reflexionou e finalmente retirou esa modificación.
¡FUERA GALLEGO!
Coa desculpa da falta de persoal en determinadas escalas e categorías, traen a mesa outro punto ditado por VOX. Propoñen eximir do coñecemento de lingua galega ao persoal de determinadas categorías sanitarias. Queren dar a entender que van ter que recorrer a persoas doutras comunidades, países ou estados, ante a insuficiencia de persoal sanitario na Xunta de Galiza. Facémoslle notar que isto se debe entre outros factores, a que unha parte importante de persoal que se formou neste país ESTÁ FORA, noutras comunidades e noutros países en condicións mellores. E que incluso o persoal propio marcha para o SERGAS en canto pode. Así que a cuestión non é que non haxa persoal formado en Galiza, senón que determinadas políticas teñen determinados efectos.
E a maiores, destacamos a indolencia negocial que leva a que nin se plantexaran buscar alternativas que incluso poderíamos valorar, como podería ser a forma de abordar a mesma cuestión na Comunidade Autónoma Vasca, onde non se exime do requisito de coñecer a lingua do país (que é un dereito da cidadanía e das persoas usuarias e polo tanto DEVÉN nun deber do persoal funcionario), senón que se adía a futuro facilitando que a formación dese persoal para obter os coñecementos na lingua propia se faga en varios anos.
Todo isto sucede ademais nun momento en que Rueda, aquel que se manifestaba contra o galego hai uns anos, manifesta a súa “preocupación” polo estado da situación lingüística provocada polo deterioro consciente que o PP producíu.
A facción da boina no PP: quitar persoal funcionario para meter exalcaldes
Pero non todo o que nos trae a Dirección Xeral de Emprego Púbico e inspirado por Vox. A modificación que pretenden facer da LOFAXGA para a creación de AXENTES POLÍTICOS parece ditada pola facción da boina do PP.
A maiores do anecdótico cambio de denominación das xefaturas territoriais que pasan a ser departamentos territoriais e de xefes/as territoriais a directores/as territoriais e que xa se fixo nos decretos de estrutura, o cambio relevante que nos traen é o da posibilidade de que estes/as directores/as territoriais NON SEXAN PERSOAL FUNCIONARIO.
É evidente que queren instaurar a figura do axente electoral, que tan ben lle resulta a este goberno do PP. O importante non é a dirección dos servizos dos departamentos territoriais senón “Representar oficialmente á consellería ante as autoridades e bla, bla, bla...” o que significa, que hai que nomear aos excedentes de alcaldías perdidas, deputados e senadores non electos, cargos e afiliados sobrantes. E colocar aos que teñan maña para saír nas fotos de prensa inaugurando fervenzas ou fenómenos naturais, farolas, paseando por colexios onde se cambiou unha tella ou recibindo aos xubilados do clube da boina.
Trátase, en definitiva, de usar a administración pública non para dar servizos á cidadanía, senón para servirse a eles mesmos. E ao mesmo tempo é un insulto a todo o persoal empregado público e especialmente ás persoas dos corpos e escalas dos subgrupos A1 e A2, que son quen teñen os coñecementos, capacidade e perfil para desempeñar as direccións territoriais
- Detalles
Parece de sentido común que cando unha escala coincide no seu nome e funcións cunha titulación académica, esta sexa a titulación que se esixa para acceder á escala. Pero para a Xunta, a escala de Educación Social, pode ser un caixón desastre onde caiban moitas titulacións. Por iso na Mesa Xeral do 15/10/2024 tráennos unha modificación sobre as titulacións para a escala de Educación Social que consiste engadir o título de “graduado/a” en Educación Social (por certo, só en masculino).
Dende a CIG manifestamos que dende xa hai tempo que vimos reivindicando o asunto da correspondencia desta escala cunha titulación e esixindo que a titulación esixida sexa unicamente a de Educación Social.
Somos tamén conscientes de que neste momento hai persoas desempeñando postos desta escala con outras titulación, e que por tanto establecer a correspondencia entre o nome da escala e titulación esixida podería supoñer exclusións, polo que salientamos que se se acoutan as titulacións se pode tamén establecer a través dunha disposición transitoria que todo o persoal que estea desempeñando postos desa escala cunha das titulacións vixentes ata o de agora poida seguir facéndoo e continuar ademais nas listas de substitucións.
Sinalámoslle á Xunta que facer unha pequena modificación e non abordar a problemática principal desta escala é unha oportunidade perdida.
- Detalles
Na mesa xeral do día 15/10/2024 a Xunta declara que vai introducir na LEPG (art 24.2) unha penalización para o persoal temporal ou interino que non supere o período de proba consistente en 6 meses de baixa nas listas de contratación.
Non nos parece serio que dun día para outra nos traian modificacións deste calado. Queremos datos sobre canto persoal non supera o período de proba e tamén saber as causas polo que non se fai. Deducimos que para a administración é máis doado adoptar medidas sancionadoras que corrixir problemas cando estes poden ser derivados de moi variadas causas, organizativas, de saúde, etc. E ao mesmo tempo, unha modificación que pode restrinxir dereitos ten que estar moi xustificada e definida nun protocolo que non deixe lugar á arbitrariedade dalgún xefe inmediato ou intermedio. Solicitamos que se retire e se dea tempo para unha reflexión sobre o asunto.
Tamén manifestan a súa intención de abordar nun futuro próximo a modificación do decreto de listas, aínda que agora queren introducir os seguintes cambios que xa estaban operando:
1. Adaptar o decreto ás sentenzas no que se refire á valoración do tempo de traballo en entidades instrumentais que non sexan do sector público autonómica. Isto deriva de sentenzas sobre a prestación de servizos en TRAGSA, empresa do sector público estatal.
2. Reducir os días do notifica de 5 a 2.
3. Introducir unha disposición adicional para no caso do persoal do SPIF valorar por unha soa vez os servizos prestados ata 30 de maio de 2023 como persoal laboral das categorías equivalentes.
Ademais destas modificacións, na lei de medidas fiscais e administrativas para o 2025 e con vixencia limitada a ese ano, SE MANTÉN en materia de listas de contratación a posibilidade de que para garantir a dispoñibilidade de persoal en determinadas categorías se habilita a vía de que no caso de non haber persoal nas listas se solicite persoal a través do Servizo Público de Emprego.
As escalas e categorías serían as seguintes:
Categorías profesionais 2 do grupo I (titulado/a superior médico/a), 2 do grupo II (ATS, enfermeiro/a, practicante, DUE), nas categorías profesionais 65 (oficial 1ª cociña, oficial 1ª cociñeiro, xefe/a de cociña, cociñeiro/a 1ª), 69 (oficial de servizos técnicos, oficial 1ª mantemento, oficial 1ª de oficios varios, oficial de primeira) do grupo III, nas categorías profesionais 3 (auxiliar sanitario, auxiliar de clínica, auxiliar psiquiátrico, auxiliar de enfermaría, coidador/a xeriátrico, coidador/a), 4 (auxiliar fogar, coidador/a auxiliar, auxiliar coidador/a, auxiliar de internado), 5 (oficial 2ª de cociña, cociñeiro/a 2ª) e 6 (axudante/a de servizos técnicos, oficial 2ª de mantemento) do grupo IV e categoría profesional 1 (camareiro/a- limpador/a, axudante/a de cociña, pasador/a de ferro -lavandeiro/a, costureiro/a, cortador/a, pasador/a de ferro e lavandeiro/a) do Grupo V do V Convenio colectivo único para o persoal laboral da Xunta de Galiza ou, de ser o caso, para o nomeamento de persoal interino para o desempeño con carácter transitorio de prazas reservadas a persoal funcionario na escala de facultativos especialidade de medicina (subgrupo A1), na escala de técnicos facultativos especialidade de enfermaría (subgrupo A2) na escala técnica de cociña (subgrupo C1), escala técnica de mantemento (subgrupo C1), na escala de auxiliares de clínica (subgrupo C2), escala auxiliar de coidadores (subgrupo C2), escala auxiliar de cociña (subgrupo C2), escala auxiliar de mantemento (subgrupo C2) e na especialidade de persoal de limpeza e cociña da agrupación profesional.
Tamen manteñen durante o ano 2025 a reducción do período de penalización de 6 meses e a exención de coñecemento do galego ao persoal citado a través do SEPE e que ten un marcado acento ideolóxico tal e como vos contamos aquí: ¡FUERA GALLEGO!
