- Detalles
No DOG do 14/07/2023 publican:
- RESOLUCIÓN do 11 de xullo de 2023, da Dirección Xeral da Función Pública, pola que se aproban e se fan públicas as listas provisionais de persoas admitidas e excluídas ao proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso, para o ingreso na agrupación profesional de persoal funcionario da Xunta de Galiza (subgrupo AP).
- RESOLUCIÓN do 11 de xullo de 2023, da Dirección Xeral da Función Pública, pola que se aproban e se fan públicas as listas provisionais de persoas admitidas e excluídas ao proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso na agrupación profesional de persoal funcionario da Xunta de Galiza (subgrupo AP).
As persoas aspirantes poderán consultar o estado das solicitudes de inscrición presentadas e a situación como admitidas ou excluídas en fides.xunta.gal
A lista completa de persoas aspirantes admitidas e excluídas, con indicación da causa determinante da súa exclusión, poderase consultar no portal web corporativo funcionpublica.xunta.gal
Así mesmo, e segundo a base I.4 das que rexen o proceso selectivo, nesta lista figuran as persoas aspirantes que teñen pendente de acreditar que están en posesión do Celga requirido.
As persoas aspirantes excluídas, as que non figuren en ningunha das listas, así como aquelas persoas que non acreditaron estar en posesión do Celga requirido, disporán dun prazo de dez días hábiles, contados a partir do día seguinte ao da publicación desta resolución no DOG, para reclamar ou emendar o defecto que motivou a exclusión ou acreditar que posuían antes do día de finalización do prazo de presentación de solicitudes de participación no proceso selectivo o Celga 2 ou equivalente debidamente homologado.
- Detalles
No DOG do 14/07/2023 publican a RESOLUCIÓN do 5 de xullo de 2023, da Dirección Xeral da Función Pública, pola que se anuncia a exposición das listaxes provisionais de axudas aprobadas e denegadas dos criterios de repartición do Fondo de Acción Social do exercicio económico 2022, relativos á axuda para a atención de persoas con discapacidade para o persoal da Administración da Xunta de Galiza.
Fan públicas as listaxes provisionais das axudas aprobadas e denegadas dos criterios de repartición do Fondo de Acción Social do exercicio económico 2022 relativos á axuda para a atención de persoas con discapacidade na páxina web da Dirección Xeral da Función Pública http://funcionpublica.xunta.es/?q=FAS
Para o coñecemento íntegro do acto os solicitantes deberán introducir nos espazos habilitados para o efecto o NIF e mais o código de impresión da súa solicitude.
- Detalles
A Xunta pretende facilitar os trámites de proxectos cun grande impacto ambiental
Na CIG Autonómica tomamos a decisión de impugnar o Decreto 102/2023, do 15 de xuño, polo que se regulan as entidades de colaboración ambiental e se crean o rexistro de entidades e o banco de persoas expertas en avaliación ambiental. Dende a CIG Autonómica denunciamos que se trata dunha estratexia da Xunta ao abeiro da lei de simplificación administrativa aprobada polo Goberno do PP para substituír o traballo do persoal funcionario público co obxectivo de facilitar a autorización de proxectos con impacto ambiental como os parques eólicos ou a minería extractiva.
Deste xeito a Administración pública botará man de empresas privadas colaboradoras e dunha bolsa de expertos/as contratados/as directamente para facilitar as autorizacións e legalizar así a venta dos recursos naturais do noso país. E o que é máis grave, mediante este Decreto non se privatizan unicamente as funcións de informe previo, senón tamén o seguimento das obras e actuacións, permitindo o levantamento de actas con valor probatorio, cando estas funcións están unicamente reservadas por lei a persoal funcionario público.
Dende a CIG Autonómica denunciamos publicamente que algúns/has empregados/as públicos/as están a ser apartados/as das súas funcións porque non “facilitan” as autorizacións dos parques eólicos cando teñen incidencia sobre o medio ambiente. O persoal afectado, biólogos/as, enxeñeiros/as e incluso axentes ambientais, está preocupado polo perigo evidente que corren especies protexidas, hábitats prioritarios, espazos da Rede Natura ou afloramentos singulares, xa que as empresas terán que seguir as liñas marcadas pola Xunta, unhas liñas que segundo denuncian os propios empregados/as públicos/as a Xunta non se atreve a publicar porque son un disparate.
Ademais da substitución de funcións das que até o de agora se encargaba o persoal público, a medida obrigará os funcionarios/as a ter que autorizar a cegas ao non ter realizado eles/as o informe, o que os/as porá nunha situación de inseguridade xurídica. Por maior abastanza, tamén se lles substitúe nas funcións de control.
Por non falar do gasto que suporá, xa que o control das empresas que van realizar os informes obrigaría a realizar de novo o informe e auditar a empresa para ver que non forma parte dun grupo de empresa; polo tanto, o traballo será maior para o persoal funcionario público, que por unha parte ten que elaborar o informe e por outra investigar a empresa que o fai.
Outra cuestión negativa do Decreto é a creación dunha bolsa paralela ás listas de contratación de persoal empregado público para contratar expertos/as, cando a Administración podería botar man das listas de contratación propias se precisa máis persoal. E tamén o feito de que se lle permita a empresas privadas acceder a procedementos realizados por persoal funcionario público e a expedientes propios da Administración pública.
En definitiva, dende o sector de Autonómica da CIG-Administración denunciamos que a lei de simplificación administrativa aprobada polo Goberno do PP persegue facer posíbel o até de agora imposíbel: pagar a empresas privadas para facer os trámites de autorización atribuídos a persoal público. O que se pretende con esta normativa é que si os funcionarios/as da Xunta informan negativamente, a Xunta poida comprar informes positivos para favorecer ás grandes empresas que espolian os recursos naturais do país. Unha práctica mafiosa á que lle deron cobertura legal a través da “lei de depredación” de Galiza.
Dende a CIG-Autonómica denunciamos que a Xunta artellou un plan para a aprobación exprés de actuacións que poden repercutir no patrimonio natural ou cultural do país: parques eólicos, minería, infraestruturas, industria, etc. Pero, como a redución de prazos garantistas non lle chega para sacar adiante proxectos de grande impacto, o que fai agora é directamente comprar as autorizacións pagando a empresas privadas para que substitúan o papel imparcial das persoas funcionarias públicas.
Ademais, esta nova actitude gangsteril vén acompañada das denuncias de presións que nos trasladaron os empregados/as públicos/as coas que a Xunta pretende que dean o positivo á aprobación de proxectos.
- Detalles
Ao abeiro da campaña electoral para as eleccións xerais do 23 de xullo, a CIG Autonómica vén de presentar aos partidos políticos presentes na Galiza unha batería de propostas sobre materias de competencia estatal que afectan ao persoal empregado público da Administración xeral da Xunta de Galiza
Con esta iniciativa pretendemos que os partidos políticos galegos tomen en consideración nos seus programas electorais para as eleccións do 23 de xullo as propostas que dende a CIG Autonómica lles trasladamos por escrito, e que van encamiñadas na procura dunha mellora das condicións laborais do persoal empregado público e da calidade dos servizos públicos en xeral.
- Estabelecemento das 35 horas semanais como xornada máxima. No caso de distribución irregular da xornada ou horarios especiais, poderán negociarse xornadas inferiores en cómputo anual.
- Dereitos de xubilación do persoal empregado público:
- Parcial anticipada. Recuperación do Acordo de xubilación parcial cunha porcentaxe máis beneficiosa para as administracións públicas e o persoal afectado. Posibilitar a xubilación parcial tamén para o persoal funcionario público.
- Anticipada directa ou mediante a aplicación de coeficientes redutores a aquelas categorías e escalas cuxos postos de traballo
- levan unha especial penosidade , traballo a quendas, nocturnidade, etc.
- Xubilación aos 60 anos do persoal sociosanitario
- Xubilación mediante coeficientes redutores dun mínimo do 0,15 ampliable por razón de funcións no mar con carácter retroactivo.
- Aplicación de coeficientes redutores para o persoal das escalas de axentes ambientais e forestais.
- Actualización dos gastos de locomoción e axudas de custo, rachando coas diferencias por grupos.
- Dignidade salarial. Subir os niveis dos grupos inferiores para diminuír a diferencia. Maior definición da estrutura salarial para evitar as incoherencias nas retribucións dos funcionarios/as públicos. Aplicar a claúsula de revisión salarial co IPC real por comunidade autónoma. Establecer fórmulas para compensar a perda do salario dos últimos 15 anos.
- Garantir que se desenvolva un proceso de negociación colectiva previo de leis básicas ou estatutos na Mesa Xeral de Administracións Públicas. Para que non se salten o paso como fixeron coas recentes propostas que afectan a persoal empregado público da Galiza e que quedaron sen a posibilidade de representación.
- Lei de bombeiros forestais con aplicación directa e con carácter retroactivo dos coeficientes de bombeiros/as e un cadro persoal de xestión directa 100% publico.
- Lei básica de axentes forestais na que se deben respectar as competencias propias, dirección da extinción de incendios e seguridade e saúde laboral con coeficientes para a xubilación anticipada.
- Imposición as administracións públicas do levantamento dos recortes do 2012 con carácter retroactivo dende que mudaron as condicións macroeconómicas que o sustentaban (mínimo 2019) e aplicación da compensación correspondente ao persoal (asuntos propios, FAS, compensacións artigo 19, etc.)
- Blindar as funcións do persoal funcionario público establecendo un réxime sancionador para o persoal directivo das administracións publicas asinantes de contratos con entidades publicas e privadas para realizar xestións, informes e trámites que ata de agora realizaban empregados publicos.
- Rematar coa discriminación do persoal funcionario do Servizo de Gardacostas de Galiza por razón do seu réxime xurídico coa inclusión no réxime especial do mar e a aplicación dos coeficientes redutores por actividade.
- Regular no EBEP os concursos de traslados e a promoción interna, cunha periodicidade permanente ou cando menos anual e previos a outros procesos selectivos.
- Pór freo a privatización de servizos públicos, que impide a posta en marcha de novos servizos ao privatizarse a xestión pública. Rematar coas externalizacións.
- Eliminar a taxa de reposición de efectivos.
- Detalles
A Consellería de Sanidade convocounos a unha xuntanza para o día 14 de xullo, para tratar unha proposta de modificación da súa relación de postos de traballo (RPT), consistente na creación dunha unidade de matadoiro móbil.
O asunto xa o teñen avanzado, pois aportan un acordo entre as consellerías de Sanidade e Medio Rural, e na proposta falan ata das instalacións. Por tanto, esto é algo que levan tempo cocendo.
Porén, aos sindicatos nolo entregaron case ás 15 horas do mércores 12, para unha xuntanza a media mañá do venres 14. Non actúan con boa fe, non respetan o principio de mutua axuda á que obriga o EBEP e a LEPG. Non median 48 horas, e a CIG xa comunicou que non vai asistir e non daremos por valida esta xuntanza nas posteriores que necesariamente haberá.
Se é do teu interese, aquí tes a súa proposta: descargar. Para achegarnos o que consideres, podes contactar coa CIG.
- Detalles
O sindicato maioritario na Xunta vén de remitirlle un escrito ao director xeral da Función Pública para que aplique a sentenza xa a todas as empregadas e empregados públicos
O pasado seis de xuño de 2023 a Sala do Social do Tribunal Superior de Xustiza de Galiza ditou unha sentenza, en resposta a un recurso promovido pola CIG Autonómica, na que se se declara “o dereito do actor [un traballador do Consorcio Galego de Benestar e Servizos Sociais] a gozar dun permiso por nacemento de fillo de proxenitor non xestante de 22 semanas de duración, e non das 16 semanas recoñecidas na LEPG, condenando a entidade demandada a estar e pasar por esta declaración e a que lle recoñeza o dereito a gozar das seis semanas non recoñecidas, con todos os efectos legal e regulamentariamente establecidos»
A CIG Autonómica leva anos defendendo a ampliación dos permisos por parto, tanto para a persoa xestante como para o outro proxenitor, co obxectivo de estender estes permisos até 52 semanas de duración, equiparándonos cos dereitos máis avanzados a nivel europeo nos coidados e conciliación da vida laboral e familiar.
Nesta liña a CIG Autonómica xa propuxo en diferentes mesas de negociación, como primeiro paso, o aumento do permiso para outra persoa proxenitora até 22 semanas, co obxectivo de equiparar este co da nai biolóxica. Agora, a xustiza confirma que a nosa demanda sindical ten pleno amparo legal e constitúe claramente unha razón para que a administración galega, en virtude da citada sentenza, recoñeza este dereito a todos os empregados e empregadas públicas.
Por todo isto, desde a CIG Autonómica demandámoslle á dirección xeral da Función Pública:
1. A modificación do artigo 124 da Lei 2/2015 no sentido do que recolle a sentenza, recoñecendo a extensión a 22 semanas desde as 16 actuais para a persoa proxenitora diferente da nai biolóxica en casos de nacemento, acollemento, garda con fins de adopción ou adopción dun fillo ou filla.
2. A publicación, mentres non se faga efectivo ese cambio, das instrucións ou normas legais necesarias para que recoñeza ese dereito a todos os empregados e empregadas públicas da Xunta de Galiza, evitando que persoas que terían dereito ás 22 semanas vexan limitado este dereito antes da modificación da Lei.
3. A negociación, no marco da Mesa Xeral, da extensión dos permisos para ambos proxenitores, dos permisos no camiño da proposta da CIG de ampliala, cando menos dun xeito progresivo, até as 52 semanas.
- Detalles
No DOG do 12/07/2023 publican:
- RESOLUCIÓN do 6 de xullo de 2023, da Dirección Xeral da Función Pública, pola que se aproban e se fan públicas as listaxes provisionais de persoas admitidas e excluídas ao proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso, para o ingreso no corpo auxiliar da Administración xeral da Comunidade Autónoma Galiza e no corpo de auxiliares de carácter técnico de Administración especial da Administración xeral da Comunidade Autónoma de Galiza (subgrupo C2).
- RESOLUCIÓN do 6 de xullo de 2023, da Dirección Xeral da Función Pública, pola que se aproban e se fan públicas as listaxes provisionais de persoas admitidas e excluídas ao proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso no corpo auxiliar da Administración xeral da Comunidade Autónoma de Galiza e no corpo de auxiliares de carácter técnico de Administración especial da Administración xeral da Comunidade Autónoma de Galiza (subgrupo C2).
As persoas aspirantes poderán consultar o estado das solicitudes de inscrición presentadas e a situación como admitidas ou excluídas en fides.xunta.gal
A listaxe completa de persoas aspirantes admitidas e excluídas, con indicación da causa determinante da súa exclusión, poderase consultar no portal web corporativo funcionpublica. xunta.gal
Así mesmo e segundo a base I.4 das que rexen o proceso selectivo, nesta listaxe figuran as persoas aspirantes que teñen pendente de acreditar que están en posesión do Celga requirido.
As persoas aspirantes excluídas, as que non figuren en ningunha das listaxes, así como aquelas persoas que non acreditaron estar en posesión do Celga requirido, disporán dun prazo de dez días hábiles, contados a partir do día seguinte ao da publicación desta resolución no Diario Oficial de Galiza, para reclamar ou emendar o defecto que motivou a exclusión ou acreditar que posuían antes do día de finalización do prazo de presentación de solicitudes de participación no proceso selectivo o Celga 3 ou equivalente debidamente homologado.
- Detalles
A inspección de Traballo e Seguridade Social de Vigo levanta acta de liquidación contra Política Social por non cotizar polas diferenzas salariais de dous anos de atrasos dun traballador
O persoal empregado público da Consellaría de Política Social en situación similar ten que denunciar diante da Inspección de Traballo e Seguridade Social o cumprimento da normativa sobre cotización e liquidación de dereitos da Seguridade Social.
Aqueles traballadores e traballadoras que perciben diferencias retributivas, referidas a un período determinado, ven como Política Social non regulariza as bases de cotización e a liquidación para cada un dos meses nos que se devengou o dereito, senón que acumula todas as cotizacións nun só mes, aínda que eses atrasos superen a base máxima de cotización.
Esta diferencia que supere a base máxima de cotización non é cotizada nin liquidada, producindo un fraude no ingreso de cotas e un claro prexuízo para o traballador/a nas súas bases de cotización que serán inferiores ás reais por non comprender os importes que superen a base máxima dese mes e para ese grupo de cotización.
A normativa da Seguridade Social sobre a cotización e a liquidación, regulada polos art. 18, 141, 142, 144, 145, 146 e 147 do texto refundido da Lei Xeral da Seguridade Social, aprobado polo Real Decreto Lexislativo 8/2105, establece que a “base de cotización para todas as continxencias e situacións amparadas pola acción protectora do Réxime Xeral, incluídas as de accidente de traballo e enfermidade profesional, estará constituída pola remuneración total, calquera que sexa a súa forma ou denominación, tanto en metálico coma en especie, que con carácter mensual teña dereito a percibir o traballador ou asimilado, ou a que efectivamente perciba de ser esta superior, por razón do traballo que desenvolva por conta allea.”
Así, naqueles supostos de abono de salarios con carácter retroactivo, as cotizacións efectuaranse mediante a correspondente liquidación complementaria e, a este fin, tomaranse as bases, topes, tipos e condición vixentes nos meses a que eses salarios correspondan.
Esta acta de de liquidación obriga a Política Social á cotización e ao pago de cotas, tanto por continxencias comúns como por accidentes e enfermidades profesionais, tanto a cota empresarial coma a do traballador, deses dous anos de diferenzas salariais, ademais dun recargo do 20% sobre as cotas debidas.
- Detalles
Na xuntanza que tivemos co director xeral de Función Pública o venres 7 de xullo para tratar o acordo de condicións de traballo do persoal farmacéutico inspector (FISP), o DXFP facilitou información doutros asuntos:
- Concurso de traslados de Administración especial. Ler máis
- Fondo de Acción Social: o venres 14 publicarán a listaxe provisional
- Procesos de estabilización derivados da Lei 20/21:
- O mércores 12 publicarán as listaxes provisionais de persoas admitidas/excluidas de C2.
- O venres 14 publicarán de A.P. E con isto estarían todas publicadas
- Os exames de galego en setembro
- Prioridade o concurso de méritos sobre o concurso-oposición
- Para os concursos de traslados irán todas as prazas vacantes. A resolución sería despois dos procesos selectivos.
- Detalles
Recibimos borrador da Resolución pola que se convoca o concurso ordinario para a provisión de postos de traballo vacante dos corpos e escalas de Administración especial da Administración xeral da Comunidade Autónoma de Galiza. Descargar.
Os sindicatos temos de prazo para presentar alegacións ata o venres 14 de xullo. Se é do teu interese, contacta coa CIG.
As intencións manifestadas polo director xeral de Función Pública é pechar a negociación deste concurso en xullo, deixando para setembro o listado de prazas e a publicación da convocatoria.
O que convocarían serían as escalas de Administración especial de política social, enxeñarías e veterinarios/as, e aquelas escalas que poidan ter prazas compartidas con estas mencionadas.
Para a CIG, que convoquen só unha selección de escalas de Administración especial é insuficiente. Non abonda, e esiximos que se convoque o concurso de traslados de TODAS as escalas, tanto de administración xeral como especial, así como de corpos xerais. E tamén do persoal laboral.
