- Detalles
A directora xeral de Emprego Público e Administración de Persoal (DXEP) convocou aos sindicatos para o venres 13 de decembro, a negociar a Oferta de Emprego Público (OEP) do ano 2024 que xa anunciaron á prensa fai semanas. Tamén traen a Relación de Postos de Traballo (RPT) do Consorcio, que afecta a máis de 1.800 postos de traballo.
Engaden na orde do día outras dúas misteriosas RPT. Dunha só sabemos que é unha modificación "de postos de traballo de administración xeral e de administración especial", sen máis información. A outra é unha modificación da RPT de funcionarización de postos de administración especial de C1 e C2.
De todos estes asuntos, tan só aportan a RPT de Consorcio (descargar). Do demais, nada, nin documentación nin información.
A vontade negociadora das persoas responsábeis políticas da Función Pública galega podémola observar en que non só non envían documentación ou información da maioría dos asuntos, senón en que toda a negociación vaise concentrar no mesmo día, o venres 13.
A maiores, na orde do día vai tamén a OEP do ano 2024 das escalas sanitarias (Lei 17/1989). Pero neste caso xa tivemos unha xuntanza previa con Sanidade o martes 10.
- Detalles
A Dirección Xeral do Emprego Público e Administración de Persoal (DXEP) achegounos a relación de postos e resumo dos mesmos para a eleición de destino provisional dos procesos selectivos dos seguintes corpos/escalas:
Se é do teu interese, contacta coa CIG.
- Detalles
A posta en marcha do sistema de carreira profesional, que se iniciou no 2019 e tiveron que resetear no 2022, nen sequera se cumpre nos termos acordados. Deberían sentarse a negociar a convocatoria do grao III. E se supón que iso incluiría tamén o acceso aos graos I e II para aquelas persoas que están no grao I ou aínda non accederon a eles polo sistema extraordinario.
A diferenza do SERGAS onde están xa máis avanzados e no grao IV dende 2022, na Xunta o sistema pactado non garante nada. E a maiores de telo paralizado durante un ano e de verse obrigados a modificalo seguen a impedir que moito persoal acceda ao sistema.
Esiximos a posta en marcha, previa negociación, do acceso universal a todos os graos con efectos do 1 de xaneiro de 2025. E agora e no momento da negociación imos seguir mantendo,
• Que se estableza a posibilidade de acceder aos graos I, II e III e IV simultaneamente si se cumpren os requisitos.
• Que levanten o veto a que o persoal interino e temporal, ou ao que incluso agora xa ten a condición de persoal funcionario de carreira, para que poida acceder tamén aos graos I a IV nas mesmas condicións e cos mesmos requisitos que o persoal funcionario de carreira.
• Que se dea o dereito a cobrar a carreira a todo o persoal ao que cumprindo os requisitos se lles negou en 2019, con efectos económicos dende esa data.
• Que se cumpran as sentenzas gañadas pola CIG e se garanta a carreira profesional a todo o persoal chantaxeado coa funcionarización. Que se lles restitúa a carreira no grao que corresponda e se lles abonen os atrasos derivados da suspensión ás persoas que optaron por non funcionarizarse.
• Que se abra o procedemento ordinario para que as/os compañeiros/as que nestes últimos anos entraron a traballar na Administración, poidan acceder ao sistema de carreira profesional.
E finalmente, que o acceso á mesma se poida facer cando as persoas cumpran os requisitos (sexa a instancia das mesmas ou non) sen que haxa que esperar a que se abra un prazo, que en ocasións podería significar a perda de graos de carreira.
Sen prexuízo doutras medidas que defenderemos (suba e equilibrio dos importes, a inexistencia de tramos e porcentaxes e o cobro do 100% de cada grao dende o primeiro momento) estes serían os elementos básicos que imos defender para artellar un sistema de carreira profesional real e igualitario.
Convoquen a mesa xeral de negociación XA!
- Detalles
En primeiro lugar salientar que para reclamar os importes dos trienios como persoal laboral se exclúe ao persoal laboral fixo que se funcionarizou e que estas reclamacións poden darse en basicamente dúas situacións:
1.- Persoal laboral temporal que aproba un proceso selectivo e pasa a ser FUNCIONARIO/A DE CARREIRA.
2.- Persoal laboral temporal que pasa a prestar servizos como persoal FUNCIONARIO INTERINO.
O persoal funcionario dos grupos C1, C2 e AP que prestou servizos como persoal laboral e tiñan trienios recoñecidos como tal, perderon poder adquisitivo ao adquirir a condición de persoal funcionario de carreira ou interino.
A diferenza entre o importe dos trienios de persoal funcionario e laboral por subgrupos é a seguinte:
No caso de querer reclamar que os antigos trienios se cobren polo importe que correspondía como persoal laboral hai que ter en conta que se a administración non estima a reclamación en vía administrativa, haberá que plantexar unha demanda no ámbito do contencioso administrativo.
Se tés algunha dúbida ponte en contacto cos locais da CIG na túa comarca.
- Detalles
A Dirección Xeral de Emprego Público e Administración de Persoal achegounos o listado de postos e resumo dos mesmos para a eleición de destino provisional do corpo de xestión da Administración Xeral da Comunidade Autónoma de Galiza, subgrupo A2. Descargar
- Detalles
A Xunta vai construír un macrocomplexo de servizos en Mos / O Rebullón cun centro de coidados intermedios, escola infantil e centro de atención a persoas maiores, entre outros
A Xunta de Galiza e o Partido Popular téñenos acostumada á cidadanía a ler noticias diarias sobre o “pioneiros” que son nunha morea de iniciativas, proxectos e servizos, máis aquí non somos os pechacancelas en nadiña....
O problema é que este chauvinismo patriótico que sentimos a cidadanía, non ten nada que ver coa utilización sistemática da mentira para manipularnos. Na área de Vigo, en Mos, contábase cun hospital psiquiátrico que atendía a unha ampla poboación. Este centro foi desmantelado e as persoas que precisabamos deste servizo observamos como nos ingresan en residencias de maiores sen profesionais cualificados que nos atendan, facendo a convivencia imposible e os últimos anos de vida das persoas maiores un inferno. Neste gran espazo con instalacións desocupadas, que estaba cedido parcialmente a entidades privadas “sen ánimo de lucro”, vanse construír agora un centro de coidados intermedios (tras a estancia hospitalaria), unha escola infantil e un centro de atención a persoas maiores.
Dende hai anos, a Xunta non abre ningún centro de servizos sociais con xestión pública. Dende a CIG, esiximos que este complexo de servizos sociais sexa 100% público, que é a única forma de garantir uns servizos públicos de calidade e o bo trato ás persoas usuarias. Non podemos esquecer que estamos falando de persoas en situación de vulnerabilidade (persoas enfermas, crianzas e persoas maiores son as usuarias destes tres tipos de centros).
A cidadanía non se pode permitir que o que pagamos cos nosos impostos vaia a engordar as contas de empresas privadas, moitas veces de familiares de cargos públicos, que acaban tratando a persoas enfermas, menores e anciás sen a garantía de calidade que ofrecen os servizos públicos de xestión directa. Unha mostra deste despropósito son as residencias privadas, e non so na pandemia.
Privatización, externalización e outras mamandurrias fóra! Coa CIG por uns servizos públicos de calidade, con xestión pública!
- Detalles
Función Pública recúa e acepta despois de 4 meses a proposta da CIG, pero tarde e tratando de aparentar que se debe a un acordo co trifachito sindical.
Informan CCOO, UGT e CSIF que mantiveron unha reunión con Función Pública en relación á problemática dos procesos do SPIF. A CIG, sendo o sindicato maioritario na Mesa Xeral de Empregados Públicos, NON foi convocada a esta reunión.
No mes de xullo tivemos unha xuntanza onde lle transmitimos a Función Pública os problemas que estaba a causar o cambio de criterios e solicitamos a baremación de todos os aspirantes ou a corrección dos autobaremos, como deixamos constancia nesta nova.
Se nese momento, tanto Función Pública como os outros sindicatos apoiaran a proposta, agora non teríamos ese problema.
O día 28 deste mes, sacamos outra nota e trasladamos a Función Pública o mesmo no que levamos meses insistindo.
Alegrámonos se ao final están dispostos a resolver este problema dándolle a solución que a CIG demandou insistentemente mentres outros calaban. Pero para tratar de tapar o erro, a administración non ten outra ocorrencia que tratar de transmitir que isto sucede porque se chegou a un “acordo sindical” cos tres mariachis, e non porque tiñan que rectificar porque estes procesos ían rematar xudicializados ata polos puntos e comas
Non imos consentir que se intente tapar e ignorar, nin á forza sindical que aportou a solución e que ademais é maioritaria, nin que se adopten decisións sen negociar, porque de entrada NON sabemos en que termos se vai facer esta rebaremación, co cal ata coñecer os criterios exactos en que se vai levar a cabo non nos imos pronunciar.
E este luns imos esixirlle unha explicación a Función Pública por non convocarnos.
Mentres as persoas aspirantes sofren as consecuencias deste despropósito a solución estaba aí porque a puxemos hai meses enriba da mesa. Que teñen que ocultar?
A empresa necesita dos sindicatos amarelos para xustificar os seus erros, e os sindicatos amarelos necesitan que a empresa dea lexitimidade á súa inacción durante meses.
- Detalles
Comprobación/actualización de datos do persoal integrante das listas propias do Consorcio Galego de Igualdade e Benestar para a súa integración nas listas do Decreto 37/2006
Segundo nos comunican na Comisión de Listas, proximamente abrirase un prazo para que o persoal do Consorcio se integre nas listas da Xunta. Para que esto se poida levar a cabo e poidan ser tidos en conta os servizos prestados no Consorcio, o persoal que presta ou prestou servizos no consorcio debe:
- Revisar a maior brevidade posible o seu expediente do FIDES e comprobar os seus datos, especialmente:
- Grupo/subgrupo, corpo/escala/categoría.
- No campo do apartado profesional EXPERIENCIA INTERNA.
- Se está todo correcto non hai que facer nada. Se hai que acreditar a experiencia por non figurar ou non estar correcta hai que facelo mediante certificación orixinal ou copia auténtica emitida polas persoas titulares das unidades de xestión de persoal e nas que deberá constar: grupo e categoría, réxime xurídico de vinculación, porcentaxe de xornada no caso de ser inferior a xornada completa, tipo de vínculo ( fixo, temporal...), carácter da cobertura e data de inicio e fin de cada unha das vinculacións.
Esta documentación será remitida ao SERVIZO DE ACTUALIZACIÓN DE DATOS DO PERSOAL da DIRECCIÓN XERAL DE EMPREGO PÚBLICO E ADMINISTRACIÓN DE PERSOAL a través do formulario PR004A, por sede electrónica se dispós de orixinais electrónicos ou copias auténticas; caso contrario, terás que facelo de forma presencial segundo o previsto no artigo 16.4 da Lei 39/2015, do 1 de outubro.
Se necesitas axuda, podes contactar coa CIG por internet ou dirixirte aos delegados/as da túa comarca.
- Detalles
No 2022, cando se comezaron a negociar as convocatorias dos procesos da Lei 20/2021, dende a CIG fixemos alegacións ás bases como por exemplo a do computo do período de inactividade. Non nolo admitiron e logo, sen recollelo nas bases, o aplicaron de oficio na metade do partido, o que provocou o actual caos nos baremos.
Daquela, cando se podía solucionar incluíndoo nas bases, a administración fixo caso omiso, polo que a CIG votou en contra das bases do proceso e presentamos demandas. Mentres, outros sindicatos votaron a favor desas convocatorias.
Comezado o ano 2024, Función Pública modificou o criterio de puntuación da experiencia profesional puntuando o tempo de inactividade. E xustificaron este cambio dicindo que é una interpretación diferente do criterio e non unha modificación, e baséanse na "recente xurisprudencia do Tribunal Supremo" como di a nota informativa que colgaron na súa páxina web. O resultado é que esa "recente" interpretación do 2024 ven a modificar os cálculos do 2023, deixando os autobaremos con puntuacións ficticias (ás veces ata da metade da puntuación real).
O 18 de xullo do 2024 a CIG mantén unha xuntanza "informativa" con Función Pública por mor dos procesos selectivos de estabilización. Nesa reunión nos din que o proceso vai seguir co autobaremo actual, sumando a puntuación por inactividade, pero que só baremaran á xente que entra no número máximo de persoas a baremar. É dicir, non van ter en conta a puntuación "real" no autobaremo, senón a do 2023, polo que nin a puntuación nin os postos do autobaremo reflicten a realidade dos aspirantes.
A CIG, non conforme con este proceder, solicitou:
◦ Paralizar os procesos de alegacións.
◦Abrir un novo prazo de solicitude de participación nos procesos selectivos onde houbera persoal fixo descontinuo coa intención de actualizar os autobaremos.
◦ Baremar a todas as persoas solicitantes.
◦Tamén instamos a reclamar a todo o persoal afectado por esta circunstancia.
O día 11 de outubro de 2024, dende a CIG reiteramos a solicitude feita a Función Pública xa que, canto máis avanza o proceso nas diferentes categorías, máis aspirantes se ven prexudicados e discriminados nestes procesos que non está a ter en conta os méritos a todos os aspirantes por igual. Algúns incluso quedando fora dos baremos cando, pola súa puntuación real, terían opción a coller praza.
Ao final, chegamos ao momento da publicación dos baremos definitivos do concurso e comprobamos que Función Pública segue erre que erre en tirar para adiante co proceso sen dar opción á revisión dos autobaremos, e así nos atopamos con:
◦ Persoal que non sae na baremación provisional por non ten computado o tempo de inactividade e, que ten maior puntuación que persoas baremadas, chegando incluso a estar dentro das posibles propostas para acadar posto.
◦ Listas que segundo as bases da convocatoria* non foron revisadas e outras que non foron ben revisadas.
*Ao persoal laboral fixo ou ao que se atope en condicións de adquirir a fixeza en virtude dos procesos selectivos en curso, que se presenten aos procesos derivados da Lei 20/2021, non se lle computarán os servizos prestados como persoal laboral temporal na categoría que sexa equivalente á escala funcionarial convocada.
Chegados a este punto, solicitamos á administración que abra un prazo para actualizar os autobaremos ou que baremen a todo o persoal que está sen baremar. Así como que paralicen os proceso ata que corrixan as incidencias derivadas da non valoración do tempo de inactividade nos autobaremos. E que asuman as súas responsabilidades as persoas encargadas destes procesos.
Basta xa desta disfunción da Función Pública
- Detalles
O pasado xoves día 21 de novembro, tivo lugar unha xuntanza do Comité de Seguridade e Saúde Laboral de Medio Ambiente (en adiante CSSL), onde se tratou o tema da influenza aviaria e información sobre o Centro de Recuperación de Fauna Salvaxe de Santa Cruz, como único punto na orde do día ademais da rolda de intervencións.
Dende a Consellería de Medio Ambiente e Cambio Climático déusenos traslado do Protocolo de vixilancia da gripe aviaria en humanos, elaborado pola Consellería de Sanidade, ademais dunha circular informativa, da Dirección Xeral de Patrimonio Natural, respecto á vixilancia pasiva a desenvolver por parte da Consellería de Medio Ambiente e Cambio Climático sobre a detección do virus de influencia aviar, entre outra información referente a este tema.
A CIG solicitou unha simplificación dos documentos que se lle vaian achegar aos traballadores e traballadoras para facer máis sinxela a súa lectura e comprensión. A Presidenta do CSSL tivo a ben a iniciativa e comprometeuse a realizar uns dípticos para entregar ao persoal. Por outro lado, tamén solicitou dos delegados e delegadas de prevención a nosa colaboración para que as persoas traballadoras tomen todas as medidas e preventivas postas a súa disposición cando nos atopemos en situacións que poidan ser posibles causas de gripe aviaria.
Na rolda de intervencións a Presidenta do CSSL de Medio Ambiente xa nos adiantou que proximamente terá lugar unha xuntanza do CSSL de Medio Ambiente, cun monográfico para tratar a situación en canto a prevención de riscos laborais no Parque Nacional das Illas Atlánticas, a petición da CIG.
Por último, sinalar que a xuntanza do CSSL realizouse de xeito presencial, accedendo desta maneira a Presidenta do comité a unha demanda da maioría dos delegados e delegadas de prevención de riscos laborais.
