- Detalles
O investimento en residencias e centros de día: unha porta aberta a privatizar o coidado dos nosos maiores
Nos derradeiros anos estamos a ser testemuñas dun crecente interese por parte da Administración Pública en fomentar a inversión pública na construción de centros de maiores para posteriormente ceder a súa xestión a empresas privadas “amigas”; obtendo estas unha serie de beneficios como poden ser fundamentalmente os económicos; non asumindo os custos iniciais (infraestruturas), o que se traduce nunhas marxes de ganancias moi elevadas, mentres os nosos maiores son os que pagan as consecuencias dunha xestión enfocada o lucro.
Exemplo disto témolo nas inversións anunciadas pola Xunta, entre outras, de 1,2 millóns de euros na construción dunha residencia de maiores en A Peroxa e de 600.000 € nun centro de día en Vilamarín.
Ao priorizar os beneficios económicos a curto prazo, estas empresas poden descoidar aspectos fundamentais como a equidade no acceso aos servizos e a atención as necesidades dun dos sectores de poboación máis vulnerables.
Por que a xestión pública é esencial?
- Enfoque do interese público: As administracións públicas teñen como obxectivo principal garantir o benestar dos/as cidadáns, priorizando o acceso a servizos básicos de calidade para todos/as.
- Maior transparencia: Os procesos de contratación e xestión de servizos públicos son transparentes e están suxeitos a un maior control cidadán.
- Investimento a longo prazo: As administracións públicas poden realizar investimentos a longo prazo en infraestruturas e tecnoloxías, asegurando a sustentabilidade dos servizos.
- Equidade: A xestión pública busca garantir a equidade no acceso aos servizos, evitando a discriminación e a exclusión social.
A Administración Pública perde o control sobre a prestación do servizo e exímese de responsabilidades
A falta de persoal cualificado e a redución de ratios de coidadores/as por residente repercuten nos coidados dos maiores, priorizándose os beneficios económicos sobre a calidade do servizo.
Dende a CIG esiximos que a Administración revirta esta situación e camiñe cara mellorar os servizos de toda a rede de residencias e centros de día do país e, nomeadamente, nos citados de próxima contrucción na Peroxa e Vilamarín e tamén no futuro centro de discapacitados de Ourense; a través dunha xestión propia con fondos públicos destinados a dar e garantir un servizo e unha atención pública de calidade.
Os nosos maiores merecen o mellor
- Detalles
No DOG do 5 de agosto de 2024 sae publicada a Resolución do 26 de xullo de 2024, da Dirección Xeral de Emprego Público e Administración de Persoal, pola que se anuncia a exposición das listaxes provisionais das axudas aprobadas e denegadas en relación cos criterios de repartición do Fondo de Acción Social do exercicio económico 2023 relativos á axuda para a atención de persoas con discapacidade.
As devanditas listaxes poderán consultarse no web da Dirección Xeral de Emprego Público e Administración de Persoal. Para o coñecemento íntegro do acto, as persoas solicitantes deberán introducir nos espazos habilitados para o efecto o NIF e o código de impresión da súa solicitude.
Reclamacións e emendas: contra esta resolución, as persoas interesadas poderán presentar unha reclamación e/ou emendar os defectos causantes da exclusión, dirixíndose á persoa titular da Dirección Xeral de Emprego Público e Administración de Persoal da Consellaría de Facenda e Administración Pública mediante calquera dos rexistros públicos, oficinas de Correos e demais lugares establecidos no artigo 16.4 da devandita Lei 39/2015, do 1 de outubro, do procedemento administrativo común das administracións públicas.
Prazo: dende o 6 de agosto até o 10 de setembro.
- Detalles
Na Comisión de Persoal do venres 2 de agosto CCOO e UGT votaron a favor dunha RPT de funcionarización que supón perdas retributivas de ata 3.000 € nalgunhas categorías laborais
O persoal laboral fixo da categoría 009 do grupo V, vixiantes de recursos naturais, de acordo coas sentenzas firmes, percibe as súas retribucións do grupo IV ao probarse que desenvolven as mesmas tarefas que os gardas xuramentados fluviais, categoría 007 do grupo IV, polo que, mentras sigan desenvolvendo as mesmas funcións continuarán percibindo as retribucións do grupo IV; de facto é unha reclasificación ao grupo IV.
A dirección xeral de Emprego Público, nun acto de ocultación desta realidade, executa a equivalencia partindo do grupo V e non do IV, polo que este persoal que ten recoñecidos os pluses de penosidade, perigosidade, toxicidade e dedicación que ascenden a unha contía anual próxima aos 4.000 €, ao propoñer a súa funcionarización no subgrupo C2, complemento destino nível 15 e complemento específico nível 16, vai sufrir unha perda retributiva de case que uns 2.000 € anuais.
Categoría 005, grupo IV, oficiais 2ª de cociña, dos centros de ensino da consellaría de Educación
Moitos destes postos de traballo, de acordo coas resolucións xudiciais, cobran a superior categoría de oficial 1ª grupo III, ao estimarse que desenvolven as tarefas desta categoría e, ano tras ano, veñen obtendo este recoñecemento. Tamén hai varias sentenzas reclasificatorias do grupo III.
Polo tanto, se este persoal acepta o nomeamento como funcionario da escala, vai sufrir unha perda salarial de case que 3.000 € anuais. Xa van moitos anos que vimos demandando a homoxenización das cociñas para que a persoa responsable das mesmas fose a categoría de oficial 1ª, tal como acontece nas escolas infantís.
Categorías de analistas de laboratorio, de auxiliar coidador (centro educación especial Terra de Ferrol) e outro persoal que teñen sentenzas firmes de recoñecemento de pluses (ex. perigosidade), que non están reflectidas na RPT, van a funcionarizar cunha perda retributiva de máis de 1.000 € anuais.
A funcionarización que idearon entre a antiga Función Pública, CCOO e UGT coma unha chantaxe para a percepción da carreira profesional e do complemento de desempeño, seica non ía supoñer unha merma do poder adquisitivo; así o venderon sempre, pero a realidade está a demostrar todo o contrario.
Fronte a isto, na Comisión de Persoal a CIG esixiu unha reorientación da funcionarización para que non houbese ningunha perda retributiva que poidera provocar un rexeitamento do nomeamento como persoal funcionario e o conseguinte decaemento do complemento de desempeño.
Mais lamentablemente, o que quedou claro hoxe é que grazas a CCOO e UGT moito persoal laboral fixo se se quere funcionarizar vai ser a costa de perder moitos cartos.
- Detalles
Dende a CIG pedimos explicacións sobre a supresión de todos os actos conmemorativos do Día das Letras Galegas 2024, o incumprimento do compromiso da EGAP de elaborar os temarios para os procesos selectivos e a insuficiente oferta en linguaxe administrativa galega, xunto coa de igualdade ou COMDIX.
Non recibimos resposta a ningunha das queixas e escritos que a CIG remitira a Sonia Rodríguez-Campos. A directora da EGAP argumenta agora que non se puideron levar a cabo os actos das Letras polo cambio estrutural das consellarías, argumento tan insuficiente como feble, pois entón terían que terse paralizado todas as demais actividades da Escola tamén.
Cando lembramos o compromiso de elaboración dos temarios, a directora da EGAP bota a pelota enriba do tellado de Función Pública dicindo que a Escola está aberta ás propostas, mentres asistimos á privatización dos temarios da escala de orientación laboral (grupo A2), licitados e asignados vía contrato menor de servizos e tramitación ordinaria á empresa Noroeste de Valor Asociados, S.L. cun orzamento base de 17.847,50 € (difusión o 25-03-2024), e sobre os que se advirte de que se trata duns temarios de apoio, non oficiais e que contan cun aviso de exención de responsabilidade por parte da empresa.
A secretaria da EGAP gabouse de ter tres materias cunha gran demanda en relación ás prazas ofertadas: linguaxe administrativa 900 prazas/5.000 solicitudes, COMDIX 850 prazas/5.601 solicitudes e igualdade e violencia de xénero 1.889 prazas/11.911 solicitudes. Levamos moitos anos con ofertas moi insuficientes de formación sen que sexan un problema a solventar, senón un motivo incomprensíbel de satisfacción na xestión por parte das persoas responsábeis, tendo en conta, ademais, que as e os traballadoras/es contribuímos con cada nómina ao financiamento da nosa formación. Ás nosas preguntas, balóns fóra, porque todo depende doutras instancias; no caso dos cursos de linguaxe administrativa dependen de Normalización Lingüística, dado que a EGAP se limita a dar soporte. Pois ao mellor ese mesmo é o problema!
Outras queixas e demandas da CIG foron: a opacidade do rexistro de formadoras/es da EGAP (como a dos criterios de selección de persoal empregado público e outras/os docentes, e as remuneracións); o incumprimento da carta de servizos da EGAP; a baixa calidade, o incumprimento de horarios ou ausencia de enquisas de valoración nalgúns cursos; a necesidade de formación específica para as distintas escalas, que non ten resposta; e que o persoal de AGACAL non está incluído nesta formación. A directora e todas as/os responsábeis presentes non contestaron. Tamén nos chamou a atención a cantidade salientábel de fondos que van destinados aos convenios coas entidades locais.
Na xuntanza quedáronnos moitas cousas no tinteiro por imposibilidade de tratalas todas en tan pouco tempo, pero a CIG vai seguir demandando máis galego, máis transparencia, temarios públicos e oficiais para todas as categorías, máis calidade, e máis e mellor formación, e imos insistir en darlle solución a todas e cada unha das problemáticas que nos afectan, polo que xa estamos a traballar no seguinte Consello Reitor deste 2024. Se queres facernos chegar as túas suxestións, envíanolas a través deste formulario.
- Detalles
No DOG do 2 de agosto publican as resolucións polas que se inadmiten determinadas solicitudes de recoñecemento extraordinario dos graos I e II do sistema de carreira profesional:
Contra estas resolucións poderase interpor recurso potestativo de reposición no prazo dun mes, ou demanda ante a xurisdicción social para o persoal laboral e recurso contencioso-administrativo para o persoal funcionario, no prazo de dous meses.
- Detalles
O xoves 1 de agosto, por fin, e despois da promesa do presidente Rueda antes das últimas eleccións, parece que arranca na práctica a ampliación do tempo de traballo do persoal descontinuo do Servizo de Prevención de Incendios Forestais (SPIF), que pasaría de 6 a 9 meses.
Así pois, segundo se nos informou na xuntanza co Comité Intercentros deste mesmo día, o persoal descontinuo do SPIF pasará a traballar 7 meses durante o ano 2024, 8 meses no ano 2025 e 9 meses a partir do ano 2026 (inclusive).
Non foi sen tempo, despois de anos de porfiar en que era preciso ampliar o tempo de traballo do persoal descontinuo e de respostarnos que isto non era posible.
Aínda que dende a CIG sempre defendimos que todo o persoal do SPIF ten que traballar durante todo o ano, xa que os lumes están cada vez máis desestacionalizados e o SPIF é un servizo de emerxencias no medio natural e rural, calquera ampliación do tempo de traballo do seu persoal descontinuo é benvida.
Por parte da Dirección Xeral de Emprego Público e Administración de Persoal (antiga Función Pública), e da Consellería de Medio Rural, comprometéronse a que o tempo de actividade será continuo.
Tamén temos que manifestar que todo este proceso podería terse feito con mais dilixencia e non ter ao persoal descontinuo vivindo na incerteza durante meses.
- Detalles
Logo de ignorar as numerosas veces que dende a CIG se expuxo a necesidade de creación das listas de persoal funcionario, chegaron a ter que que sacar unhas listas polo trámite de urxencia para poder cubrir as prazas do Servizo de Prevención de Incendios Forestais (SPIF). Non será por non avisar!
A funcionarización do SPIF levouse a cabo xa fai un ano, o dia 1 de xuño de 2023. E xa dende esas, a CIG solicitou a creación de listas para a cobertura das prazas funcionarizadas.
A toma de posesión dos procesos selectivos do SPIF tivo lugar durante o mes de decembro do 2023. O persoal que quedou fora pero superou algún exame, quedou sen poder actualizar os seu méritos ao non abriren as ditas listas de persoal funcionario.
O Decreto de listas prevé a apertura das mesmas nos meses de marzo e abril co fin de poder solicitar incorporarse a elas. A CIG instou á consellería, unha vez máis, a creación das listas de persoal funcionario do SPIF. Pero seguen a chamar desde as listas de laborais provocando diversos prexuízos, tanto para o persoal (renuncias) como para o propio servizo (necesidade de múltiples chamamentos e atraso da cobertura efectiva da praza).
Toda esta situación esta levando a esgotar as listas de contratación de persoal laboral.
A Consellería do Medio Rural tivo que facer, ás presas e correndo, unha apertura provisional de listas con oferta ao Servizo Público de Emprego para a cobertura de prazas no SPIF.
Fixerono en plena campaña de incendios, cando as listas de contratación están baixo mínimos e non lles queda outra que facer un “chamamento” ao SEPE cando moito persoal quere anotarse nas listas e non pode pola non existencia das listas funcionarias e a non apertura das listas laborais.
Dende a CIG fixemos unha campaña para que calquera persoa afectada puidese reclamar de xeito individual a creación das ditas listas. Por outra banda tamén recollemos de xeito colectivo preto de 400 sinaturas co fin de que a administración corrixa a discriminación de traballadores no SPIF. Pedimos que remate xa este desleixo por parte da Administración. Os asinantes reclamamos a creación con urxencia das listas de funcionarios nas categorías do SPIF.
- Detalles
O día 18 de xullo de 2024 reuniuse de xeito ordinario o Comité de Seguridade e Saúde Laboral da Consellería de Medio Rural. O último comité tivo lugar en decembro, e lembróuselle á presidenta que segundo a Lei 31/95 de Prevención de Riscos, os Comités deben de ser trimestrais. O presidente comprometeuse a retomar os comités de xeito trimestral.
INCUMPRIMENTO da Orde de Uniformidade de Axentes Ambientais: A administración tratou de xustificar este incumprimento baseándose en que practicamente xa deran todo aos/ás axentes. Isto non é así, xa que ademais do incumprimento da 1º entrega e das entregas das reposicións, tamén incumpren de xeito reiterado a Orde do 27 de febreiro de 2020, en canto aos elementos identificativos do uniforme da escala nos EPIs. E por moito que digan inda quedan mais de 10 elementos do uniforme por entregar.
Segundo nos informan antes de rematar xullo entregaranse EPIs de incendios que xa cumprirán esta Orde.
AVALIACIÓN DE RISCOS das bases de Bombeiro/as Forestais: Pedimos, de novo, a avaliación dos centros, xa en funcionamento desde fai tempo, e que seguen sen avaliar como Vincios ou Guizán. Segundo di o Servizo de Prevención o problema é que non teñen xente abondo para facer as avaliacións. Pero o verdadeiro problema, que non dan resolto, é que a Consellaría de Medio Rural ten persoal traballando en centros sen avaliación de riscos.
RUIDO NOS VEHÍCULOS Toyota Land Cruise e Skoda Karoq (2023): Infórmannos de que xa están a solucionar o problema.
SOBREESFORZOS en AGACAL: Informamos do problema de sobreesforzos que están a soportar as persoas traballadoras do AGACAL por falta de cobertura de prazas. Isto fai que unha persoa teña que levar a carga de traballo de varias, ademais da súa propia. A Administración di que non teñen datos de baixas por sobreesforzos. Parece ser que mentres o traballo saia adiante, a Administración non ten problema con que o seu persoal asuma unhas cargas de traballo excesivas se elo non comporta baixa médica. Non é difícil pensar que se teñen que estar presentes tres persoas de quenda e só hai unha, esta sufrirá unha sobrecarga de traballo xa que, por exemplo, os animais non poden quedar sen atender. Pedimos unha solución rápida a este problema.
DISTRITO II: informan de que están a facer melloras nas instalacións de diferentes bases de bombeiros forestais.
CARRACHAS: No último comité, de decembro do 2023, aprobouse unha modificación do protocolo das carrachas pero que, por desleixo da dirección da Administración, este aínda non se fixo e por tanto non se mandou aos traballadores/as.
No protocolo anterior puña que había que quitar a carracha o antes posible, e debe poñer que “a persoa traballadora informe o centro de traballo e vaia quitar a carracha á mutua (ou ao centro de saúde se a detecta fora das horas de traballo)” para que así “quede constancia por escrito da picadura de carracha”. Xa que, como os síntomas poden tardar en aparecer un tempo, se o incidente non está informado a mutua non acepta que houbese unha picada anterior no tempo de traballo.
Debido ao alto grado de incidencias destes artrópodos no traballo diario e o risco para o persoal de contraer enfermidades graves, como a enfermidade de Lyme, consideramos de gran importancia que o novo protocolo de actuación fronte as carrachas se distribúa o antes posible.
A Administración resposta que van sacar unha circular e tamén din que SI van a dar repelentes. Xa estamos case no mes de agosto, non foi sen tempo!
ROGOS E PREGUNTAS: ROUPA DE AGACAL
Lembramos, como xa explicamos nos comités anteriores, que o prego de condicións para a roupa do AGACAL non pasou polo comité. AGACAL tampouco tivo en conta a decisión tomada neste comité de que a roupa tería que ir diferenciada por sexos, por cuestións de ergonomía e prevención de riscos. E informamos das queixas recibidas do persoal pola mala calidade das prendas. Pedimos que esta situación se solucione para os contratos menores deste ano, e que o próximo prego de condicións pase polo comité de seguridade e saúde, como ten que ser.
- Detalles
O servizo de persoal de Medio Rural vén de achegarnos a relación de prazas que foron anunciadas en "Moura" para a súa cobertura a través das listas de contratación. Trátase de prazas de varias categorías correspondentes ao Servizo de Prevención de Incendios Forestais (SPIF).
Lembra que os chamamentos para as prazas de 12 meses teñen que vir sinalados como optativos (agás axentes e operador codificador) porque fan o chamamento a través das listas de laborais. E que o persoal de 6 meses non debería recibir citacións para outras prazas de 6 meses, a non ser que sexa persoal indefinido.
- Detalles
A xustificación desta proposta de modificación parcial da RPT da recentemente rebautizada Consellería de Educación, Ciencia, Universidades e Formación Profesional baséase fundamentalmente na necesidade de adecuar as unidades administrativas á nova estrutura orgánica, pero en realidade non é máis que outra destrución de postos base para crear postos de escalas e niveis altos centralizándoos en Compostela e deixando ás Xefaturas (agora chamadas Departamentos) Territoriais e os centros de ensino cada vez con menos recursos, xa que se amortizan 21 postos para crear 12.
Para xustificar a creación de 5 dos 12 postos faise referencia a que anteriormente Cultura daba apoio aos servizos de Educación por ter esta máis volume de traballo. Entón... preguntámonos porque a Xunta non deixa de marear xa de unha vez á Consellería de Cultura que dependendo do aire que sopre pertence ou non á de Educación? Por que a Consellería de Cultura é sempre o comodín que vai ou vén segundo interese? Será que á Xunta de Galiza pouco lle interesa a Cultura?
As competencias de transporte escolar pasan a ser asumidas pola Consellería de Presidencia, Xustiza e Deportes cando anteriormente estaban xestionadas directamente pola propia Consellería de Educación, polo que hai determinados efectivos que pasaron a depender doutra consellería, o que, a priori, parece lóxico. Mais por que se emprega entón esta xustificación para crear 2 postos (só en Coruña e Pontevedra) para a tramitación de asuntos en materia de comedores escolares, cafeterías, becas, títulos e libros de cualificación? En Ourense e en Lugo non tramitan este tipo de asuntos ou nestas provincias non hai comedores escolares, cafeterías, becas...?
Por outra banda, é curioso que unha das xustificacións da creación de 2 novos postos na Xefatura de Servizo de Persoal de Administración e Servizos sexa a asunción das competencias en prevención de riscos laborais cando no ano 2020, e con motivo doutro decreto de estrutura, fixeron desaparecer o Servizo de Prevención de Riscos e a consellería vén incumprindo sistematicamente a Lei de Prevención de Riscos Laborais tal e como denunciamos aquí.
Pola famosa “estabilidade orzamentaria” precisan amortizar postos e neste caso son 9 postos base C2 (6 de nivel 12, 2 de nivel 14 e un de nivel 16) e 7 postos de Agrupación Profesional nivel 10 correspondentes a persoal de limpeza e cociña. É certo que tamén se amortiza algún posto de grupos máis altos: 2 son postos de médico (un deles coa especialidade de psiquiatría), 1 posto de educador nun centro de educación especial e 1 de intérprete de lingua de signos. Será que á consellería a atención a diversidade non lle preocupa demasiado?
Para crear postos deste tipo nunca hai limitación, porque "o manda o Decreto de estrutura" e sácase o orzamento de onde sexa, maiormente amortizando postos de nivel inferior polo que novamente asistimos a unha inversión da pirámide de recursos humanos, onde cada vez hai máis cargos e menos postos base.
A creación deste tipo de postos tamén se fai o antes posible porque tamén “o manda o Decreto de estrutura”, e non hai que esperar meses e meses (antes eran anos…) no tocante ás modificacións derivadas da creación de postos de estrutura.
É unha mágoa que o Decreto non mande negociar as ratios obsoletas da Circular do ano 94 e as condicións de traballo do persoal non docente dos centros de ensino, demanda que a CIG mantén dende hai anos e por tal motivo xa solicitamos unha xuntanza co Conselleiro.
Con todo o indicado, na xuntanza que mantivemos o 23 de xullo solicitamos a creación dos seguintes postos dos que temos coñecemento:
- Persoal subalterno para o IES Nº 1 de Ordes
- Oficial 2ª cociña para o CEE A Barcia
- Non só non amortizar senón que pase a xornada completa o posto de Médico (psiquiatra)
- Persoal coidador para os seguintes centros:
- IES Perdouro (Burela)
- CEIP Plurilingüe (Foz)
- IES Gregorio Fernández (Sarria)
- CEIP As Mercedes (Lugo)
- CEIP Plurilingüe Virxe do Carme (Burela)
- CEIP Casás (Lugo)
- CPI Plurilingüe Jose García García (Ourense), para dar cumprimento á avaliación de riscos laborais
- Axudante de cociña CEIP Plurilingüe Ribadavia (Ourense)
- Axudante de cociña CEIP Albino Núñez (Ourense)
- Persoal subalterno e auxiliar administrativo no IES Universidade Laboral (Ourense)
- Persoal Arquitécto Técnico, Enxeñeiro Técnico Industrial e Delineante para a Unidade Técnica de Ourense
- Persoal dependente do Servizo de Apoio aos Servizos Educativos para os Departamentos Territorias de Ourense e Lugo ao igual que os que se crean para Coruña e Pontevedra
Ponte en contacto coa CIG se queres achegarnos as túas demandas.