- Detalles
A Dirección Xeral de Función Pública enviounos un novo listado de prazas para o concurso de traslados de corpos xerais. Non indican prazo, pero podemos alegar. Se é do teu interese, podes descargar o listado: ligazón.
Se sabes de prazas que están mal ou non aparecen, podes contactar coa CIG.
O xoves 25 de abril estamos convocados a unha Mesa Xeral, e teremos unha xuntanza previa o mércores 24. Supoñemos que falaremos de cando van a convocar o concurso, pero en todo caso, a nosa información é que convocarían en maio. Informaremos.
- Detalles
Neste boletín de CIG-Autonómica falamos de:
- Concursos de traslados e as 1.100 prazas bloqueadas
- Concurso específico
- Campaña pola xornada de 35 horas semanais e as semanas de 4 días
- Lentitude dos procesos selectivos
- Condicións de traballo do persoal non docente de centros de ensino
- Como recibir información da CIG-Autonómica.
- Detalles
De cara a unha vindeira mesa de negociación, a Dirección Xeral da Función Pública vén de remitirnos unha proposta de modificación da relación de postos de traballo, consistente na funcionarización de postos de persoal laboral da Xunta de Galicia, no corpo de técnicos de carácter facultativo da administración especial (grupo B), no corpo administrativo da administración xeral (subgrupo C1), no corpo auxiliar da administración xeral (subgrupo C2); da Administración xeral da Comunidade Autónoma de Galicia.
Descargar a documentación.
- Detalles
A Dirección Xeral de Función Pública achegounos o borrador de criterios de repartición do Fondo de Acción Social (FAS) para o exercicio económico 2023, con vista a unha vindeira xuntanza de negociación.
Na proposta que achegan non se recuperan as modalidades do FAS que tiñamos antes dos recortes da Lei 1/2012, de medidas temporais en determinadas materias do emprego público de Galiza, que suspendeu todas as medidas do fondo agás a axuda por persoa con discapacidade.
Dende a seguinte ligazón podes descargar a proposta, e si é do teu interese, contacta coa CIG.
- Detalles
Tras a xuntanza da Comisión de seguimento do acordo de condicións do persoal funcionario do SPIF do 10 de abril, a Consellería de Medio Rural enviounos un documento cunha proposta das quendas que quere implantar.
Dende a CIG queremos manifestar que fomos facendo distintas achegas, pero tendo en conta que parece ser que a Consellería non quere negociar máis imos facer a nosa valoración das luces e sombras da proposta de horarios.
Luces
• Sempre propuxemos as quendas de 10 horas coas cadencias de libranzas T-L-T-L-L-T-T/L-T-L-T-T-L-L. Para nós é un grande avance non poder traballar máis de dous días seguidos e a continuación ter algunha xornada de descanso e non poder facer secuencias de 5 días seguidos de traballo con prolongacións ata as 12 horas.
• A Consellería aceptou a nosa proposta de facer dúas semanas de noite de cada 8, pero o que xa non compartimos é que o aceptou para todos menos para as brigadas. O argumento de que hai distritos onde hai só 5 brigadas e senón non darían as contas parécenos bastante feble pois tamén hai distritos onde hai brigadas que son múltiplos de 4. De tódolos xeitos esa situación en dous anos máis so vai suceder 3 meses no ano nalgún distrito puntual.
• Entendemos coma positiva a eliminación das prolongacións de xornada, excepto para os lumes de nivel operativo 2. Agora só falta que se cumpra. Por este motivo propuxemos mudar a quenda de noite de 23 a 09 e que se solapara nunha hora a quenda de noite e a de mañá e non se fixeran prolongacións de xornada si ou si.
• Libranzas de fins de semana alternos todo o ano en consonancia coa nosa proposta.
• Compensación polo tempo traballo en domingos e festivos. Aínda que dende a CIG defendemos a compensación en tempo de descanso.
• Vacacións tamén no verán. Veremos baixo que criterios.
Sombras
• Non queremos franxas horarias que supoñan entrar a traballar nunha xornada e rematar na seguinte senón é preciso. Por qué hai que traballar ata a 01 ou ás 02 da madrugada? O descanso establecido no acordo é de dous días ininterrompidos. Se se retira á 01 da mañá xa se traballa no día seguinte . Isto non ten razón de ser, na quenda de noite é inevitable, pero é facilmente solucionable se na quenda de tarde todo o mundo se retira ás 24 horas consonte á nosa proposta. A maiores dende a CIG sempre defendimos o binomio brigada-motobomba e con este sistema isto non é posible.
• No caso das motobombas establécense unhas quendas de dúas semanas de noite consecutivas cun cambio de noite a mañá, cambio que dende a CIG non compartimos. Sempre propuxemos e imos seguir defendendo que da quenda de noite se pase sempre á de tarde para optimizar o descanso e diminuír a brusquidade da rotación. Igual cambio sucede nos centros de coordinación e vixiantes. Por que a cadencia non pode ser N-T-T-M-M-N-T?
• Seguimos sen unha proposta en firme de horarios para as brigadas helitransportadas. Na CIG temos claro que calquera proposta neste senso pasa por equiparar a xornada máxima anual de todo o persoal.
• O cobro da nocturnidade segue sendo unha cuestión sen a regulación debida. Por que se vai manter o sistema que fai que se cobren as noites varios meses despois de realizalas e en ocasións a maiores cun atraso adicional? Existe moito persoal na Xunta que realiza quendas de noite e as cobra no mes seguinte coma máximo. Pero o persoal do SPIF segue sendo unha excepción.…..a peor claro. A maiores nós defendíamos o cobro nunha cantidade fixa integrada no complemento específico, cuestión que nunca se aceptou.
A todo isto hai que engadirlle que a día de hoxe seguimos sen a convocatoria ao Comité Intercentros para adecuar a aplicación das condicións específicas de traballo fixadas neste acordo ao réxime xurídico do persoal descontinuo do servizo de prevención de incendios forestais tal e coma recolle o acordo. Dende a CIG solicitamos a súa convocatoria inmediata para que todo o persoal teña os mesmos dereitos e non se vexa minguada a operatividade do servizo.
Tampouco podemos esquecer que os horarios do persoal é a primeira cuestión que tiña que tratarse dentro desa comisión de seguimento, pero aínda quedan moitas cuestións pendentes que teñen que ser obxecto de negociación.
- Detalles
A Academia Galega de Seguridade Pública (AGASP), organismo autónomo de carácter administrativo adscrito organicamente á consellaría competente en materia de interior e xustiza, imparte formación ao persoal axente forestal (art. 4 da Lei 1/2007). A Dirección Xeral de Defensa do Monte, da Consellaría do Medio Rural, participa na organización da formación e nos procesos de selección.
A AGASP vén de convocar a actividade formativa “Análise de incendios forestais”, de 120 horas e 40 prazas, cuxa impartición é en liña. Entre os criterios de selección establecidos pola AGASP indícase que terá prioridade o persoal fixo sobre o temporal e que de acordo coa Lei para a igualdade efectiva de mulleres e homes de Galiza, reservarase un 50 por cento das prazas para mulleres que reúnan os requisitos esixidos na convocatoria.
Os criterios de selección que está a empregar a AGASP son discriminatorios, tendo en conta que se prioriza o acceso dun persoal sobre o outro con base no tipo de vínculo contractual, criterio xa condenado polos tribunais, e que ocasionou a súa eliminación de todos os procesos de selección para a formación de organismos como a EGAP.
Por outra banda, a AGASP establece nas súas convocatorias a reserva do 50 por cento das prazas a mulleres, pero nas listaxes feitas públicas non constan todos os datos que permitirían ás persoas solicitantes comprobar se efectivamente esta reserva se levou a cabo; e no caso da formación “Análise de incendios forestais” coñecer cal foi a puntuación obtida por cada unha das persoas que competiron por unha das prazas deste curso e saber cales son os motivos que están a ocasionar que haxa un número tan escaso de mulleres que accede á formación en comparación cos homes.
As listaxes de persoal resultantes da xestión dos procesos de acceso á formación convocados pola AGASP non desagregan os datos por sexo, e ademais a linguaxe empregada nas convocatorias de formación non é neutra e inclusiva, aspectos aos que obriga a normativa de igualdade.
Dende a CIG solicitámoslle a AGASP e á Dirección Xeral da Defensa do Monte:
- A anulación da selección levada a cabo para este curso de “Análise de incendios forestais”, por térense aplicado criterios discriminatorios, e a aclaración da concesión de máis prazas das convocadas; así como a repetición da selección de persoal con criterios obxectivos que respecten a normativa vixente.
- A publicación das listaxes íntegras de selección onde se fagan constar: 1) a relación íntegra de solicitantes da formación desagregada por sexo; 2) o persoal excluído; 3) os motivos das exclusións; 4) a puntuación acadada por cada admitida/o.
- A aclaración dos motivos polos que só foron seleccionadas 12 mulleres fronte a 45 homes, e a comprobación de se se está a producir unha discriminación indirecta de xénero nos criterios de selección aplicados no acceso á formación.
- Que se garanta a inclusión sistemática da variable de sexo en todas as listaxes do persoal en materia de formación, como estipula a normativa de igualdade e se esixe para posibilitar a elaboración das diagnoses dos plans de igualdade que conten con datos estatísticos reais.
- Que se garanta en todas as convocatorias de formación o emprego dunha linguaxe inclusiva e neutra.
- Detalles
A CIG-Autonómica denuncia ante a autoridade laboral a decisión da Xunta e máis do Consorcio de cargar ás traballadoras coas horas de programación sen reducir o horario de atención directa.
O Consorcio impuxo, dentro da xornada de 35 horas semanais, que toda a xornada de traballo fose de atención directa ás crianzas. Esta medida supón un novo atentado contra os servizos públicos, dado que afecta á calidade do servizo ao eliminar a programación educativa, as xuntanzas coas familias, a preparación dos materiais e as avaliacións de resultados, que son vitais para o desenvolvemento educativo das crianzas de 0 a 3 anos.
Nese senso, as instrucións da Dirección da Axencia e da Xerencia do Consorcio son claras: nada de proxecto educativo, só tempo de atención directa asistencial dentro da xornada laboral.
Até o de agora, case un 6% da xornada laboral dedicábase a elaborar programacións, atender ás familias, avaliar, deseñar ambientes de aprendizaxe ou preparar materiais, entre outros, tal e como recolle o Regulamento de réxime interior das escolas infantís.
Dan a orde de programar o período de adaptación
O día 9 de abril chega ás escolas unha circular de parte do equipo de atención educativa (que depende da xerencia adxunta, servizos centrais) na que se lle ordena aos centros que se programe o proceso de familiarización (período de adaptación). Tamén se lles pide que avalíen a avolución de cada crianza e fagan os informes en tempo de atención directa. A intención da Xunta é clara: cargar sobre as costas das traballadoras a responsabilidade da calidade do servizo, sen tempo de traballo para facer as tarefas que marcan a diferenza cos centros privados.
Denuncia perante a ITSS
Dende a CIG acabamos de denunciar na Inspección de Traballo as ordes contraditorias que emite o Consorcio: o tempo de traballo é todo de atención ás crianzas e, por outro lado, danse ordes de programar o período para acoller as crianzas e familias no curso que entra.
Queremos programar, avaliar, ter reunións dos equipos, titorías, e todo o que marca a lexislación, pero con tempos habilitados para tal fin.
Acabáronse os tempos de “tempo por tempo” e se non o tes, “tempo do teu”!!
Acabouse esa práctica abusiva do Consorcio de esixir ás traballadoras tempo da súa vida persoal como se se tratase de voluntariado.
- Detalles
A CIG presentou un recurso de reposición á Resolución que convocou o concurso ordinario para a provisión de postos de traballo vacantes de escalas de enxeñarías, arquitectura, arquitectura técnica e ciencias (administración especial).
No recurso solicitamos unha relación das prazas que desapareceron do concurso, con información polo miudo de cada unha delas. Tamén da relación de prazas que teñen reserva. Ao tempo, reclamamos a convocatoria inminente das prazas de concurso específico, que por estar todas adxudicadas en comisión de servizos, as persoas titulares están ao tempo bloqueando outras prazas que poderían ser vacantes. E unha vez adxudicadas, que as vacantes liberadas sexan convocadas nun novo concurso ordinario de traslados.
O primeiro borrador do concurso ordinario de administración especial especial foi remitido á representación sindical o 18/01/2024. Entre as alegacións da CIG estaba “que se oferte a totalidade de postos vacantes existentes”, e que “de darse o caso de postos que non poidan ser ofertados, solicitamos información polo miúdo que xustifique a súa exclusión”. Posteriormente, o 05/02/2024 recibimos un segundo borrador.
A primeiros de febreiro, a Dirección Xeral de Función Pública (DXFP) puxo a disposición dos sindicatos o listado de prazas vacantes “que se ofertarán nun próximo concurso de traslados para a provisión de postos de traballo vacantes”. Na comunicación recibida tamén se indicaba que dispoñíamos de dous días para facer alegacións. Posteriormente indicóusenos que podiamos alegar durante algúns días máis.
A negociación das bases do concurso foi o día 12 de febreiro na Mesa sectorial de negociación do persoal Funcionario. Respecto das prazas, o DXFP limitouse a informar oralmente de que se retiraban as seguintes prazas:
- As ocupadas en Augas de Galiza por persoas que non se integraron.
- 3 ou 4 prazas de Medio Ambiente.
- Algunha máis afectada por proceso de estabilización por estar mal localizada ou con problemas de titulación.
Sen mais, ese mesmo día quedou aprobada en Comisión de Persoal a convocatoria do concurso, coa abstención de CIG. A CIG xustificou o seu voto en que o concurso era moi demandado, pero non podiamos apoiar porque non coñeciamos os postos que ían convocar.
En todo o proceso de negociación, a información cos postos obxecto de concurso posta a disposición das organizacións sindicais limitouse a darnos acceso a unha aplicación dende a que podiamos ver unha relación de postos supostamente vacantes, sobre os que podiamos alegar, e mesmo engadir outros postos que tamén considerabamos que deberían ser ofertados. En ningún momento recibimos listado algún no que se nos comunicara cales serían os postos a ofertar no concurso de traslados.
En todo caso, dando por bo o listado de postos ofrecido, puidemos observar que algúns deles non aparecen entre os convocados no concurso de traslados, polo que esta organización sindical non tivo opción a alegar a súa inclusión por descoñecer que tiñan intención de retiralos da oferta.
Unha vez publicada a Resolución que convoca o referido concurso de traslados, dende a CIG enviamos un correo electrónico á Dirección Xeral de Función Pública no que solicitabamos explicacións pola desaparición dalgúns postos, sen que a día de hoxe teñamos resposta algunha. Non tivemos resposta.
Sospeitamos que os postos que queren retirar serán por existir certificación das consellerías conforme teñen intención de amortizalas. Evidentemente non concordamos con que a estas alturas queiran amortizar postos, pero en todo caso esiximos información concreta, polo miudo, de cada praza retirada ou non ofertada.
Agardamos a resposta de Función Pública para decidir que facemos.
- Detalles
Dende a CIG, e con ánimo de mellorar os textos dos proxectos de leis básicas de bombeiros/as forestais e axentes forestais e medioambientais, enviamos aos grupos parlamentares do Congreso as nosas achegas a estes documentos dentro da fase de emendas.
Para nós estes textos son claramente mellorables porque poden chegar a limitar o ámbito de actuación e funcións de competencia da comunidade galega e non afondan en dar solucións aos principais problemas deste persoal que sí son cuestións de competencia estatal directa.
Ademais non se nos convocou como organización sindical coa consideración de mais representativa nin se negociou dentro da Mesa Xeral das Administracións Públicas, a pesar de que este persoal na Galiza e noutros territorios é persoal empregado público.
Tendo en conta que pouco mudou o contido dos textos dende o anterior intento de proxectos de lei (que se desbotou por mor da convocatoria das pasadas eleccións xerais), as nosas propostas seguen sendo as mesmas que daquela.
A modo de resumo estas son as nosas principais reivindicacións:
Axentes forestais e medioambientais
• Funcións: obviase a función da dirección técnica de extinción (DTE), función fundamental e necesaria na Galiza en relación coa loita contra o lume. Solicitamos a súa inclusión no texto.
• Coeficientes redutores da idade de xubilación: propoñemos regular de xeito directo a aplicación de coeficientes redutores para a xubilación anticipada (0,20 por ano completo efectivamente traballado).
• Colaboración cos corpos e forzas de seguridade do Estado: opoñémonos a que se articulen nesta norma competencias que non son de entidade estatal e polo tanto non son función directa destes corpos. Con este proceder, se estaría a validar unha duplicidade de competencias.
• Seguridade e saúde laboral: precísase un catálogo de enfermidades profesionais propias e medidas impositivas cun prazo máximo de actuación e un sistema de avaliación.
• Uniformidade: é preciso estabelecer a igualdade da uniformidade do persoal dos parques nacionais transferidos.
• Igualdade: propoñemos a obriga de estabelecer un plan específico de igualdade atendendo á especial infrarrepresentación feminina.
Bombeiros/as forestais
• Xubilación anticipada: concordamos con que a xubilación para o persoal bombeiro forestal sexa a recollida no Real Decreto 383/2008, de 14 de marzo tal e coma sostivo sempre a CIG. Nós solicitamos que se estenda o cálculo para os coeficientes redutores con carácter retroactivo e vinculados ás funcións efectivas realizadas independentemente da nomenclatura da categoría empregada.
• Precariedade laboral: a pesares de que este anteproxecto referise á alta temporalidade e estacionalidade, non achega solucións a este problema. Dende a CIG defendemos a necesidade de traballar os 12 meses do ano, cun servizo profesional de emerxencias completo no medio natural e rural.
• Dereitos laborais básicos: o proxecto de lei debería recoller medidas impositivas concretas para implementar unha conciliación laboral e familiar real e efectiva. Ademais, tería que estabelecerse unha xornada máxima anual universal que tivera en conta os coeficientes multiplicadores do traballo nocturno e a quendas e as condicións tóxicas e penosas desta actividade.
• Seguridade e saúde laboral: debe estabelecerse un catálogo de enfermidades profesionais e un regulamento de prevención de riscos laborais propios no prazo máximo dun ano.
• Igualdade: hai que eliminar do texto a linguaxe sexista e implementar a obriga de establecer un plan específico de igualdade atendendo á especial infarrepresentación feminina.
• Servizos 100% públicos e con mando único.
• Formación: debe ser unha formación ampla e axeitada. Ten que ser considerada en todo caso como de prevención de riscos laborais (PRL) e realizada en tempo de traballo.
- Detalles
A Consellería de Educación, de xeito unilateral e sen previo aviso, retirou a axuda por persoa con discapacidade a cargo que o persoal funcionarizado tiña recoñecida en base ao V Convenio Colectivo da Xunta de Galiza.
O persoal laboral ten dereito a unha axuda de 180 € mensuais cando ten ao cargo unha persoa con discapacidade e con ingresos inferiores ao SMI. En teoría ese dereito íase manter parar o persoal laboral funcionarizado da citada consellería pero na práctica foille retirado. É evidente que o importe non é elevado, pero si que supuña unha axuda para contribuír aos gastos que supón ter unha persoa dependente a cargo e que ten uns ingresos moi baixos (inferiores ao SMI).
A CIG leva anos solicitando que esta axuda se inclúa na nómina tamén para o persoal funcionario, co mesmo sistema de solicitude que ten o persoal laboral, por unha soa vez, e ata que se perda o dereito a cobrala. Función Pública xa en marzo do ano 2023 afirmaba que no último trimestre do ano iniciaría unha negociación nos termos que a CIG propón, pero non só non foi así senón que permite que se deixe sen ese dereito ao persoal que o tiña recoñecido.
A CIG esixe que se reverta esta situación, que se siga aboando a axuda ao persoal que a viña percibindo ata que se negocie de xeito urxente un auténtico Fondo de Acción Social ao que se poida acoller todo o persoal empregado público da Xunta, que vaia máis aló dunha simple liña de axudas para a atención de persoas con discapacidade e que se recuperen os importes subtraídos no 2012 chegando, como mínimo ao 1% da masa salarial.
