- Detalles
A CIG valora positivamente a oferta formativa da Consellería de Medio Ambiente e Cambio climático para o ano 2025 e solicita unha xuntanza extraordinaria e urxente do CSSL monográfica sobre a situación do Parque Nacional Illas Atlánticas en materia de PRL
O 29.10.2024 tivo lugar unha nova xuntanza do CSSL da Consellería de Medio Ambiente e Cambio Climático (CMACC) co obxectivo principal de informar ás organizacións sindicais de varios asuntos, principalmente avanzar diferentes accións formativas para o ano 2025, a entrega de roupa de traballo e a situación do Centro de Recuperación de Fauna salvaxe (CRFS) de Santa Cruz.
Oferta formativa para 2025:
- Curso para a obtención dunha titulación habilitante para o manexo das embarcacións oficiais
- Curso de inspección ambiental
- Curso de redacción de actas e informes para o persoal de campo recentemente funcionarizado
- Curso de toma de mostras de augas, residuos e verquidos. Redacción de actas.
- Curso de Cartografía e dixitalización en programas SIX (sistemas de información xeográfica)
- Curso de implementación de recursos técnicos e de xestión da norma ISO 17025 nos laboratorios
- Curso de condución sostible
A convocatoria dun curso que habilite para o manexo de embarcacións oficiais é un importante logro da CIG, pois levamos tempo traballando neste asunto para rematar coas chapuzas da CMACC que ata o de agora promovía as titulacións de recreo (PNB, PER, etc.) sen criterio de selección e fóra dos circuítos formativos apropiados . Os diferentes servizos da Consellería contan con embarcacións e polo tanto precisan de persoal que as manexe con todas as garantías e coberturas legais e eso é o que vamos a exixir, unha titulación profesional para as diferentes escalas que deban manexar as embarcacións oficiais.
Por outra banda, informaron dunha próxima contratación de roupa para todo o persoal de campo da CMACC. Destacamos, como novidade e a demanda da CIG, a entrega de roupa e calzado para o persoal técnico. Tamén nos informan da inminente contratación do calzado, que para os axentes facultativos ambientais non levará punta reforzada.
A Presidenta do CSSL infórmanos sobre as actuacións que se acometeron e se están acometendo no CRFS de Santa Cruz trala aparición dun gromo de gripe aviaria acontecido o pasado mes de agosto. Recordemos que o centro pechouse asumindo o centro de Carballedo a carga de traballo. Dende a CIG preguntamos se houbo que reforzar a plantilla polo aumento da carga de traballo, aínda sendo conscientes de que esta época do ano é un período baixo de actividade, dende a Consellería contestoúsenos que non foi preciso. Comnunicóusenos que en breve volverá ao seu funcionamento normal, non dando unha data concreta debido a que depende de cando se rematen unha serie de obras que se están acomentendo. A Presidenta do comité tamén nos pediu aos delegados de prevención que insistíramos aos traballadores da necesidade, importancia e responsabilidade de que fagan uso dos EPIS.
No último punto da orde do día, fomos informados do reparto de repelentes para os carrachos.
Na rolda de intervencións tomamos a palabra para denunciar a grave situación do Parque Nacional das Illas Atlánticas en materia de prevención de riscos laborais. O desleixo da Dirección do Parque e da propia Consellería é insoportable. As deficiencias son excesivas e o persoal debe traballar sen apenas as medidas de prevencións básicas esixibles, pese a que moitas destas medidas non requiren grandes esforzos económicos. O máis grave é a actitude dos xestores.
A información que nos remitiron, tanto por parte da Dirección do parque como por parte da Consellería, é totalmente insuficiente, omiten datos de gran importancia e non nos facilitaron os documentos máis esenciais en materia de prevención de riscos laborais. Polo que a CIG solicitou por escrito á presidenta do CSSL da CMACC unha convocatoria extraordinaria, urxente e monográfica sobre o Parque Nacional das Illas Atlánticas de Galicia. No comité non obtivemos resposta da Presidenta á nosa demanda por mor dos contínuos problemas de conexión e foi o Director Territorial de Lugo o encargado de darnos largas neste asunto.
Para rematar a CIG volveu a esixir que as xuntanzas deste comité sexan presenciais, neste último os contínuos problemas de conexión impedirón seguir o fío da xuntanza con normalidade.
- Detalles
Dan o dito por non dito, e listo!!
Representantes do Comité Intercentros e dos comités de empresa de Política Social reuníronse o 31 de outubro con representantes da Consellería e do Consorcio. A reunión solicitáraa o Comité Intercentros para tratar as condicións de traballo e de prestación do servizo nas escolas infantís, tanto da Axencia Galega de Servizos Sociais como do Consorcio.
Na reunión, o xerente do Consorcio, Perfecto Rodríguez, expuxo unha proposta sobre unha das reivindicacións dos cadros de persoal, tanto da Axencia como do Consorcio sobre as reunións dos claustros, que consistía en pechar ás tres da tarde unha vez ao mes e facer as titorías a partir desa hora. Expuxo tamén que ao persoal que se pasara da xornada de traballo diaria compensaríase con “tempo por tempo” (termo acuñado polo Consorcio dende 2007 que non está nin no Estatuto das traballadoras e traballadores nin no EBEP nin co V Convenio).
Como queira que ás persoas representantes do persoal nos pareceu intolerable que se siga con eses postulados (incluso a secretaria xeral técnica abondou que a iso se lle chamaban horas extra de toda a vida) o xerente dixo que ía enviar por escrito tres propostas que tiñan preparadas para negociar.
Pois, como de homes sabedores é trocar de pareceres (e dá igual que estea recollido na acta) Perfecto Rodríguez decidiu mandar ás escolas infantís do Consorcio, no día de onte, unha circular na que se ditan instrucións sobre como facer as titorías: pechar 3 días ao ano despois do xantar das crianzas e xa se compensará.
Nin se lle mandaron as propostas ás persoas representantes do persoal nin ganas que tiñan de facelo.
Se a Consellería de Política Social permite que o Consorcio vaia por libre é igual de responsable!
- Detalles
No DOG do 06/11/2024 publican as baremacións provisionais da fase de concurso de varias escalas ou especialidades:
- Escala auxiliar de recursos naturais e forestais, subgrupo C2, do corpo de auxiliares de carácter técnico de Administración especial da Administración xeral da Comunidade Autónoma de Galiza.
- Corpo facultativo de grao medio de Administración especial da Administración xeral da Comunidade Autónoma de Galiza, subgrupo A2, escala técnica de facultativos, especialidade de enfermaría.
- Corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, especialidade de arquivos e bibliotecas.
- Corpo de auxiliares de carácter técnico de Administración especial da Administración xeral da Comunidade Autónoma de Galiza, subgrupo C2, escala auxiliar de laboratorio.
- Agrupación profesional de persoal funcionario da Administración xeral da Comunidade Autónoma de Galiza, escala de persoal de limpeza e recursos naturais e forestais, especialidade de persoal de recursos naturais e forestais, subgrupo AP.
- Corpo superior da Administración xeral da Comunidade Autónoma de Galiza, subgrupo A1, escala de facultativos, especialidade medicina.
A puntuación provisional obtida polas persoas baremadas figura reflectida no portal web corporativo da Dirección Xeral de Emprego Público e Administración de Persoal: https://www.xunta.gal/funcion-publica/procesos-selectivos/consulta
De acordo co establecido na base IV.5 da convocatoria, as persoas baremadas poderán formular reclamación contra as puntuacións provisionais perante o tribunal, no prazo de dez (10) días hábiles contados a partir do día seguinte ao da publicación desta resolución no Diario Oficial de Galiza.
As reclamacións presentaranse a través de Fides na epígrafe «inscrición en procesos selectivos». Para isto, a persoa aspirante accederá ao proceso de estabilización a que se refire esta resolución en que desexe formular reclamación, na epígrafe «Que podo facer?», «presentación alegacións baremo».
- Detalles
Recibimos listado de postos para a eleición de destino dos procesos selectivos de A1-Enxeñaría de Montes, e A2-Enxeñaría Técnica Forestal, achegada pola Dirección Xeral de Emprego Público e Administración de Persoal o martes 5 de novembro. Descargar listado
Se é do teu interese, podes contactar coa CIG.
- Detalles
Xuntanza do 31 de outubro do Comité Intercentros co obxectivo de tratar os moitos problemas que afectan sobre todo ás escolas infantís, tanto da Axencia coma do Consorcio:
1. Número de usuarios/as das E.I. por escola e franxas horarias. A Secretaria informa en que co acordo aumentouse o persoal cun reforzo de 14 persoas, e que en escolas da Axencia pódese alcanzar a parella ou máis, progresivamente. Teñen intencion de unificar e acadar as parellas educativas en todas as escolas da Axencia. Insiste en que non está obrigado pola normativa a dar os datos de usuarios/as por franxa horaria . Que van a ver o que poden facer, que o van a valorar. A CIG considera un dato fundamental para poder avaliar o cumprimento das ratios.
2. Horario de programación e avaliación escolar. A secretaria informa de que que se van a negociar e se van a ofrecer cando menos tres propostas para valorar e negociar. Dende a CIG entendemos que tal e como relexa o Decreto 150/2022 do currículo da educación infantil en Galiza, os claustros débense reunir ao completo, as xuntanzas de equipo son precisas, estimando os tempos de programación e avaliación necesarios, debendo implementarse un modelo unificado de avaliación como no segundo ciclo. Ademais os resultados das avaliacións psicosociais mostran de xeito palmario a grande afectación que para o persoal ten este xeito de traballar
3. Implantación da parella educativa de xeito universal. Segundo sinala a secretaria: co aumento de persoal e a raíz da parella no Consorcio, xa hai esta tendencia na Axencia. Que se pode alcanzar a parella en moitos centros. Refiren a que teñen a vontade de facelo paulatinamente.
4. Revisión de horarios de apertura e peche. Moitas veces o establecemento dos horarios non atende a cuestións formais ou de matricula, nin sequera do RRI. Senón á presión das familias, dándose diferencias entre centros. Informan que tentarán que se melloren as condicións das traballadoras pero que non supoña un prexuízo para as familias e estudarán a posibilidade de solicitar unha xustificación do horario segundo os casos
5. Eliminación das xornadas partidas e medias xornadas. Aseguran que xa non quedan medias xornadas. En canto as xornadas partidas, van facer un estudo, para ver si reorganizando se poden eliminar. No caso de non poder, estudiaran cantos postos serian necesarios, canto sería o custe, e trasladar a fecenda para tentar aumentar postos. Estudarán as posibilidades.
6. Implantación de cociña de xestión propia en todas as escolas. Dende a CIG reivindicamos os servizos públicos e de calidade fronte á privatización. Non dan resposta
7. Compromiso de respectar os dereitos recollidos no V Convenio Colectivo. A maioría da xente está funcionarizada ou en proceso e dereitos como os días de descanso do 24, 31 de decembro e ausencias masivas e outro tipo de dereitos recollidos no convenio, que xa están consolidados. Segundo a Secretaria: non se ten pensado cambiar o criterio de cando abre unha escola. A pesar do que indique o texto, informa que se seguirán aplicando os mesmos criterios. Deixou o texto como “aberto” pero que todo continuará como antes (cunha escola de garda).Pensan que a futuro se tenderá a unificar para que toda a rede pública funcione cos mesmos criterios. Comunican o peche das escolas o dia 30 de decembro
8. Escolas cualificadas como PAI e funcións dos PSX. Refiren que non ven problema en que as escolas esté cualificadas como PAI pero concordan en que os/as PSX non deben ter asignadas tarefas educativas, asi como que o persoal educativo non realice función de PSX nos centros onde se carece destes profeionais. Van tamén facer un estudo de que persoal seria necesario e o custe.
9. Menús únicos. Refiren que o tema da alimentación se fai dende ano 2021 en colaboración coa Consellería de Sanidade. Que é unha cuestión que se traslada unicamente dende Relfas, así que non entenden onde están os problemas...
Esto foi o tratado o 31, máis hoxe día 5 o Consorcio falta unha vez máis aos seus compromisos e remite de xeito unilateral unha orde sobre cómo se debe proceder coas horas de titorías, quedando en fume o que dixeron na xuntanza de intercentros
- Detalles
En resposta ao desastre producido pola DANA de Valencia, a Xunta de Galiza está a solicitar persoal voluntario entre o persoal das consellarías de Medio Rural e Medio Ambiente e Cambio Climático. A información foi anunciada á prensa, e está a circular por grupos de whatsapp.
A CIG-Autonómica está conforme coa necesidade de axudar ás persoas damnificadas e a restablecer os servizos públicos, pero como representantes dos traballadores e traballadoras ao servizo da Administración de Galiza, queremos información.
Queremos coñecer que tipo de persoal é o que se quere movilizar, os medios que van a utilizar (incluíndo os equipos de protección individual), e as condicións en que van a desenvolver o seu traballo.
A CIG ven de remitir un escrito solicitando información ás secretarías xerais técnicas das consellarías de Medio Rural e de Medio Ambiente e Cambio Climático, así como á Dirección Xeral de Emprego Público e Administración de Persoal.
- Detalles
En xuño do 2022 foi convocada a promoción interna separada para a escala de vixilancia de estradas (C1), á que se podía presentar o persoal laboral fixo da categoría IV-031 (legoeiros). O proceso incumpre o que pactamos, e podería egochar un intento de privatización da vixilancia das estradas.
Un acordo que comprometía a creación de prazas
As organizacións sindicais e a Xunta negociamos un acordo e unha posterior addenda sobre o persoal da Axencia Galega de Infraestruturas (ano 2018). Entre os seus puntos, recollíase a creación dun mínimo de 57 prazas da escala de axentes de inspección, especialidade de vixilancia de estradas, e a convocatoria de 38 delas mediante promoción interna nunha primeira fase que remataría no ano 2019. As prazas non cubertas acumularíanse ás 19 restantes e ofertaríanse no ano 2020.
Non cumpriron coa fase inicial, así que OPE do 2020 ofertáronse xuntas as 57 prazas, convocadas no 2022. O proceso que tiña que estar rematado no 2019, está a piques de rematar agora, pendente da elección de destinos.
E aquí chega o lio: a Xunta non crea ningunha praza de vixilancia de estradas, e no seu lugar oferta unhas prazas que nada teñen que ver coas funcións da escala de inspección, especialidade de vixilancia de estradas: capataz de brigada, celador de estradas e operario de maquinaria pesada.
A recualificación e a creación de postos
Cando negociamos coa Xunta as bases da convocatoria, a CIG solicitou, como no resto das promocións internas, a recualificación dos postos das persoas que superen o proceso, ou como mínimo que se articulase algún sistema que facilitara manter a localidade.
Así o solicitamos nas alegacións escritas e nas intervencións orais nas mesas. Pero finalmente, a Dirección Xeral de Función Pública non aceptou engadir esa cláusula na convocatoria, e xunto a outras razóns, a CIG votou en contra das bases da convocatoria na Comisión de Persoal (CCOO abstívose, e CSIF e UGT votaron a favor).
Chegou o día de escoller destino, xa temos un listado de prazas, e as persoas que superaron a promoción interna ven como moitos/as deles/as corren o risco de térense que mover a outra localidade.
A Axencia Galega de Infraestruturas e a Dirección Xeral de Emprego Público e Administración de Persoal, teñen que darlle unha volta á relación de prazas, mesmo modificar a Relación de Postos de Traballo para que as funcións de cada un dos postos teña que ver coas propias da escala segundo o recollido na Lei do emprego público de Galiza. E teñen que crear postos novos tal e como se comprometeran nos acordos: “adecuar a estrutura do persoal laboral da Axencia á necesidade de potenciar a vixilancia fronte á conservación directa das estradas”, “contar con postos dedicados á vixilancia das estradas”.
A privatización da vixilancia de estradas
Quen vai facer as labores de vixilancia das estradas que deberían realizar as persoas que superaron este proceso selectivo e que, por outra banda, xa viñan realizando antes do proceso?
Que persigue a Xunta de Galiza ao tentar derivar o persoal que realiza estas funcións e que superou un proceso selectivo para esa concreta especialidade de vixilancia das estradas, ao obrigalos a escoller prazas de capataz de brigada, celador de estradas e operario de maquinaria pesada?
Con esta xogada, están a asignar destinos con funcións non relacionadas coa vixilancia. Pero a Axencia Galega de Infraestruturas vai ter que seguir vixiando as obras, a explotación e a conservación das estradas de titularidade autonómica. Quen o vai facer?
Aquí é onde entra en escena a información que nos chegou sobre a intención da AXI de incluir a vixilancia nos pregos de cláusulas administrativas particulares para a contratación de obras. Todo cobra sentido. Por que ía ter tanto interese a Xunta en desfacerse dun persoal que vén realizando unhas funcións tan concretas e necesarias, aproveitando que superaron un proceso de promoción interna para realizar esas funcións?
Non imos utilizar a palabra que todos temos en mente e que vén acompañando a política de xestión dos servizos públicos por parte dos dirixentes políticos da Xunta de Galiza polo menos dende 2009. No canto diso imos utilizar un dito popular que se acae perfectamente á ocasión: a Xunta de Galiza quere poñer o raposo a coidar das galiñas.
- Detalles
Na sesión do 28/10/2024 tratamos os seguintes asuntos:
AVALIACIÓNS DE RISCOS REALIZADAS
- CIMA:
Ambas Avaliacións de Riscos, de CIMA Corón e CIMA Ribadeo foron entregadas no 2023. Dende entón fóronse implementando algunhas das medidas correctoras e outras están pendentes. De estas sinalar as seguintes:
-Pendente o plan de autoprotección e a sectorización do edificio.
-As portas antipánico non deben pecharse en ningún momento, estudarase a seguridade do centro pola noite.
-Instalarase unha centraliña de detección de fumes e mercaranse mantas ignífugas.
-Queda pendente a remisión dun listado de produtos químicos que non constan nesta avaliación.
- CIMA Ribadeo:
Quedan medidas correctoras sen acometer, algunhas das previstas proximamente son:
-Sinalización dos chanzos con tiras luminiscentes.
-Compra de traspalé para movemento de cargas pesadas e elevador para cargas mais lixeiras.
-Faltan as mantas ignífugas e sinalización.
PROGRAMACIÓNS PENDENTES
Informan dende a Vicesecretaría que para o ano 2025 se efectuarán as avaliacións por postos do Servizo de Gardacostas que vimos demandando dende a CIG reiteradamente.
Farase a avaliación de riscos Inicial da delegación de Ribeira.
Pídese que se avalíen no IGAFA, aquelas instalacións novas que non estean avaliadas.
IGAFA
Levarase a cabo unha avaliación de riscos psicosociais no centro.
Carga de traballo das auxiliares de laboratorio do IGAFA. Reclamase unha solución para a carga de traballo das auxiliares de laboratorio que se prolonga dende fai moitos anos. Dende a Vicesecretaria propoñen acumulación de tarefas pendente de que FP o autorice. Indicamos que é un problema que se mantén por moito tempo e que se debe solucionar de xeito estrutural incrementando persoal.
VIXILANCIA DA SAÚDE NO EDIFICIO DE PONTEVEDRA
Reiteramos as queixas pola vixilancia da saúde en Pontevedra xa que non aplican os protocolos establecidos e nos informes aparecen reflectidos resultados de probas non realizadas.
Dende o SPRL indican que o poñerán en coñecemento da Mutua para que resolvan estas queixas.
FORMACIÓN: RISCOS NO EMBARQUE, MANIPULACIÓN PRODUTOS QUÍMICOS E CONDUCIÓN SEGURA
Informa a Consellería que está prevista a formación para prevención de riscos no mar na Escola Náutica de Ferrol e que solo falta por establecer as datas. Se farán varias edicións da formación co fin de que poida asistir o maior número de persoas.
Así mesmo se fará un curso de manexo de produtos químicos.
Estase en negociacións coa EGAP para o curso de condución segura. De non ser posible o asumirá a Consellería.
ROUPA DE TRABALLO
Gardacostas: transmitimos que dende maio que se fixeron os tallaxes non se entregou a roupa e que agora xa sería necesaria a roupa de inverno. Pedimos axilidade na entrega da roupa e sobre todo dotar ás novas persoas empregadas públicas de roupa suficiente.
Traballo de campo: sen dotación orzamentaria para este ano. A consellería está traballando no prego de compra da roupa para o 2025. Pedimos igualmente axilidade na merca de roupa para o novo persoal e na substitución de roupa deteriorada.
ROLDA DE INTERVENCIÓNS
1.-Dende a CIG inquirimos o SPRL sobre as necesarias medidas de seguridade nas planeadoras que non teñen elementos mecánicos para recollida de artes.
2.-Comunicamos as deficiencias de funcionamento dos vehículos eléctricos que provocan que os empregados queden tirados nos destinos e a inseguridade que isto produce.
3.- Iniciaranse as obras de reforma da Delegación de Carril e de Salgueiriños no 2025.
4.-Iniciarase a medición de radón obrigatoria segundo a normativa das dependencias da consellería fora de Edificio de San Caetano.
- Detalles
Na reunión de Comité de Seguridade e Saúde Laboral da Consellería do Mar deste pasado luns 28 de Outubro, a vicesecretaria xeral da Consellería confirmounos que no ano 2025 realizaranse as avaliacións de riscos laborais nos postos de patrón, mecánico e axente do Servizo de Gardacostas de Galiza.
Esta era unha reivindicación da CIG dende hai moito tempo xa que estamos diante dun colectivo susceptíbel de accidentes laborais con resultado de baixa e baixas derivadas de doenzas crónicas asociada a súa actividade profesional.
Estamos diante dun servizo fundamental para a loita contra o furtivismo e chave para o sector pesqueiro galego que nos últimos anos ven sufrindo unha carencia crónica de persoal que se engade a elevada idade media dos seus membros.
Dende a CIG, alegrámonos deste paso na boa dirección e instamos a Consellería do Mar a que poña da súa parte para acadar mecanismos de xubilación anticipada para o Servizo de Gardacostas de Galiza, outra das reivindicacións históricas da CIG con este colectivo.
- Detalles
No DOG do 30/10/2024 sae publicada a Resolución pola que se nomea ao tribunal que deberá cualificar o proceso selectivo para o ingreso na escala de persoal de limpeza e recursos naturais e forestais, especialidade de persoal de limpeza e cociña e OHH SORPRESA, todos/as os/as membros menos 1 do tribunal titular son persoal docente e no tribunal suplente, dous dos seus 5 membros tamén o son.
Creo que A Xunta aínda non se decatou de que este persoal xa non presta os seus servizos unicamente en centros de ensino e por iso nomea estes tribunais. Van a avaliarnos os que logo deberían ser os nosos compañeiros en moitos casos, pero que rematan sendo a patronal?.
Ademais de que isto é un menosprezo ao persoal aspirante a esas prazas, tamén o é ao resto do persoal funcionario da Administración Xeral e Especial da Xunta de Galiza, do que a Administración parece pensar que non temos suficientes coñecementos como para formar parte dun tribunal. Nin sequera se poden escudar nunha titulación específica ou en que hai que pertencer ao mesmo corpo ou a un superior, pois estamos falando de prazas da AP para as que non se require ningunha titulación e todo o persoal funcionario da Xunta é desa escala ou superior.
Estamos seguros que hai moitas escalas que están máis capacitadas para formar parte destes tribunais: gobernantía, xefes/as cociña, oficiais cociña, incluso calquer/a funcionario/a da escala AP subalterno/a, pois conviven a diario con persoal da escala ofertada e coñecen á perfección os traballos que deben realizar.
Unha vez máis fáltannos ao respecto metendo persoal dos corpos docentes en postos nos que debería estar persoal funcionario da Administración da Xunta.
Alguén se imaxina un tribunal de ensino no que os seus membros fosen veterinarios/as, médicos/as, titulados/as superiores...en fin, funcionarios/a da Administración Xeral?
Basta xa de menosprezos e de querer vendernos uns tribunais nos que a maioría dos seus membros descoñecen onde e que fan as persoas que van acadar un posto nese proceso.
