- Detalles
O director xeral de Función Pública convocounos a unha xuntanza da Mesa Xeral de Empregados Públicos que será o luns 7 de agosto, coa seguinte Orde do día:
Punto único: Acordo sobre as condicións de traballo do persoal de centros de xestión propia da Consellería de Política Social e Xuventude
Descargar a proposta que enviaron para a MX
Esta é a terceira versión do documento despois de varias xuntanzas. A previsión é que quede aprobado na Comisión de Persoal prevista para o mércores 8 de agosto.
- Detalles
A Dirección Xeral de Función Pública enviounos un segundo borrador do concurso de traslados de Administración especial, con indicación de que podemos enviar novas alegacións ata o 6 de setembro (contacta coa CIG).
Os tres cambios que presentan neste segundo borrador foron parte das alegacións presentadas pola CIG:
- Engaden a posibilidade de participar no concurso a quen se encontre en excedencia por agrupación familiar e por coidado de familiar.
- Retiran o límite de antigüidade dos cursos para aceptalos. O DXFP anunciou na Comisión de Persoal do martes 1 de agosto, que aceptan isto en consideración polo tempo que vai dende o anterior concurso, pero que o seu criterio para futuros concursos é poñer un límite temporal aos cursos, algo que rexeita a CIG.
- En titulación académica, engaden a de técnico superior.
Fan cambios tamén coa redacción da elección dos postos das persoas que están a dispor ou en adscrición provisional. Pero aquí líanse, xa que non coincide a redacción da LEPG co Decreto de mobilidade (151/2022).
Non fan cambios na maioría dos aspectos que a CIG alegou, e que mantemos:
- O primeiro é que este concurso de Administración especial queremos que sea para a totalidade das escalas, non dunha selección delas que aínda non está definida (o DXFP segue a falar de enxeñarías, escalas de Política Social, veterinarios/as, e algunha outra que comparta postos). A isto engadimos que queremos un compromiso de que convoquen os concursos de traslados para a totalidade de escalas e corpos xerais, de xeito que poidan estas rematados a 31/12/2024.
- Tampouco fan cambios na valoración dos méritos, que nalgúns casos quedan curtos (31 anos para o máximo de antigüidade), e noutros son excesivamente desequilibrantes (grao, traballo desenvolvido, méritos específicos, ..).
- Na formación non queremos o máximo de horas por curso, e si á ampliación das entidades formadoras, incluíndo as escolas oficiais de idiomas, universidades, D.X. de formación, SEPE.
- A permanencia no posto vai ser outro atranco, xa que o máximo obtense con 11 anos, cando o anterior concurso rematou fai 9 (en 2014), polo que os efectos deste mérito van quedar en nada xa que case non existirá diferenza entre as persoas.
- Rexeitamos a valoración das comisións de servizo por ser a súa concesión a dedo. Mentres non teñamos un sistema de provisión temporal que sexa obxectivo, esiximos que se valore como tempo prestado no posto de orixe.
A previsión é retomar as negociacións e aprobar as bases en setembro.
- Detalles
O pasado 1 de agosto tivo lugar unha xuntanza da Comisión de Persoal na que se trataron os seguintes asuntos: 1) Acordo FISP; 2) RPT Sanidade-FISP; 3) Protocolo ante o acoso e violencias; 4) Plan de igualdade. Dentro do punto de Rogos e preguntas, o director xeral de Función Pública deu información de: 1) publicación das notas dos primeiros exercicios; 2) concurso de administración especial; 3) funcionarización do persoal laboral fixo do grupo I; 4) proceso selectivo de axentes medioambientais; 5) data de exame de galego dos procesos da Lei 20/21; 6) permisos da Lei de impulso demográfico; 7) acordo de condicións de traballo en centros de Política Sociaol; 8) acordo de integración do GAIN.
ACORDO FISP
A proposta de Acordo sobre o persoal funcionario da clase de Farmacéuticos/as Inspectores (FISP) que enviaron para a Comisión de Persoal é a mesma que a da Mesa Sectorial. Na CIG mantemos que se sobrepasa a xornada máxima anual, pero os beneficios superan aos prexuízos, polo que votamos a favor. O mesmo votan CCOO, CSIF e UGT.
RPT SANIDADE
A proposta que traen adapta a RPT de Sanidade á nova situación pactada mediante o Acordo FISP. Esto incrementa o nivel dos actuais FISP e crea 5 postos de coordinación.
Para financiar este incremento, amortizan 18 postos de “farmacéuticos titulares” (unha escala a extinguir na que xa non había persoal), 7 FISP, 1 xefatura de área e 2 xefaturas de sección. Sen contar os 18 farmacéuticos titulares, e descontando os 5 postos de coordinación que crean, o resultado é que hai unha destrución neta de 5 postos de traballo.
E mentres destrúen estes postos, manteñen certos servizos externalizados, como o control das augas de baño, que antigamente exercían os FISP. A CIG solicitou a eliminación dos servizos externalizados e utilizar ese diñeiro para financiar a proposta de Acordo FISP.
Por tanto, estamos ante unha destrución neta de 5 postos ao tempo que manteñen a xestión con empresas privadas de servizos que ata fai pouco exercían os FISP.
En consecuencia a CIG votou en contra desta proposta de RPT. Pola súa parte, CCOO, CSIF e UGT votaron a favor.
PROTOCOLO ANTE ACOSO E VIOLENCIAS. PLAN DE IGUALDADE
Resumimos nesta nova a postura da CIG.
- Votación do Protocolo: CIG, CCOO, CSIF e UGT votamos a favor.
- Votación do Plan de Igualdade: CIG en contra. CCOO, CSIF e UGT a favor.
DIAGNOSE DO PLAN DE IGUALDADE
A Diagnose do Plan de igualdade non estaba prevista na orde do día da Comisión de Persoal. A CIG solicitou a súa inclusión, e por unanimidade acordamos a súa incorporación.
O documento ten eivas importantes, por falta de datos, que leva a conclusións que non son correctas, según che contamos aquí. O resultado da votación foi: CIG en contra; CCOO, UGT e CSIF a favor.
ROGOS E PREGUNTAS
Publicación das notas dos primeiros exercicios de procesos selectivos: informa o DXFP que ao longo desta semana sairán case todos as notas dos 1º exames celebrados en xuño e xullo, e que xa teñen data para o 2º exercicio. Os que non saian esta semana sairán para a seguinte.
Concurso de Administración especial: remitiron un novo borrador. Di o DXFP que contén algunhas alegacións aceptadas. Teñen por obxectivo publicalo en setembro. Haberá unha xuntanza previa á Mesa. Será para a semana do 4 de setembro ou seguinte. Non van esixir antigüidade máxima dos cursos neste concurso, pero advirte que o seu criterio para o futuro é acotalos a un tempo.
Funcionarización do persoal laboral fixo do grupo I: remitirán as bases para alegar e convocar xuntanza en setembro.
Proceso selectivo de axentes medioambientais: remitirán un borrador de bases esta semana. Negociación en setembro.
Data de exame de galego dos procesos extraordinarios derivados da Lei 20/21: esta semana publicarán a data. Dará tempo a facelo en setembro.
Permisos da Lei de impulso demográfico: di que “con sorte” poderían remitir esta semana o texto definitivo para a súa aprobación na Comisión de Persoal.
Acordo de condicións de traballo en centros de Política Social: convocaron xuntanza. Tentarán pechar un acordo entre esta semana e a seguinte.
Acordo integración GAIN: di que tamén tentarán pechar o acordo nestas dúas semanas (“se dá tempo”).
- Detalles
Un novo agravio para o persoal funcionarizado do SPIF que non percibe os trienios por segundo mes consecutivo
Dende a CIG non paramos de publicar informacións sobre o descontrol que impera no SPIF, que roza o esperpento. Pero isto non é novo, é outro episodio máis dunha longa listaxe de despropósitos.
Primeiro foi a posta en marcha dun proceso de funcionarización ”a cegas” , sen condicións de traballo negociadas previamente. A maiores das incertezas das condicións, trouxo consigo os tumbos nos chamamentos polas listas de contratación, as comisións de servizo e adscricións provisionais, con prazas que se ofertan e logo se retiran, cambios nas datas da súa vixencia, etc.
Todas estas situacións poderian evitarse, non será porque non o tentaramos, incluso enviamos hai máis dun ano unha proposta base para negociar a priori as condicións laborais. Pero para algúns sindicatos e para a Xunta non pasa nada por comezar a casa polo tellado. Así nos vai.
Logo veu o episodio da remuneración das horas extras realizadas no pasado verán. O nunca visto ata o de agora, a parte do persoal se lles pagaron estas horas extras, mentras ao compañeiro do lado que as fixo non. Dende a CIG, non compartiamos o cobro económico destas horas pero tamén é certo que non podemos consentir discriminacións entre compañeiros/as.
E agora viu o problema da falta do cobro de trienios do persoal que se funcionarizou do SPIF. Xa van dous meses sen cobralos, primeiro baseándose nunha explicación e logo noutra, sendo ata o de agora o único persoal ao que non se lle está abonando. Pero bueno, tampouco é a primeira vez que non se cobra algunha retribución. A modo de exemplo, en varias ocasións abonouse a nocturnidade con retraso. Outro agravio máis, sobre todo tendo en conta que a maioría do persoal da Xunta soe cobrar este concepto mensualmente, pero no SPIF non.
A estabilización extraordinaria en base á Lei 20/2021 merece un capítulo aparte. A estas alturas non é un segredo que por parte da Xunta fíxose unha interpretación torticeira da DA8ª desta lei, desaparecendo na práctica, excepto para o persoal de 6 meses do SPIF.
Chegados a este punto e vendo que cada día se incrementa o caos, solicitamoslle á Xunta para que inicie de xeito inmediato a negociación dun acordo marco de condicións do persoal do SPIF. Por iso dende a CIG estamos realizando unha recollida de sinaturas entre o persoal. Pero non é a única cuestión que require de solución, fai falta resolver os procesos selectivos pendentes, regular as listas de contratación....Todo isto dende a negociación colectiva, con base á normativa vixente e con criterios claros e negociados.
SENTIDIÑO XA!!
- Detalles
Despois de mais de 15 anos, aprobouse na Comisión de Persoal do 01/08/2023 co voto en contra da CIG o I Plan de Igualdade: falto de contido, con medidas xa contempladas nas leis e meras declaracións de intencións
A Administración autonómica estaba obrigada a elaborar un Plan de Igualdade para o seu persoal (máis de 26.000 traballadoras e traballadores) dende a Lei 3/2007. Foron numerosos anos reclamando a negociación deste Plan, e numerosas reunións nas que non se avanzaba por falta de vontade negociadora por parte da Xunta. A principios do ano 2022 comezou este proceso negociador que finaliza agora.
Foron numerosas reunións nas que a CIG negociou até a última hora para que se cumprira a normativa de elaboración dos Plans en canto a contidos mínimos e propostas que incorporaran medidas reais para acabar con certas discriminacións e se incorporaran as nosas achegas ao texto.
No caso do “Protocolo contra o acoso e as violencias sexuais e psicolóxicas no traballo”, a CIG votou a favor pois achega novidades e solucións en temas de acoso que estaban pendentes e trae unha nova regulación noutras cuestións que non contaban con protección ou procedemento específicos, como as violencias sexuais e violencias no traballo e na protección da identidade e expresión de xénero.
No Plan de Igualdade aprobado no día de hoxe a nosa postura foi sempre facer unha boa diagnose da situación, cos contidos establecidos na normativa que nos permitira extraer conclusións reais da situación da igualdade na Xunta de Galiza, e así propor medidas efectivas para mellorar a situación de igualdade do persoal empregado público.
A diagnose está incompleta, e incumpre o RD 901/2020 en:
• Datos de formación: están mesturados con datos doutras administracións que non son a Xunta e están computados polo número de cursos realizados e non por persoas; faltan número de solicitudes, de denegacións, de abandonos e as súas causas.
• Na análise dos datos económicos como establece a normativa, xa que non se analizan salarios reais, senón salarios normalizados, e non se establece unha análise por postos de igual valor. Falta auditoría retributiva que queda para máis adiante.
• Na prevención de riscos con perspectiva de xénero, e ademáis non existen resultados da análise de riscos psicosociais.
• As distintas xornadas, horarios, e lugares de prestación de servizos, etc., non se poden avaliar pois non se proporcionan datos.
• Falta Protocolo de violencia de xénero. Nin se negociou o procedemento nin as medidas ás que se poden acoller as vítimas de violencia de xénero.
• Nivel de estudos do persoal da Administración, independentemente da titulación de acceso requirida.
• Na enquisa cualitativa feita ao persoal, as respostas, estudo e conclusións non están desagregadas por xénero, cousa incomprensible nunha enquisa que vai achegar unha visión de como está a percepción da igualdade entre o persoal e tendo en conta que eses datos si se recolleron.
Como consecuencia dunha diagnose incompleta en cuestións tan importantes para un Plan de igualdade temos unhas conclusións parciais que non permiten analizar realmente a situación de igualdade para o persoal da Xunta e trasladan estas carencias ás medidas a adoptar para corrixir as eivas detectadas. Dentro das medidas, por unha parte queren corrixir o que debería de estar feito na diagnose (protocolo de violencia de xénero), e por outro, propóñense medidas que quedan en declaración de intencións (“procurarase”, “estudarase”…).
Nas medidas que se propoñen, tampouco son quen de adoptar as que acaben, dunha vez por todas, coas discriminacións directas; das retributivas no caso dos incrementos salariais nas situacións de embarazo e baixa por maternidade; no acceso a postos vacantes dende as listas de contratación cando se está en situación de suspensión de contrato ou incapacidade temporal por embarazo e/ou lactación natural. Tampouco se recolleu o incremento do permiso para o outro proxenitor até equiparalo co permiso de maternidade na Xunta de Galiza como establece unha recente sentenza do TSXG.
As mulleres e homes da CIG non estamos dispostas a aceptar calquera Plan polo simple feito de telo. Seguimos empeñadas en ter un verdadeiro Plan de Igualdade para o persoal da Xunta de Galiza.
A CIG, sempre comprometida cos avances en dereitos e a non discriminación, seguirá a loitar por acadar a igualdade real e efectiva.
- Detalles
O director xeral de Función Pública convocounos a unha xuntanza da Comisión de Persoal que será o martes 01/08/23, coa seguinte Orde do día:
1. Acordo sobre a clase de Farmacéuticos/as Inspectores/as de Saúde Pública (FISP). Descargar
2. Modificación da RPT de Sanidade (polo acordo FISP). Descargar
3. Protocolo de actuación fronte ao acoso e as violencias sexuais e psicolóxicas no traballo da Xunta de Galiza. Descargar
4. Plan de Igualdade da Xunta de Galiza. Descargar
- Detalles
No DOG do 31/07/2023 publican a RESOLUCIÓN do 24 de xullo de 2023, da Dirección Xeral da Función Pública, pola que se fai pública a relación de persoas admitidas e excluídas con carácter provisional que solicitaron a inclusión na lista única para a cobertura con carácter transitorio de prazas reservadas a persoal da agrupación profesional do persoal funcionario da Administración xeral da Comunidade Autónoma de Galiza, escala de persoal de limpeza e recursos naturais e forestais, especialidade de persoal de limpeza e cociña, ao abeiro do establecido no artigo 4.1 da Orde do 20 de xullo de 2021.
Fan pública a lista provisional única para o desempeño transitorio de prazas reservadas a persoal da agrupación profesional do persoal funcionario da Administración xeral da Comunidade Autónoma de Galiza, escala de persoal de limpeza e recursos naturais e forestais, especialidade de persoal de limpeza e cociña.
As listas poderán consultarse no portal web corporativo da Xunta de Galiza, http://funcionpublica.xunta.gal, epígrafe de <listas de contratación> , e nas oficinas de rexistro e atención á cidadanía da Xunta de Galiza (oficinas dos edificios administrativos da Vicepresidencia Primeira e Consellaría de Presidencia, Xustiza e Deportes).
Nas devanditas listas figura a seguinte información:
– Persoas solicitantes admitidas na lista única, ao abeiro da Resolución do 12 de abril de 2023, procedentes de listas de contratación temporal de categorías profesionais laborais equivalentes, con indicación da puntuación provisional resultante da aplicación do baremo, conforme o establecido no artigo 6 e na disposición transitoria primeira da Orde do 20 de xullo de 2021, en relación co seu artigo 2.
– Persoas solicitantes admitidas na lista única, ao abeiro da Resolución do 12 de abril de 2023, procedentes das solicitudes presentadas no prazo de 2023 nas listas de contratación temporal de categorías profesionais laborais equivalentes segundo o punto sétimo da dita resolución, con indicación da puntuación provisional resultante da aplicación do baremo, conforme o establecido no artigo 6 e na disposición transitoria primeira da Orde do 20 de xullo de 2021, en relación co seu artigo 2.
- Detalles
Función Pública comunicounos que está prevista a próxima publicación da listaxe provisional de admitidos e excluídos das solicitudes que se presentaron para a creación da lista única da agrupación profesional de persoal funcionario da Administración xeral da Comunidade Autónoma de Galicia, escala de persoal de limpeza e recursos naturais e forestais, especialidade de persoal de limpeza e cociña.
No punto sétimo da Resolución do 12 de abril de 2023 pola que se creaba esta lista, se indicaba que se tramitarían como solicitudes desta escala as solicitudes presentadas neste prazo anual das categorías equivalentes (V-001) e (V-011) dado que estas listas pecharán no momento da entrada en xestión na nova lista única.
Deben cumprir cos requisitos esixidos no prazo ordinario para ser admitidas e ademais estar en posesión dos requisitos do artigo 3 da Orde do 20 de xullo de 2021 (DOG do 30 de xullo).
A publicación está prevista para o vindeiro luns 31 de xullo de 2023.
- Detalles
O pasado 27 de xullo tivo lugar unha xuntanza da Mesa Xeral na que se trataron os seguintes asuntos: 1) I Plan de igualdade da Xunta de Galiza; 2) Acordo de integración e carreira profesional do persoal de GAIN. En rogos e preguntas falouse dos concursos de traslados, a integración do Consorcio, dos procesos selectivos en execución e o RD Lei 5/2023.
REMATE DA NEGOCIAICÓN DO I PLAN DE IGUALDADE
O director xeral de Función Pública (DXFP) comezou expoñendo as alegacións que admitiron na derradeira negociación dos documentos do Plan de Igualdade.
Tratáronse os tres documentos que forman parte do Plan de Igualdade e, o martes día 1 de agosto irán a Comisión de Persoal. Os documentos son os seguintes: Diagnose do Plan, Protocolo de acoso e outras violencias no traballo e Medidas do Plan de Igualdade para a súa posible aprobación.
Despois da Comisión de Persoal informaremos ampliamente das nosas consideracións e postura respecto do Plan de Igualdade.
ACORDO DE INTEGRACIÓN DO PERSOAL DO GAIN
Ao respecto do GAIN, a CIG rexeita o modo de proceder da Administración con negociación encuberta cun sindicato e excluíndo aos demais (o DXFP di que era meramente informativa), e a entrega da proposta de Acordo tan só 26 horas antes da súa discusión en Mesa. Levaremos este proceder á nosa asesoría xurídica para a súa valoración.
A DXFP explica que vai iniciar a negociación da integración como persoal laboral da Xunta do persoal laboral que estabilice. Esta negociación será antes de rematar a estabilización (segundo semestre do 2023). Rematada a integración, comezará a funcionarización, que finalizaría no primeiro trimestre do 2024. Incluirían as prazas na OEP-2023.
Abrirán a carreira profesional extraordinario en dous meses para quen acepten integrarse e funcionarizarse. Con efectos económicos a 1/1/2023. A CIG rexeitamos que recoñezan o complemento de carreira só para quen acepte a integración e se funcionarice.
No segundo semestre do 2023 negociarase a RPT do persoal de Gain.
ROGOS E PREGUNTAS
Concursos de traslados
Están estudando as alegacións ás bases do concurso de administración especial (rematarían a semana que ven). As bases estarán en setembro e inmediatamente sairán os buzóns de postos. Están traballando no concurso de enxeñarías e, se é posible, algunha escala máis de especial de Politica Social. Negociarémolo en setembro e publicarano en outubro.
A CIG insistiu en demandar a negociación dos concursos de traslados de todos os corpos e escalas, tanto de administración xeral como especial, co obxectivo de que poida estar resolto antes do 31/12/2024. O DXFP tira balóns fora e négase a poñer datas concretas.
Integración do Consorcio
Preguntamos pola Integración do persoal do Consorcio, ao que o DXFP resposta que "estamos en ello". Di que en setembro traballarán na RPT, e que a funcionarización será posterior.
Procesos selectivos en execución
O 3 outubro tomarán posesión educación social e auxiliares de enfermaría. Tamén publicarán do resto de procesoss (que será en setembro).
Estabilización: publicarán as listaxes definitivas nas vindeiras semanas. O exame de galego será na primeira quincena de setembro (publicarano no DOG nuns días).
Real Decreto Lei 5/2023
Novos permisos: afirma que dende Función Pública enviaron instrucións internas ás consellerías. Algúns permisos son de aplicación directa. Outros necesitan desenvolvemento regulamentario. Di que o permiso de 8 semanas non é retribuido e que precisa desenvolvemento.
Interpretación do artigo 217 (estabilización): di que eles xa foron previsores e deixaron a OEP aberta para incorporar as prazas que ian quedando vacantes dos procesos que se estan a celebrar.
- Detalles
O director xeral de Función Pública (DXFP) convocounos a unha xuntanza da Mesa Sectorial de Persoal Funcionario que será venres 28/97/23, coa seguinte Orde do día: RPT de Sanidade (consecuencia do Acordo do persoal Farmacéutico Inspector). Descargar.
Na documentación non observamos cambios respecto da proposta que xa discutimos coa consellería na xuntanza previa do 18 de xullo.
A documentación inclúe o Acordo de condicións de traballo do persoal FISP, sen cambios respecto da versión anterior.
O DXFP anunciou que o martes 1 de agosto habería unha Comisión de Persoal, pero non o seu contido. Podería ser que ese día quedase aprobada definitivamente a RPT e o Acordo.