- Detalles
O venres publícarase a elección de destino provisional (OEP 2019) e de seguido vaise convocar o concurso de traslados.
E a orde de elección definitiva dos procesos das categorías funcionarizadas do SPIF coas vacantes resultantes do concurso de traslados sería a seguinte:
1. Promoción interna.
2. Destino definitivo OEP 2019.
3. Concurso de méritos lei 20/2021.
Están abertos a buscar unha solución para o persoal que tomou destino provisional mais non se quixo funcionarizar e ten dereito a ter destino definitivo porque non poden quedar nun limbo.
- Detalles
Nunha reunión informativa celebrada o día 9 de outubro, Función Pública comunícanos o seguinte:
CONCURSOS DE TRASLADOS
Prelación das convocatorias que se van publicar:
- Bombeiros/as e persoal SPIF (categorías funcionarizadas).
- Política Social e Consorcio.
- Administración especial.
Fixemos constar que o concurso de traslados de Administración xeral (e as súas escalas) non aparece neste cronograma polo que demandamos que se inclúa.
TOMAS DE POSESIÓN DOS PROCESOS SELECTIVOS
Ao final en Función Pública van entrando en razón e din que van procurar dar tomas de posesión en destino definitivo ao persoal que vai superando os procesos selectivos SEMPRE E CANDO AS PRAZAS PASARAN POR UN CONCURSO DE TRASLADOS INMEDIATO PREVIO. E aclara a orde de prelación de tomas de posesión nos procesos:
1.Concursos de traslados (fase ordinaria con todas as vacantes e de resultas).
2.Eleccións de destino dos aprobados en todos os procesos que agora se atopen en destino provisional.
3.Eleccións de destino dos procesos libres e de estabilización rematados ou aínda en marcha.
4.Eleccións de destino dos procesos de concurso de méritos (lei 20/2021).
5.Eleccións de destino de concurso-oposición (lei 20/2021) [se pasa moito tempo dende o concurso e hai cambios estas últimas poderían ser en destino provisional].
Procurarase que nos catro primeiros a resolución sexa de xeito simultaneo en cada corpo ou escala (por exemplo, no caso de escolas infantís antes de comezo de curso e no caso de bombeiros antes da tempada de máximo risco).
Protestamos pola FALTA DE PROMOCIÓN INTERNA SEPARADA dos corpos xerais, esquecida por Función Pública e a piques de caducar a de 2020, e doutras varias escalas onde os procesos de libre das mesmas OEP´s están convocados e case rematados. Terían que convocarse e rematar antes das citadas no punto 3 pois moitas están derivadas das mesmas OEP´s. Como sempre o persoal da casa o máis maltratado pola Administración da Xunta do PP. Esixímoslle a súa convocatoria inmediata.
NOTA: a CIG fixolle constar a Función Pública que o artigo 12 da lei galega de temporalidade contempla que os destinos dos procesos selectivos derivados da lei 20/2021 serán de carácter PROVISIONAL.
En consecuencia, a Administración debe instar que se modifique dita lei a través da Lei de medidas de próxima aprobación.
- Detalles
Nunha reunión informativa, Función Pública trasladounos á CIG e ao resto de organizacións sindicais varias cuestións de relevancia que afectan ao persoal do Consorcio e de Política Social.
RPTs de Política Social e toma de posesión dalgunhas escalas da OPE social
Van levar ás mesas xerais varias pequenas modificacións de aquí a xaneiro de 2024. Agora anuncian a creación de prazas de escalas que compoñen os equipos de valoración de dependencia e de discapacidade. Con esta modificación van crear prazas de traballadores/as sociais que lles permitan sumalas ás existentes para a toma de posesión provisional desta escala que se pode realizar sobre esas prazas incluso antes de que se modifique a RPT se é preciso. Anuncia o director xeral que iso é para que a toma de posesión evite que salten as persoas interinas pendentes dos procesos de consolidación da lei 20.
A seguinte modificación de RPT desta consellería será a das prazas que se amplían pola aplicación do Acordo de Política Social, 140 (xa que as 5 restantes ou se crearon xa na recente modificación e que solo falta a publicación de 2).
Acordo de condicións de traballo de Política Social
Imos proceder nun prazo breve á sinatura, rexistro e publicación do acordo para formalizar a sua aprobación ante Relacións Laborais e que comece a súa vixencia, e poder comezar a cobrar en novembro as compensacións de 2023.
Curso sobre carteleiras
Ante a queixa que lle fixemos por facer cursos de carteleiras de directores/as de centros sen antes convocar sequera a comisión de seguimento para pactar o modelo de carteleira, dende Función Publica asumen a responsabilidade e din que van convocar a comisión e ademais facer unha nova edición do curso (xaneiro) ante o grande número de persoas interesadas. Recalcamos a necesidade de pactar e logo formar ao cadro de delegados e delegadas e de directores/as para evitar conflitos por diferentes interpretacións.
RPT do Consorcio
Seguen a traballar nela e teñen que actualizar os posibles cambios dende 2021 (supresións, creacións, xubilacións… e actualización de niveis) Houbo risada xeral porque a inutilidade do Consorcio sona e a cachondeo total, mais non nos cremos que sexa casual. FP dixo que “debera estar” para a semana.
Integración do persoal laboral fixo do Consorcio
Para que o persoal laboral fixo do Consorcio poida concursar xunto co resto de persoal funcionario da Xunta de todas as escalas é necesario o seguinte:
PRIMEIRO. Que se integren como persoal laboral fixo da Xunta de Galiza.
SEGUNDO. Que se funcionaricen como o resto do persoal laboral da Xunta (isto é voluntario).
Todo isto vai ser un proceso expres que compre realizalo con axilidade, de aí que a indolencia do Consorcio pareza xa non incapacidade conxénita senón boicot intencionado.
Non son quen de enviar correctamente e con toda a documentación os expedientes das súas traballadoras a Función Pública (e iso que son pouco mais de 200 as fixas do Consorcio). E ata que non se teña toda a documentación non se vai reunir a Comisión de integración.
Función Pública vai requirirlle toda a documentación ao Consorcio, pero nós recomendamos a todo o persoal laboral fixo que estea pendente e que lle esixa ao Consorcio que teña o seu expediente actualizado especialmente no relativo aos procesos selectivos superados e á publicidade dos mesmos.
Sobre todos estes asuntos anuncia xuntanza previa entre finais de outubro e a primeira semana de novembro e será unha negociación rápida.
Tamén se tratará nesa negociación
-Itinerancias.
-Procedemento para o nomeamento das directoras/es das escolas infantís.
-Coordinadores/as.
-Medias xornadas.
- Detalles
En vindeiros días vaise tratar o incremento do importe dos gastos de desprazamento pasando de 0,19 a 0,26 euros/km, tal e como se estableceu con carácter básico tal e como che contamos, é que xa na Administración do Estado se aplica dende o 18 de xullo deste ano.
Aínda así, temos manifestado en varias ocasións que estes importes levan conxelados máis dunha década e sumando a isto o prezo á alza dos carburantes a suba é moi xustiña, sendo benevolentes ao adxetivala.
Función Pública di que van procurar levar á Mesa Xeral e á Comisión de Persoal para a súa aprobación “esta semana ou a que vén”. Pero din que non vai ter carácter retroactivo dende o 18 de xullo como temos demandado senón dende a súa aprobación, co que a parsimonia da Xunta a acaba pagando o persoal que tivo que facer desprazamentos dende o verán ata agora.
O que si parece que van atender é a demanda histórica da CIG de actualizar e eliminar diferenzas das axudas de custo de xantar e aloxamento entre os distintos grupos de clasificación, tendo en conta que non poden sobrepasar o límite para a tributación.
Desta demanda de acabar cunha das diferenzas máis clasistas que aínda existen na administración, imos ver que alcance se lle dá pois non se aportou ningún dato.
- Detalles
Non che imos abafar con moitos datos porque calquera persoa empregada pública pode percibir que unha suba media de 7 euros netos non da nin para mercar un litro de aceite.
Baixo o presuntuoso nome de Acordo para unha administración do século XXI (parece que algunha letra se lles moveu de sitio neste acordo do século XIX), o goberno español, CCOO e UGT pactaron non subir os nosos salarios conforme ao incremento do custe da vida. E na Galiza reproduciron o mesmo o PP, CCOO, UGT e CSIF.
De todo isto xa che fomos detallando as consecuencias dende que asinaron un acordo que ataba de pés e mans ao persoal empregado público en caso dunha esperada suba do IPC.
Pero se ben dicimos que non imos dar moitos datos, algúns si temos que dar para comprender por que esta suposta suba é en realidade unha perda. Tendo incluso en conta as estimacións máis baixas de subida do IPC para o 2023 (as que fai o Banco de España) e reflectindo xa a suba do 0,5%, o panorama é o seguinte:
Perda de poder adquisitivo das persoas empregadas públicas (2022-23)
| Salarios | IPC | Diferenza | |
| 2022 | 3,5% | 5,7% | -2,2% |
| 2023 | 3,0% | 3,6% | -0,6% |
| Total | 6,5% | 9,3% | -2,8% |
A Xunta confirma que levará esta modificación á Comisión de Persoal pero que non vai dar tempo a que se materialice na nómina de outubro, e será para novembro con efectos retroactivos dende o 1 de xaneiro de 2023.
Isto non palía a perda do poder adquisitivo pero os sindicatos amigos seguen dando palmas despois de venderse por unha botella de aceite.
- Detalles
No DOG do 06/10/2023 publican:
- RESOLUCIÓN do 29 de setembro de 2023 pola que se modifica a Resolución do 22 de maio de 2023 pola que se resolve o concurso ordinario para a provisión de postos de traballo vacantes da Administración xeral da Comunidade Autónoma de Galiza, escala superior de finanzas, e do corpo de xestión da Administración xeral da Comunidade Autónoma de Galiza, escala técnica de finanzas, convocado pola Resolución do 14 de xullo de 2021.
Engaden, como anexo III da resolución, os destinos adxudicados na fase de resultas.
- RESOLUCIÓN do 29 de setembro de 2023 pola que se abre o prazo posesorio dos postos adxudicados en virtude da Resolución do 22 de maio de 2023 pola que se resolve o concurso ordinario para a provisión de postos de traballo vacantes da Administración xeral da Comunidade Autónoma de Galiza, escala superior de finanzas, e do corpo de xestión da Administración xeral da Comunidade Autónoma de Galiza, escala técnica de finanzas, convocado pola Resolución do 14 de xullo de 2021.
De conformidade co previsto na Lei 2/2015, do 29 de abril, do emprego público de Galiza, e no artigo 14 do Decreto 93/1991, do 20 de marzo, polo que se aproba o Regulamento de provisión de postos de traballo, promoción profesional e promoción interna, o prazo da toma de posesión comezará a contar a partir do día seguinte ao do cesamento e será de tres días hábiles se non implica cambio de residencia, ou de sete días hábiles se comporta cambio de residencia.
O cesamento deberá efectuarse o día 9 de outubro de 2023.
Se a adxudicación comporta o reingreso ao servizo activo, o prazo de toma de posesión será de vinte días hábiles e empezará a computarse o día 10 de outubro de 2023.
- Detalles
No DOG do 06/10/2023 publican a RESOLUCIÓN do 26 de setembro de 2023, da Dirección Xeral da Función Pública, pola que se anuncia a exposición das listaxes definitivas de axudas aprobadas e denegadas dos criterios de repartición do Fondo de Acción Social do exercicio económico 2022, relativos á axuda para a atención de persoas con discapacidade para o persoal da Administración da Xunta de Galiza.
Fan públicas as listaxes definitivas das axudas aprobadas e denegadas dos criterios de repartición do Fondo de Acción Social do exercicio económico 2022 relativos á axuda para a atención de persoas con discapacidade na páxina web da Dirección Xeral da Función Pública http://funcionpublica.xunta.es/?q=FAS
Para o coñecemento íntegro do acto, os solicitantes deberán introducir nos espazos habilitados para o efecto o NIF e mais o código de impresión da súa solicitude.
- Detalles
Publicación do procedemento actualizado para o Consorcio Galego de Servizos de Igualdade e Benestar
A CIG instou ao Consorcio, no seo do Comité de Saúde Laboral, a que actualizaran o protocolo de actuación nos casos de embarazo das traballadoras das escolas infantís de cero a tres anos
Despois de denuncialo en numerosas ocasións, a CIG conseguiu que o Consorcio Galego de Servizos de Igualdade e Benestar manteña fóra do posto de traballo as embarazadas dende o momento que comunican o seu estado.
Pese a que o risco biolóxico está recoñecido dende o coñecemento do estado do embarazo (Sentenza do Xulgado do Social nº 5 de Vigo e Sentenza do TSXG, sala do Social, gañadas pola CIG) e as traballadoras xa non deben ir ao centro de traballo ao comunicaren o seu estado de xestación, o protocolo de actuación polo que se rexían as direccións dos centros estaba desactualizado dende hai anos.
Isto daba lugar a que algunha das persoas responsables dos centros e tamén a Ibermutua (cando atendía ao teléfono dende outras localizacións fóra da Galiza) non protexeran a saúde da traballadora xestante nin á súa futura descendencia.
Agora, tras pedilo en numerosas ocasións, publícase e dáselle difusión, por fin, ao dito protocolo.
O protocolo telo á túa disposición na wiki:
https://wiki.igualdadebenestar.org/Prevencion+de+Riscos+Laborais#Maternidade_e_lactaci_n
Non esquezas que a wiki é de acceso para todas as traballadoras e traballadores do Consorcio e, no teu centro de traballo, débenche facilitar a chave para acceder.
Se precisas axuda non dubides en poñerte en contacto coa CIG
- Detalles
Na Comisión de Persoal do 29 de setembro a Xunta aproba a orde que desenvolve a flexibilidade por conciliación da Lei de Impulso demográfico sen esforzarse a chegar a acordos coa representación do persoal e sen dar resposta as alegacións presentadas
A Administración aprobou a Orde coa que pretende regular a flexibilidade horaria por conciliación prevista nas diferentes normas estatais e que a Xunta ampliou a 18 anos de idade coa Lei de Impulso Demográfico de Galicia. Un documento engorroso que levaba paralizado moito tempo e que finalmente contou co voto en contra da CIG e coa abstención do resto dos sindicatos.
Esta orde de flexibilidade limita o dereito á conciliación da maioría do persoal empregado público
Deixa fóra do dereito de conciliar directamente ao persoal non docente da Consellería de Educación. Xustifícao a Administración por “ser persoal de atención directa”. Isto pode darnos unha idea sobre como van a proceder co resto do persoal que prestamos servizos en centros con atención a persoas usuarias ou persoal a quendas.
Limita as posibilidades de flexibilizar xa que a dirección do centro pode establecer un marco horario limitado (que pode ser menor que o do servizo).
Marca unha escala de preferencias para acollerse á flexibilidade, deixando claro que para a Xunta a conciliación non é un dereito. Por riba diso, non regulan o prazo anual de solicitude. Con isto quen chega antes podería ter flexibiliadde horaria ou no medio dun curso escolar poderían quitarche a flexibilidade se unha compañeira/o solicitara e tivera unha posición superior na escala de prioridades que establecen.
Non se garante o equilibrio á hora de asumir o dereito, podendo unha persoa flexibilizar toda a xornada e outra só media hora ou incluso nada.
Tampouco resolven se exercer o dereito pode prexudicar ao resto do cadro de persoal porque se negan a establecer medidas de reforzo (como fan outras administracións) e non queren priorizar a busca de medidas organizativas nos propios centros. Con isto as necesidades de servizo van seguir sendo un “caixón de xastre” que servirá para automatizar as denegacións.
Non se definen os termos básicos para evitar interpretacións torticeiras como son o marco horario, o horario de referencia e a propia flexibilización.
A posición sindical
Non se dá entendido como CCOO, UGT e CSIF poden absterse ante unha orde deste calado, que non garante o dereito á flexibilidade a todo o persoal da Administración, admitindo incluso que van quedar máis de 4000 compañeiros/as fóra. A desculpa que dixeron é que é unha orde moi esperada e que había que poñela en marcha xa.
O problema é que esta “posta en marcha” vai servir para limitar a flexibilidade a quen xa a ten e para ter “razóns” para denegar e que, finalmente, o xulgado o teña máis difícil para outorgar o dereito a conciliar.
Contacta coa CIG e reclama os teus dereitos!
- Detalles
No Comité de Seguridade e Saúde Laboral da Consellería de Medio Ambiente, Territorio e vivenda deron de prazo ata o 16 de outubro para aportar suxerencias formativas en materia de PRL.
O 29 de setembro tivemos reunión telemática do CSSL, sen posibilidade de que fose presencial (ante a queixa a Presidenta comprometeuse a dar a opción para o futuro). Se a isto sumámoslle a escasa orde do día sen documentación e a actitude relaxada da reunión telemática o que manifesta é unha clara falta de seriedade coa protección da seguridade e saúde do seu persoal.
Como punto ían as propostas formativas para o ano 2024 no que a Administración non fixo NINGUNHA PROPOSTA, ante o que esiximos que se nos dese un prazo para enviarlles as necesidades (ata o 16 de outubro) e denunciamos que esta consellería se caracteriza pola escasa formación que da o seu persoal.
E por iso, que dende a CIG, solicitamos a realización de convenios entre as Consellerías de Medio Rural, Medio Ambiente e Mar para formación de materias que afectan ao persoal de campo de ambas e que non nos den prazas sobrantes “de caridade”. Tamén que as formacións foran descentralizadas, dun mínimo de 8 horas para poder ser valoradas en procesos selectivos e concursos e que foran avaladas pola EGAP, pero destacar que nestes asuntos obtivemos a calada por resposta.
O que si se aprobou foi a realización dun curso formativo de seguridade nos vehículos.
No apartado de Rogos e Preguntas a CIG fíxolle saber ao Comité de Seguridade e Saúde Laboral da grave situación dos grupos electróxenos existentes nas instalacións das illas que conforman o Parque Nacional das Illas Atlánticas onde existen depósitos de combustibles de 5000 l, e xa non é a primera vez que existen incidentes con traballadores. Denunciamos o último incidente que puido ter consecuencias graves e que tivo lugar fai unhos meses na illa de Ons. Ademais lembrámoslle a Presidenta do Comité, que a Primeira Avaliación de Riscos e o Plan de Acción tivo lugar no ano 2016 onde xa se advirte deste risco e que aínda non se fixo nada ata o día de hoxe (7 anos despois); a Presidenta do comité dixo que non tiña constancia de ningún incidente, non obstante, comprometeuse a recopilar información e tratar de solucionar o problema.
Por un Comité de Seguridade e Saúde Laboral máis útil
Non admitimos que isto quede como unha reunión trimestal de mínimos legais, temos moito que tratar polo que instamos a unha nova convocatoria no que se resolvan asuntos demandados polo persoal como:
1.Cumprir coa ARL e crear dunha vez por todas a centraliña de recepción e avisos.
2. SIMULACRO DE ACCIDENTE xa que temos denuncias de que o botón de SOS das emisoras non funciona.
3. Revisión dos Plans de Accións das ARL. Esiximos que se cubra o Check list da propia avaliación para comprobar o cumprimento.
4. Linternas de calidade e botas (de monte) para realizar vixilancia, cousas simples nas que imos para atrás e que dificultan realizar o traballo habitual con seguridade.
Se queres facernos chegar algunha cuestión tanto en propostas formativa como por outras cuestións de saúde laboral ponte en contacto coa CIG.
