- Detalles
No DOG do 28/02/2022 publican a RESOLUCIÓN do 17 de febreiro de 2022, da Dirección Xeral da Función Pública, pola que se fai pública a relación de persoas excluídas con carácter definitivo das listas únicas para a cobertura con carácter transitorio de prazas reservadas a persoal funcionario de determinados corpos, escalas ou especialidades resultantes da transformación de oficio de listas das categorías profesionais laborais equivalentes, ao abeiro do establecido no artigo 4.2 da Orde do 20 de xullo de 2021.
Fan pública a relación definitiva de persoas excluídas nas listas únicas para o desempeño transitorio de prazas reservadas a persoal funcionario dos corpos, escalas e especialidades que se relacionan no anexo desta resolución, resultantes da transformación de oficio das listas das categorías profesionais laborais equivalentes.
As causas de exclusión por esta razón son por ter acadado a idade de xubilación forzosa ou por non posuír a nacionalidade española nin cumprir as condicións establecidas no artigo 52.1 da Lei 2/2015.
A relación definitiva de excluídos poderá consultarse no portal web corporativo da Xunta de Galiza, http://funcionpublica.xunta.gal, epígrafe de Listas de contratación; no Servizo de Atención e Información á Cidadanía a través do teléfono 012; e nas oficinas de Rexistro e Atención á Cidadanía da Xunta de Galiza (oficinas dos edificios administrativos da Vicepresidencia Primeira e Consellaría de Presidencia, Xustiza e Turismo).
As listas novas do corpo, escala ou especialidade que se enumeran no anexo entrarán en vigor o 1 de marzo de 2022.
ANEXO
Corpos e escalas (persoal funcionario)
A1 208F Escala de facultativos. Especialidade medicina
A1 208G Escala de facultativos. Especialidade psicoloxía
A1 208H Escala de facultativos. Especialidade pedagoxía
A2 208A Escala técnica de facultativos. Especialidade enfermaría
A2 208C Escala técnica de facultativos. Especialidade educadores
A2 208B Escala técnica de facultativos. Especialidade fisioterapia
A2 208E Escala técnica de facultativos. Especialidade traballo social
A2 208D Escala técnica de facultativos. Especialidade terapia ocupacional
B 208J Escala de axentes técnicos facultativos. Especialidade xardín de infancia
C2 20A3 Escala de auxiliares de clínica
- Detalles
No DOG do 28/02/2022 publican a Resolución do 16 de febreiro de 2022, da Dirección Xeral da Función Pública, pola que se acorda o peche e a apertura de determinadas listas para a incorporación de novas solicitudes para a contratación temporal de persoal laboral da Xunta de Galiza e o nomeamento de persoal funcionario interino correspondente a determinados grupos, categorías, corpos, escalas e especialidades.
Relacionan as listas correspondentes aos grupos, categorías, corpos, escalas e especialidades que se encontran abertas e nas cales as persoas interesadas poderán presentar solicitude de inclusión no período comprendido entre o 1 de marzo e o 30 de abril deste ano (anexo III).
Relacionan as listas correspondentes aos grupos, categorías, corpos, escalas e especialidades pechadas e nas cales soamente se poderán inscribir aquelas persoas que, para a lista correspondente, superasen algunha proba do último proceso selectivo do grupo, categoría, corpo, escala ou especialidade, ou teñan prestado servizos na Administración xeral da Comunidade Autónoma de Galiza ou en entidades públicas instrumentais do sector público autonómico que teñan publicadas relacións de postos de traballo para a lista correspondente a ese grupo, categoría, corpo, escala ou especialidade (anexo IV).
ANEXO III Listas abertas
Corpos, escalas e especialidades (persoal funcionario)
A1 208F Escala de facultativos. Especialidade medicina
A1 2062 Escala de enxeñeiros. Especialidade de enxeñaría de camiños, canais e portos
A1 2065 Escala de enxeñeiros. Especialidade de enxeñaría de minas
A1 2066 Escala de enxeñeiros. Especialidade de enxeñaría de montes
A1 2067 Escala de veterinarios
A1 2093-01 Escala de profesores numerarios de institutos politécnicos marítimopesqueiros. Especialidade en lexislación marítima
A1 2093-03 Escala de profesores numerarios de institutos politécnicos marítimopesqueiros. Especialidade en navegación marítima
A1 2093-04 Escala de profesores numerarios de institutos politécnicos marítimopesqueiros. Especialidade en pesca marítima/bioloxía pesqueira
A1 2093-05 Escala de profesores numerarios de institutos politécnicos marítimopesqueiros. Especialidade en inglés marítimo
A1 2093-06 Escala de profesores numerarios de institutos politécnicos marítimopesqueiros. Especialidade en medicina subacuática e hiperbárica
A1 2093-07 Escala de profesores numerarios de institutos politécnicos marítimopesqueiros. Especialidade en intervencións subacuáticas e hiperbáricas
A1 2093-08 Escala de profesores numerarios de institutos politécnicos marítimopesqueiros. Especialidade en comunicacións
A1 2093-09 Escala de profesores numerarios de institutos politécnicos marítimopesqueiros. Especialidade en máquinas e instalacións mariñas
A1 2093-10 Escala de profesores numerarios de institutos politécnicos marítimopesqueiros. Especialidade en procesos sanitarios
A2 208A Escala técnica de facultativos. Especialidade enfermaría
A2 208B Escala técnica de facultativos. Especialidade fisioterapia
A2 208D Escala técnica de facultativos. Especialidade terapia ocupacional
A2 2074 Escala de enxeñeiros técnicos. Especialidade de enxeñaría técnica de obras públicas
A2 2079 Escala de enxeñeiros técnicos. Especialidade de enxeñaría técnica de minas
A2 2094-01 Escala de mestres de taller de institutos politécnicos marítimo-pesqueiros. Especialidade en traballos técnicos de mergullo
A2 2094-02 Escala de mestres de taller de institutos politécnicos marítimo-pesqueiros. Especialidade en máquinas e produción
A2 2094-03 Escala de mestres de taller de institutos politécnicos marítimo-pesqueiros. Especialidade en servizos ao buque
C1 207H Escala de axentes facultativos ambientais (a extinguir)
C1 207C-02 Escala de axentes do Servizo de Gardacostas de Galicia
C1 207V Escala operativa do Servizo de Gardacostas de Galicia. Especialidade patrón.
C1 207W Escala operativa do Servizo de Gardacostas de Galicia. Especialidade mecánico.
C2 20A3 Escala de auxiliares de clínica
Grupos e categorías (persoal laboral)
III 006 Xefe/a de servizos técnicos. Encargado/a de mantemento. Conservador/a de edificios. Encargado/a de oficios varios mantemento. Xefe/a de taller. Encargado/a de traballos. Especialista de oficios
III 014 Xefe/a de cociña
III 065 Oficial 1ª cociña. Oficial 1ª cociñeiro/a. Xefe/a de cociña. Cociñeiro/a 1ª
III 069 Oficial/a de servizos técnicos. Oficial 1ª de mantemento. Oficial 1ª oficios varios. Oficial de primeira
III 090 Animador/a sociocultural
III 104 Intérprete de linguaxe de signos
IV 005 Oficial/a 2ª de cociña. Cociñeiro/a oficial 2ª
IV 006 Axudante/a servizos técnicos. Oficial/a 2ª de mantemento V 001 Camareiro/a-limpador/a. Axudante de cociña. Pasador/a de ferrolavandeiro/a. Costureiro/a. Cortador/a. Pasador de ferro/a. Lavandeiro/a
- Detalles
No DOG do 28/02/2022 publican a ORDE do 18 de febreiro de 2022 pola que se regula o procedemento para o nomeamento como persoal funcionario de carreira do persoal laboral fixo de determinadas categorías profesionais que superou os procesos de funcionarización convocados polas resolucións do director xeral da Función Pública do 7 de febreiro de 2020.
- A partir da publicación desta orde no Diario Oficial de Galicia, o persoal laboral fixo deberá asinar un acordo de extinción do contrato de traballo, consonte o establecido no artigo 7.2 do Decreto 165/2019, do 26 de decembro, polo que se establece o procedemento para a adquisición da condición de persoal funcionario de carreira polo persoal laboral fixo do Convenio colectivo único do persoal laboral da Xunta de Galicia. A extinción estará condicionada á efectiva toma de posesión como persoal funcionario de carreira.
- A toma de posesión como persoal funcionario de carreira, que implicará o cambio do vínculo xurídico coa Administración, será o 1 de marzo de 2022.
- No caso de vacacións, permisos ou licenzas, o prazo para a sinatura do acordo de extinción comezará a contar desde a súa finalización; o día da toma de posesión será o seguinte hábil ao da sinatura do dito acordo. Nos supostos de incapacidade temporal ou incapacidade permanente con reserva de posto, o cómputo do prazo iniciarase a partir da correspondente alta ou reincorporación. Quedan exceptuadas do disposto no parágrafo anterior as situacións derivadas da maternidade ou paternidade.
- O incumprimento dos prazos antes indicados, agás as causas de forza maior debidamente acreditadas e apreciadas pola Dirección Xeral da Función Pública, implicará que a persoa interesada desiste voluntariamente da súa funcionarización e, polo tanto, non se producirá o cambio do seu vínculo xurídico, e manterá a súa condición de persoal laboral fixo e todos os dereitos inherentes á dita condición.
- Segundo o establecido no artigo 8.2 do Decreto 165/2019, o/a traballador/a conservará a situación administrativa que teña recoñecida noutras categorías laborais antes da adquisición da súa condición de persoal funcionario de carreira.
- O persoal que se funcionarice seguirá percibindo en concepto de antigüidade a mesma cantidade que estaba percibindo como laboral fixo nun concepto na nómina á marxe do complemento de funcionarización-persoal.
As persoas que tomarán posesión como persoal funcionario de carreira, ao abeiro do establecido na presente orde, serán as que proveñen das categorías de persoal laboral que aquí se relacionan:
Corpo facultativo superior da Administración especial-subgrupo A1-escala facultativos.
- Especialidade Medicina. Categoría 002 do grupo I (titulado/a superior médico/a, médico/a xeriatra, médico/a CEI).
- Especialidade Psicoloxía. Categoría 006 do grupo I (titulado/a superior psicólogo/a).
- Especialidade Pedagoxía. Categoría 011 do grupo I (titulado/a superior pedagogo/a).
Corpo facultativo de grao medio da Administración especial-subgrupo A2-escala técnica de facultativos.
- Especialidade Enfermaría. Categoría 002 do grupo II (ATS enfermeiro/a, practicante, DUE).
- Especialidade Educadores. Categoría 006 do grupo II (educador/a, profesor/a especial).
- Especialidade Fisioterapia. Categoría 011 do grupo II (fisioterapeuta).
- Especialidade Traballo social. Categoría 017 do grupo II (asistente/a social).
- Especialidade Terapia ocupacional. Categoría 020 do grupo II (terapeuta ocupacional).
Corpo de técnicos de carácter facultativo de Administración especial- grupo B-escala axentes técnicos facultativos.
- Especialidade Xardín de infancia. Categoría 050 do grupo III (técnico/a especialista xardín de infancia).
Corpo auxiliar de carácter técnico de Administración especial-subgrupo C2-escala auxiliares de clínica.
- Categoría 003 do grupo IV (auxiliar sanitario/a, auxiliar clínica, auxiliar psiquiátrico/a).
- Detalles
No DOG do 25/02/2022 publican o Decreto 20/2022, do 24 de febreiro, polo que se modifica o Decreto 37/2006, do 2 de marzo, polo que se regula o nomeamento de persoal interino para o desempeño con carácter transitorio de prazas reservadas a funcionarios e a contratación temporal de persoal laboral da Xunta de Galiza.
A actualización de méritos será realizada anualmente de oficio pola Administración mediante resolución da persoa titular da dirección xeral competente en materia de función pública, que se publicará no DOG. Nesta resolución darase publicidade á lista provisional e as persoas interesadas disporán dun prazo de dez días para reclamaren no caso de non estaren conformes con ela.
Segundo esta modificación, a actualización de méritos xa non será realizada necesariamente no mes de febreiro.
- Detalles
Unha verdade a medias é unha mentira enteira.
A risco de ser pesados, non podemos obviar a insistencia de CSIF en faltar á verdade. Imos ser breves e ir rapidiño.
A CIG gañou tres sentenzas. Non unha como di CSIF. Pero antes de entrar en materia dicir que todas son posteriores a que a Xunta suspendera, por decisión propia e en connivencia cos asinantes, o grao II que tiña que regularse no segundo semestre de 2020 e ter efectos do 1 de xaneiro de 2021.
A primeira sentenza gañada é contra a Orde pola que se regula o grao I, e é do 17/03/2021.
A segunda é contra o Acordo de Concertación (a que cita CSIF) e é do 14/07/2021.
E a terceira é contra a Orde de confección de nóminas, do 26/01/2022.
En todas as sentenzas se recoñece o dereito do persoal interino e temporal á carreira profesional. Na terceira o mesmo dereito ao persoal laboral fixo que non quere funcionarizarse. No primeiro e terceiro caso expresamente no fallo e no segundo nos fundamentos de dereito.
Pero nos tres casos queda claro que se anulan as ordes por non estender o dereito a todo o persoal e en consecuencia, o persoal que xa ten dereito segue cobrando e aos que se lle negou hai que incluílos, como se fixo modificando a LEPG e agora anunciando que van facelo en breve.
O que non explica CSIF é que se as sentenzas da CIG non son beneficiosas, por que eles demandaban exactamente o mesmo?
E repetimos, a proba palpábel de que a carreira non está suspendida para quen xa a ten recoñecida é que a segue cobrando, aínda que, antes CCOO e UGT e agora CSIF soliciten a suspensión e digan que non está en vigor. Se está suspendida como di CSIF, non estaría a Xunta cometendo unha ilegalidade ao seguir manténdoa en vigor e pagando o grao I?
Supoñíamos, na nosa inocencia, que CSIF íase alegrar de que a carreira profesional se estendera a todo o persoal despois de gañar demandas nas que se fundamentaban as nosas pretensións cos mesmos argumentos cos que despois armou CSIF a súa demanda e que foi desestimada. Agora parece que eles están ledos de que lla desestimaran.
Queda claro lector/a, cal é a nulidade de pleno dereito?
- Detalles
Sabemos que moitas persoas están fartas de ver “guerras” entre as organizacións sindicais, neste caso sobre o asunto da carreira profesional. Pero tamén queremos que comprendas que si se difunden bulos ou mentiras, dende a CIG non podemos calar porque iso sería outorgar. A algunhas persoas ás veces isto as leva a pensar iso de “todos os sindicatos son iguais”. Pois non, non somos iguais. E agora CSIF que estivo agochado co asunto da carreira profesional asoma a cabeza para dicir que CCOO e UGT mal pero que a CIG tamén. Así que vamos a aclarar unhas cantas cuestións nas que faltan á verdade.
As sentenzas gañadas pola CIG suspenden o grao I para o persoal funcionario de carreira? NON
Antes de entrar en materia ímosche poñer aquí o fallo da sentenza de 17 de marzo de 2021 contra a Orde onde se desenvolve o grao I:
“Anular, por contraria al ordenamiento jurídico, la mencionada Orden, en la medida en que excluye al personal laboral temporal y a los funcionarios interinos del régimen de carrera profesional establecido y, en consecuencia, reconocer el derecho de estos colectivos a participar en el procedimiento de reconocimiento del grado I de carrera profesional, y condenar a la Administración a estar y pasar por tal declaración.”
Calquera pode entender que si este fallo recoñece o dereito a participar no procedemento do grao I, non pode ao mesmo tempo anular o procedemento e negar o grao I ao persoal funcionario. E calquera pode entender que o sentido do fallo é incluír a todo o persoal no sistema de carreira porque OBRIGA a que eses colectivos poidan participar.
Isto significa, e na práctica o vemos porque o estamos cobrando, que a sentenza non obriga a suspender absolutamente nada, senón a INCLUÍR.
CSIF pediu a nulidade das ordes que regulan a carreira profesional?: SI
Segundo CSIF eles pedían na súa demanda “a estensión de dereitos da carreira profesional do funcionario ao persoal temporal e ao laboral fixo”, sen embargo a CIG pedía “Anular a sección 2ª” do Acordo de Concertación.
É verdade isto? Vexamos que pedía CSIF. Nesta nota súa de outubro de 2020 podemos ler:
E nesta de xaneiro de 2021:
A maiores, e isto si que é unha torpeza xurídica, a demanda de CSIF foi desestimada polo TSXG por incompetencia de xurisdición ao presentar un conflito colectivo cando este asunto afectaba tamén a persoal funcionario.
Pero polo que se ve, os servizos xurídicos do CSIF coincidían cos da CIG en que a técnica xurídica para pedir a extensión do dereito á carreira profesional a todo o persoal era pedir a nulidade/anulabilidade en tanto en canto non se incluía a todo o persoal. En consecuencia, CSIF MINTE cando di que eles non pediron iso.
As mentiras, segundo CSIF
“CIG miente cuando afirma que la sentencia del TSJG no anula la carrera y que lo que hace es reconocer el derecho al personal excluido. “
E que di a CIG na última nota?
O que fai CSIF, igual que fixeron CCOO e UGT antes, é atribuír á CIG algo que non dixemos. O que se anula, e así o dixemos, é a parte do acordo de concertación onde se pacta a carreira profesional. Anula un acordo non a carreira que é un dereito contemplado na lei e desenvolvido a través de varias ordes, como a que desenvolve o grao I, donde precisamente se recoñece o dereito ao persoal excluído, polo que quen minte é CSIF.
E agora pensemos. Unha sentenza da CIG anula a parte do Acordo de Concertación onde CCOO, UGT e FP pactan unha carreira profesional que exclúe ao persoal interino e temporal, é dicir anula un acordo sindical por discriminatorio. Nin anula o dereito á carreira que emana de dúas leis (o EBEP e a LEPG), nin anula o desenvolvemento da carreira, tal e como che explicamos aquí.
Outra sentenza da CIG, a citada arriba, en relación ao sistema extraordinario de acceso ao grao I, anula a orde que o regula e OBRIGA a incluír a todo o persoal. Como explicamos antes, si anula porque obriga a incluír iso significa que NON PODE EXCLUÍR, e que no propio fallo o TSXG lle está dicindo á Xunta o que ten que facer.
E que fixo a Xunta?
Precisamente OBRIGADA polas sentenzas gañadas pola CIG, a Xunta para executalas tivo que recoñecer a carreira profesional como dereito universal facendo o seguinte:
1º Enviando ao Parlamento un proxecto de lei que é aprobado por este ONDE INCLÚE ao persoal interino, e explicitamente recoñece na exposición de motivos que iso se debe as sentenzas nese sentido QUE NÓS GAÑAMOS, e non a demanda fake desestimada de CSIF como conflito colectivo onde tamén pedía anular a carreira pero se equivocou de ámbito.
2º Comunicando (a través de CCOO e UGT) que RECOÑECE que se vai implementar o grao I PARA TODO O PERSOAL, tal e como di a sentenza que gañamos.
3º Recoñecendo, tamén a través da nota de CCOO e UGT, que tamén se vai aplicar ao persoal que non queira funcionarizarse. E isto PORQUE TAMÉN GAÑAMOS ISO e nin se pode obrigar a funcionarizarse para ter dereito á carreira, nin hai que devolver as cantidades cobradas si un non se funcionariza.
Se chegaches con paciencia ata aquí, compañeiro/a é que realmente a ti interésache coñecer que vai pasar coa carreira profesional, non as falsas disputas que queiran plantexar algúns sindicatos.
Probablemente non te estrañe que haxa tres sindicatos que en vez de celebrar que a carreira sexa para todo o persoal intentaran meternos medo dicindo que a carreira se ía deixar de cobrar ou que non estaba en vigor, ou incitando á Xunta á paralizala.
A nós interésanos que o dereito á carreira sexa universal e ISO FOI O QUE CONSEGUIMOS. E si a ti as disputas sindicais sobre a carreira non che interesan... A NÓS TAMPOUCO.
|
E ASÍ SUCEDEU... ...que isto rematou como tiña que rematar (xa había xurisprudencia), polo que cabe lembrar como sucederon os feitos: 1. A Xunta asina con CCOO e UGT un acordo que non recoñece dereitos a parte do persoal e chantaxea a outra parte coa obriga da funcionarización. 2. Sen que haxa sentenza algunha, a Xunta incumpre o acordo ao non convocar o grao I ordinario nin o grao II anticipado. 3. A CIG gaña nos tribunais o dereito de todo o persoal que cumpra os requisitos a participar no grao I da carreira, independentemente do seu vínculo fixo ou temporal. 4. A Xunta non o fai efectivo e ademais segue sen aprobar o acceso ao grao II cando corresponde, co a pasividade de CCOO e UGT e o silenzo de CSIF. 5. A CIG gaña outra sentenza que di que o acordo de concertación é contrario ao ordenamento xurídico (precisamente por excluír a parte do persoal). 6. A Xunta modifica a Lei de Emprego Público recoñecendo o acceso ao persoal interino á carreira debido ás sentenzas gañadas pola CIG. 7. A CIG gaña unha nova sentenza que recoñece que non se pode obrigar ao persoal laboral a funcionarizarse para acceder á carreira e que non se ten que devolver o xa cobrado porque é unha chantaxe. 8. A Xunta acorda e nolo anuncian CCOO e UGT, que o grao I o vai cobrar todo o persoal que reúna os requisitos, que o grao II, despois de paralizalo o vai retomar, e que o persoal que non se funcionarice tamén vai ter dereito. |
- Detalles
A Dirección Xeral de Patrimonio Natural activa o protocolo de vixilancia da gripe aviaria nas aves silvestres sen informar nin revisar EPIS nin indicar as medidas preventivas.
Na CIG solicitamos a convocatoria urxente do Comité de Seguridade e Saúde Laboral da Consellería de Medio Ambiente, Territorio e Vivenda.
Non se informou da alerta ao todo persoal de campo
Non é a primeira vez que se activa a alerta polo risco de gripe aviaria na nosa comunidade, pero si é a primeira vez que se obvia informar e actuar na prevención da saúde do persoal dos Servizos de Patrimonio Natural que se ten que encargar da vixilancia, control, traslado e tratamento de aves migradoras nos centros de recuperación de fauna silvestre.
O virus da gripe aviaria (é un tipo de influenza) ten risco de introducirse nos humanos e de combinarse co virus da gripe común ou A. O risco de contaxio é real para as persoas traballadoras, as súas familias e incluso a transmisión a poboación por eso se activa un protocolo de seguimento europeo. Para evitar que os que traballamos podemos enfermar ou ser fonte de contaxio hai que establecer un protocolo preventivo e EPIs adecuados e informar e formar periodicamente.
A CIG solicita o CSSL e que se tomen medidas preventivas urxentes
Mais dun mes despois se que se activaran as alarmas no país a representación do persoal non temos aínda ningunha información da consellería, por eso os delegados de prevención da CIG solicitamos a convocatoria urxente do Comité de Seguridade e Saúde Laboral e que ao menos se tomen as seguintes medidas preventivas:
1.Información do risco actual e Avaliación de riscos específica e plan de acción con especial coidado de aplicadores, biocidas e EPIS. Formación do persoal en medidas preventivas, desinfección e colocación EPIS.
3. Revisión de vehículos e departamentos para o traslado da fauna e EPIS contaminados.
4.Protocolos específicos de manexo, traslado e control.
5.Revisión de EPIS e Biocidas.
Ourense: o Servizo de Patrimonio Natural leva anos sen cubrir a praza de veterinario/a
É inaceptable coa que está caendo coa pandemia mundial, no Servizo de Patrimonio Natural de Ourense leven anos sen cubrir a praza de veterinario/a fundamental entre outros traballos para o seguimento e control de enfermidades dos animais silvestres, moitas delas transmisibles ás persoas.
Por iso, este 12 de febreiro reunímonos coa Xefatura Territorial e que proceda a cobertura inmediata da única praza de veterinario/a do servizo.
Ademais solicitamos que abrise o acceso ao REXEL ao persoal axente ambiental para o que incluso nos propuxo crear un rexistro por distritos das denuncias. Ao tempo solicitamos o poder consultar o REGIAC e o programa das licenzas de caza e pesca para ter a información necesaria nas gardas e quendas de vixilancia.
- Detalles
O mércores 16 participamos na Comisión de Persoal na que se aprobou a RPT do IET, a segunda de funcionarización, e un acordo sobre o mesmo. En rogos e preguntas falouse dos procesos selectivos e dos concursos de traslados, tanto de corpos xerais como de administración especial.
RPT do Instituto de Estudos do Territorio
Non podemos apoiar a creación de postos coa amortización doutros. E mantemos o resto das nosas alegacións. CIG vota en contra.
Os outros sindicatos (CCOO, CSIF e UGT) din estar en contra da destrución de postos de traballo, pero como neste caso non se destruen máis das que se crean, votan a favor.
Acordo de “acomodación” da segunda RPT de funcionarización de determinadas escalas de administración especial
En coherencia a como se levou a negociación do proceso de funcionarización, votamos en contra.
CSIF tamén vota en contra, mentres que CCOO e UGT votan a favor.
RPT de funcionarización de administración especial de servizos sociais
A proposta que se aprobou na Comisión de Persoal é a mesma que presentaron para a Mesa Xeral. É dicir, que non aceptaron ningunha das nosas alegacións. Non houbo negociación. Non se cumpre o criterio de homoxeneidade de que fala o director xeral. Non nos vale a promesa de que se vai estudar e modificar posteriormente, pois tiveron tempo para facelo (non damos validez a algo que “poderá ser”). A CIG vota en contra. O mesmo vota a CSIF.
Durante a intervención de CCOO tivemos a sensación de que quen falaba era o director de función pública (DXFP), pois fartouse de defender as bondades da proposta. A verdade que non era necesaria a presenza nin a intervención do DXFP, pois xa estaba CCOO para defender a proposta da Xunta e recriminar aos que votamos en contra. Evidentemente CCOO, e tamén UGT, votaron a favor.
Segundo o DXFP a RPT aprobarase no Consello da Xunta do xoves 17, e entrará en vigor o día 1 de marzo.
Cronograma de RPTs (educación, vicepresidencia, consorcio e servizos sociais)
Xa en rogos e preguntas, o DXFP informa de que nas próximas semanas teremos algunha RPT máis, como a de educación e vicepresidencia (e algunha máis non definida). E inmediatamente rematadas estas retomaremos a do consorcio e servizos sociais. Aproveitarán esa rpt para revisar o asunto do persoal de menores e carné de conducir e algunha cuesitón máis sobre política social. Calcula que será durante marzo.
Procesos selectivos en execución
Informa o DXFP que o día 25 publicarán a apertura da fase de concurso duns 7 ou 8 procesos selectivos.
Corpos xerais (concursos e procesos selectivos)
Preguntamos polas datas de toma de posesión do concurso de traslados e dos procesos selectivos que están actualmente en destino provisional, así como as previsións dos procesos que están en execución. O DXFP:
- Concurso: Confirma que o venres se publica no DOG a resolución do concurso.
- En destino provisional: iniciarán o procedemento de elección de destino das persoas de promocion interna e acceso libre que están en destino provisional, que será ao longo de marzo.
- Unha vez feito o anterior comezarán as tomas de posesión de concurso e procesos selectivos. Meterémonos probablemente en abril.
- Procesos selectivos en execución: afirma que comezan os prazos da fase de concurso.
Escalas e administración especial (concursos e procesos selectivos)
Pedimos cronograma dos procesos selectivos que están en execución. O DXFP informa:
- ISSGA: están a traballar para nomear o tribunal (fai uns días solicitaron membros); exames no 2º trimestre deste ano.
- Finanzas: nuns días sae lista definitiva. Traballando na designación do tribunal.
- E só quedarían os procesos convocados en decembro. Agora mesmo teñen 60 procesos en marcha.
Solicitamos a previsión da data do primeiro exercicio do proceso selectivo de escalas sanitarias (que na súa convocatoria non indicaba ningunha estimación). O DXFP comprométese a preguntar a Sanidade e informar noutra xuntanza.
Denunciamos que do concurso de traslados de persoal veterinario enviaran un borrador fai dous anos, a CIG presentou as alegacións correspondentes e non soubemos nada. Varias veces coprometéronse a retomalo, e non cumpriron. Tamén queremos que dean os pasos necesarios para convocar os concursos de todas as escalas e administración especial. O DXFP resposta que están coa RPT de veterinarios (outra vez o mesmo conto), para así poder retomar o concurso. Asegura que teñen intención de convocar o concurso completo para toda a administración especial (incluindo veterinarios). Non da prazos, e non menciona nada das escalas de administración xeral.
- Detalles
O luns 31 de xaneiro saíron publicadas varias resolucións polas que se encomendan a TRAGSATEC traballos de xestión e control de varias áreas de traballo de persoal empregado público da Consellería de Medio Ambiente, Territorio e Vivenda para o 2022
Tragsatec, empresa filial de Tragsa que se adica a servizos técnicos agrarios, con estas encomendas tan só durante o ano 2022 suma 5 millóns de euros para realizar diversos traballos de control e xestión ambiental. A Consellería de Medio Ambiente continúa a externalizar funcións de persoal empregado público a pesar de que recentemente o Tribunal Superior de Xustiza de Galiza, após da denuncia da CIG, anulou as encomendas de control de patrimonio arqueolóxico a esta mesma empresa.
As encomendas de Medio Ambiente son diversas e afectan a varios servizos da consellería que con estas novas contratacions se veñen a reforzar. Así Tragsatec está a realizar dende traballos auxiliares de impacto e avaliación ata actividades de control, competencias claras do persoal funcionario público.
E tamen están a tramitar axudas e autorizacións de instalacións, a recompilación do expediente, coa análise da documentación das solicitudes, o informe ambiental que logo pasan a autorización coa sinatura de funcionarios públicos. Crease así unha clara inseguridade xurídica ao persoal funcionario que ten que asinar un traballo do que non fixo o seguimento ademais de extraer da rede da Xunta expedientes e información sensible. Ademais cuestionamos que unha empresa realice todos os trámites administrativos para instalacións de alto impacto como son parques eólicos ou minería extractiva.
A Consellería de Medio Ambiente fai encomendas ao tempo que nin reforza o cadro persoal nin cubre as vacantes
As de informe de impacto non son as únicas encomendas de servizos que corresponden a funcionarios e funcionarias públicas, son todas como os traballos do servizo de calidade ambiental e do seu persoal inspector ou de Augas de Galiza que se externalizan ao tempo de que esta consellería é campioa en non cubrir as prazas vacantes e moito menos as baixas do seu persoal e ten amortizado numerosas prazas nos últimos anos.
O goberno do PP privatiza servizos públicos empregando as encomendas de xestión
Esta externalización “a contagotas” supon ao fin a privatización dos servizos públicos da Xunta de Galiza conformando unha administración paralela. Medio Rural, Politica Social e Sanidade tamén teñen abondosas encomendas a esta empresa pero hai outras como a do 012 que leva xa a maioria das xestions cidadáns coa Xunta.
Na CIG témolas en estudo para a sua demanda xudicial inmediata, se tes información e queres axudar, ponte en contacto con nós aquí.
Estas son os servizos que se externalizan coas resolucións do 31 de xaneiro:
Encomenda que comprende o servizo técnico cualificado para a análise, xestión, planificación e control da xestión de residuos de Galicia: 544.838,04 €
Outro servizo técnico cualificado para a predición e difusión climatolóxica, o seguimento do estado químico e ecolóxico das augas, o control da calidade do aire e o cambio climático: 2.717.669,10 €
O asesoramento xurídico, económico e de información ambiental en materia de calidade ambiental e cambio climático: 668.250,57 €
- Detalles
En relación ás prazas do concurso que estaban adxudicadas a persoas que se xubilaron, e despois de que llo fixéramos constar a Función Pública esixindo unha reasignación dos postos, finalmente a Xunta o que decidiu ao respecto é o seguinte:
- Coas prazas que foron adxudicadas no concurso a compañeiros/as xubilados/as antes da resolución, se fai unha reasignación. Isto xa se pode observar a través da páxina de Función Pública.
- Coas prazas de orixe destes/as compañeiros/as e que formaban parte do concurso ao ser prazas de resultas, deciden DEIXALAS DESERTAS e retiralas do concurso.
Isto non ten moita lóxica. Esas prazas formaban parte do concurso ao ser prazas de resultas, son prazas que agora están vacantes por xubilación, que foron solicitadas no concurso e que o xeito ordinario de cubrilas e mediante concurso, precisamente o que está en marcha.
Manifestámoslle a Función Pública o noso desacordo con isto e esperamos que corrixan esta decisión.
E sobre as persoas que non validaron a solicitude e que constan como concursantes pero con cero puntos, Función Pública finalmente decide que ao ter todos os postos un requisito de puntuación mínima non pode adxudicalos a ninguén que teña cero puntos, incluso no caso de postos aos que só concursou unha desas persoas ou que habendo máis dun concursante quedaron desertos.
A excepción serían aquelas persoas que tiñan a obriga de concursar, ás que se lles adxudicará unha praza de oficio. Tanto nun caso como noutro a Administración se ampara en que non se poden saltar as bases do concurso.
Outro asunto de grande importancia é que dos postos ofertados en resultas hai algúns que retiran do concurso porque pretenden amortizalos. As bases do concurso din que "A adxudicación dun posto de resultas estará condicionada a que o dito posto sexa de necesaria cobertura". Este epígrafe foi un dos aspectos aos que a CIG se opuxo durante a negociación, pero mantiverono igualmente. Para a CIG, se un posto está na RPT, é un posto necesario, e por tanto teñen que ofrecelo. A cacicada vai acompañada da desilusión que veñen que provocar nalgunha xente que fai uns días aparecía cun posto adxudicado, e uns días despois xa non.