- Detalles
A última hora da véspera da asamblea, a Xunta de Galiza veta o acceso a San Caetano a máis de 120 axentes ambientais a unha asemblea autorizada para este xoves 6 de xullo, polo que tiveron que trasladarse para un salón da EGAP (Escola Galega de Administración Pública en Fontiñas). Estas funcionarias/as públicos con horarios de 00 a 24 horas tiveron que facer quendas para poder acudir dende toda Galiza á asemblea convocada.
A cancelación da sala por parte da Xunta foi un claro intento de desmobilización porque acumula numerosos incumprimentos do Acordo de condicións de traballo de 2018 conquerido despois dunha folga que durou varios meses.
Na actualidade, 543 axentes ambientais traballan nos Distritos Ambientais da Dirección Xeral de Patrimonio Natural (156) e, na Consellería de Medio Rural nos Distritos Forestais (387), de non se ter amortizado prazas e de ter cuberto todas as vacantes o numero sería maior.
Cunha alta porcentaxe de temporalidade, a necesidade de procesos selectivos foi unha das cuestións que máis se demandaron. Preocupa tamén a intención da Consellería de Medio Rural de reordenación e división do persoal dos Distritos forestais cun empeoramento das condicións laborais e do servizo público. A negativa da Xunta de convocar o grupo B e manter a rebaixa profesional foi outra das cuestións que centraron o debate.
Con todo estas foron as conclusións máis destacables:
- Convocatoria urxente de procesos selectivos (concurso-oposición) das 56 prazas das OEP 2020 e 2022, e oferta de todas as vacantes (máis de 130) contando tamén coas numerosas xubilacións. Tamén compre solución as prazas non convocadas do C2 da oferta de estabilización da lei 20/2021 e as que negou por ser da DA8ª.
- Concurso de traslados, sen mobilidade dende hai mais de 10 anos.
- Negociación do regulamento da escala de axente técnico en xestión ambiental. Tal como se comprometeu a Administración tras a sinatura de diversos acordos (un no ano 2016 e outro no ano 2018).
- Activar o grupo B, que é o que esta previsto na Lei de Emprego e no TREBEP para a titulación requirida da escala. O acordo de 2016 comprometía a Administración a que unha vez que reciclara a titulación o 40% do persoal, se convocaría o proceso de promoción interna. Esta porcentaxe esta máis que superada pero a Xunta segue incumprindo os seus acordos co escusa de que se necesita unha regulación específica do goberno estatal cando noutras administracións non hai problema para aplicar o B.
-OPE parlamento Galiza DOG nº 67 mércores 5 de abril 2023 Escala: técnica de mantemento de infraestruturas. Grupo B
-Concello da Coruña 29/07/2021 Elaboración de listaxes de persoal funcionario interino para cobertura de prazas de Técnico superior de informática Grupo B.
-Consello consultivo de Galiza 3/5/2019 informe sobre a creación no concello de Santiago Escalas encadradas no Grupo B. Para a creación do novo grupo B chega por medio dunha modificación da RPT - Necesidade de creación de prazas comprometidas pola Xunta e que viñan previstas nas medidas 26 e 27 do ditame do Parlamento Galego do ano 2017 con motivo da vaga de lumes e das que non creou ningunha.
- Rematar coa discriminación do persoal axente ambiental do AGACAL que traballa na EIF de Lourizán.
- Plan Formativo conxunto con acceso a todo o persoal da escala.
E, sobre a pretensión manifestada por Medio Rural de división do persoal dos distritos forestais concluíuse cun NON ROTUNDO á DIVISIÓN e un SI á ESPECIALIZACIÓN.
Se a Administración non avanza nos compromisos adquiridos nos acordos asinados no 2016, 2017 e 2018, xa hai máis de 5 anos, ou vai adiante cunha división da escala con retrocesos laborais, vai ter conflito inmediato asegurado, e xa se estudan as primeiras accións de loita para o mes de setembro.
- Detalles
No DOG do 07/07/2023 publican:
- RESOLUCIÓN do 5 de xullo de 2023 pola que se convoca o proceso selectivo para o ingreso, pola quenda de acceso libre e promoción interna, no corpo superior de Administración xeral da Comunidade Autónoma de Galiza, subgrupo A1, escala superior de estatísticos.
O sistema selectivo será o de oposición. O obxecto do proceso selectivo será cubrir seis (6) prazas.
Titulación: estar en posesión ou en condicións de obter o título de licenciado ou graduado nunha titulación de calquera rama na data de finalización do prazo da presentación das solicitudes de participación.
O prazo para presentar as solicitudes será de vinte (20) días hábiles, que se contarán a partir do seguinte ao da publicación desta convocatoria no DOG.
- RESOLUCIÓN do 5 de xullo de 2023 pola que se convoca proceso selectivo para o ingreso, pola quenda de acceso libre e de promoción interna, no corpo superior de Administración xeral da Comunidade Autónoma de Galiza, subgrupo A1, escala de letrados.
O sistema selectivo será o de oposición. O obxecto do proceso selectivo será cubrir dez (10) prazas.
Titulación: estar en posesión ou en condición de obter o título universitario oficial de licenciado ou grao en dereito na data de finalización do prazo da presentación das solicitudes de participación.
O prazo para presentar as solicitudes será de vinte (20) días hábiles, que se contarán a partir do seguinte ao da publicación desta convocatoria no DOG.
- RESOLUCIÓN do 5 de xullo de 2023 pola que se convoca o proceso selectivo para o ingreso, pola quenda de acceso libre e de promoción interna, no corpo superior da Administración xeral da Comunidade Autónoma de Galiza, subgrupo A1, escala de sistemas e tecnoloxía da información.
O sistema selectivo será o de oposición. O obxecto do proceso selectivo será cubrir dezaseis (16) prazas.
Titulación: estar en posesión ou en condicións de obter o título de licenciado ou graduado nunha titulación de calquera rama na data de finalización do prazo da presentación das solicitudes de participación.
O prazo para presentar as solicitudes será de vinte (20) días hábiles, que se contarán a partir do seguinte ao da publicación desta convocatoria no DOG.
- RESOLUCIÓN do 5 de xullo 2023 pola que se convoca o proceso selectivo para o ingreso, pola quenda de acceso libre e de promoción interna, no corpo superior da Administración xeral da Comunidade Autónoma de Galiza, subgrupo A1, escala superior de orientación laboral.
O sistema selectivo será o de oposición. O obxecto do proceso selectivo será cubrir seis (6) prazas.
Titulación: estar en posesión ou en condición de obter, o día de finalización do prazo de presentación de solicitudes, o título de licenciada/o ou graduada/o nunha titulación de calquera rama.
O prazo para presentar as solicitudes será de vinte (20) días hábiles, que se contarán a partir do seguinte ao da publicación desta convocatoria no DOG.
- RESOLUCIÓN do 5 de xullo de 2023 pola que se convoca o proceso selectivo para o ingreso, pola quenda de acceso libre e promoción interna, no corpo de xestión da Administración xeral da Comunidade Autónoma de Galiza, subgrupo A2, escala de orientación laboral.
O sistema selectivo será o de oposición. O obxecto do proceso selectivo será cubrir centro trinta (130) prazas.
Titulación: Estar en posesión ou en condición de obter o día de finalización do prazo de presentación de solicitudes o título de diplomado ou graduado nunha titulación de calquera rama.
O prazo para presentar as solicitudes será de vinte (20) días hábiles, que se contarán a partir do seguinte ao da publicación desta convocatoria no DOG.
- RESOLUCIÓN do 5 de xullo de 2023 pola que se convoca o proceso selectivo para o ingreso, polas quendas de acceso libre e promoción interna, no corpo de xestión da Administración xeral da Comunidade Autónoma de Galicia, subgrupo A2, escala de inspección turística.
O sistema selectivo será o de concurso-oposición. O obxecto do proceso selectivo será cubrir sete (7) prazas.
Titulación: estar en posesión ou en condición de obter o día de finalización do prazo de presentación de solicitudes o título de diplomado ou graduado nunha titulación de calquera rama.
O prazo para presentar as solicitudes será de vinte (20) días hábiles, que se contarán a partir do seguinte ao da publicación desta convocatoria no DOG.
- RESOLUCIÓN do 5 de xullo de 2023 pola que se convoca o proceso selectivo para o ingreso, pola quenda de acceso libre e de promoción interna, na escala técnica de condución do corpo de axudantes de carácter facultativo de Administración especial da Administración xeral da Comunidade Autónoma de Galiza, subgrupo C1.
O sistema selectivo será o de oposición. O obxecto do proceso selectivo será cubrir vinte (20) prazas.
Titulación: estar en posesión ou en condición de obter o título de bacharel ou equivalente e os carnés de tipo C e de tipo E. Así mesmo, observarase o establecido na Orde EDU/1603/2009, do 10 de xuño, pola que se establecen equivalencias cos títulos de graduado en educación secundaria obrigatoria e de bacharelato regulados na Lei orgánica 2/2006, do 3 de maio, de educación, modificada mediante a Orde EDU/520/2011, do 7 de marzo.
O prazo para presentar as solicitudes será de vinte (20) días hábiles, que se contarán a partir do día seguinte ao da publicación da presente convocatoria.
- RESOLUCIÓN do 5 de xullo de 2023, da Dirección Xeral da Función Pública, pola que se deixa sen efecto a Resolución do 10 de febreiro de 2023 (DOG núm. 35, do 2 de febreiro), que declaraba deserto o proceso selectivo para o ingreso, pola quenda de promoción interna, no corpo facultativo superior de Administración especial da Administración xeral da Comunidade Autónoma de Galiza, subgrupo A1, escala de facultativo de arquivos, bibliotecas e museos, especialidade de museos, retrotraendo as actuacións á convocatoria realizada pola Resolución do 30 de marzo de 2022 (DOG núm. 65, do 4 de abril) e abrindo un novo prazo para presentar as solicitudes.
Ábrese un novo prazo de vinte (20) días hábiles para presentar as solicitudes, que se contarán a partir do seguinte ao da publicación desta resolución no DOG. Dentro deste prazo as persoas aspirantes deberán presentar a súa solicitude electronicamente dirixida á Dirección Xeral da Función Pública, a través da plataforma FIDES (https://fides.xunta.gal).
- Detalles
O ano pasado afirmou que todas as horas extras traballadas polo persoal do SPIF durante a vaga de lumes do pasado verán serían compensadas
A realidade é que a día de hoxe parte do persoal do servizo de incendios segue sen cobrar e sen desfrutar a compensación en tempo de traballo establecida
Na nómina de decembro do ano pasado fóronlle aboadas a unha parte do colectivo as horas de prolongación realizadas na extinción de lumes entre o 14 de xullo e o 31 de agosto de 2022. Pero non a todos. Como pode ser isto se todo o persoal que aceptou prolongar a súa xornada para loitar contra as nefastas consecuencias dos gravísimos incendios realizou o mesmo esforzo e arriscou a súa seguridade por igual?
Non hai ningún criterio obxectivo para realizar esta discriminación e a Consellaría do Medio Rural non dá ningunha explicación para este agravio entre o persoal do servizo de incendios.
Dende a CIG xa manifestamos que non se debían pagar as horas extras e que tiñan que compensar a súa totalidade en tempo de descanso, pero coma sempre a Consellería fixo caso omiso da recomendación.
A día de hoxe dende a Consellaría non dan explicacións convincentes deste caos e vai pasando o tempo. Ante isto e para evitar que pase o prazo dun ano dende a realización das horas extraordinarias, dende a CIG recomendámosvos a todas e todos os compañeiros/as que non cobraron que presenten unha reclamación previa de cantidades antes de que cumpra o ano da súa realización.
Se queres reclamar contacta cos delegados/as da CIG para que te faciliten o modelo.
CONSELLEIRO: PAGA O QUE DEBES
- Detalles
As seis semanas adicionais por maternidade, tamén para a paternidade
O TSXG estima que o empregado público denunciante ten tamén dereito a 6 semanas adicionais ás 16 do permiso de paternidade, a cargo da administración pública e en igualdade de condicións que o permiso de maternidade das mulleres.
O Tribunal de primeira instancia de Vigo de primeiras fallou en contra do traballador, mais unha vez recorrido pola CIG diante do Tribunal Superior de Xustiza de Galiza, este revogou a sentenza inicial en contra, estimando a demanda nos seguintes termos:
«...sobre DEREITOS DE CONCILIACIÓN DA VIDA PERSOAL, FAMILIAR E LABORAL, debemos revogar e revogamos a resolución recorrida, estimando a demanda e declarando o dereito do actor a desfrutar dun permiso por nacemento de fillo de proxenitor non xestante de 22 semanas de duración, e non das 16 semanas recoñecidas, condenando á ENTIDADE DEMANDADA a estar e pasar por esta declaración e a que lle recoñeza o dereito a desfrutar das 6 semanas non recoñecidas, con todos os efectos legal e regulamentariamente establecidos...»
O TSXG considera que hai discriminación indirecta por razón de sexo na situación en que una disposición, criterio o práctica aparentemente neutros pon a persoas dun sexo en desvantaxe particular con respecto a persoas doutro.
Basea a súa sentenza nos dereitos de conciliación e a corresponsabilidade, na Lei de emprego público de Galiza, no Real Decreto-Lei 6/2019, de 1 de marzo, de medidas urxentes para garantía da igualdade de trato e de oportunidades entre mulleres e homes no emprego e a ocupación, establecendo idéntica duración para o permiso por nacemento da nai biolóxica que para o permiso derivado do nacemento para o proxenitor distinto da nai biolóxica, así como nas directivas europeas de aplicación.
A CIG comprometida na conciliación e a corresponsabilidade familiar nos labores de coidados.
Reclama os teus dereitos!!
- Detalles
No DOG do 05/07/2023 publican:
- RESOLUCIÓN do 30 de xuño de 2023, da Dirección Xeral da Función Pública, pola que se aproban e se fan públicas as listaxes provisionais de persoas admitidas e excluídas ao proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso, para o ingreso no corpo administrativo da Administración xeral da Comunidade Autónoma Galiza e no corpo de axudantes de carácter facultativo de Administración especial da Administración xeral da Comunidade Autónoma de Galiza, (subgrupo C1), e para o ingreso no corpo de técnicos de carácter facultativo de Administración especial da Administración xeral da Comunidade Autónoma de Galiza, (subgrupo B).
- RESOLUCIÓN do 30 de xuño de 2023, da Dirección Xeral da Función Pública, pola que se aproban e se fan públicas as listaxes provisionais de persoas admitidas e excluídas ao proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso no corpo administrativo da Administración xeral da Comunidade Autónoma Galiza e no corpo de axudantes de carácter facultativo de Administración especial da Administración xeral da Comunidade Autónoma de Galiza (subgrupo C1), e para o ingreso no corpo de técnicos de carácter facultativo de Administración especial da Administración xeral da Comunidade Autónoma de Galiza (subgrupo B).
As persoas aspirantes poderán consultar o estado das solicitudes de inscrición presentadas e a situación como admitidas ou excluídas en fides.xunta.gal
A listaxe completa de persoas aspirantes admitidas e excluídas, con indicación da causa determinante da súa exclusión, poderase consultar no portal web corporativo funcionpublica.xunta.gal
Así mesmo, e segundo a base I.4 das que rexen o proceso selectivo, nesta listaxe figuran as persoas aspirantes que teñen pendente de acreditar que están en posesión do Celga requirido.
As persoas aspirantes excluídas, as que non figuren en ningunha das listaxes, así como aquelas persoas que non acreditaron estar en posesión do Celga requirido, disporán dun prazo de dez días hábiles, contados a partir do día seguinte ao da publicación desta resolución no DOG, para reclamar ou emendar o defecto que motivou a exclusión, ou acreditar que posuían antes do día de finalización do prazo de presentación de solicitudes de participación no proceso selectivo o Celga 4 ou equivalente, debidamente homologado.
Carreira profesional: o director xeral de Función Pública declárase insumiso ante o Tribunal Supremo
- Detalles
Na Mesa Xeral do 30 de xuño a CIG volveu esixir a Función Pública que acate a providencia do Tribunal Supremo que confirma a sentenza que declarou ilegal a chantaxe da funcionarización do persoal laboral fixo para acceder á carreira profesional (complemento de desempeño)
Tralo recente pronunciamento do Tribunal Supremo a favor da CIG, a sentenza gañada contra a Orde de confección de nóminas de 2019 adquiriu plena firmeza, de xeito que a chantaxe da funcionarizacion é ilegal, ao tempo que otorga ao persoal laboral fixo o pleno dereito a carreira profesional.
Diante desta labazada xudicial, na Mesa Xeral do 30 de xuño a CIG solicitoulle a Función Pública o seguinte:
1. Que abran un periodo extraordinario con efectos económicos de 2019 para o persoal laboral que non aceptou o compromiso de funcionarización.
2. Que se reactive de oficio, coa percepción dos atrasos correspondentes, o pagamento do grao 1 da carreira a todas aquelas persoas ás que llo suspenderon por non funcionarizarse.
3. Que eliminen a chantaxe no complemento de desempeño da nova carreira.
O director xeral de Función Pública di que discrepa da sentenza e basicamente anunciou que non ía facer nada porque nos fundamentos da mesma non di nada sobre a funcionarización. Desculpas de mal pagador, nunca mellor dito. Convidámosche a que leas a providencia do Tribunal Supremo aquí.
- Detalles
Función Pública decide tirar para adiante co máis recente (OEP-2022), e deixa na neveira o máis atrasado, incluíndo a promoción interna e acceso libre das OEP do 2020 e 2021
A Comisión de Persoal do martes 4 de xullo aprobou as convocatorias dos procesos selectivos ás seguintes escalas de persoal funcionario: orientación laboral (subgrupos A1 e A2), inspección turística (A2), condución (C1), sistemas e tecnoloxía da información (A1), letrados (A1), estatística (A1).
A maioría destes 7 procesos correspóndense coa Oferta de Emprego Público (OEP) do ano 2022. Está ben que os movan, pero .. temos pendentes outros procesos da OEP do 2020 e do 2021 que habería que convocar antes. Dos que van neste lote, queremos destacar as presas que teñen cos seguintes:
- Convocatoria de sistemas e tecnoloxía da información (A1). Son 16 prazas, da OEP do 2022, que convocan agora cando están pendentes de convocar outras 8 prazas de promoción interna da OEP anterior (do 2021).
- Convocatoria de orientación laboral. Estas escalas de A1 e A2 son novas, vai ser a primeira vez que se convoquen. Foron cubertas interinamente por primeira vez en febreiro deste mesmo ano 2023, e se corresponden coa OEP do ano 2022. Por tanto, en comparación a outras prazas de anos anteriores, estas son as que menos presa teñen en ser convocadas, e van ir de primeiras.
A CIG solicitou a retirada da proposta de convocar procesos da Oferta de 2022, e nos centrásemos en convocar o máis atrasado, entre o que está a promoción interna separada pendente do 2020 e 2021. Por facer unha relación rápida, van unhas notas do pendente do 2020:
- De promoción interna: corpo superior, corpo de xestión, corpo administrativo, corpo auxiliar.
- De acceso libre: delineantes, axentes técnicos en xestión ambiental, recursos naturais e forestais, mantemento de servizos, análise de laboratorio, PSX, auxiliar de arquivos, limpeza e cociña.
Estas convocatorias deste lote teñen en común as seguintes características:
- Acceso mediante oposición (a CIG defendeu o concurso-oposición). A última hora, o director de Función Pública acepta cambiar a concurso-oposición o proceso de turismo.
- Promoción interna:
- Vai ser do 25% da oferta, conxunta coa oferta libre (CIG quere promoción interna separada, co 50%).
- En letrados van permitir a promoción interna horizontal, dende calquer escala de A1. Isto é algo que a CIG pide sempre, e queremos que o estendan ao resto dos procesos.
- Nalgunha das convocatorias van permitir a participación do persoal laboral fixo en promoción horizontal dende calquera categoría do grupo equivalente. Queremos que tamén poida participar o persoal funcionario nesa promoción horizontal dende calquera escala.
- Sen criterio uniforme, nalgunhas convocatorias permiten a promoción horizontal dende calquera escala do subgrupo inferior, e noutras só permiten dende algúnhas escalas. Defendemos que permitan dende todas, sempre con reciprocidade.
- Os destinos serán provisionais. Para poder dar destino definitivo, queremos negociar TODOS os concursos de traslados, co obxectivo de telos rematados a 31/12/2024.
- Exercicios:
- As mesmas partes do programa están a entrar repetidamente en diferentes exercicios. Queremos que os exercicios eliminen materia.
- Queremos a substitución de temas por test.
- Nos exercicios que teñen 2 partes, rexeitamos que estas teñan cortes individuais, pois en realidade son exercicios diferentes.
- Cando haxa 2 exercicios, un test e outro temas, que non puntúen igual, senón o dobre o test sobre temas.
- Fixan corte no primeiro exercicio. Queremos que tamén o fixen nos sucesivos.
Estas son as convocatorias aprobadas:
A2. TURISMO (7 prazas da OEP-2020, das que 2 son para promoción interna).
Ao longo da negociación, a CIG lembrou que o Decreto 40/2001 establece que o acceso a esta escala será mediante o sistema de concurso-oposición. E finalmente o director xeral de Función Pública (DXFP) acepta o cambio no minuto previo á votación, polo que a CIG solicita a retirada do punto e proceder a discutir a fase de concurso. O DXFP non acepta. Descargar. Voto: CIG en contra, CCOO abstención, CSIF abstención, UGT en contra.
A1. LETRADOS (10 prazas das OEP de 2020, 2021 e 2022, das que 2 son para promoción interna)
Advertimos en todas as xuntanzas sen éxito que na OEP-2022 reservaba unha praza para persoas con discapacidade. Conformes con permitir a promoción interna horizontal dende calquera A1, e vertical dende calquera A2. Conformes que o tribunal facilite textos legais e xurisprudenciais. Manteñen un modelo inadecuado (OEP-2019, ocupadas 2 de 8 ofertadas). Excesivas probas, excesivos temas, excesivas lecturas. Non hai diferenzas entre libre e promoción interna. Non hai nota de corte. Descargar. Voto: CIG, CCOO e CSIF en contra, UGT abstención.
A1. INFORMÁTICA (16 prazas da OEP de 2022, das que 4 son para promoción interna)
Non aceptan paralizar esta convocatoria ata traer e aprobar primeiro a convocatoria coas 8 prazas de promoción interna pendentes da OEP do 2021. Descargar. Voto: CIG, CCOO, CSIF e UGT en contra.
A1. ESTATÍSTICA (8 prazas da OEP de 2021 e 2022, das que 2 son para promoción interna)
Ten excesivos exercicios, o primeiro con corte en cada unha das dúas partes. Descargar. Voto: CIG, CCOO e CSIF en contra, UGT abstención.
A1. ORIENTACIÓN LABORAL (6 prazas da OEP do 2022, das que 2 son para promoción interna)
Permiten a promoción do persoal laboral fixo de calquera categoría dos grupos I e II, e de calquera escala de A2, pero non outras escalas de A1. Descargar. Voto: os catro sindicatos en contra
A2. ORIENTACIÓN LABORAL (130 prazas da OEP do 2022, das que 32 son para promoción interna)
Permiten a promoción do persoal laboral fixo de calquera categoría dos grupos II e III, e de calquera escala de C1, pero non outras escalas de A2. Descargar. Voto: os catro sindicatos en contra
C1. CONDUCIÓN (20 prazas da OEP de 2022, das que 5 son para promoción interna)
Permiten a promoción do persoal laboral fixo de calquera categoría do grupo III, ao tempo que exclúen ao persoal funcionario doutras escalas de C1 e case todas de C2. Para o desempate, despois de aplicar a infrarrepresentación feminina xa pasamos ao chou da letra do primeiro apelido (non aceptaron desempatar pola puntuación das dúas probas do exercicio). Descargar. Voto: CIG, CCOO, CSIF e UGT en contra.
Segundo a información que nos traslada o DXFP, estas convocatorias serán publicadas no DOG do venres 7 de xullo.
- Detalles
O martes 4 de xullo foron aprobadas en Comisión de Persoal (CP) as modificacións das Relacións de Postos de Traballo (RPT) seguintes. Previamente foron discutidas en Mesa Xeral do 30/06/23.
RPT DE POLÍTICA SOCIAL
Reconvirten e amplían a xornada de traballo a 4 prazas que pasan a xornada completa para auxiliar de clínica, para ofrecelas en elección de destino. CIG, CCOO, CSIF e UGT votamos a favor. Descargar.
RPT DE ATRIGA
Agradecemos as formas na negociación coa representación da Administración. CIG, CCOO, CSIF e UGT votamos a favor. Descargar.
RPT DE AUGAS DE GALIZA
Ante as reiteradas peticións de información e de documentación, como é o informe favorable da D.X. de Planificación e Orzamentos, o director xeral de Función Pública só se lle ocorre respostar que a CIG ten un exceso de celo. Unha vez mais, os responsábeis políticos de dirixir á Administración Autonómica mostra a sua falta de vontade de transparencia e de facilitar a información requerida pola CIG.
Esta RPT ten un custe de máis de 450.000 €, e queren financiala agora con amortizacións de postos “en diferido”: cando se xubilen as persoas titulares dos postos. Na liña dos finiquitos en diferido.
CIG vota en contra. CCOO, CSIF e UGT votan a favor. Descargar.
RPT DE AGADIC
Rexeitamos a retirada dos pluses do persoal tremoeiro. Rexeitamos o traslado dun posto de mestre gaiteiro de Coruña a Compostela (debe ser creación e amortización). CIG, CCOO e CSIF en contra. UGT a favor. Descargar.
- Detalles
Na Mesa Xeral do 30 de xuño e na Comisión de Persoal do 4 de xullo Función Pública informou de varias cuestións:
O 5 de xullo sairá no DOG:
- as listaxes provisionais do C1 do proceso de estabilización (Lei 20/21) por concurso de méritos (2052 solicitudes) e por concurso oposición (4727 solicitudes)
- o baremo definitivo de A2-finanzas
- o baremo provisional de A1 enxeñería agronómica libre e estabilización
O 7 de xullo sairá no DOG:
- superación do curso selectivo e nomeamento provisional de C2 auxiliar admvo que entraron con posterioridade.
- as sete convocatorias aprobadas hoxe na CP (A1 e A2 orientación laboral, A2 inspección turística, C1 condución, A1 informática, A1 letrados/as e A1 estatística)
O 11 de xullo sairá no DOG:
- elección de destino de A2 educadores/as.
- baremo provisional de enxeñería técnica agrícola de libre e estabilización.
Auxiliar de clínica da lei 20/21: a publicación da listaxe provisional non será antes do 8 de xullo.
Quedarían pendentes de publicación rápida o baremo definitivo do A1 Finanzas libre e PI e o baremo provisional de A1 escala de seguridade no traballo, hixiene industrial e ergonomía e do A2 escala de seguridade no traballo e hixiene industrial.
Tamén probablemente para a semana que vén publicarán as listaxes provisionais do C2 da lei 20/21 de concurso e concurso oposición. Posteriormente publicarían as listaxes provisionais da agrupación profesional.
O obxectivo é tentar publicar todas as listaxes neste mes para que o prazo dos dez días de alegacións remate neste mes de xullo ou como moito na primeira semana de agosto. Neste último caso farían unha pequena modificación na resolución habitual nos últimos anos do inhábil do mes de agosto.
Elección de destino de Traballo Social e OEP Social: Están a traballar na RPT de Política Social, crearán algunha praza máis de traballador/a social e ofertaríana na elección de destino. Semana que vén ou seguinte traerán a mesa. Con respecto ao posible adiamento das tomas de posesión a setembro, o que primeiro queren é resolver a elección de destino e unha vez resolta farán as consultas correspondentes coas consellerías afectadas e cos propios sindicatos para tomar a decisión que se considere máis adecuada nese momento.
Persoal subalterno con discapacidade intelectual en destino provisional dende maio de 2021: están a traballar nun catálogo de postos para as tomas de posesión. Informan que a este persoal se lle está a dar unha formación específica e que hai escalas que levan máis tempo en provisional.
Persoal laboral indefinido: o DXFP manifesta que non van permitir excedencias para o persoal laboral indefinido que aprobe un proceso selectivo.
Procesos selectivos do SPIF do 2019: na semana que vén ou na seguinte sairá no DOG o baremo definitivo tanto do C2 emisorista, bombeiro forestal conductor de motobomba e bombeiro forestal.
Adscricións de persoal laboral do SPIF en prazas de funcionarios: di o DX que o fan así por necesidade polo máximo risco de incendios.
Chamamentos para as brigadas helitransportadas: xa se paralizaron e fixeron resolución polo requisito pero non solucionaron a cuestión de que persoal que ten que “xogarse” o posto ao aceptar un posto de mellora. O DXFP descárgase de responsabilidade e di que hai que coordinar coa comisión de listas e que é complicado coordinar a norma e a xestión.
Listas de substitucións de persoal de incendios: En canto se faga o proceso de funcionarización se procederá á fusión de listas seguindo o criterio de escalas/categorías sen ter en conta as especialidades.
Axentes medioambientais: enviarán proximamente as bases da convocatoria de 56 prazas das OEPs de 2020 e 2022. O decreto de segunda actividade dos axentes medioambientais enviarano esta semana.
Carreira profesional: van a seguir resolvendo todas as solicitudes. Na vindeira semana traerán datos da situación.
Concursos de traslados: a finais desta semana ou comezo da seguinte enviarán as bases xerais para todos os concursos.
Promoción interna: o DXFP non se pronuncia.
Acordo FISP: O 6 de xullo terá lugar unha nova xuntanza coa DXFP polo último borrador do acordo. Previmente manterán unha xuntanza a DXFP coa DX de Saúde Pública. Queren traer a RPT de Saúde Pública o antes posible.
Conciliación para menores de 18 anos: o director xeral manifesta que ten que ser aprobada na Comisión de Persoal.
Orde de integración de Augas de Galiza: están coa tramitación administrativa. Está avanzada.
Consorcio: están traballando na RPT e en canto á orde de integración están recompilando documentación.
Fondo de acción social (FAS): contan con publicar a listaxe provisional no DOG do día 15 de xullo.
RDL 5/2023: non van facer ningunha valoración polo de agora porque aínda ten que convalidarse no Congreso (o prazo da convalidación remata despois das eleccións xerais). Farán a valoración a finais de mes se se convalida no Congreso antes.
- Detalles
O luns 3 de xullo tivemos a segunda reunión da Comisión de seguimento do Acordo de axentes ambientais dende o 2019.
Na Comisión de Seguimento de axentes ambientais a Dirección Xeral de Función Pública deu, con moi boas palabras, unha patada para adiante na maioría das cuestións. Con moito borollismo quedaba claro que nos quería deixar contentos e aplacar un posible conflito en pleno verán.
E aínda así atreveuse a xustificar a imposición do período extraordinario o 29 de xuño “polo risco excepcional” (con este argumento poden impoñer o que queiran) e, de grupo B nada. Comprometeuse a avanzar no acordo das IIlas Atlánticas e no de segunda actividade que ten paralizados. E vendeu procesos selectivos que en realidade tiña que sacar igual porque se non lle caducan.
Procesos selectivos pendentes, so ofertaron 2 prazas de estabilización da lei 20; reclamamos solución das 13 do C2 que se cargaron. Van estudar que facer antes de respostar as reclamacións que teñen pendentes.
Dende a CIG esiximos que as convocatorias seguintes sexan de concurso-oposición na vez de oposición como están a facer nos novos procesos, e din que o van ter en conta (pola abondosa interinidade). Anuncian a próxima convocatoria das 56 prazas acumulando, como xa fan noutros procesos, varias OPES pendentes.
Para a futura OEP 2023 están abertos a meter o máximo de prazas posible para compensar a multitude de xubilacións.
Das queixas que lle presentamos na aplicación do período extraordinario en Patrimonio Natural din o “estudarán” pero dende a Consellería de Medio Ambiente aclaran que poden facelo libremente.
Regulamento: “convocarán” mesa de traballo a partir de setembro.
Nada de aplicar o Acordo de 2016 (grupo B). Teiman en que se necesita un desenvolvemento regulamentario...Pásanse os acordos polo forro e máis cando xa hai B nas deputacións, concellos, etc. e aparece regulado na lei de orzamentos do Estado.
Coeficientes redutores, din que “xa o solicitaron” ao Goberno anteriormente e se quedan tan anchos.
Formación do persoal da escala: explican dende Medio Rural que a prioridade é para o seu persoal e que se sobran prazas entrarían axentes de Patrimonio Natural. Medio Ambiente nin se pronuncia ante a súa nula oferta formativa.
Prazas do Agacal (Centro de Investigación Forestal de Lourizán): a DXFP o estudará pero Medio Rural xa avanzou a sua negativa por non estar as súas funcións incluídas na “xustificación” da suba de niveis do acordo.
Seguimento e interpretación do Acordo: no 2021 presentáronse emendas para resolver interpretacións torticeiras, diferentes carteleiras, noites en Patrimonio Natural, etc ao que nunca nos responderon. Di que enviemos de novo.
