- Detalles
Remitímoslle un escrito a Función Pública para que restableza as condicións á espera da sentenza tras a denuncia presentada en 2019.
Reclamamos a restitución dos dereitos laborais que foron recortados ao persoal empregado público coa escusa da crise en 2012. Máis dunha década despois o Goberno galego segue a utilizar os mesmos argumentos para non restablecer as condicións de traballo suspendidas o que nos levou a presentar demanda no 2019 ante o TSXG contra as decisións da Xunta de manter os recortes.
Queremos lembrar que a Xunta aproveitou a crise económica iniciada en 2008 para sacar adiante a lei 1/2012, do 29 de febreiro, de medidas temporais en determinadas materias do emprego público de Galiza, unha norma que impuxo recortes de dereitos laborais que se manteñen a día de hoxe a pesar de que o texto da propia lei establece que “o carácter desta lei é temporal, polo que a súa vixencia queda supeditada á subsistencia das difíciles circunstancias económicas que afectan a sustentabilidade das contas públicas”.
Unha vez atenuados os efectos máis graves da crise a partir de 2018 dende a CIG comezamos a demandar a restitución dos dereitos e desenvolver distintas mobilizacións con este obxectivo, porque nos cansámos de tentar razoar contra o muro dos sucesivos Gobernos do PP.
Por iso iniciamos un proceso de reclamación xudicial en 2019 para a restitución dos dereitos suspendidos con carácter retroactivo, e aínda estamos a agardar pola sentenza. Agora decidimos presentar un escrito dirixido ao director xeral da Función Pública reclamándolle a restitución dos dereitos suprimidos mentres non se produce a decisión xudicial.
Neste tempo o Goberno español derrogou a disposición adicional 2ª do RDL 20/2012, de 13 de xullo, de medidas para garantir a estabilidade orzamentaria e de fomento da competitividade coa lei 21/2022, de 23 de decembro, de orzamentos xerais do Estado para o ano 2023, en vigor dende o 01/01/2023. De xeito que o propio Goberno central, que ditou unha lei similar á galega no mesmo ano, recoñece por lei que non se dan as circunstancias que xustifiquen a aplicación dos artigos 32 e 38.10 do Estatuto Básico do Empregado Público. Por iso preguntámonos a que agarda a Xunta entón para restituír os dereitos laborais arrebatados ao seu persoal hai máis dunha década.
O texto derrogado é o seguinte:
"Disposición adicional segunda. Suspensións ou modificacións de convenios colectivos, pactos e acordos que afecten ao persoal funcionario ou laboral por alteración substancial das circunstancias económicas.
Aos efectos do previsto no artigo 32 e 38.10 do Estatuto Básico do Empleado Público entenderase, entre outras, que concorre causa grave de interese público derivada da alteración substancial das circunstancias económicas cando as Administracións Públicas deban adoptar medidas ou plans de axuste, de requilibrio das contas públicas ou de carácter económico financeiro para asegurar a estabilidade orzamentaria ou a corrección do déficit público."
A eliminación de dereitos baseouse precisamente no artigo 38.10 do EBEP, “por concorrer causas graves de interese público derivadas dunha alteración substancial das circunstancias económicas que afectaban á sustentabilidade das contas públicas”. A súa vixencia ficou condicionada á crise económica que se iniciou en 2008, rematou en 2014 e deuse por totalmente superada en 2018, segundo se recolle nos argumentos incluídos na nosa demanda.
Os dereitos suspendidos foron:
• O Fondo de Acción Social: suprimiron todas as medidas agás as destinadas a persoal empregado público con persoas con discapacidade a cargo; todas as demais quitáronas, como por exemplo a axuda por adquisición de vivenda, estudos de crianzas ou para gastos en gafas, lentes de contacto ou dentista.
• O dereito a nove días de “permiso por asuntos persoais sen xustificación”, quedando reducidos a seis.
• Artigo 19º do V Convenio Colectivo, relativo ao “descanso e festivos”.
• Artigo 29º do Convenio Colectivo, relativo aos “dereitos de comedor”.
• Artigo 34º.2 do Convenio Colectivo, relativo á “gratificación por xubilación”.
• Disposición Adicional 3ª, relativa a "períodos de descanso en Nadal e Semana Santa”.
- Detalles
Nova oferta de comisións de servizo e chamamentos polas listas de contratación para a cobertura de prazas no Servizo de Incendios (SPIF)
Nestes días estamos a vivir un novo episodio do caos que se está a producir co proceso de funcionarización do SPIF. Dende a Consellería de Medio Rural enviáronos unhas listaxes con prazas para a súa cobertura mediante comisión de servizos e por chamamentos polas listas de contratación.
Son múltiples as chamadas que estamos a recibir con dúbidas sobre a situación na que queda moito persoal que non sabe a día de hoxe se vai cesar ou non. Dende a CIG levamos tempo advertindo que facer un proceso de funcionarización sen orde, sen procesos selectivos resoltos, sen concurso de traslados en tempo e forma e sen condicións de traballo negociadas previamente trae consigo un proceso de funcionarización lesivo e chapuceiro. Pois aquí temos as consecuencias.
A todo isto engadimos que vaise resolver este proceso de funcionarización ás portas do inicio da campaña de lumes e coa letra pequena sen publicar no DOG a día de hoxe. O dito, un CAOS.
Para calquera dúbida consulta coa CIG.
Aquí podes acceder á información das prazas ofertadas: ligazón. Son prazas de 12 meses, e que dende o 1 de xuño serán prazas de persoal funcionario.
- Detalles
O director xeral de Función Pública convocounos a unha xuntanza da Mesa Xeral de Empregados Públicos e da Comisión de Persoal que serán, respectivamente, o luns 29/05/23 e martes 30/05/23, coa seguinte Orde do día:
RELACIÓN DE POSTOS DE TRABALLO DE AUGAS DE GALIZA
Esta modificación comezou a súa tramitación cos sindicatos o 4 de outubro do 2022. Case oito meses despois, a proposta vai quedar pechada.
- Detalles
A saturación nos equipos psicosociais dos IMELGA, da Xunta de Galiza, que presentaban un atraso na elaboración de informes periciais, nalgunhas delegacións de ata 2 anos, foi unha das críticas expostas polo propio Tribunal Superior de Xustiza de Galiza (TSXG) na apertura do ano xudicial en setembro de 2022. A resposta inicial da Xunta foi o incremento de horas extras do persoal do IMELGA, medida que resultou insuficiente para recortar os tempos de espera. Por este motivo, no pasado mes de novembro se crearon ata 7 equipos de reforzo con persoal funcionario interino, psicólogos e traballadores sociais; 2 en Pontevedra, Santiago e A Coruña e 1 en Lugo.
A pesares das dificultades engadidas polas recentes folgas dos diferentes colectivos de traballadores no ámbito xudicial, conseguiuse reducir as listas de espera en procedementos de familia, chegando o mes de maio a traballar nos iniciados no presente ano, minorándose notablemente os tempos de espera.
Porén, esta situación non é puntual senón estrutural. Existen subdireccións cunha demanda insostible para o número de equipos psicosociais que as compoñen e xa, no pasado mes de novembro, o presidente do TSXG e a entón directora do IMELGA, coincidiran na necesidade de ampliar o número de equipos para “reducir os atrasos” na emisión de informes periciais, o que repercutiría na axilización dos procedementos xudiciais.
Neste mes de maio, coñecemos o novo convenio celebrado pola Vicepresidencia Segunda con dúas institucións de profesionais, o Colexio de Psicóloxía de Galiza e a Asociación Nacional de Peritaxe Social, por un valor total de 60.000€, externalizando un servizo público como xa se fixo noutras ocasións, a última no 2021, que resultou cara e ineficaz e debilitou a seguridade dos xuíces e fiscais á hora de valorar a proba pericial debido ás diferentes metodoloxías e protocolos de valoración aplicados polos diferentes profesionais externos, fronte á homoxeneidade conseguida entre as e os membros dos equipos psicosociais públicos.
A diferenza con esta nova privatización, radica na existencia actual de equipos de reforzo en funcionamento, plenamente integrados na dinámica das diferentes subdireccións territoriais do IMELGA e dos órganos xudiciais galegos, constituídos por 14 funcionarios interinos competentes que asumiron de forma eficaz e eficiente a tarefa de asesorar e orientar a representantes legais, xulgados e fiscalía, fornecéndolles unha información imparcial, profesional e comprensible que lles facilita a toma de decisións nos procedementos tramitados.
Esiximos da Vicepresidencia a anulación destes convenios de colaboración e avogamos pola consolidación dos equipos de reforzo coa súa creación na relación de postos da Consellaría.
Rexeitamos estes convenios que, ademais de non garantir a confidencialidade dunha información tan protexida como a de menores e familias, permitirá que os profesionais desas institucións ocupen dependencias públicas, accedan aos expedientes e poidan rematar cunha demanda por cesión ilegal de traballadores
- Detalles
Recibimos comunicación da Dirección Xeral da Función Pública na que nos informa de que a resolución do concurso ordinario para a provisión de postos de traballo vacantes de Administración xeral da Comunidade Autónoma de Galiza, escalas superior e técnica de finanzas, convocado por Resolución do 14/07/2021, será publicada no DOG do luns 29 de maio.
- Detalles
A Dirección Xeral de Función Pública remitiu aos sindicatos unha nova versión do "Acordo de Farmacéuticos/as Inspectores/as de Saúde Pública". Aceptaron varias alegacións sindicais sobre o primeiro borrador (que eran erros de bulto). Temos novo período para alegar este segundo texto, ata o 24 de maio, e esperemos ter ao menos unha mesa de negociación coa consellaría de Sanidade e con Función Pública para discutir todos os artigos en conflicto baixo os principios de boa fe negocial xa que ata agora non o tivemos.
Se queres aportar algo, podes contactar coa CIG.
- Detalles
Na Comisión de Persoal do pasado día 16 de maio aprobouse a RPT de funcionarización do SPIF co voto en contra da CIG.
Este foi un proceso que “comezou polo tellado” e dende a CIG sempre defendimos un proceso transparente, que facilitara toda a información que permitira ao persoal do servizo de incendios tomar a decisión de funcionarizarse ou non con tódalas garantías e coñecendo con carácter previo todas as condicións. Nesta liña, incluso na xuntanza da Comisión de Persoal e tendo en conta que minutos despois aprobouse esta RPT o director xeral de Función Pública anunciou que se valoraría a posteriori unha nova proposta de adaptación dos complementos, a negociación dunha regulación da segunda actividade para o persoal funcionario, a proposta dun novo acordo de condicións de traballo...
Aínda que valoramos positivamente que non exista complemento de funcionarización, non podemos estar de acordo cun proceso así. As razóns polas que a CIG votou en contra a son as seguintes:
• Non estamos de acordo en que non se encadre as prazas de bombeiro/a forestal xefe/a de brigada no grupo B.
• Seguimos dicindo que o acordo de condicións de traballo tiña que ser previo a esta RPT. Dende a CIG levamos xa tempo presentándolle á administración unha proposta para comezar a negociar este acordo, e advertindo dos problemas que poderían xurdir de levar a cabo o proceso de funcionarización sen telo.
• Non compartimos que haxa diferenzas no complemento de destino para postos iguais.
- Detalles
Resumo dos “rogos e preguntas” da Comisión de Persoal do pasado 16 de maio, onde o director xeral de Función Pública deu a información que trasladamos.
PROCESOS SELECTIVOS
Calendario: publicaron o calendario onde figuran xa todos os procesos convocados (95 procesos) de libre e estabilización.
Procesos pendentes de rematar: é probable que a semana que vén remitan as prazas dos procesos de educación social e de veterinarios/as tanto funcionarios como laborais. Están pendentes da revisión das prazas de auxiliar de clínica e de traballo social e dos prazos dos recursos. Esperan que na primeira quincena do vindeiro mes estean publicadas todas estas eleccións de destino.
Procesos de estabilización: os listados de admitidos/as sairán coa información adicional sobre si está presentado o CELGA ou non para non ter que facer o exame de galego.
Repesca da funcionarización: as convocatorias se negociarán para que saian antes do mes de agosto.
Admisión do recurso nun proceso selectivo: ante a inquedanza que se xerou polas declaracións na anterior Comisión de Persoal ao non definir si era traballo social ou educación social o proceso afectado pola admisión dun recurso, o director xeral aclara que o proceso é traballo social.
CARREIRA PROFESIONAL
No mes de maio irán 1.500 recoñecementos máis. Estudarán abrir un novo prazo para as persoas que non puideron presentar acceder no anterior prazo.
CONCILIACIÓN, FLEXIBILIDADE HORARIA E BOLSA 5%
Retomarán a negociación en canto poidan porque o texto está case pechado pero lles gustaría levalo en paralelo á negociación da segunda actividade.
ACORDO FISP
Envían un novo borrador de acordo do persoal farmacéutico inspector de saúde pública con cambios e explicacións sobre os cambios. Prazo de alegacións ata o mércores 24 as 14:00. O director xeral di que non é un acordo que estea pechado e que aceptaron algunhas alegación sindicais e outra. Gustaríalle que no vindeiro mes se pechara este asunto ao achegar posturas.
MELLORAS EN POLÍTICA SOCIAL
Na reunión co Comité Intercentros xa indicaron que comezaran a negociación cos catro sindicatos (CIG, CCOO, CSIF e UGT) sobre a problemática das condicións laborais e retributivas do persoal de Política Social e a intención de adecuar ás ratios. Haberá aumento de persoal e novas contratacións e nas vindeiras semanas se negociará todo isto.
EQUIPOS DE VALORACIÓN DE DISCAPACIDADES
Ante a preocupación polo incremento de ratios e a publicación do Real Decreto 888/2022 sobre o procedemento para o recoñecemento, declaración y cualificación do grao de discapacidade o director xeral comenta que hai problemas coa aplicación informática que é do Ministerio. Se chegou a falar de que os equipos de valoración fixeran 9 valoracións no inverno e 7 no verán pero que polo de agora quedan en 4.
- Detalles
O 15 de maio de 2023, o Comité Intercentros, e os comités de Política Social, mantivemos a xuntanza solicitada coa Secretaria Xeral Técnica da Consellería de Política Social, á que asistiu o Director Xeral de Función Pública.
Tanto o compañeiro da CIG que ostenta a presidencia do Comité Intercentros como o resto dos membros das outras OOSS nos comités expuxemos as demandas po persoal de Política Social:
- Actualización das ratios de persoal, completamente desfasadas (son de 1996), á realidade dos centros neste momento.
- Tipoloxía de usuarios: ingreso nos centros de persoas moi novas con perfís psiquiátricos, cando os centros non están adaptados estruturalmente, nin contan con material, nin existe dotación de persoal con formación axeitada. Todo isto acaba xerando problemas de convivencia co persoal residente que ten outras características completamente diferentes.
- Necesidade de modificación do decreto de listas para tentar mellorar o funcionamento das coberturas temporais.
- Compensación do traballo en domingos e festivos, moi importante, pero non o único e fundamental.
- Escaseza de material cando hai gromos de COVID nos centros. Pagamento dos tres complementos (penosidade, perigosidade e toxicidade) ao persoal de reforzo, e non ao resto de persoal, que traballa nas mesmas condiciona de funcións e quendas.
- Cronograma da negociación de todas estas cuestións.
Por parte da CIG, expuxemos a maiores cuestións como a idade do persoal, maioritariamente preto da xubilación, número elevado de accidentes laborais, e necesidade de regular unha segunda actividade así como alternativas de xubilación (xubilación parcial, coeficientes redutores, etc..), que poña fin ás adaptacións de posto pola perda da saúde do persoal. Dificultade para a conciliación do persoal da consellería. Ratios insuficientes e dereito de comedor como parte educativa de educadoras en menores.
Función Pública incidiu nos puntos seguintes:
- A idade do persoal: espera que vaia renovándose coas oposicións e incorporación de xente mais nova.
- Estudará coa Consellería de Sanidade unha alternativa para as persoas que non se corresponde co perfil de usuarios das residencias de maiores.
- Incremento de persoal centrado fundamentalmente na conversión en contratos de xornada completa de todos os contratos de xornada inferior (medias xornadas e xornadas de fin de semana) e no aumento nos centros nos que queda unha persoa sóa na quenda de noite, a dúas persoas na quenda.
- Modificación do decreto de listas, estudando es especificidades de Política Social, e o tema das penalizacións e ofrecer maior estabilidade nas contratacións.
- Redución da xornada máxima anual, polo aumento de persoal.
- Estudará un sistema mixto de compensacións do traballo en domingos e festivos que contemple tanto aumento de descanso como de retribucións.
- Aumento de niveis de carácter retributivo, especialmente para algunhas categorías (médicas, enfermeiras, etc..) que incentiven o traballo na consellería.
- A respecto do cronograma, contan levar ás mesas de negociación estas cuestiona nas vindeiras semanas para o seu estudo, e tentar chegar a acordos antes do mes de agosto (finais de xuño ou xullo) para incluír na proposta dos orzamentos do 2024 .
- En relación ao asunto da segunda actividade, isto excede do ámbito de Política Social e haberá que negocialo con carácter xeral para todo o persoal da Xunta de Galiza.
Todas estas medidas incidirán nunha mellora das condicións laborais do persoal de Política Social.
Congratulámonos de que por fin se teñan en conta as demandas do persoal de Política Social, e que se fagan realidade as propostas que melloren as condicións laborais e retributivas, porque É DE XUSTIZA, despois de 11 anos de recortes de persoal e de salario, traballando sempre a mínimos e con menoscabo da nosa saúde.
- Detalles
Pasarían por diante os procesos de libre e de estabilización, malia que as prazas de promoción interna son de ofertas de emprego anteriores
A propaganda política ten consecuencias que o persoal funcionario pode pagar. En xuño convocaron 506 prazas por acceso libre para os corpos xerais que anunciaron aos catro ventos falando de oportunidades de emprego para a cidadanía, etc. Como os prazos son os que son non quedou outra que poñer para este mes de xullo as datas dos exames.
E mentres convocaban xa hai un ano estas prazas das OEP´s de 2020 e 2021 deixaban sen convocar a promoción interna deses mesmos anos e, a maiores, a de 2022, como xa che contamos aquí. Ademais destas tres ofertas sen executar, habería que sumar a promoción interna da OEP de 2023 que a Xunta tampouco quere aprobar.
E agora, cando os exames de libre xa están fixados para este mes de xullo nos din que falaremos da promoción interna... en setembro!!!
Cos ritmos que ten Función Pública iso implica que os exames serán no 2024 e igual a toma de posesión no 2025, cando xa estean resoltos e feitas as tomas de posesión dos procesos de libre e de estabilización de OEP´s posteriores.
Non se pode adiar máis a promoción interna nin castigar ao persoal funcionario de carreira sen oportunidades de promoción. A promoción interna débese negociar no que queda de maio e principios de xuño, e debe publicarse a convocatoria no mes de xuño e fixar os exames para fin de ano, ou en todo caso ten que rematar antes ou simultaneamente cos procesos de libre e estabilización.
Seguimos mantendo que a prelación para optar aos postos de traballo na Xunta deber ser 1º concurso de traslados, 2º promocións anteriores que estean actualmente en destino provisional, 3º persoal de promoción interna e 4º persoal de estabilización e libre.
Tratar de relegar ás persoas que teñen dereito a promocionar, non convocando xa, ou incluso manexando a posibilidade de deixar caducar as ofertas de emprego é síntoma da nefasta xestión e escuros intereses que se manexan en Función Pública.
Lembramos aquí as prazas de corpos xerais que están sen convocar cando as de libre xa teñen data de exame:
| PROMOCIÓN INTERNA NON CONVOCADA (OEP´s 2020, 2021, 2022) | |
| CORPOS | PRAZAS |
| Corpo superior (subgrupo A1) | 50 |
| Corpo de xestión (subgrupo A2) | 275 |
| Corpo administrativo (subgrupo C1) | 422 |
| Corpo auxiliar (subgrupo C2) | 195 |
| TOTAL | 942 |
E en breve falaremos tamén das poucas opcións de promoción interna vertical e horizontal de determinadas escalas, así como de desenvolver un novo modelo de promoción interna tendo en conta que ten que ser máis livián promocionar que acceder á condición de persoal funcionario de carreira, algo que aínda que parece lóxico nestes momentos non sucede.
PROMOCIÓN INTERNA XA!!