- Detalles
A Dirección Xeral da Función Pública actualizou o venres 22 de decembro o calendario coas datas, lugares e horas de realización dos primeiros e segundos exercicios de diversos procesos selectivos.
Se é do teu interese, podes acceder dende a seguinte ligazón.
- Detalles
Na xuntanza do día 22/12/2023, o director xeral de Función Pública informou de varios asuntos:
Procesos de estabilización: para evitar a saturación do sistema lembra que para presentar os méritos abriran un prazo específico.
Funcionarización: no DOG do 26/12/2023 sairán publicadas as convocatorias. O 29/12/2023 publicarase no DOG a resolución pola que se procede á apertura do prazo para que o persoal en excedencia solicite participar nos procesos de funcionarización. En xaneiro queren axilizar a dos grupos I, II e V e logo a do resto para rematala o antes posible.
Ante a queixa de que non se actualizan as listas laborais nos procesos recentes de bombeiros/as din que esta semana terán un informe polas modificacións das listas de funcionarización. Tratarase en xaneiro.
Listas de contratación: vanlle dar prioridade ás escalas das que se crean prazas para que a publicación se faga un pouco antes que o resto.
Orde flexibilidade horaria: instarán a que se publique o antes posible.
Bolsa de flexibilidade (5%): intentarán darlle unha volta en xaneiro.
FIDES (expediente electrónico): están traballando no apartado da experiencia profesional do persoal indefinido non fixo.
Segunda actividade do persoal laboral funcionarizado: mantén as mesmas condicións mentres non se negocie outro acordo. Están dispostos a facelo.
Ademáis desta información facilitada, dende a CIG plantexámoslle varias cuestións:
Proceso selectivo A2, escala de inspección turística: Tras modificarse a convocatoria por esixencia normativa (inclusión do requisito do permiso de conducir da clase B), dende a CIG solicitamos que se habilite un procedemento para a devolución das taxas das persoas que se anotaron no seu momento neste proceso selectivo e que agora non cumpren co citado requisito.
Estabilización A1, escala de profesores numerarios dos institutos politécnicos marítimo-pesqueiros, especialidade de navegación marítima: Na resolución cos resultados da primeira proba da oposición o tribunal cualificou a proba dividindoa en dúas partes, sendo necesario aprobar ambas partes para continuar no proceso. Isto vai en contra do disposto na convocatoria deste proceso e ten unha afectación directa na puntuación das persoas participantes. Pedimos a intervención de Función Pública.
Reclasificación no grupo B do persoal delineante: A diferencia do que pasa na Galiza, na comunidade autónoma de Andalucía gobernada tamén polo PP, o 14 de decembro entrou en vigor a reclasificación no grupo B do persoal delineante contemplada na Lei de la Función Pública de Andalucía (BOE 11/07/2023). Solicitamos que tomen nota dos seus compañeiros de partido andaluces e fagan xa todas as reclasificacións no grupo B contempladas na LEPG.
Postos para a elección de destino de enxeñería agronómica e agrícola: Seica está a circular entre os traballadores un listado extraoficial de postos. Na CIG non temos coñecemento oficial de ningún buzón de postos. Pedimos explicacións. O DXFP di unha obviedade: que non deberan circular os buzóns desa maneira, que enviarán ás organizacións sindicais o buzón definitivo cando o teñan.
Eleccións de destino de varias enxeñarías: despois do 08/01/2024 enviarán os postos e os criterios para a elección de destino.
- Detalles
Na Comisión de Persoal do 22/12/2023 foi aprobada co voto favorable das catro organizacións sindicais a modificación da RPT de Política Social e Xuventude para transformar en xornada completa 139 postos e crear 129 novos e así dar cumprimento ao disposto no Acordo de condicións de traballo do persoal de centros de xestión propia da Consellería de Política Social e Xuventude co compromiso explícito de rematar coa RPT do Consorcio e incluír as prazas de nova creación necesarias para cumprir coas compensacións e as 35 horas semanais.
- Detalles
Estas ordes de carreira aprobadas na Comisión de Persoal do día 22/12/2023, abren un novo prazo do sistema extraordinario para as persoas que non cumprían os requisitos de formación ou antigüidade no ano 2019 e 2022, ou que, cumprindo os requisitos non a solicitaron. Pero ollo, non o fan de xeito absoluto e deixan fora a moito persoal.
• Se es interino ou temporal con máis de 11 anos de servizos e concedéronche o grao I no 2022, non vas poder solicitar o grao II. (De feito, dos case 4.000 interinos e temporais que poden solicitar a carreira tan só 13 van poder solicitar o grao II).
• Se es funcionario de carreira ou laboral fixo con máis de 11 anos de servizos e non solicitaches o grao I no 2019 e obtivéchelo no 2022, tampouco vas poder solicitar o grao II agora.
• Se es laboral fixo que non se quixo funcionarizar e paralizáronche o cobro dos graos I e/ou II seguen esixíndoche que te funcionarices.
Propuxemos instaurar a carreira ordinaria e encaixala co sistema extraordinario aberto, permanente e automático para todo o persoal, sen exclusións e pagando os atrasos ao persoal ao que se lles negou no 2019. Pero Función Pública sigue tirando para adiante co apoio doutras organizacións, cun modelo fracasado, discriminatorio e que non executa as sentenzas. Preguntámonos, por que cada vez que a CIG pon solucións enriba da mesa eles prefiren seguir arrastrando os problemas do pasado.
Explicamos por que estes modelos de carreira (carreira administrativa e complemento de desempeño) seguen a ser excluíntes e discriminatorios porque:
1. Non son unha corrección da carreira do 2021 xa que non recuperan nin as cantidades nin o tempo que paralizaron a carreira, nin tampouco ao persoal que lla retiraron por non funcionarizarse, nin ao que expulsaron do sistema por ter antigüidade doutras administracións.
2. Deixan outra vez fóra ao persoal laboral fixo ao que condiciona coa chantaxe da funcionarización.
3. Non permiten ir acolléndose ao segundo grao ao persoal funcionario interino e laboral temporal que deixaron fora no 2019 nin cumpre a sentenza na sua totalidade recuperando as cantidades dos anos que os tiveron excluídos.
4. Non solucionan a grande eiva do sistema: non deseñan unha carreira automática e universal na que, unha vez cumpridos os requisitos de avaliación e antigüidade, se conceda o grao correspondente.
Dito isto, non por ser habitual deixa de sorprender a facilidade que ten Función Pública para contar con algúns sindicatos para restrinxir dereitos: desta volta ao director xeral de Función Pública só lle levou tres días conseguir o voto favorable dos mariachis de turno a uns borradores iniciais que foron aprobados tal e como nolos achegaron, sen mover nin unha coma.
- Detalles
A Dirección Xeral de Función Pública achegounos os borradores das convocatorias dos procesos selectivos de acceso libre e de promoción interna ás seguintes escalas de persoal funcionario, con prazo para que presentemos alegacións ata o día 8 de xaneiro. As convocatorias de promoción interna separada serán mediante concurso-oposición; as convocatorias de acceso libre (e promoción interna conxunta), serán mediante oposición. Si é do teu interese, contacta coa CIG.
| ACCESO LIBRE E PROMOCIÓN INTERNA | ||||||
| Grupo | Escala (preme para descarga) | Total prazas | Promoción interna | Discap.xeral | Discap.intelectual | Ano da OEP |
| A1 | Sup. de Finanzas | 17 | 5 | 2 | 2021, 2023 | |
| A1 | Bioloxía | 14 | 4 | 1 | 2021 | |
| A1 | Veterinario/a | 93 | 24 | 13 | 2021, 2022, 2023 | |
| A1 | Medicina | 29 | 8 | 2 | 2021, 2022, 2023 | |
| A2 | Téc. de Finanzas | 18 | 5 | 1 | 2021, 2023 | |
| A2 | Subinspecc.Urbanística | 2 | 1 | 2021 | ||
| A2 | Educador/a social | 21 | 6 | 1 | 2021, 2023 | |
| A2 | Enfermaría | 42 | 11 | 4 | 2021, 2022, 2023 | |
| AP | Subalterno/a | 19 | 19 | 2021, 2022 | ||
| PROMOCIÓN INTERNA SEPARADA | ||||||
| Grupo | Escala (preme para descargar) | Total prazas | Discap.xeral | Ano da OEP | ||
| A1 | Enx. Agronómica | 10 | 1 | 2021 | ||
| A1 | Enx. Industrial | 2 | 2021 | |||
| A1 | Enx. Minas | 2 | 2021 | |||
| A1 | Enx. Montes | 10 | 1 | 2021 | ||
| A1 | Sup. Finanzas | 8 | 2021 | |||
| A1 | Sistemas e tec. da información | 8 | 2021 | |||
| A2 | Enx. Téc. Agrícola | 2 | 2021 | |||
| A2 | Enx. Téc. Obras públicas | 3 | 2021 | |||
| A2 | Enx. Téc. Forestal | 2 | 2021 | |||
| A2 | Xestión de sistemas de informática | 8 | 2021 | |||
| A2 | Inspección de consumo | 2 | 2021 | |||
Lembramos que uns días antes enviaran para alegar os borradores dos procesos selectivos de: xerocultor/a, PSX, aux. de laboratorio, educación infantil e inspección de turismo.
- Detalles
A Dirección Xeral de Función Pública achegounos o borrador do concurso ordinario para a provisión de postos de traballo vacantes nas escalas do Servizo de Gardacostas de Galiza, con prazo para que presentemos alegacións ata o día 8 de xaneiro de 2024.
Dende a seguinte ligazón podes descargar a proposta, e tamén descargar o borrador de postos a ofertar. E si é do teu interese, contacta coa CIG.
Satisfácenos que movan este concurso, pero ao tempo queremos subliñar que o director xeral de Función Pública non cumpre nin coas súas propias palabras, xa que o que nos estivo a dicir foi que primeiro convocarían o concurso de incendios e axentes forestais/ambientais (xa en marcha), de seguido iría o concurso de escalas "sociais", a continuación o resto de escalas de administraición especial, e nin unha palabra da previsión do concurso de corpos xerais e das súas escalas.
- Detalles
Negociación das novas convocatorias para solicitar o complemento de desempeño ou a carreira administrativa, pero con moitas restricións
A Xunta, CCOO e UGT deseñaron unha carreira profesional no 2019 excluíndo a parte do persoal empregado público (interinos, temporais, indefinidos) e chantaxeando para cobrala (laborais fixos que non se querían funcionarizar).
Despois de perder sentenza tras sentenza (tanto as da CIG como individuais), sacáronse da manga un novo acordo cambiando o nome de carreira profesional por “carreira administrativa” para o persoal funcionario e “complemento de desempeño” para o persoal laboral, a ver se colaba.
No 2022 no canto de recoñecer o dereito dende o 2019 ao persoal que decidiran excluír, só lle deron acceso ao grao I. E con este modelo proposto agora NON amañan esta desfeita.
Neste caso vaise dar acceso ao sistema de carreira:
Ao grao I, ao persoal funcionario e laboral que teña 5 anos de servizos a 31/12/2023 e non teña recoñecido ese grao.
Ao grao II, ao persoal funcionario de carreira e laborais fixos, que teñan 11 anos de servizos prestados e tiveran recoñecido o grao I no 2019.
Ao persoal ao que lle denegaron a carreira no 2022 por non valorar a antigüidade noutras administracións.
Non se lle vai dar acceso:
Ao grao I, ao persoal funcionario e laboral que non cumpra 5 anos de servizos ou non cumpra os criterios (40 horas de formación, fundamentalmente).
Ao grao II, ao persoal funcionario de carreira e laborais fixos, que non cumpra 11 anos de servizos ou non cumpra os criterios (40 horas de formación, fundamentalmente).
Ao grao II, ao persoal funcionario interino, laboral temporal e indefinido (excepto casos moi contados que teñen sentenza individual).
Ao persoal ao que lle deron algún grao de carreira no 2022.
Se lle vai dar acceso condicionado:
Á maior parte do persoal laboral fixo que se lle esixe funcionarizarse.
Dende a CIG plantexamos basicamente 3 cousas:
1. Que cumpran a sentenza da CIG e non esperen á resolución do incidente de execución e lle dean acceso A TODO O MUNDO sen discriminación que cumpra os requisitos de tempo de permanencia e criterios (fundamentalmente formación).
2. Que establezan o sistema extraordinario aberto e automático e permanente que a CIG xa plantexou no 2019 similar ao que ten o persoal docente (sexenios). onde cando unha persoa cumpre un determinado número de anos e outros requisitos automaticamente pasa a cobrar o grao que lle corresponda.
3. Que retiren a chantaxe ao persoal laboral fixo que non queira funcionarizarse
O que seguimos sen entender é que algúns sindicatos sigan aplaudindo un modelo restritivo ou sigan ameazando en volver promover a suspensión da carreira durante un ano como xa fixeron con anterioridade.
Dende a CIG imos seguir promovendo e loitando por un sistema que inclúa a todo o mundo, áxil, automático e que teña en conta a totalidade da vida laboral para situar a cada persoa no grao que lle corresponda segundo a antigüidade, incluindo claro está o grao IV canto antes. O venres 22 de decembro tratarase na Comisión de Persoal e informaremos máis detalladamente das convocatorias.
- Detalles
Tres empresas-fundacións preséntanse á licitación da residencias de maiores doadas pola fundación Amancio Ortega
A conselleira de Política Social xustifica a licitación dos servizos das residencias a mans privadas porque van ser xestionadas por “fundacións sen ánimo de lucro” Así o expresou ante a opinión pública.
A definición das fundacións é que son entidades sen ánimo de lucro, pero moitas delas perderon no camiño (ou na orixe) a parte de “sen ánimo de lucro”
Segundo o Rexistro de economistas e asesores fiscais, Facenda ten moi difícil controlar se as fundacións destinan ou non o 70% dos seus beneficios a fins sociais. Os patronos das fundacións non poden cobrar por xestionalas nin teñen acceso ao capital, pero ninguén lles impide prestar un servizo diferente da xestión e poñerse salarios moi grosos por facelo.
As tres fundacións que optan ao concurso para facerse co servizo son: FESAN, Fundación Gerón e Fundación Valdegodos
Estas fundacións adícanse á prestación de servizos. No caso da FESAN, que o fai tanto en formación como en servizos sociais e en todo o que se lles encomende dende a Xunta, sábese que está vinculada ao Opus Dei e ao PP.
A Xunta non gastou un peso en construír estas residencias, amoblalas e dotalas de materias, pero se permite regalalas ao sector privado e darlles cartos para xestionalas, beneficio empresarial incluído. Porque si, as Fundacións teñen beneficios.
Convén ter presente, para que non se repita, o que sucedeu nas residencias privadas durante a pandemia e comparar cos datos da xestión pública. O 94,3% das mortes nas residencias galegas nos primeiros 9 meses foi en centros de xestión privada. Dos 509 falecementos, 480 eran usuarios/as de centros a cargo de entidades privadas, incluídas as públicas con xestión privada, mentres que os restantes 29 falecidos/as (5,7%) foron nas residencias públicas de xestión pública.
Xa o di unha vella cantiga: “pa temporada que vén, temos que cambiar de xente”. Xa vemos por que camiño nos leva esta que temos.
- Detalles
Delegados e delegadas concentráronse diante do Parlamento de Galiza, coincidindo co debate da Lei
Delegadas e delegados da CIG-Administración concentrámonos diante do Parlamento de Galiza para manifestar o noso rexeitamento a uns orzamentos da Xunta para 2024 que, un ano máis, non contemplan as medidas necesarias para mellorar as condicións laborais do persoal empregado público.
Como vimos facendo desde hai anos, na CIG-Administración denunciamos que esta lei segue avanzando na precarización das condicións laborais do persoal empregado público e non recolle a posibilidade de recuperar os dereitos perdidos.
A Lei de Orzamentos para 2024 non introduce as partidas orzamentarias precisas para crear as prazas necesarias para o funcionamento da propia administración pública, nin a posibilidade de derrogar a Lei de Medidas, o que permitiría recuperar os dereitos perdidos como o 1% de acción social, os días adicionais que se suprimiron con reformas pasadas e tamén recuperar cuestións que ten o persoal da Administración pendente de volver á mesa de negociación.
Nese sentido denunciamos que a Xunta non aceptou ningunha proposta de mellora na LEPG, como a de recoller os dereitos do V Convenio e que así o persoal laboral non perda os seus dereitos pola funcionarización masiva.
A Lei de Orzamentos deste ano non só non introduce todas estas cuestións senón que afonda máis no deterioro dos servizos públicos.
Xornada de 35 horas
Dende a federación da Administración Pública temos en marcha unha campaña polas implementación da xornada das 35 horas, que xa teñen contemplada outras administracións, como o SERGAS.
Para o persoal é fundamental a redución de xornada mais para iso fai falta máis persoal que faga fronte a este traballo. Iso, entre outras cuestións, tiña que estar recollido nos orzamentos da Xunta, pero non está.
Oposicións, promoción interna, concursos de traslados, carreira profesional
Reclamamos comisións de servizo non discrecionais e negociadas a implantación da categoría superior no mundo funcionarial, a cobertura de todas as vacantes e o aumento dos cadros de persoal.
Ademais, dende a CIG-Administración demandamos convocatorias anuais de oposicións e promoción interna, concursos de traslados aberto e permanentes e un complemento de Carreira Profesional digno, negociado e para todos e todas.
Respecto do Plan de Igualdade da Xunta exiximos a súa mellora porque o aprobado recentemente non é máis que unha copia da Lei en vigor, sen achegar nada novo.
Outra das cuestión que demandamos é a revisión salarial anual aplicando o IPC real, a recuperación do poder adquisitivo perdido nos últimos anos e a recuperación do Fondo de Acción Social FAS, equivalente ao valor do 1% da masa salarial.
Bombeiros comarcais
No decurso da concentración contamos cunha representación do colectivo de bombeiros comarcais que leva meses mobilizándose en demanda de condicións laborais dignas.
Os bombeiros comarcais están, desde o pasado venres, na praza do Obradoiro reclamando que as súas demandas sexan escoitadas e que as Administracións se aveñan a negociar melloras para garantir o funcionamento deste servizo público esencial.
- Detalles
Na xuntanza da Comisión de Listas de Contratación que tivo lugar o 20/12/20023 a Administración trasladou a seguinte información:
Listas provisionais de persoas admitidas/excluidas: no referente ao procedemento a seguir para presentar alegacións ás listas provisionais publicadas no DOG do 20/12/23, aquelas persoas que fixesen a solicitude de inclusión por medios electrónicos teñen que seguir o procedemento por este medio. No caso que teñan que presentar documentación, o propio programa emite un documento para presentar no rexistro xunto coa documentación correspondente.
O periodo de alegacións remata o día 5 de xaneiro. Teñen previsto que se publiquen as listas definitivas antes da próxima reunión da Comisión de Listas, que será o día 24 de xaneiro.
Modificación nas citacións electrónicas: a Lei de medidas fiscais e administrativas que se vai publicar o 1 de xaneiro inclúe unha modificación nas citacións electrónicas para as listas de contratación. Co fin de garantir as coberturas urxentes o tempo do que dispón a persoa para elexir redúcese de 5 a 2 días naturais. Xa se vai aplicar ás citas que saian dende o día 2 de xaneiro.
Por este motivo, van adiantar as próximas citas electrónicas para non interferir nos traballos informáticos que van facer na última semana do ano.
Puntuación que se terá en conta para as listas de contratación: mentres coexistan procesos de estabilización e ordinarios contarase a que sexa máis favorable á persoa, ata que rematen os procesos de estabilización.
Esta semana publicarán na web de Función Pública unha nota informativa con estas novidades.