- Detalles
Cualtis entrou en ERTE. E curiosamente fai uns días a Xunta incrementou os atrancos no protocolo a seguir polas persoas “especialmente sensibles”. Está a Xunta a tapar a Cualtis?
Segundo información recibida pola CIG, a empresa Cualtis, SLU, servizo de prevención alleo co que a Xunta de Galiza ten concertada a prestación da Prevención de Riscos Laborais para os/as traballadores/as da Administración xeral, entrou en ERTE. Quen vai a realizar os plans, visitas e vixiancia da saúde, en especial para os traballadores e traballadoras sensibles? Pretende a Xunta que voltemos ao choio logo de que se levante o estado de Alarma sen Plan de prevencion específicos por centro de traballo ao risco biolóxico do COVID?
Polo que sabemos, unicamente quedou excluído do ERTE parte do persoal que fai a vixiancia da saúde (recoñecementos médicos). Sospeitamos que esto sería así como xustificación que asegurase que a Xunta de Galiza continuase a pagar o conveniado. É dicir, que cobrarían da Xunta, pero non atenderían a totalidade dos seus compromisos.
Coincidindo no tempo, a Vicepresidencia da Xunta modificou fai uns días o protocolo a seguir polo persoal “especialmente sensible”, procedemento que a xuizo da CIG entorpece e atrasa as baixas por risco de COVID19.
Ligando a información do ERTE en Cualtis, e a modificación do protocolo por parte de Vicepresidencia, preguntámonos se o que hai detrás da complicación do protocolo non sería unha manobra da Xunta para tapar a Cualtis.
A CIG xa se dirixiu á Xunta para reclamar información sobre a veracidade da información, o alcance, e a relación deste expediente de regulacion temporal de emprego co novo protocolo de persoal sensible que elaborou Vecepresidencia. Tamén solicitamos que se reforce o servizo publico de prevención de riscos laborais dándolle a importancia que realmente ten como ferramenta garante para preservar a saude e seguridade do persoal.
- Detalles
A culpa é do SERGAS, de Función Pública, do goberno do Estado….
A CIG reuniuse cos responsables da Consellería de Política Social na que estivo presente a secretaria xeral, o xefe de persoal e o servizo de prevención. Propuxemos as seguintes cuestións ante a falta de iniciativa da Consellería:
1. Criticamos a falta de resposta dos escritos que dende o comezo desta crise levamos achegado á secretaria xeral técnica como responsable desta crise.
2. Respecto dos datos finalmente aportados do persoal da administración que deu positivo ou está en corentena polo COVID consideramos que non son suficientemente representativos porque faltan os centros nos que non se fixeron test ou non se lle fixo a todo o persoal. Pedimos os mesmos datos desagregados por categorías e centros xunto cos test realizados para poder valorar a efectividade das medidas preventivas.
3. Solicitamos unha relación do persoal que foi prestar servizos na Consellería de Política Social. Preguntamos tamén cales son os criterios de traslado e responden que só piden a categoría e número de efectivos e é Función Pública a que xestiona o chamamento. Recordamos a necesidade da súa negociación.
4. Reiteramos a necesidade de control dos plans de prevención e as súas medidas en tódolos centros e recordar que as medidas deben ser de obrigado cumprimento (pensar que son recomendacións pode levar a unha relaxación co conseguinte aumento do risco de contaxio).
5. Insistimos no cobro na nómina deste mes dos pluses correspondentes. Comprométense a facer “todo o posible” para que se inclúan na nómina de abril.
6. En relación ás residencias integradas a Xunta confirma que dependen do SERGAS. Solicitamos información deste tipo de centros e reiteramos a nosa denuncia porque non queren facer test (so fan se hai positivos). Manifestamos o descontrol e a falta de coordinación efectiva co SERGAS e a indefensión que supón para o noso persoal. Esiximos explicación acerca do cese da dirección de Baños Molgas e denunciamos que alí nin se coñece a existencia do plan preventivo COVID. Botaron balóns fóra, a culpa de todo tena o SERGAS.
7. Quixemos coñecer a situación das solicitudes respecto do persoal especialmente sensible e confirman que se están tramitando basicamente as dos 4 centros onde hai positivos confirmados e o SPRL resolve propoñendo a IT por continxencia profesional.
- Detalles
O persoal da Consellería Educación está de novo sendo chamado pola administración para reanudar o seu traballo nos centros educativos e facer tarefas de limpeza e mantemento xa que agora son consideradas “tarefas esenciais”.
A Consellería seguindo coa súa opacidade e actitude autoritaria nin informa nin negocia esta reincorporación coa representación do persoal, polo que vimos de esixirlle mediante un escrito que:
- Se faciliten os certificados de desprazamento.
- Se establezan unhas quendas flexibles, atendendo á situación persoal de cada traballador/a (maiores e/ou menores a cargo), persoal con patoloxías concorrentes ou crónicas, embarazadas, etc. E sempre para que o persoal poida manter as distancias aconselladas concorrendo sempre o mínimo persoal á vez no centro. Estas quendas nunca deben ser superiores en tempo que as esixidas aos equipos directivos que prestan servizos presenciais.
- Aclaración de que o traballo a desenvolver nestes intres é única e exclusivamente un traballo de mantemento das instalacións (utilizadas neste momento) e non se debe empregar para a realización de ningunha outra tarefa.
- Un plan de prevención de riscos laborais para os risco do COVID 19 no que estean definidas as medidas de protección necesarias e que se lles facilite o material axeitado de protección (EPI): ao menos luvas e máscaras, ademais de xel hidroalcóholico e xabón para a hixiene.
- O persoal vulnerable fronte ao virus debe solicitar a consideración de traballador/a sensible, polo que solicitamos que a Consellería aclare o procedemento (modificado o pasado 8 de abril) polo que cambian as actuacións para os servizos de prevención de riscos laborais fronte a exposición ao SARS-CoV-2 e cautelosamente, mentres non se tramiten, o persoal con algunha patoloxía quede na casa.
Finalmente dende a CIG reiteramos o dereito de coñecer e negociar os criterios para o chamamentos e traslado das traballadoras e criticamos que a Consellería se desentenda das condicións nas que está prestando servizos na Consellería de Política Social.
- Detalles
A Xunta de Galiza informa da apertura das oficinas de rexistro, cun sistema de cita previa, para posibilitar a tramitación de determinados procedementos administrativos para a semana que vén. Todo isto sen negocialo previamente en ningunha mesa, nin tratalo con ninguén e sen informar con antelación.
Segundo informa o Subdirector Xeral de Coordinación de Servizos Transversais, van enviar un plan de prevención específico para estas unidades entre os que está a separación entre o persoal funcionario e a colocación de pantallas de metacrilato. Ante a nosa crítica a esta decisión explica que as direccións serán quen establezan de inmediato estas medidas antes de activar o rexistro e que por iso non dan data concreta de apertura.
Dende a CIG solicitamos a negociación previa antes da reactivación de ningún servizo, mais cando ten contacto directo coa cidadanía. Necesítase un plan de prevención específico para cada centro de traballo que teña en conta as peculiaridades dos centros como a ventilación ou o espazo e a cantidade de público. Isto ten que ser a maiores daquelas medidas guía establecidas con carácter xeral. Ademais hai que dar tempo a que se resolvan as solicitudes de traballadores/as sensibles, polo que pedimos que as persoas que o soliciten queden cautelarmente na casa e non asuman riscos innecesarios.
Negociar a desescalada
A desescalada debe negociarse e facerse con sentido. Xa temos solicitado a Función Pública unha xuntanza no marco da Mesa Xeral de Empregados Públicos na que se trate a ampliación masiva do teletraballo e se negocien os criterios de desescalada e incluso quendas de non coincidencia, sempre co plan preventivo por diante.
Os plans de prevención ante o coronavirus por diante de calquera reincorporación
A Xunta de Galiza negouse a reunir aos Comités de Seguridade e Saúde Laboral Intercentros e os específicos de consellerías (agás de Medio Ambiente) a pesar de que llo solicitamos dende o comezo da alarma sanitaria. Agora non poden seguir a obviar esta ferramenta imprescindible para salvagardar a saúde e a seguridade ante o risco de contaxio ao COVID. Non estamos preparados ante o risco biolóxico e as avaliacións de riscos laborais aínda non están adaptadas a esta nova realidade.
A CIG rexeita a volta ao traballo sen condicións de seguridade
- Detalles
O 16 de abril de 2020 despois de ter a CIG presentada denuncia recibimos o requirimento que a Inspección Provincial de Traballo e Seguridade Social de Lugo fai a Xunta de Galicia relativo aos centros de traballo: Residencia de Maiores de As Gándaras, Milagrosa, de Monforte e de Burela; Centro de especial protección de menores Santo Anxo de Rábade; Centro de Atención a Persoas con Discapacidade Psíquica de Sarria.
O requirimento recolle a obriga legal de protexer aos traballadores e traballadoras por parte da empresa ou administración empregadora así como implica tamén a obrigación de dotarlles dos medios preventivos necesarios para que realicen o seu traballo nas mínimas condicións de seguridade.
É por iso que se efectúa o requirimento que debe ser cumprido de forma inmediata e advírtese á Xunta de Galicia que o incumprimento deste requirimento poderá dar lugar á extensión da correspondente acta de infracción:
- Require a empresa que a avaliación de risco biolóxico (exposición a coronavirus SARS- COv-2) deberá repetirse periodicamente, cada vez que se produza un cambio nas condicións que poida afectar á exposición dos traballadores e traballadoras a axentes biolóxicos, e tendo en conta as modificacións que se produzan nas recomendacións e pautas establecidas polas autoridades sanitarias.
- Realízase advertencia para que modifique o Anexo e no caso de operacións de aerosolización será precisa máscara con nivel FFP3.
- Realízase requirimento para que se dote a todo o persoal dos devanditos equipos de protección individual en número suficiente que cumpran coas especificacións técnicas requiridas, para unha adecuada protección fronte ao axente biolóxico grupo 2.
- Realízase advertencia de cumprimento das recomendacións sanitarias recollidas no documento técnico antes mencionado, de que as tarefas de asistencia de caso posible ou confirmado son tarefas de exposición de risco, polo que a protección respiratoria xeralmente recomendada para os profesionais da saúde, e por tanto extensible a persoal de atención/coidado persoas residentes que poida estar en contacto a menos de 2 metros con casos posibles, probables ou confirmados, é unha máscara autofiltrante tipo FFP2 ou media máscara provista con filtro contra partículas P2. As máscaras autofiltrantes ou, no seu caso, os filtros empregados non deben reutilizarse e, por tanto, deben refugarse tras o seu uso. As medias máscaras deben limparse e desinfectarse despois do seu uso. Para iso seguiranse estritamente as recomendacións do fabricante e en ningún caso, o usuario debe aplicar métodos propios de desinfección xa que a eficacia do equipo pode verse afectada.
- Realízase requirimento para que se recollan na avaliación de riscos as medidas alternativas a adoptar en caso de carecer dos EPIS que deban ser utilizados.
- Realízase requirimento para que, a formación teórica e práctica debe proporcionar ao traballador a adecuada información, instrución e adestramento sobre os riscos biolóxicos que afecten o seu posto de traballo ou función, e das medidas de protección ou prevención aplicables aos devanditos riscos, incluíndo colocación, uso, retirada e desinfección dos equipos de protección individual. Da entrega da devandita información, así como da impartición de formación, deixarase constancia mediante firma do traballador.
- Así mesmo, realízase requirimento para que se garanta en todo momento, o cumprimento das obrigacións de información, consulta e participación dos representantes dos traballadores, EN CONCRETO, as establecidas no art. 33- ss da Lei 31/95, do 8 de novembro, respecto a os delegados de prevención, e no art.39 respecto do Comité de Seguridade e Saúde.
- O empresario garantirá unha vixilancia adecuada e específica da saúde dos traballadores en relación cos riscos por exposición a axentes biolóxicos, realizada por persoal sanitario competente, segundo determinen as autoridades sanitarias nas pautas e protocolos que se elaboren. Dita vixilancia deberá ofrecerse aos traballadores nas seguintes ocasións:
a) Antes da exposición.
b) A intervalos regulares en diante, coa periodicidade que os coñecementos médicos aconsellen, considerando o axente biolóxico, o tipo de exposición e a existencia de probas eficaces de detección precoz.
c) Cando sexa necesario por detectarse nalgún traballador, con exposición similar, unha infección ou enfermidade que poida deberse á exposición a axentes biolóxicos.O servizo sanitario do servizo de prevención de riscos laborais serán os encargados de establecer os mecanismos para a investigación e seguimento dos contactos estreitos no ámbito das súas competencias, de forma coordinada coas autoridades de saúde pública.
- Coordinación: Cando nun mesmo centro de traballo desenvolvan actividades traballadores de dúas ou máis empresas, estas deberán cooperar na aplicación da normativa sobre prevención de riscos laborais.
Tendo en conta que as algunhas medidas preventivas establecidas na avaliación de riscos laborais, precisan da información e coordinación con empresas externas, garantirase a coordinación necesaria con eles para os efectos de garantir a seguridade e saúde dos traballadores, e a efectiva implantación das medidas propostas.
- Detalles
Na maior crise sanitaria coñecida onde a poboación de máis risco son os centros de maiores os/as gobernantes galegos seguen a buscar escusas para eludir as súas responsabilidades.
Dende o decreto do Estado de alarma e a declaración da Emerxencia Sanitaria poucas novas tivemos acerca da Conselleira de Política Social. Na máis grave crise de saúde para as persoas maiores non resulta de recibo que a máxima responsábel na xestión de residencias de maiores na Galiza non estivera ao fronte para informar, organizar e protexer as persoas maiores e ao cadros de persoal que seguiron nos centros de traballo prestando un servizo tan esencial na sociedade na que vivimos.
Delegou o seu traballo e responsabilidades noutros mandos intermedios da Consellería, entanto nunha tras outra residencia os maiores e o persoal caían infectados e se tomaban medidas de intervención pública de residencias privadas, mudando de centros ao persoal dunha forma imperativa e improvisada.
No día de onte atopámonos coa reaparición mediática da conselleira, entrevista na Radio Galega e foto virtual cos directores das residencias (incluído o “cesado” director da Residencia de Baños de Molgas).
Pero despois desta corentena mediática da Conselleira sorpréndenos que a primeira medida que toma sexa o cambio de xestión e dirección no Centro integrado de Baños de Molgas. Ou establecen propostas de xeito irreflexivo ou non se falan entre consellerías; porque por máis que insistan non nos vamos a crer que o Centro Integrado de Os Milagres xa está posto en marcha, cando non teñen nin claro se o plan de prevención para o persoal debe ser feito polo SERGAS ou por Política Social. Aínda que a causa tamén podería ser as declaracións do presidente da Sociedade Galega de Xerontoloxía e Xeriatría acerca das responsabilidades penais por desatención sanitaria dos maiores ou na censura feita por obrigar ao persoal traballador das residencias a enfrontarse ao seu posto de traballo sen medios de protección contra o COVID-19. A verdadeira resposta queda para as partes implicadas.
Nestes momentos de crise sanitaria, onde aínda non se coñece o alcance real das persoas maiores mortas e infectadas polo virus e onde non se lle fan os test nin se dotan de EPI´s ao persoal, non precisamos de dirixentes que veñan a facerse a fotos, senón de xestores eficaces e comprometidos polo que ou:
- non necesitamos dunha conselleira, porque o traballo se segue a facer igual e polo tanto debe dimitir, ou
- se debería de pór a alguén capaz ao fronte das Políticas Sociais e facer todo o posíbel por implantar un sistema público de atención integral ás persoas maiores no que non primen os intereses privados e o beneficio para os fondos de inversión, polo que tamén debería dimitir ou ser cesada esta conselleira.
O PÚBLICO É SERVIZO O PRIVADO BENEFICIO!!
- Detalles
No DOG núm. 141 do venres 26 de xullo de 2019 publicouse a LEI 4/2019, do 17 de xullo, de administración dixital de Galicia. Na LEDIXGA regúlase a sinatura e acreditación do persoal empregado público, incluíndo como novidade o uso dos certificados electrónicos con pseudónimo para certos colectivos o cal era demanda desta organización sindical desde fai anos.
- Detalles
A Consellería de Presidencia, Administracións Públicas e Xustiza, elaborou unha guía para todo o persoal da Xunta que, tal e como xa informamos a semana pasada, entorpece e atrasa as baixas por risco de COVID 19 a persoas especialmente sensibles (ir á nova referida).
Que teñas unha serie de patoloxías ou sexas maior de 60 anos NON determina directamente ese recoñecemento de persoal especialmente sensible polo que o primeiro paso que segundo esa guía terías que dar é facer unha solicitude á persoa responsable da unidade (director/a ou xefatura) para que estude a túa vulnerabilidade ante o COVID19.
Podes empregar este modelo de solicitude:
- Se traballas no ámbito sanitario ou sociosanitario: descargar.
- Se traballas no ámbito non sanitario ou non sociosanitario: descargar.
A persoa responsable da unidade (director/a ou xefatura) realizará un informe sinalando o nivel de risco segundo o establecido no Anexo IV desa guía e daralle traslado ao SPRL (Servizo de Prevención de Riscos Laborais) para que o servizo médico poida determinar se o teu posto pode adaptarse ou pola contra deberán apartarte do servizo.
O médico ou médica especialista en medicina do traballo, avaliará a solicitude recibida, e solicitará ao/á traballador/a a documentación acreditativa da súa situación que resulte procedente.
Lembra que é moi importante que non lle facilites os teus datos médicos a ninguén máis que ao servizo médico do SPRL.
- Detalles
O mércores 23 de abril a CIG asistiu a unha visita de avaliación de riscos laborais para a elaboración do Plan de prevención na Residencia dos Milagres en Baños de Molgas, da Fundación San Rosendo, reconvertida en residencia “integrada” pola Xunta para acoller a persoas maiores infectadas.
A visita evidencia a descoordinación entre a Consellería de Política Social e o SERGAS. Nese mesmo día o director foi cesado coa escusa de “pasar” a dirección asistencial ao SERGAS. Nin sequera o servizo de prevención que vai realizar a avaliación de riscos tiña coñecemento da nova dirección do SERGAS.
Visitamos “Chernóbil” e non se nos dan EPIs polo que NON puidemos acceder ás instalacións residenciais (unicamente á administración e á sala de cursos), e por tanto NON se pode facer o proceso de recollida de datos nin comprobar a implantación das medidas preventivas.
- Non puidemos comprobar o uso de EPIS por parte do persoal.
- Non puidemos visitar as instalacións.
- Confírmanse as nosas sospeitas sobre o ineficaz de forzar ao persoal baixo ameazas e ademais sen ningún tipo de información. Así se nos recoñece que o feito de que o persoal veña obrigado (con ameaza de repercusións penais) non é adecuado para traballar con normalidade e seguridade e aumenta os problemas no centro.
- Non hai director ou directora, que é o máximo responsable en prevencións. Non dan mais explicación ante a súa ausencia: tan só que “foi cambiado”.
- Comprobamos que as persoas que se presentan como responsables do centro non coñecen o Plan de acción de COVID elaborado polo Servizo de Prevención de Riscos Laborais a finais de marzo polo que cuestionamos que sexa aplicado correctamente.
- Esta visita parece dirixida a cumprir un requirimento legal dalgunha autoridade laboral como pode ser a inspección de traballo (ante a que a CIG presentou varias denuncias), pero na práctica é inútil xa que, como dixemos, NON podemos ver nada nin comprobar as medidas preventivas e témonos que quedar coa versión que nos contan.
- Insistimos na necesidade imperativa de facer os TEST nas residencias integradas coa oposición da consellería. Será finalmente o SERGAS quen fará os TEST ao persoal destes centros que traballa con residentes positivos. E máis neste caso onde o persoal traballou co lote de mascarillas defectuosas, o que de entrada produciu que como mínimo haxa unha empregada pública que deu positivo e dende a dirección da Residencia de Baños de Molgas trataron de convencernos de que seguramente “se contaxiaría fóra” porque non “saía da cociña”. Cuestionamos as afirmacións e solicitamos en todo caso a consideración a todos os efectos do contaxio como accidente laboral.
Trátase dunha improvisación ou falta de coordinación? A resposta é que a mala xestión e soberbia da consellería producen unha e a outra.
Mentres o persoal ten que traballar en condicións extremas de risco e sen que se lle garanta unha mínima seguridade laboral, a consellería xoga coa saúde no seu posto de traballo. Unha consellería irresponsábel que bota balóns fóra acusando ao SERGAS, a Función Pública e que sen ningún escrúpulo pretende sacudirse de enriba a súa responsabilidade neste desastre.
- Detalles
O mércores 23 de abril de 2020, o conselleiro de Medio Rural comunicounos que o persoal fixo descontinuo de 6 meses do Servicio de Prevención de Incendios Forestales (SPIF) vai reanudar a súa actividade o día 11 de maio.
Na CIG consideramos que esta incorporación tería que recoller as seguintes cuestións:
1. Formación e entrega de protocolos e procedementos preventivos co risco do COVID 19 (que inclúa técnicas de colocación e retirada axeitada de EPIS).
2. Puntos de encontro: é importante coñecer a localización dos puntos de encontro e o número de persoas que van acoller, así como o seu plan preventivo adaptado ao risco biolóxico do coronavirus. Urxe a realización ou revisions de avaliacións de riscos laborais de tarefas e centros co plan de risco ante o COVID (anexo).
3. EPIS: todo o persoal debe ter os EPIS precisos e dispoñibilidade de medidas hixiéncias axeitadas cun servizo de lavandería da roupa e EPI de incendios (ademais do risco para o COVID, o lavado e manipulación ten outros contaminantes tóxicos que non deben levarse aos fogares).
4. Salarios: solicitamos unha solución que permita percibir os salarios en maio, e non agardar ata finais de xuño.
5. Convocatorias telemáticas dos Comités de Seguridade e Saúde Laboral: tanto do da Consellería do Medio Rural como do específico do servizo de incendios.
Na CIG consideramos que para minimizar o contaxio é fundamental a prevención de riscos. Traballo SI, pero en condicións de SEGURIDADE.
A continuación achegamos as ligazóns aos protocolos de seguridade publicados pola Consellería do Medio Rural (actualizados a día de hoxe), así como información do procedemento para a declaración de persoal especialmente sensíbel.
Para calquera dúbida, contacta coa CIG.
Ligazóns:
- Procedemento para o recoñecemento coma persoal especialmente sensíbel (persoas con diabete, enfermidade cardiovascular, incluída hipertensión, enfermidade pulmonar crónica, inmunodeficiencia, cancro en fase de tratamento activo, embarazo e maiores de 60 anos)
- Información xeral para o persoal da Consellería do Medio Rural e específica para o SPIF
- Solicitude persoal sensible COVID19-Persoal non sanitario
