- Detalles
A CIG-Autonómica denuncia que a Consellería de Medio Rural da un paso máis cara a desconexión da vida no rural galego ao obrigar as persoas solicitantes de cortas de uso doméstico a relacionarse cunha aplicación dixital.
As oficinas de atención desta consellería como os distritos e comarcas forestais e oficinas agrarias comarcais cada vez máis perto do peche, este paso segue ao desmantelamento de formación e labores de asesoramento polas oficinas comarcais aos propietarios de parcelas agrarias e forestais, os novos procedementos para a obtención de permisos e a obriga da relación telemática dos produtores.
O pasado mes de maio publicouse o novo decreto de aproveitamentos forestais (DECRETO 73/2020, do 24 de abril, polo que se regulan os aproveitamentos madeireiros e leñosos, de cortiza, de pastos, micolóxicos e de resinas en montes ou terreos forestais de xestión privada na Comunidade Autónoma de Galiza) que recolle como principal novidade que todas as solicitudes teñen que tramitarse de forma dixital. Este feito fundamentado na axilización da tramitación administrativa (reclamada pola industria) comporta unha dura consecuencia para as persoas do rural aos que se lles impide poder facer as solicitudes de uso doméstico (cortas pequenas para leñas) de forma presencial nas oficinas da administración.
De esta forma a partir do 9 de xuño (data da entrada en vigor do novo decreto) toda a persoa que queira solicitar un aproveitamento de madeira ou leñas independentemente que teña un uso comercial ou doméstico, ten que facelo de forma telemática e ter un certificado dixital ou unha chave 365. Caso contrario comporta acudir a unha xestoría e pagar por unha tramitación (temos constancia de custes de uns 60€ por xestorías en distintos lugares) ou no peor dos casos deixar de facer o trámite ante a existencia dunha barreira dixital imposta sen alternativa.
Desde a CIG pedimos que se busquen solucións de servizo público para o rural e que a brecha dixital que quere impoñer o conselleiro de Medio Rural. Apoiando unha vez máis á industria sen garantir o servizo publico as persoas persoas usuarias do medio rural. Na CIG na defensa da actividade tradicional da Galiza rural como valor prioritario para a pervivencia do país loitamos pola cohesión social e mantemento dos servizos directos aos cidadán e propuxemos achegas que finalmente se incorporaron á lei 4/2019, do 17 de xullo, de administración dixital de Galiza. Destaca o seguinte parágrafo da exposición de motivos: “Na súa configuración será necesario ter en conta a especial dispersión no medio rural, que abrangue máis do oitenta por cento do territorio de Galiza, así como a necesaria dotación suficiente de medios humanos e materiais para a atención da rede”. Esta mesma norma indica no seu artigo 12.2. que a Administración xeral e as entidades instrumentais do sector público autonómico de Galiza prestarán especial atención aos factores que poidan agravar as dificultades de relación dixital, en particular a idade, a localización no medio rural ou a situación de precariedade económica ou de exclusión social.
Para poder resolver esta situación desde a CIG reclamamos o desenvolvemento da disposición adicional terceira da lei de Administración Dixital de Galiza vinculado a asistencia á cidadanía no relativo aos medios tecnolóxico (o punto segundo di: “Coa finalidade de garantir o acceso igualitario aos servizos dixitais durante o proceso progresivo da incorporación do uso dos medios dixitais na sociedade, as oficinas de atención á cidadanía e de rexistro poderán desenvolver actuacións específicas tendentes a favorecer a progresiva incorporación, familiarización ou desenvolvemento do uso dos medios dixitais por parte dos colectivos que especialmente o requiran”) e a aplicación do rexistro do persoal funcionario público habilitado (capítulo V desta mesma lei), para que os empregados públicos incluídos neste rexistro podan actuar en nome dos administrados e realizar as tramitacións telemáticas.
Cando se lle preguntou ao actual conselleiro pola tramitación telemática das solicitudes de corta, nun dos actos de campaña feito nas redes (ver minutos 12 a 14), mentiu de forma descarada, indicando que este trámite podía facerse nos concellos ou nas oficinas de medio rural. A realidade indícanos que todo isto non é posible posto que non están desenvolvidos os elementos humanos e materiais necesarios que o poden poñen en marcha en base á norma indicada con anterioridade. Polo tanto, señor conselleiro deixe de enganar aos cidadáns do medio rural axilizando trámites só para os intereses dunha parte e póñase a traballar para reducir a brecha dixital e dar servizo a cidadanía tal e como lle obriga a lexislación actual.
- Detalles
No DOG do venres 3 de xullo de 2020 vén de publicarse a resolución do 23 de xuño de 2020 pola que se convocan as actividades de formación continua para o persoal ao servizo da Administración xeral da Comunidade Autónoma de Galicia, das entidades públicas instrumentais do sector público autonómico e da Administración institucional.
O prazo de presentación de solicitudes comezará o día seguinte ao da publicación desta resolución no Diario Oficial de Galicia e rematará o día 16 de xullo de 2020.
As solicitudes de participación nas actividades formativas só se poderán realizar mediante o formulario de matrícula telemática dispoñible no enderezo https://egap.xunta.gal/matricula desde as 8.00 horas da data de inicio do prazo de presentación de solicitudes e ata as 23.55 horas da data de finalización. As solicitudes entenderanse presentadas unha vez que se complete correctamente o proceso de matriculación.
O número máximo de cursos que se pode solicitar durante o prazo de presentación de solicitudes limítase a cinco.
- Detalles
O día 29 de xuño rexistramos un escrito onde se recollen diferentes erros das novas aplicacións CORWEB e CORPRI, desenvolvidas e promovidas pola Dirección Xeral de Planificación e Ordenación Forestal da Consellería do Medio Rural da Xunta de Galicia.
Algúns dos erros detectados son:
- falta de tempo de adaptación para o uso das aplicacións,
- falta de formación,
- falta de previsión nos accesos directos dos visores necesarios para cumprimentar os diferentes partes dos informes,
- non ter en conta a normativa existente en canto o uso do NIP por parte dos Axentes,
- a inclusión de varias referencia catastrais no mesmo expediente o que dificulta o seu informe, etc.
Estas aplicacións impoñen a obriga de presentar de xeito telemático todas as solicitudes de aproveitamentos, sin medidas nin tempo para a súa adaptación, limitan o acceso ás persoas usuarias ao servizo publico ademais de dificultar o control polo persoal axente e técnico dos aproveitamentos forestais.
Por todo isto, a CIG solicitou por escrito que se corrixan as disfuncións detectadas e se cre un grupo de traballo para facer seguimento da posta en marcha das aplicacións.
- Detalles
Ante a paralización sen acordo das xuntanzas coa consellería do Medio Rural por falta de propostas concretas por parte da administración, as organizacións sindicais convocan a terceira teleasemblea de persoal técnico de incendios forestais para o vindeiro luns 6 de xullo ás 21h.
Nesta nova convocatoria darase conta das distintas xuntanzas mantidas coa consellería e aprobaranse as medidas que se porán en marcha nas vindeiras semanas para seguir solicitando de forma lexítima un novo acordo que regule as condicións de traballo de forma efectiva.
Ante a negativa da administración de presentar unha proposta, o persoal técnico de incendios farase escoitar.
Por un NOVO ACORDO XA!!!!
- Detalles
Recollemos nun único arquivo todos os postos vacantes iniciais do concurso de traslados de corpos xerais (DOG 27/11/2019), xunto con todas as potenciais resultas, e os códigos correspondentes ás escalas, formación e observacións.
O arquivo contén nove lapelas. A primeira cos postos de todos os grupos (vacantes e resultas unidas). As cinco seguintes, só os postos dun grupo. As seguintes son as indicacións dos códigos de escalas, formación e observacións.
Os datos están collidos directamente do Portax. Simplemente os agrupamos nun único arquivo.
- Detalles
Os servizos xurídicos da CIG gañaron a primeira sentenza que recoñece a unha persoa que é funcionaria interina o dereito a acceder ao grao I da carreira administrativa por medio do réxime extraordinario publicado no DOG do 29 de marzo de 2019 nas mesmas condicións que se recollían para o persoal funcionario de carreira.
Pero os efectos van máis aló do individual e TEÑEN CARÁCTER XERAL, xa que a sentenza declara nulo, por discriminatorio, o artigo 3 da orde pola que se publica o acordo da Xunta con CCOO e UGT de acceso ao grao I do sistema de carreira profesional do persoal funcionario de carreira e do persoal laboral da Xunta.
Para chegar a esta sentenza o tribunal basease nas sentenzas do Tribunal de Xustiza da Unión Europea e a súa aplicación pola doutrina do Tribunal Supremo español sobre a consideración de discriminación cando se aplican diferentes medidas no trato de persoal temporal respecto do fixo, doutrina na que o Tribunal Supremo xa se pronunciou en sentenzas do proprio ano 2019. A CIG xa o advertiu dende o minuto un sinalando que incluso o Tribunal Supremo se estaba a pronunciar no sentido da non discriminación do persoal interino ou temporal como dixemos aquí ou aquí.
Esta sentenza abre o camiño para que as reclamacións de recoñecemento da carreira administrativa do persoal funcionario interino, que a CIG recomendou para aquelas persoas que o acordo coa Xunta deixou excluídos dese dereito, se vexan recoñecidas.
Pero a Xunta non debe esperar a que a sentenza adquira firmeza, debe sentarse a negociar xa unha modificación do Acordo para a implantación do réxime extraordinario de acceso ao grao I onde se inclúa a todo o persoal empregado público dentro do seu ámbito subxectivo e se lles recoñeza o grao I con efectos retroactivos dende o 1 de xaneiro de 2019.
E tampouco debe esperar a que saia a sentenza da demanda que con carácter xeral a CIG presentou nese mesmo tribunal e que con toda a probabilidade vai ir no mesmo sentido.
Hai que lembrar que a CIG non asinou o acordo de carreira profesional para o persoal funcionario e laboral porque considerábamos que establecía unha serie de cláusulas inxustas, entre as cales citábamos a grande diferenza entre os grupos altos e baixos no importe anual; inexistencia da concreción de como se cobrarían os seguintes graos e a discriminación respecto do persoal funcionario de carreira do persoal laboral e do persoal interino.
O recoñecemento de que o acordo de carreira profesional da Xunta avalado por CCOO e UGT é ilegal e discriminatorio respecto do persoal interino da a razón á CIG na súa postura de defensa dos intereses de todas as persoas que traballan para a Xunta sen distinción segundo a relación laboral que teñan coa administración.
- Detalles
Por se che é de utilidade, ofrecémosche unha folla de cálculo con todas as prazas que podes escoller na túa solicitude do concurso de traslados de corpos xerais, tanto vacantes como prazas de resultas xuntas nun mesmo arquivo.
O arquivo contén seis lapelas. A primeira cos postos de todos os grupos. As seguintes, só os postos dun grupo. Todas coas vacantes máis as resultas.
- Detalles
O Tribunal Superior de Xustiza de Galiza acepta a demanda da CIG e anula a RPT da Consellería de Economía, Emprego e Industria publicada o 17/07/2018, por vulneración do dereito á negociación colectiva, vulneración do procedemento, ausencia de avaliación orzamentaria e falta de motivación dos actos administrativos.
En xuño do 2018 aprobouse en Comisión de Persoal unha modificación da RPT da Consellería de Economía, Emprego e Industria, conxuntamente cun “Plan de ordenación de recursos humanos de las oficinas de empleo y centros integrados de formación profesional“ e un “Acordo dobre condicións laborais do persoal de supervisión e seguimento da Formación Profesional para o Emprego”. A Resolución foi publicada no DOG do 17/07/2018.
As persoas que exercen a dirección política da Administración Autonómica galega están acostumadas a facer o que lles peta, a pasar por riba dos dereitos dos traballadores e traballadoras baixo a escusa da potestade organizativa, sen repetar as súas obrigas de sentarse a negociar.
A RPT anulada destruía máis de 90 postos de traballo, creaba 70, modificaba a forma de provisión e áreas funcionais de numerosos postos, creaba diferenzas entre as Oficinas de Emprego que dividían en tres clases con diferentes formas de provisión e remuneración. Vamos, que facía importantes cambios na estrutura de postos de traballo, e facíao despachando o asunto en poucos días convertendo o deber de negociar en meros trámites formais. Finalmente a CIG quedou en solitario rexeitando a modificación da RPT proposta (CCOO, CSIF e UGT votaron a favor na Comisión de Persoal, e a CIG votou en contra).
Unha vez publicada en DOG, a CIG presentou un contencioso ante o TSXG, por:
- Violación do dereito á negociación colectiva e información, en relación coa substitución do proceso de negociación do conxunto da RPT aprobada por un mero tráfime de consulta: a Administración consultou e resolveu as alegacións das centrais sindicais, máis eso non foi negociar a RPT.
- Vulneración do procedemento legalmente establecido para a negociación das modificacións de RPTs: a Administración non só non negociou senón que violou o procedemento legalmente establecido, ao incorporar ao proceso un Plano de Reordenación das Oficinas de Emprego e dos CIFP a última hora, polo que modificou a proposta de RPT inicialmente entregada ás centrais sindicais sen dar opción a negociar nada.
- Ausencia de avaliación e informe da Dirección Xeral de Planificación e Orzamentos da Consellería de Facenda: a Administración vulnerou o procedemento establecido polo artigo 16 da LEPG sobre o carácter previo á aprobación da RPT do informe da consellería competente en materia de orzamentos.
- Infracción do ordenamento xurídico por falta de motivación dos actos administrativos, como garantía fronte á arbitrariedade e á incongruencia, en relación coa adecuación dos postos de traballo dos directores/as dos Centros Integrados de Formación Profesional e a nova clasificación das Oficinas de Emprego e adecuación dos postos de traballo dos seus directores e directoras (complementos, e cobertura mediante libre designación).
O 17 de xuño de 2020, foi ditada sentenza polo Tribunal Superior de Xustiza de Galiza que estima o recurso contencioso-administrativo contra a referida RPT, que anula. A sentenza non é firme, pois cabe recurso de casación ante o Tribunal Supremo.
A CIG dirixiu escrito ao DXFP solicitando unha reunión urxente para coñecer cales son agora as pretensións da Administración para solucionar os problemas xerados por eles.
- Detalles
Función Pública non incluíu as novas vacantes xeradas dende a convocatoria do concurso, en novembro de 2019.
Cando o 27 de novembro do 2019 foi publicada a convocatoria do concurso de traslados de corpos xerais, Función Pública difundiu tamén a relación de vacantes ofertadas (na propia convocatoria). Pero a solicitude de postos non se podería facer ata que por xaneiro sacarían un segundo listado coas prazas das persoas que solicitaron concursar e por tanto eran potenciais vacantes (esto é, o listado de posíbeis resultas).
Pasou xaneiro, e febreiro, e mediados de marzo (ata ese intre o virus non era a xustificación da paralización do concurso); e chegou a corentena... Pasaron tantos meses que foron aparecendo novas vacantes. Así que un bo día, a primeiros de xuño, Función Pública enviounos un listado de vacantes novas para incluír no concurso. Recibimos un montón de correos de compañeiros e compañeiras, e fixemos as correspondentes alegacións. Que enchenta tivemos cando vimos que aceptaban algunhas!
Pero... foi fume. Porque finalmente o listado de vacantes que publicaron para escoller destino a partir do día 29 de xuño, NON INCLÚE ningunha desas prazas vacantes novas. Non quixeron darnos explicacións en Función Pública, pero podemos albiscar que se trata dunha cuestión de seguridade xurídica ante posíbeis impugnacións por non abrirse un novo prazo para poder participar no concurso. Pode ser. Pero á CIG prodúcelle xenreira ser conscientes de que vamos para dous anos de retraso, e que estas prazas vacantes non incluídas no concurso, en troques de ser cubertas como deus manda, van selo mediante designación dixital (Comisión de Servizos), sen ningún criterio obxectivo.
O concurso, afectado por unha sentenza
Para complicar a cousa, o Tribunal Superior de Xustiza de Galiza ditou sentenza o 17 de xuño pola que anula a modificación da RPT da Consellería de Economía, Emprego e Industria de data 17/07/2018. Función Pública e a CEEI fixeron o que lles petou, deturparon a negociación colectiva, saltáronse as normas ás que están obrigadas .. E agora, que vai facer a Adminsitración coas prazas afectadas? Van retirar do concurso as prazas creadas ou modificadas? Van engadir as amortizadas indebidamente? Van actualizar os cambios de méritos, niveis, areas funcionais e formas de provisión que foron modificados pola RPT anulada e restaurar os seus orixinais?
A CIG dirixiu escrito ao DXFP solicitando unha reunión urxente para coñecer cales son agora as pretensións da Administración para solucionar os problemas xerados por eles.
- Detalles
O 30 de xuño de 2020 e a un día do comezo da campaña de alto risco de incendios, tivo lugar a constatación da paralización das negociacións do novo acordo do persoal técnico de incendios. Na xuntanza mantida pola consellería do Medio Rural coas organizacións sindicais, despois de máis de dez meses agardando por unha proposta dun novo acordo; os representantes da consellería, tan só foron quen de presentar unha modificación dun parágrafo do acordo do ano 2008 que tan só afecta a unha parte do persoal técnico e que non resolve nin unha mínima parte das reivindicacións.
A posición adoptada pola consellería do Medio Rural supón un desprezo polo traballo desenvolvido polo persoal técnico de incendios forestais e o nulo interese por iniciar unha negociación real das novas condicións de traballo, o que levou ás catro oganizacións sindicais presentes a NON aceptar o parche proposto (ver comunicado conxunto) e non voltar a xuntarse ata non ter unha proposta escrita riba da mesa. Esta postura está ratificada de forma maioritaria polo persoal técnico de incendios forestais que amosaron a súa postura por distintas vías.
Ante esta situación, non queda outro camiño que continuar coas mobilizacións e accións de presión, para o que se convoca a todo o persoal técnico de incendios forestais á 3ª teleasemblea que se celebrará o vindeiro luns 6 de xullo ás 21h (ver cartel), onde se decidirán as medidas que se tomarán nas vindeiras semanas.
