- Detalles
O día 20 celebramos por vídeoconferencia a reunión extraordinaria do CSSL do edificio administrativo de Pontevedra.
Despois dunha rolda de intervencións na que analizamos todo o feito e o que queda por facer, as conclusións finais foron:
- Revisar a sinaléptica que se colocou, e ademais dado que o BOE publica hoxe a obrigatoriedade do uso de mascarilla, colocar tamén esta obriga.
- Ampliar sinalización en zonas comúns e reorganizar o uso das escaleiras de subida e baixada, deixando as laterais para as plantas da 1ª á 3ª, e as centrais a compartir entre os administrados e o persoal do edificio, para as plantas da 4ª á 9ª. Neste momento as centrais estaban só de subida e as laterais de baixada.
- Colocar expendedores de hidroxel nos dous andares do garaxe na entrada aos ascensores para que os traballadores que accedan desde o garaxe poidan utilizalo.
- Dirixirnos ás distintas xefaturas territoriais, que son as responsábeis de poñer todos os medios, para que os poñan dunha vez, porque ata o de agora o criterio que seguiron algunhas foi poñer as condicións de traballo que sinala o protocolo nesta fase so para o persoal que se incorporou o luns.
- Crear unha comisión de seguimento das medidas a implementar, na que estaremos dúas representantes da CIG e o representante do CSIF.
- Faremos un informe semanal de como van transcorrendo as cousas, e celebraremos nova reunión do comité en xuño que xa estaremos na seguinte fase.
Desde a CIG pedimos ademais formación para o persoal. A resposta foi que todo o mundo recibiu o protocolo aprobado polas centrais sindicais no seu correo corporativo. Iso non é suficiente e insistimos na necesidade de formación e esperamos que ao final se faga algo ao respecto.
Dicir tamén que ante a petición de realizar unha avaliación de riscos polo COVID19, o xefe de servizo de prevención de riscos en Compostela que tamén asistiu como asesor a este comité, informou de que xa está feita unha avaliación de riscos por COVID19 para oficinas e despachos e que a faría chegar a súa Secretaría Xeral Técnica, que será a que a pase ás distintas secretarías xerais.
- Detalles
A Consellería de Educación obrigou a unha boa parte do seu persoal a incorporarse ao seu posto de traballo o pasado 11 de maio. Facíao ás presas e correndo, porque quería abrir o prazo de matrícula seguindo a estratexia do PP de aparentar normalidade polos seus intereses eleitorais.
Inmediatemente a CIG presentou denuncia ante a Inspección de Traballo e Seguridade Social polo incumprimento por parte da consellería da lexislación en prevención de riscos laborais e a falta de negociación coa representación sindical xa que as únicas directrices que facilitou foron unhas simples “Recomendacións sanitarias a establecer nos centros educativos”, sen implementar medidas de seguridade para persoal e usuarios.
Ante o requirimento da inspectora para que acreditara documentalmente as actuacións, esta consellería enviou (fora de prazo) como medidas preventinas unicamente un “pequeno informe e un documento xenérico de recomendacións sanitarias nos establecementos educativos” volvendo a mostrar a sua prepotencia e total despreocupación.
Despois de examinar a documentación aportada pola consellería, a Inspección considerou que esta non cumpriu co seu deber de protección e información ao persoal.
Para tratar de arranxalo a consellería convocou para o pasado mércores 20 a Mesa Sectorial de Ensino, para negociar un protocolo de reincorporación onde so está representado o persoal docente. Non convocou á representación do persoal non docente, que sigue sendo desprezado.
Dende a CIG-Autonómica achegamos un documento cunha serie de consideracións e propostas preventivas ao COVID19 e solicitámoslles que convocaran á representación do persoal non docente ou ben tratalo no marco da Mesa Xeral de Empregados Públicos. Porén, a día de hoxe seguimos sen novas da consellería de educacion. Está claro que o persoal laboral, auxiliar administrativo e subalterno non lle importa o máis mínimo.
Educación non informou nin negociou coa representación legal do persoal laboral e funcionario de administración con destino nos centros de ensino, polo que CIG-Autonómica decidirá as medidas a tomar.
- Detalles
Máis preocupados polo CANDO que polo COMO incorporarse
A semana do 11 de maio tivemos tres xuntanzas telemáticas conxuntas dos Comités de Seguridade e Saúde Laboral (CSSL) de Medio Rural e de Incendios.
O luns día 11 de maio tivemos un CSSL conxunto dos dous comités existentes na Consellería de Medio Rural, o CSSL de Incendios e o CSSL de Medio Rural. A convocatoria urxente chegara o venres 8: despois de case dous meses de estado de alarma, case sen tempo para poder estudar a documentación remitida ou facer consultas cos compañeiros e compañeiras.
Tras esta xuntanza viñeron duas máis a mesma semana (13 e 15 de maio). As persoas responsábeis da Administración quedaron en remitirnos un documento base coa estratexia de incorporación para ser estudado polos representantes dos traballadores e traballadoras. Está estratexia, xunto cuns protocolos de incorporación claros e adaptados á realidade, foron sempre defendidas pola CIG para que o persoal se puidese incorporar con seguridade aos diferentes postos de traballo.
A presión da CIG fixo que se pasara dun documento simple de menos de dúas páxinas no que tan só importaba o CANDO incorporarse, a un documento no que aparece unha estratexia máis polo miudo (consulta aquí) no que se define o COMO incorporarse. De feito a incorporación efectiva pensada para o 11 de maio tiveron que adiala ata ter definida unha estratexia concreta para a incorporación do persoal de incendios.
Nas 3 reunións deste Comité mixto a CIG seguiu defendendo as achegas que presentou por escrito (primeiras achegas, e segundas achegas) e que xiran arredor destas cuestións xerais e especificas, moitas das cales foron recollidas no documento final aprobado pola consellería do medio rural:
- Avaliación previa de riscos laborais específica por centro de traballo e posto, en base a unha radiografía dos distintos centros que permita unha efectiva planificación das necesidades preventivas para cada lugar e categoría.
- Reconsideración do risco biolóxico establecido para o COVID-19:
O informe de Cualtis recolle o que o risco bioloxico do SARS CoV-2, como de nivel 2, cando dende a CIG defendemos o risco como de nivel 3. Esta redefinición de nivel é un concepto importante para definir os distintos protocolos de traballo. - Formación previa para todo o persoal: requisito imprescindible antes de calquera reincorporación e que inclúa unha parte práctica.
- Medidas a aplicar ao persoal sensible/vulnerable: solicitamos que se cumpra co requerimento da Inspección de Traballo (consecuencia da denuncia da CIG) e o procedemento de recoñecemento de persoal especialmente sensible se faga acorde ao procedemento establecido polo Ministerio de Sanidade (solicitude do traballador/a directamente ao Servizo de prevención de riscos laborais que será quen resolva) e que namentres non se resolve o procedemento o persoal vulnerable non se incorpore a traballar. Esta reivindicación aparece recollida na resolución do 18 de maio de 2020 do CECOP.
- Medidas para a conciliación familiar e laboral: o persoal que formamos parte do servizo de incendios, aínda que sexa considerado servizo esencial, somos ante todo persoas que no estado actual de alarma nos atopamos pechados os centros educativos, os centros de maiores e os centros de persoas con discapacidade; polo que esiximos que se podan buscar alternativas ás necesidades de conciliación por menores ou maiores a cargo antes da incorporación do persoal que o precise, e que esta tramitación se faga a través do servizo de persoal e non a través do distrito.
- Fomento do teletraballo para todas as funcións e categorías que o permitan tal e como aparece recollida nas recomendacións e normativa do Estado.
- Medidas preventivas e organizativas en todos os centros de traballo (especialmente oficinas de distrito e puntos de encontro). Estas medidas preventivas e organizativas, que a Xunta pretendía obviar nas tres reunións, foron unhas das liña vermellas que nos marcamos desde a CIG. A incorporación ten que vir precedida dunha estratexia e dunha organización clara. Así o fixemos saber en moitas das nosas intervencións e o recolleramos nas nosas achegas, nas que tentamos detallar e concretar o máis posible esas medidas.
- Medidas organizativas en materia de quendas para evitar a rotación constante e o contacto do persoal: xornadas voluntarias de 10 horas para todo o persoal para minimizar o número de xornadas de servizo presencial, establecemento do binomio brigada-condutor/a de motobomba, baseándonos na Proposición Non de Lei xa presentada pola CIG en novembro do 2018 e nunha instrución de quendas do 2018 da propia Administración. Magoa que a Xunta, como na maioría dos puntos tratados, se limitase a dicir que estudará a proposta sen clarexar nada e sen ter presente que con este mínimo cambio reduciríase moito o risco de contaxio asi como o número de vehículos compartidos.
Na CIG defendemos que a incorporación do persoal tense que facer con todas as garantías e seguridade polo que denunciamos a falta de stock, a formación deficiente, a situación de incertidume do persoal, a falta de xustificación da imposición dos medios a incorporarse, a falta de medidas organizativas e a planificación dos distintos lugares de traballo.
Servizo público SI pero seguridade TAMÉN
- Detalles
O venres 15 de maio celebrouse por videoconferencia o III Comité de Seguridade e Saúde Laboral da Consellería de Medio Ambiente, Territorio e Vivenda que demandamos para a avaliación e control das medidas preventivas ante a emerxencia sanitaria polo coronavirus.
Como primeiro punto tratamos a Avaliación de risco biolóxico COVID-19 en traballos de campo. O técnico de Prevención de riscos laborais da Xunta presentou a avaliación que, ao noso parecer é insuficiente e non se trata dun documento de avaliación completo senon unha simple recompilación de medidas lexislativas e os protocolos de actuación internos da Consellería.
O segundo punto, reincorporación ao traballo presencial na CMATV entregóusenos o documento por correo o mesmo día do comité, polo que non deu tempo á súa análise. Por esta razón abren un prazo para reclamar.
Toda esta documentación pódese encontrar aquí: https://cmatv.xunta.gal/coronavirus
Dende a CIG seguimos a reclamar:
- Avaliación de riscos laborais de todos os centros de traballo co seu plan de acción ante o coronavirus.
- Formación e información (teórica e práctica) a todos os traballadores e traballadoras antes da súa incorporación o traballo presencial.
- Disponibilidade e EPIS, en cantidade abonda e de cualidade axeitada para cada traballo e traballador/a.
- Que o persoal sensible, así como o que teña problemas para conciliar a vida familiar e laboral, se lle aparte do seu posto de traballo ata a resolución da súa solicitude.
- Tres meses de período extraordinario para os Axentes Forestais e Medio Ambientais.
- Horarios flexibles para todo o persoal.
- Sinatura dixital con certificado de pseudónimo
- Detalles
O venres 15 e o luns 18 tivemos xuntanzas con representantes da Consellería de Infraestruturas e Mobilidade. A xuntanza do venres foi co secretario xeral técnico (SXT) para tratar os protocolos de reincorporación ao traballo presencial. O luns foi unha xuntanza do Comité de Seguridade e Saúde Laboral (CSSL). Teremos unha nova xuntanza do CSSL o martes 26.
O que manifestou a Administración nas dúas xuntanzas foi:
- Que partindo das directrices do protocolo xeral de reincorporación da Xunta, foron vendo todas as cuestións que nel se plantexan. Na primeira semana realizaron as actuacións preliminares que remitiron no informe que indica vicepresidencia. O informe está detallado segundo os diferentes servizos, tendo en conta edificios administrativos e outros centros de traballo. Nos edificios administrativos tívose en conta o cumprimento das distancias de 2 metros entre postos de traballo, a sinalización de espazos comúns e as incidencias a correxir.
- Fixeron protocolos e instrucións específicas para AXI, Augas e Mobilidade.
- Incorporan unicamente ao persoal que non pode realizar as súas funcións na casa, pero sen marcar prazos específicos para a incorporación.
- Nesta semana incorpóranse os xefes de servizo o persoal que non pode realizar as súas funcións en teletraballo, insistindo en que fomentarán o teletraballo na medida do posible.
- En canto ás solicitudes de teletraballo para persoal vulnerable din que primeiro hai que solicitar o teletraballo a función pública para persoal vulnerable e se resulta denegado poderíase iniciar o procedemento de declaración de persoal vulnerable co departamento de prevención de riscos.
- Nos servizos centrais cúmprense en xeral tódolos requirimentos do protocolo de reincorporación con algunhas excepcións. En Augas de Galicia hai máis problemas, pero están buscando solucións. Nos servizos periféricos están adaptando as instalacións para cumprir cos requirimentos.
- Sobre o uso das máscaras din que se se cumpren as distancias non fai falta, ao que respostamos que non toda a xornada, e en case ningún corredor ou escaleira se poden cumprir as distancias.
- Comentan que está pendente a licitación da roupa de traballo que quedou paralizada pola declaración do estado de alarma, pero que a retomarán en canto poidan.
Por parte da CIG, manifestamos o seguinte:
- Que non obriguen a ninguén a reincorporarse sen contar con todas as medidas de seguridade. Aceptan e van organizar equipos de traballo para evitar acumulación de persoas.
- Preguntamos sobre o mantemento e revisión dos sistemas de ventilación. Respostan que se están a revisar todos.
- Queixámonos pola falta de negociación dos protocolos e a súa revisión por parte do Servizo de prevención de Riscos Laborais (SPRL) que debe supervisalos. Respostan disculpándose e comprometéndose a negociar as posíbeis modificacións no CSSL.
- Reclamamos que se aposte pola continuidade e extensión do teletraballo, ao que respostan que agardan pola negociación que os sindicatos teñamos con Función Pública.
- Denunciamos que non se impartiron instrucións relativas a medidas organizacitvas e de protección, e o incumprimento do deber de formación e información que esixe a Lei de prevención de riscos laborais. Comprométense a contactar coas xefaturas territoriais para corrixir as carencias.
- Queixámonos pola falta de concreción no informe, que só dá cifras xerais sen identificar que persoal conta con despacho propio en cada edificio, cantos espazos de traballo compartidos cumpren a distancia de 2 metros, cantos postos hai que reordenar se non cumpren as distancias, cantos postos se cuantifican fóra de edificios por categorías e que non se consultou ao persoal sobre a posible reoranización de quendas de traballo.
- Criticamos que o informe só se refire á fase 1 e só detalla que en principio nesta fase se reincorporan ou continúan as funcións que viñan facendo un total de 329 persoas, pero sen dicir moito máis, nin que pasa coas outras persoas traballadoras ata un total de 682 da consellería. Omíteses ao persoal de brigadas do que aínda non sabemos cando terían que incorporarse por non poder teletraballar
- Reclamamos que se especifique nos protocolos que as reunións se realicen preferentemente de xeito telemático e as comunicacións se fagan utilizando medios electrónicos e se reduza o uso do papel.
- Incidimos na falta de medidas para evitar distancias inferiores aos 2 metros, por exemplo nos postos dos ordenanzas das entradas. Denunciamos que faltan mamparas ou mesas que delimiten eses espazos. Incidimos en que o mesmo luns 18 houbo incorporación de persoal sin facilitarlles máscaras ou xeles desinfectantes a disposición
- Mostramos a problemática dos equipos informáticos compartidos, por exemplo entre os vixilantes de estradas, sen medidas preventivas como a desinfección. Reclamamos máis medios informáticos que nos permitan non ter que compartir equipos, accesos telemáticos aos datos e ás cartografías ou outros, e apoio para poder teletraballar.
Non houbo discrepancias co resto de organizacións sindicais que avalaron a exposición da CIG. Un sindicato pide o uso máis extendido da desinfección por ozono e os compañeiros da CIG amosamos a nosa desconformidade ao uso indiscriminado deste gas polos posíbeis perxuízos que pode causar á saúde.
- Detalles
Na reunión mantida hoxe, martes 19, a CIG pediu a volta á fase preliminar para garantir a toma de medidas preventivas antes da apertura ao público e a incorporación do persoal.
Esta reunión foi convocada pola denuncia presentada o luns 18 ante a Inspección de Traballo contra a Consellería de Cultura e Turismo por abrir centros como bibliotecas, arquivos e museos sen medidas de prevención ao COVID19 ata co 100% do persoal, incumprindo as fases de reincorporación previstas no Protocolo xeral. Para a CIG esta actuación deixou clara a presa da Xunta de Galiza pola volta a unha normalidade ficticia con vistas electorais.
A actitude dos responsables de Cultura pode ser cualificada de chulesca. O secretario xeral técnico bota balóns fora acusando ao goberno do estado español da apertura apresurada dos seus centros culturais manifestando incluso que o fixo por “imperativo legal” e que o único que pretenden é dar “translación as fases de apertura e proporcionar os servizos de cultura”, como se agora fosemos nós quenes quixeramos paralizar este dereito e eles foran os máximos defensores da cultura.
Non abren por imperativo legal, xa que as normas estatais non os obrigan, abren por imperativo electoral.
Sexamos serios, non se pode abrir un centro ao público nin ao persoal sen a mínima seguridade, polo que dende a CIG-Autonómica tratamos de expoñer as eivas da desescalada nos centros culturais e xefaturas territoriais, e as inconcrecións dos documentos elaborados pola consellería no marco das fases progresivas da volta ao traballo presencial na Xunta de Galiza, para intentar que a consellería recuara e peche ata poñer as medidas preventivas ante o risco de contaxio polo coronavirus.
A falla de formación e actitude preventiva é manifesta nesta secretaria xeral técnica que mesturou ISSGA con Servizo de Prevención de Riscos Laborais (SPRL) e recomendacións estatais con protocolos e informe de fase preliminar sen ningún tipo de pudor. Ao final da xuntanza, como se dun carameliño se tratara, acordou convocar o comité de seguridade e saúde laboral para o venres, o que por certo non convocan dende 2018, e que están obrigados pola denuncia da CIG ante Inspección de Traballo e polo propio Protocolo xeral.
Resumo do acontecido neste mes de maio:
- 09 - Publicación do Protocolo xeral de reincorporación ao traballo na Xunta de Galiza.
- 12 a 14 - Presentación do borrador de protocolo de incorporación ao traballo nos centros de Cultura e presentación de alegacións por parte da CIG.
- 15 - Informe (parcial e insuficiente) das actuacións da SXT de Cultura na fase preliminar para a reincorporación do persoal ao traballo presencial.
- 15/16 - Comunicación a todo o persoal da inmediata incorporación o luns 18.
- 17 - Escrito conxunto das OOSS á Xunta con denuncia pública da intención da incorporación ao traballo presencial sen medidas preventivas.
- 18 - Denuncia da CIG, CCOO, UGT e CSIF ante Inspección de Traballo polo incumprimento desta consellería do Protocolo e a apertura dos centros.
- 19 - Publicación no DOG do Protocolo de incorporación ao traballo nos centros de Cultura aprobado no CECOP o 17 (sen negociar).
- 19 - Reunión das OOSS coa Consellería de Cultura.
En definitiva, tiveron presa por abrir os centros é incorporar ás bravas, saltáronse as fases, pasaron da comprobación do SPRL, do CSSL e cargaron ás direccións dos centros de toda a responsabilidade en base a un protocolo para centros de cultura, que se sacaron da manga, chapuceiro e inconcreto: Se lle saen as cousas ben é grazas ao esforzo e sentido común do persoal.
- Detalles
Este luns 18 varias delegadas e delegados da CIG estivemos a botar un ollo ao estado das instalacións de San Caetano co motivo da volta ao traballo presencial do persoal da fase 1, imposta pola Xunta sen ter rematada axeitadamente a fase preliminar. Pois nesta fase previa era onde se tiñan que acometer os traballos para que a xente voltase en condicións de seguridade aos centros.
Supoñíamos que estas actuacións preliminares serían controlada polo servizo de prevenzón de riscos, pero parece ser que non, que as frechas que pintaron no chan púxoas Manolo o da empresa de rotulación onde boamente entendeu. Así esta fase preliminar, non existiu, incumprindo a propia Xunta a súa normativa, e de existir foi un limbo temporal no que non se fixo case nada.
Primeiro de todo dicir que a pouca xente que se reincorporou este luns ao traballo en San Caetano andaba máis perdida que un pulbo nun garaxe, non sabían a que permisos se tiñan que acoller, algunhas só foran para solicitar o teletraballo, outros non sabían que había que reincorporarse, unhas con máis de 60 anos non sabían que debían estar na casa, outros con máscara dicindo que era obligatoria, outras sen ela.. Vamos que a desinformación era o que máis abundaba. O camarote dos irmáns Marx era o máis parecido ao que atopamos alí.
Pero o que ven a conto no fío desta noticia é o inarrable sentido das frechas de circulación, que ao velas polo miudo soubemos que tivo que colocalas un condutor bébedo ou coas facultades de orientación maltreitas, pois só con mirar para as fotos vemos que hai que dar brincos ou mesmo estouparse contra unha parede para cumprir os 2 metros de distancia.
Rematamos pedindo ao Departamento de Tráfico de Santiago de Compostela que envie urxentemente unha dotación ao edificio administrativo de San Caetano a ver se pillamos ao infrator, e se lle poder retirar o carnet de por vida.
- Detalles
Consecuencia da denuncia da CIG, a Inspección de Traballo da provincia de Pontevedra emitiu un requirimiento dirixido á Consellería do Medio Rural no que se recolle a súa praxe incorrecta sobor do procedemento de recoñecemento do persoal especialmente sensible
Neste requirimento establécese que, no tocante ao recoñecemento do persoal especialmente sensible, a Consellería do Medio Rural deberá axustar a súa actuación ao indicado no PROCEDEMENTO DE ACTUACIÓN PARA OS SERVIZOS DE PREVENCIÓN DE RISCO LABORAIS FRENTE Á EXPOSICIÓN AO SARS-CoV-2 (documento do Ministerio de Sanidade), xa que os pasos determinados na guía da Xunta de Galiza para determinar a especial sensibilidade dos traballadores e traballadoras dilata no tempo o procedemento e podería poñer en perigo ao persoal que durante a tramitación debe incorporase ao posto.
Ao ter que axustar o procedemento ao establecido no protocolo do Ministerio de Sanidade, o servizo sanitario do SPRL sería o único competente para avaliar a presenza de persoal traballador especialmente sensible en relación á infección de coronavirus SARS‐ CoV‐2, establecer a natureza de especial sensibilidade da persoa traballadora e emitir informe sobre as medidas de prevención, adaptación e protección. Porén, esa avaliación será a única actividade técnica que poderá servir de base para tomar as decisións preventivas adaptadas a cada caso.
Por iso, na xuntanza do Comité de Seguridade e Saúde Laboral da Consellería do Medio Rural, a CIG solicitou que se cumpra co requirido pola Inspección de Traballo e tamén que o persoal vulnerable non se incorpore ao traballo presencial ata que a súa solicitude se resolva. Medio Rural respostou que levará ao CECOP a aplicación nesta Consellería do protocolo do Ministerio de Sanidade (solicitude do traballador/a directamente ao Servizo de Prevención de riscos que será quen resolva).
- Detalles
A Xunta chama á incorporación presencial do seu persoal e programa a apertura de centros a partir deste luns 18 sen ter en conta as medidas previstas no seu protocolo de reincorporación.
As organizacións sindicais CIG, CCOO, CSIF e UGT, con representación na Mesa Xeral de Empregados Públicos, que ratificamos o Protocolo do Consello da Xunta polo que se establecen a reincorporación do persoal empregado público ao traballo presencial e as medidas de prevención fronte ao COVID-19, denunciamos o seu incumprimento pola propia Xunta de Galiza.
É inadmisible que centros de traballo como as bibliotecas e museos da Consellería de Cultura, as Oficinas de Emprego da Consellería de Economía, Emprego e Industria, as Oficinas Comarcais Agrarias da Consellería do Medio Rural, por exemplo da apertura sen contraste de toma de medidas preventivas, vaian a abrir as portas este luns cando nin sequera se rematou o informe de identificación e actuacións preliminares, nin foi revisado polos Servizos de Prevención de Riscos laborais nin aos Comités de Seguridade e Saúde Laboral correspondentes.
Moitas consellerías están a facer interpretacións torticeiras do Protocolo saltándose os pasos de control e avaliación e agora obrigan á incorporación mediante chamada telefónica para o luns 18 deixando desprotexido e en grave risco ao persoal, pois na maioría de centros non se tomaron as medidas preventivas necesarias nin este persoal tivo tempo a comunicar a sua situación.
Así, o venres a ultima hora da maña, á Dirección Xeral de Función Publica enviou unha nota informativa en relación á solicitude de permisos en Portax cara a reincorporación ao traballo presencial derivado do Acordo do Consello da Xunta de Galicia, do 8 de maio de 2020, polo que se aproba o Protocolo polo que se establece a reincorporación dos empregados públicos ao traballo presencial e as medidas de prevención fronte ao COVID-19. A pregunta lóxica que nos facemos é como lle vai dar tempo ao persoal a solicitar os permisos correspondentes á súa situación, e ás xefaturas a resolver o que sexa procedente no fin de semana? Esta imposición de reincorporación presencial “as bravas” supón poñer a todo o persoal en risco para a súa seguridade e saúde e o abandono de menores e maiores a cargo, desoíndo o acordado e ratificado polas Organizacións Sindicais..
O fomento do teletraballo así como a flexibilidade son os parámetros sobre os que debe articularse a reincorporación progresiva ao traballo presencial, aplicando ambos sobre os efectivos recoñecidos na Resolución do 12 de marzo do Cecop ao respecto do persoal especialmente sensible.
As organizacións sindicais rexeitamos esta actitude impositiva da Xunta que contradí o Protocolo, que pon en risco a persoas e usuarios de servizos públicos e tamén vai contra a prudencia e principio de precaución que a Administración debera ter na reincorporación ao traballo presencial, que debe regularse polos principios de progresividade e toma de medidas de protección adecuadas.
- Detalles
Os centros dependentes da Consellería de Cultura que dan servizo ao público, falamos de arquivos, bibliotecas e museos, teñen unhas particularidades específicas para que tanto o persoal como os usuarios se doten de medidas axeitadas para a loita contra a pandemia.
Así, a semana pasada a consellería elaborou un documento de reincorporación e posta en marcha dos centros, ao que a CIG fixo alegacións no sentido de que antes de poñer en marcha os centros e que voltara o persoal tíñase que facer unha avaliación de riscos laborais unidade a unidade para recoller a infinidade de problemáticas diferentes que teñen cada arquivo, cada biblioteca e cada museo dependentes da Xunta de Galiza.
O dito protocolo polo que sabemos non foi aprobado e aquí estamos esperando…
E todo se acelerou: o venres 15 pola tarde os traballadores de todos os centros reciben vía correo a comunicación de que o luns todos a traballar presencialmente.
Se anulaban todos os permisos de teletraballo e se debía acudir ao centro e de selo caso alí solicitar un novo permiso.
Obviamente os responsables da consellería nen se leran o Protocolo de carácter xeral de reincorporación do persoal empregado público da Xunta de Galiza e nen sequera se leran o propio borrador de protocolo da propia consellería que remitía ao primeiro onde a partir do luns so traballarán os afectados pola fase 1, recordemos, xefes de servizo e persoal que non poida teletraballar.
Ao longo da tarde, e polas críticas do persoal e dalgunhas direccións, foron recuando e deberon botar un ollo ao DOG e xa consideraron que os que estaban teletraballando seguiran nesa situación.
Que temos a día de hoxe:
- Entre luns e martes van abrir todos os centros; non sabemos se xa ao público ou con traballos internos.
- O número de persoal que se vai incorporar vai ser en moitos casos superior ao 80% dos efectivos, co que vai ser moi difícil manter distancias de separación ao longo da xornada.
- Cónstanos que a maioría dos centros aínda non contan nen con mamparas de separación, luvas, hidroxel nen a organización de espacios para manter adecuadas medidas sanitarias.
- Temos centros que polo seu exiguo tamaño habería que iniciar o teletraballo entre persoal que aínda non o solicitara e que podería desenvolvelo.
- Non se ten planificado a relación entre usuario/traballador no tocante á venda de entradas, cobro, entrega de documentos, depósito de documentos, etc.
- Non se dotou nas dependencias de ordenadores diferenciados para traballadores e tampouco sabemos nada do plan especial de limpeza e desinfección.
En fin, unha desfeita que se intenta solucionar coa boa vontade de moitas direccións pero que se ve superada pola realidade e que representa unha irresponsabilidade enorme no momento de pandemia que vivimos.
Dirixímonos aos responsables desta desfeita, a saber o director xeral de Políticas Culturais e secretario xeral técnico para que por un lado aproben un protocolo que recolla todas as eivas que sinalamos e por outro que faga unha desescalada progresiva e que non queiran facer puntos diante do xefe para ser os primeiros en chegar a unha “falsa normalidade” pois están a xogar coa saúde dos traballadores e tamén dos usuarios, polo que de non haber medidas que garantan a seguridade NON SE DEBEN ABRIR OS CENTROS.