Detalles

Published: 18 Agosto 2020

• Dereitos, permisos, xornada
• Asambleas, mobilizacións

A falta de diálogo e negociación da consellería do Medio Rural empurrou ao persoal técnico de incendios forestais a iniciar o 1 de agosto unha folga indefinida; sen resposta algunha por parte da Administración no que vai de mes. Na actualidade o seguimento da folga é masivo (por riba do 80%, exceptuando o persoal de libre designación) e continuado na totalidade dos distritos forestais e nos catro centros de coordinación provinciais.

Ante esta situación as organizacións sindicais CIG, CCOO, CSIF e UGT, convocan concentracións de apoio á folga nas catro provincias, con carácter rotativo cada dous días. Na provincia de Lugo celebrouse o luns 17 de agosto a oitava mobilización no décimo sétimo día de folga indefinida co lema “Se somos esenciais, Novo Acordo Xa!!!!”, no que se pretende resaltar a situación duns profesionais considerados “esenciais” na súa labor de traballo de emerxencias e que pola contra a Administración fixo deixadez de funcións ao non negociar un novo acordo de condicións de traballo. O actual acordo (do ano 2008) foi denunciado fai un ano e está desfasado polos cambios na consellería, distribución de persoal e condicións de xestión do monte e bioclimáticas actuais. Co acordo vixente, non temos asegurada a capacidade de resposta do sistema e do cadro de persoal ante unha situación tan difícil como son os incendios forestais o que deixa desprotexido o servizo publico.

As vindeiras mobilizacións celebraranse nas seguintes datas e lugares:

• Ourense: 19 de agosto - Rúa Villamil e Castro, s/n (Prado Lonia) 32004
• Pontevedra: 21 de agosto - Rúa María Victoria Moreno nº 43, 36003.
• A Coruña: 23 de agosto - Rúa Vicente Ferrer 2, Monelos, 15008.

Detalles

Published: 18 Agosto 2020

• Saúde laboral
• COVID19

O DOG do 17 de agosto vén de recoller a resolución da Consellería de Política Social para a apertura das escolas infantís o 1 de setembro baixo a sombra da Covid-19, sen a existencia dun protocolo preventivo válido e consensuado.

A Xunta acorda abrir os servizos e centros de atención á infancia como son as escolas infantís 0-3 anos, os puntos a atención á infancia, casas niño, espazos infantís e ludotecas, sen un protocolo válido de actuación preventivo consensuado nin tratado no respectivo Comité de Seguridade e Saúde Laboral. O texto de protocolo que teñen pendurado na web de Politica Social é de imposible cumplimento se non se amplían os medios humanos e materiais. En conclusión: a Xunta quere unha incorporación a custe cero. 

Destacamos que non se fixeron as preceptivas Avaliacións de riscos laborais dos centros ao risco biolóxico do COVID19 e que tampouco se adaptou o seu “Plan de reactivación no ámbito infantoxuvenil en relación ca infección polo virus SARS-COV2.

Demandas da CIG:

• Asegurar a protección das traballadoras, especialmente sensibles e embarazadas.
• Negociación do Protocolo de incorporación cos cativos/as.
• Avaliación de Riscos Laborais e adaptación do protocolo a cada centro de traballo por persoal especializado xa que cada centro é diferente.
• Establecer unha persoa directora e coordinadora para COVID-19 formada e liberada da actividade docente nas aulas.
• Negociación de carteleiras de traballo e revisión das solicitudes de conciliación e flexibilización do persoal.
• Axustar o horario dos centros á matricula actual ó establecemento de burbullas ou illas de convivencia que dificulten o espallamento o contaxio negociada co persoal.

Dende a CIG-Autonómica entendemos que ás escolas infantís igual que outros servizos públicos deben funcionar coa máxima normalidade posible pero parecenos unha irresponsabilidade social intolerable da Xunta de Galiza que se faga sen seguridade.

Detalles

Published: 06 Agosto 2020

• Saúde laboral

As traballadora embarazadas das Escolas Infantís do Consorcio, teñen recoñecido o risco biolóxico para o embarazo e a lactancia natural dende o momento que o comunican á empresa (se ben é certo que a pesares de denunciar en repetidas ocasións, a Mutua demora a suspensión do contrato até as tres semanas que lle permite a Lei).

Pois ben, neste momento, a Mutua está dando as suspensións de contrato a partir da semana 20 de embarazo, polo que non se contempla o risco biolóxico recoñecido até o de agora (anterior ao risco por COVID).

Non se teñen en conta nin a sentenza do TSXG, que recoñece o risco biolóxico, nin o que recolle a avaliación de riscos de Qualtis e mais o documento de postos exentos de risco para o embarazo e a lactancia natual, que establecen que hai que apartar do servizo a estas traballadoras.

Ademais dalgunha certificación que xa lle chegou a algunha traballadora, están dicíndolle de palabra, cando van facer a xestión, que o risco vai considerarse dende a semana 20.

Dende non hai moito tempo a Mutua manda facer probas serolóxicas para ver a inmunidade, pero obvia que os citomegalovirus e parvorirus (frecuentes en crianzas de cero a tres anos) non producen inmunidade aínda que se teñan pasado, e xeran malformacións e abortos.

É importante que as traballadoras embarazadas se manifesten por escrito en desacordo coa Mutua, coa certificación a partir da semana 20 porque, se non rectifican, haberá que adoptar, en cada caso, as medidas que se estimen oportunas.

Detalles

Published: 04 Agosto 2020

• Concursos traslados

No DOG do 04/08/2020 publican a Resolución pola que se amplía o prazo para expedir e presentar a certificación dos méritos emendados para o concurso de traslados de corpos xerais.

- Expedición dos certificados de xustificación dos méritos por parte das unidades de persoal: ampliado ata o 29 de setembro de 2020.

- Presentación, por parte dos/das concursantes, dos certificados realizados polas unidades de persoal: ampliado ata o 9 de outubro de 2020.

Detalles

Published: 30 Xullo 2020

• Asambleas, mobilizacións

En primeiro lugar queremos agradecer ás máis de 6.000 persoas que están a loitar arestora contra o lume en Galiza, especialmente aos compañeiros e compañeiras que hoxe están no lume de Cualedro. Dese equipo de profesionais, pouco máis de 100 persoas temos o cometido de coordinar e xestionar todos os medios na extinción de incendios. Somos o Persoal Técnico de Incendios Forestais (enxeñeiros/as técnicos/as forestais e enxeñeiros/as de montes). Os que hoxe concentrámonos esixindo un novo acordo para as nosas condicións de traballo e tamén para lograr unha resposta máis eficaz do servizo público que representamos (tanto na extinción e prevención dos incendios forestais como na xestión forestal dos nosos montes).

De seguro que ata o de agora non escoitaras falar de nós, mais vémonos na obriga de alzar a nosa voz e reclamar unha mellor organización do noso traballo ante unha nova realidade que cambiou substancialmente na última década. Tes que preguntarche quen xestiona os nosos montes (que na nosa terra representa as ¾ partes do territorio) e obteras a resposta nos profesionais que estamos aquí. Recordar que coordinamos máis do 40% dos incendios do Estado (un 10% dos de toda Europa), xestionamos de forma directa o 15% do territorio galego que se atopa en contratos de xesión pública (con 60.000 ha en certificación), revisamos a metade das cortas de madeira do Estado e canalizamos a corta de preto de medio millón de toneladas ao ano de madeira en montes de xestión pública (que xeran uns ingresos de preto de 15 millóns de metros cúbicos, unha gran parte dos cales revirte nas comunidades de montes). 

Non pedimos aumento de soldo senón unha mellor organización do traballo, melloras na seguridade e aumentar o cadro de persoal nos lugares cunha alta carga de traballo. Loitamos contra os abusos horarios que nos impón a Xunta ao facer gardas de 24 horas cunha media de 500 horas ao ano por riba do calendario medio dos empregados públicos, e no caso dos xefes de distritro ter unha disponibilidade de 24 horas, sete días á semana.

Levamos máis de 25 meses esixindo un novo acordo, e ante o silencio, a falta de diálogo e negociación da consellería do Medio Rural, a Xunta de Galiza empúxanos a iniciar unha folga indefinida a partir do 1 de agosto de 2020. Proba dilo é que aínda non nos xuntamos para negociar os servizos mínimos (farémolo a mesma tarde do xoves 30, en tempo de desconto para publicar ao día seguinte no DOG esa regulación). Somos profesionais responsables e seguiremos atendendo ás necesidades de extinción de incendios que nos espera nesta dura campaña.

Finalmente se Feijoo aposta por Galiza, Galiza, Galiza, non se esqueza da importancia de facer un desenvolvemento rural integral, non se acorde de nós tan só cando hai vaga de lumes e recordámoslle que atallar os lumes parte de ter un traballo de xestión previo. Por todo iso, retrucamos decindo:

MONTE, MONTE, MONTE

FRONTE AO LUME, SILVICULTURA

POR UN NOVO ACORDO XA!!!!!!

Detalles

Published: 30 Xullo 2020

• OEP-Procesos selectivos
• Concursos traslados
• Saúde laboral
• Dereitos, permisos, xornada
• RPT e estrutura
• Mesas de negociación
• Funcionarización
• COVID19

Na Mesa Xeral de Negociación de Empregados Públicos (MX) e na Comisión de Persoal do xoves 29 de xullo tratáronse os seguintes asuntos:

PROCESOS SELECTIVOS E OEP-2020

As probas dos procesos que xa tiveron algún exame, serán en outubro.

As probas do proceso selectivo de funcionarización do persoal laboral fixo serán na primeira semana de outubro.

En setembro/outubro comezarán as negociacións das convocatorias pendentes, incluídos legoeiros/estradas.

Os primeiros exames da oferta social e corpos xerais (libre, estabilización, consolidación e promoción interna) comezarán a partires da segunda quincena de outubro ou primeira de novembro.

Oferta de Emprego Público-2020: Di o DXFP que está practicamente pechada, e que despois de varán será a negociación cos sindicatos. Irán prazas de funcionarización.

ELECCIÓNS DE DESTINO

A elección de destino de arqueólogos, finanzas A1 (P.I.), veterinarios e C1-xeral (P.I.) será na segunda quincena de setembro (veremos). 

A este efecto, enviáronos un borrador de protocolo de elección de destino telemático (se queres dicir algo, contacta coa CIG)

A CIG insiste en propoñer que o destino para promoción interna, cando sexa provisional, sexa voluntario. O DXFP comprometeuse nos días pasados en dar resposta nesta MX a esta petición da CIG. Pero volve adiar a resposta: di que están a estudar a proposta que lle facemos, pero que non terán resposta ata a primeira quincena de setembro, cando teñamos unha xuntanza para falar dos destinos, que serán na segunda quincena. Deixa para esa xuntanza tamén a solución do conflito de dereitos de quen teña que escoller destino e ao tempo participase no concurso de traslados.

En canto ao número de persoas que están obrigadas a escoller destino en C1 (P.I.), di que serán 50 ou 52 (ofrecéndolles tan só 62 postos).

TELETRABALLO

O DXFP volve co que xa dixo o luns: na primeira quincena de setembro teremos negociación da modificación normativa do teletraballo, para o que están a preparar as modificacións que consideran. O luns comprometérase a enviar “pronto” un borrador.

MÁSCARAS

Insistimos en que as faciliten ao persoal, pois ainda que sexan obrigatorias para todas as persoas, nas zonas comúns (corredores, ..) é imposíbel manter a distancia de 1,5 m, e neses casos é o empresario quen está obrigado a tomas as medidas de protección. 

Se as máscaras son obrigatorias para todo o mundo, e por esa razón néganse a facilitarllas a todo o seu persoal, preguntamos polas razóns de que en certos ámbitos estean a facilitar máscaras ao público. Non temos resposta.

RPT DE ATRIGA

A Administración non modifica a proposta, que queda aprobada co voto en contra de CCOO e UGT, e abstención de CIG e CSIF.

RPT DE FACENDA

Non remitiron a documentación que demandamos. Na organización dos postos un parte deles dependen directamente das subdireccións, e non dos servizos. Non cambian nada nas áreas funcionais. Das 12 creacións de postos, 8 son de postos de estrutura, e só 4 son de postos de fora da estrutura (de “curritos”); e para crear eses 4 postos, amortizan 6. Quedou aprobada co voto en contra dos catro sindicatos.

RPT DE MEDIO RURAL

A proposta consiste en que amortizan os 21 postos de persoal laboral veterinario ocupado por persoal indefinido que aprobaron a oposición de veterinario/a funcionario/a, e crean eses mesmos postos como persoal veterinario funcionario para ofertar na elección de destino da escala. A CIG está conforme coa proposta, pero non nos gusta que para financiar eses 21 postos, amorticen outros 5 (ainda que vacantes e sen ocupación). 

CIG e CCOO abstémonos. UGT e CSIF votan en contra (porque queren que os 21 postos queden reservados para o proceso de consolidación do persoal laboral indefinido).

O DXFP explica a UGT e CSIF que en canto un posto afectado polo proceso de consolidación/estabilización queda libre porque deixa de estar ocupado pola persoa que estaba nel, a praza desaparece da consolidación/estabilización e hai que amortizala. Por tanto, a proposta que defenden implicaría a amortización dos postos en canto os/as 21 veterinarios laborais indefinidos tomen posesión do seu novo posto de funcionario/a.

CONSORCIO

Segundo o DXFP, a integración do persoal do consorcio está avanzada. Retomarana en setembro. Vai vinculado á RPT (que estaría practicamente avanzada) e á oferta de emprego da totalidade das prazas do consorcio. 

ACORDOS ASINADOS NO ÁMBITO DA AXI

Asegura a consellería que xa tiveron conversas con Educación sobre a formación pactada. Enviáronlles unha relación das funcións, e Educación respostou que coas titulacións que existen non hai módulos que se axusten específicamente ás funcións dos vixiantes de estradas, polo que habería que deseñar uns modulos específicos con esas funcións. Volverán a retomar as xuntanzas con Educación.

Á volta das vacacións traballarán nun borrador paraa incorporar na OEP as prazas do acordo de legoeiros e gardería fluvial.

POSTOS DE ARQUIVEIROS/AS

O DXFP di que a dotación destes postos ten que ser mediante unha solución global. O problema é que a solución leva adiada dende o ano 2014.

PROTOCOLO COVID EN CENTROS DE ENSINO

Insistimos en que o protocolo COVID para o curso 2020/2021 en centros de ensino, altera as condicións de traballo de parte do persoal non docente (limpadores/as, coidadores/as, cociña), sen negociación nin información á lexítima representación do persoal afectado, pois o que fixo Educación foi levalo a unha Mesa Sectorial de Docentes (onde están os profes, que non son representantes sindicais do persoal afectado), e tamén levalo ao Comité Intercentros de Seguridade e Saúde Laboral de centros de ensino, comité que non ten capacidade para alterar as condicións de traballo.

Educación quere confundir ao DXFP coa xustificación de que con levalo á Mesa Sectorial Docente e ao CSSL de centros de ensino, xa está ben feito. Pois non. Ou se sentan con nós, ou na seguinte Mesa Sectorial Docente teremos que presentarnos nosoutros, e que nos levanten.

Detalles

Published: 29 Xullo 2020

• Compostela
• COVID19

Nun wc como o que ves na imaxe.

Ese é o mellor lugar que escolleu o Consorcio Galego de Igualdade e Benestar como zona de illamento para persoas maiores dependentes no Centro de Día de Dodro en caso de que sexan sospeitosas de padecer coronavirus. Imaxinamos que co beneplácito da Consellería de Política Social, que está, ou debería estar, informada do tratamento que se lle dá ás persoas usuarias da rede pública de atención a persoas maiores. O que descoñecemos é se as familias están informadas de onde pretenden illalos en caso de sospeita de COVID.

Dende a CIG-Autonómica queremos denunciar a falta de humanidade e o trato indigno e humillante que se lle vai dar aos usuarios e usuarias do Centro de Día de Dodro que se atopen nesa situación. Sen contar coas consecuencias que pode ter para a saúde dunha persoa maior esta situación estresante e delicada.

Se xa de por si o lugar non parece moi digno, hai que engadir que ademais non dispón de ningunha clase de fiestra, ventilación nin ar acondicionado, que a súa vez funciona como sistema de calefacción do centro. Nesa zona de illamento estará a persoa maior e un membro da equipa, ataviado cun EPI. Á situación, que xa de por si xera un estrés na persoa, hai que engadir unha estancia tan pouco confortable e acolledora como sala de espera, tendo en conta que cando se active o protocolo non se sabe o tempo no que a persoa ten que permanecer no lugar de illamento. Dito doutro xeito, poden ser uns minutos ou unha longa espera.

Cando noutros centros optaron por escoller os despachos sanitarios ou de enfermaría como zona de illamento, por que en Dodro optouse por un wc? Que triste é chegar a maior nestas condicións! As persoas maiores non son gando e merecen un trato digno e respectuoso.

Para a CIG-Autonómica esta actuación denota unha falta de humanidade e de respecto que non se pode consentir polo que estes feitos xa foron postos en coñecemento da Inspección de Traballo e Seguridade Social da Coruña.

Tamén queremos denunciar que esta situación do Centro de Día de Dodro non é un caso excepcional, xa que no Centro de Día de Boiro tamén se optou por un wc como lugar de illamento, aínda que nese caso polo menos dispón dunha pequena fiestra para ventilar.

Detalles

Published: 28 Xullo 2020

• Dereitos, permisos, xornada

A Consellería de Educación publicou o mércores 22 de xullo un protocolo COVID para os centros de ensino para o curso 2020/2021. Nese protocolo modifícanse as condicións de traballo do persoal non docente, polo que a consellería está obrigada a dar conta á lexítima representación do persoal afectado. 

Como para a Educación o persoal non docente non conta, ou se cadra pensan que negociando cos docentes a cousa xa está ben feita, a consellería convocou a Mesa Sectorial de Negociación de Docentes para informarlles das medidas. 

Ainda que xa llo pedíramos por escrito días antes, na xuntanza co director xeral de Función Pública que tivemos o luns 27 de xullo, reclamamos que se incluise na orde do día da Mesa Xeral do mércores 29, o protocolo COVID para os centros de ensino. A petición da CIG foi apoiada polos demáis sindicatos con representación na Mesa Xeral. O motivo é evidente: Educación non pode aprobar un protocolo que altera as condicións de traballo do persoal sen dar conta á lexítima representación destes.

Comprometeuse o DXFP a falar coa Secretaría Xeral Técnica de Educación e valorar se o protocolo altera ou non as condicións de traballo do persoal non docente e, nese caso, actuar en consecuencia. Así que poñémoslle ao DXFP e ao SXT de Educación, algúns exemplos de aspectos que alteran as condicións de traballo:

• Persoal de limpeza: normalmente traballan cando non hai clases (polas tardes) e o protocolo obriga a que para o curso ten que estar presente unha persoa de limpeza durante o horario lectivo.
  
  
• Persoal coidador: o seu traballo é atender a nenos e nenas con necesidades especiais, e o protocolo quere que acompañen aos nenos de infantil o baño.
  
  
• Persoal de cociña: para o curso haberá tres quendas de comedor, o que implica maior carga de traballo e probablemente de horario.
  
  

Estes son uns exemplos de cambios de condicións de traballo que decide a consellería dando conta aos representantes sindicaos dos docentes en troques da representación sindical do persoal non docente. 

Se cadra teremos que presentarnos nosoutros na seguinte Mesa Sectorial de Docentes.

Detalles

Published: 28 Xullo 2020

• OEP-Procesos selectivos
• Concursos traslados
• Saúde laboral
• Dereitos, permisos, xornada
• RPT e estrutura
• COVID19

Para tratar sobre a modificación das RPTs de Atriga, Facenda e Medio Rural, así como os buzóns de postos para a elección de destino dos procesos selectivos de veterinarios/as, finanzas-A1 (P.I.), arqueólogos/as e C1-Xeral (P.I.). A maiores falamos do teletraballo, plan covid de centros de ensino, procesos selectivos, concursos, máscaras..

Á xuntanza, convocada con carácter previo á Mesa Xeral (MX) e Comisión de Persoal (CP) do mércores 29, asistimos as organizacións sindicais CIG, CCOO, CSIF e UGT.

RPT DE ATRIGA/FACENDA

Comprométense a revisar as áreas funcionais. Nada máis. Esta é a proposta que envían para a MX e CP.

• Proposta de Facenda: descargar.
• Proposta de Atriga: descargar.

RPT DE MEDIO RURAL

Amortizan como persoal laboral, e crean como persoal funcionario, os postos ocupados por persoal laboral indefinido que superou o proceso selectivo de persoal funcionario veterinario. Descargar a proposta que vai á MX e CP.

ELECCIÓN DE DESTINO DOS PROCESOS SELECTIVOS

Para os seguintes procesos selectivos, queren convocar elección de destino telemática (ver borrador do protocolo) no mes de setembro:

• C1-Xeral (P.I.)
• Finanzas-A1 (P.I.)
• Veterinarios/as
• Arqueólogos/as

Os tres primeiros vai ser destino provisional. Arqueólogos/as vai ser definitivo (inaceptable que pasaran catro anos dende o destino provisional). A CIG defende o destino definitivo, pero sen concurso de traslados previo, non deixan outra alternativa que o provisional.

Para os de promoción interna solicitamos que o destino provisional sexa voluntario. O DXFP comprometeuse a dar resposta na MX. 

No caso de C1-Xeral(P.I.), solicitamos que se poidan reclasificar os postos. Teñeno moi doado: os postos C2 de centros de ensino xa teñen nivel 14, que é o mínimo de C1. Non teñen vontade de facelo.

Informa que no mes de setembro poderían ir máis eleccións de destino, pero non concreta nada máis.

CONCURSOS DE TRASLADOS

Para corpos xerais, informa o DXFP que nuns días van ampliar o prazo para o rexistro de méritos debido a que nos metemos xa en agosto e que a cita previa está a producir atrancos.

A CIG manifesta que que moitos dos problemas que estamos a ter coas eleccións de destino teñen que ver co retraso nos concursos. Non pode ser que pasen anos, ou décadas, sen concurso. E non pode ser que pasen anos dende o destino provisional ata o definitivo por falta de concurso. Moi lonxe queda o famoso concurso de traslados permanente.

PROCESOS SELECTIVOS PENDENTES

No caso dos de corpos xerais (libre e promoción interna) convocados hai dous anos, e moitos deles pendentes unicamente ou da resolución cos aspirantes aprobados ou, no caso da promoción interna, da resolución provisional ou definitiva de méritos, NON quere contestar.

O que si nos conta, para evadir a responsabilidade, é do rápido que van ir os próximos procesos interrumpidos e que nos vindeiros días van publicar as datas dos exames de 12 ou 14 procesos selectivos, sendo en todos os casos posteriores ao 1 de outubro. Pero para os demáis (aqueles que ainda non arrancaron), non se quere mollar.

Estes son os datos que nos facilitaron o martes 28:

REINCORPORACIÓN AO TRABALLO PRESENCIAL

Remata o teletraballo COVID. As persoas con teletraballo por conciliación ou situacións excepcionais (como mulleres embarazadas) poderán continuar con teletraballo ata o 21 de setembro. As demáis persoas (teletraballo COVID), teñen que incorporarse.

O de que o teletraballo se prorrogue ata tres meses despois do estado de alarma, (Real Decreto-lei 15/2020) tal e como recomenda o Goberno do Estado soalle a chinés.

E como seguir prometendo é gratis-free, anúncianos que na primeira quincena de setembro, “en principio”, van convocar o grupo de traballo sobre teletraballo, para adaptalo ás novas experiencias e circunstancias. O DXFP comprométese a enviar “pronto” un borrador.

MÁSCARAS

Reclamamos que a Administración ten que facilitar as máscaras, pois ainda que sexan de uso obrigatorio, e ainda que instalaran anteparos, hai espazos comúns (como corredores) nos que é imposíbel manter a distancia de seguridade, polo que é a empresa a que está obrigada a facilitar os medios de protección. Os demáis sindicatos apoian esta petición.

Detalles

Published: 24 Xullo 2020

• Saúde laboral
• COVID19

A resposta é SI. Explicámosche por que:

O pasado sábado 18 a Xunta estableceu a obrigatoriedade do emprego das máscaras para case todas as circunstancias, incluíndo a permanencia en espazos abertos e pechados aínda que se garde a distancia de seguridade.

A Xunta, no seu Protocolo polo que se establece a reincorporación dos empregados públicos ao traballo presencial e as medidas de prevención fronte ao COVID-19, publicado o 9 de maio, no apartado 4.3.2 indicaba, sobre as medidas de protección individuais, que non ten a obriga de proporcionar ao seu persoal aqueles equipamentos de protección que determinen como obrigatorios ou recomendables as autoridades sanitarias para todas as circunstancias vitais de cada persoal.

Pero a normativa posterior do Estado deixa clara a obriga por parte do empresario de proporcionar máscaras e outro material de protección, e propón aplicar sancións se non cumpre. 

Así o Real Decreto-lei 21/2020, do 9 de xuño, de medidas urxentes de prevención, contención e coordinación para facer fronte á crise sanitaria ocasionada polo COVID-19,  no seu artigo 7 sinala con respecto aos centros de traballo:

“1. Sen prexuízo do cumprimento da normativa de prevención de riscos laborais e do resto da normativa laboral que resulte de aplicación, o titular da actividade económica ou, no seu caso, o director dos centros e entidades, deberá:

c) Adaptar as condicións de traballo, incluída a ordenación dos postos de traballo e a organización das quendas, así como o uso dos lugares comúns de forma que se garanta o mantemento dunha distancia de seguridade interpersoal mínima de 1,5 metros entre os traballadores. Cando iso non sexa posible, deberá proporcionarse aos traballadores equipos de protección adecuados ao nivel de risco.”

O Real Decreto-lei 26/2020 sinala os/as Inspectores de Traballo e Seguridade Social e Subinspectores Laborais como encargados de vixiar e requirir, estender actas de infracción, en relación co cumprimento por parte do empregador das medidas de saúde pública establecidas.

O incumprimento polo empregador das obrigacións constituirá infracción grave que, no caso das administracións públicas, procederase conforme ao procedemento especial previsto no Real Decreto 707/2002.

Á vista do anterior queda claro que:

1. Deberá proporcionárselle aos/ás traballadores/as os equipos de protección adecuados ao nivel de risco, pois en zonas comúns e de tránsito nos centros de traballo non se pode garantir o distanciamento de 1,5 m.
2. O incumprimento por parte do empregador é unha infracción grave.
3. Calquera persoa empregada publica da Xunta pode acudir a denunciar na Inspección de Traballo e Seguridade Social se non lle dan a máscara de protección.

CAL É A MASCARA QUE HAI QUE EMPREGAR?

Se a avaliación de riscos COVID do teu posto non determina outra cousa, abondará coa hixiénica ou a cirúrxica.

Tes que ter en conta que é de protección de saída e non de entrada polo que é moi importante que as persoas que estean ao teu arredor a leven colocada correctamente e limpa (cambiase cada dia) e manter as distancias de 1,5 m. O recomendable se traballas cara o público, con esforzo físico, con moitas persoas, etc é cambiala cada 4 horas.