- Detalles
Instalación dos parasois
Como punto central deste Comité tratouse o da instalación de parasois na fachada sur do edificio administrativo de Pontevedra.
Hai dous temas sobre os que nos informa o presidente:
- No mes de setembro, finalizouse a colocación dos parasois na torre central do edificio.
- Parte pendente de executar:
Quedan os laterais. Motivo: a primeira licitación quedou deserta e na segunda, debido a que non se podía dilatar moito no tempo xa que a licitación era cos fondos FEDER, ofertouse a 1ª fase (a torre central que ao levar andamios mais altos era a mais complexa de executar e a máis custosa).
Nunha 2ª fase vaise licitar o pendente mediante contratos de obra menor, polo que os prazos redúcense. - Problemas que se detectan:
As persianas teñen dous sensores, un lumínico e outro de vento.
Luminosidade. Hai moitas queixas xa que como non se entende moi ben como funcionan os sensores, e ao estar en fase de probas, ás veces as persianas entran en funcionamento aínda que o día esté anubrado.
O xefe de servizo de mantemento informa de que existen dous sensores lumínicos programados para baixar en determinadas sensibilidades, un ata a terceira planta e outro ata a novena.
Todas as plantas teñen sensores de luminosidade das luces do teito, que en función da escuridade encenden con mais intensidade ou con menos.
Aínda que hai queixas a nivel persoal, son necesarios datos obxectivos de luminosidade, polo que a proposta da CIG, despois de oir ao persoal do servizo de prevención, vanse facer 2 medicións diarias durante un período de tempo coas que poder comprobar si a luminosidade chega a 500 luxes.
Información sobre as pingueiras no Arquivo xeral
A raíz dunha limpeza xeral con auga a presión descubriuse que nun punto onde estaba “resolto” o das pingueiras, entrou auga.
O servizo de mantemento contactou coa empresa construtora do edificio que fixo unha proposta de gasto para facer a reparación. Estamos á espera de que desde Santiago aproben o orzamento.
A raíz desta situación, considerouse pola Xefatura paralizar o acordado no comité anterior de colocar bandexas que recolleran a auga.
Tanto a CIG como CCOO presentamos queixa pola non colocación das bandexas, dado que o acordo era de abril e xa tiveran tempo de telas colocadas antes de agosto, que foi cando descubriron a pingueira.
Implantación do Plan de Acción
O plan de acción trasladouse á Xefatura Territorial e os técnicos informárono desfavorablemente.
Fixeron alegacións ao mesmo diante do servizo de prevención (en Santiago) e están sendo valoradas.
Aínda non hai plan de acción aprobado definitivamente, polo que os prazos de execución aínda non corren.
Dende a CIG preguntamos que técnicos informaron desfavorablemente (non tivemos resposta) e presentamos queixa porque en todo caso podería ser aprobado parcialmente dado que según indicou o presidente no que é de obrigado cumprimento por normativa, están conforme.
Rolda de intervencións
A representante de sanidade pide mellorar a climatización.
A CIG pregunta por:
Comedor: A xefatura considera idónea a ubicación. Hai auga para beber no rexistro e posibilidade de lavar os utensilios que se traian co xantar nos baños.
A CIG propuxo que a Xefatura Territorial baixe durante unha semana a xantar na cafetería, pasando por diante dos administrados co tupper para lavar .
Limpeza: trasladarán a queixa.
- Detalles
A CIG solicita ao conselleiro do Medio Rural e á Dirección Xeral de Defensa do Monte que implante os módulos formativos correspondentes á cualificación profesional SEA596_3 “Coordinador de operacións en incendios forestais e apoio a continxencias no medio natural” e rural. Estes módulos formativos van dirixidos aos bombeiros/as forestais xefes/as de brigada, axentes forestais e persoal técnico, así coma a todo o persoal do SPIF que xa obtivera o certificado do nivel 2 do SEA 595_2.
Asemade, solicitamos que se retome o proceso negociador do Plan de Formación Plurianual coa Dirección Xeral de Defensa do Monte, que leva parado dende o 15 de marzo de 2019, e sobre o que xa manifestamos en numerosas ocasións que a vía a seguir é a formación correspondente á cualificación profesional SEA595_2 coma formación básica para o persoal do SPIF.
Dende a CIG loitamos e facemos unha aposta clara porque o persoal do SPIF reciba a formación axeitada ao seu encadramento normativo coma servizo de emerxencias no medio natural e rural. Porén, a Xunta segue sen dar a formación demandada aos traballadores e traballadoras que loitan por estar certificados profesionalmente nas súas competencias.
Así os compañeiros e compañeiras da CIG estamos permanentemente facendo iniciativas para obter a mellor formación posíbel e por iso fixemos tamén, hai uns días, unha solicitude dirixida á Academia Galega de Seguridade Pública para que, como organismo competente para a formación dos traballadores do SPIF, convocara os módulos formativos correspondentes ás cualificacións profesionais SEA595_2 e SEA596_3 (da rama profesional de Seguridade e Medio Ambiente).
Dende a CIG seguimos traballando pola formación de calidade como piar básico para lograr que o SPIF sexa un servizo público profesional, versátil, eficaz, estable e seguro.
- Detalles
Á Mesa Xeral celebrada o mércores 16 de outubro levouse a creación de varias escalas de persoal funcionario para o proceso de funcionarización de categorías de persoal laboral. O director xeral de Función Pública comenta que con esta modificación proposta da Lei de emprego público de Galiza (LEPG) está case listo o asunto da creación de escalas para a funcionarización.
Dende a CIG facemos constar o noso malestar pola burla que supón traer esta materia despois de negociala previamente na comisión de seguimento do Acordo de mellora. Tal e como se pode apreciar nos resumos das xuntanzas desa comisión de “seguimento” que fan públicos as organizacións asinantes, nese foro se negociou a modificación da LEPG para crear escalas, a RPT do Consorcio, e materias que son alleas ao acordo. Sobardar as materias do acordo e negociar asuntos propios da mesa xeral é ir contra a boa fe negocial e nos reservamos acudir á vía xudicial para garantir os nosos dereitos como sindicato maioritario.
- Detalles
Achegounos Función Pública os borradores de sete convocatorias de procesos selectivos. Temos ata o día 23 para presentar alegacións.
Tres novas convocatorias:
- Fisioterapia. Descargar.
- Psicólogo/a. Descargar.
- Médico/a. Descargar. (ollo, podería ter un erro no número de prazas)
Segundo borrador unha vez vistas as alegacións dos sindicatos. Contén cambios substanciais, algunha positiva, outras inaceptábeis.
- Educador/a. Descargar.
- Enfermeiro/a. Descargar.
- Terapeuta ocupacional. Descargar.
- Traballo social. Descargar.
Diriximos escrito a Función Pública para saber se teñen pensado xuntarse cos sindicatos (polo menos coa CIG, que con outros seguro que xa o despacharon) ou se pensan liquidar o asunto cumplindo o formalismo da Mesa Xeral. Segundo como fagan, e segundo algun aspecto negativo que está nas bases, esto pode rematar no xulgado.
Se queres podes contactar coa CIG.
- Detalles
A sinatura do Acordo de Concertación entre CCOO, UGT e o goberno do PP ten implicacións tanto nos procesos selectivos que agora xa se están a negociar como os que veñen a continuación. Estás afectado/a tanto se pretendes presentarte por libre como se o que agardabas era o concurso, a promoción interna ou a superior categoría.
Temos enriba da mesa o borrador das bases de convocatoria aos procesos selectivos da escala de técnicos facultativos de servizos sociais (grupo A2), especialidades de traballo social, terapeuta ocupacional, enfermeiro/a e educador/a. Todas elas escalas de persoal funcionario que ata agora son categorías de persoal laboral (grupo II). Pero veñen detrás moitas máis, de todos os grupos.
A primeira consecuencia do que pactou a Xunta con CCOO e UGT é que non haberá concurso de traslados previo. Por tanto, o persoal fixo non vai poder moverse ás prazas vacantes antes da elección de destino do persoal de novo ingreso.
O vixente convenio establece que a promoción interna do persoal laboral ten que ser do 50% das prazas, e que calquera laboral fixo podía presentarse dende calquera grupo co único requisito de ter a titulación. Despois do Acordo de Concertación de Xunta, CCOO e UGT desaparecen os preceptos do convenio e a promoción interna neste caso vai ser do 22%, pero só se vai poder presentar o persoal laboral fixo das categorías de ATS, Educador, Terapeuta Ocupacional e Asistente Social. Todo o demais persoal laboral de calquera grupo e categoría que se esforzou en sacar a titulación, tirou o seu esforzo ao lixo.
- Detalles
Seguimos cunha suba raquítica pactada en Madrid que non axuda a recuperar o poder adquisitivo perdido nos últimos 10 anos, sen xornada de 35 horas, e co resto dos recortes consolidados neste anteproxecto de Orzamentos Xerais.
Na Mesa Xeral celebrada o mércores 16 de outubro o director xeral de Planificación e Orzamentos infórmanos que espera que a suba salarial se sitúe ao redor do 2,2%, o 2% derivado do acordo de Madrid e o 0,2% a maiores tendo en conta os datos do cadro macro do goberno que sitúan o incremento do PIB nun 2,1%, todo isto condicionado a que se habilite isto pola normativa básica estatal.
Intervimos para destacar que neste borrador de anteproxecto seguen consolidados os RECORTES.
A suba do 2,2% parece a todas luces insuficiente. A maiores parece que o Goberno do Estado vai establecer a suba dos empregados públicos no 2% tal e como recolle o II Acordo de mellora asinado en Madrid con CCOO, UGT e CSIF.
No caso de que o incremento do PIB baixe do 2,1% (e xa existen estimacións serias como a de FUNCAS que o baixan do 2%) o Acordo de Madrid implicaría que a suba queda nun ridículo 2%, e non no 2,2% nin por suposto no 3% que alegremente anunciou CCOO. Isto ocorre por condicionar a suba salarial a un incremento do PIB que no mesmo momento de asinar o Acordo tanto o Goberno como CCOO, UGT e CSIF sabían que non se ía a cumprir.
- Detalles
O pasado luns día 14 de outubro participamos na Comisión de Persoal na que se votou o anexo de prazas para o concurso de traslados de corpos xerais así como varias modificacións de Relacións de Postos de Traballo. Tamén falamos outros asuntos en rogos e preguntas, como o Fondo de Acción Social.
Concurso de traslados de corpos xerais
Informa o DXFP que engadiron 11 prazas vacantes por xubilación recentes, co que serían uns 2150 postos ofertados. Informa tamén que farán un engadido na convocatoria para permitir actualizar as áreas funcionais dos postos (pensando naquelas RPTs que ainda non o teñen actualizado).
A CIG non pode verificar se con eses 11 postos que comunican agora que se incorporan, están a incluir no concurso todas as prazas que nós aseguramos que están vacantes recentes, incluíndo algun falecemento e unha vacante por adxudicación ao seu titular doutro posto mediante libre designación (e publicado en DOG).
Tampouco estamos conformes con que retiren postos por proposta de amortización das consellerías (tiveron tempo para tramitar as amortizacións), pois non sería a primeira vez que finalmente non se amortizan. Para a CIG, moitas veces é unha escusa para manter agochados postos. Seguimos a pedir explicación por un posto que retiran por amortización en AMTEGA pero que o xoves saiu ofertado para ser cuberto en comisión de servizos (incongruente se non é necesario).
- Detalles
No día de onte celebrouse unha xuntanza coa Consellería do Medio Rural á que estabamos convocadas as organizacións sindicais e numerosas asociacións (que aglutinaban a distintos sectores do persoal que traballa na prevención e extinción de incendios). Houbo dous “mantras” que o Conselleiro mencionou na xuntanza:o SPIF ten que facer unha aposta clara pola prevención e que non se ían tratar nesa xuntanza cuestións laborais que tiveran que ser obxecto de negociación sindical. O fundamental que nos quixo comunicar era que pretendía contar co persoal do SPIF(coma un dos catro actores principais) para facer grupos de traballo para elaborar un documento base para o anteproxecto dunha nova Lei de prevención e extinción de incendios.
Ademais fixo un breve balance da tempada de alto risco e anunciou que nos ía presentar dende a consellería un Plan plurianual de medios materiais e humanos (quinquenal).
Na CIG, dixemos que unha vez que estudaramos o Plan e a documentación aportariamos as achegas que consideraramos. Os compañeiros delegados fomos os primeiros na loita polos coeficientes redutores para a xubilación, tentando a recuperación do artigo 19 do V Convenio (asinado pola CIG e UXT) , unha maior estabilidade no emprego... a través de numerosas iniciativas e por tódalas vías que temos ao noso dispor. Pero tamén consideramos que , hai que tratar tódalas cuestións que poidan influír directa ou indirectamente no devir do servizo público que proporcionamos e dun futuro para o monte galego.
Na CIG defendemos sempre os intereses dos traballadores e traballadoras sexan funcionarias ou laborais, a súa profesionalización, estabilidade e formación, sen necesidade de deixar de lado tódalas aquelas cuestións que poidan afectar ao noso monte, ao noso rural e as súas xentes.
- Detalles
Proceso de formación de acceso dos axentes facultativos ambientais e forestais á nova escala de axentes técnicos en xestión medioambiental.
Despois de anos de espera e negociacións, o día 4 de outubro de 2019 foi asinada unha addenda ao acordo de colaboración de 16 de marzo de 2017 subscrito entre as consellerías de Medio Ambiente e Ordenación do Territorio; de Educación, Universidade e Formación Profesional e de Medio Rural para nunha oferta específica de ensinanzas do CS de Xestión Forestal e do Medio Natural en réxime para as persoas adultas en modalidade semipresencial e a distancia no CIFP A Granxa e no IES de Arzúa.
Con esta finalidade, ábrese un prazo de solicitudes de matrícula que rematará ás 13 horas do día 14 de outubro de 2019.
As solicitudes realizaranse mediante un formulario web ao que se accede na URL:
http://www.edu.xunta.es/fp/node/15546
Antes de escoller os módulos para os que quere solicitar matrícula, pode consultar a táboa de validacións de módulos mediante unidades de competencia (http://www.edu.xunta.es/fp/webfm_send/8493) e os itinerarios formativos recomendados.(http://www.edu.xunta.es/fp/itinerarios-adultos)
Para calquera dubida pódese chamar aos telf. 881 997 407-881 997 408 ou facer a consulta no enderezo electrónico: admisión.ciclos@edu.xunta.es
A matrícula final non poderá superar as 1000 horas.
A dirección de abaixo e para acceder a plataforma ca clave e mirar os módulos acreditados.
https://www.edu.xunta.es/acreditacion/ListSolInscricion.do
Estase tamén a negociar ca administración unha convocatoria de acreditación de competencias do CM Aproveitamento e conservación do medio natural para que todo os compañeiros podan acceder o ciclo superior.
- Detalles
Na Mesa Xeral de Negociación de Empregados Públicos que tivemos o mércores 9 de outubro, discutimos sobre o anexo de postos a ofertar no concurso. Previamente aprobouse unha modificación da RPT de Educación que implica a amortización e a creación de cinco postos que entrarán no concurso.
A postura da CIG é que sexan ofertadas todas as vacantes que non teñan algún tipo de limitación legal ou xudicial. Queixámonos do seguinte:
- Prazas retiradas por proposta de amortización: as consellerías tiveron tempo abondo para amortizar as prazas que consideraran, e non o fixeron. Así que non nos vale que agora digan que van amortizar para retirar prazas do concurso. A maiores, non é a primeira vez que din que van amortizar unha praza e despois non o fan. Moitas veces isto non é máis que unha escusa para agochar prazas no concurso. Rexeitamos esta manobra.
- Prazas recentemente vacantes que non aparecen: como é posíbel que prazas vacantes por xubilación ou falecemento dende fai un mes non entren no concurso xustificando en que non teñen aínda os datos? Están sen mecanizar? Quen sexa responsábel de ter os datos ao día, que se poña as pilas. Pero non aceptamos que unha praza vacante dende fai un mes quede sen ofertar. O colmo é ver como non entra algunha praza que sabemos vacante porque ao seu titular lle deron outra en libre designación; e que o nomeamento sae publicado en DOG.
- Prazas ocupadas por persoal laboral indefinido non fixo: ofertar estas prazas de persoal funcionario ocupadas por persoal laboral con sentenza xudicial de indefinición é meterse nun problema. A ocupación destas prazas no concurso de traslados vai dar lugar a posteriores sentenzas de readmisión e indemnización como xa ocurríu no anterior concurso de traslados de corpos xerais, onde funcionarios/as que concursaron tiveron que saltar da praza por unha reclamación posterior de persoal indefinido con sentencia estimatoria. Este problema tiña que telo resolto Función Pública convocando esas prazas en procesos selectivos para poder liberalas para un concurso de traslados e non o fixo en catro anos. Ofertar agora en concurso esas prazas sen especificar que a toma de posesión do concurso e do proceso selectivo serán coincidentes no tempo, cousa case imposible, nos vai levar a múltiples impugnacións.
Das alegacións ás prazas que faltan feitas pola CIG só admitiron incluir 9 delas. E o venres máis, queren celebrar unha "mesa técnica" para rematar isto. Así que ata o venres non saberemos cando van publicar o concurso no DOG.
Chegados a este punto, o concurso vaise publicar, con máis dun ano de atraso. Todo coa desculpa das múltiples frontes que abríu Función Pública entre xuño do 2018 e mediados do 2019, aínda que a realidade é que non lles interesa. Están máis cómodos facendo "concursos" mediante comisións de servizo.
