- Detalles
Función Pública achegounos o anexo das prazas e persoas para o proceso de funcionarización do persoal laboral fixo da Xunta. Os sindicatos temos prazo para alegar ás convocatorias de funcionarización ata o 14 de xaneiro.
- Detalles
Recibimos da Dirección Xeral de Función Pública o primeiro borrador do concurso de provisión de postos de traballo vacantes do corpo facultativo superior da escala de veterinarios da Xunta.
Os sindicatos temos prazo de alegacións ata o día 17 de xaneiro, polo que se queres dicirnos algo podes contactar coa CIG antes desa data.
Este concurso é outro dos que leva tempo dando voltas e voltas. A última información que tiñamos é da Mesa Xeral do 18 de decembro do ano pasado: ata ese momento prometeran que teriamos os borradores entre finais de novembro e primeiros de decembro; o día 18 o que nos respostaron foi que enviarían o borrador esa mesma semana.
- Detalles
Pronunciamento das xuntas de persoal dos servizos centrais e dos servizos periféricos das provincias de Ourense e Pontevedra en contra do peche do paritorio e das urxencias pediátricas no hospital de Verín. Aprobados por unanimidade.
Por unha sanidade pública e de calidade en clave de xénero no rural galego.
Ao longo destes últimos anos foron desaparecendo postos de traballo no Hospital Público de Verín en áreas tan importantes como Medicina Interna, Paliativos, Bloque cirúrxico, Traumatoloxía ou Enfermería, chegando incluso a desaparecer servizos como o de Dermatoloxía, e agora o goberno da Xunta insiste no esmorecemento paulatino deste hospital público pechando o Paridoiro e as Urxencias pediátricas.
- Detalles
E van xa máis de dez dende a última entrega desta roupa de traballo para o persoal do servizo público de defensa contra incendios forestais da Xunta de Galiza.
Daquelas, equipárase ao persoal de campo con chaqueta (chuvasqueiro e forro polar) e pantalón de alta calidade (tanto na impermeabilización como na transpiración das prendas). Estabamos aínda nos tempos do bipartito.
Máis de dez anos despois, a choiva e o frío nas épocas de outono e inverno seguen a ser as mesmas, o único que cambiou é que o persoal do SPIF que entrou nestes últimos dez anos non dispón da roupa, e os que o tiñan sufriron o inexorable paso do tempo.
Lembramos que traballamos nun servizo de por si considerado periférico, e que contamos cun plus de penosidade, ambos os factores, recoñecidos pola propia empresa, demostran que andamos ao aire libre sexa cal sexa a estación do ano, e sexan cales sexan as condicións climatolóxicas.
Como non nos cansaremos de repetir, dende o ano 2015, coa entrada en vigor da nova lei de protección civil, somos (o SPIF) un servizo de emerxencias a todos os efectos. Tamén dende o 2016 o persoal de extinción posúe a categoría profesional 5932 bombeiro/a forestal, sendo o apoio a continxencias no medio natural e rural unha das funcións encomendadas a este colectivo.
Falamos logo de actuacións en nevaradas, inundacións...ou mesmo en temporais como os que estamos pasando estes días. É inconcebíbel que para estas tarefas – por máis que dende a Dirección Xeral de Defensa do Monte- non queiran activar o que a propia lei marca, non se equipe ao persoal, dunha vez por todas cos materiais básicos necesarios para poder desenrolar coa maior profesionalidade as tarefas que por lei se nos encomendan.
Por iso dende a CIG esiximos que dunha vez por todas se equipe ao persoal do SPIF con imprescindíbel roupa de inverno.
- Detalles
Decreto de funcionarización
O Decreto de funcionarización foi publicado no DOG do luns 03/01/2020. O borrador do decreto fora aprobado na Comisión de Persoal do 12 de xullo de 2019 (case seis meses antes), co voto favorable de CCOO e UGT; a CIG votara en contra, principalmente porque deixa demasiadas cousas fora (retribucións, procesos selectivos e concurso de traslados previos como persoal laboral..).
O texto final publicado en DOG contén emendas introducidas pola Asesoría Xurídica da Xunta e do Consello Consultivo, de xeito que entre o texto aprobado en Comisión de Persoal e o publicado en DOG hai diferenzas que, pola súa importancia, deberían ter sido novamente negociadas e o documento votado, algo ao que se negou o director xeral de Función Pública, impoñendo por tanto o texto final sen discutilo cos sindicatos.
- Detalles
Resumo dos avances da denuncia presentada ante a Inspección de Traballo e Seguridade Social co obxetivo de verificar si se cumpre a normativa de Prevención de Riscos Laborais no Servizo de Conservación da Consellería de Medio Ambiente, Territorio e Vivenda.
O pasado 20 de decembro as organizacións sindicais fomos citadas ante a Inspección de Traballo e Seguridade Social nas oficinas da Coruña para tratar os seguintes temas:
- Avaliación de Riscos Laborais para as tarefas de campo na Conservación da Natureza: A Consellería presentou un novo documento no que ainda se esta a traballar para a súa mellora. Este documento foi entregado a todo o persoal que realiza tarefas de campo.
- Protocolo en situación de embarazo o lactación, indicando as traballadoras cal é o procedemento a seguir para comunicar o seu estado coa correspondente obriga da protección da maternidade.
- Entrega de roupa de traballo – EPI: despois de moitos anos loitando pola entrega de roupa de traballo, no orzamento da Xunta para o ano 2020 aparecen 729.690€ máis IVE para a Consellería de Medio Rural e 280.335€ para a de Medio Ambiente, Territorio e Vivenda, e unha memoria económico-financeira para os vindeiros anos ata 2023.
- Radios Tetra: a CIG leva dende que se implantou este sistema de radio manifestando que o boton de emerxencias tal e coma esta diseñado non funciona. Dende a consellería comprometéronse a que sexa operativo en breve.
Dende a CIG seguimos a traballar pola seguridade e benestar de todos os traballadores e traballadoras.
- Detalles
Coa entrada en vigor da Lei do sistema nacional de protección civil o 10 de xaneiro de 2016, o servizo público contra incendios forestais da Xunta de Galiza (SPIF) é a todos os efectos un servizo de emerxencias. Pechábase así o círculo debuxado anos atrás polos “visionarios” asinantes do V Convenio colectivo que insistían na necesidade de recoñecer a categoría profesional de bombeiro/a forestal.
Aínda que o contexto legal nos inclúe (nas vidas laborais do persoal do SPIF xa se recolle esta inclusión dentro do ámbito da protección civil), aínda que sexamos un servizo de contrastada experiencia perfectamente distribuído ao longo da xeografía do País con medios materiais e humanos para actuar e/ou minimizar calquer continxencia no medio natural e rural, aínda así, a Xunta decide non activar nin empregar este servizo cando as circunstancias o esixen.
O SPIF é un servizo público ao que apenas habería que reforzar no que ao material se refire para actuar en vendavais, nevaradas , inundacións.. servindo de apoio aos actuais efectivos, pero sen perder de vista o seu principal acometido que é a prevención e extinción de incendios.
Vítima desta obstinación por non aproveitar ao máximo todo o potencial co que conta o SPIF, e tamén a necesaria e obrigatoria formación que dende a consellería do medio rural se nos nega, perfectamente estruturada e recollida no Real decreto 624/2013 do 2 de agosto, e xa presentada pola CIG en sede parlamentar e aos órganos competentes, ademais de ser avalada polo ditame do comite de expertos. Cuns custes irrisorios, tratándose da Administración pública, a formación podería ser afrontada con medios propios e convertiría ao SPIF nunha ferramenta para o rural de vital importancia.
- Detalles
No DOG do 30/12/2019 publican o Decreto 160/2019 polo que modifican o Decreto 60/2019, que a súa vez modificaba o Decreto 36/2006, que regula o nomeamento de persoal interino para o desempeño con carácter transitorio de prazas reservadas a persoal funcionario e a contratación temporal de persoal laboral da Xunta de Galiza.
Este novo Decreto tan só modifica a data de entrada en vigor dalgúns artigos do decreto anterior:
"Non obstante, na súa nova redacción, o artigo 5.1 entrará en vigor o 1 de xuño de 2020 e os artigos 14 e 16 entrarán en vigor na data que expresamente se determine por orde da persoa titular da consellería competente en materia de función pública, tan pronto quede garantida a viabilidade técnica do sistema de citacións electrónicas, mantendo ata entón a vixencia dos referidos artigos na súa redacción anterior. Esta orde deberá ser obxecto de publicación no Diario Oficial de Galicia".
- Detalles
As bases das convocatorias dos procesos selectivos de promoción interna a corpos xerais correspondentes á OEP-2019, xa pasaron por Mesa Xeral de Negociación o mércores 18. E xa temos data para a Comisión de Persoal, o venres 20, día en que se van aprobar definitivamente. A súa publicación en DOG, segundo as intencións do director xeral de Función Pública, quedaría adiada para xaneiro.
A CIG defendeu:
- Queremos negociación de criterios xerais. Estamos fartos de que anden a bandazos, con cambios importantes entre convocatorias similares negociadas en poucos días de diferencia.
- Reclamamos que acumulen as prazas non cubertas da OEP-2017.
- Así como permiten que ás escalas se promocione dende corpos xerais, tamén reclamamos a inversa, que dende as escalas se poida promocionar a corpos xerais.
- Defendemos a recalificación dos postos, ou polo menos que se busque algunha alternativa que evide ter que moverse de localidade (o que fai que a promoción non sexa atractiva a persoas de certas localidades que teñen poucos postos). E tamén que non se obrigue a permanecer no mesmo destino a quen estea nun posto aberto ao grupo superior.
- Do mesmo xeito que levan facendo uns anos, que conserven o aprobado da anterior convocatoria.
- 3 ou 4 meses é pouco tempo para o primeiro exercicio.
- En A1 substituir o 2º exercicio (tema) por un test/suposto práctico test sobre Anexo II. De manter tema, que a puntuació non sexa 30-30 senon 40-20. Pero como mellor opción, tanto para A1 como A2, que apliquen o mesmo sistema que para as escalas de servizos sociais: un único exame test, dividido en dúas partes.
- En C1 e C2 o tempo para realizar o primeiro exercicio é xusto de máis.
- A proba de galego querémola tamén tipo test.
- Incrementar a puntuación máxima para antigüidade para subir dos 25 anos máximos que terían en conta.
- Reducir a puntuación por cada grao ao equivalente a 6 meses de antigüidade (equivale a 8 meses).
- Traballo desenvolvido: reducir as diferenzas entre niveis. En canto a valoración das comisións de servizo, esperamos que a explicación que nos dán sexa real e finalmente o que puntue sexa o posto definitivo.
- En canto á formación, seguen sen aceptar os cursos de universidades, servizo público de emprego, D.X. de Orientación ou escolas de idiomas. E non aceptan retirar o límite de valorar só ata 150 horas por curso.
- Queremos que o programa sexa todo normas, non temas. E se manteñen temas que a EGAP edite temarios, ou polo menos referencias bibliográficas.
Finalmente, nas novas versións que nos enviaron para a Comisión de Persoal do venres 20, modificaron algunha cousa: tempo para realizar algún exercicio e retoque do programa. Pouco máis.
Nas promocións internas da OEP-2017 que está agora en marcha, din que tentarán acelerar no caso de A2 e C1. Comprométense a que as persoas que aproben o saiban antes de que remate o prazo da nova convocatoria. Din que en xaneiro informarán polo miudo do estado de todos os procesos pendentes.
| Borradores enviadas para a Comisión de Persoal (20/12/2019) | ||
| Corpo | Total prazas | Reserva discapacidade |
| A1-Corpo superior (descargar borrador) | 46 | 5 |
| A2-Corpo de xestión (descargar borrador) | 127 | 8 |
| C1-Corpo administrativo (descargar borrador) | 195 | 14 |
| C2-Corpo auxiliar administrativo (descargar borrador) | 52 | 4 |
- Detalles
O mércores 18 participamos na Mesa Xeral de Negociación de Empregados Públicos. A maiores de falar das convocatorias de promoción interna de corpos xerais (irá noutro resumo), tratamos asuntos variados en rogos e preguntas:
Oposicións subalterno e ordenanza: convocados en marzo, non saíu sequera a lista provisional de admitidos e excluidos. Lembramos ao director xeral de Función Pública (DXFP) que a mediados novembro dixera que levaba un retraso de 3/4 meses. O director non pon data, limítase a afirmar que tentarán telo listo canto antes. Di que van cun sistema antigo (entendemos que informática) o que non permite que vaia tan rápido como o novo.
Corpos xerais en curso A1, A2, C1 e C2 (libre e promoción interna): denunciamos o retraso que leva algún dos procesos, e o estancamento doutros. Hai unha enorme incertidume no persoal. Preguntamos cal é a situación de cada un deles e que medidas van tomar para axilizalos. O DXFP limítase a indicar que dará información polo miudo a comezos de xaneiro.
