- Detalles
O 24 de outubro tiveron lugar as eleccións sindicais aos comités de empresa de persoal laboral da consellería de Política Social, no que desta vez se elixían catro comités que suman 94 delegadas e delegados.
Cun ámbito de máis de 6.000 persoas traballadoras e unha grande participación, o número de votos para a a CIG foi o maior, o que avala o noso traballo de defensa dos dereitos das persoas empregadas públicas e o rexeitamento dos acordos lesivos asinados por outros sindicatos.
A CIG consegue ser a forza maioritaria nos catro comités obtendo un total de 31 dos 94 representantes a elixir entre as 7 forzas sindicais que se presentaban:
A CIG gaña, e con ela gañamos as traballadoras/es desta consellería. Estas eran as primeiras eleccións onde se elixía un órgano de representación único tanto para quen traballa nos centros da consellería como para quen traballa no Consorcio de Servizos de Igualdade e Benestar. Fronte a confrontación entre colectivos de traballadores que outros sindicatos promoveron nesta campaña CIG cree e fomenta a unidade, porque os intereses son iguais, os problemas son comúns e porque somos unha unidade indivisíbel e a única confrontación posíbel é coa nosa empresa e non entre nós.
O voto á CIG avala unha política de reivindicacións e propostas en defensa das traballadoras do consorcio e da consellería. Unha liña de traballo a prol de recuperar dereitosv laborais, de implantar horarios e medidas de conciliación do século XXI, de establecer a xornada de 35 horas, de asegurar a estabilidade laboral, de cobrar uns salarios dignos.
Pero o voto á CIG é tamén un voto contra aqueles que buscaron a desigualdade negando a carreira profesional á metade das compañeiras e tendo que acudir a unha funcionarización forzosa, que negociaron ofertas de emprego ridículas e taxas de reposición, que renunciaron a defender os descansos e o artigo 19 do V Convenio. E tamén un berro forte contra os que apostaron por defender ao patrón fronte aos/as traballadores/as.
Con esta confianza renovada as compañeiras e compañeiros da CIG afrontamos uns anos decisivos onde sabemos que temos o respaldo maioritario das persoas desta consellería para seguir traballando cara a un futuro mellor.
E finalmente, queremos dar as grazas á todas as persoas que confiaron en nós e apoiaron as candidaturas da CIG.
- Detalles
Publicada no DOG Núm. 202 do mércores, 23 de outubro de 2019 resolución da Dirección Xeral da Función Pública, pola que se anuncia a exposición das listaxes provisionais de axudas aprobadas e denegadas dos criterios de repartición do fondo de acción social do exercicio económico 2018, relativos á axuda para a atención de persoas con discapacidade para o persoal da Administración da Xunta de Galicia.
Dado que nas listaxes preceptivas figuran datos de carácter identificativo, de características persoais, económicos ou de saúde protexidos, cuxa publicación pode lesionar o dereito constitucional á intimidade dos/as solicitantes ou dos/as causantes das axudas, cómpre realizar a publicación coas limitacións e reservas establecidas no artigo 46 da Lei 39/2015, do 1 de outubro, do procedemento administrativo común das administracións públicas.
Pódense consultar as listaxes provisionais das axudas aprobadas e denegadas na páxina web da Dirección Xeral da Función Pública http://funcionpublica.xunta.es/?q=FAS.
As persoas interesadas dispoñen de dez días hábiles, que se contarán desde o día seguinte ao da publicación desta resolución no Diario Oficial de Galicia, para reclamar e emendar defectos.
O Fondo de Acción Social foi unha das cousas que o goberno de Feijoo recortou coa Lei 1/2012, do 29 de febreiro, de medidas temporais en determinadas materias do emprego público da Comunidade Autónoma de Galicia. Pasaron os anos, pero os recortes temporais continúan. Desde a CIG continuamos en loita para recuperar todo o arrebatado e incrementar as axudas.
- Detalles
Un ano tras outro algunhas directivas de centros de ensino poñen dos nervos a compañeiras e compañeiros que se ven sometidos a caprichos, chantaxes ou caramelos para que abran o centro e atendan oposicións de docentes, cursos de CEFORE, probas de CELGA, xornadas da consellaría de traballo e xornadas de votacións políticas.
Atopámonos moitas veces estas preguntas de “se teño a obriga de atendelos, porque me dí o dire que o teño que facer por ser no centro onde traballo…”.
Pois non, non tes obriga. Son traballos voluntarios, non poden impoñelos. De feito está regulado o seu cobro en dietas se te ofreces voluntario. E se alguén cho quere impoñer, esixe a orde por escrito. Se se negan a dar a orde por escrito e non hai testemuñas da orde verbal, a orde non existe. Si hai testemuñas, fai constar ti por escrito que recibiches a orde (indica por escrito quen é a testemuña e rexistra o escrito). Todo por se hai que actuar diante do xulgado (primeiramente podemos tentar falar coa Xefatura Territorial).
A consellería ten regulado o cobro por prestar servizos "extraordinarios" salvo nos procesos electorais que debería correr á conta da Xunta Eleitoral; o sentido común xa nos di que estamos a falar de colaboracións voluntarias. Se non hai ninguén do centro que o queira facer, terán que buscar a colaboración en xente de fóra do centro. Ti podes negarte.
Temos visto de todo: bautizos masivos de relixións diversas, coidado do gando do señor director, abrir os domingos para botar un partido, gravacións de películas, cursos dos concellos. Case sempre contarán coa complicidade do director/a que endosará a apertura do centro ao persoal subalterno, e a limpeza ao persoal propio. Unhas veces cobrando, outras non. Eles cómense o marrón; o director ou directora aparecerá cando lle pete, se é que aparece.
- Detalles
A disposición transitoria 10ª da Lei xeral da Seguridade Social establece o acceso á xubilación parcial anticipada para o persoal laboral que reúna os requisitos de idade, anos de cotización e a celebración simultánea dun contrato de remuda. Para este ano, 2019, xa poderían obter o dereito a este sistema de xubilación aqueles traballadores cunha idade de 61 anos e 8 meses e unha carreira de cotización de 34 anos e 9 meses.
Con esta disposición normativa plenamente en vigor, o pasado mes de febreiro a CIG elevou ao director xeral da Función Pública unha proposta para a celebración dun acordo co Comité Intercentros do persoal laboral, que facilitase este tipo de xubilación de acordo co establecido no art. 215.2 e na disposición transitoria 10ª da referida Lei da Seg. Social. Non houbo resposta formal.
Sen embargo, aproveitando a celebración das mesas xerais de negociación, insistimos neste dereito do persoal laboral e o director manifestou reiteradamente que Función Pública non poría atrancos e promovería a celebración dos consecuentes contratos de remuda; máis aínda, dixo que xa tiña suficiente penalización -de cotización- o que pretendese xubilarse parcialmente e que non sería Función Pública a que imposibilitase este dereito.
A CIG, coñecedora da existencia dos primeiros laborais que xa instaron a súa pretensión de xubilarse parcialmente, constatou que estas comunicacións están paralizadas diante da ausencia de instrucións de Función Pública. A pesares do compromiso expreso do seu director, Función Pública nun alarde de cinismo manifesta o seu incumprimento en aras dun acordo que tamén implique ao persoal funcionario.
As competencias lexislativas reguladoras do acceso á xubilación en calquera das súas formas é do Parlamento do Estado Español e as de desenvolvemento executivo, vía regulamentos, tenas o goberno de Madrid. Nin Xunta nin Parlamento Galego teñen estas competencias.
- Detalles
O xoves 24 de outubro van ser as votacións para formar os comités de empresa de política social de Coruña, Lugo, Ourense e Pontevedra.
|
Boletín nacional
|
Coruña: boletín e candidatura.
|
Lugo: boletín e candidatura.
|
|
Ourense: boletín e candidatura
|
Pontevedra: boletín e candidatura
|
- Detalles
O luns 21/10/2019, tivemos unha reunión co director xeral de Orientación e Promoción Laboral para preguntar pola posible contratación de 188 orientadoras/es laborais, tal e como se publica no BOE do día 17 de setembro de 2019.
O director xeral comeza decindo que a información no BOE está mal, xa que o Estado fai as contas por remuneracións básicas e que en Galiza se paga máis, polo que o número de orientadoras/es laborais para os programas que se recollen serán de 141.
O que van a facer é renovar aos 130 orientadoras/es que hai contratados a día de hoxe e contratar a 11 máis.
A distribución destes/as 11 orientadoras/es novas serán: 1 para cada unha das grandes cidades. (A Coruña, Ferrol, Compostela, Lugo, Ourense, Pontevedra e Vigo) e os outros 4 que faltan non saben aínda como o van a facer.
Estas contratacións serán con cargo aos orzamentos 2020 e faránse, previsiblemente, no mes de XANEIRO DE 2020.
Dende a CIG manifestámoslle que non entendemos como están a levar as políticas activas de emprego, xa que cosideramos que a data de hoxe os postos de orientación laboral xa non son de programas, senón que teñen que ser de estructura, máis cando se propón a creación de a escala de orientación laboral.
Que, xa que estes fondos son finalistas, deben ser destinados a contratar todo o persoal posible e as prazas que xa existen pasar a ser prazas de estructura e incluílas en RPT.
O director xeral dí que esta decisión é cuestión de Función Pública, ao que lle contestamos que a consellería ten que ser a máis interesada e presionar para que se faga así.
Remata dicindo que pasará as nosas demandas á Secretaría Xeral e ao Conselleiro.
- Detalles
Instalación dos parasois
Como punto central deste Comité tratouse o da instalación de parasois na fachada sur do edificio administrativo de Pontevedra.
Hai dous temas sobre os que nos informa o presidente:
- No mes de setembro, finalizouse a colocación dos parasois na torre central do edificio.
- Parte pendente de executar:
Quedan os laterais. Motivo: a primeira licitación quedou deserta e na segunda, debido a que non se podía dilatar moito no tempo xa que a licitación era cos fondos FEDER, ofertouse a 1ª fase (a torre central que ao levar andamios mais altos era a mais complexa de executar e a máis custosa).
Nunha 2ª fase vaise licitar o pendente mediante contratos de obra menor, polo que os prazos redúcense. - Problemas que se detectan:
As persianas teñen dous sensores, un lumínico e outro de vento.
Luminosidade. Hai moitas queixas xa que como non se entende moi ben como funcionan os sensores, e ao estar en fase de probas, ás veces as persianas entran en funcionamento aínda que o día esté anubrado.
O xefe de servizo de mantemento informa de que existen dous sensores lumínicos programados para baixar en determinadas sensibilidades, un ata a terceira planta e outro ata a novena.
Todas as plantas teñen sensores de luminosidade das luces do teito, que en función da escuridade encenden con mais intensidade ou con menos.
Aínda que hai queixas a nivel persoal, son necesarios datos obxectivos de luminosidade, polo que a proposta da CIG, despois de oir ao persoal do servizo de prevención, vanse facer 2 medicións diarias durante un período de tempo coas que poder comprobar si a luminosidade chega a 500 luxes.
Información sobre as pingueiras no Arquivo xeral
A raíz dunha limpeza xeral con auga a presión descubriuse que nun punto onde estaba “resolto” o das pingueiras, entrou auga.
O servizo de mantemento contactou coa empresa construtora do edificio que fixo unha proposta de gasto para facer a reparación. Estamos á espera de que desde Santiago aproben o orzamento.
A raíz desta situación, considerouse pola Xefatura paralizar o acordado no comité anterior de colocar bandexas que recolleran a auga.
Tanto a CIG como CCOO presentamos queixa pola non colocación das bandexas, dado que o acordo era de abril e xa tiveran tempo de telas colocadas antes de agosto, que foi cando descubriron a pingueira.
Implantación do Plan de Acción
O plan de acción trasladouse á Xefatura Territorial e os técnicos informárono desfavorablemente.
Fixeron alegacións ao mesmo diante do servizo de prevención (en Santiago) e están sendo valoradas.
Aínda non hai plan de acción aprobado definitivamente, polo que os prazos de execución aínda non corren.
Dende a CIG preguntamos que técnicos informaron desfavorablemente (non tivemos resposta) e presentamos queixa porque en todo caso podería ser aprobado parcialmente dado que según indicou o presidente no que é de obrigado cumprimento por normativa, están conforme.
Rolda de intervencións
A representante de sanidade pide mellorar a climatización.
A CIG pregunta por:
Comedor: A xefatura considera idónea a ubicación. Hai auga para beber no rexistro e posibilidade de lavar os utensilios que se traian co xantar nos baños.
A CIG propuxo que a Xefatura Territorial baixe durante unha semana a xantar na cafetería, pasando por diante dos administrados co tupper para lavar .
Limpeza: trasladarán a queixa.
- Detalles
A CIG solicita ao conselleiro do Medio Rural e á Dirección Xeral de Defensa do Monte que implante os módulos formativos correspondentes á cualificación profesional SEA596_3 “Coordinador de operacións en incendios forestais e apoio a continxencias no medio natural” e rural. Estes módulos formativos van dirixidos aos bombeiros/as forestais xefes/as de brigada, axentes forestais e persoal técnico, así coma a todo o persoal do SPIF que xa obtivera o certificado do nivel 2 do SEA 595_2.
Asemade, solicitamos que se retome o proceso negociador do Plan de Formación Plurianual coa Dirección Xeral de Defensa do Monte, que leva parado dende o 15 de marzo de 2019, e sobre o que xa manifestamos en numerosas ocasións que a vía a seguir é a formación correspondente á cualificación profesional SEA595_2 coma formación básica para o persoal do SPIF.
Dende a CIG loitamos e facemos unha aposta clara porque o persoal do SPIF reciba a formación axeitada ao seu encadramento normativo coma servizo de emerxencias no medio natural e rural. Porén, a Xunta segue sen dar a formación demandada aos traballadores e traballadoras que loitan por estar certificados profesionalmente nas súas competencias.
Así os compañeiros e compañeiras da CIG estamos permanentemente facendo iniciativas para obter a mellor formación posíbel e por iso fixemos tamén, hai uns días, unha solicitude dirixida á Academia Galega de Seguridade Pública para que, como organismo competente para a formación dos traballadores do SPIF, convocara os módulos formativos correspondentes ás cualificacións profesionais SEA595_2 e SEA596_3 (da rama profesional de Seguridade e Medio Ambiente).
Dende a CIG seguimos traballando pola formación de calidade como piar básico para lograr que o SPIF sexa un servizo público profesional, versátil, eficaz, estable e seguro.
- Detalles
Á Mesa Xeral celebrada o mércores 16 de outubro levouse a creación de varias escalas de persoal funcionario para o proceso de funcionarización de categorías de persoal laboral. O director xeral de Función Pública comenta que con esta modificación proposta da Lei de emprego público de Galiza (LEPG) está case listo o asunto da creación de escalas para a funcionarización.
Dende a CIG facemos constar o noso malestar pola burla que supón traer esta materia despois de negociala previamente na comisión de seguimento do Acordo de mellora. Tal e como se pode apreciar nos resumos das xuntanzas desa comisión de “seguimento” que fan públicos as organizacións asinantes, nese foro se negociou a modificación da LEPG para crear escalas, a RPT do Consorcio, e materias que son alleas ao acordo. Sobardar as materias do acordo e negociar asuntos propios da mesa xeral é ir contra a boa fe negocial e nos reservamos acudir á vía xudicial para garantir os nosos dereitos como sindicato maioritario.
- Detalles
Achegounos Función Pública os borradores de sete convocatorias de procesos selectivos. Temos ata o día 23 para presentar alegacións.
Tres novas convocatorias:
- Fisioterapia. Descargar.
- Psicólogo/a. Descargar.
- Médico/a. Descargar. (ollo, podería ter un erro no número de prazas)
Segundo borrador unha vez vistas as alegacións dos sindicatos. Contén cambios substanciais, algunha positiva, outras inaceptábeis.
- Educador/a. Descargar.
- Enfermeiro/a. Descargar.
- Terapeuta ocupacional. Descargar.
- Traballo social. Descargar.
Diriximos escrito a Función Pública para saber se teñen pensado xuntarse cos sindicatos (polo menos coa CIG, que con outros seguro que xa o despacharon) ou se pensan liquidar o asunto cumplindo o formalismo da Mesa Xeral. Segundo como fagan, e segundo algun aspecto negativo que está nas bases, esto pode rematar no xulgado.
Se queres podes contactar coa CIG.
